Dzo kpo yi emenuwo dzi

Dzo kpo yi emenuawo dzi

Míedo Yehowa Kpɔ

Míedo Yehowa Kpɔ

 Agbemeŋutinya

Míedo Yehowa Kpɔ

ABE ALESI PAUL SCRIBNER GBLƆE ENE

“Ŋdi na wò, Aƒenɔ Stackhouse. Mele amesiwo di be yewoadɔ Easter kpɔnɔwo ƒe ŋkɔ xɔm ŋdi sia, eye meka ɖe edzi be àdi be nàdɔ ɖe na miaƒe ƒomea.” Nya sia dzɔ le ƒe 1938 ƒe adame, esime menɔ Atco, New Jersey, U.S.A., eye menɔ nu ƒom na nye asisi vevi aɖe si gbɔ metona ne mele nye asisiwo dzi tsam esime menɔ dɔ wɔm na Abolomeha Gã la. Gake ewɔ nuku nam be Aƒenɔ Stackhouse gbe be yemadɔ akpɔnɔa o.

EGBLƆ be: “Nyemexɔ se be madɔ ɖe o. Míeɖua Easter o.”

Fifia nyemeganya nusi magblɔ o. Womeɖua Easter o? Ele eme be nudzraɖaŋu gbãtɔ enye be woalɔ̃ ɖe edzi be asisia ƒe nyawo le eteƒe ya. Ke nya kae magagblɔ azɔ? Metee kpɔ gblɔ be: “Gake ènyaa, akpɔnɔ nyui aɖee, eye menya be èdoa vivi ɖe míaƒe akpɔnɔwo ŋu. Mèsusu be adzɔ dzi na wo ƒomea ne mieɖua ee, Easter o hã oa?”

Egagblɔe ake be: “Nyemexɔ se o, gake Aƒetɔ Scribner, menɔ didim be magblɔ nya aɖe na wò, eye fifia anye ɣeyiɣi nyui aɖe be magblɔe na wò.” Dzeɖoɖo ma trɔ nye agbenɔnɔ kura! Aƒenɔ Stackhouse si le Yehowa Ðasefowo ƒe hame si le Berlin, New Jersey, me ɖe afisi Easter ɖuɖu dzɔ tso me nam eye wòtsɔ agbalẽvi etɔ̃ nam. Agbalẽviawo ƒe tanyae nye Safety (Dedienɔnɔ), Uncovered (Woklo Nu le Wo Ŋu) kple Protection (Takpɔkpɔ). Metsɔ agbalẽviawo yi aƒemee, eye togbɔ be medi vevie be manya wo me nyawo hã, vɔvɔ̃ vi aɖe nɔ menye. Nya si Aƒenɔ Stackhouse gblɔ ɖi nya aɖe si mese kpɔ le nye ɖevime.

Gododo Biblia Nusrɔ̃viawo le Nye Ðevime

Wodzim le January 31, 1907, dzi eye le ƒe 1915 me, esime mexɔ ƒe enyi la, kansa wu fofonye.  Eyata mía kple Dada míeyi ɖanɔ edzilawo gbɔ le aƒe gã aɖe me le Malden, Massachusetts. Nyruinye Benjamin Ransom kple srɔ̃a hã nɔ afima, le dzisasrã evelia dzi. Nyrui Ben nye Dukɔwo Dome Biblia Nusrɔ̃vi, si nye alesi woyɔa Yehowa Ðasefowo ɣemaɣi, ɣeyiɣi didi aɖe hafi ƒe alafa 20 lia dze egɔme. Nyrui Ben ƒe nu dzɔa dzi nam ale gbegbe, gake Dada ƒe ƒometɔ siwo nye Methodisttɔwo katã bunɛ be eƒe nuwɔna mesɔ o. Hafi srɔ̃a nagbee le ƒe aɖewo megbe la, edze agbagba na wosikae ɖe tagbɔdɔdaƒe sẽ le eƒe subɔsubɔ dzixɔsewo ta! Esi ɖɔkta siwo le kɔa dzi kpɔ be naneke megblẽ le Nyrui Ben ƒe susu ŋu o ta la, woɖe kuku nɛ heɖe asi le eŋu.

Nyrui Ben kplɔam dea Dukɔwo Dome Biblia Nusrɔ̃viwo ƒe kpekpewoe le Boston, vevietɔ ne nuƒola aɖe tso adzɔge va alo woawɔ wɔna tɔxɛ aɖewo. Ɣeaɖeɣi la, nuƒola si va srã wo kpɔe nye Charles Taze Russell si wonya nyuie, amesi nɔ gbeƒãɖeɖedɔa dzi kpɔm ɣemaɣi. Ɣebubuɣi la, nu tɔxɛ si wowɔe nye “Xexeamewɔwɔ ƒe Fotoɖeɖefia” la ɖeɖe. Togbɔ be ƒe 1915 me kee woɖee hã la, fotoɖeɖe si me Abraham kplɔ Isak yina ɖe toa dzi aɖatsɔe asa vɔe la gale ŋku dzi nam nyuie va ɖo egbea. (Mose I, ta 22) Megakpɔa alesi Abraham kple Isak tsɔ nakegba nɔ to ma liamee, le esi Abraham ɖo ŋu ɖe Yehowa ŋu bliboe ta la, le susu me. Esi wònye tsyɔ̃evie menye ta la, nusia wɔ dɔ ɖe dzinye ŋutɔ.

Le ema megbe la, Nyrui Ben kple srɔ̃a woʋu yi Maine, eye Dada ɖe ŋutsu bubu eye míeʋu yi New Jersey. Eyata nyemegate ŋu kpɔa Nyrui Ben ale o hena ɣeyiɣi didi aɖe. Le nye ƒewuiwo me, esime míenɔ New Jersey la, medo go Marion Neff si nye ɖevi enyi siwo nɔ Presbyteriatɔwo ƒe ƒome aɖe me dometɔ ɖeka si melɔ̃a sasrãkpɔ. Menɔa ƒome ma kple woƒe sɔleme sɔhɛ habɔbɔ gbɔ Kwasiɖagbe gbogbo aɖewo ƒe fiẽ ale be nye ŋutɔ meva zu Presbyteriatɔ mlɔeba. Gake nusiwo mesrɔ̃ le Biblia Nusrɔ̃viawo ƒe kpekpewo dometɔ aɖewo gakpɔtɔ nɔ susu me nam kokoko. Mía kple Marion míeɖe mía nɔewo le ƒe 1928 me eye míedzi mía vinyɔnu Doris le ƒe 1935 me kple Louise le ƒe 1938 me. Esi vidzĩ ɖeka va kpe ɖevi sue si nɔ mía si la, mí ame evea míekpɔe be míehiã gbɔgbɔmemɔfiafia be míatsɔ anyi míaƒe ƒomeae.

Keke Ðe Nyateƒea Ŋu le Agbalẽ Mawo Me

Mía kple Marion míenɔ ha si me míanɔ dim eye susu aɖe va tame na mí. Míeɖɔa li mía nɔewo Kwasiɖa sia Kwasiɖa be mía dometɔ ɖeka nanɔ ɖeviawo gbɔ eye ame evelia nayi sɔleme aɖe si me míebu be míate ŋu ava nɔ la. Kwasiɖa aɖe gbe la, eɖo Marion dzi be wòatsi aƒeme, gake megblɔ nɛ be nye boŋ manɔ ɖeviawo gbɔ ale be mate ŋu axlẽ agbalẽvi si nye Safety la, si nye agbalẽ etɔ̃ siwo Aƒenɔ Stackhouse nam la ƒe gbãtɔ. Esi medze exexlẽ gɔme la, nyemegate ŋu dae ɖi o! Eva nɔ dzedzem nam kɔte be meke ɖe nane si sɔlemeha aɖeke mate ŋu ana o la ŋu. Kwasiɖa si kplɔe ɖo la, nu ma ke gadzɔ, eye melɔ̃ be manɔ ɖeviawo gbɔ eye metsɔ ɣeyiɣi ma xlẽ agbalẽvi evelia si nye Uncovered. Ðeko wòwɔ abe ɖe mese nusiwo xlẽm menɔ la ŋu nya kpɔ ene. Nusiawoe Nyrui Ben xɔsea? Míaƒe ƒomea susu be ha sia menyo o. Nukae Marion hã asusu? Gake mehiã be matsi dzi  o. Ŋkeke aɖewo le Uncovered la xexlẽ vɔ megbe esi megbɔ tso dɔme la, ewɔ nuku nam be Marion gblɔ be “mexlẽ agbalẽ mawo siwo nètsɔ va aƒea mee la. Wo me nyawo vivi ŋutɔ.” Ema na wòkpɔ gbɔdzɔe!

Wogblɔ agbalẽ yeye si nye Enemies (Futɔwo), si klo nu le alakpasubɔsubɔha dzi nyuie, si woɖe ɖe go ŋu nya ɖe agbalẽvi siawo ƒe megbekpa dzi. Míeɖo be míaxɔe. Gake kaka míaɖo lɛta si míatsɔ adɔe ɖa la, Ðasefo aɖe do agoo na mí eye wòtsɔ agbalẽ ma tututu vɛ na mí. Míaƒe nyametsotsowɔƒe katã koe nye ma! Míedzudzɔ sɔlemedede eye míete Yehowa Ðasefowo ƒe Hame si le Camden, New Jersey, ƒe kpekpewo dede. Le dzinu ʋɛ aɖewo ko megbe, le Kwasiɖagbe, July 31, 1938, dzi la, mí amesiwo ade ame 50 míekpe ta ɖe Nɔvinyɔnu Stackhouse ƒe aƒeme—aƒe si me tututu medi be madzra Easter kpɔnɔawo le hafi la—eye míese Ʋɔnudrɔ̃la Rutherford ƒe nyɔnyrɔxɔxɔnuƒo si wolé ɖe mɔ̃ dzi. Emegbe míeɖɔ li awu le aƒea me, eye mí ame 19 míexɔ nyɔnyrɔ le tɔʋu sue aɖe si tsɔ ɖe afima me.

Meɖoe be Mazu Mɔɖela

Le nye nyɔnyrɔxɔxɔ megbe kpuie la, nɔvinyɔnu aɖe si le hamea me gblɔ ame aɖewo siwo woyɔna  be mɔɖelawo, amesiwo tsɔ dutoƒogbeƒãɖeɖedɔa ɖoa dɔe la ŋu nya nam. Medi enumake be manya nu tso wo ŋu eye eteƒe medidi o meva dze si ƒome aɖe si me tɔwo katã nye mɔɖelawo. Nɔviŋutsu Konig, si nye ame tsitsi aɖe, kple srɔ̃a, kpakple vianyɔnu tsitsi wonye mɔɖelawo le hame aɖe si gbɔ medidi tso mía tɔ gbɔ o me. Esi menye ƒome sue aɖe fofo ta la, dzidzɔ gã si Konig ƒomea kpɔna le subɔsubɔdɔa me la wɔ dɔ ɖe dzinye. Metoa wo gbɔ, daa nye aboloʋu la ɖe afima, hekpɔa gome le tso aƒeme yi aƒeme dɔa me kpli wo zi geɖe. Eteƒe medidi o nye ŋutɔ medi be mazu mɔɖela. Gake aleke mawɔ awɔe? Ðevi sue eve le mía kple Marion si, eye dɔ si mewɔna na nyemevona o. Le nyateƒe me, esime Xexemeʋa II dze egɔme le Europa eye sɔhɛ geɖe zu asrafowo le United States la, amesiwo susɔ nɔ dukɔmeviwo ƒe dɔ wɔm la ƒe dɔwo dzi ɖe edzi. Wonɔ eƒom ɖe nunye be madzra nua na ame geɖe wu, eye menya be nyemate ŋu awɔ mɔɖeɖedɔa ne mele dɔ wɔm nenema o.

Esi meɖo dze kple Nɔviŋutsu Konig be medi be mawɔ mɔɖeɖedɔa la, egblɔ be: “Wò ya nɔ wò ŋutete wɔm ko le Yehowa subɔsubɔ me, eye nàtsɔ wò taɖodzinua anɔ eŋkume ɖom le gbedodoɖa me ɣesiaɣi. Akpe ɖe ŋuwò nàɖo egbɔ.” Menɔ nusia wɔwɔ dzi wu ƒe ɖeka. Medea ŋugble le mawunyakpukpuiwo abe Mateo 6:8 ene, si ka ɖe edzi na mí be Yehowa nya míaƒe nuhiahiãwo hafi míebianɛ, la ŋu edziedzi. Eye medzea agbagba be mawɔ ɖe Mateo 6:33 ƒe aɖaŋuɖoɖoa dzi be manɔ Mawu ƒe Fiaɖuƒea kple eƒe dzɔdzɔenyenye didi gbãgbiagbã dzi. Nɔviŋutsu Melvin Winchester si nye nutome sue dzikpɔla hã de dzi ƒo nam.

Megblɔ nye taɖodzinuwo ŋu nya na Marion. Míeɖo dze tso Maleaxi 3:10 me nyawo, si de dzi ƒo na mí be míado Yehowa akpɔ be madudu yayra aƒo ɖe mía dzi o hã ŋu. Nya si Marion gblɔ la de dzi ƒo nam, egblɔ be: “Ne èdi be yeazu mɔɖela la, megahe ɖe megbe le tanye o. Mate ŋu anɔ ɖeviawo dzi kpɔm esime nèle mɔɖeɖedɔa wɔm. Míehiã na ŋutilãmenu boo aɖeke o ɖe.” Le mía nɔewo ɖeɖe ƒe 12 megbe la, menyae be Marion mezãa ga yakayaka o eye wònye nyɔnu si léa be na nu. Le ƒe siwo va yi me la, enye zɔhɛ nyui aɖe nam le mɔɖeɖedɔa wɔwɔ me, eye nusiwo kpe ɖe mía ŋu míekpɔ dzidzedze na mɔɖeɖedɔa anye ƒe 60 enye siae nye alesi wòkpɔa ŋudzedze ɖe ŋutilãmenu ʋɛwo ŋu eye wòwɔa nu abe ɖe wòsɔ gbɔ kakaka ene la.

Va ɖo ƒe 1941 ƒe dzomeŋɔli, le ɖoɖowɔwɔ gbedodoɖatɔe ɣleti geɖe megbe la, mía kple Marion míedzra ga ɖo te ŋu ƒle kekexɔ si ƒe didime nye meta 5.5 si nye míaƒe ƒomea ƒe nɔƒe heganye ʋu na mí. Meɖe asi le dɔ si mewɔna ŋu hezu gbesiagbe mɔɖela le July 1941 me, eye nyemedzudzɔ mɔɖeɖedɔa wɔwɔ tso ɣemaɣi kpɔ o. Afisi wode asi nam be mawɔ dɔ le gbã enye du ewolia si me ʋuwo tɔna ɖo le mɔgã si ŋkɔe nye Route 50 dzi le New Jersey kple St. Louis, Missouri, afisi míava wɔ míaƒe takpekpe le le August ƒe gɔmedzedze la me. Woɖo nɔvi siwo le mɔa dzi ƒe ŋkɔwo kple adrɛswo ɖem, eye meŋlɔ lɛta ɖo ɖe wo gblɔ ɣeyiɣi si woakpɔ mɔ nam la na wo do ŋgɔ. Esi míeɖo takpekpea me la, wogblɔ nam be mayi mɔɖeɖedɔa dzikpɔƒe ne woana dɔdasi bubum.

“Mele Yehowa Do Ge Akpɔ”

Míedo agbalẽgba ɖe míaƒe kekexɔ suea me eye míeyi míaƒe kpekpe mamlɛa le Camdem be míaklã nɔviawo. Esi ɖevi sue eve nɔ mía si eye míenya afisi woaɖo mí ɖo ne míewu takpekpea nu o ta la, míaƒe ɖoɖoawo mesɔ na nɔvi aɖewo tututu o eye wo dometɔ geɖe gblɔ be: “Eteƒe madidi hafi míatrɔ agbɔ o.” Meɖo ŋku edzi be megblɔ be: “Nyemele gbɔgblɔm be nyematrɔ agbɔ o. Yehowa be yeakpɔ dzinye, eye mele Yehowa do ge akpɔ.”

Le mɔɖeɖedɔa wɔwɔ ƒe 60 kple edzivɔ le du 20 me tso Massachusetts va ɖo Mississippi megbe la, míate ŋu agblɔ be Yehowa wɔ eƒe ŋugbedodoa dzi wu gbɔgblɔ. Yayra siwo wòdudu ɖe mía kple Marion kpakple mía vinyɔnuvi eveawo dzi gbɔ nusi míekpɔ mɔ na le ƒe 1941 me ŋu yi sasasã. Woƒe ɖewoe nye be mía vinyɔnuawo va zu mɔɖela wɔnuteƒewo le hame siwo tsɔ ɖe mía gbɔ me, eye (ƒo wo katã ta) gbɔgbɔmevi ŋutsu kple nyɔnu siwo ade alafa ɖeka va su mía si le United States ƒe Ɣedzeƒeƒuta ƒe nutowo katã me. Mesrɔ̃ nu kple ame 52 eye wotsɔ woƒe agbe ɖe adzɔgbe  na Yehowa Mawu eye Marion hã srɔ̃e kple ame 48 siwo hã tsɔ wo ɖokui ɖe adzɔgbee.

Le August 1941 me la, míeɖo St. Louis, afisi medo go Nɔviŋutsu T. J. Sullivan si tso Betel le. Exɔ ɖaseɖigbalẽ tso habɔbɔa gbɔ vɛ nam si fia be Kristotɔ subɔlae menye, si nye agbalẽ si mehiã na elabena enɔ dzedzem be aʋa gbɔna dzɔdzɔ ge eye woalé amewo akpasesẽ be woazu asrafowo ene. Megblɔ na Nɔviŋutsu Sullivan be ɣeyiɣi agbɔsɔsɔme si mezãna le subɔsubɔdɔa me ke srɔ̃nye hã zãna eye adi be yeawɔ mɔɖeɖedɔa kplim. Togbɔ be womeɖo mɔɖeɖedɔa dzikpɔƒe le takpekpea me haɖe o hã la, Nɔviŋutsu Sullivan de dɔ asi na Marion enumake be wòazu mɔɖela eye wòbia mí be: “Afikae mieyina mɔɖeɖedɔa wɔ ge le ne míewu takpekpea nu?” Míenya o. Egblɔ be: “Enyo, miawo ya migatsi dzi o. Miado go ame aɖe le takpekpea me si atso nuto aɖe si hiã mɔɖelawo la me, eye mianya afisi miayi. Miawo miŋlɔ afisi miele ɖo ɖe mí, eye míana míanɔ afima.” Nenemae wòdzɔe. Edzɔ be Nɔviŋutsu Jack DeWitt, si nye nutome sue dzikpɔla va yi, nya ame aɖewo le New Market, Virginia, siwo si mɔɖelawo ƒe aƒe le eye wogahiã mɔɖela aɖewo kpee. Eyata esi míewu takpekpea nu la, míeyi New Market.

Wotsɔ beléle tɔxɛ na mí le New Market. Amesi tututu va kpe ɖe mía ŋu le Philadelphia le mɔɖeɖedɔa mee nye Benjamin Ransom! Ẽ, Nyrui Ben ye. Dzidzɔ kae nye si wònye be míawɔ dɔ kplii le tso aƒeme yi aƒeme dɔa me, le nyateƒea ƒe nukuwo ƒaƒã ɖe nye dzi me le Boston, ƒe 25 kple edzivɔ enye ma megbe! Togbɔ be amewo metsɔ ɖeke le Nyrui Ben ƒe subɔsubɔdɔa me o eye woɖu fewu le eŋu ƒe geɖe, eye ƒomea ti eyome gɔ̃ hã la, lɔlɔ̃ si le eme na Yehowa kple subɔsubɔdɔa nu metsi gbeɖe o.

Míenɔ mɔɖelawo ƒe aƒe si le New Market me ɣleti enyi. Nusiwo míesrɔ̃ le ɣeyiɣi ma me ƒe ɖewoe nye alesi míaxɔ koklo kple koklozi ɖe agbalẽ siwo míenana la tae. Emegbe wode dɔ asi na mía kple Nyrui Ben kpakple Marion tsɔ kpe ɖe ame etɔ̃ bubu aɖewo ŋu be míanye mɔɖela veviwo le Hanover, Pennsylvania—si nye teƒe ade siwo míava wɔ dɔ le le Pennsylvania tso ƒe 1942 vaseɖe ƒe 1945 me ƒe gbãtɔ.

Mɔɖela Vevi Dɔa Wɔwɔ le Xexemeʋa II Me

Ɣeyiɣi aɖewo nɔ anyi le Xexemeʋa II me siwo me míeto fuléle nuwɔnawo me le míaƒe akpaɖekedzimademade ta, gake Yehowa nɔ megbe na mí ɣesiaɣi. Ɣeaɖeɣi la, míaƒe ʋu xoxoa, si ŋkɔe nye Buick, va gblẽ le Provincetown, Massachusetts, eye wòhiã be mato afɔ kilometa geɖe ato Katolikotɔwo ƒe nuto aɖe si me wolé fu mí le vevie me hafi aɖawɔ tɔtrɔyi aɖe. Medze le sɔhɛ gbevuvi aɖewo ƒe ha aɖe si kpɔm dze sii la ŋu eye wote ɣlidodo. Mezɔ kabakaba to wo dome esime woƒe kpedada nɔ toxa tom nam, kple susu be menye ɖe ɖekakpuiawo dze yonyeme o. Mete ŋu ɖo ɖetsɔlemetɔa gbɔ dedie. Gake aƒetɔa si nye Amerikatɔwo ƒe Asrafoha me tɔ si ŋu wodea bubui la do taflatse be: “Nyemate ŋu axɔ wò fiẽ sia o elabena meŋlɔ be bena míayi sinima le dua me.” Nye dzi lã kpo esi meɖo ŋku gbevuvi kpedala mawo siwo le mɔa dzi hele nye tɔtrɔgbɔ lalam dzi. Gake nye dzi dze eme esi aƒetɔa gblɔ kpee be: “Màna mí katã míazɔ oa? Míate ŋu anɔ dze ɖom le mɔa dzi.” Eyata mete ŋu ɖi ɖase nɛ, eye meto afisi kuxia nɔ hã dedie.

Dadasɔ le Ƒomegbaa Tsɔtsɔ Kple Subɔsubɔdɔa Wɔwɔ Me

Esi aʋa la ke la, wode dɔ geɖe asi na mí le Virginia, si me mɔɖela vevi kple gbesiagbe mɔɖela dɔa wɔwɔ ƒe enyi le Charlottesville hã nɔ. Va ɖo ƒe 1956 me la, mía vinyɔnuawo tsi heɖe srɔ̃, eye mía kple Marion míeganɔ ʋuʋum tso afii yi afimɛ hewɔ gbesiagbe mɔɖeɖedɔa le Harrisonburg, Virginia, kple mɔɖela veviwo ƒe dɔ le Lincolnton, North Carolina.

Le ƒe 1966 me la, wode nutome sue dɔa asi nam, eye míezɔa mɔ tso hame ɖeka yia bubu me nɔa dzi dem ƒo na nɔviawo, abe alesi Nɔviŋutsu Winchester de eƒe dzi ƒo namee le New Jersey le ƒe 1930-awo me ene. Mesubɔ hamewo le nutome sue aɖe me le Tennessee ƒe eve. Emegbe wobia tso mía kple Marion si be míagbugbɔ ayi dɔ si dzɔa dzi na mí wu si nye mɔɖela vevi dɔa wɔwɔ dzi. Tso ƒe 1968 va ɖo ƒe 1977 me la, míewɔ mɔɖela vevi dɔa le United States ƒe anyiehe nutome ʋĩ, tso Georgia va ɖo Mississippi ƒe teƒeteƒewo.

 Woɖom hamedzikpɔlae (si woyɔna fifia be dzikpɔla zimenɔla) le Eastman, Georgia, be maxɔ ɖe Powell Kirkland, si nye nɔviŋutsu tsitsi lɔlɔ̃ aɖe si nye nutome sue dzikpɔla ƒe geɖe gake lãmesẽ meganɔ esi tututu o la teƒe. Esia dze eŋu ale gbegbe eye wòna kpekpeɖeŋu ɖesiaɖe si wòate ŋui la mí. Kpekpeɖeŋu si wòna la nɔ vevie elabena mama aɖe nɔ hamea me eye nɔvi ŋkuta ʋɛ aɖewo nɔ eme. Nya la nu va sẽ ale gbegbe, eye metsɔa ɣeyiɣi didi aɖe doa gbe ɖae na Yehowa. Meɖoa ŋku mawunyakpukpuiwo, abe Lododowo 3:5, 6 ene dzi, esi xlẽ be: “Ðo ŋu ɖe Yehowa ŋu tso dzi blibo me, ke megaɖo dzi ɖe wò gɔmesese ŋu o. Lé ŋku ɖe eŋu le wò mɔwo katã dzi, ekema ata mɔ na wò.” To agbagbadzedze vevie be amewo navo le wo ɖokui me agblɔ woƒe dzimenyawo me la, míete ŋu na ɖekawɔwɔ gaɖo hamea me si ɖe vi na amesiame.

Va ɖo ƒe 1977 me la, míedze tsitsi ƒe gbɔdzɔgbɔdzɔ sese le mía ɖokui me vivivi, eye wogbugbɔ gaɖo mí ɖe Charlottesville nutoa me, afisi mía vinyɔnu eveawo kple woƒe ƒomeawo le. Enye dzidzɔ na mí be le ƒe 23 siwo va yi me la, míawɔ dɔ le nuto sia me, eye míekpe asi ɖe Ruckersville, Virginia, hamea ɖoɖo ŋu eye míakpɔ míaƒe Biblia-nusrɔ̃vi gbãtɔwo ƒe viwo kple wo tɔgbui kple mama yɔviwo wotsi zu hamemegãwo, mɔɖelawo, kple Betel dɔwɔlawo. Mía kple Marion  míegate ŋu dea gbeadzi alesi dze, eye enye mɔnukpɔkpɔ nam be manye hamemegã le Charlottesville East Hamea me, afisi mekpɔa agbalẽ me nusɔsrɔ̃ dzi eye meƒoa dutoƒonuƒowo le.

Esi ƒeawo va nɔ yiyim la, míedo go kuxiwo, abe alesi amesiame doa goe ene. Le kpɔɖeŋu me, togbɔ be míedze agbagba kpem hã la, Doris va gbɔdzɔ le gbɔgbɔ me ɣeaɖeɣi le eƒe ƒewuiwo me eye wòɖe ŋutsu aɖe si menye Ðasefo o. Gake eƒe lɔlɔ̃ na Yehowa nu metsi keŋkeŋ kpɔ o, eye viaŋutsu Bill le subɔsubɔm le Betel le Wallkill, New York, ƒe 15 enye sia. Doris kple Louise siaa zu ahosiwo fifia, gake wotsɔ dzidzɔ le gbesiagbe mɔɖeɖedɔa wɔmee le teƒe si tsɔ ɖe mía gbɔ.

Nusiwo Míesrɔ̃ Esi Ƒeawo Va Nɔ Yiyim

Mesrɔ̃ gɔmeɖose ʋɛ bɔbɔe aɖewo siwo ana nàkpɔ dzidzedze le Yehowa subɔsubɔ me: Nɔ agbe si le bɔbɔe. Ðo kpɔɖeŋu nyui le wò nuwɔna ɖesiaɖe me, le wò ŋutɔ wò ɖokuisigbenɔnɔ hã me. Wɔ ɖe “dɔla nuteƒewɔla kple aɖaŋudzela” ƒe mɔfiame dzi le nusianu me.—Mateo 24:45.

Aɖaŋuɖoɖo aɖewo siwo le kpuie evɔ wowɔa dɔ la le Marion si si ŋudɔ woate ŋu awɔ ahakpɔ dzidzedze le mɔɖeɖedɔa wɔwɔ me ne vi le ame si hã: Wɔ ɖoɖowɔɖi si dzi anya wɔ eye nàzɔ ɖe edzi. Tsɔ mɔɖeɖedɔa wɔ wò agbemedɔ ŋutɔŋutɔe. Ðu nusi ade wò lãmesẽ dzi. Gbɔ ɖe eme nyuie. Mègaɖe modzaka wu alesi dze o. Na nyateƒea, si me gbeadzisubɔsubɔdɔa ƒe akpa vovovoawo hã le, nanye nusi viwòwo sea vivi na. Na woase vivi na gbeadzisubɔsubɔdɔ ɣeawokatãɣi.

Fifia míele míaƒe ƒe 90-awo me. Ƒe 62 va yi tso esime míese míaƒe nyɔnyrɔxɔxɔnuƒoa le Stackhouse ƒe aƒeme, eye míetsɔ ƒe 60 wɔ ɣeyiɣiawo katã ƒe subɔsubɔdɔae. Mía kple Marion míate ŋu agblɔ anukwareɖiɖitɔe be nusi míete ŋu wɔ le agbe me la dze mía ŋu ŋutɔ. Meda akpe ɖe dzi si wode ƒo nam esime ɖevi suewo nɔ asinye be matsɔ gbɔgbɔmetaɖodzinuwo aɖo nɔƒe gbãtɔ eye mayi edzi anɔ dɔ wɔm le wo ŋu ta ale gbegbe, eye meda akpe ɖe srɔ̃nye lɔlɔ̃ Marion ta, kple na mía vinyɔnuawo ɖe ƒe gbogbo siwo wotsɔ kpe ɖe mía ŋu la ta. Togbɔ be ŋutilãmekesinɔnuwo mele mía si o hã la, megblɔna be Nyagblɔla 2:25 me nyawo sɔ ɖe nye nɔnɔme nu, be: ‘Amekae ɖua nu henoa nu wum?’

Le nyateƒe me, Yehowa wɔ ɖe eƒe ŋugbedodo si le Maleaxi 3:10 dzi le mía gome wògbɔ eme. ‘Edudu yayra ƒo ɖe mia dzi wu gbɔgblɔ’ nyateƒe!

[Aɖaka/Nɔnɔmetata si le axa 29]

AƲAŊƆLIƑEAWO ME ƑE ŊKUÐODZINYAWO

Anye ƒe 60 kloe nye sia le aʋa la ƒe keke vɔ megbe la, ƒome bliboa gaɖoa ŋku ƒe mawo me nudzɔdzɔwo dzi nyuie.

Doris ɖo ŋku edzi be: “Pennsylvania te ŋu fana miamiamia ŋutɔ. Gbeɖeka ƒe zã me la, efa wòɖiɖi ɖo dzidzenu –35 le Celsius dzoxɔxɔdzidzenu dzi.” Louise gblɔ kpee be: “Mía kple Doris míekɔa mía nɔewo ɖe ata dzi le míaƒe Buick xoxo la ƒe megbezikpui dzi bene vuvɔ megale afɔ na mí tso eme o.”

Doris gblɔ be: “Gake mewɔ na mí be míeda ahe alo nane le mía ŋu tom o. Míenya be míeɖia tsa dea teƒeteƒewo wu ame akpa gãtɔ, gake míeɖua nu nyui ɣesiaɣi, eye mía xɔlɔ̃ aɖewo siwo le Ohio, siwo si nyɔnuvi siwo tsi wu mí vie le la ɖoa awu dzeani siwo womedo boo o ɖe mí.”

Louise yi edzi be: “Dada kple Papa naa míesena le mía ɖokui me ɣeawokatãɣi be yewolɔ̃ mí hekpɔ ŋudzedze ɖe mía ŋu eye míenɔ gbeadzi ɣeyiɣi didi kpli wo. Ena be míese le mía ɖokui me be míele vevie na wo eye mía kpli wo dome nɔ kplikplikpli ŋutɔ.”

Paul hã gblɔ be: “Ƒe 1936 ʋu si ŋkɔe nye Buick Special nɔ asinye, eye ʋu mawo xɔ ŋkɔ le alesi woƒe afɔtiwo dona le ete kabakaba ta. Mexɔ se be mɔ̃ si le ʋua me la sẽ wu ʋua ŋutɔ. Ewɔna nam be zã siwo me vuvɔ le wɔwɔm le wu le ɣletia mee afɔtiawo dona koŋ ene, eye meyina ɖadia ʋu xoxo siwo womegale zazãm o tɔ dea ete. Wo dede va mam nyuie.”

Marion gblɔ be: “Mègaŋlɔ wò nuƒlegbalẽvia be o. Ðe wodzidzea nusianu hafi dzrana na ame—eɖanye lã o, ami o, lɔrifɔti o, nusianu ko. Ɣesiaɣi si míeyi teƒe yeye aɖe la, ele be míayi afima ƒe dziɖuɖudɔwɔƒe ava bia be woana nuƒlegbalẽvi mí. Ɣleti geɖe ate ŋu ava yi hafi asiwò nakae, eye ewɔ abe ɣesiaɣi si míexɔ yeye la, woɖea mí yia du bubu me, eye míegadzea egɔme ake ene. Gake Yehowa léa be na mí ɣesiaɣi.”

[Nɔnɔmetata]

Mía kple Marion kpakple Doris (miame) kple Louise, ƒe 2000

[Nɔnɔmetata si le axa 25]

Mía kple nɔnye le ƒe 1918 me, esime mexɔ ƒe 11

[Nɔnɔmetata si le axa 26]

Mía kple Louise, Marion, kple Doris le ƒe 1948 me esime ɖeviawo xɔ nyɔnyrɔ

[Nɔnɔmetata si le axa 26]

Míaƒe srɔ̃ɖegbe foto, October 1928

[Nɔnɔmetata si le axa 26]

Mía kple vinyenyɔnuawo (miame kple ɖusime ɖaa) le Yankee Stadium, ƒe 1955