Dzo kpo yi emenuwo dzi

Dzo kpo yi emenuawo dzi

Boas Kple Rut ƒe Srɔ̃ɖeɖe si Dze abe Esi Madze Edzi O Ene

Boas Kple Rut ƒe Srɔ̃ɖeɖe si Dze abe Esi Madze Edzi O Ene

 Boas Kple Rut ƒe Srɔ̃ɖeɖe si Dze abe Esi Madze Edzi O Ene

DƆWƆNAWO le edzi yim vevie le lugbɔƒe si tsɔ ɖe Betlexem gbɔ. Ðeɖi te amewo ŋu ŋutɔ. Nuku yeye siwo mem wole ƒe ʋeʋe lilili na dɔwɔla siwo dɔ le wuwum la nya be nuɖuɣi ɖo. Amesiame gbɔna eƒe asinudɔwɔwɔ me tsonu ɖu ge.

Boas, si nye anyigbatɔ kesinɔtɔ aɖe, ɖu nu no nu ɖi ƒo eye wòle ɖiɖim ɖe eme le nuku gbogbo aɖe si woƒo ƒu ɖi la gbɔ. Emegbe nuŋeŋeŋkekea wu enu, eye amesiame di teƒe fafɛ aɖe be yeaɖaɖi ɖe eme. Boas, si ƒe dzi dze eme azɔ la, he avɔ tsyɔ hedɔ alɔ̃.

Adzame Gododo Aɖe

Boas nyɔ le zãtiƒe henɔ ƒoƒom kpakpakpa le vuvɔ ta. Nukutɔe la, ame aɖe ɖoe koŋ klo avɔ le eƒe afɔ ŋu, hemlɔ afima tututu! Esi mekpɔ amesi wònye la dze sii le vivitia me o ta la, ebia be: “Wò amekae?” Nyɔnu aɖe ɖo eŋu be: “Nye Rut, wò dɔlanyɔnue; keke wò avɔ ɖe wò dɔlanyɔnu dzi, elabena srɔ̃ɖia nènye.”—Rut 3:1-9.

Woawo ɖeɖe woƒo nu le vivitia me. Womedoa go nyɔnuwo le nɔnɔme sia me le lugbɔƒe o. (Rut 3:14) Ke hã, Boas ɖe mɔ na Rut be wòamlɔ eƒe afɔde vaseɖe esime wòkpɔtɔ vie fɔŋli naɖo be wòafɔ adzo ale be woaƒo asa na fɔbubu yakatsyɔ.

Lɔlɔ̃tɔwo ƒe gododo aɖee esia nyea? Ðe Rut—si nye ɖetugbi ahosi dahe si tso trɔ̃subɔdukɔ me—tsɔ ayedzedze ble ame tsitsi, kesinɔtɔ sia? Alo ɖe Boas nɔ didim be yeawɔ nɔnɔme si me Rut nɔ kple eƒe akogotsitsi le zã ma me ŋudɔ atsɔ anɔ agbegbegblẽ kplia? Kura o, ke boŋ nusi dzɔ la lɔ nuteƒewɔwɔ kple lɔlɔ̃ na Mawu ɖe eme. Eye kpeɖodziawo hã wɔ dɔ ɖe ame dzi ŋutɔ.

Gake amekae nye Rut? Nukae nye eƒe tameɖoɖo? Eye amekae nye kesinɔtɔ Boas sia?

“Nyɔnu Zãzɛ”

Ƒe aɖewo do ŋgɔ na nudzɔdzɔ sia la, dɔ to le Yuda. Israel-vi aɖe ƒe ƒome si me ame ene le—Elimelex; srɔ̃a Naomi; kple wo viŋutsu eve, Maxlon kple Xilion—woʋu yi Moab-nyigba si nyo la dzi. Viŋutsuawo ɖe Moab-nyɔnu eve, siwo nye Rut kple Orpa. Esi ŋutsu etɔ̃awo va ku le Moab emegbe la, nyɔnu etɔ̃awo se be nɔnɔmeawo ka ɖe eme le Israel. Eyata Naomi—si zu ahosi azɔ hele veve sem eye vi alo mamayɔvi mele esi o la—tso nya me be yeatrɔ ayi yewo de.—Rut 1:1-14.

Esi wonɔ mɔa dzi gbɔna Israel la, Naomi ƒoe ɖe Orpa nu be wòagbugbɔ ayi wo de. Emegbe  Naomi gblɔ na Rut bena: “Kpɔ ɖa, atsuwòsi gbugbɔ yina eƒe dukɔ kple eƒe Mawu gbɔ; gbugbɔ dze atsuwòsi yome.” Gake Rut gblɔ bena: “Megaƒoe ɖe nunye be, magblẽ wò ɖi . . . o! Ke boŋ afisi nayi la, afima mayi; . . . wò dukɔ anye nye dukɔ, eye wò Mawu anye nye Mawu; afisi naku ɖo la, afima maku ɖo, eye afima woaɖim ɖo.” (Rut 1:15-17) Eyata ahosi nublanuitɔ eveawo trɔ yi Betlexem. Le afima la, lɔlɔ̃ kple ɖetsɔleme si Rut ɖe fia lɔ̃xoa la wɔ dɔ ɖe aƒelikawo dzi ale gbegbe be wogblɔ be ‘ede ŋutsuvi adre nu na Naomi.’ Ame bubuwo gblɔ be enye “nyɔnu zãzɛ.”—Rut 3:11; 4:15.

Esi lu xaɣi ɖo le Betlexem la, Rut gblɔ na Naomi bena: “Mayi agble me aɖafɔ lu [siwo dzɔ ɖe anyigba] le amesi ave nunye la yome.”—Rut 2:2.

Nukutɔe la, eva Boas, si nye toa, Elimelex ƒe ƒometɔ, ƒe agble me. Ebia mɔ le dzikpɔlaa gbɔ be yeafɔ lu siwo dudu kɔ ɖe anyi la. Alesi wòɖo movevi le lua fɔfɔ me la ɖe dzesi, eye dɔdzikpɔla la kafu eƒe dɔwɔwɔ na Boas.—Rut 1:22–2:7.

Ametakpɔla Kple Nunala

Boas nye Yehowa subɔla dovevienu. Ŋdi sia ŋdi la, Boas doa gbe na eƒe nuŋelawo kple nya siawo be: ‘Yehowa nenɔ kpli mi!,’ eye woɖoa eŋu be; “Yehowa ayra wò!” (Rut 2:4) Esi Boas kpɔ alesi Rut ɖo movevi ɖe dɔ ŋui hese alesi wòwɔa nuteƒe na Naomi la, ena lu fɔfɔ ƒe mɔnukpɔkpɔ tɔxɛe. Ne míagblɔe kpuie la, egblɔ nɛ be: ‘Nɔ nye agble dzi; mehiã be nàyi agble bubuwo me o. Nɔ nye dɔlanyɔnuwo ŋu; ànɔ dedie le wo dome. Mede se na dɔlaŋutsuawo be woagaɖe fu na wò o. Ne tsikɔ le wuwòm la, woaku tsi si wodu vɛ la ƒe ɖe na wò.’—Rut 2:8, 9.

Rut bɔbɔ ɖe anyi hegblɔ be: ‘Aleke wòdzɔe be nève nye amesi nye amedzro nu alea gbegbe?’ Boas ɖo eŋu be: “Wogblɔ nusiwo katã nèwɔ na lɔ̃xowò le srɔ̃wò ƒe ku megbe kple alesi nègblẽ fofowò kple dawò kpakple mia de ɖi heʋu va dukɔ, si mènya tsã o gbɔ la nam. Yehowa naɖo wò nuwɔwɔ teƒe na wò, eye fetu didie le Yehowa, Israel ƒe Mawu, si ƒe aʋala te nèva sisi ge tso la, gbɔ na wò.”—Rut 2:10-12.

Boas menɔ agbagba dzem be yeana wòalɔ̃ ye o. Ðe wòkafui le anukwareɖiɖi me. Rut bɔbɔ eɖokui tso dzi blibo me heda akpe nɛ ɖe akɔfafa si dzi wòka ɖo nɛ la ta. Ebui be yemedze na esia hafi o eye wòyi edzi wɔ dɔa vevie wu. Emegbe, esi nuɖuɣi ɖo la, Boas yɔ Rut hegblɔ nɛ bena: “Te va natsɔ abolo asisi ataditsi aɖu.” Eɖu nu ɖi ƒo eye wòsusɔ ɖe ɖi be wòatsɔ ayi na Naomi le aƒeme.—Rut 2:14.

Kaka ŋkekea nawu enu la, Rut fɔ lu lita 22. Etsɔ woa kple nuɖuɖu si wòsusɔ ɖi la yi na Naomi le aƒeme. (Rut 2:15-18) Esi dzi dzɔ Naomi ɖe nu gbogboa ta la, ebia be: “Afikae  nèyi ɖafɔe le egbea? . . . Woayra amesi bu wò ale!” Esi Naomi se be Boas gbɔe la, egblɔ be: “Yehowa, si mete eƒe amenuveve agbagbeawo kple kukuawo o la, ayrae! . . . Ŋutsu la míaƒe ƒometɔe, eye mía srɔ̃ɖia wònye.”—Rut 2:19, 20.

“Dzudzɔƒe” Didi

Esi Naomi di vevie be yeadi “dzudzɔƒe,” alo nɔƒe si le dedie na ye lɔ̃xoyɔvia ta la, ewɔ mɔnukpɔkpɔa ŋudɔ tsɔ wɔ ɖoɖo be woagbugbɔ nuwo aƒle, si le ɖekawɔwɔ me kple Mawu ƒe Sea. (Mose III, 25:25; Mose V, 25:5, 6) Azɔ Naomi ɖo aɖaŋu na Rut le mɔ nyui ŋutɔ aɖe si wɔa dɔ ɖe ame dzi nu—si ahe Boas ƒe susu. Le dzadzraɖo si sɔ, kple mɔfiafia nyui xɔxɔ vɔ megbe la, Rut yi ɖe Boas ƒe lugbɔƒe le zã me. Ekpɔe wòle alɔ̃me. Eklo avɔ le eƒe afɔ helala be wòanyɔ.—Rut 3:1-7.

Esi Boas nyɔ la, ɖikeke mele eme o be ese kpɔɖeŋunu si Rut wɔ la gɔme tsɔ kpe ɖe eƒe biabia be ‘wòakeke eƒe avɔ ɖe eƒe dɔlanyɔnu dzi’ ŋu. Rut ƒe nuwɔna na Yudatɔ tsitsi la kpɔ agbanɔamedzi si le edzi abe nuxɔƒlela ene la dze sii, le esi wònye Rut srɔ̃, Maxlon, si trɔ megbe la ƒe ƒometɔe wònye ta.—Rut 3:9.

Boas menɔ mɔ kpɔm be Rut ava le zã ma me o. Ke hã, eƒe nuwɔna ɖee fia be Rut ƒe biabia be wòagbugbɔ ye axɔ la menye nu yeye kura nɛ o. Boas lɔ̃ faa be yeawɔ ɖe Rut ƒe biabiaa dzi.

Dzimaɖitsitsi aɖe anya dze le Rut ƒe gbe si wòtsɔ ƒo nui me, si ʋã Boas be wòaka ɖe edzi nɛ be: “Vinye, megavɔ̃ o! Mawɔ nusiwo katã nègblɔ la na wò; elabena nye dukɔ ƒe du blibo la nyae bena, nyɔnu zãzɛ nènye.”—Rut 3:11.

Be Boas bu Rut ƒe nuwɔnawo be wosɔ ŋutɔ la dze le eƒe nya siawo me be: “Yehowa ayra wò, vinye! Èɖe wò [nuteƒewɔwɔ ƒe] lɔlɔ̃ fia fifia wu tsã.” (Rut 3:10) Le nudzɔdzɔ gbãtɔ me la, Rut ɖe amenuveve, alo nuteƒewɔwɔ ƒe lɔlɔ̃, fia Naomi. Le nudzɔdzɔ mamlɛtɔa me la, eɖe eɖokui fia Boas, si tsi wui sã la, ɖokuitɔmadimaditɔe kple susu be eyae nye nuxɔƒlela la. Elɔ̃ faa be yeado ƒome ɖi na srɔ̃a, Maxlon, si ku la, kple na Naomi.

Nuxɔƒlela aɖe He Ðe Megbe

Le ŋufɔke la, Boas na woyi ɖayɔ eƒe ƒometɔ aɖe, si woyɔ be “Xɔ̃,” si do ƒome kplikplikpli kple Naomi wu eyama la vɛ. Boas gblɔ le dua me tɔwo kple dumegãwo ŋkume be: ‘Mebu be magblɔ gome si le asiwò be nàxɔ Elimelex ƒe anyigba aɖe aƒle le srɔ̃a Naomi si la na wò, elabena eva hiã be wòadzrae.’ Boas yi edzi be: ‘Àƒlea? Ne màƒlee o la, ekema maƒlee.’ Esi Xɔ̃ see la, egblɔ be yeaƒlee.—Rut 4:1-4.

Gake Xɔ̃ sia le nukunya aɖe se ge! Azɔ Boas gblɔ le ɖasefoawo katã ŋkume be: “Gbesigbe nàxɔ agblea aƒle le Naomi si la, gbemagbe nàxɔ Moab-nyɔnu Rut, si nye ame kuku  la srɔ̃ hã, ne ame kuku la ŋkɔ natsi eƒe domenyinu ŋu.” Esi ƒometɔ si tsɔ ɖe egbɔ wu la va te vɔvɔ̃ be ye ŋutɔ ƒe domenyinu me ava gblẽ ta la, eɖe asi le gome si le esi be wòaxɔe aƒle ŋu, hegblɔ be: “Nyemate ŋu axɔe o.”—Rut 4:5, 6.

Le kɔa nu la, ele be amesi gbe be yemagbugbɔe axɔ o la naɖe eƒe afɔkpa atsɔ na nɔvia. Eyata esi nuxɔƒlela la gblɔ na Boas be, ‘Xɔe na ɖokuiwò la,’ eɖe eƒe afɔkpa le afɔ tsɔ nɛ. Emegbe Boas gblɔ na ame tsitsiawo kple dua me tɔwo katã bena: “Miawoe nye ɖasefowo egbea be, mexɔ Elimelex ƒe nuwo katã kpakple Xilion kple Maxlon ƒe nuwo katã ƒle le Naomi si. Eye mexɔ Moab-nyɔnu Rut, Maxlon srɔ̃, hã wòzu srɔ̃nye, be ame kuku la ƒe ŋkɔ natsi eƒe domenyinu ŋu, . . . Miawoe nye ɖasefowo egbe.”—Rut 4:7-10.

Amesiwo katã nɔ agboa nu gblɔ na Boas be: “Yehowa nawɔ na nyɔnu, si le aƒewò me va ge la, abe Raxel kple Lea, nyɔnu, siwo kple eve ɖo Israel ƒe aƒe la tè dzi la ene! Wò alɔ nede dzi le Efrata, eye wò ŋkɔ nenyɔ le Betlexem.”—Rut 4:11, 12.

Le ameawo ƒe nyuidinamenyawo gbɔgblɔ megbe la, Boas ɖe Rut wòzu srɔ̃a. Edzi ŋutsuvi nɛ si wòva tsɔ ŋkɔ na be Obed, eye aleae Rut kple Boas va zu Fia Dawid kpakple Yesu Kristo mama kple tɔgbui.—Rut 4:13-17; Mateo 1:5, 6, 16.

“Fetu Dedie”

Le nuŋlɔɖi bliboa me la, Boas ɖee fia tso eƒe gbedodo na eƒe dɔwɔlawo dɔmenyotɔe dzi vaseɖe agbanɔamedzi si nye Elimelex ƒe ŋkɔa léle ɖe te dzi be yenye ame ɖedzesi—amesi doa vevie nu kple ŋusẽtɔ. Le ɣeyiɣi ma ke me la, enye ɖokuidziɖula, xɔsetɔ, kple nuteƒewɔla. Boas nye nunala, dɔmenyotɔ, agbenyuinɔla, eye wòwɔna ɖe Yehowa ƒe sededewo dzi bliboe.

Rut ɖe dzesi le lɔlɔ̃ si le esi na Yehowa, nuteƒewɔwɔ ƒe lɔlɔ̃ si le esi na Naomi, kple eƒe veviedodonu kple ɖokuibɔbɔ ta. Mewɔ nuku be amewo nyae be enye “nyɔnu zãzɛ” o. Meɖu “kuviabolo” o, eye le eƒe dɔ sesẽ wɔwɔ ta la, ekpɔ nane yi ɖana lɔ̃xoa dahe la. (Lododowo 31:27, 31) Le Naomi dzi kpɔkpɔ ƒe agbanɔamedzia tsɔtsɔ me la, Rut anya kpɔ dzidzɔ si dona tsoa nunana me.—Dɔwɔwɔwo 20:35; Timoteo I, 5:4, 8.

Kpɔɖeŋu nyui kae nye si míekpɔ le Rut ƒe agbalẽa me! Yehowa ɖo ŋku Naomi dzi. Rut xɔ “fetu dedie” heva zu Yesu Kristo mama. Boas kpɔ “nyɔnu zãzɛ” ɖe. Míawo ya la, míekpɔ xɔse ƒe kpɔɖeŋu nyui siwo wòle be míasrɔ̃ atso amesiawo gbɔ.

[Aɖaka si le axa 26]

Mɔkpɔkpɔ ƒe Dzesi Aɖe

Ne èsena le ɖokuiwò me be yele nɔnɔme madodzidzɔnamewo me tom la, Rut ƒe ŋutinyaa ate ŋu ana mɔkpɔkpɔ ya teti nasu asiwò. Eɖe dzesi abe Ʋɔnudrɔ̃lawo ƒe agbalẽa taƒoƒo vevi aɖe ene. Rut ƒe agbalẽa gblɔ alesi Yehowa zã ahosi tsɛ aɖe si tso dzronyigba si nye Moab dzi, be fia aɖe natso eme na eƒe dukɔa. Le etsɔtsɔ kpe ɖe Ʋɔnudrɔ̃lawo ƒe agbalẽa ŋu me la, Rut ƒe xɔse klẽ abe kekeli ene le ɣeyiɣi ma me.

To Rut ƒe ŋutinyaa xexlẽ me la, kakaɖedzi ate ŋu asu asiwò be aleke ke nɔnɔmeawo ɖasesẽe o, Mawu tsɔa ɖe le eme na eƒe amewo ɣesiaɣi eye wònaa eƒe tameɖoɖowo vaa eme.