Dzo kpo yi emenuwo dzi

Dzo kpo yi emenuawo dzi

Aʋadziɖuɖu le Dziɖuɖu ƒe Dukplɔsetakpɔʋɔnudrɔ̃ƒe

Aʋadziɖuɖu le Dziɖuɖu ƒe Dukplɔsetakpɔʋɔnudrɔ̃ƒe

 Aʋadziɖuɖu le Dziɖuɖu ƒe Dukplɔsetakpɔʋɔnudrɔ̃ƒe

YEHOWA ÐASEFO siwo le Germany kpɔ aʋadziɖuɖu ɖedzesi aɖe le Dziɖuɖu ƒe Dukplɔsetakpɔʋɔnudrɔ̃ƒe le Karlsruhe. Eyata woɖe afɔ vevi aɖe ku ɖe wo dede agbalẽ me le setɔwo gbɔ ŋu.

Ƒe 100 kple edzivɔ sɔŋ ye Yehowa Ðasefowo le dɔ wɔm le Germany. Wonɔ te ɖe yometiti sesẽ siwo wohe va wo dzi le ƒe alafa 20 lia me dzizizidziɖuɖu—siwo nye Dukɔa ƒe Sosialist kple Kɔmiunist dziɖuɖuwo—te la nu. Tso ƒe 1990 me ke la, Ðasefoawo nɔ agbagba dzem be woade yewo ƒe habɔbɔa agbalẽ me le se nu. Le dzi ɖuɖu le ʋɔnunya eve kple ɖeka si me womekpɔ dziɖuɖu le o megbe la, Ðasefoawo bia be woagbugbɔ nyaa adrɔ̃ le Dziɖuɖu ƒe Dukplɔsetakpɔʋɔnudrɔ̃ƒe, eye ʋɔnudrɔ̃ƒea ɖe gbeƒã eƒe afiatsotso le December 19, 2000, dzi.

Afiatsotso si Dzi Ʋɔnudrɔ̃lawo Katã Da Asi Ðo na Yehowa Ðasefowo

Ʋɔnudrɔ̃ƒea ƒe ʋɔnudrɔ̃la adre la katã tso afia wòde Ðasefoawo dzi. Ʋɔnudrɔ̃laawo te fli ɖe afia aɖe si Dukɔa ƒe Dɔwɔnyawo Gbɔkpɔʋɔnudrɔ̃ƒe tso le ƒe 1997 me la me hegblɔ na ʋɔnudrɔ̃ƒea be wòagbugbɔ alé ŋku ɖe Ðasefoawo ƒe biabiaa ŋu.

Dziɖuɖu ƒe Dukplɔsetakpɔʋɔnudrɔ̃ƒea zã mɔnukpɔkpɔa tsɔ ƒo nu tso ƒomedodo vevi si le Dziɖuɖua kple subɔsubɔhawo dome ŋu. Kpuie ko la, “menye [subɔsubɔha] aɖe ƒe dzixɔsewo dzie wonɔa te ɖo nyaa eŋunyawo, ke boŋ eƒe nuwɔnawoe.”

Ʋɔnudrɔ̃ƒea gblɔ hã be ne Ðasefowo wɔ nu ɖe “Kristotɔwo ƒe akpaɖekedzimademade” nu la, “wometsi tre ɖe demokrasi gɔmeɖosewo ŋu o” eye “menye woƒe didi enye be yewoatsɔ dziɖuɖu ƒomevi bubu aɖo demokrasi teƒe o.” Eyata mele be woabu Ðasefoawo ƒe gomemakpɔmakpɔ le dunyahehe me akɔdadawo me be enye agɔdzedze si ta womada asi ɖe wo dzi le senu o.—Yohanes 18:36; Romatɔwo 13:1.

Ʋɔnudrɔ̃ƒea yi edzi gblɔ be xɔsetɔ aɖe—eɖanye Ðasefo alo ha bubu aɖe me tɔ o—ate ŋu ava ge ɖe nɔnɔme aɖe si me Dziɖuɖua ƒe nudidiwo kple eƒe dzixɔse natsi tre ɖe wo nɔewo ŋu me. Ne wòadzɔ be amea ɖo to eƒe dzitsinya to “eƒe subɔsubɔdzixɔsewo tsɔtsɔ wɔ dɔe tsɔ wu sea la,” Dziɖuɖua ate ŋu abu nuwɔwɔ sia be esɔ eye be subɔsubɔblɔɖe si le esi nue wòwɔ nu ɖo.—Dɔwɔwɔwo 5:29.

Ʋɔnudrɔ̃ƒea ƒe afiatsotsoa zu nyadzɔdzɔgbalẽwo ƒe tanya. Menɔ bɔbɔe be woakpɔ nyadzɔdzɔgbalẽ aɖe le Germany si me nya sia medze le o. Woɖe gbeƒã nyatakaka kple gbebiamewo le television kple radio dɔwɔƒe gãwo katã. Medzɔ be woƒo nu tso Yehowa ƒe ŋkɔ ŋu wòde du alea gbegbe kpɔ le Germany o.

[Nɔnɔmetata Tsoƒe si le axa 8]

AP Photo/Daniel Maurer