Dzo kpo yi emenuwo dzi

Dzo kpo yi emenuawo dzi

Mawu Nyateƒetɔ La Sɔsrɔ̃

Mawu Nyateƒetɔ La Sɔsrɔ̃

 Mawu Nyateƒetɔ La Sɔsrɔ̃

“Mizu mawusrɔ̃lawo abe lɔlɔ̃viwo ene.”​—EFESOTƆWO 5:1.

1. Nuka dzie ame aɖewo xɔ se ku ɖe nyateƒe ŋu, eye nukatae nukpɔsusu sia nye vodada?

“NUKAE nye nyateƒe?” (Yohanes 18:38) Nya ma si Pontio Pilato bia fewuɖuɖutɔe ƒe 2,000 kloe enye esia la, le fiafiam be nyateƒea nye nane si ŋu womate ŋu ake ɖo o. Ame geɖe alɔ̃ ɖe edzi egbea nenema. Nyateƒe la ŋutɔ nye nusi ŋu wotsi tre ɖo. Ðewohĩ èse wogblɔ kpɔ be amesiame wɔa eya ŋutɔ ƒe nyametsotso le nusi nye nyateƒe ŋu, alo be nyateƒea nye nane si le eteƒe vaseɖe afia aɖe, alo be nyateƒe trɔna ɣesiaɣi. Nukpɔsusu sia nye vodada. Taɖodzinu si tututu le numekuku wɔwɔ kple agbalẽsɔsrɔ̃ ŋue nye be woanya nusi le eteƒe, woanya nyateƒea ku ɖe xexeme si míele la ŋu. Nyateƒea menye ame ŋutɔ ƒe nukpɔsusu o. Le kpɔɖeŋu me, ɖeko amegbetɔ ƒe luʋɔ anye nu makumaku loo alo manye nu makumaku o. Ðeko Satana anye amesi li loo alo amesi meli o. Ðeko tameɖoɖo anɔ agbe ŋu loo alo manɔ eŋu o. Le goawo dometɔ ɖesiaɖe me la, ŋuɖoɖo si sɔ ɖeka koe ate ŋu anɔ anyi. Ðeka nye nyateƒe, eye evelia nye aʋatso; woa kple evea mate ŋu anye nyateƒe o.

2. Mɔ kawo nue Yehowa nye Mawu nyateƒetɔ le, eye biabia kawo mee míadzro fifia?

2 Le nyati si do ŋgɔ me la, míedzro eme kpɔ be Yehowa nye Mawu nyateƒetɔ. Enya nyateƒea ku ɖe nuwo katã ŋu. Vovototo ɖedzesi si le woa kple eƒe futɔ bleame Satana Abosam dome enye be Yehowa nye nyateƒetɔ ɣesiaɣi. Gawu la, Yehowa ɖea nyateƒea fiaa ame bubuwo dɔmenyotɔe. Apostolo Paulo xlɔ̃ nu hati Kristotɔwo be: “Mizu mawusrɔ̃lawo abe lɔlɔ̃viwo ene.” (Efesotɔwo 5:1) Abe Yehowa ƒe Ðasefowo ene la, aleke míate ŋu asrɔ̃ eyama le nuƒoƒo kple agbenɔnɔ ɖe nyateƒea nu mee? Nukatae wòle vevie be míawɔe alea? Eye kpeɖodzi kawoe le mía si be Yehowa kpɔa ŋudzedze ɖe amesiwo nɔa agbe ɖe nyateƒe la nu ŋu? Mina míakpɔe ɖa.

3, 4. Aleke apostolo Paulo kple Petro ƒo nu tso nusi gbɔna dzɔdzɔ ge le “ŋkeke mamlɛawo” me ŋui?

3 Míele ɣeyiɣi aɖe si me mawusubɔsubɔ me aʋatsokaka bɔ ale gbegbe. Abe alesi gbɔgbɔ ʋã apostolo Paulo wògblɔe ɖi ene la, mawusosroɖa ƒe nɔnɔme aɖe le ame geɖewo si le ‘ŋkeke mamlɛ’ siawo me gake wogbe eƒe ŋusẽ. Ame  aɖewo tsia tre ɖe nyateƒea ŋu henyea “tamegbegblẽtɔwo.” Gakpe ɖe eŋu la, ‘ame vɔ̃ɖiwo kple ameblelawo yi edzi vɔ̃ɖitɔe wu le amewo blem, eye amewo le wo blem.’ Togbɔ be amesiawo srɔ̃a nu ɖaa hã la, ‘womeɖoa nyateƒe ƒe sidzedze vavãtɔ gbɔ o.’—Timoteo II, 3:1, 5, 7, 8, 13.

4 Gbɔgbɔ ʋã apostolo Petro hã wòŋlɔ nu ku ɖe ŋkeke mamlɛawo ŋu. Abe alesi wògblɔe ɖi tututu ene la amewo megbea nyateƒe la ko o, ke boŋ woɖua fewu le Mawu ƒe Nya kple amesiwo ɖea gbeƒã nyateƒe si le eme la ŋu. ‘Le woa ŋutɔwo ƒe nudzodzrowo nu la,’ fewuɖula siawo ŋea aɖaba ƒua nyateƒe si wònye be tsi ɖe Noa ŋɔli me xexea wònye etsɔ si gbɔna ƒe ʋɔnudɔdrɔ̃ ƒe kpɔɖeŋu la dzi. Woƒe tamebubu ɖe woƒe nudzodzrowo nu azu afɔku na wo ne Mawu ƒe ɣeyiɣi de be wòatsrɔ̃ ame mavɔ̃mawuwo.—Petro II, 3:3-7.

Yehowa Subɔlawo Nya Nyateƒea

5. Nya kae nyagblɔɖila Daniel gblɔ ɖi be adzɔ le ‘nuwuɣi la’ me, eye aleke nyagblɔɖi sia va emee?

5 Nyagblɔɖila Daniel gblɔ nu bubu aɖe kura si anɔ edzi yim le Mawu ƒe amewo dome ŋu nya ɖi esime wònɔ nu ƒom tso ‘nuwuɣia’ ŋu—si nye subɔsubɔ me nyateƒea gbugbɔgaɖoanyi. Eŋlɔ bena: “Ame geɖewo adzro eme, eye sidzedze adzi ɖe edzi.” (Daniel 12:4) Ameblela gã la metɔtɔ Yehowa ƒe amewo alo gbã ŋku na wo o. Biblia me dzodzro na wova kpɔ sidzedze vavãtɔ. Le ƒe alafa gbãtɔ me la, Yesu fia nu geɖe eƒe nusrɔ̃lawo. ‘Eʋu woƒe tame bena woase Ŋɔŋlɔawo gɔme.’ (Luka 24:45) Yehowa wɔ nenema ke le míaƒe ŋkekea me. Eto eƒe Nya, eƒe gbɔgbɔa, kple eƒe habɔbɔa dzi na ame miliɔn geɖe le xexeame va nya nusi wònya xoxo—si nye nyateƒea.

6. Biblia me nyateƒe kawo gɔmee Mawu ƒe amewo se?

6 Mawu ƒe amewo si míenye na míeva se nu geɖe gɔme si míanya gbeɖe hafi o. Míenya ŋuɖoɖo na nya siwo ŋu xexemenunyalawo dagba le ƒe akpe geɖe. Le kpɔɖeŋu me, míenya nusita fukpekpe li, nusita amewo kuna, eye míenya nusita amegbetɔwo mate ŋu akpɔ xexeame katã ƒe ŋutifafa kple ɖekawɔwɔ o. Woyra mí hã kple ŋutega siwo gblɔ nusiwo ava dzɔ le etsɔme—si nye Mawu ƒe Fiaɖuƒea, paradisonyigba, kple agbe mavɔ le blibodede me. Míeva nya Yehowa, Nuwokatãtaƒola la. Míesrɔ̃ nu ku ɖe eƒe nɔnɔme nyoameŋuawo ŋu kpakple alesi míawɔ axɔ eƒe yayra. Nyateƒe la nyanya kpena ɖe mía ŋu míenyaa nusi menye nyateƒe o. Nyateƒe la ŋudɔwɔwɔ kpɔa mía ta tso numadeamedziwo yomenɔnɔ me, ekpena ɖe mía ŋu míekpɔa nu nyuitɔwo le agbe me, eye wònaa etsɔme ƒe mɔkpɔkpɔ wɔnuku aɖe mí.

7. Amekawoe te ŋu kpɔa Biblia me nyateƒea, eye amekawoe mete ŋu kpɔnɛ o?

7 Ðe nèse Biblia me nyateƒea gɔmea? Ne ese egɔme la, ekema woyra wò ŋutɔ. Ne agbalẽŋlɔla ŋlɔ agbalẽ la, etrɔa asi le eŋu be wòasɔ na amewo ƒe ƒuƒoƒo aɖewo. Woŋlɔa agbalẽ aɖewo na agbalẽnyala gãwo, eye woŋlɔa bubu aɖewo na ɖeviwo, eye woŋlɔa ɖewo kura na dɔ tɔxɛ aɖewo wɔlawo. Togbɔ be wowɔ Biblia na amesiame hã la, wowɔe be amewo ƒe ƒuƒoƒo aɖewo koŋ nase egɔme ahakpɔ ŋudzedze ɖe eŋu. Yehowa trɔ asi le eŋu na ɖokuibɔbɔlawo, ame fafa siwo le anyigba dzi. Amesiawo te ŋu sea Biblia gɔme, metsɔ le hehe si woxɔ, dekɔnu si le wo si, ɖoƒe si le wo si le hadome, alo gbe si wodona, me o. (Timoteo I, 2:3, 4) Gake womena Biblia gɔmesese amesiwo ƒe dzi metrɔ ɖe eŋu o, metsɔ le alesi woƒe susu ɖae alo alesi wonya agbalẽe me o. Dadalawo, ɖokuidoɖedzilawo, mate ŋu ase nyateƒe nya xɔasi siwo le Mawu ƒe Nya me la gɔme o. (Mateo 13:11-15; Luka 10:21; Dɔwɔwɔwo 13:48) Mawu ɖeka koe ate ŋu awɔ agbalẽ ma.

Yehowa Subɔlawo Nye Nyateƒetɔwo

8. Nukatae Yesu nye nyateƒea ŋutɔŋutɔ?

8 Yehowa ƒe Ðasefo wɔnuteƒewo nye nyateƒetɔwo abe eyama ke ene. Yesu Kristo si nye  Yehowa ƒe Ðasefo si ƒo ɖesiaɖe ta la tsɔ nusiwo wòfia kple alesi wònɔ agbe hekui la ɖo kpe nyateƒea dzi. Eʋli Yehowa ƒe nya kple ŋugbedodowo ƒe nyateƒea ta. Eyata Yesue nye nyateƒea ŋutɔŋutɔ, abe alesi eya ŋutɔ gblɔe ene.—Yohanes 14:6; Nyaɖeɖefia 3:14; 19:10.

9. Nya kawoe Ŋɔŋlɔawo gblɔ le nyateƒetoto ŋu?

9 “Amenuveve kple nyateƒe yɔ [Yesu] fũ” eye “alakpa menɔ eƒe nu me kpɔ o.” (Yohanes 1:14; Yesaya 53:9) Kristotɔ vavãwo dzea kpɔɖeŋu si Yesu ɖo la yome le nyateƒetoto na amewo me. Paulo xlɔ̃ nu haxɔsetɔwo be: “Amesiame nagblɔ nyateƒe na ehavi; elabena ŋutinuwo míenye na mía nɔewo.” (Efesotɔwo 4:25) Do ŋgɔ la, nyagblɔɖila Zaxarya ŋlɔ be: “Amesiame neto nyateƒe na ehavi.” (Zaxarya 8:16) Kristotɔwo nye nyateƒetɔwo elabena wodi be yewoadze Mawu ŋu. Yehowa nye nyateƒetɔ eye wònya afɔku si le alakpadada me. Eyata esɔ be edi tso esubɔlawo si be woato nyateƒe.

10. Nukatae amewo daa alakpa, eye afɔku kae dona tsoa eme?

10 Le ame geɖewo gome la, alakpadada adze abe dɔwɔnu nyui aɖe si woazã atsɔ axɔ mɔnukpɔkpɔ aɖewo ene. Amewo kaa aʋatso be yewoasi le tohehe nu, akpɔ viɖe aɖe, alo be amewo nakafu yewo. Gake alakpadada nye agbenɔnɔ si doa vlo ame. Gawu la, Mawu mekpɔa ŋudzedze ɖe aʋatsokala ŋu o. (Nyaɖeɖefia 21:8, 27; 22:15) Ne wonya be míenye nyateƒetɔwo la, amewo xɔa míaƒe nyawo dzi sena; wokana ɖe mía dzi. Gake ne wolé mí be míeda alakpa ɖeka pɛ ko la, amewo ake ɖi nya sia nya si míagblɔ le etsɔme ƒe nyateƒenyenye ŋu. Afrika lododo aɖe gblɔ be: “Alakpadada ɖeka gblẽa nya akpe siwo nye nyateƒe.” Lododo bubu gblɔ be: “Womaxɔ alakpatɔ dzi ase gbeɖe o, ne ele nyateƒe tom gɔ̃ hã.”

11. Mɔ ka nue nyateƒetoto lɔ nu geɖe ɖe eme wu nyateƒea gbɔgblɔ ko le?

11 Nyateƒetoto lɔ nu geɖe ɖe eme wu nyateƒea gbɔgblɔ ko. Enye mɔ si nu wonɔa agbe ɖo. Eɖea amesi tɔgbe míenye la fiana. Míenana amewo nyaa nyateƒea menye le nusi míegblɔna ɖeɖeko me o, ke boŋ le nusi míewɔna hã me. Apostolo Paulo bia be: “Wò amesi fia nu ame bubuwo la, ɖe mèfia nu ɖokuiwò oa? Wò amesi ɖe gbeƒã bena, womegafi fi o la, wòe fi fia? Wò amesi gblɔ bena womegawɔ ahasi o la, wòe wɔ ahasia?” (Romatɔwo 2:21, 22) Ne míedi be míafia nyateƒea ame bubuwo la, ele be míanye nyateƒetɔwo le míaƒe mɔwo katã dzi. Ŋkɔ si anɔ mía ŋu le nyateƒetoto kple anukwareɖiɖi me akpɔ ŋusẽ gã aɖe ɖe alesi amewo axɔ nusi fiam míele la dzi.

12, 13. Nya kae ɖevi aɖe ŋlɔ tso nyateƒetoto ŋu, eye nuka gbɔe eƒe agbenyuinɔnɔ ƒe dzidzenu kɔkɔa tso?

12 Ðevi siwo le Yehowa subɔm hã nya vevienyenye si le nyateƒetoto ŋu. Le suku ŋutinyaŋɔŋlɔ aɖe me la, Jenny, si xɔ ƒe 13 ɣemaɣi, ŋlɔ bena: “Anukwareɖiɖi nye nɔnɔme aɖe si melɔ̃na vevie. Nublanuitɔe la, ame ʋɛ aɖewo koe ɖia anukware egbea. Medo ŋugbe na ɖokuinye be malé anukwareɖiɖi me ɖe asi ɣeawokatãɣi le nye agbe me. Maɖi anukware nenye be nyateƒea gbɔgblɔ maɖe vi na nye ŋutɔ alo xɔ̃nyewo enumake o gɔ̃ hã. Mekpɔna egbɔ be xɔ̃nyewo nyea amesiwo toa nyateƒe eye wonyea anukwareɖilawo.”

13 Jenny ƒe nufiala gblɔ le dɔdasia ŋu be: “Togbɔ be metsi o hã la, ete ŋu ɖo agbenyuinɔnɔ ƒe gɔmeɖose ŋuti taɖodzinu kɔkɔ sia. Menya be anɔ agbe ɖe wò gɔmeɖosea nu elabena agbenyuinɔnɔ ƒe ŋutete ma le asiwò.” Nukae kpe ɖe sukuvi nyɔnuvi sia ŋu be wòtu agbenyuinɔnɔ ŋutete sia ɖo? Jenny gblɔ le eƒe ŋgɔdonya me be yeƒe subɔsubɔe “ɖo agbe me dzidzenuawo [na ye].” Ƒe adre va yi tso esime Jenny ŋlɔ ŋutinya sia. Abe alesi Jenny ƒe nufiala de dzesii le eŋu ene la, eyi dzi lé agbenyuinɔnɔ ƒe dzidzenu kɔkɔa me ɖe asi le eƒe agbe me abe Yehowa Ðasefo ene.

Yehowa Subɔlawo Ðe Nyateƒea Ðe Go

14. Nukatae wònye agbanɔamedzi gã aɖe koŋ le Mawu subɔlawo dzi be woalé nyateƒea me ɖe asi?

14 Nyateƒee, ame bubu siwo menye Yehowa  Ðasefowo toa nyateƒe eye woadze agbagba be yewoaɖi anukware. Ke hã esi míenye Mawu subɔlawo ta la, enye agbanɔamedzi gã aɖe koŋ le mía dzi be míalé nusi nye nyateƒe me ɖe asi. Wotsɔ Biblia me nyateƒea—si nye nyateƒe siwo ate ŋu akplɔ ame ayi agbe mavɔ me—de asi na mí. Eyata enye agba le mía dzi be míafia sidzedze sia ame bubuwo. Yesu gblɔ be: “Amesiame, si wona nu geɖee la, woabia nu geɖe le esi.” (Luka 12:48) Le nyateƒe me la, ‘wobia nu geɖe’ tso amesiwo xɔ Mawu ŋuti sidzedze xɔasi la si.

15. Dzidzɔ kae míekpɔna le Biblia me nyateƒea fiafia ame bubuwo me?

15 Dzidzɔ le Biblia me nyateƒea fiafia amewo me. Abe Yesu ƒe ƒe alafa gbãtɔ me nusrɔ̃lawo ene la, míeɖea gbeƒã nyanyuia—si nye mɔkpɔkpɔ gbedasi ʋãdziname—na amesiwo ‘ka hlẽ abe alẽ, siwo kplɔla meli na o la ene’ kple amesiwo wotsɔ “gbɔgbɔ vɔ̃wo ƒe nufiafia” gbã ŋku na hetɔtɔ la. (Mateo 9:36; Timoteo I, 4:1) Apostolo Yohanes ŋlɔ bena: “Nyemekpɔ dzidzɔ gã wu esia be, mese bena, vinyewo zɔna le nyateƒe me o.” (Yohanes III, 4) Yohanes ‘viwo’—anye amesiwo wòkplɔ va nyateƒea me—ƒe nyateƒetɔnyenye he dzidzɔ gã aɖe vɛ nɛ. Míekpɔa dzidzɔ ne amewo xɔ Mawu ƒe Nyaa kple dzidzɔ.

16, 17. (a) Nukatae menye amewo katãe xɔa nyateƒea o? (b) Dzidzɔ kae nàte ŋu akpɔ ne èle gbeƒã ɖem Biblia me nyateƒea?

16 Nyateƒee, menye amewo katãe axɔ nyateƒea o. Yesu gblɔ Mawu ŋuti nyateƒea, esime amewo melɔ̃ be yewoasee o gɔ̃ hã. Egblɔ na Yudatɔ tsitretsiɖeŋulawo bena: “Nukaŋuti míexɔm se o mahã? Amesi tso Mawu me la, sea Mawu ƒe nyawo; miawo la miele wo sem o, le esi mietso Mawu me o la ta.”—Yohanes 8:46, 47.

17 Abe Yesu ene la, míawo hã míehena ɖe megbe le Yehowa ŋuti nyateƒe xɔasia gbɔgblɔ me o. Míekpɔa mɔ be amesiame naxɔ nya si míegblɔna na wo o, elabena menye amewo katãe xɔ nya si Yesu gblɔ la o. Ke hã dzi dzɔa  mí esi míenya be míele dɔ nyui wɔm. Yehowa to eƒe amenuveve me di be woaɖe nyateƒea afia ameƒomea. Abe amesiwo si nyateƒea le ene la, Kristotɔwo va zua kekeliviwo le xexe doviviti me. Míate ŋu akpe ɖe ame bubuwo ŋu be woatsɔ ŋutikɔkɔe ana mía Fofo si le dziƒo ne míena nyateƒea klẽ le míaƒe nyawo kple nuwɔna me. (Mateo 5:14, 16) Míeɖenɛ fiana le dutoƒo be míetsri Satana ƒe nyateƒe si wòtrɔ gboe eye míeléa Mawu ƒe Nya dzadzɛ si wometɔ tsi o la me ɖe asi. Nyateƒea si míenya heɖea gbeƒãe la ate ŋu ana ablɔɖe vavã amesiwo xɔe.—Yohanes 8:32.

Ti Nyateƒetoto Yome

18. Nukatae Yesu ve Nataniel nu eye aleke wòwɔe?

18 Yesu lɔ̃ nyateƒea heto nyateƒe. Le eƒe subɔsubɔdɔa me le anyigba dzi la, eve amesiwo toa nyateƒe la nu. Yesu gblɔ le Nataniel ŋu be: “Kpɔ ɖa, Israeltɔ vavãe, amesi me alakpa mele o.” (Yohanes 1:47) Emegbe wotia Nataniel, si anɔ eme be wogayɔnɛ be Bartolomeo la, be wòanye apostolo 12-awo dometɔ ɖeka. (Mateo 10:2-4) Bubu ka gbegbe nye esi wonye!

19-21. Aleke woyra ŋutsu si nye ŋkuagbãtɔ tsã ɖe eƒe nyateƒetoto dzinɔameƒotɔe tae?

19 Wogblɔ nyateƒetola bubu aɖe si Yesu yra ƒe ŋutinya le Biblia-gbalẽ siwo Yohanes ŋlɔ ƒe ta blibo ɖeka me. Míenya eŋkɔ o. Nusi míenya le ŋutsua ŋu enye be enye nubiala aɖe si wodzi ŋkuagbãtɔ. Ewɔ nuku na amewo esi Yesu ʋu ŋku nɛ. Gbedada wɔnuku sia ŋu nya ɖo to me na Farisitɔwo, amesiwo lé fu nyateƒe la, eye wobla nu be amesiame si axɔ Yesu dzi ase la woaɖee le ƒuƒoƒoa me. Esi amesi nye ŋkuagbãtɔ tsã la dzilawo nya Farisitɔwo ƒe nugbeɖoɖoa ta la, woble wo gblɔ na wo bena yewomenya alesi wòdzɔe be yewo via va le nu kpɔm azɔ o alo nya amesi da gbe le eŋu o.—Yohanes 9:1-23.

20 Wogayɔ amesi ŋu woda gbe le la va Farisitɔwo gbɔ ake. Esi metsɔ le nusi ava dzɔ me o la, eto nyateƒe dzideƒotɔe. Eɖe alesi wɔ wòkpɔ dɔyɔyɔ la me eye be Yesue da gbe le ye ŋu. Esi alesi ame xɔŋkɔ kple ame nyagbalẽ siawo mexɔ edzi se be Mawu gbɔe Yesu tso o wɔ nuku na amesi ŋu woda gbe le la, exlɔ̃ nu wo dzideƒotɔe be woalɔ̃ ɖe nusi nɔ dzedzem ƒã la dzi: “Ðe amesia metso Mawu gbɔ o la, ne mate ŋu awɔ naneke o.” Esi nyanuɖenya aɖeke menɔ Farisitɔwo si o ta la, wobu fɔe be mebuna ame o eye wonyae do goe.—Yohanes 9:24-34.

21 Esi Yesu se nya sia la, etsɔ lɔlɔ̃ di ŋutsua dzigbɔɖitɔe. Esi wòke ɖe eŋu la, etu xɔse si amesi nye ŋkuagbãtɔ tsã la ɖe fia la ɖo. Yesu ʋu eme nɛ tẽ be yee nye Mesia la. Aleke gbegbee woyra ŋutsu ma ɖe nyateƒetoto tae nye si! Nyateƒee, Mawu ƒe amenuveve le amesiwo toa nyateƒea dzi.—Yohanes 9:35-37.

22. Nukatae wole be míati nyateƒetoto yome?

22 Nyateƒetoto nye nuwɔna si me wòle be míalé ɖe asi vevie. Enye nu vevi aɖe le kadodo kple amewo kpakple kadodo kple Mawu tutuɖo kple emeléle ɖe asi me. Be woanye nyateƒetɔ fia be woanye amesi naa nuwo dzena gaglã, ame vavã, amesi ŋu woate ŋu ate ɖo, kple amesi dzi woate ŋu aka ɖo, eye enye nusi ŋu Yehowa kpɔa ŋudzedze ɖo la wɔwɔ. (Psalmo 15:1, 2) Be woanye alakpatɔ fia be woanye ameblela, amesi dzi womete ŋu kana ɖo, kple aʋatsotɔ eye enana Yehowa mekpɔa ŋudzedze ɖe ame ŋu o. (Lododowo 6:16-19) Eyata ɖoe kplikpaa be nàti nyateƒetoto yome. Nyateƒee, be míasrɔ̃ Mawu nyateƒetɔ la, ele be míanya nyateƒea, ato nyateƒe, ahanɔ agbe ɖe nyateƒea nu.

Aleke Nàɖo Wo Ŋui?

• Nukatae míada akpe be míenya nyateƒea?

• Aleke míate ŋu asrɔ̃ Yehowae le nyateƒetoto me?

• Viɖe kawoe le Biblia me nyateƒea fiafia ame bubuwo me?

• Nukatae wole vevie be míanɔ nyateƒetoto dzi?

[Biabiawo]

[Nɔnɔmetata siwo le axa 17]

Kristotɔwo ɖea gbeƒã Biblia me nyateƒea dzonɔamemetɔe le esi wotsɔe de wo si ta

 [Nɔnɔmetata siwo le axa 18]

Woyra ŋkuagbãtɔ si ŋu Yesu da gbe le la vevie le esi wòto nyateƒe ta