Dzo kpo yi emenuwo dzi

Dzo kpo yi emenuawo dzi

Ðe Nètsɔa Ðokuiwò Sɔna Kple Ame Bubuwoa?

Ðe Nètsɔa Ðokuiwò Sɔna Kple Ame Bubuwoa?

 Ðe Nètsɔa Ðokuiwò Sɔna Kple Ame Bubuwoa?

MÍA dometɔ kae medo go ame aɖe si dze ɖeka alo dze tugbe wu mí, amesi dze abe exɔ ŋkɔ wu mí, amesi ƒe susu ɖea abla wu mía tɔ, alo xɔa dzeside wu mí le suku kpɔ o? Ðewohĩ ame bubuwo le lãmesẽ me alo wokpɔ dɔwɔɖui si nyo wu mía tɔ, wokpɔ dzidzedze wu, alo wòdze abe xɔlɔ̃ geɖe wu le wo si ene. Ðewohĩ nunɔamesi geɖe wu le wo si, ga geɖe wu, ʋu yeye, alo ewɔ abe wokpɔa dzidzɔ wu mí ene. Ðe míetsɔa mía ɖokui sɔna kple ame bubuwo ne míede dzesi nusiawoa? Ðe míate ŋu aƒo asa na mía ɖokuitsɔtsɔ sɔ kple ame bubuwo gbeɖe oa? Nukatae Kristotɔ adi be yeaƒo asa na nuwɔna sia? Eye aleke míawɔ akpɔ ŋudzedze ɖe míaƒe nɔnɔme ŋu evɔ míatsɔ mía ɖokui anɔ sɔsɔm kple ame aɖeke o?

Nusita Kple Ɣeyiɣi si me Míate Ŋu Atsɔ Mía Ðokui Asɔ Kple Ame Bubuwo

Susu ɖeka si ta amewo tsɔa wo ɖokui sɔna kple ame bubuwoe nye be akpe ɖe yewo ŋu yewoakpɔ asixɔxɔ si le yewo ɖokui ŋu ta alo be yewoana wòagadze awu. Edoa dzidzɔ na amewo zi geɖe be woakpɔe be yewokpɔ dzidzedze abe yewo hatiwo ke ene. Nukpɔsusu bubue nye be, ɖokuitsɔtsɔ sɔ kple ame bubuwo nye agbagbadzedze be míaɖe makamaka ɖe mía ɖokui dzi akpɔtɔ, be míakpɔ nusiwo míate ŋu awɔ kple afisi míaƒe ŋutetewo se ɖo adze sii. Míeléa ŋku ɖe nusi ame bubuwo te ŋu wɔ ŋu. Ne woƒe nɔnɔmewo sɔ kple mía tɔ le mɔ geɖe nu eye woɖo taɖodzinu aɖewo gbɔ la, ɖewohĩ míase le mía ɖokui me be míawo hã míate ŋu aɖo taɖodzinu mawo tɔgbe ke gbɔ.

Zi geɖe la, amesiwo sɔ le nu ɖeka mee tsɔa wo ɖokui sɔna kple wo nɔewo—amesiwo to vidzinu ɖeka, siwo xɔ ƒe ɖeka, hele hadome ɖoƒe ɖeka eye wonya wo nɔewo. Ne edze ƒã be vovototo gã aɖe le mía kple ame aɖe dome la, madzro mí be míatsɔ mía ɖokui asɔ kplii o. Ne míagblɔe bubui la, ɖetugbui sukuvi matsɔ eɖokui asɔ kple amesi doa atsyɔ̃ɖonuwo be yeatsɔ afia nusiwo le tsia dzi la o, ke boŋ eƒe sukuhatiwoe wòatsɔ eɖokui asɔ kple. Nenema kee amesi doa atsyɔ̃ɖonuwo be yeatsɔ afia nusiwo le tsia dzi hã matsɔ eɖokui asɔ kple ɖetugbi sukuvi o.

Go kawo mee míate ŋu atsɔ mía ɖokui asɔ kple ame bubuwo le? Le nunɔamesi alo ɖoƒe si wobuna le nuto aɖe me be enye nusi ŋu asixɔxɔ le gomee—ate ŋu anye nunya, ɖekadzedze alo tugbedzedze, kesinɔnu, alo nudodo. Gake míetsɔa mía ɖokui sɔna kple amewo le nusiwo koŋ dzɔa dzi na mí gome. Le kpɔɖeŋu me, ne  bɔlƒoƒo medoa dzidzɔ na mí o la, ɖewohĩ míabiã ŋu mía xɔlɔ̃ aɖe si bi ɖe eƒoƒo me o.

Ðokui tsɔtsɔ sɔ kple ame bubuwo wɔnɛ be míeɖea nɔnɔme vovovowo fiana; ate ŋu anye dzidzeme alo blanuiléle, ŋudzedzekpɔkpɔ kple didi be míasɔ kple ame alo awɔ wui alo susumefuɖename kple fuléle. Seselelãme siawo dometɔ aɖewo gblẽa nu, eye womenye nɔnɔme siwo wòle be Kristotɔ naɖe afia o.

Hoʋiʋli Kple Amesi Wotsɔ Ame Ðokui Sɔ Kplii

Amesiwo dina vevie be yewoanye “dziɖulawo” le wo ɖokui tsɔtsɔ sɔ kple ame bubuwo me la ɖea hoʋiʋli ƒe gbɔgbɔ fiana. Wodina be yewoanyo wu ame bubuwo, eye nɔnɔme si me wole medzea wo ŋu o vaseɖe esime wose le wo ɖokui me be yewoɖo taɖodzinu ma gbɔ hafi. Amesiawo ƒomevi dome nɔnɔ mevivina o. Woƒe nuwɔna wɔnɛ be xɔlɔ̃dzedze dome gblẽna eye kadodowo megavivina o. Menye ɖekoe amesiawo mebɔbɔa wo ɖokui o, ke woŋea aɖaba ƒua Biblia ƒe aɖaŋuɖoɖo be woalɔ̃ wo haviwo hã dzi zi geɖe, elabena woƒe nuwɔna wɔnɛ be ame bubuwo sena le wo ɖokui me be yewomele ɖeke me o eye be woda yewo ɖe anyi.—Mateo 18:1-5; Yohanes 13:34, 35.

Nana be amewo nase le wo ɖokui me be “woɖu yewo dzi” dea abi wo ŋu le mɔ aɖe nu. Agbalẽŋlɔla aɖe gblɔ be: “Míaƒe kpododonuwo gavea mí wu ne edze abe nusiwo dim míele lae va su amesiwo mía kple wo míele nɔnɔme ɖeka me la si ene.” Eyata hoʋiʋli ƒe gbɔgbɔ hea ŋuʋaʋã, dzikudodo kple dzidzɔmakpɔmakpɔ ɖe ame ŋu le eƒe nunɔamesiwo, nudzedziname, ɖoƒe, ŋkɔxɔxɔ, viɖekpɔkpɔ, kple bubuawo ta vɛ. Esia gahea hoʋiʋli geɖe wu vɛ eye wòyia edzi atraɖii. Biblia gblɔ be menyo be ‘míado hoʋiʋli ɖe ŋgɔ’ o.—Galatiatɔwo 5:26.

Ŋuʋãla toa gbɔɖiɖi amesi ƒe dzidzedzekpɔkpɔwo wòle ŋu ʋãmee dzi dzea agbagba be asixɔxɔ si wòsusu be ebu le ye ŋu la nagasu ye si. Nuwɔna siawo ate ŋu adze nu tsɛwo, gake ne womede dzesi wo eye wolé wo nu kaba o la, woate ŋu akplɔ ame yi vɔ̃ wɔwɔ ɖe ame ŋu vevie gbɔ. De ŋugble tso Biblia me nudzɔdzɔ eve siwo ŋuʋãʋa he vɛ la ŋu kpɔ.

Esime Isak nɔ Filistitɔwo dome la, woyrae kple “alẽhawo kple nyihawo hekpe ɖe kluvi geɖewo ŋuti, ale bena Filistitɔwo ʋã ŋui.” Nusi wowɔe nye be woxe vudo siwo Isak fofo Abraham ɖe la, eye woƒe fia bia tso Isak si be wòadzo le nutoa me. (Mose I, 26:1-3, 12-16) Woƒe ŋuʋãʋa nye esi woɖo koŋ be yewoatsɔ asẽ ŋuta le eŋu be wòagblẽ nu le eŋu. Womagate ŋu ayi edzi ado dzi akpɔe dzi nanɔ Isak dzɔm le nudzedziname ta o.

Ƒe alafa aɖewo megbe la, David wɔ kalẽ etɔxɛ le aʋagbedzi. Eyata nyɔnuwo kpɔ dzidzɔ le eƒe kalẽwɔwɔa ŋuti eye wodzi ha be: “Saul wu akpe, David wu akpe nane!” Togbɔ be Saul hã xɔ kafukafu aɖe hã la, ebui be ye tsɔtsɔ sɔ kple Dawid nye gbɔɖiɖi ye, eye esia na ŋuʋaʋã ge ɖe eƒe dzi me. Eyata tso ema dzi yina la, enɔ vɔ̃e dim na David. Eteƒe medidi o, etee kpɔ zi gbãtɔ be yeawu David, eye ewɔ esia zi geɖe. Vɔ̃ɖivɔ̃ɖi ka gbegbee nye esi ate ŋu ado tso ŋuʋaʋã me!—Samuel I, 18:6-11.

Eyata ne míetsɔ mía ɖokui le sɔsɔm kple ame bubuwo—woƒe nuwɔna ɖedzesiwo alo woƒe viɖekpɔkpɔwo—eye wònyɔ seselelãme siwo sɔ kple ŋuʋaʋã alo hoʋiʋli ɖe mía me la, mina míakpɔ nyuie! Seselelãme manyomanyoe esiawo nye, eye womewɔ ɖeka kple Mawu ƒe susu o. Gake hafi míadzro alesi míawɔ atsi tre ɖe nɔnɔme siawo ŋui me la, mina míadzro nu bubu aɖe si hã nana ame tsɔa eɖokui sɔna kple ame bubuwo me.

Ðokuimedzodzro Kple Ŋudzedzekpɔkpɔ Ðe Nusi Le Ame Si Ŋu

‘Ðe nye tagbɔ kɔa, nye nu léa dzi na amea, ɖe mebi ɖe nuwɔwɔ mea, nye dzedzeme nyoa, medze bubua, ɖe wolɔ̃a nye nyaa? Ne nya siawo ƒe ŋuɖoɖo nye ẽ ɖe, ke vaseɖe afikae?’ Ƒã hafi míetɔna ɖe ahuhɔ̃e ŋgɔ biaa nya siawo tɔgbe mía ɖokui. Ke hã agbalẽŋlɔla aɖe gblɔ be, “godoo la, nyabiase siawo vaa susu me na mí eye  wohea ŋuɖoɖo siwo ŋu míekpɔa ŋudzedze ɖo alo esiwo medze mía ŋu o vɛ.” Ame aɖe si menya ŋutete si le esi o la ate ŋu abu nya siawo ŋu hoʋiʋli alo ŋuʋaʋã ƒe didi aɖeke manɔmee. Ðeko wòle eɖokui me dzrom kpɔ. Eyata naneke megblẽ le ame ɖokui me dzodzro ŋu o. Ke hã, menye mía ɖokui tsɔtsɔ sɔ kple ame bubuwoe nye mɔ nyuitɔ si dzi míato awɔ esia o.

Ŋutete vovovowo le mía si, siwo tso nɔnɔme vovovowo gbɔ. Adze na mí godoo be ame aɖewo wɔa nu wònyoa wu alesi míawo ya míewɔnɛ. Eyata, le esi teƒe be míatsɔ ŋuʋaʋã ƒe susu anɔ wo kpɔmee la, ele be míatsɔ míaƒe ŋutetewo asɔ kple Mawu ƒe dzidzenu dzɔdzɔe siwo naa mɔfiame si ŋu kakaɖedzi le, le nusi nye nyui kple vɔ̃ ŋu boŋ. Nusi mía dometɔ ɖesiaɖe wɔna mee Yehowa tsɔ ɖe le. Mehiã be wòatsɔ mí asɔ kple ame aɖeke o. Apostolo Paulo ɖo aɖaŋu na mí be: “Amesiame nado ye ŋutɔ ƒe dɔwɔwɔ akpɔ, ekema akpɔ nu aƒo adegbe le ye ŋutɔ ɖokui ɖeɖeko me, eye menye le ame bubu me o.”—Galatiatɔwo 6:4.

Tsitre Tsitsi Ðe Ŋuʋaʋã Ŋu

Esi mí amegbetɔwo katã míenye ame madeblibowo ta la, ahiã be míayi edzi anɔ agbagba dzem vevie hafi míate ŋu atsi tre ɖe ŋuʋaʋã ŋu. Míanya nyae be Ŋɔŋlɔawo gblɔ na mí be: “Mitre mia nɔewo bubu” ya, gake wɔwɔ ɖe nya sia dzi nye nu bubu kura. Paulo ŋutɔ lɔ̃ ɖe edzi be nuvɔ̃wɔwɔ dzroa ye. Eyata, be wòawɔ aʋa kplii la, ele nɛ be ‘wòaƒo eƒe ŋutilã wòado ʋusrã, eye wòawɔe kluvii.’ (Romatɔwo 12:10; Korintotɔwo I, 9:27) Le míawo gome la, ɖewohĩ afia be míatsi tre ɖe hoʋiʋli ƒe susuwo ŋu, eye míatsɔ susu nyuiwo aɖo wo teƒe. Ehiã be míado gbe ɖa anɔ Yehowa biam be wòakpe ɖe mía ŋu be ‘míagabu mía ɖokui ŋu wu alesi dze o.’—Romatɔwo 12:3.

Biblia sɔsrɔ̃ kple ŋugbledede hã kpena ɖe ame ŋu. Le kpɔɖeŋu me, bu Mawu ƒe etsɔme Paradiso ŋugbedodowo ŋu kpɔ. Ɣemaɣi la, amesiame anɔ ŋutifafa kple lãmesẽ nyui me, nuɖuɖu abɔ, aƒe siwo me dzidzeme le anɔ amesiame si, eye woawɔ dɔ siwo naa ame ƒe dzi dzea eme. (Psalmo 46:9, 10; 72:7, 8, 16; Yesaya 65:21-23) Ðe ame aɖe agase le eɖokui me be yeaʋli ho kple ye nɔvia? Kura o. Susu aɖeke manɔ anyi si ta ame aɖe agawɔ nenema o. Le nyateƒe me la, Yehowa megblɔ alesi agbenɔnɔ anɔ ɣemaɣi la ŋuti numeɖeɖe tsitotsito ya o, gake, asɔ be míasusui be amesiame ate ŋu awɔ nusiwo wòlɔ̃na kple aɖaŋudɔ siwo dzɔa dzi nɛ la. Ame aɖe ate ŋu asrɔ̃ ɣletiviŋutinunya, eye ame bubu awɔ nutovɛ dzeaniwo. Nukata ame aɖe aʋã ŋu nɔvia? Mía nɔviwo ƒe dɔwɔnawo ade dzo mía me boŋ ye, ke menye be woado dziku na mí o. Seselelãme mawo ava zu gbaɖegbe nyawo.

Ne agbe ma dim míele la, ke ɖe mele be míaku kutri atu nɔnɔme ma tɔgbe ɖo fifia oa? Míele dzidzɔ kpɔm le gbɔgbɔmeparadiso aɖe me xoxo, eye míevo tso xexe si me míele la ƒe kuxi gbogbo aɖewo me. Esi wònye be hoʋiʋli ƒe gbɔgbɔ aɖeke manɔ Mawu ƒe xexe yeyea me o ta la, susu le eme be míatsrii fifia.

Ekema ɖe wònye nu gbegblẽ be míatsɔ mía ɖokui asɔ kple ame bubuwoa? Alo ɖe ɣeyiɣi aɖewo li siwo me wòasɔ le be míawɔea?

Ðokui Tsɔtsɔ sɔ Kple Ame Bubuwo Siwo Sɔ

Ðokui tsɔtsɔ sɔ kple ame bubuwo hea vevesese alo nuteɖeamedzi vɛ zi geɖe, gake mele be wòanɔ nenema kokoko o. De dzesi aɖaŋu si apostolo Paulo ɖo le nya sia ŋu: “Mizu amesiwo toa xɔse kple dzigbɔgbɔ blewu me nyia ŋugbedodowo ƒe dome la, srɔ̃lawo.” (Hebritɔwo 6: 12) Kutri kuku be míasrɔ̃ Yehowa subɔla nuteƒewɔla siwo nɔ anyi le blema ƒe nɔnɔme nyuiwo ate ŋu aɖe vi na mí. Le nyateƒe me la, esia abia be míatsɔ mía ɖokui asɔ kple ame aɖewo. Gake ate ŋu akpe ɖe mía ŋu be míakpɔ kpɔɖeŋu siwo míasrɔ̃ kple teƒe siwo míawɔ ŋgɔyiyi le.

De ŋugble le Yonatan ŋu kpɔ. Le susu aɖewo nu la, etɔ adzɔ be wòaʋã ŋu hafi. Abe Israel-fia Saul ƒe vi tsitsitɔ ene la, Yonatan anya susui kpɔ be yeava zu fia, gake Yehowa tia ɖekakpui David, amesi wòtsi wu ƒe 30 sɔŋ. Le esi teƒe be Yonatan nalé fui la, eɖe ɖokuitɔmadimadi ƒe xɔlɔ̃wɔwɔ fia eye wòna kpekpeɖeŋu David abe fia si Yehowa tia ene. Gbɔgbɔmemee Yonatan nye vavã. (Samuel I, 19:1-4) To vovo na fofoa, amesi kpɔ David abe futɔ ene la, Yonatan ya kpɔ Yehowa ƒe asi le nyaa me eye wòbɔbɔ eɖokui ɖe Eƒe lɔlɔ̃nu te; metsɔ eɖokui sɔ kple David, hebia be, “Nukata wòanye David ke menye nye o” hã o.

Le mía hati Kristotɔwo dome la, mele be wòaɖe fu na mí gbeɖe be ame bubuwo le agbagba dzem be yewoawɔ wu mí alo be yewoaxɔ míaƒe ɖoƒe o. Mesɔ be míaʋli ho o. Nusi dea dzesi Kristotɔ tsitsiwoe nye nuwɔwɔ aduadu, ɖekawɔwɔ, kple lɔlɔ̃, ke menye hoʋiʋli o. Hadomegbenɔnɔŋutinunyala Francesco Alberoni gblɔ be lɔlɔ̃ ɖea hoʋiʋli ɖa. Eyi edzi gblɔ be: “Ne míelɔ̃ ame aɖe la, míedia eƒe nyui, eye míekpɔa dzidzɔ ne nu dze edzi nɛ eye wòle dzidzɔ kpɔm.” Eyata, ne wotia ame bubu aɖe le Kristo-hamea me nae mɔnukpɔkpɔ aɖe la, nusi me lɔlɔ̃ le si míawɔ enye be míakpɔ ŋudzedze ɖe eŋu. Nenemae Yonatan wɔ. Ne míekpe asi ɖe amesiwo le subɔsubɔm nuteƒewɔwɔtɔe le agbanɔamedzinɔƒewo le Yehowa ƒe habɔbɔa me ŋu la, woayra mí abe Yonatan ene.

Míate ŋu akpɔ ŋudzedze ɖe kpɔɖeŋu nyui si hati Kristotɔwo ɖo la ŋu. Mía ɖokui tsɔtsɔ sɔ kple wo le nɔnɔme si sɔ me ate ŋu aʋã mí be míasrɔ̃ woƒe xɔse wòaɖe vi. (Hebritɔwo 13:7) Gake ne míekpɔ nyuie o la, didi be míanɔ abe woawo ene ate ŋu ava zu hoʋiʋli kpli wo. Ne míese le mía ɖokui me be ame aɖe si míekafuna dze agbagba wu mí, eye míedi be míaɖi gbɔe alo míahe nya ɖe eŋu la, didi be míanɔ abe amea ene atrɔ zu ŋuʋaʋã eyama.

Ame madeblibo aɖeke mate ŋu aɖo kpɔɖeŋu deblibo o. Eyata Ŋɔŋlɔawo gblɔ be: “Mizu mawusrɔ̃lawo abe lɔlɔ̃viwo ene.” Hekpe ɖe eŋu la, “Kristo hã kpe fu le mia ta, eye wògblẽ kpɔɖeŋu ɖi na mi, bene miadze eƒe afɔɖoƒewo yome.” (Efesotɔwo 5:1, 2; Petro I, 2:21) Yehowa kple Yesu ƒe nɔnɔmewo—woƒe lɔlɔ̃, vividoɖeameŋu, veveseseɖeamenu, kple ɖokuibɔbɔ—ye nye nusi wòle be míaʋli sesĩe asrɔ̃. Ele be míatsɔ mía ɖokui asɔ kple woƒe nɔnɔmewo, tameɖoɖowo, kple alesi wowɔa nui. Ðokui tsɔtsɔ sɔ kple ame bubuwo sia ƒomevi atu míaƒe agbenɔnɔ ɖo, ana mɔfiafia si ŋu kakaɖedzi le, kelili, kple dedienɔnɔ mí, eye ate ŋu akpe ɖe mía ŋu míazu Kristotɔ ŋutsu kple nyɔnu tsitsiwo. (Efesotɔwo 4:13) Ne míedze agbagba mla mía ɖokui be míasrɔ̃ woƒe kpɔɖeŋu debliboa alesi míate ŋui la, didi be míatsɔ mía ɖokui asɔ kple mía havi amegbetɔwo dzi aɖe akpɔtɔ godoo.

[Nɔnɔmetata si le axa 29]

Fia Saul ʋã ŋu Dawid vevie

[Nɔnɔmetata si le axa 31]

Yonatan mebu Dawid si wòtsi wu la kpɔ gbeɖe be ele ho ʋlim kpli ye o