Dzo kpo yi emenuwo dzi

Dzo kpo yi emenuawo dzi

Ðe Nàte Ŋu Ana Xexeame Nanyo Wua?

Ðe Nàte Ŋu Ana Xexeame Nanyo Wua?

 Ðe Nàte Ŋu Ana Xexeame Nanyo Wua?

“Dunyahehe mete ŋu na amewo dome ƒomedodo ɖɔ ɖo o. Ŋutete mele esi be wòaɖɔ agbenyuinɔnɔ ƒe dzidzenuwo ɖo o. Dziɖuɖuɖoɖo nyuitɔ kekeake mate ŋu agbugbɔ alesi wobua zɔzɔ do ŋgɔ na srɔ̃ɖeɖe tsã alo srɔ̃ɖeɖe aɖo eteƒe, wòana vifofowo natsɔ ɖe le eme na wo viwo o, wòagbugbɔ fuléle vɔ̃ alo dzitsinya ƒe fɔbubu ame aɖo eteƒe abe alesi wònɔ tsã ene o . . . Se mate ŋu aɖe kuxi akpa gãtɔ siwo ɖea fu na mí le agbenyuimanɔmanɔ ta la ɖa o.”

ÀLƆ̃ ɖe ŋutsu aɖe si wɔa kpekpeɖeŋudɔ aɖe na United States dziɖuɖua tsã ƒe nya mawo dzia? Ne nenemae la, ke nukae nye kuxi gbogbo siwo ŋukeklẽ, ame malɔ̃malɔ̃ si le ƒomewo me, agbeblibanɔnɔ, manyamanya, kple nɔnɔme gbegblẽ bubu siwo le nu gblẽm le ameƒomea ƒe ƒomedodo ŋu hena vɛ la gbɔ kpɔnu? Ame aɖewo susu be egbɔkpɔnu aɖeke meli o, eyata woyia woƒe gbesiagbegbenɔnɔ dzi alesi woate ŋui. Bubuwo le mɔ kpɔm be gbeɖeka dziɖula tagbɔɖaɖɛtɔ ŋusẽ nyui kpɔɖeamedzila aɖe, alo subɔsubɔhakplɔla aɖe gɔ̃ hã ava eye wòakplɔ amewo le mɔ nyuitɔ nu.

Le nyateƒe me, ƒe akpe evee nye si va yi la, amewo di be yewoalé Yesu Kristo aɖo fiae elabena wokpɔe dze sii be Mawue dɔe ɖa eyata edze anye dziɖula nyui aɖe. Gake esi Yesu de dzesi nusi nɔ woƒe susu me la, ewɔ kaba hesi le wo gbɔ. (Yohanes 6:14, 15) Egblɔ na Roma dziɖula aɖe emegbe be: “Nye fiaɖuƒe metso xexe sia me o.” (Yohanes 18:36) Gake egbea la, ame ʋɛ aɖewo koe te ŋu tsoa nya me abe alesi Yesu wɔe ene—subɔsubɔhaŋgɔnɔla siwo gblɔna be eyomedzelawoe yewonye gɔ̃ hã mete ŋui o. Wo dometɔ aɖewo tee kpɔ be yewoana xexe sia nanyo wu, esime wodze agbagba be yewoakpɔ ŋusẽ ɖe dziɖulawo dzi alo woa ŋutɔwo nɔ dziɖuɖunɔƒewo. Míate ŋu akpɔ esia ne míelé ŋku ɖe ƒe 1960 kple 1970-awo me nudzɔdzɔwo ŋu.

Subɔsubɔhawo ƒe Agbagbadzedze be Yewoaɖɔ Xexeame Ðo

Le ƒe 1960-awo ƒe nuwuwu la, mawunyaŋununyala aɖewo siwo tso Latin-Amerika dukɔ aɖewo me tso be yewoaʋli ame dahewo kple amesiwo wote ɖe anyi ta. Be woate ŋu awɔ esia la, woto ablɔɖenana ƒe mawuŋunufiafia vɛ, nufiafia si me woƒoa nu tso Yesu ŋu le be menye Biblia ƒe nukpɔsusu nu koe wònye ɖela le o ke boŋ be enyee le dunyahehe kple le ganyawo gome hã. Le United States la, sɔlemeha ŋgɔnɔla aɖewo siwo va tsi dzi vevie le alesi agbenyuinɔnɔ ƒe dzidzenuwo le gbegblẽm ta la va ɖo habɔbɔ aɖe si woyɔna be Agbenyuinɔnɔ Dzidela Gbogbotɔ. Habɔbɔa ƒe taɖodzinue nye be yeakpɔ egbɔ be amesiwo awɔ ƒomegbenɔnɔ ŋuti se nyuiwo nanɔ dziɖuɖunɔƒewo. Nenema ke ƒuƒoƒo aɖewo dze agbagba le Moslem-dukɔ geɖe me be yewoatsi nufitifitiwɔwɔ kple nugbɔmewɔwɔ nu to dzidede ƒo na amewo be woalé Koran ƒe sewo me ɖe asi sesĩe me.

Ðe nèxɔe se be nuwo nyo wu le xexeame le agbagbadzedze mawo taa? Ne míagblɔe gbadzaa la, kpeɖodziwo ɖee fia be agbenyuinɔnɔ ƒe dzidzenuwo le gbegblẽm ɖe edzi, kesinɔtɔwo le ho kpɔm ɖe edzi eye ame dahewo hã le ahe dam ɖe edzi le dukɔ siwo me ablɔɖenana ƒe mawuŋunufiafia xɔ aƒe ɖo wu gɔ̃ hã me.

 Esi Agbenyuinɔnɔ Dzidela Gbogbotɔ habɔbɔa do kpo eƒe taɖodzinuwo gbɔ kpɔkpɔ le United States ta la, Jerry Falwell, si nye eɖola, gbã habɔbɔa le ƒe 1989 me. Habɔbɔ bubuwo va xɔ ɖe eteƒe. Ke hã Paul Weyrich, amesi to nyagbe “agbenyuinɔnɔ dzidela gbogbotɔ” vɛ ŋlɔ le Christianity Today magazine me be: “Ne míeɖu dzi le dunyahehe me kura gɔ̃ hã la, míaƒe aʋadziɖuɖua mete ŋu naa dziɖuɖuɖoɖo siwo míexɔ se be wole vevie wɔa dɔ o.” Egagblɔ hã be: “Toyiyi dzi koe dekɔnuwo le ɖe edzi. Míele ɣeyiɣi si me dekɔnuwo dome gblẽ wu ɖesiaɖe me, edome gblẽ ale gbegbe be eƒe gbegblẽ ƒo dunyahehe ta sã.”

Nyadzɔdzɔ kple agbalẽ ŋlɔla Cal Thomas ɖe nusi wòkpɔ be enye vodada vevitɔ le agbagbadzedze be woato dunyahehe dzi aɖɔ nuwo ɖo le ameƒomea dome gblɔ be: “Tɔtrɔ ŋutɔŋutɔ dzea egɔme tsoa ame ɖekaɖekawo dzi, ke menye to dzi ɖuɖu le dunyahenyawo me o, elabena menye ganya kple dunyahehe ŋue míaƒe kuxi vevitɔwo ku ɖo o ke boŋ eku ɖe agbenyuinɔnɔ kple gbɔgbɔmedzidzenu veviwo ŋu.”

Gake aleke woate ŋu akpɔ agbenyuinɔnɔ kple gbɔgbɔme kuxiwo gbɔ le xexe si me dzidzenuwo meli o me, afisi amesiame wɔa nyui kple vɔ̃ ŋuti nyametsotso na eɖokui le? Ne ŋusẽkpɔɖeamedzilawo kple tamenyuiɖolawo—woɖanye subɔsubɔhawo alo womeɖanyee o—mete ŋu na xexe sia nyo wu ŋutɔŋutɔ o ɖe, ke amekae ate ŋui? Ŋuɖoɖoa li, abe alesi míakpɔe le nyati si kplɔe ɖo me ene. Le nyateƒe me, eku ɖe nusi koŋ ta Yesu gblɔ be yeƒe Fiaɖuƒe metso xexe sia me o ŋu.

 [Nɔnɔmetata Tsoƒe si le axa 2]

COVER: Dirty water: WHO/UNICEF photo; globe: Mountain High Maps® Copyright © 1997 Digital Wisdom, Inc.

[Nɔnɔmetata Tsoƒe si le axa 3]

Children: UN photo; globe: Mountain High Maps® Copyright © 1997 Digital Wisdom, Inc.