Dzo kpo yi emenuwo dzi

Dzo kpo yi emenuawo dzi

Aleke Wòle Be Míabu Amewoe Esi Yehowa Ƒe Ŋkekea Le Aƒe Tum?

Aleke Wòle Be Míabu Amewoe Esi Yehowa Ƒe Ŋkekea Le Aƒe Tum?

 Aleke Wòle Be Míabu Amewoe Esi Yehowa Ƒe Ŋkekea Le Aƒe Tum?

“Menye ɖe Aƒetɔ la le wɔwɔm blewu le eƒe ŋugbedodowo dziwɔwɔ me . . . o; hafi egbɔ dzi ɖi blewu na mi, esi melɔ̃ bena, ame aɖeke natsrɔ̃ o, ke boŋ bena amewo katã natrɔ va dzimetɔtrɔ gbɔ la ŋuti.”​—PETRO II, 3:9.

1, 2. (a) Aleke Yehowa bua amewo egbeae? (b) Nya kawoe míate ŋu abia mía ɖokui?

WODE dɔ asi na Yehowa subɔlawo be ‘woawɔ dukɔwo katã me nɔlawo ne woanye nusrɔ̃lawo.’ (Mateo 28:19) Esi míele dɔ sia wɔm hele “Yehowa ƒe ŋkeke gã la” lalam la, ehiã be miabu amewo abe alesi wòbua woe ene. (Zefanya 1:14) Eye aleke wòwɔa esiae? Apostolo Petro gblɔ be: “Menye ɖe Aƒetɔ la le wɔwɔm blewu le eƒe ŋugbedodowo dziwɔwɔ me, abe alesi ame aɖewo bunɛ blewuwɔwɔ la ene o; hafi egbɔ dzi ɖi blewu na mi, esi melɔ̃ bena, ame aɖeke natsrɔ̃ o, ke boŋ bena amewo katã natrɔ va dzimetɔtrɔ gbɔ la ŋuti.” (Petro II, 3:9) Mawu bua amegbetɔwo abe amesiwo ate ŋu atrɔ dzime ene. Eƒe ‘didie nye be, woaxɔ amewo katã, bene woava nyateƒe ƒe sidzedze vavãtɔ la me.’ (Timoteo I, 2:4) Edzɔa dzi na Yehowa gɔ̃ hã ne ‘ame vɔ̃ɖi ɖe asi le eƒe zɔzɔme ŋu henɔ agbe boŋ’!​—Xezekiel 33:11.

2 Ðe mía ŋutɔwo míekpɔa amewo abe alesi Yehowa kpɔa woe enea? Ðe míebua ameƒomevi ɖesiaɖe kple dukɔ ɖesiaɖe me tɔwo  be woate ŋu ava nye “alẽwo le eƒe lãnyiƒe” abe alesi wòbunɛ enea? (Psalmo 100:3; Dɔwɔwɔwo 10:34, 35) Mina míabu kpɔɖeŋu eve siwo ɖe alesi wòle vevie be Mawu ƒe nukpɔsusu nanɔ mía si fia la ŋu kpɔ. Le go eveawo siaa me la, tsɔtsrɔ̃ tu aƒe, eye wona Yehowa subɔlawo nya nyateƒenya sia do ŋgɔ. Kpɔɖeŋu siawo le vevie ŋutɔ esi míele Yehowa ƒe ŋkeke gã la lalam.

Abraham Bu Nuwo Ŋu abe Alesi Yehowa Bui Ene

3. Aleke Yehowa bu amesiwo nɔ Sodom kple Gomorae?

3 Kpɔɖeŋu gbãtɔ ku ɖe blemafofo nuteƒewɔla Abraham kpakple Sodom kple Gomora ƒe du vɔ̃ɖiawo ŋu. Esi Yehowa se ‘nutsotso si wona le Sodom kple Gomora ŋu’ la, metsrɔ̃ du siawo kple wo me nɔlawo enumake o. Ewɔ numekuku gbã. (Mose I, 18:20, 21) Edɔ mawudɔla eve ɖo ɖe Sodom, afisi woyi ɖadze ame dzɔdzɔe Lot ƒe aƒeme le. Le zã si me mawudɔlawo va ɖo la, ‘dua me ŋutsuwo, ɖekakpuiwo kple ame tsitsiwo, keke dua ƒe mlɔenutɔwo ke hã va ɖe to ɖe aƒea,’ henɔ didim be yewoadɔ kple mawudɔlaawo. Edze ƒã be alesi dua me tɔwo gblẽe la ɖo kpe edzi be edze be woatsrɔ̃e. Ke hã, mawudɔlaawo gblɔ na Lot bena: “Ame aɖewo gale asiwò le afisia? Kplɔ tɔwòwo kple viwònyɔnuwo kple tɔwo tɔ, siwo katã le dua me la, do go tso teƒe sia.” Yehowa ɖe mɔ be dua me tɔ aɖewo nakpɔ ɖeɖe, gake mlɔeba la, Lot kple vianyɔnu eve koe tsi agbe le tsɔtsrɔ̃a me.—Mose I, 19:4, 5, 12, 16, 23-26.

4, 5. Nukatae Abraham ɖe kuku ɖe Sodomtɔwo nu, eye ɖe alesi wobua amewoe wɔ ɖeka kple Yehowa tɔa?

4 Azɔ, mina míatrɔ ɖe ɣeyiɣi si me Yehowa ɖoe be yeayi aɖatsa ŋku le Sodom kple Gomora ƒe dua me la ŋu. Ɣemaɣie Abraham ɖe kuku be: “Ðewohĩ ame dzɔdzɔe blaatɔ̃ anɔ duame; ɖe àtsrɔ̃e, eye màtsɔe ake teƒe la le ame blaatɔ̃, siwo le eme la ta o mahã? Esia nede megbe xaa tso gbɔwò be, nagawu ame dzɔdzɔe kple ame vɔ̃ɖi siaa zi ɖeka, eye ame dzɔdzɔe nanɔ abe ame vɔ̃ɖi ene o! Esia nede megbe xaa tso gbɔwò! Ðe xexeame ƒe ʋɔnudrɔ̃la madrɔ̃ ʋɔnu dzɔdzɔe oa?” Abraham zã nyagbɔgblɔ si nye “esia nede megbe xaa tso gbɔwò” zi eve sɔŋ. Abraham nyae tso eƒe nuteƒekpɔkpɔwo me be Yehowa matsrɔ̃ ame dzɔdzɔewo kple ame vɔ̃ɖiwo atsaka o. Esi Yehowa gblɔ be yematsrɔ̃ Sodom ne ‘ame dzɔdzɔe  blaatɔ̃ le dua me’ o la, Abraham yi edzi ɖe xexlẽmea dzi kpɔtɔ vivivi vaseɖe ewo.—Mose I, 18:22-33.

5 Ðe Yehowa aɖo to Abraham ƒe kukuɖeɖewo ne ɖee womewɔ ɖeka kple eya ŋutɔ ƒe nuŋububu oa? Ðikeke mele eme o be maɖo toe o. Esi Abraham nye ‘Yehowa xɔlɔ̃’ ta la, anɔ eme be enya alesi Wòbua nuwo ŋui eye eya hã bunɛ nenema ke. (Yakobo 2:23) Esi Yehowa trɔ susu ɖe Sodom kple Gomora ŋu la, elɔ̃ faa be yeaɖo to ase Abraham ƒe kukuɖeɖewo. Nukatae? Elabena mía Fofo si le dziƒo la ‘medi bena, ame aɖeke natsrɔ̃ o, ke boŋ bena amewo katã natrɔ va dzimetɔtrɔ gbɔ.’

Alesi Yona Bu Amewoe​—Eto Vovo Kura

6. Aleke Niniwetɔwo wɔ nu ɖe Yona ƒe gbeƒãɖeɖea ŋui?

6 Azɔ bu kpɔɖeŋu evelia—si nye Yona tɔ—ŋu kpɔ. Du si wobe woatsrɔ̃ le go sia ya mee nye Niniwe. Wogblɔ na nyagblɔɖila Yona be wòaɖe gbeƒã be du ma ƒe nu vɔ̃ɖi wɔwɔ ‘ɖo Yehowa ŋkume.’ (Yona 1:2) Niniwe, kple eƒe golɔgoewo, nye du gã aɖe ‘si ƒe didime nye ŋkeke etɔ̃ ƒe mɔzɔzɔ.’ Esi Yona ɖo to emegbe heyi Niniwe la, eyi dzi nɔ gbeƒã ɖem be: “Esusɔ ŋkeke blane, ne Niniwe natsrɔ̃.” Esia wɔe be “Niniwetɔwo xɔ Mawu dzi se; wodo kpo, be woatsi nu adɔ, eye woata akpanya.” Niniwe-fia gɔ̃ hã trɔ dzime.—Yona 3:1-6.

7. Aleke Yehowa bu Niniwetɔwo ƒe dzimetɔtrɔ ƒe nɔnɔmeae?

7 Esia to vovo kura tso alesi Sodomtɔwo wɔ nui gbɔ! Aleke Yehowa bu Niniwetɔ trɔdzimeawoe? Yona 3:10 gblɔ be: “Vɔ̃, si Mawu gblɔ be, yeawɔ wo la vee, eye mewɔe o.” ‘Eve’ Yehowa le susua nu be Niniwetɔwo ƒe agbenɔnɔ na wòɖoe be yeatsrɔ̃ wo hafi si na wòtrɔ nusi wòɖo be yeawɔ. Mawu ƒe dzidzenuwo metrɔ o, gake Yehowa trɔ eƒe nyametsotsoa esime wòkpɔ be Niniwetɔawo trɔ dzime.—Maleaxi 3:6.

8. Nukatae Yona do dziku?

8 Esi Yona kpɔe dze sii be Niniwe magatsrɔ̃ o la, ɖe wòbu nuwo ŋu abe alesi Yehowa bu woe enea? Ao, elabena wogblɔ na mí bena: “Ke esia medze Yona ŋu o, eye dzi kui vevie.” Nuka hãe Yona gawɔ? Nuŋlɔɖia gblɔ be: “[Edo] gbe ɖa na Yehowa gblɔ bena: Oo, Yehowa, esia ŋu pɛ mebu, esime mele mía de; eyata medo ŋgɔ be, masi ayi Tarsis; elabena menyae be, Mawu amenuvela kple nublanuikpɔla nènye, ègbɔa dzi blewu, dɔmenyo bɔ ɖe asiwò, eye vɔ̃wɔwɔ vea wò.” (Yona 4:1, 2) Yona nya nu tso Yehowa ƒe nɔnɔmewo ŋu. Gake ɣemaɣi la, nyagblɔɖila la do dziku eye alesi Mawu bu Niniwetɔ trɔdzimewo la mesɔ nɛ o.

9, 10. (a) Nukae Yehowa fia Yona? (b) Nukatae míate ŋu atsɔe be Yona va bu Niniwetɔwo abe alesi Yehowa bu woe ene?

9 Yona do le Niniwe yi ɖatu agbadɔ, henɔ eƒe vɔvɔli te “ne yeakpɔ nusi le dzɔdzɔ ge ɖe dua dzi.” Yehowa na treklɔnu míe hedo vɔvɔli ɖe Yona dzi. Gake le ŋufɔke la, numiemie  la yrɔ. Esi Yona do dziku ɖe esia ta la, Yehowa gblɔ be: ‘Treklɔnu la ƒe nu le vewòm, ɖe du gã, Niniwe, si me amewo le wu ame akpe alafa ɖeka blave, siwo menya nuka enye ɖusi kple mia hekpe ɖe lã geɖewo ŋu la ƒe nu mavem oa?’ (Yona 4:5-11) Nusɔsrɔ̃ kae nye si esia nye na Yona ku ɖe alesi Yehowa bua amewoe ŋu!

10 Womeŋlɔ alesi Yona ɖo nya ŋu na Mawu le nya si wòbiae ku ɖe vevesese ɖe Niniwetɔwo nu ŋu la ɖi o. Ke hã, edze ƒã be nyagblɔɖila la trɔ asi le alesi wòbu Niniwetɔ trɔdzimeawoe ŋu. Nusita míeƒo nya ta aleae nye be Yehowa zãe tsɔ ŋlɔ nusia si tso gbɔgbɔ me la ɖi.

Nɔnɔme Kae Le Asiwò?

11. Ne ɖe Abraham gali la, aleke wòabu amewoe?

11 Egbea, míedze ŋgɔ tsɔtsrɔ̃ bubu​—eyae nye nuɖoanyi vɔ̃ɖi si li fifia tsɔtsrɔ̃ le Yehowa ƒe ŋkeke gã la dzi. (Luka 17:26-30; Galatiatɔwo 1:4; Petro II, 3:10) Ne ɖe Abraham gale agbe la, anye aleke wòabu amesiwo le xexe sia si woava tsrɔ̃ kpuie me lae? Anɔ eme godoo be atsi dzi ɖe amesiwo mekpɔ se “fiaɖuƒeŋutinya nyui” la haɖe o ŋu. (Mateo 24:14) Abraham ɖe kuku na Mawu enuenu ɖe ame dzɔdzɔe siwo ate ŋu anɔ Sodom la nu. Ðe mía ŋutɔwo míetsɔa ɖe le amesiwo ate ŋu agbe nu le xexe sia si le Satana ƒe dzikpɔkpɔ te la ƒe mɔwo gbɔ ne mɔnukpɔkpɔ su wo si be woatrɔ dzime ahasubɔ Mawu la mea?—Yohanes I, 5:19; Nyaɖeɖefia 18:2-4.

12. Nukatae wòle bɔbɔe be nɔnɔme si ɖi Yona tɔ nanɔ mía si ɖe amesiwo míedoa goe le míaƒe subɔsubɔdɔa me ŋu, eye nukae míate ŋu awɔ tso esia ŋu?

12 Esɔ be míadi vevie be woahe vɔ̃ɖinyenye ava nuwuwui. (Xabakuk 1:2, 3) Ke hã ele bɔbɔe ŋutɔ be Yona ƒe nɔnɔme tɔgbe nava su ame si eye matsɔ ɖeke le amesiwo ate ŋu atrɔ dzime la ƒe nyonyo me o. Enɔa alea, vevietɔ ne míedoa go ɖekematsɔlemetɔwo, tsitretsiɖeŋulawo, alo gedilawo gɔ̃ hã edziedzi ne míetsɔ Fiaɖuƒegbedasia yi woƒe aƒewo me. Míaƒe susu adzo le amesiwo kpɔtɔ Yehowa naƒo wo nu ƒu tso nuɖoanyi vɔ̃ɖi sia me la dzi. (Romatɔwo 2:4) Ne ɖokuimedzodzro nyuie ɖee fia be nɔnɔme si nɔ Yona si ɖe Niniwe ŋu gbã ƒe sue aɖe le mía si la, míate ŋu ado gbe ɖa abia kpekpeɖeŋu be míana míaƒe nuŋububu nasɔ ɖe Yehowa tɔ nu.

13. Nukatae míate ŋu agblɔ be Yehowa tsɔ ɖe le eme na amewo egbea?

13 Yehowa tsɔ ɖe le amesiwo mekpɔ le eyama subɔm haɖe o la me, eye eɖoa to esubɔla ɖeadzɔgbewo ƒe kukuɖeɖe. (Mateo 10:11) Le  kpɔɖeŋu me, “aɖe wo” atsɔ aɖo woƒe gbedodoɖawo ŋui. (Luka 18:7, 8) Gawu la, Yehowa awɔ eƒe ŋugbedodowo kple tameɖoɖowo katã dzi le eya ŋutɔ ƒe ɣeyiɣi ɖoɖi dzi. (Xabakuk 2:3) Esia ƒe akpa aɖe anye vɔ̃ɖinyenye ɖeɖe ɖa le anyigba dzi, abe alesi ko wòtsrɔ̃ Niniwe esi emenɔlawo gatrɔ ɖe nuvɔ̃ɖiwɔwɔ ŋu ake la ene.—Naxum 3:5-7.

14. Esi míele Yehowa ƒe ŋkeke gã la lalam la, nukae wòle be míanɔ wɔwɔm?

14 Vaseɖe esime woaɖe nuɖoanyi vɔ̃ɖi sia ɖa le Yehowa ƒe ŋkeke gã me la, ɖe míanɔ lalam dzigbɔɖitɔe ahanɔ vevie dom nu le eƒe lɔlɔ̃nu wɔwɔ mea? Míenya afisi woagawɔ gbeƒãɖeɖedɔa aɖo hafi Yehowa ƒe ŋkekea nava la ŋuti nyawo katã o, ke hã míenya ya be woaɖe gbeƒã Fiaɖuƒeŋutinya nyuia le anyigba bliboa dzi be wòaɖo afisi dze Mawu ŋu hafi nuwuwua nava. Eye ele be míatsɔ ɖe le “nu vevitɔ” siwo kpɔtɔ Yehowa naƒo ƒu, esi wòyi edzi tsɔ ŋutikɔkɔe le eƒe aƒea yɔmee, me godoo.—Xagai 2:7.

Míaƒe Nuŋububu Dzena le Míaƒe Nuwɔnawo Me

15. Nukae ate ŋu adzi míaƒe ŋudzedzekpɔkpɔ ɖe gbeƒãɖeɖedɔa ŋu ɖe edzi?

15 Ðewohĩ nuto si me womexɔa gbeƒãɖeɖedɔa nyuie le o mee míele, eye ŋutete mele mía si míaʋu ayi afisi Fiaɖuƒegbeƒãɖelawo hiã le wu o. Tsɔe be woate ŋu akpɔ ame ewo le míaƒe anyigbamama me hafi nuwuwua nava. Ðe nèsenɛ le ɖokuiwò me be ehiã be woadi ame ewo mawoa? Yesu ƒe “dɔme trɔ” ɖe amehawo ŋu “elabena woƒe lãme gbɔdzɔ, eye woka hlẽ abe alẽ, siwo kplɔla meli na o la ene.” (Mateo 9:36) To Biblia sɔsrɔ̃ kpakple Gbetakpɔxɔ kple Nyɔ! me nyatiwo xexlẽ nyuie me la, míate ŋu ase xexeame ƒe nɔnɔmea gɔme nyuie. Esia hã ate ŋu adzi alesi míekpɔnɛ be ehiã be míaɖe gbeƒã nyanyuia ɖe edzi. Gawu la, Biblia-srɔ̃gbalẽ siwo míexɔna to “dɔla nuteƒewɔla kple aɖaŋudzela” dzi la zazã ŋudzedzekpɔkpɔtɔe ate ŋu ana miadi vevie be míaƒo nya ɖe amewo nu ɖe edzi le anyigbamama siwo me wowɔ dɔ le zi geɖe me.—Mateo 24:45-47; Timoteo II, 3:14-17.

16. Aleke míate ŋu adzi míaƒe subɔsubɔdɔa ƒe nyonyome ɖe edzii?

16 Míaƒe ɖetsɔtsɔ le amesiwo gbɔna Biblia ƒe gbedasi si naa agbe xɔ ge me la ʋãa mí be míabu ɣeyiɣi kple mɔ vovovo siwo dzi míato ate ɖe aƒemenɔlawo ŋu le míaƒe subɔsubɔdɔa me ŋu. Ðe míekpɔnɛ be ame geɖe menɔa aƒeme o ne míeyia? Ne nenemae la, míate ŋu adzi míaƒe subɔsubɔdɔa ƒe nyonyome ɖe edzi to míaƒe ɖaseɖiɖidɔa wɔɣiwo kple afisiwo míewɔnɛ le la tɔtrɔ me. Ɣeyiɣi si me lãɖelawo ate ŋu aɖe lãe woyia tɔƒo. Ðe míate ŋu awɔ esia tɔgbe le míaƒe gbɔgbɔmelãɖeɖedɔa mea? (Marko 1:16-18) Nukatae màte fiẽsi ɖaseɖiɖi kple telefon dzi ɖaseɖiɖi, le afisiwo se ɖe mɔ le, akpɔ o? Ame aɖewo kpɔe be ʋudaɖoƒewo, ʋutɔɖoƒewo, mɔ̃memidzeƒewo, kple fiasewo me nye ‘lãɖeƒe’ nyui aɖewo. Abraham ƒe nɔnɔme si tɔgbe anɔ mía si ɖe amewo ŋu hã dzena ne míewɔ mɔnukpɔkpɔwo ŋudɔ tsɔ ɖi vomeɖasee.

17. Mɔ kawo nue míate ŋu ade dzi ƒo na dutanyanyuigblɔlawo kple ame bubu siwo le subɔsubɔm le dutanyigbawo dzi le?

17 Ame miliɔn geɖe mekpɔ se Fiaɖuƒegbedasia haɖe o. Tsɔ kpe ɖe míaƒe gbeƒãɖeɖea ŋu la, ɖe míate ŋu aɖe ɖetsɔleme afia amesiawo le mɔ si mahiã be míado le aƒeme o gɔ̃ hã nua? Ðe míenya dutanyanyuigblɔlawo alo ɣeyiɣiawo katã ƒe subɔla siwo le dɔ wɔm le dutaa? Ne míenya wo la, míate ŋu aŋlɔ lɛta na wo atsɔ fia be míekpɔa ŋudzedze ɖe woƒe dɔa ŋu. Aleke ema ate ŋu aɖe ɖetsɔtsɔ le amewo katã me afiae? Lɛta dedziƒoname siwo míaŋlɔ atsɔ akafu dutanyanyuigblɔlawo la ate ŋu ado ŋusẽ wo be woanɔ woƒe dɔa dzi, si awɔe be woakpe ɖe ame geɖewo ŋu be nyateƒea ƒe sidzedze nava su wo si. (Ʋɔnudrɔ̃lawo 11:40) Míate ŋu ado gbe ɖa hã ɖe dutanyanyuigblɔlawo kple  amesiwo nyateƒea ƒe dɔ le wuwum le dukɔ bubuwo me la ta. (Efesotɔwo 6:18-20) Mɔ bubu si dzi míate ŋu ato aɖe ɖetsɔleme afia enye be míadzɔ ga atsɔ akpe asi ɖe xexeame katã ƒe dɔ si wɔm Yehowa Ðasefowo le la ŋu.—Korintotɔwo II, 8:13, 14; 9:6, 7.

Àte Ŋu Aʋua?

18. Nukae Kristotɔ aɖewo wɔ tsɔ do Fiaɖuƒea ƒe nuwo ɖe ŋgɔ le dukɔ si me wole me?

18 Woyra amesiwo ʋu yi teƒe siwo Fiaɖuƒegbeƒãɖelawo hiã le wu la ɖe woƒe ɖokuitsɔtsɔsavɔ ƒe agbagbadzedzewo ta. Gake Yehowa Ðasefo bubu siwo kpɔtɔ le wo de dukɔ me la srɔ̃ gbegbɔgblɔ bubu be yewoate ŋu ana gbɔgbɔmekpekpeɖeŋu amesiwo ʋu va la. Agbagbadzedze siawo ɖe vi geɖe nyateƒe. Le kpɔɖeŋu me, Ðasefo adre siwo nɔ kpekpem ɖe Chinatɔwo ŋu le Texas, U.S.A., ƒe du aɖe me kpe ame 114 va Aƒetɔ ƒe Fiẽnuɖuɖu la ɖuƒe le ƒe 2001 me. Amesiwo le kpekpem ɖe amesiawo ŋu kpɔe be nukuawo ƒu le yewoƒe agblea dzi hena xaxa.—Mateo 9:37, 38.

19. Nuka mee nunya le be nàwɔ ne èle ʋuʋu ayi dutadukɔ aɖe me aɖado Fiaɖuƒegbeƒãɖeɖedɔa ɖe ŋgɔ ŋu bum?

19 Ðewohĩ mia kple wò ƒomea miese le mia ɖokui me be yewoate ŋu aʋu ayi teƒe aɖe si Fiaɖuƒegbeƒãɖelawo hiã le wu. Le nyateƒe me la, nunya le eme be ‘woabɔbɔ nɔ anyi abu eŋu kɔnta’ gbã. (Luka 14:28) Esia le vevie wu ne ame aɖe le ʋuʋu ayi dutadukɔ aɖe me ŋu bum. Anyo be amesiame si le esia ŋu bum la nabia eɖokui nya siawo be: ‘Ðe mate ŋu akpɔ nye ƒomea dzia? Ðe mate ŋu akpɔ dukɔmenɔgbalẽ si sɔa? Ðe mese gbe si wodona le dukɔa me la xoxoa, alo mele klalo be masrɔ̃ea? Ðe mebu afima ƒe yame ƒe nɔnɔme kple dekɔnu ŋua? Ðe mate ŋu anye “akɔfafa” na haxɔsetɔwo le dukɔ ma me eye manye agba oa?’ (Kolosetɔwo 4:10, 11) Be ame nate ŋu anya hiahiã si gbegbe le dukɔ si ŋu bum wòle be yeaʋu ayi me la, esɔ ɣesiaɣi be wòaŋlɔ agbalẽ aɖo ɖe Yehowa Ðasefowo ƒe alɔdzedɔwɔƒe si le gbeƒãɖeɖedɔa dzi kpɔm le nuto ma me. *

20. Aleke ɖekakpui Kristotɔ aɖe tsɔ eɖokui ɖo anyi na haxɔsetɔwo le dutadukɔ aɖe mee?

20 Kristotɔ aɖe si kpɔa gome le Fiaɖuƒe Akpatawo tutu me le Japan la se be wohiã na dɔwɔla bibiwo be woatu tadeaguƒe aɖe le Paraguay. Esi wònye tre eye ɖekakpuimeŋusẽ le eŋu ta la, eʋu yi dukɔ ma me ɖawɔ dɔ ɣleti enyi sɔŋ eye eya ɖeka koe wɔ dɔ ɣeyiɣiawo katã le dɔa wɔƒe. Esime wònɔ anyi la, esrɔ̃ Spaingbe eye wowɔ aƒeme Biblia nusɔsrɔ̃wo. Ekpɔe be Fiaɖuƒegbeƒãɖelawo hiã le dukɔa me. Togbɔ be egbɔ va Japan hã la, eteƒe medidi o egatrɔ yi Paraguay ake ɖakpe asi ɖe amewo nuƒoƒoƒu ɖe Fiaɖuƒe Akpata ma me ŋu.

21. Esi míele Yehowa ƒe ŋkeke gã la lalam la, nuka ŋue wòle be míatsi dzi ɖo vevie eye aleke wòle be míanɔ nuwo ŋu bumee?

21 Mawu akpɔ egbɔ be woawɔ gbeƒãɖeɖedɔa ade goe keŋkeŋ, wòasɔ kple eƒe lɔlɔ̃nu. Ele tsɔtsɔe dom gbɔgbɔmenuŋeŋedɔ mamlɛa egbea. (Yesaya 60:22) Ekema esi míele Yehowa ƒe ŋkekea lalam la, mina míakpɔ gome le nuŋeŋedɔa me moveviɖoɖotɔe ahabu amewo abe alesi mía Mawu lɔlɔ̃tɔ la bua woe ene.

[Etenuŋɔŋlɔ]

^ mm. 19 Menye ɣesiaɣie ʋuʋu ayi dukɔ aɖe si me woɖo asi gbeƒãɖeɖedɔa dzi alo woxe mɔ ɖe enu le la ɖea vi o. Esia wɔwɔ ate ŋu agblẽ nu le Fiaɖuƒegbeƒãɖela siwo le dɔ wɔm aɖaŋutɔe le nɔnɔme mawo me la ŋu.

Èɖo Ŋku Wo Dzia?

Esi míele Yehowa ƒe ŋkekea lalam la, aleke wòle be míabu amewoe?

Aleke Abraham bu ame dzɔdzɔe siwo anya nɔ Sodom lae?

Aleke Yona bu Niniwetɔ trɔdzimewo?

Aleke míate ŋu aɖee afiae be míebua amesiwo mekpɔ se nyanyuia haɖe o la abe alesi Yehowa bua woe ene?

[Biabiawo]

[Nɔnɔmetata si le axa 16]

Abraham bu amewo abe alesi Yehowa bua woe ene

[Nɔnɔmetata si le axa 17]

Yona va bu Niniwetɔ trɔdzimewo abe alesi Yehowa bu woe ene

[Nɔnɔmetata siwo le axa 18]

Ðetsɔtsɔ le eme na amewo ʋãa mí be míalé ŋku ɖe ɣeyiɣi kple mɔ vovovo siwo nu míetona ɖea gbeƒã ŋu