Dzo kpo yi emenuwo dzi

Dzo kpo yi emenuawo dzi

“Fiaɖuƒe Gbeƒãɖela Veviedonulawo” Kpe Ta Dzidzɔtɔe

“Fiaɖuƒe Gbeƒãɖela Veviedonulawo” Kpe Ta Dzidzɔtɔe

 “Fiaɖuƒe Gbeƒãɖela Veviedonulawo” Kpe Ta Dzidzɔtɔe

AGBENƆNƆ, ganyawo, kple dunyahehe ƒe kuxiwo le fu ɖem na xexea ale gbegbe. Gake le tɔtɔ siawo katã me la, Yehowa Ðasefowo kpe ta ŋutifafatɔe le ŋkeke etɔ̃ ƒe “Fiaɖuƒe Gbeƒãɖela Veviedonulawo” Nutome Gã Takpekpewo me. Wowɔ kpekpe siawo le xexeame godoo tso May 2002 ƒe gɔmedzedze.

Takpekpeawo nye dzidzɔɣeyiɣiwo nyateƒe. Mina míadzro wɔna tuameɖo sia si wotu ɖe Biblia dzi la me kpuie.

Ŋkeke Gbãtɔ Te Gbe Ðe Yesu ƒe Veviedodonu Dzi

Takpekpea ƒe ŋkeke gbãtɔ ƒe tanyae nye “Srɔ̃ Míaƒe Aƒetɔ Yesu ƒe Veviedodonu.” (Yohanes 2:17) Nuƒo si nye “Mi Fiaɖuƒe Gbeƒãɖelawo, Dzi Nedzɔ Mi ɖe Miaƒe Ƒuƒoƒo Ðekae Ŋu” la kpe vavalawo vividoɖeameŋutɔe be woakpɔ gome le dzidzɔ si nɔa Mawu ƒe amewo ƒe takpekpewo me ɣesiaɣi la me. (Mose V, 16:15) Gbebiabia nyanyui gbeƒãɖela veviedonulawo kplɔ nuƒo sia ɖo.

Nuƒo si nye “Yehowa ƒe Nu Nenyo Ŋuwò Vevie” ɖe Psalmo 37:1-11 me kpukpuiawo me ɖekaɖeka. Wode dzi ƒo na mí be “dzi megaku” mí ɖe yeaɖi dzidzedze si nuvlowɔlawo kpɔna la ta o. Togbɔ be ame vɔ̃ɖiwo agblɔ alakpanyawo ɖe mía ŋu hã la, Yehowa ana amesiwo tututu nye eƒe ame wɔnuteƒewo la nadze nyuie le ɣeyiɣi aɖe megbe. Nuƒo si nye “Minye Akpedalawo” dzro alesi míate ŋu ada akpe na Mawui me. Ele be Kristotɔwo katã natsɔ “kafukafuvɔsa” anɔ Yehowa nam. (Hebritɔwo 13:15) Ke hã, ɣeyiɣi agbɔsɔsɔme si míetsɔna ɖoa anyi na Yehowa ƒe subɔsubɔdɔa nɔ te ɖe míaƒe ŋudzedzekpɔkpɔ kple nɔnɔmewo dzi.

Nuƒo tɔxɛa ƒe tanyae nye “Wode Veviedodonu ƒe Dzo Fiaɖuƒe Gbeƒãɖelawo Me.” Eɖee fia be Yesu Kristoe nye veviedodonu ƒe kpɔɖeŋuɖola nyuitɔ na mí. Esi woɖo Dziƒofiaɖuƒea anyi le ƒe 1914 me megbe la, ehiã be Kristotɔ vavãwo nado vevie nu aɖe gbeƒã nyanyui ma. Nuƒolaa he susu yi takpekpe si wowɔ le Cedar Point, Ohio, U.S.A., le ƒe 1922 me dzi heɖo ŋku amekpekpe si womaŋlɔ be o la dzi na mí be: “Miɖe Gbeƒã Fia la Kple Eƒe Fiaɖuƒea”! Esi ɣeyiɣiawo va le yiyim la, dzo si nɔ Mawu subɔla wɔnuteƒewo me ʋã wo be woaɖe gbeƒã Fiaɖuƒea ŋuti nyateƒe dodzidzɔname siawo na dukɔwo.

Nuƒo si nye “Migavɔ̃ O Elabena Míenya be Yehowa Li Kpli Mí,” si woƒo le ŋkeke gbãtɔ ƒe ŋdɔ me, ɖee fia be Mawu ƒe amewoe Satana tɔ ŋkui koŋ. Gake togbɔ be míedzea ŋgɔ tsitretsiɖeŋu hã la, ŋugbledede le xɔsetɔ geɖe siwo nɔ anyi le Biblia me kple egbeŋkekea me tɔwo ƒe kpɔɖeŋuwo ŋu dea dzi ƒo na mí be míekpea akɔ kple dodokpɔwo kpakple tetekpɔwo vɔvɔ̃manɔmee.—Yesaya 41:10.

Eyome nuƒo kpui si ƒe tanyae nye “Mixa ƒe Nyagblɔɖia Doa Ŋusẽ Mí be Míazɔ le Yehowa ƒe  Ŋkɔ Me,” si woma ɖe akpa etɔ̃ la kplɔe ɖo. Nuƒola gbãtɔa tsɔ alesi agbenyuinɔnɔ ƒe toyiyi, xɔsegbegbe, kple ŋutilãmenudidi vivivo nɔ le Mixa ŋɔli la sɔ kple míaƒe ɣeyiɣia. Egblɔ be: “Kakaɖedzi anɔ míaƒe etsɔme mɔkpɔkpɔa ŋu ne míena dzi ɖoto su mía si eye míekpɔa egbɔ be wokpɔ mí le anyinɔnɔ kɔkɔe kple mawusosroɖagbenɔnɔ me ɣesiaɣi—eye ne míeŋlɔ Yehowa ƒe ŋkekea ƒe vava be o.”—Petro II, 3:11, 12.

Nuƒo kpui evelia ƒola la tɔ asi alesi Mixa ƒo nu tsi tre ɖe Yuda kplɔlawo ŋu la dzi. Wowɔ ŋlɔmi le ame dahewo kple wɔnamanɔŋutɔwo ŋu. Gake Mixa gblɔe ɖi be tadeagu vavãtɔ aɖu dzi. (Mixa 4:1-5) Le ŋusẽ si Yehowa ƒe gbɔgbɔ kɔkɔea do mí ta la, míeɖoe kplikpaa be míaɖe gbeƒã mɔkpɔkpɔgbedasi sia si naa gbɔdzɔe ame la. Ke ne míese le mía ɖokui me be lãmegbegblẽ le fu ɖem na mí alo se le mía ɖokui me be míegbɔdzɔ le mɔ bubu aɖe nu ya ɖe? Nuƒola etɔ̃lia gblɔ be: “Yehowa ƒe nudidiwo mesesẽ akpa o eye míate ŋu awɔ wo dzi.” Eyi edzi dzro Mixa 6:8 ƒe akpa vovovoawo me, afisi míexlẽ le be: “Nusi ko dim Yehowa le tso asiwò la, enye be, nawɔ nusi le eteƒe, nalɔ̃ dɔmenyowɔwɔ, eye nabɔbɔ ɖokuiwò ɖe anyi ahazɔ le wò Mawu ŋku me.”

Esi xexeame ƒe agbe nyui manɔmanɔ ate ŋu akpɔ ŋusẽ ɖe Kristotɔwo dzi ta la, mí katã míekpɔ viɖe tso nuƒo si ƒe tanyae nye “Yi Edzi Nànɔ Agbe Dzadzɛ to Wò Dzi Ta Kpɔkpɔ Me” me. Le kpɔɖeŋu me, agbe dzadzɛ si míanɔ akpe ɖe mía ŋu be srɔ̃ɖeɖe si me dzidzɔ le nasu mía si. Abe Kristotɔwo ene la, mele be míabu etete akpɔ be míaƒo mía ɖokui ɖe gbɔdɔdɔ ƒe agbegbegblẽnɔnɔ me gɔ̃ hã ŋu gbeɖe o.—Korintotɔwo I, 6:18.

Nuƒo si nye “Kpɔ Nyuie le Amebeble Ŋu” ɖee fia be míebua nya totrowo, nyateƒe afã afãwo, kple alakpanya siwo xɔsegbelawo gblɔna nunyatɔe be wonye aɖi. (Kolosetɔwo 2:8) Nenema ke mele be míable mía ɖokui anɔ bubum be míate ŋu aɖi kɔ na míaƒe dzodzro vɔ̃wo emetsonuwo makpɔmakpɔe o.

 Ŋkeke gbãtɔ ƒe nuƒo mamlɛa ƒe tanyae nye “Subɔ Mawu Vavãtɔ Ðeka Kolia La.” Esi xexeame ƒe nɔnɔmewo yi edzi le gbegblẽm ɖe edzi la, aleke gbegbee wòdzɔa dzi na ame enye si be woanya be Yehowa ahe eƒe dzɔdzɔenyenye xexe yeyea vɛ kpuie! Amekawoe anɔ eme? Amesiwo subɔ Yehowa la ɖeɖekoe. Be wòakpe ɖe mía ŋutɔwo, mía viwo, kple míaƒe Biblia nusrɔ̃viwo ŋu be míaɖo taɖodzinu sia gbɔ la, nuƒola la ɖe nusrɔ̃gbalẽ yeye si nye Subɔ Mawu Vavã Ðeka Kolia La ɖe go. Aleke wòdzɔ dzi na mí enye si be míexɔe!

Ŋkeke Evelia Ƒo Nu tso Veviedodonu le Dɔ Nyuiwo Wɔwɔ me Ŋu

Tanya si nɔ takpekpea ƒe ŋkeke evelia si enye “Mido Vevie Nu le Dɔ Nyuiwo Wɔwɔ Me.” (Petro I, 3:13) Nuƒola gbãtɔ dzro ŋkekea ƒe mawunyakpukpuia me. Ete gbe ɖe edzi be gbesiagbe mawunyakpukpuia me dzodzro moveviɖoɖotɔe edziedzi dzia míaƒe veviedodonu ɖe edzi.

Eyome “Fiaɖuƒe Gbeƒãɖela Siwo Dea Bubu Woƒe Subɔsubɔdɔ Ŋu,” si nye nuƒo kpuiwo la kplɔe ɖo. Akpa gbãtɔ te gbe ɖe alesi wòhiãe be míawɔ Mawu ƒe Nya la ŋudɔ pɛpɛpɛe dzi. (Timoteo II, 2:15) Biblia si míazã nyuie la naa ‘wòkpɔa ŋusẽ’ ɖe amewo ƒe agbe dzi. (Hebritɔwo 4:12) Ele be míahe amewo ƒe susu ayi Biblia dzi ahaɖe eme kakaɖedzitɔe. Nuƒo kpuiawo ƒe akpa evelia de dzi ƒo na mí be míagbugbɔ ayi ɖetsɔlemetɔwo gbɔ edziedzi. (Korintotɔwo I, 3:6) Dzadzraɖo kple dzinɔameƒo hiã bene míate ŋu atrɔ ayi amesiwo katã tsɔ ɖe le eme la gbɔ enumake. Akpa etɔ̃lia kafui be míabu ame ɖesiaɖe si míado  goe la be ate ŋu azu nusrɔ̃la eye wòɖee fia be nuƒoƒo tso Biblia-nusɔsrɔ̃ ƒe ɖoɖoa ŋu le yiyi zi gbãtɔ me ate ŋu ana míava kpɔ dzidzɔ si le kpekpe ɖe amewo ŋu be woazu nusrɔ̃lawo me.

“Nusita Wòle Be ‘Míado Gbe Ða Madzudzɔmadzudzɔe’” enye nuƒo si kplɔe ɖo la ƒe tanya. Biblia de dzi ƒo na Kristotɔwo be woakpɔ Mawu sinu hena mɔfiame le woƒe agbenɔnɔ ƒe akpa sia akpa. Ehiã be míadi ɣeyiɣi na gbedodoɖa le mía ɖokui si. Gawu la, ele be míado gbe ɖa madzudzɔmadzudzɔe, elabena ɖewohĩ Yehowa ana míayi edzi anɔ gbea dom ɖa va ɖo ɣeyiɣi aɖe hafi míaxɔ eŋuti ŋuɖoɖo.—Yakobo 4:8.

Nuƒo si nye “Dzeɖoɖo Siwo Ku Ðe Gbɔgbɔmenuwo Ŋu Tua Ame Ðo” xlɔ̃ nu mí be míazã nuƒoƒo ƒe nunanaa wòaɖe vi na mía ŋutɔwo kple ame bubuwo. (Filipitɔwo 4:8) Ehiã be srɔ̃tɔwo kple ɖeviwo naɖo dze tso gbɔgbɔmenuwo ŋu gbesiagbe. Be woate ŋu awɔ esia la, ele be ƒomewo nadze agbagba aɖu nu ɖekae zi ɖeka ya teti gbesiagbe, si awɔe be woate ŋu aɖo dze tuameɖowo.

Ŋdi ƒe wɔnaa wu nu kple nuƒo dodzidzɔname si nye “Alesi Adzɔgbeɖeɖe Kple Nyɔnyrɔxɔxɔ Kplɔa Ame Yia Ðeɖekpɔkpɔ Mee.” Sidzedze su nyɔnyrɔxɔlawo si, woxɔ nusiawo dzi se, wotrɔ dzi me, woɖe asi le nugbegblẽwɔwɔ ŋu, eye wotsɔ wo ɖokuiwo ɖe adzɔgbee na Mawu. Nuƒola la gblɔ be le woƒe nyɔnyrɔxɔxɔ megbe la, ele be woayi edzi atsi le gbɔgbɔ me eye woalé woƒe veviedodonu kple agbenyuinɔnɔ me ɖe asi.—Filipitɔwo 2:15, 16.

Le ŋdɔ ma me la, wote gbe ɖe nyati vevi eve dzi le nuƒo si nye “Bɔbɔ Ðokuiwò, eye Nàna Wò Ŋku Dzi Nadza” me. Mía ɖokui bɔbɔ fia míaƒe gbɔdzɔgbɔdzɔwo kple ɖoƒe si le mía si le Mawu ŋkume la ŋuti nukpɔsusu si da sɔ si anɔ mía si. Ðokuibɔbɔ kpena ɖe mía ŋu be míana míaƒe ŋku dzi “nadza”—wòanɔ Mawu ƒe Fiaɖuƒea ŋu, ke menye ŋutilãmenuwo ŋu o. Ne míewɔ esia la, mahiã be míatsi dzimaɖi o, elabena Yehowa akpɔ míaƒe nuhiahiãwo gbɔ.—Mateo 6:22-24, 33, 34.

Nuƒola si kplɔe ɖo ɖe nusitae wòle be ‘Míaka Ðe Yehowa Dzi Bliboe le Xaxaɣiwo’ la me. Aleke míate ŋu anɔ te ɖe nuwo abe ame ŋutɔ ƒe gbɔdzɔgbɔdzɔwo kple ga alo lãmesẽ kuxiwo ene nui? Mina míabia Yehowa be wòana nunya si sɔ na agbenɔnɔ la mí eye míabia kpekpeɖeŋu tso ame bubuwo gbɔ. Le esi teƒe be míana dzidziƒoame alo dziɖeleameƒo naɖu mía dzi la, ele be míado ŋusẽ alesi míeka ɖe Mawu dzii to eƒe Nyaa xexlẽ me.—Romatɔwo 8:35-39.

Takpekpea ƒe nuƒo kpui mamlɛtɔ ƒe tanyae nye “Dodokpɔ Vovovowo Doa Míaƒe Xɔse ƒe Nyonyome Kpɔna.” Akpa gbãtɔ ɖo ŋku edzi na mí be  wotiaa Kristotɔ vavãwo katã yome. Enyea ɖaseɖiɖi, doa ŋusẽ míaƒe xɔse, henaa mɔnukpɔkpɔ mí be míaɖe míaƒe nuteƒewɔwɔ na Mawu afia. Togbɔ be míedea míaƒe agbe afɔku me yakatsyɔ o hã la, míato mɔ siwo mesɔ ɖe Ŋɔŋlɔawo nu o dzi aƒo asa na yometiti gbeɖe o.—Petro I, 3:16.

Nuƒo kpui siawo ƒe akpa evelia ƒola la ɖo biabia siwo ku ɖe akpaɖekedzimademade ŋu la ŋu. Kristotɔ gbãtɔwo menye aʋatsrilawo o, gake wonyae be yewotsɔ yewo ɖokui na Mawu keŋkeŋ. Nenema ke egbea la, Yehowa Ðasefowo léa gɔmeɖose si nye be “mietso xexeame o” la me ɖe asi sesĩe. (Yohanes 15:19) Esi wònye be míaƒe akpaɖekedzimademade ŋuti dodokpɔawo ate ŋu adzɔ le vome ta la, ele be ƒomewo nadi ɣeyiɣi atsɔ adzro mɔfiame siwo Biblia na le nya sia ŋu me. Abe alesi nuƒo kpui sia ƒe nuƒo etɔ̃lia ɖee fia ene la, menye Satana ƒe taɖodzinue nye be yeawu mí kokoko o, ke boŋ be yeazi mía dzi míazu nuteƒemawɔlawo. Ne míenɔ te ɖe fewuɖuɖu, agbegbegblẽnɔnɔ ƒe nyaƒoɖeamenuwo, seselelãme ƒe vevesese, kple lãmegbegblẽwo nu nuteƒewɔwɔtɔe la, míehea kafukafu vɛ na Yehowa.

Vividoɖeameŋu ƒe amekpekpe si nye “Te Ðe Yehowa Ŋu” enye ŋkekea ƒe nuƒo mamlɛa ƒe tanya. Yehowa ƒe nɔnɔme veviwo gɔmesese hea mí ɖe eŋu. Ezãa eƒe ŋusẽ triakɔ la tsɔ kpɔa eƒe amewo ta, vevietɔ le gbɔgbɔ me. Eƒe dzɔdzɔenyenye mele kpaɖii o, ke boŋ eʋãnɛ be wòaɖo agbe si nuwuwu meli na o la anyi na amesiame si wɔa nu le dzɔdzɔenyenye me la. Mawu ƒe nunya dze le mɔ si nu wòzã amegbetɔ madeblibowo tsɔ ŋlɔ Bibliae me. Nusi nyoa ame ŋu wu enye eƒe lɔlɔ̃, si ʋãe be wòwɔ ɖoɖo ɖe ameƒomea ɖeɖe to Yesu Kristo dzi ŋu. (Yohanes 3:16) Nuƒola la ɖe agbalẽ yeye dodzidzɔname si nye Te Ðe Yehowa Ŋu la ɖe go tsɔ wu enui.

 Ŋkeke Etɔ̃lia Ku Ðe Veviedodo le Dɔ Nyuiwo Wɔwɔ me Ŋu

Takpekpea ƒe ŋkeke etɔ̃lia ƒe tanyae nye “Amesiwo Doa Vevie Dɔ Nyui Wɔwɔ.” (Tito 2:14) Wotsɔ ƒome aɖe ƒe ŋkekea ƒe mawunyakpukpuia me dzodzro dze ŋdi wɔnaa gɔmee. Eyome nuƒo si nye “Ðe Nèɖoa Ŋu Ðe Yehowa Ŋua?” kplɔe ɖo. Dukɔwo ɖoa ŋu ɖe numaɖinuwo ŋu to dziɖoɖo ɖe woa ŋutɔwo ƒe nunya kple ŋusẽ ŋu me. Ke hã, Yehowa ƒe subɔlawo tsɔ dzinɔameƒo kple dzidzɔ ɖoa ŋu ɖe eyama ŋu togbɔ be wotoa afɔkuwo me hã.—Psalmo 46:2-4, 8-12.

Akpa si nye “Sɔhɛwo—Mitu Miaƒe Etsɔme ɖe Yehowa ƒe Habɔbɔa Dzi” ɖo biabia si nye: Aleke agbe awɔ adze edzi tututu na sɔhɛe? ŋu. Ga, nunɔamesiwo, kple ŋkɔxɔxɔ yometiti mate ŋu ahe esia vɛ nɛ o. Mía Wɔla la xlɔ̃ nu sɔhɛwo lɔlɔ̃tɔe be woaɖo ŋku ye dzi le woƒe sɔhɛmenɔɣi. Nuƒola la bia gbe ame aɖewo siwo do vevie Kristotɔwo ƒe subɔsubɔdɔa le woƒe sɔhɛmenɔɣi, eye míese dzidzɔ si wokpɔ. Aleke wòɖe vi enye si esi míexɔ trakt yeye si nye Sɔhɛwo—Agbemedɔ Kae Miawɔ?, si ŋu wotrɔ asi le be wòakpe ɖe sɔhɛ Ðasefowo ŋu be woaɖo etsɔme mavɔ aɖe ƒe gɔmeɖokpe anyi le Yehowa ƒe habɔbɔa me.

Eyome wowɔ Biblia me drama si he ame ƒe susu si nye “Nɔ Te Sesĩe le Xaxaɣiwo Me.” Eku ɖe dɔ si Yeremya wɔ ɣeyiɣi didi tso eƒe sɔhɛmenɔɣi ɖaseɖe Yerusalem ƒe tsɔtsrɔ̃ si ŋu nya wògblɔ ɖi veviedodotɔe ŋu. Yeremya se le eɖokui me be yemedze na yeƒe dɔdasia o, gake ewɔe de goe togbɔ be wotsi tre ɖe eŋu hã, eye Yehowa ɖee.—Yeremya 1:8, 18, 19.

Nuƒo si kplɔ dramaa ɖo enye “Nɔ Abe Yeremya Ene—Nàɖe Gbeƒã Mawu ƒe Nya la Vɔvɔ̃manɔmee.” Zi geɖe la, wogblɔa alakpanya kple ameflunya vɔ̃ɖiwo ɖe egbeŋkekea me Fiaɖuƒe gbeƒãɖelawo koŋ ŋu. (Psalmo 109:1-3) Gake míate ŋu akpe akɔ kple dziɖeleameƒo, abe Yeremya ene, to dzidzɔkpɔkpɔ ɖe Yehowa ƒe Nya ŋu me. Eye míeka ɖe edzi be amesiwo tsia tre ɖe mía ŋu la makpɔ dzidzedze o.

Dutoƒonuƒo si ƒe tanyae nye “Xexe Sia me ƒe Nɔnɔme Le Tɔtrɔm” sɔ ɖe ɣeyiɣia nu ŋutɔ. Tɔtrɔ ɖedzesiwo dzɔ le míaƒe ɣeyiɣia me. Biblia gblɔe ɖi be nɔnɔme siawo, tsɔ kpe ɖe “ŋutifafa kple anyinɔnɔ dedie” ƒe boblododowo ŋu, aɖo ta Mawu ƒe ʋɔnudrɔ̃ŋkeke dziŋɔa me. (Tesalonikatɔwo I, 5:3) Ahe tɔtrɔ wɔnukuwo—si nye aʋawɔwɔwo, nuvlowɔwɔ, ŋutasẽnuwɔwɔ, kple dɔléle gɔ̃ hã ƒe nuwuwu—vɛ. Ekema le esi teƒe be míaɖo ŋu ɖe nuɖoanyi sia ŋu la, fifiae wòle be míati mawusosroɖa yome ahayi edzi anɔ agbe dzadzɛ nɔm.

Takpekpea ƒe nuƒo mamlɛa si ƒe tanyae nye “Migba Go le Dɔ Nyuiwo Wɔwɔ me Mi Fiaɖuƒe Gbeƒãɖela Veviedonulawo” ye kplɔ kwasiɖaa ƒe Gbetakpɔxɔ nusɔsrɔ̃ totoɖeme ɖo. Nuƒola la ɖe alesi wɔnaa de dzo mía me le gbɔgbɔ me hede dzi ƒo na mí be míaɖo ŋu ɖe Yehowa ŋu la fia. Le etaƒoƒo me la, woxlɔ̃ nu mí be míanɔ dzadzɛ, alɔ̃ ame, ahanye Mawu ƒe Fiaɖuƒea ƒe gbeƒãɖela dovevienuwo.—Petro I, 2:12.

Abe alesi wònɔ le Yehowa subɔla siwo nɔ anyi le Nexemya ŋɔli gome ene la, míetsɔ dzidzɔ trɔ yi aƒee le gbɔgbɔmeyayra siwo míexɔ le “Fiaɖuƒe Gbeƒãɖela Veviedonulawo” Nutome Gã Takpekpea me ta. (Nexemya 8:12) Ðe takpekpe dedzoameme sia mena dzidzɔ kple tameɖoɖo kplikpaa be yeayi edzi anye Fiaɖuƒe gbeƒãɖela veviedonula yɔ mewò oa?

[Aɖaka/Nɔnɔmetata si le axa 23]

Nusrɔ̃gbalẽ Yeye Aɖe!

Le takpekpea ƒe ŋkeke gbãtɔ ƒe nuwuwu la, edzɔ dzi na vavalawo be woɖe agbalẽ yeye si nye Subɔ Mawu Vavã Ðeka Kolia La ɖe go. Wotrɔ asi le eŋu be woasrɔ̃e kple amesiwo wu Sidzedze si Kplɔa Ame Yia Agbe Mavɔ Me ƒe agbalẽa sɔsrɔ̃ nu, eye ɖikeke mele eme o be ado ŋusẽ “amesiwo ƒe nɔnɔme sɔ na agbe mavɔ kpɔkpɔ” la ƒe xɔse.—Dɔwɔwɔwo 13:48, NW.

[Afi Si Míexɔ Mɔɖeɖe Tso]

Image on book cover: U.S. Navy photo

[Aɖaka/Nɔnɔmetata si le axa 24]

Nusi Akpe Ðe Ŋuwò Nàte Ðe Mawu Ŋu

Takpekpea ƒe ŋkeke evelia ƒe nuƒo mamlɛa ƒola ɖe gbeƒã agbalẽ yeye si nye Te Ðe Yehowa Ŋu la ɖeɖe ɖe go. Ele akpa vevi ene me, eye akpa ɖesiaɖe ku ɖe Yehowa ƒe nɔnɔme veviawo dometɔ ɖeka—ŋusẽ, dzɔdzɔenyenye, nunya, kple lɔlɔ̃—ŋu. Ta aɖe le agbalẽa ƒe akpawo dometɔ ɖesiaɖe me si ɖe alesi Yesu Kristo ɖo kpɔɖeŋu nyui ɖi le Mawu ƒe nɔnɔmewo ɖeɖe fia le nuwɔna ŋutɔŋutɔ mee la me. Taɖodzinu si le agbalẽ sia ŋu koŋ enye be wòakpe ɖe mía kple míaƒe Biblia-nusrɔ̃viwo ŋu be míatu ƒomedodo si le kplikplikpli eye eme sẽ la ɖo le mía kple Yehowa Mawu dome.

[Aɖaka/Nɔnɔmetata siwo le axa 26]

Gbɔgbɔmemɔfiafia na Sɔhɛwo

Nusi ɖe dzesi le takpekpea ƒe ŋkeke etɔ̃lia ŋu enye trakt tɔxɛ aɖe si woɖe ɖe go si ƒe tanyae nye Sɔhɛwo—Agbemedɔ Kae Miawɔ? Trakt yeye sia, si ŋu wotrɔ asi le be wòakpe ɖe Ðasefo siwo nye sɔhɛwo ŋu be woawɔ nyametsotso siwo sɔ na woƒe etsɔme, la na Ŋɔŋlɔawo me ɖaŋuɖoɖo siwo ku ɖe agbemedɔ si woawɔ le Yehowa ƒe subɔsubɔdɔa me tegbee la ŋu.