Dzo kpo yi emenuwo dzi

Dzo kpo yi emenuawo dzi

Yehowa Ðea Eƒe Ŋutikɔkɔe Fiaa Ðokuibɔbɔlawo

Yehowa Ðea Eƒe Ŋutikɔkɔe Fiaa Ðokuibɔbɔlawo

 Yehowa Ðea Eƒe Ŋutikɔkɔe Fiaa Ðokuibɔbɔlawo

“Kesinɔnu, bubu kple agbe enye fetu tso ɖokuibɔbɔ kple Yehowa-vɔvɔ̃ me.”​—LODODOWO 22:4.

1, 2. (a) Aleke Dɔwɔwɔwo ƒe agbalẽa ɖee fiae be Stefano nye “ŋutsu, si yɔ fũ kple xɔse kpakple Gbɔgbɔ kɔkɔe”? (b) Kpeɖodzi kae li be Stefano nye ɖokuibɔbɔla?

STEFANO nye “ŋutsu, si yɔ fũ kple xɔse kpakple Gbɔgbɔ kɔkɔe.” ‘Eyɔ fũ kple amenuveve kple ŋusẽ’ hã. Esi wònye Yesu ƒe nusrɔ̃la gbãtɔwo dometɔ ɖeka ta la, enɔ dzesi gãwo kple nukunuwo wɔm le dukɔ la dome. Ɣeaɖeɣi la, ame aɖewo tsi tre be yewoawɔ nusesẽe kpli, ke hã “womete ŋu tsi tre ɖe nunya kple gbɔgbɔ, si wòtsɔ le nu ƒom la nu o.” (Dɔwɔwɔwo 6:5, 8-10) Eme kɔ ƒã be Stefano nye Mawu ƒe Nya srɔ̃la dovevienu, eye woʋli eta bliboe le eŋɔlimetɔ Yuda-subɔsubɔhakplɔlawo ŋkume. Eƒe ɖaseɖiɖi tsitotsito, si woŋlɔ ɖe Dɔwɔwɔwo ta 7 lia me, ɖe alesi gbegbe wòtsɔ ɖe le Mawu ƒe tameɖoɖo siwo me nɔ kɔkɔm vivivi la me vevie la fia.

2 Stefano nye ɖokuibɔbɔla, mele abe subɔsubɔhakplɔla mawo, siwo bui be yewoƒe ɖoƒe kple sidzedze na yewode ŋgɔ wu ame tsɛawo la, ene o. (Mateo 23:2-7; Yohanes 7:49) Togbɔ be enya Ŋɔŋlɔawo nyuie hã la, etsɔ dzidzɔ gã aɖe xɔ dɔdasi si nye ‘subɔsubɔ le kplɔ̃ ŋuti,’ bena apostoloawo nate ŋu akpɔ ɣeyiɣi ‘anɔ gbedodoɖa kple nya la ƒe subɔsubɔ dzi.’ Stefano kpɔ ɖaseɖiɖi nyui tso nɔvi siwo dome wònɔ la gbɔ eyata wotiae wònye ŋutsu adre, siwo ŋu woɖi ɖase nyui le, la dometɔ ɖeka be woakpɔ gbesiagbenuɖuɖu mamadɔ sia gbɔ. Exɔ dɔa ɖokuibɔbɔtɔe.—Dɔwɔwɔwo 6:1-6.

3. Mawu ƒe amenuveve ɖedzesi kae Stefano xɔ?

3 Stefano ƒe ɖokuibɔbɔ ƒe nɔnɔme, tsɔ kpe ɖe eƒe gbɔgbɔmemenyenye kple nuteƒewɔwɔ ŋu, meɣla ɖe Yehowa o. Esime Stefano nɔ ɖase ɖim na Yudatɔwo ƒe kplɔlawo ƒe ha si do dziku vevie le woƒe Sanhedrin ʋɔnudrɔ̃ƒea la, eƒe tsitretsiɖeŋula siawo ‘kpɔ eƒe mo abe mawudɔla aɖe ƒe mo ene.’ (Dɔwɔwɔwo 6:15) Eƒe mo ƒe dzedzeme nɔ abe mawudɔla aɖe, si yɔ fũ kple ŋutifafa si tso ŋutikɔkɔe ƒe Mawu, Yehowa, gbɔ tɔ ene. Le Stefano ƒe gbeƒãɖeɖe dzonɔamemetɔe na Sanhedrin la me tɔwo megbe la, exɔ Mawu ƒe amenuveve ɖedzesi aɖe. “Eya la, esi Gbɔgbɔ kɔkɔe la yɔe fũ la, ekpɔ dziƒo gã, eye wòkpɔ Mawu ƒe ŋutikɔkɔe la kple Yesu le tsitre ɖe Mawu ƒe nuɖusi me.” (Dɔwɔwɔwo 7:55) Le Stefano gome la, ŋutega wɔdɔɖeamedzi sia na wògaka ɖe Yesu ƒe ɖoƒe si nye Mawu ƒe Vi kple Mesia la dzi. Edo ŋusẽ ɖokuibɔbɔla Stefano eye wòna wògaka ɖe edzi be Yehowa kpɔ ŋudzedze ɖe ye ŋu.

4. Ame kawoe Yehowa ɖea eƒe ŋutikɔkɔe fiana?

4 Abe alesi ŋutega si Stefano kpɔ la ɖee fiae ene la, Yehowa ɖea eƒe ŋutikɔkɔe kple eƒe tameɖoɖo fiaa mawuvɔ̃la siwo bɔbɔa wo ɖokui eye wodea asixɔxɔ woa kple Mawu dome ƒomedodo ŋu. Biblia gblɔ be: “Kesinɔnu, bubu kple agbe enye fetu tso ɖokuibɔbɔ kple Yehowa-vɔvɔ̃ me.” (Lododowo 22:4) Eyata ele vevie be míase nusi ɖokuibɔbɔ vavãtɔ nye, alesi míatu amenyenye vevi sia ɖoe, kple alesi ame ɖokui bɔbɔ le agbemenuwɔna ɖesiaɖe me aɖe vi na míi la gɔme.

Ðokuibɔbɔ​—Enye Mawumenɔnɔme

5, 6. (a) Nukae nye ɖokuibɔbɔ? (b) Aleke Yehowa ɖe ɖokuibɔbɔ fiae? (d) Aleke wòle be Yehowa ƒe ɖokuibɔbɔ nawɔ dɔ ɖe mía dzii?

5 Awɔ nuku na ame aɖewo be Yehowa  Mawu, nuwokatãtaƒola si ƒe ŋutikɔkɔe ƒo ɖesiaɖe ta le xexeame katã la, kee nye ɖokuibɔbɔ ƒe kpɔɖeŋuɖola gãtɔ kekeake. Fia Dawid gblɔ na Yehowa be: “Ètsɔ wò xɔname ƒe akpoxɔnu nam, meziɔ ɖe wò ɖusi ŋu, eye wò [ɖokuibɔbɔ, NW] do gãm.” (Psalmo 18:36) Esi Dawid nɔ nu ƒom tso Yehowa ƒe “ɖokuibɔbɔ” ŋu la, ezã Hebrigbe me nya aɖe si ƒe gɔmesese ŋutɔŋutɔe nye be “bi ɖokuiwò ɖe anyi.” Nya bubu siwo hã do ƒome kple Hebrigbe me nya si me woɖe ɖokuibɔbɔ tsoe lae nye “ɖokuibɔbɔɖeanyi” “tufafa” kple “ameŋububu.” Eyata Yehowa ɖe ɖokuibɔbɔ fia esime wòbɔbɔ eɖokui ameŋububutɔe be yeawɔ nu ɖekae kple ame madeblibo Dawid eye wòzãe be wòanye fia anɔ Ye teƒe. Abe alesi Psalmo 18 lia ƒe ŋgɔdonyawo ɖee fiae ene la, Yehowa kpɔ Dawid ta hedo alɔe, eye wòɖee “tso eƒe futɔwo katã si me kpakple Saul si me.” Nenema kee Dawid hã nyae be gãnyenye alo ŋutikɔkɔe ɖesiaɖe si asu ye si abe fia ene la, nɔte ɖe Yehowa ƒe nuwɔwɔ ɖe ye ŋu le ɖokuibɔbɔ me dzi. Esia nyanya kpe ɖe Dawid ŋu wòyi edzi bɔbɔ eɖokui.

6 Ke míawo hã ɖe? Yehowa tiae be yeafia nyateƒea mí, eye anɔ eme be ena subɔsubɔ ƒe mɔnukpɔkpɔ tɔxɛwo su mía si to eƒe habɔbɔa dzi, alo anɔ eme be ezã mí le mɔ aɖe nu tsɔ na eƒe lɔlɔ̃nu aɖe va eme. Aleke wòle be míase le mía ɖokui me ɖe esia ŋu? Ðe mele be míabɔbɔ mía ɖokui oa? Ðe mele be míada akpe ɖe Yehowa ƒe ɖokuibɔbɔ ta eye míatsri ɖokuidodoɖedzi, si ado afɔku mí godoo la oa?—Lododowo 16:18; 29:23.

7, 8. (a) Aleke Yehowa ƒe ɖokuibɔbɔ dze le eƒe nuwɔwɔ kple Manase mee? (b) Mɔ kawo nue Yehowa kple Manase siaa ɖo ɖokuibɔbɔ ɖeɖe fia ƒe kpɔɖeŋu ɖi na mí le be míasrɔ̃?

7 Menye ɖeko Yehowa ɖe ɖokuibɔbɔ gã fia to nuwɔwɔ kple ame madeblibowo me o, ke boŋ egaɖe alesi wòlɔ̃ faa be yeakpɔ nublanui na amesiwo bɔbɔa wo ɖokui le susu me la fia, eye wòkɔa ɖokuibɔbɔlawo ɖe dzi alo doa wo ɖe dzi gɔ̃ hã. (Psalmo 113:4-7) Le kpɔɖeŋu me, bu Yuda-fia Manase ŋu kpɔ. Ezã eƒe ɖoƒe abe fia si ŋu bubu nɔ ene ɖe mɔ gbegblẽ nu hedo alakpasubɔsubɔ ɖe ŋgɔ eye “wòwɔ nu vɔ̃ɖi geɖe le Yehowa ŋku me hetsɔ do dziku nɛ.” (Kronika II, 33:6) Mlɔeba la, Yehowa he to na Manase to mɔɖeɖe be Asiria-fia nava ɖee le zi dzi me. Esi Manase nɔ game la, “eƒo koko le Yehowa, eƒe Mawu la ŋku me, eye wòbɔbɔ eɖokui ɖe anyi vevie” si na be Yehowa gakplɔe va Yerusalem hegaɖoe eƒe fiazikpuia dzi, eye Manase ‘dze sii be, Yehowa ye nye Mawu vavã la.’ (Kronika II, 33:11-13) Nyateƒee, Manase ƒe ɖokuibɔbɔ ƒe nɔnɔme, si wòva ɖe fia mlɔeba la, dze  Yehowa ŋu, eye eya hã ɖe ɖokuibɔbɔ alo ameŋububu fia to eƒe nuvɔ̃wo tsɔtsɔ kee kple eɖoɖo fiae ake me.

8 Alesi Yehowa lɔ̃na faa tsɔ kena kple Manase ƒe dzimetɔtrɔ ƒe nɔnɔme nye ɖokuibɔbɔ ƒe kpɔɖeŋu vevi aɖe na mí. Ele be wòanɔ susu me na mí ɣesiaɣi be alesi míewɔa nui ɖe amesiwo ada vo ɖe mía ŋu la ŋu kple nɔnɔme si míeɖena fiana ne míewɔ nuvɔ̃ ate ŋu akpɔ ŋusẽ ɖe alesi Yehowa awɔ nu ɖe mía ŋui la dzi. Ne míelɔ̃na faa tsɔa amewo ƒe vodadawo kea wo eye míelɔ̃na ɖe míaƒe agɔdzedzewo dzi la, ekema míate ŋu akpɔ mɔ be Yehowa akpɔ nublanui na mí.—Mateo 5:23, 24; 6:12.

Woɖe Mawu ƒe Ŋutikɔkɔe Fia Ðokuibɔbɔlawo

9. Ðe ɖokuibɔbɔ nye gbɔdzɔgbɔdzɔ ƒe dzesia? Ðe eme.

9 Gake mele be míabu ɖokuibɔbɔ kple nɔnɔme bubu siwo do ƒome kplii la vodadatɔe be wonye gbɔdzɔgbɔdzɔ ƒe dzesi alo be woana míade nugbegblẽ wɔwɔ dzi o. Abe alesi Ŋɔŋlɔ Kɔkɔeawo ɖo kpe edzii ene la, Yehowa bɔbɔa eɖokui, gake edoa dziku le dzɔdzɔenyenye me eye wòɖea ŋusẽ triakɔ fiana ne nɔnɔmea bia nenema. Esi Yehowa bɔbɔa eɖokui ta la, etsɔa ɖe le eme na ame bɔbɔɖeanyiwo alo ebua wo ŋu etɔxɛe, ke enɔa adzɔge tso dadalawo ya gbɔ. (Psalmo 138:6) Aleke Yehowa ɖea ameŋububu fiaa esubɔla siwo bɔbɔa wo ɖokuii?

10. Nukae Yehowa ɖena fiaa ɖokuibɔbɔlawo abe alesi wòdze le Korintotɔwo I, 2:6-10 ene?

10 Le Yehowa ŋutɔ ƒe ɣeyiɣi ɖoɖi kple mɔ si dzi wòtia be yeatsɔ gbedasi atoe dzi la, eɖe eƒe tameɖoɖo me vava ŋuti nya goglowo fia ɖokuibɔbɔlawo. Nya kɔkɔe siawo nɔ ɣaɣla ɖe dadala, alo dzimesẽla, siwo ku ɖe amegbetɔwo ƒe nunya alo tamebubu ŋu la. (Korintotɔwo I, 2:6-10) Gake esi Yehowa ƒe tameɖoɖowo ŋuti gɔmesese vavãtɔ va su ɖokuibɔbɔlawo si ta la, eʋã wo be woatsɔ ŋutikɔkɔe na Yehowa le esi woƒe ŋudzedzekpɔkpɔ ɖe eƒe ŋutikɔkɔe wɔnuku la ŋu gade to ɖe edzi ta.

11. Le ƒe alafa gbãtɔ me la, aleke ame aɖewo ɖe ɖokuimabɔmabɔ fiae, eye aleke esia gblẽ nu le wo ŋui?

11 Le ƒe alafa gbãtɔ me la, ame geɖe, siwo dome amesiwo be Kristotɔwoe yewonye hã nɔ, mebɔbɔ wo ɖokui o eye wona nusiwo apostolo Paulo ɖe fia wo ku ɖe Mawu ƒe tameɖoɖo ŋu la ɖia wo nu. Paulo va zu “trɔ̃subɔlawo ƒe apostolo,” gake menye le dukɔ si me wòtso, agbalẽnyanya, ƒexɔxɔ, alo dɔ nyui gbogbo siwo wòwɔ ta o. (Romatɔwo 11:13) Zi geɖe la, nusiawoe amesiwo bua ŋutilãmenuwo ɖeɖe ko ŋu tsɔna dzidzea amesi wòle be Yehowa nazã lae. (Korintotɔwo I, 1:26-29; 3:1; Kolosetɔwo 2:18) Ke hã, Pauloe Yehowa tia, le ɖekawɔwɔ me kple Eƒe amenuveve kple tameɖoɖo dzɔdzɔewo. (Korintotɔwo I, 15:8-10) Amesiwo Paulo yɔ be “apostolo, siwo kɔ akpa,” tsɔ kpe ɖe tsitretsiɖeŋula bubuwo ŋu la, gbe Paulo kple eƒe numekɔkɔ siwo nam wònɔ tso Ŋɔŋlɔawo me. Woƒe ɖokuimabɔmabɔ wɔe be Yehowa ƒe nukumɔ si dzi wòto wɔa eƒe tameɖoɖo dzi ŋuti sidzedze kple gɔmesese bɔ wo. Negadzɔ gbeɖe be míagbe bubudede amesiwo Yehowa tiana hetoa wo dzi naa eƒe lɔlɔ̃nu vaa eme la ŋu alo abu nazã ɖe wo ŋu o.—Korintotɔwo II, 11:4-6.

12. Aleke Mose ƒe kpɔɖeŋua ɖee fia be Yehowa vea ɖokuibɔbɔlawo nui?

12 To vovo na ema la, Biblia me kpɔɖeŋu geɖe li siwo ɖe alesi wove ɖokuibɔbɔlawo nu be wokpɔ Mawu ƒe ŋutikɔkɔe ƒe akpa sue aɖe la fia wòdze ƒã. Mose, amesi “fa wu” amewo katã la, kpɔ Mawu ƒe ŋutikɔkɔe eye ƒomedodo  kplikplikpli nɔ woa kplii dome. (Mose IV, 12:3) Wɔla la ve ɖokuibɔbɔla sia, si nye alẽkplɔla tsɛ aɖe hena ƒe 40 sɔŋ, si anya zã ƒe siawo ƒe akpa gãtɔ le Arab-ƒukpoa ƒe afã dzi la, nu ŋutɔ le mɔ geɖewo nu. (Mose II, 6:12, 30) Le Yehowa ƒe mɔfiafia te la, Mose va zu nyanuɖela kple ɖoɖowɔla gã na Israel-dukɔa. Eɖo dze kple Mawu tẽ. Ekpɔ “Yehowa ƒe dzedzeme” le ŋutega me. (Mose IV, 12:7, 8; Mose II, 24:10, 11) Amesiwo de bubu subɔla ɖokuibɔbɔla kple Mawu ƒe amedɔdɔ sia ŋu hã xɔ yayra. Nenema kee woayra mí ne míede bubu nyagblɔɖila si de ŋgɔ wu Mose, si nye Yesu, kpakple “dɔla nuteƒewɔla kple aɖaŋudzela” si wòɖo la, ŋu heɖo to wo.—Mateo 24:45, 46; Dɔwɔwɔwo 3:22.

13. Aleke woɖe Yehowa ƒe ŋutikɔkɔe fia alẽkplɔla ɖokuibɔbɔlawo le ƒe alafa gbãtɔ mee?

13 Amekawoe ‘Aƒetɔ ƒe ŋutikɔkɔe klẽ ƒo xlãe’ esime mawudɔlawo ɖe gbeƒã dzidzɔ gã ŋutinya si ku ɖe “xɔla, si nye Kristo, Aƒetɔ la” ƒe dzidzi ŋu? Menye subɔsubɔhakplɔla ɖokuidoɖedzilawo loo alo ameŋkuta siwo nɔ ɖoƒe kɔkɔwoe o, ke boŋ alẽkplɔla ɖokuibɔbɔla siwo “le gbedzi, eye wole woƒe alẽha ŋuti dzɔm le zã me” lae. (Luka 2:8-11) Womedea bubu boo aɖeke amesiawo ŋu ɖe woƒe aɖaŋu kple dɔwɔna ta o. Gake, woawo ƒe nue dze Yehowa ŋu eye wòtiae be yeaka Mesia la dzidzi ŋutinya ta na gbã. Nyateƒee, Yehowa ɖea eƒe ŋutikɔkɔe fiaa mawuvɔ̃la siwo bɔbɔa wo ɖokui.

14. Yayra kawoe Yehowa duduna ɖe ɖokuibɔbɔlawo dzi?

14 Nukae kpɔɖeŋu siawo fia mí? Woɖee fia mí be Yehowa vea ɖokuibɔbɔlawo nu eye wòɖea eƒe tameɖoɖo ŋuti sidzedze kple gɔmesese fiana wo. Etiaa amesiwo amegbetɔwo abu ame madeŋgɔwoe la eye wòzãa wo tsɔ ɖea gbeƒã eƒe tameɖoɖo wɔnuku ŋuti nya na amewo. Ele be esia nado ŋusẽ mí be míayi edzi atrɔ ɖe Yehowa, eƒe Nyagblɔɖinya, kple eƒe habɔbɔ ŋu hena mɔfiafia. Míate ŋu aka ɖe edzi be Yehowa ayi edzi anɔ eƒe tameɖoɖo wɔnuku siwo me le kɔkɔm vivivi la ŋuti numekɔkɔ nam esubɔla siwo bɔbɔa wo ɖokui. Nyagblɔɖila Amos gblɔ be: “Yehowa mewɔa naneke, ne meɖe eƒe tameɖoɖo fia eƒe dɔla, nyagblɔɖilawo hafi o.”—Amos 3:7.

Tu Ðokuibɔbɔ Ðo be Wò Nu Nadze Mawu Ŋu

15. Nukatae wòle vevie be míayi edzi abɔbɔ mía ɖokui, eye aleke woɖe esia fiae le Israel-fia, Saul, gomee?

15 Be Mawu ƒe amenuveve si nɔa anyi ɖaa nanɔ kpli mí la, ele be míayi edzi abɔbɔ mía ɖokui. Ame ɖokui bɔbɔ le ɣeyiɣi aɖe me mefia be ame anye ɖokuibɔbɔla tegbee o. Ele bɔbɔe be ame nadzudzɔ eɖokui bɔbɔ ava zu dadala kple ɖokuidoɖedzila, si kplɔa ame dea ɖokuisinuwɔwɔ kple gbegblẽme. Nu ma tututue Saul, si nye ame gbãtɔ si wosi ami na be wòanye fia ɖe Israel dzi la, wɔ. Esi wotiae gbã la, ‘mebu eɖokui nanekee o.’ (Samuel I, 15:17) Gake le eƒe dziɖuɖu ƒe eve ko megbe la, etso le eɖokuisi wɔ nusi mesɔ o. Mede bubu Yehowa ƒe ɖoɖo si ku ɖe vɔsasa to nyagblɔɖila Samuel dzi la ŋu o, eye wòkpa nya aɖe tsɔ ɖe eɖokui nui le alesi wòtso le eɖokuisi sa vɔ la ta. (Samuel I, 13:1, 8-14) Le nyateƒe me la, esiae nye nu vovovo siwo tsia ɖe enu siwo ɖe eƒe ɖokuimabɔmabɔ ƒe nɔnɔme si nɔ esi fia la ƒe gbãtɔ. Emetsonue nye be Mawu ƒe gbɔgbɔ kple amenuveve dzo le eyama dzi, si na wòva ku gbɔɖiameku mlɔeba. (Samuel I, 15:3-19, 26; 28:6; 31:4) Nufiame si le eme la dze ƒã be: Ele be míado vevie ayi edzi atu ɖokuibɔbɔ kple tufafa ƒe nɔnɔme ɖo eye míaɖu ɖokuiŋudzedze ƒe seselelãmewo dzi, si ana be míaƒo asa na ɖokuisinuwɔwɔ si nana Yehowa mekpɔa ŋudzedze ɖe ame ŋu o.

16. Aleke ŋugbledede le mía kple Yehowa kple mía haviwo dome ƒomedodo ŋu akpe ɖe mía ŋu be míatu ɖokuibɔbɔ ɖoe?

16 Togbɔ be womeyɔ ɖokuibɔbɔ de Mawu ƒe gbɔgbɔ ƒe kutsetsea me o hã la, enye mawumenɔnɔme si wòle be míatu ɖo. (Galatiatɔwo 5:22, 23; Kolosetɔwo 3:10, 12) Esi  ɖokuibɔbɔ nye tamesusu ƒe nɔnɔme—si nye alesi míebua mía ɖokui kple amewoe—ta la, abia agbagbadzedze geɖe le etutuɖo me. Mía kple Yehowa dome kple mía haviwo dome ƒomedodo ŋu bubu kple ŋugble dede le eŋu vevie ate ŋu akpe ɖe mía ŋu míayi edzi anye ɖokuibɔbɔlawo. Mawu bua ŋutilãwo katã abe gbe si míena hena ɣeyiɣi aɖe ko, emegbe wòyrɔna eye wòƒuna, ene. Amegbetɔwo le ko abe ʋetsuvi siwo le agble dzi la ene. (Yesaya 40:6, 7, 22) Ðe gbe alo aŋgba ɖeka aɖe ate ŋu ado eɖokui ɖe dzi dadatɔe le esi wòdidi vie wu aŋgba bubuwo ta? Ðe susu le me be ʋetsuvi aɖe naƒo adegbe le eƒe ŋutete ŋu le esi wòate ŋu adzo ayi ŋgɔ vie wu ʋetsuvi bubuawo ta? Mekpɔe be susu mele eme kura oa? Esia tae apostolo Paulo ɖo ŋku edzi na ehati Kristotɔwo be: “Ameka na nèto vovo ma? Eye nukae le asiwò, si mèxɔ oa? Ke ne wò hã nèxɔe la, nukaŋuti nèle adegbe ƒom abe menye ɖe nèxɔe ene oa?” (Korintotɔwo I, 4:7) Ŋugbledede tso mawunyakpukpuiwo abe esia ene ŋu ate ŋu akpe ɖe mía ŋu míatu ɖokuibɔbɔ ƒe nɔnɔme ɖo ahawɔ nu ɖe amewo ŋu le ɖokuibɔbɔ me.

17. Nukae kpe ɖe nyagblɔɖila Daniel ŋu be wòtu ɖokuibɔbɔ ƒe nɔnɔme ɖo, eye nukae ate ŋu akpe ɖe mía ŋu be míawɔ nenema ke?

17 Woƒo nu tso nyagblɔɖila Hebritɔ Daniel ŋu be enye “ame malɔ̃nugbɔa” le Mawu ƒe ŋkume le esi ‘wòtsi nu dɔ,’ ɖokuibɔbɔtɔe ta. (Daniel 10:11, 12) Nukae kpe ɖe Daniel ŋu wòtu ɖokuibɔbɔ ƒe nɔnɔme ɖo? Gbã la, eɖo ŋu ɖe Yehowa ŋu bliboe, eye wòdoa gbe ɖa nɛ ɣesiaɣi. (Daniel 6:11, 12) Hekpe ɖe eŋu la, Daniel nye Mawu ƒe Nya la srɔ̃la veviedonula, si si nukpɔsusu nyuie nɔ, si kpe ɖe eŋu be eƒe susu nɔ Mawu ƒe tameɖoɖo wɔnukuwo dzi. Azɔ hã, elɔ̃ ɖe eƒe gbɔdzɔgbɔdzɔwo dzi faa, ke menye eƒe dukɔa tɔ ko dzi o. Eye le nyateƒe me la, etsɔ ɖe le Mawu ƒe dzɔdzɔenyenye dodo ɖe dzi me, ke menye eya ŋutɔ ƒe dzɔdzɔenyenye o. (Daniel 9:2, 5, 7) Ðe míate ŋu asrɔ̃ nu tso Daniel ƒe kpɔɖeŋu ɖedzesi sia me eye míadze agbagba atu ɖokuibɔbɔ ƒe nɔnɔme ɖo awɔ nu ɖe amewo ŋu le ɖokuibɔbɔ me le míaƒe agbemenuwɔna ɖesiaɖe mea?

18. Ŋutikɔkɔe kae le amesiwo ɖea ɖokuibɔbɔ fiana egbea la lalam?

 18 Lododowo 22:4 gblɔ be: “Kesinɔnu, bubu kple agbe enye fetu tso ɖokuibɔbɔ kple Yehowa-vɔvɔ̃ me.” Nyateƒee, Yehowa vea ɖokuibɔbɔlawo nu, eye bubu kple agbe enyea woƒe fetu. Esi wòsusɔ vie ko hakpala Asaf nana ta keŋkeŋ le eƒe Mawu subɔsubɔ me eye Yehowa kpe ɖe eŋu wòɖɔ eƒe tamebubu ɖo la, elɔ̃ ɖe edzi ɖokuibɔbɔtɔe be: “Àkplɔm le wò aɖaŋudede la nu, eye emegbe àxɔm ɖe gbɔwò kple bubu.” (Psalmo 73:24) Aleke esia ka mí egbeae? Ŋutikɔkɔe kae le amesiwo ɖea ɖokuibɔbɔ fiana lalam? Tsɔ kpe ɖe amenuveve kple yayra ƒe ƒomedodo si anɔ woa kple Yehowa dome ŋu la, woate ŋu akpɔ mɔ na Fia Dawid ƒe nya siwo tso gbɔgbɔ me la ƒe emevava be: “Ke [ame fafawo] anyi anyigba la dome, eye dzi adzɔ wo ɖe ŋutifafa gbogbo la ŋuti.” Enye etsɔme wɔnuku vavã!—Psalmo 37:11.

Èɖo Ŋku Wo Dzia?

• Aleke Stefano nye ɖokuibɔbɔla siwo Yehowa ɖea Eƒe ŋutikɔkɔe fiana la ƒe kpɔɖeŋu aɖee?

• Mɔ kawo nue Yehowa Mawu ɖea ɖokuibɔbɔ fiana le?

• Kpɔɖeŋu kawoe ɖee fia be Yehowa ɖea eƒe ŋutikɔkɔe fiana ɖokuibɔbɔlawo?

• Aleke Daniel ƒe kpɔɖeŋua ate ŋu akpe ɖe mía ŋu míatu ɖokuibɔbɔ ƒe nɔnɔme ɖoe?

[Biabiawo]

[Aɖaka si le axa 12]

Togbɔ be Dzixɔse Sẽŋu Nɔ Esi Hã la, Ebɔbɔ Eɖokui

Le Biblia Nusrɔ̃viawo (siwo woyɔna egbea be Yehowa Ðasefowo) ƒe takpekpe gã si wowɔ le ƒe 1919 me le Cedar Point, Ohio, U.S.A. la, Nɔviŋutsu J. F. Rutherford si xɔ ƒe 50, eye wònɔ gbeƒãɖeɖedɔa dzi kpɔm ɣemaɣi la, lɔ̃ faa dzidzɔtɔe tsɔ eɖokui na wɔ amedzroxɔla ƒe dɔ, henɔ takpekpevalawo ƒe agbawo fɔm henɔ wokplɔm yi woƒe xɔwo mee. Le takpekpea ƒe ŋkeke mamlɛa dzi la, ede dzo nyaselawo me kple nya siawo be: “Ènye fiawo dzi Fia kple aƒetɔwo dzi Aƒetɔ la teƒenɔla si le gbeƒã ɖem . . . míaƒe Aƒetɔ ƒe fiaɖuƒe kɔkɔea na amewo.” Togbɔ be Nɔviŋutsu Rutherford nye amesi si dzixɔse sẽŋu nɔ, eye wòƒoa nu ŋusẽtɔe eye metrɔna le nusi dzi wòxɔ se be enye nyateƒe la yome o hã la, enye amesi bɔbɔa eɖokui ŋutɔ le Mawu ŋkume, eye esia dzena le eƒe gbedodoɖawo me le Betel ŋdi mawunyakpukpui me dzroɣiwo.

[Nɔnɔmetata si le axa 9]

Stefano, enya Ŋɔŋlɔawo nyuie, elɔ̃ wɔ nuɖuɖumamadɔ ɖokuibɔbɔtɔe

[Nɔnɔmetata si le axa 10]

Manase ƒe ɖokuibɔbɔ ƒe nɔnɔme dze Yehowa ŋu

[Nɔnɔmetata si le axa 12]

Nukae na Daniel nye “ame malɔ̃nugbɔa”?