Dzo kpo yi emenuwo dzi

Dzo kpo yi emenuawo dzi

Woɖo Eƒe Dzidodo Teƒe Nɛ

Woɖo Eƒe Dzidodo Teƒe Nɛ

 Woɖo Eƒe Dzidodo Teƒe Nɛ

Dzianukwaretɔ geɖe di be yewoƒe lɔlɔ̃tɔwo nasrɔ̃ nu tso Mawu ƒe tameɖoɖowo ŋu bena woakpɔ dzidzɔ le agbe me. Ne ame aɖe tsɔ eɖokui ɖe adzɔgbee na Mawu la, ame bubuwo, ɖeviwo kple tsitsiawo siaa, anya to woƒe agbenyuinɔnɔ dzi wɔ akpa aɖe le amea ƒe nyametsotso nyui ma wɔwɔ me godoo. Nenemae wònɔ le Jearim, si nye nyɔnuvi ƒewuivi aɖe si le Mexico, si tsɔ lɛta si gbɔna la na le Yehowa Ðasefowo ƒe ŋkeke ɖeka takpekpe tɔxɛ aɖe me, la gome:

“Medi be miakpɔ dzidzɔ kplim. Mina magblɔ nusitae na mi. Le ƒe wuienyi siwo va yi me, esime womekpɔ dzim haɖe o la, dzinyelawo srɔ̃ nyateƒea. Danye wɔ ŋgɔyiyi, eye emegbe mía kple fonye hã míewɔe. Mí katã míedoa gbe ɖa na Yehowa be fofonye hã nava nɔ agbemɔa dzi. Ƒe wuienyi va yi, eye egbea nye ŋkeke tɔxɛ aɖe na mí. Fofonye le nyɔnyrɔ xɔ ge. Meda akpe na Yehowa be mehe tsɔtsrɔ̃a vɛ hafi ŋkeke sia, si míekpɔ mɔ na ɣeyiɣi didi la, ɖo o. Yehowa, akpe na wò!”

Ðikeke mele eme o be le ƒeawo me la, gɔmeɖose si tso gbɔgbɔ me si dze le Petro I, 3:1, 2 ƒe nuxlɔ̃ame la nɔ susu me na ɖetugbivi sia ƒe ƒomea, si gblɔ be: “Mi nyɔnuwo la, mibɔbɔ mia ɖokui na mia ŋutɔwo mia srɔ̃wo, bena ne ame aɖewo meɖo to nya la o la, nyɔnuwo ƒe agbenɔnɔ nya aɖeke magblɔ la naɖe wo, esi wokpɔ miaƒe agbenɔnɔ dzadzɛ le vɔvɔ̃ me ɖa la.” Eye ɖikeke mele eme o be ɖetugbivi Jearim wɔ Mose V, 5:16 me nyawo dzi: “Bu fofowò kple dawò, abe alesi Yehowa, wò Mawu, de se na wò ene.” Ðikeke mele eme o be gɔmeɖose mawo ŋudɔwɔwɔ kpakple Yehowa sinu kpɔkpɔ dzigbɔɖitɔe he yayrawo vɛ na Jearim kple eƒe ƒomea.