Dzo kpo yi emenuwo dzi

Dzo kpo yi emenuawo dzi

Èxɔ Mawu Vavã la Dzi Sea?

Èxɔ Mawu Vavã la Dzi Sea?

 Èxɔ Mawu Vavã la Dzi Sea?

Amesiwo Amerika Blemanuwo Kple Dzɔdzɔmenuwo Dzraɖoƒe dɔ be woayi aɖasrɔ̃ nu tso Arctic-nyigba si ŋu anyigbayeyedila Robert E. Peary gblɔ le be yeke ɖo anɔ ƒe adre do ŋgɔ, le ƒe 1906 me la, dze woƒe mɔzɔzɔa egɔme.

PEARY nɔ Cape Colgate si le Dziehe Amerika ƒe dzieheɣetoɖoƒe ʋĩ eye wòkpɔ nusi dze abe anyigba aɖe si le didiƒe la ƒe towo tame si fu ɣi ene. Ena ŋkɔe be Crocker-nyigba, si nye amesiwo da megbe nɛ le ganyawo gome dometɔ ɖeka ƒe ŋkɔ. Aleke gbegbe amedɔdɔ siwo kplɔe ɖo la gli kple dzidzɔ esi wokpɔ togbɛwo, baliwo, kple to siwo tame sno yɔ fũ le adzɔge ʋĩ enye esi! Gake eteƒe medidi o, wova de dzesii be nusi kpɔm yewole la nye Arctic ƒe bleziblezi dzro aɖe ko. Nukpɔkpɔ sia si tso yame ƒe nɔnɔmea gbɔ la flu Peary, eye fifia wogblẽ ɣeyiɣi, ŋusẽ, kple nunɔamesiwo tsɔ le nusi menye nu ŋutɔŋutɔ o la dim.

Egbea la, ame geɖe tsɔa wo ɖokui kple ɣeyiɣi kea mawu siwo woxɔ se be wonye nu ŋutɔŋutɔwo. Amewo subɔna mawu siwo nye Yupiter kple Merkurio le Yesu ƒe apostoloawo ƒe ŋkekeawo me. (Dɔwɔwɔwo 14:11, 12) Egbea la, mawu siwo Shinto, Hindu, kple xexeame ƒe subɔsubɔha bubuwo me nɔlawo subɔna la ade miliɔn nanewo. Nyateƒee, abe alesi Biblia gblɔ ene la, ‘mawu geɖewo kple aƒetɔ geɖewo li.’ (Korintotɔwo I, 8:5, 6) Ðe nusiawo katã ate ŋu anye mawu vavãwoa?

Mawu Siwo ‘Mate Ŋu Aɖe Ame O’

Le kpɔɖeŋu me, de ŋugble le legbawo alo dzesiwo zazã le tadedeagu me ŋu kpɔ. Le amesiwo xɔa legbawo dzi sena alo doa gbe ɖa toa wo dzi gome la, wole na wo abe ɖela siwo ƒe ŋusẽ triakɔ wu amegbetɔ tɔ, siwo ate ŋu aɖo eteƒe na amewo alo aɖe wo tso afɔku me ene. Gake nyateƒee wònye be woate ŋu aɖe amea? Hakpala la dzi ha le nusiawo ŋu be: “Dukɔwo ƒe legbawo nye klosalo kple sika, amegbetɔwo  ƒe asinudɔwɔwɔwo wonye. Nu li na wo, womeƒoa nu o; ŋku li na wo, womekpɔa nu o; to li na wo, womesea nu o; eye gbɔgbɔa ɖeke hã mele woƒe nu me o.” Nyateƒee, wonye mawu siwo ‘mate ŋu aɖe ame o.’—Psalmo 135:15-17; Yesaya 45:20.

Ele eme baa be amesiwo wɔa legbawo ate ŋu agblɔ be agbe kple ŋusẽ le yewoƒe asinudɔwɔwɔwo si. Eye amesiwo dea ta agu na legbawo ɖoa dzi ɖe wo ŋu. Nyagblɔɖila Yesaya gblɔ le legbawo ŋu be: “Wokɔe ɖo abɔta, eye wode ta ete ɖadro ɖe enɔƒe.” Egagblɔ kpee be: “Etsia tre ɖi meʋãna tsoa eteƒe o. Ne ame aɖe do ɣli nɛ hã, mesenɛ o, eye meɖenɛ tsoa eƒe hiã la me o.” (Yesaya 46:7) Nyateƒeae nye be agbe mele legba me o, eɖanye aleke ke amesiwo xɔa wo dzi sena doa vevie nu o. Nukpakpɛ kple kpememe mawo katã nye ‘mawu dzodzrowo.’—Xabakuk 2:18.

Modzakaɖela kple kamedefefewɔla xɔŋkɔwo, dunyahenuɖoanyiwo, kple subɔsubɔhakplɔla aɖewo tsɔtsɔ wɔ mawui, bubudede wo ŋu fũ, alo tadedeagu na wo gɔ̃ hã bɔ egbea. Gawu la, ga nye mawu na ame geɖe. Le wo dometɔ ɖesiaɖe gome la, wowɔa legba siawo wodzena nusiwo womenye ŋutɔŋutɔ o. Womewɔa naneke na amesiwo xɔa wo dzi sena heɖoa ŋu ɖe wo ŋu o eye womate ŋu awɔ naneke na wo. Le kpɔɖeŋu me, kesinɔnu ate ŋu adze abe kuxi geɖewo gbɔ kpɔnu ene, gake kesinɔnuwo ƒe ŋusẽ nye beble. (Marko 4:19) Numekula aɖe bia be: “Aleke míaɖe nyateƒenya si wònye be ame geɖe ŋutɔwo le nane dim, eye woxɔe se be akpɔ nusianu gbɔ na yewo, gake ne woƒe asi su edzi la, wòhea mɔkpɔkpɔbuɖeame kple nuveviwɔame vovovowo vɛ, la mee?” Ẽ, kesinɔnuwo didi ana be ame natsɔ nusiwo ŋu viɖe xɔasi le la asa vɔe, abe lãmesẽ nyui me nɔnɔ, ƒomegbenɔnɔ si me dzidzɔ le, xɔlɔ̃ kplikplikpliwo, alo ƒomedodo xɔasi me nɔnɔ kple Wɔla la ene. Ðeko eƒe mawua va zua “yakanu dzodzrowo.”—Yona 2:9.

“Ame Aɖeke Metɔ O”

Enye bometsitsi be woayɔ nusi menye nu vavã o la be nu vavã. Amesiwo dea ta agu na Baal le nyagblɔɖila Eliya ŋɔli srɔ̃ nusia to nuteƒekpɔkpɔ sesẽ aɖe me. Woxɔe se vevie be ŋusẽ le Baal si be wòana dzo nage tso dziƒo ava fiã vɔsalã la. Le nyateƒe me, “woyɔ Baal ŋkɔ vaseɖe ɣeɖota le gbɔgblɔm bena: Baal, tɔ na mí!” Ðe to si sea nu kple nu si ƒoa nu le Baal sia? Nuŋlɔɖia yi edzi be: “Gbea ɖeke meɖi o, ame aɖeke metɔ o.” Nyateƒee, “amea ɖeke meɖo to o.” (Fiawo I, 18:26, 29) Baal meli ŋutɔŋutɔ o, mele agbe o eye ŋusẽ mele eŋu o.

Aleke gbegbe wòle vevie be míanya Mawu vavã la eye míasubɔe enye esi! Gake amekae wònye? Eye aleke kaka ɖe eyama dzi aɖe vi na míi?

[Nɔnɔmetata siwo le axa 3]

Peary ƒe zɔhɛ Ehingwah nɔ ŋku lém ɖe nu ŋu tso didiƒe ʋĩ nɔ anyigba yeye dim

Robert E. Peary

[Afi Si Míexɔ Mɔɖeɖe Tso]

Egingwah: From the book The North Pole: Its Discovery in 1909 Under the Auspices of the Peary Arctic Club, 1910; Robert E. Peary: NOAA

[Nɔnɔmetata siwo le axa 4]

Nusiwo wotsɔ wɔ mawui le xexe sia me flua ame geɖe