Ðe Nyateƒea Le Ku Tsem le Amesiwo Nèfiaa Nui Mea?

ESI Eric, si nye sɔhɛ aɖe, gblɔ be yemegadi be yeanye Yehowa Ðasefo o la, edzilawo ƒe dzi gbã ale gbegbe. Nya bliboa nye nusi va dze wo kpo. Esi Eric nye ŋutsuvi dzaa la, ekpɔ gome le ƒomea ƒe Biblia sɔsrɔ̃ me, de Kristotɔwo ƒe kpekpewo, eye wòwɔ ɖeka kple hamea le gbeƒãɖeɖedɔa wɔwɔ me. Míagblɔe ko be, edze abe enɔ agbe nɔm ɖe nyateƒea nu ene. Gake fifia si wòʋu le aƒea me la, edzilawo va de dzesii be Biblia me nyateƒea meƒo ke ɖe to le eyama me o. Esia na wolulu eye wòde ŋukpe mo na wo.

Nya gbãdziname sia tɔgbe ɖe fu na ame bubuwo hã, esime woƒe Biblia nusrɔ̃vi aɖe dzudzɔ nu sɔsrɔ̃ le vome. Ne edzɔ nenema la, amewo biana wo ɖokui zi geɖe be, ‘Aleke wɔ nyemete ŋu kpɔ nusia ƒe dzesi aɖeke do ŋgɔ o?’ Ðe woate ŋu akpɔ gbɔgbɔmefɔku sia, ahanya ne nyateƒea le ku tsem le amesiwo míefiaa nui me loo alo mele ku tsem o, do ŋgɔa? Eye aleke míawɔ akpɔ kakaɖedzi be nyateƒea le ŋusẽ kpɔm ɖe mía ŋutɔwo kple amesiwo míefiaa nui la siaa dzi? Le Yesu ƒe nukuwula ŋuti lododo nyanyɛa me la, ena numekɔkɔ aɖe si akpe ɖe mía ŋu le nyabiabia mawo ŋu ɖoɖo me.

Ele Be Nyateƒea Naɖo Dzia Gbɔ

Yesu gblɔ be: “Nuku la enye Mawu ƒe nya. Eye esi le anyigba nyui la me la, woawo nye amesiwo se nya la kple dzi nyui, si dza, eye wolé eme ɖe asi sesĩe, eye wotsena le dzigbɔɖanyi me.” (Luka 8:11, 15) Eyata hafi Fiaɖuƒea ŋuti nyateƒea nate ŋu atse ku nyuiwo le míaƒe nusrɔ̃viwo me la, ele be wòaƒo ke ɖe to ɖe woƒe kpɔɖeŋudzi la me. Yesu na kakaɖedzi mí be ne mawumenyateƒea nya ge ɖe amesi si dzi nyui le me ko la, etsina hetsea ku, abe alesi nuku nyui wɔna le anyigba nyui mee ene. Nukae ŋue wòle be míalé ŋku ɖo?

Ele be míaƒe susu nanɔ dzi ƒe nɔnɔmewo ŋu, ke menye gotagome ƒe dzedzeme ko o. Gomekpɔkpɔ le tadedeagu nuwɔnawo me edziedzi dzro ko meɖea nusi tututu le ame ƒe dzime fiana ɣesiaɣi o. (Yeremya 17:9, 10; Mateo 15:7-9) Ehiã be míalé ŋku ɖe nu geɖe wu ŋu. Ele be wòadze ƒã be amea wɔ tɔtrɔwo le eƒe dzodzrowo, dzimedidiwo, kple nusiwo le vevie nɛ wu me. Ele be amenyenye yeyea, si le ɖekawɔwɔ me kple Mawu ƒe lɔlɔ̃nu, ƒe dzesiwo nanɔ dzedzem le amea ŋu. (Efesotɔwo 4:20-24) Le kpɔɖeŋu me: Esi Tesalonikatɔwo se nyanyuia la, Paulo gblɔ be enumake woxɔe abe Mawu ƒe nya ene. Gake woƒe dzidodo, nuteƒewɔwɔ, kple lɔlɔ̃ si woɖe fia emegbee ɖo kpe edzi na Paulo be nyateƒea “hã sẽa ŋu le [wo me].”—Tesalonikatɔwo I, 2:13, 14; 3:6.

Nyateƒee, nuka kee ɖale nusrɔ̃vi aɖe ƒe dzi me o ava dze gbeɖeka le eƒe nuwɔna me godoo abe alesi Eric ƒe kpɔɖeŋua ɖee fia ene. (Marko 7:21, 22; Yakobo 1:14, 15) Nublanuitɔe la, ɖewohĩ hafi nɔnɔme gbegblẽ aɖewo nava dze gaglã le ame ƒe nuwɔnawo me woakpɔ la, atsi megbe akpa. Eyata nya lae nye be woadze agbagba ade dzesi nusi tututue gbɔdzɔgbɔdzɔawo nye hafi woava zu gbɔgbɔmekplamatsedonuwo. Míehiã mɔ aɖe si nu míato akpɔ kpɔɖeŋudzia me. Aleke míawɔ esiae?

Srɔ̃ Nu tso Yesu Gbɔ

Enye nyateƒe be, Yesu te ŋu kpɔa nusi tututu le ame ƒe dzi me dzea sii vodadamanɔŋutɔe. (Mateo  12:25) Mía dometɔ aɖeke mate ŋu awɔ ema o. Ke hã, Yesu fia mí be míawo hã míate ŋu adze si ame ƒe dzodzrowo, eƒe dzimedidiwo, kple nusiwo le vevie nɛ wu la. Abe alesi ko ɖɔkta bibi zãna amedokpɔmɔnu vovovowo tsɔ dia nusi tututu gblẽ le dɔnɔ aɖe ƒe dzi ŋu ene la, nenema kee Yesu zã Mawu ƒe Nya tsɔ he “tamesusuwo kple dzimedidiwo,” esime wole ɣaɣla eye womedze gaglã haɖe o gɔ̃ hã, do goe.—Lododowo 20:5; Hebritɔwo 4:12.

Le kpɔɖeŋu me, gbeɖeka Yesu kpe ɖe Petro ŋu wòde dzesi gbɔdzɔgbɔdzɔ aɖe si va zu kplamatsedonu nɛ emegbe. Yesu nya be Petro lɔ̃ ye. Le nyateƒe me la, ɖeko Yesu tsɔ “dziƒofiaɖuƒe ƒe safuiawo” na Petro teti koe nye ma. (Mateo 16:13-19) Gake Yesu nyae hã be, Satana tɔ ŋku apostoloawo vevie. Eteƒe madidi o, woava dze ŋgɔ nugbegbe le ye gbɔ ƒe nyaƒoɖeamenu sesẽwo. Edze ƒã be Yesu de dzesii be gbɔdzɔgbɔdzɔ aɖewo le yeƒe nusrɔ̃lawo dometɔ aɖewo ƒe xɔse ŋu. Eyata mehe megbelele le nusi ŋu wòhiã be woatrɔ asi le la gbɔgblɔ na wo me o. De ŋugble tso alesi wòdo nya la medzodzro ɖae ŋu kpɔ.

Mateo 16:21 gblɔ be: “Tso ekema dzi la, Yesu de asi eƒe nusrɔ̃lawo fiafia me, alesi wòle nɛ godoo bena . . . wòakpe fu . . . eye woawui.” De dzesii be Yesu fia wo nusi adzɔ ɖe eyama dzi, ke menye ɖeko wògblɔe na wo ko o. Anɔ eme kokoko be Yesu zã mawunyakpukpuiwo, abe Psalmo 22:15-19 alo Yesaya 53:10-12 ene, siwo ɖee fia be ele na Mesia la be wòakpe fu eye wòaku. Eɖanye mɔnu kae Yesu zã o, to Ŋɔŋlɔawo xexlẽ alo wo yɔyɔ tẽ me la, ena mɔnukpɔkpɔ Petro kple etɔwo be woaɖe nusi le woƒe dziwo me agblɔ. Aleke woawɔ nui ɖe yometiti si le wo ŋgɔ ŋui?

Nukutɔe la, Petro, amesi ƒo dzi nɔna eye wòdoa vevie nu la ƒe nyagbename dzitsitsitɔe le nudzɔdzɔ sia me, ɖe gbɔdzɔgbɔdzɔ gã aɖe fia le eƒe nuŋububu gome. Egblɔ be: “Mawu nehe esia ɖa xaa tso gbɔwò, Aƒetɔ; esia nagava dziwò gbeɖe o!” Edze ƒã be Petro ƒe nuŋububu trɔ gbo, eye abe alesi Yesu ɖee gblɔ na Petro ene be, “menye Mawu tɔ nèsusu o, negbe nusi nye amegbetɔwo tɔ ko”—si nye gbɔdzɔgbɔdzɔ gã aɖe si ate ŋu agblẽ nu le ame ŋu vevie. Nukae Yesu wɔ azɔ? Le nyagbegbe na Petro vɔ megbe la, egblɔ na eyama kple eƒe nusrɔ̃la susɔeawo bena: “Ne ame aɖe lɔ̃ bena, yeanɔ yonyeme la, negbe nu le eya ŋutɔ ɖokui gbɔ, eye wòatsɔ eƒe [fuwɔameti] la, eye wòadze yonyeme.” Yesu zã nufiame si dze le Psalmo 49:9 kple 62:12 me, tsɔ ɖo ŋku edzi na wo dɔmenyotɔe be woƒe agbe mavɔ kpɔkpɔ menɔ te ɖe amegbetɔ, siwo mate ŋu axɔ ame ɖe agbe o la, dzi o, ke boŋ Mawu dzie wònɔ te ɖo.—Mateo 16:22-28.

Togbɔ be vɔvɔ̃ wɔe be Petro gbe nu le Yesu gbɔ zi etɔ̃ emegbe hã la, ɖikeke mele eme o be Yesu ƒe numedzodzro ma kple bubuawo kpe ɖe Petro ŋu be eteƒe medidi o eƒe gbɔgbɔmenyenye gasu esi. (Yohanes 21:15-19) Le ŋkeke 50 ko megbe la, Petro nɔ tsitre ɖe ameha gã aɖe ŋkume le Yerusalem heɖee fia dzideƒotɔe be Yesu fɔ tso ame kukuwo dome. Le kwasiɖawo, ɣletiwo, kple ƒe siwo va kplɔe ɖo emegbe me la, etsɔ dzideƒo nɔ te ɖe amedzidzedze, ƒoƒo, kple gamenɔnɔ nu enuenu tsɔ ɖo nuteƒewɔwɔ vɔvɔ̃manɔmee ƒe kpɔɖeŋu ɖedzesi aɖe ɖi.—Dɔwɔwɔwo 2:14-36; 4:18-21; 5:29-32, 40-42; 12:3-5.

Nukae míesrɔ̃ tso esia me? Ðe nàte ŋu ade dzesi nusi Yesu wɔ tsɔ he nusi nɔ Petro ƒe dzime do goea? Gbã la, etia ŋɔŋlɔ siwo sɔ tsɔ he Petro ƒe susu ɖe nɔnɔme aɖe koŋ ŋu. Emegbe  ena mɔnukpɔkpɔ Petro be wòaɖe eƒe dzimenyawo agblɔ. Eye mlɔeba la, egazã Ŋɔŋlɔawo me ɖaŋuɖoɖo bubuwo tsɔ kpe ɖe Petro ŋu wòɖɔ eƒe tamesusu kple seselelãmewo ɖo. Ðewohĩ àse le ɖokuiwò me be nufiafia ŋutete deŋgɔ sia gbegbe mele ye si o, gake na míade ŋugble le nuteƒekpɔkpɔ eve, siwo ɖe alesi dzadzraɖo kple ŋuɖoɖo ɖe Yehowa ŋu ate ŋu akpe ɖe mía dometɔ ɖesiaɖe ŋu be wòasrɔ̃ Yesu ƒe kpɔɖeŋuae fia, la ŋu kpɔ.

Nusiwo Le Dzi la me Hehe Ðe Go

Esi vifofo Kristotɔ aɖe se be viaŋutsuvi eve, siwo nɔ gɔmedzesuku ƒe klass gbãtɔ kple evelia, tsɔ kpetike le nufiala ƒe kplɔ̃ dzi la, eyɔ wo da ɖi hede ŋugble kpli wo. Le esi teƒe be wòabui ko be ɖeviwo ƒe fefenuwɔna aɖe koe esia nye la, vifofoa gblɔ be, “medze agbagba be mana woaɖe nusi ʋã wo be wowɔ nu gbegblẽ sia la agblɔ tso dzime.”

Vifofoa he ɖeviawo ƒe susu yi nusi dzɔ ɖe Axan dzi, abe alesi wogblɔe ɖe Yosua ta 7 lia mee ene, dzi. Enumake ɖeviawo kpɔ ŋkubiãnya si nusi wowɔ nye la dze sii helɔ̃ be yewoɖi fɔ. Woƒe dzitsinya te fɔbubu wo xoxo do ŋgɔ. Eyata wo fofo na woxlẽ Efesotɔwo 4:28, afisi gblɔ be: “Fiafitɔ la nagafi fi o, ke boŋ . . . wòatsɔ eƒe asiwo awɔ dɔ nyui, bene wòakpɔ nane aɖana hiãtɔwo.” Esi vifofoa na ɖeviawo ƒle kpetike bubu yi ɖaɖo eteƒe na nufiala la, ewɔe be Ŋɔŋlɔawo ƒe aɖaŋuɖoɖoa gawɔ dɔ ɖe ɖeviawo dzi geɖe wu.

Vifofoa gblɔ be: “Míedzea agbagba be míaɖe susu vɔ̃ ɖesiaɖe si míede dzesii la ɖa le wo me, hetsɔa dzimedidi nyui ɖɔʋuwo ɖoa wo teƒe to ŋugbledede kple ɖeviawo me.” Esi dzila siawo srɔ̃ Yesu ƒe kpɔɖeŋua le nufiafia wo viwo me ta la, wova kpɔ emetsonu nyuiwo le ɣeyiɣi siwo va kplɔe ɖo me. Mlɔeba la, wova yɔ ɖevi eveawo siaa be woava wɔ dɔ le habɔbɔa ƒe dɔwɔƒe gã le Brooklyn Betel, afisi wo dometɔ ɖeka gakpɔtɔ le subɔsubɔm le, si nye le ƒe 25 megbe.

De ŋugble tso alesi Kristotɔ bubu aɖe wɔ te ŋu kpe ɖe eƒe Biblia-nusrɔ̃vi ŋu la ŋu kpɔ. Nusrɔ̃via nɔ kpekpewo dem henɔ gome kpɔm le gbeadzisubɔsubɔdɔa me eye wòɖee gblɔ be yedi be yeaxɔ nyɔnyrɔ. Gake edze abe eɖoa ŋu ɖe eɖokui ŋu fũ akpa, tsɔ wu be wòaɖo ŋu ɖe Yehowa boŋ ŋu, ene. Ðasefoa gblɔ be: “Esi wònye nyɔnu tre ta la, eƒe nuwɔwɔ le eɖokui si va gbɔ eme wu alesi wòbui. Mevɔ̃ be esia ava gblẽ nu le eŋu le ŋutilã me alo le gbɔgbɔ me.”

Eyata Ðasefoa te ɖe nusrɔ̃via ŋu hedzro Mateo 6:33 me kplii, eye wòde dzi ƒo nɛ be wòawɔ asitɔtrɔ le nusiwo wòbua nu veviwoe ŋu, ahatsɔ Fiaɖuƒea aɖo nɔƒe gbãtɔ, eye wòaɖo ŋu ɖe Yehowa ŋu ne wòatrɔ asi le nɔnɔmeawo ŋu wòade edzi wu. Ebiae tso dzime be: “Ðe alesi nèle ɖokuiwò si wɔnɛ be ŋuɖoɖo ɖe ame bubuwo kple Yehowa hã ŋu sesẽna na wò ɣeaɖewoɣia?” Nusrɔ̃via lɔ̃ ɖe edzi hegblɔ be esusɔ vie yedzudzɔ gbedodoɖa kura kloe. Gbeƒãɖela la, de dzi ƒo nɛ be wòawɔ ɖe aɖaŋu si woɖo le Psalmo 55:23 dzi atsɔ eƒe nyawo adro ɖe Yehowa dzi, elabena abe alesi Petro I, 5:7 na kakaɖedzi míi ene la, “eyama léa be na mi.” Nya mawo de dzi gbɔ nɛ ŋutɔ. Ðasefoa gblɔ be, “Emae nye ɣeyiɣi siwo me wòfa avi mekpɔ la dometɔ ɖeka.”

Na Nyateƒea Nanɔ Dɔ Wɔm le Mewò

Ne míekpɔ amesiwo míefia nui le agbe nɔm ɖe Biblia me nyateƒea nu la, enyea dzidzɔ na mí ale gbegbe. Gake hafi míaƒe agbagbadzedze be míakpe ɖe amewo ŋu nakpɔ dzidzedze la, ele be mía ŋutɔwo míaɖo kpɔɖeŋu nyuiwo. (Yuda 22, 23) Ehiã be mí katã ‘míayi edzi atsɔ vɔvɔ̃ kple dzodzo nyanyanya awɔ mía ŋutɔwo míaƒe xɔxɔdɔ lae.’ (Filipitɔwo 2:12) Esia lɔ nana be Ŋɔŋlɔawo me kekelia  nanɔ keklẽm ɖe mía ŋutɔwo míaƒe dziwo me ɣesiaɣi, be míatsɔ anɔ míaƒe nɔnɔme, dzodzro, kple nusiwo míelɔ̃na vevie, siwo ŋu wòahiã be míawɔ ɖɔɖɔɖo le la dim ɖe eme.—Petro II, 1:19.

Le kpɔɖeŋu me, ɖe alesi nètsɔa dzo ɖe Kristotɔwo ƒe dɔwo ŋu me gbɔdzɔ fifia? Ne nenemae la, nuka gbɔe wòtso? Nusiwo gbɔ wòatso dometɔ ɖeka ate ŋu anye be èva le ŋu ɖom ɖe ɖokuiwò ŋu fũ akpa. Aleke nàwɔ anya ne kuxiae nye ma? Xlẽ Xagai 1:2-11, eye nàde ŋugble anukwaretɔe tso alesi Yehowa bu Yudatɔ aboyome siwo trɔ gbɔ la ƒe nuwɔnawoe ŋu kpɔ. Emegbe bia ɖokuiwò be: ‘Ðe metsia dzi ɖe gakpɔkpɔ kple ŋutilã me dzidzedzekpɔkpɔ ŋu akpaa? Ðe meka ɖe Yehowa dzi ŋutɔŋutɔ be akpɔ nye ƒomea ta ne metsɔ gbɔgbɔmenuwo ɖo nɔƒe gbãtɔa? Alo ɖe mesena le ɖokuinye me be ele be makpɔ nye nuwo gbɔ gbã?’ Ne èkpɔ be ehiã be yeawɔ asitɔtrɔ le yeƒe tamebubu alo seselelãmewo ŋu la, ke megahe ɖe megbe le ewɔwɔ me o. Ŋɔŋlɔawo me aɖaŋuɖoɖo aɖewo, abe esiwo dze le Mateo 6:25-33, Luka 12:13-21, kple Timoteo I, 6:6-12 ene, nana gɔmeɖose nyui siwo wɔnɛ be ŋutilãmenuhiãhiãwo kple nunɔamesiwo ŋuti nukpɔsusu si da sɔ nɔa mía si la mí, eye esia nana Yehowa ƒe yayra nɔa mía dzi.—Maleaxi 3:10.

Ame ɖokui me dzodzro anukwaretɔe alea ate ŋu anye nu sesẽ. Be ame nalɔ̃ ɖe eƒe gbɔdzɔgbɔdzɔ aɖewo, siwo dzi wohe eƒe susu yii, dzi ate ŋu aɖe fu na eyama vevie ya. Gake, ne ètso na kpekpeɖeŋu viwò loo alo wò Biblia-nusrɔ̃vi lɔlɔ̃tɔe, alo wò ŋutɔ gɔ̃ hã nèwɔ tɔtrɔ siwo hiã la—aleke kee nyaa ɖanye ame ŋutɔ ƒe nyae alo bia ŋuɖɔɖɔɖoe o—anye afɔ gbãtɔ si hiã hena eyama alo wò agbe kpɔkpɔ la ɖeɖe.—Galatiatɔwo 6:1.

Ke ne edze abe wò agbagbadzedzewo mele vi boo aɖeke ɖem o ya ɖe? Mègana ta enumake o. Dzi si mede blibo o ɖɔɖɔ ɖo ate ŋu anye dɔ si bia ŋuɖɔɖɔɖo, ɣeyiɣi geɖe, eye wòaɖe dzi le ame ƒo ɣeaɖewoɣi. Gake ate ŋu ahe teƒeɖoɖo nyui hã vɛ.

Eric, sinye sɔhɛ si ŋu míeƒo nu tsoe le gɔmedzedzea me la, va nyɔ le eɖokui me mlɔeba eye wogate ‘zɔzɔ le nyateƒe la me.’ (Yohanes II, 4) Egblɔ be: “Esime meva kpɔ nusi gbegbe mebu la dze sii hafi megatrɔ ɖe Yehowa ŋu ake.” Eric va le Mawu subɔm fifia nuteƒewɔwɔtɔe to edzilawo ƒe kpekpeɖeŋu me. Togbɔ be edzilawo ƒe agbagbadzedze enuenu be woakpe ɖe eŋu wòadzro eƒe dzimedidiwo me akpɔ ve dɔ me nɛ va yi hã la, fifia ekpɔ ŋudzedze blibo ɖe agbagba si edzilawo dze la ŋu ŋutɔ. Egblɔ be: “Dzinyelawo dzena kafukafu ale gbegbe. Womedzudzɔ lɔlɔ̃ ɖeɖe fiam o.”

Mawu ƒe Nya la me kekelia keklẽ ɖe amesiwo míefiaa nui ƒe dziwo me nyea amenuveve ƒe lɔlɔ̃ ɖeɖe fia. (Psalmo 141:5) Yi edzi nàdzro viwòwo kple wò Biblia-nusrɔ̃viwo ƒe dziwo me kpɔ ɖa be Kristotɔwo ƒe amenyenye yeyea le ŋusẽ kpɔm ɖe wo dzi ŋutɔŋutɔ hã. Na nyateƒea nanɔ ŋusẽ nyui kpɔm ɖe mia kple ame bubuwo dzi to ‘nyateƒenya la ŋudɔ wɔwɔ pɛpɛpɛ’ me.—Timoteo II, 2:15.

[Nɔnɔmetata si le axa 29]

Yesu ƒe nyawo he Petro ƒe gbɔdzɔgbɔdzɔ aɖe ɖe go

[Nɔnɔmetata si le axa 31]

Zã Biblia la nàtsɔ ahe nusi le dzi la me do goe