Dzo kpo yi emenuwo dzi

Dzo kpo yi emenuawo dzi

Yesu ƒe Ƒometɔwo—Amekawoe Wonye?

Yesu ƒe Ƒometɔwo—Amekawoe Wonye?

 Yesu ƒe Ƒometɔwo​—Amekawoe Wonye?

LE XEXEAME ƒe akpa geɖe la, ebɔ be nàkpɔ wɔna siwo me Yesu vidzĩe la le dadaa Maria kple Yosef si xɔe nyi la gbɔ wole be lém nɛ lɔlɔ̃tɔe le December me. Yesu dzidzi ŋu wɔna siawo doa dzidzɔ na amesiwo megblɔna be Kristotɔwoe yewonye o gɔ hã. Esi Yesu dzie wɔna siawo hea susu yinae ta la, nukae Ŋɔŋlɔawo gblɔ na mí le Yesu ƒe ŋutilãmeƒometɔwo ŋu?

Ƒome nyoameŋu aɖe mee wonyi Yesu le. Ðetugbi nɔaƒe aɖe si ŋkɔe nye Maria ye dzii, eye to esia mee wòva zu amegbetɔƒomea me tɔ le. Biblia gblɔ be woto gbɔgbɔ kɔkɔe dzi trɔ eƒe agbe tso dziƒo de Maria ƒe vidzidɔ me. (Luka 1:30-35) Hafi woado Yesu ƒe fufɔfɔ to nukumɔ dzi ƒe ŋugbe na Maria la, enɔ ŋugbedodo me kple ŋutsu aɖe si ŋkɔe nye Yosef, amesi ava xɔ Yesu anyi.

Le Yesu dzidzi megbe la, Yosef kple Maria dzi vi bubuwo, siwo nye Yesu dadaviwo. Ema dze ƒã le nya si Nazaretetɔwo bia le Yesu ŋu emegbe me be: “Nenem me sia la menye atikpala ƒe vie o ɖe? Alo menye ɖe woyɔa dadaa be: Maria, eye nɔviaŋutsuwo be: Yakobo, Yosef, Simon kple Yuda oa? Eye nɔvianyɔnuwo la menye wo katãe le mía dome o ɖe?” (Mateo 1:25; 13:55, 56; Marko 6:3) Míate ŋu aƒo nya ta tso nya sia me be Yesu ƒe ƒometɔ kplikplikpliwoe nye edzilawo, nɔviaŋutsu ene, kple nɔvianyɔnu eve ya teti.

Ke hã, ame aɖewo mexɔnɛ sena egbea be Yesu nɔviŋutsuwo kple nɔvinyɔnuwo nye Yosef kple Maria ƒe viwo o. Nukatae? New Catholic Encyclopedia la gblɔ be: “Tso esime woɖo Sɔlemeha anyi ko la, wofia nu amewo be ɖetugbi nɔaƒee Maria kpɔtɔ nye. Ne nyaa le alea la, ke womate ŋu ake ɖii o be Maria megadzi vi bubuwo o.” Numekugbalẽ ma ke gblɔ be woate ŋu azã nyagbe “nɔviŋutsu” kple “nɔvinyɔnu” na “ame aɖe alo ame aɖewo siwo wɔ ɖeka le subɔsubɔ alo le nu bubu aɖe me” alo woate ŋu azãe na ƒometɔwo, ɖewohĩ na tasivi-nyruiviwo.

Nenemae nya la le ŋutɔŋutɔa? Katolikotɔ mawunyaŋununyala aɖewo siwo melɔ̃ ɖe blemanufiafia la dzi o, gɔ̃ hã da asi ɖe nukpɔsusu si nye be ŋutilãmenɔviwo le Yesu si la dzi. John P. Meier, si nye Catholic Bible Association of America (Amerikatɔwo ƒe Katoliko Biblia Habɔbɔ) ƒe tatɔ tsã ŋlɔ be: “Le Nubabla Yeyea me la, ne wozã Helagbe me nya adelphos [nɔviŋutsu], menye le kpɔɖeŋumɔ nu alo le kpɔɖeŋunyagbɔgblɔ me o ke boŋ be woafia ƒomedodo si le ame aɖe kple ame bubu dome alo ƒomedodo aɖe si le se nu la, nusi wòfia koe nye tɔ ɖeka nɔ ɖeka alo dadavi alo fofoviwo eye megafiaa nu bubu aɖeke o.” * Ẽ, Ŋɔŋlɔawo ɖee fia be nɔviŋutsuwo kple nɔvinyɔnuwo le Yesu si amesiwo Yosef kple Maria dzi.

Nyanyuigbalẽawo ƒo nu tso Yesu ƒe ƒometɔ bubuwo ŋu, gake mina míahe susu yi Yesu ƒe ƒometɔ kplikplikpliwo dzi ahakpɔe ɖa be nukae míate ŋu asrɔ̃ tso wo gbɔ hã.

[Etenuŋɔŋlɔ]

^ mm. 6 “The Brothers and Sisters of Jesus in Ecumenical Perspective,” si J. P. Meier ŋlɔ, The Catholic Biblical Quarterly, January 1992, axa 21.