Dzo kpo yi emenuwo dzi

Dzo kpo yi emenuawo dzi

Gbeƒãɖeɖe le Saba ƒe Togbɛwo Dzi

Gbeƒãɖeɖe le Saba ƒe Togbɛwo Dzi

 Gbeƒãɖeɖe le Saba ƒe Togbɛwo Dzi

NETHERLANDTƆWO ƒe ƒukpo si nye Saba nye afisi adzoblasuwo nɔna hafi va daa adzo le Carib-ƒua dzi tsã. Egbea, ƒukpo sue sia si didi tso Puerto Rico ƒe ɣedzeƒekpa dzi kilometa 240 la nye afisi ame 1,600 siwo dometɔ 5 nye Yehowa Ðasefowo le. Gake subɔla dovevienu siawo le nusi xɔ asi boo wu adzo nuwo la dim. Wole amesiwo ‘dze na agbe mavɔ kpɔkpɔ’ dim vevie.—Dɔwɔwɔwo 13:48.

Mawufiaɖuƒe ŋuti nyanyuia ɖo ƒukpoa dzi zi gbãtɔ le June 22, 1952 dzi, esime Yehowa Ðasefo ƒe meli aɖe si didi meta 18 si woyɔna be Sibia, la va dze ɖe Saba ƒuta. (Mateo 24:14) Dutanyanyuigblɔla Gust Maki kple Stanley Carter lia to zɔ mɔ gɔdɔ̃gɔdɔ̃e aɖe si woyɔna be The Ladder si dzi kpe siwo wu 500 le, siwo dzi woɖoa afɔe hafi yia Saba ƒe fiadu The Bottom me. * Mɔ lɛ ma dzi koe wotona ɖoa ƒukpoa dzi nɔlawo gbɔ tsã hena ƒe alafa geɖe.

Akɔntabubu gbãtɔ si wona ku ɖe Kristotɔwo ƒe ɖaseɖiɖidɔa ŋu le Saba dze le 1966 Yearbook of Jehovah’s Witnesses (Annuaire des Témoins de Jéhovah) me. Le nyatakaka ma nu la, Ðasefo ɖeka koe nɔ ƒukpoa dzi. Gake emegbe ƒome aɖe si tso Canada zã ƒe geɖe tsɔ ɖe gbeƒã nyanyuiae le afima. Nyitsɔ laa la, Russel kple Kathy, srɔ̃tɔ tsitsi aɖe siwo tso United States la yi Saba va ɖe gbeƒã le afima. Mina míase nya si wogblɔ tso woƒe afima yiyi ŋuti.

 Saba Yiyi

Mía kple srɔ̃nye míeɖo yameʋu va dze Ronald, si nye Ðasefo ɖeka kolia si nɔ ƒukpoa dzi tso ƒe 1990-awo me la gbɔ. Ronald va kpe mí le yameʋudzeƒea. Dzi dzɔe ɖe detsiƒonu siwo le aɖaka sue aɖe me si míetsɔ nɛ ŋu, elabena ame aɖeke medea agble dzrana eme nuwo le ƒukpoa dzi o. Míezɔ blewu to mɔ gɔdɔ̃gɔdɔ̃e aɖe si le Scenery-to si nye dzoto tsã ŋu va ɖo etame.

Míetɔ ɖe Hell’s Gate kɔƒea me, esime Ronald yi vae kpɔ ʋuƒo aɖe si le ablɔ me dzi ɖa be Kwasiɖagbe ƒe nuƒoa ƒe amekpegbalẽvia gale edzi hã. Dzi dzɔ mí be enɔ edzi. Etrɔ va ʋua me eye míeyi toa lialia dzi va ɖo Windwardside, ƒukpoa ƒe kɔƒe gãtɔ, me. Abe alesi ŋkɔa fia le Eŋlisigbe ene la, kɔƒe dzeani sia le ƒukpoa ƒe akpa si ya ƒona le wu, le to si kɔkɔ meta 400 dzi. Esi míeku ʋu yina Ron ƒe aƒeme la, míekpɔ ʋuƒo nyui aɖe si dzi woŋlɔ ɖo be Yehowa Ðasefowo ƒe Fiaɖuƒe Akpata le eƒe aƒea ƒe xɔxɔnu.

Le ŋdɔnuɖuɣi la, mebia nya ku ɖe nusi míese si ta míeyi afima ɖo ŋu, be: “Aleke nèwɔ va zu Fiaɖuƒegbeƒãɖela le Saba?”

Ron gblɔ be: “Esi wowu Yehowa Ðasefowo ƒe alɔdzedɔwɔƒe tutu nu le Puerto Rico le ƒe 1993 me la, mía kple srɔ̃nye míedi be míakpɔtɔ ayi dɔwɔwɔ dzi le duta. Do ŋgɔ la, mía kple mɔɖela atsu kple asi aɖe míeyi Saba eye míekpɔe be Ðasefo aɖeke mele ame 1,400 siwo le afima la dome o. Eyata míegblɔ míaƒe ʋuʋu va afisia ŋu nya na Puerto Rico Alɔdzekɔmitia.

“Nuwo zɔ nyuie, eye mlɔeba la, wolɔ̃ ɖe edzi be míaʋu ava afisia. Nublanuitɔe le ƒe eve megbe la, srɔ̃nye dze dɔ vevie eye míetrɔ yi California. Metrɔ va Saba le srɔ̃nye ƒe ku megbe. Èkpɔea, nyemedi be madze nane gɔme evɔ wòatsi akpo dzi o.”

Tso Aƒeme Yi Aƒeme Dɔa Wɔwɔ le Saba

Ron ƒe xɔ si me wòle si tsi ƒe alafa ɖeka la kee ganye Fiaɖuƒe Akpataa. * Esi míeɖu ŋdinu henɔ dzadzram ɖo na gbeadzi yiyi la, tsi dza heƒo ya va dzodoƒea. Togbɔ be xexeame mekɔ tututu o hã la, esi míeɖu ŋdinua vɔ la míedze ʋɔtru nu yi ʋɔtru nu dɔa wɔwɔ gɔme le The Bottom dua me. Le aƒe sia aƒe me la, Ron yɔa aƒeatɔ ŋkɔ doa gbe nɛ. Míeƒoa nu tso nane si dzɔ le nutoa me eteƒe medidi o ŋu. Ame akpa gãtɔ nya nu tso Ron kple eƒe subɔsubɔdɔa ŋu, eyata ame geɖe xɔ Biblia-srɔ̃gbalẽwo bɔbɔe.

Ne mènya kɔƒea me tɔwo nyuie o la, asesẽ na wò be nàwɔ nuŋlɔɖi tso amesiwo tsɔ ɖe le Fiaɖuƒegbedasia me ŋu. Nukatae? Ron gblɔ be: “Elabena dua me se bia be woasi aŋɔ ɖeka tɔgbe na xɔawo katã.” Mekpɔ be nyateƒee, elabena esi melé ŋku ɖe xɔ siwo katã le Saba ŋu la, mekpɔ be wole ɣie eye wogba wo kple xɔgbanu dzẽ.

Ne míewu Biblia me dzeɖoɖo nu kple aƒemenɔla aɖe la, míekpenɛ be wòadze agbagba ava se dutoƒonuƒo si wotu ɖe Biblia dzi si woaƒo le Fiaɖuƒe Akpataa me le Kwasiɖagbe la. Ne Ron mezɔ mɔ o la, eƒoa dutoƒonuƒo kwasiɖa sia kwasiɖa le ƒukpoa dzi. Wole Biblia-nusɔsrɔ̃ 17 wɔm le Saba fifia. Ame 20 ye va Kristo ƒe ku ƒe Ŋkuɖodzia le ƒe 2004 me. Togbɔ be adze abe ɖe ame xexlẽme ma mesɔ gbɔ o ene hã la, efia be le ƒukpoa dzi nɔla alafa ɖesiaɖe me la, ame ɖeka va!

Le nyateƒe me la, Yehowa Ðasefowo kua kutri ɖesiaɖe be yewoatsɔ Mawu ƒe xɔxɔgbedasia ayi na ame geɖe alesinu yewoate ŋui. Eɖanye le ƒukpo sue abe Saba ene dzi alo le anyigbagã aɖe dzi o, Yehowa Ðasefowo wɔa sedede si nye be ‘woawɔ dukɔwo katã me nɔlawo woanye nusrɔ̃lawo’ la dzi nuteƒewɔwɔtɔe.—Mateo 28:19.

Eve mí vie ya, gake ɖeko wòle be míaƒe sasrãkpɔa nava nuwuwu. Esi míele yameʋua me ɖom la, míegblɔ na Ron be wòanɔ anyi sesĩe. Míaɖo ŋku míaƒe Saba yiyi kple ɣeyiɣi si míezã tsɔ lia to yi The Bottom du la me dzi ɖaa!

[Etenuŋɔŋlɔwo]

^ mm. 3 Edze abe ƒudzidzodalawoe yɔe be The Bottom (Agunu) ene elabena wosusui be ele dzoto aɖe ƒe agunu.

^ mm. 12 Le September 28, 2003 dzi la, lɔlɔ̃nu faa dɔwɔlawo tso Florida, U.S.A., yi Saba va dzra xɔ aɖe si te ɖe afima ŋu ɖo wòzu Fiaɖuƒe Akpata fifia.

[Anyigbatata siwo le axa 10]

(Edze nyuie le agbalẽa ŋutɔ me)

PUERTO RICO

[Nɔnɔmetata Tsoƒe si le axa 10]

Foto: www.sabatourism.com