Dzo kpo yi emenuwo dzi

Dzo kpo yi emenuawo dzi

Aleke Tamebubu Ŋutete Ate Ŋu Akpɔ Tawòe?

Aleke Tamebubu Ŋutete Ate Ŋu Akpɔ Tawòe?

 Aleke Tamebubu Ŋutete Ate Ŋu Akpɔ Tawòe?

ƑUTSOTSOE siwo mlina dea dzi la nya kpɔna ŋutɔ, gake enyea afɔku na ƒudzidelawo. Tsi dzeagbo mawo ate ŋu aɖe woƒe agbe ɖa.

Le mɔ sia tɔgbe nu la, Mawu subɔlawo ate ŋu adze ŋgɔ nuteɖeamedzi sesẽ siwo aɖi esiwo awu tsɔtsɔ na wo. Ànya de dzesii be dodokpɔ kple tetekpɔ geɖe vaa Kristotɔwo dzi tsiãna ɖe enu. Èdi be yeanɔ te ɖe wo nu sesĩe kple tameɖoɖo kplikpaa bene yemagadze go le gbɔgbɔ me o. (Timoteo I, 1:19) Tamebubu ŋutete nye ɖokuiwò taʋlinu ƒe akpa vevi aɖe. Nukae wònye, eye aleke wòwɔna sua ame si?

Woɖe Hebrigbe me nya mezim·mahʹ, si gɔme woɖe be ‘tamebubu ŋutete,’ la tso nya si gɔmee nye “be woawɔ ɖoɖo alo aɖo tame” me. (Lododowo 1:4) Eyata Biblia gɔmeɖeɖe aɖewo ɖe mezim·mahʹ gɔme be “ŋuɖɔɖɔɖo” alo “nukpɔkpɔdeŋgɔ.” Biblia ŋuti nunyala Jamieson, Fausset, kple Brown ɖɔ mezim·mahʹ be “ŋuɖɔɖɔɖo vevie si naa wote ŋu sina le vɔ̃dzɔɖeamedzi nu yina nyui gbɔ.” Esia bia be woabu nusiwo ava do tso míaƒe nuwɔnawo me gbaɖegbe alo enumake la ŋu. Ne tamebubu ŋutete le mía si la, míade ŋugble le míaƒe tameɖoɖowo ŋu nyuie hafi awɔ nu, vevietɔ ne ehiã be míawɔ nyametsotso vevi aɖewo.

Ne amesi si tamebubu ŋutete le wɔ nyametsotsowo ku ɖe etsɔme ŋu alo le nɔnɔme siwo me wòge ɖo fifia ŋu la, ebua afɔku alo mɔtetre siwo ate ŋu ado tso eme la ŋu gbã. Ne ete ŋu kpɔ afɔkuawo dze sii ko la, edia alesi wòawɔ aƒo asa na wo hebua ŋusẽ si wòakpɔ ɖe eƒe nutoa me kple amesiwo wòdea ha kplii dzi ŋu. Esia ana wòate ŋu anya afɔɖeɖe si me tsonuwo anyo eye ɖewohĩ wòahe Mawu ƒe yayra gɔ̃ hã vɛ la. Mina míade ŋugble le kpɔɖeŋu ŋutɔŋutɔ aɖewo si ɖe esia me la ŋu.

Ƒo Asa na Gbɔdɔdɔ ƒe Agbegbegblẽnɔnɔ ƒe Mɔ̃ La

Ɣeaɖewoɣi ya ƒoa ƒutsotsoe sẽŋuwo kpea tɔdziʋua. Yatsia ƒe ʋua ta lɔlɔ ate ŋu anyrɔ ʋua negbe ɖe wodze agbagba vevie ku ʋua kpe ya la.

Le esi míele xexe si me gbɔdɔdɔnuwɔnawo bɔ ɖo me ta la, míedzea ŋgɔ nɔnɔme sia tɔgbe. Gbesiagbe la, gbɔdɔdɔ ŋuti nukpɔsusuwo kple nɔnɔmetatawo doa kplamatse mí atraɖii. Míate ŋu aŋe aɖaba aƒu ŋusẽ si woate ŋu akpɔ ɖe gbɔdɔdɔ ƒe seselelãme siwo le mía me tso dzɔdzɔme dzi la dzi o. Ele be míazã tamebubu ŋutete atsɔ anɔ te ɖe tetekpɔa nu sesĩe tsɔ wu be míadze nɔnɔme do afɔku amewo me ko.

Le kpɔɖeŋu me, ŋutsu Kristotɔwo wɔa dɔ le amesiwo medea bubu nyɔnuwo ŋu o eye wobua wo abe nusiwo li na gbɔdɔdɔ dzaa ko ene la dome zi geɖe. Dɔwɔhatiwo ade fefenya madzetowo kple gbɔdɔdɔnya gbegblẽwo woƒe dzeɖoɖowo me. Nɔnɔme sia ate ŋu aƒã agbegbegblẽnɔnɔ ƒe susuwo ɖe Kristotɔ ƒe susu me mlɔeba.

 Ahiã be nyɔnu Kristotɔ hã nawɔ dɔ, esi awɔe be wòato nɔnɔme sesẽwo me. Ðewohĩ eya kple ŋutsu kpakple nyɔnu siwo ƒe agbenyuinɔnɔ ƒe dzidzenuwo mewɔ ɖeka kple etɔ o ye awɔ dɔ. Ðewohĩ eƒe nu dze eƒe dɔwɔhati ŋutsuwo dometɔ ɖeka ŋu. Le gɔmedzedzea me la, awɔ nu kplii ameŋububutɔe eye wòade bubu eŋu le eƒe subɔsubɔnukpɔsusuwo ta gɔ̃ hã. Alesi wòtsɔa ɖe le eme nɛ edziedzi hekpɔnɛ edziedzi ate ŋu aʋã nyɔnua wòadi be yeade ha kplii wu.

Abe Kristotɔwo ene la, aleke tamebubu ŋutete ate ŋu akpe ɖe mía ŋu le nɔnɔme siawo tɔgbe me? Gbã la, ate ŋu ana míakpɔ gbɔgbɔmefɔku siwo le eme la adze sii, eye evelia, ate ŋu aʋã mí míadzra ɖo ɖe afɔ siwo míaɖe ŋu ado ŋgɔ. (Lododowo 3:21-23) Le nɔnɔme siawo tɔgbe me la, ahiã be ame nana eƒe hadɔwɔlawo nanya be míaƒe dzidzenuwo to vovo le Ŋɔŋlɔawo me dzidzenu siwo le mía si ta. (Korintotɔwo I, 6:18) Míaƒe nuƒo kple agbenɔnɔ ate ŋu ana woade bubu gbedasi ma ŋu. Gakpe ɖe eŋu la, ahiã be míaɖe nuwɔwɔ kple dɔwɔhati aɖewo dzi akpɔtɔ.

Gake menye dɔwɔƒewo koe agbegbegblẽnɔnɔ ƒe nyaƒoɖeamenuwo le o. Woate ŋu ado mo ɖa ne srɔ̃tɔwo ɖe mɔ kuxiwo ɖu ɖekawɔwɔ si le wo dome dzi. Subɔla mɔzɔla aɖe gblɔ be: “Srɔ̃ɖeɖe me megblẽna dzro ko le vome o. Srɔ̃tɔawo dome anya nɔ kaklãm vivivi eye ƒã hafi woƒoa nu na wo nɔewo alo nɔa anyi ɖekae. Ðewohĩ woati ŋutilãmenunɔamesiwo yome be yewoatsɔ axe yewoƒe srɔ̃ɖeɖe me ʋe siae. Eye esi wònye ƒã hafi wokpena ɖe wo nɔewo ŋu ta la, woanɔ tetem ɖe ŋutsu alo nyɔnu bubuwo ŋu kplikplikpli.”

Subɔla bibi sia yi edzi be: “Ele be srɔ̃tɔwo nanɔ anyi edziedzi abu eŋu akpɔ nenye be nane le woƒe ƒomedodoa me gblẽm hã. Ele be woawɔ ɖoɖo ɖe alesi woate ŋu asrɔ̃ nu, ado gbe ɖa, ahaɖe gbeƒã ɖekae ŋu. Woakpɔ viɖe geɖe tso nuƒoƒo na wo nɔewo ‘le aƒeme, le mɔ dzi, ne womlɔ anyi, kple ne wofɔ me, abe alesi dzilawo kple ɖeviwo wɔna ene’ me.—Mose V, 6:7-9.

Tenɔnɔ Ðe Nusiwo Mele Be Kristotɔwo Nawɔ O Nu

Tsɔ kpe ɖe kpekpe ɖe mía ŋu be míanɔ te ɖe agbenyuinɔnɔ ƒe tetekpɔwo nu dzidzedzetɔe ŋu la, tamebubu ŋutete ate ŋu akpe ɖe mía ŋu hã be míanɔ te ɖe mía kple hati Kristotɔwo dome kuxiwo nu. Ne ya ƒo ƒutsotsoea ɖo ɖe tɔdziʋua megbe la, edaa ʋua yia ŋgɔ adãtɔe. Ƒutsotsoea ate ŋu akɔ ʋua megbe ɖe dzi ahahee ɖe akpa ɖeka. Esia naa ʋua trɔa axa dea ƒutsotsoeawo si awɔe be wòate ŋu anyrɔ.

Afɔku siwo tsoa afisiwo míebu o la ate ŋu ava míawo hã dzi. ‘Míetsɔa nusɔsɔ’ subɔa Yehowa aduadu kple mía nɔviŋutsu kple nɔvinyɔnu Kristotɔ wɔnuteƒe geɖewo. (Zefanya 3:9) Ne wo dometɔ ɖeka wɔ nane si mele be Kristotɔ nawɔ o la, adze abe míagate ŋu aka ɖe edzi o ene eye wòana míaxa nu vevie ŋutɔ. Alekee tamebubu ŋutete ate ŋu axe mɔ na mí be míayi vodada wɔ ge alo ase veve heliheli o?

Ðo ŋku edzi be “amegbetɔ aɖeke megbea nuvɔ̃wɔwɔ o.” (Fiawo I, 8:46) Eyata mele be wòawɔ nuku na mí be nɔvi Kristotɔ ate ŋu ado dziku na mí alo adze agɔ le mía dzi ɣeaɖewoɣi o. Ne míenya esia la, míate ŋu adzra ɖo ɖe eŋu ahade ŋugble le alesi wòle be míawɔ nui ŋu. Aleke apostolo Paulo wɔ nui esime nɔvia Kristotɔ aɖewo ƒo nu le eŋu le mɔ si avee ahaɖi gbɔ̃e nu? Le esi teƒe be wòaŋlɔ eɖokui be le gbɔgbɔ me la, eƒo nya ta be Yehowa ƒe ŋudzedzekpɔkpɔ ɖe ame ŋu le vevie wu amegbetɔ tɔ. (Korintotɔwo II, 10:10-18) Nɔnɔme sia akpe ɖe mía ŋu be míaƒo asa na nuwɔwɔ enumake ne wodo dziku na mí.

Ede sɔsɔ ge kple afɔ kikli. Ne míekli afɔ la, míebua nuwo ŋu nyuie le aɖabaƒoƒo gbãtɔ alo evelia me o. Gake ne vevesesea nu ɖiɖi la, míate ŋu abu tame ahawɔ ame nu. Nenema kee mele be míawɔ nu enumake ɖe nyagbɔgblɔ alo nuwɔna nuŋumabumabui ŋu o. Ke boŋ tɔ vie nàde ŋugble le nusi ado tso eme ne míewɔ wɔɖenui eŋumabumabui ŋu.

Malcolm, si nye dutanyanyuigblɔla hena ƒe geɖe, gblɔ nusi wòwɔna ne wodze agɔ le edzi.  “Afɔ gbãtɔ si meɖena enye be mabia nya aɖewo ɖokuinye be: Esi mía kple nɔvi sia ƒe amenyenye to vovo tae medo dziku ɖe eŋua? Ðe nusi wògblɔ la le vevie tututua? Ðe ŋusẽ si asrã kpɔ ɖe dzinyee le nye seselelãmewo hom ɖe dzia? Ðe màva se nyaa gɔme ɖe mɔ bubu nu le gaƒoƒo ʋɛ aɖewo megbea?” Abe alesi Malcolm kpɔe ene la, zi geɖe la, masɔmasɔa meva nyea nya vevi aɖeke o eye woate ŋu aɖe asi le eŋu. *

Malcolm gblɔ kpee be: “Ɣeaɖewoɣi la, togbɔ be medzea agba ɖesiaɖe be makpɔ nyaa gbɔ hã la, nɔvia ya kpɔtɔ léa mo fũm. Medzea agbagba be nyemana esia naɖe fu nam o. Ne menya wɔ nusiwo katã mate ŋui la, mebua nyaa le mɔ bubu nu. Mebua nyaa ɖe ‘nya suesue siwo gbɔ woate ŋu ava kpɔ emegbe la dome,’ wu esi mabui ɖe nye nya veviwo dome. Nyemana woaɖe fu na nye gbɔgbɔmemenyenye alo agblẽ nu le mía kple Yehowa kpakple nɔvinyewo dome ƒomedodo ŋu o.”

Abe Malcolm ene la, mele be míaɖe mɔ ame aɖe ƒe nuwɔna gbegblẽ naɖe fu na mí fũ o. Le hame ɖesiaɖe me la, nɔviŋutsu kple nɔvinyɔnu doviviɖeameŋu wɔnuteƒe geɖewo li. Enyea dzidzɔ be woanɔ Kristotɔwo ƒe agbe ‘ɖekae’ kpli wo. (Filipitɔwo 1:27) Ŋkuɖoɖo kpekpeɖeŋu si míaƒe Dziƒofofoa naa mí lɔlɔ̃tɔe dzi hã akpe ɖe mía ŋu be míabu nyawo ŋu nyuie.—Psalmo 23:1-3; Lododowo 5:1, 2; 8:12.

Xexeame ƒe Nuwo Malɔ̃malɔ̃

Tamebubu ŋutete ate ŋu akpe ɖe mía ŋu be míakpe akɔ kple ayemenyaƒoɖeamenu bubu. Ne yaa ƒo ƒutsotsoea ɖo ɖe meli ƒe axadzi la, woyɔnɛ be agbadzeke. Ne ƒua dze akɔ anyi la, agbadzeke ƒutsotsoe sia ate ŋu anɔ tɔdziʋua hem ɖa le mɔ dzi vivivi. Gake ne ahom le tutum hele ʋua ƒe axadzi lɔm la, agbadzeke ƒutsotsoea ate ŋu ana tɔdziʋua nanyrɔ.

 Nenema kee ne míena nyaƒoɖeamenu si nye be míase vivi na nusiwo katã le xexe vɔ̃ɖia si la, ŋutilãmenudidi ƒe agbenɔnɔ sia ate ŋu ate mí ɖa le gbɔgbɔmemɔa dzi. (Timoteo II, 4:10) Ne míelé ŋku ɖe eŋu o la, xexeame lɔlɔ̃ ate ŋu ana míava ɖe asi le míaƒe Kristotɔwo ƒe agbenɔnɔ ŋu keŋkeŋ. (Yohanes I, 2:15) Aleke tamebubu ŋutete ate ŋu akpe ɖe mía ŋui?

Gbã la, akpe ɖe mía ŋu míakpɔ afɔku siwo tututu míadze ŋgɔe. Xexeame zãa asitsamɔnu ɖesiaɖe si wòate ŋui be yeatsɔ able mía nui. Eyia edzi doa agbe si wòle be amesiame kloe nanɔ—si nye alesi kesinɔtɔwo nɔa agbe adegbeƒoƒotɔe, nu dzroamewo, kple ‘dzidzemegbenɔnɔ’—ɖe ŋgɔ. (Yohanes I, 2:16) Edoa amesiame, vevietɔ mía hatiwo kple aƒelikawo, ƒe ŋudzedzekpɔkpɔɖeameŋu ƒe ŋugbe na mí. Tamebubu ŋutete akpe ɖe mía ŋu be míagbe ameflunya sia ahaɖo ŋku ‘ga malɔ̃malɔ̃’ dzi na mí, esi wònye be Yehowa do ŋugbe na mí be ‘yemele mía gblẽ ge ɖi akpɔ o’ ta.—Hebritɔwo 13:5.

Evelia, tamebubu ŋutete axe mɔ na mí be míagadze amesiwo “tre mɔ tso nyateƒe la gbɔ” yome o. (Timoteo II, 2:18) Esesẽ ŋutɔ be míagbe amesiwo míelɔ̃ heka ɖe wo dzi la ƒe nya. (Korintotɔwo I, 15:12, 32-34) Ne ɖeko amesiwo ɖe asi le Kristotɔwo ƒe agbenɔnɔ ŋu kpɔa ŋusẽ ɖe mía dzi vie gɔ̃ hã la, ate ŋu ado kplamatse míaƒe gbɔgbɔmeŋgɔyiyi wɔwɔ eye wòado afɔku mí mlɔeba. Míate ŋu ava nɔ abe meli aɖe si tra vie ko tso afisi wòɖo tae la gbɔ esi wòho teti. Le mɔ didi aɖe zɔzɔ megbe la, afisi wòatra aɖo kple afisi wòle be wòadze la dome adidi ŋutɔ.—Hebritɔwo 3:12.

Tamebubu ŋutete ate ŋu akpe ɖe mía ŋu míanya afisi míele le gbɔgbɔmegɔmesese nu kple afisi míeɖo tae. Ðewohĩ míekpɔe dze sii be ehiã be míakpɔ gome le Kristotɔwo ƒe dɔwɔnawo me geɖe wu. (Hebritɔwo 6:11, 12) Kpɔ alesi Ðasefo sɔhɛ aɖe zã tamebubu ŋutete wòkpe ɖe eŋu be wòaɖo gbɔgbɔmetaɖodzinuwoe ɖa: “Mɔnukpɔkpɔ su asinye be masrɔ̃ nyadzɔdzɔwo ŋɔŋlɔ ƒe dɔ. Esia dze ŋunye ŋutɔ, gake meɖo ŋku Biblia me kpukpui aɖe dzi si gblɔ be “xexeame va yina,” gake “amesi wɔa Mawu ƒe lɔlɔ̃nu la, nɔa anyi yi ɖe mavɔmavɔ me.” (Yohanes I, 2:17) Mebui be ele be alesi manɔ nye agbee naɖe nye dzixɔsewo afia. Dzinyelawo ɖe asi le Kristotɔwo ƒe xɔsea ŋu, eye nyemedi be madze woƒe kpɔɖeŋua yome o. Eyata meɖoe kplikpaa be manɔ agbe si ŋu tameɖoɖo le ahaƒo ɖokuinye ɖe ɣeyiɣiawo katã ƒe subɔsubɔdɔa me anye gbesiagbe mɔɖela. Le ƒe ene siwo me mekpɔ dzidzedze le megbe la, menyae be mewɔ tiatia nyuitɔa.”

Akɔ Kpekpe Kple Gbɔgbɔ me Ya Sesẽwo Dzidzedzetɔe

Nukatae wòhiã kpata be míawɔ tamebubu ŋutete ŋudɔ egbea? Ehiã be ƒudzidelawo nanɔ ŋudzɔ ɖe afɔkudzesiwo ŋu, vevietɔ ne ya sesẽwo te ƒoƒo. Ne vuvɔ te wɔwɔ eye ya te ƒoƒo sesĩe la, wodoa abala na tɔdziʋua hedzrana ɖo ɖe afɔkua ŋu. Nenema kee wòle be míadzra ɖo akpe akɔ kple nyaƒoɖeamenu sesẽwo esi nuɖoanyi vɔ̃ɖi sia le eƒe nuwuwu ɖom. Ameƒomea ƒe agbenɔnɔ le gbegblẽm ɖe edzi, eye ‘ame vɔ̃ɖiwo le vɔ̃ɖivɔ̃ɖim ɖe edzi wu.’ (Timoteo II, 3:13) Abe alesi ko ƒudzidelawo ɖoa to sea yame ƒe nɔnɔmewo ŋuti nyatakakawo edziedzii la, ele be míawɔ ɖe Mawu ƒe Nya si tso gbɔgbɔ me la me nyagblɔɖi nuxlɔ̃ameawo dzi.—Psalmo 19:8-12.

Ne míezã tamebubu ŋutete la, míewɔa sidzedze si kplɔa ame yia agbe mavɔ me la ŋudɔ. (Yohanes 17:3) Míate ŋu akpɔ kuxiwo ado ŋgɔ ahatso nya me le alesi míakpɔ wo gbɔe ŋu. Esia awɔe be míaɖoe kplikpaa be míatra tso Kristotɔwo ƒe agbenɔnɔ gbɔ o, eye míate ŋu aɖo “gɔmeɖoɖoanyi nyui hena ɣeyiɣi si gbɔna” to gbɔgbɔmetaɖodzinuwo ɖoɖo kple wo yometiti me.—Timoteo I, 6:19.

Ne míelé nunya si sɔ na agbenɔnɔ kple tamebubu ŋutete me ɖe asi la, mahiã be ‘míavɔ̃ na ŋɔdzinu siwo ƒona ɖi kpoyi’ la o. (Lododowo 3:21, 25, 26) Ke boŋ ŋugbe si Mawu do la afa akɔ na mí be: “Ekema nunya age ɖe wò dzi me, eye sidzedze avivi wò luʋɔ nu. Tamebubu akpɔ dziwò.”—Lododowo 2:10, 11.

[Etenuŋɔŋlɔ]

^ mm. 19 Ele be Kristotɔwo nadze agbagba awɔ ŋutifafa, le ɖekawɔwɔ me kple aɖaŋuɖoɖo si le Mateo 5:23, 24. Ne nuvɔ̃ gã aɖee le nyaa me la, woadze agbagba be yewoaɖe wo nɔvia, abe alesi wogblɔe ɖe Mateo 18:15-17 ene. Kpɔ October 15, 1999, ƒe Gbetakpɔxɔ, axa 17-22.

[Nɔnɔmetata si le axa 23]

Dzeɖoɖo edziedzi tua srɔ̃ɖeɖe ɖo