Dzo kpo yi emenuwo dzi

Dzo kpo yi emenuawo dzi

Wole Ði Kem Yesu Ƒe Tsitretsitsi

Wole Ði Kem Yesu Ƒe Tsitretsitsi

 Wole Ði Kem Yesu Ƒe Tsitretsitsi

“Mate ŋu agblɔe na wò kaŋ be togbɔ be míate ŋu aka ɖe edzi bliboe be Yesu nɔ agbe . . . hã la, míate ŋu atsɔ kakaɖedzi ma ke agblɔ be míenya be Mawu fɔ Eyama ɖe tsitre o.” Nya mae England Sɔlemeha ŋgɔnɔla si nye Canterbury ƒe Bisiɔpgã gblɔ.

ÐIKEKE sia tɔgbe menɔ Kristotɔ apostolo Paulo me o. Paulo ŋlɔ le lɛta gbãtɔ si tso gbɔgbɔ me si wòŋlɔ na hati Kristotɔ siwo nɔ blema Korinto la ƒe ta 15 lia me be: “Nusi nye hã mexɔ la, metsɔ de asi na mi gbãgbiagbã bena, Kristo ku le mía nuvɔ̃ ŋuti le ŋɔŋlɔ la nu, eye bena woɖii, eye bena wogafɔe ɖe tsitre tso ame kukuwo dome le ŋkeke etɔ̃agbe le ŋɔŋlɔ la nu.”—Korintotɔwo I, 15:3, 4.

Yesu Kristo ƒe tsitretsitsia dzixɔsee ʋã eƒe nusrɔ̃lawo woɖe gbeƒã nyanyuia le Hela kple Roma nutowo katã me—“na nuwɔwɔwo katã le dziƒo te.” (Kolosetɔwo 1:23) Le nyateƒe me la, Yesu ƒe tsitretsitsie nye Kristotɔwo ƒe xɔse ƒe gɔmeɖoanyi ŋutɔŋutɔ.

Gake tso gɔmedzedzea me ke la, amewo ke ɖi Yesu ƒe tsitretsitsia eye womexɔ edzi se o. Le Yudatɔwo ƒe akpa gãtɔ gome la, enye busunya be Yesu yomedzelawo nagblɔ be ŋutsu sia si woklã ɖe ati ŋu lae nye Mesia la. Eye tsitretsitsi ƒe nya la medze Helatɔ agbalẽnyala akpa gãtɔ ŋu kura o, le esi woxɔ luʋɔ makumaku dzi se ta.—Dɔwɔwɔwo 17:32-34.

Egbegbe Ðikelawo

Le ƒe siwo va yi nyitsɔ laa me la, agbalẽnyala aɖewo siwo gblɔna be Kristotɔwo yewonye ta agbalẽ kple nyati siwo gblɔ be Yesu ƒe tsitretsitsia nye nyakpakpa eye wova le nya ʋlim vevie le nya sia ŋu. Esi agbalẽnyala vovovowo dzro nu me le “ŋutinya me Yesu” ŋu la, wogblɔ be nya si Nyanyuiawo gblɔ le yɔdo si tsi ƒuƒlu kple Yesu ƒe eɖokui ɖeɖefia le eƒe tsitretsitsi megbe ŋu la nye nyakpakpa ŋutɔŋutɔ si woto vɛ le eƒe ku megbe ɣeyiɣi didi aɖe be woatsɔ aɖo kpe edzi be dziƒoe wòxɔ eƒe ŋusẽa tsoe.

Le kpɔɖeŋu me, bu Germanytɔ agbalẽnyala Gerd Lüdemann, si nye Nubabla Yeyea fialagã kple agbalẽ si nye What Really Happened to Jesus—A Historical Approach to the Resurrection (Nusi Tututu Dzɔ ɖe Yesu DziTsitretsitsia Me Kuku le Ŋutinya Me) ŋlɔla la ƒe nukpɔsusuwo ŋu kpɔ. Egblɔ be Yesu ƒe tsitretsitsia nye “nya si ŋu kpeɖodzi mele o” si wòle be amesiame si nya nu tso “xexeame ƒe dzɔdzɔmenyawo” ŋu nagbe.

 Nufialagã Lüdemann gblɔ be Kristo si wofɔ ɖe tsitre si ɖe eɖokui fia apostolo Petro la nye ŋutega si Petro kpɔ le esi nuxaxa kple fɔɖiɖi yɔe fũ le Yesu si wògbe ta. Eye le Lüdemann ƒe nya nu la, Yesu ɖokui si wòɖe fia xɔsetɔ 500 kple edzivɔ gbeɖeka la nye “ame hahoo ƒe dzidzɔkpɔkpɔ” ko. (Korintotɔwo I, 15:5, 6) Kpuie ko la, agbalẽnyala geɖe bua Biblia me nuŋlɔɖi siwo ku ɖe Yesu ƒe tsitretsitsi ŋu be wonye nudzɔdzɔ siwo na gbɔgbɔ me kakaɖeameɖokuidzi kple dutanyanyuigbɔgblɔ ƒe dzo ɖo nusrɔ̃lawo me.

Ele eme be ame geɖe metsɔa ɖeke le agbalẽnyalawo ƒe nyaʋiʋliwo me boo ya o. Gake ele be Yesu ƒe tsitretsitsi ŋuti numedzodzro naka mí katã. Nukata? Elabena ne womefɔe ɖe tsitre o la, ke alakpagɔmeɖoanyi dzie wotu Kristotɔnyenye ɖo. Gake ne ŋutinyamenudzɔdzɔ ŋutɔŋutɔe Yesu ƒe tsitretsitsia nye la, ke efia be nyateƒe dzie wotu Kristotɔnyenye ɖo. Ne ele nenema la, menye Kristo ƒe nyawo ta koe wòaʋli o, ke aʋli eƒe ŋugbedodowo hã ta. Tsɔ kpe ɖe eŋu la, ne tsitretsitsi li la, ke ku menye aʋadziɖulagã o ke boŋ enye futɔ si dzi woate ŋu aɖu.—Korintotɔwo I, 15:55.

[Nɔnɔmetata Tsoƒe si le axa 3]

Etso Self-Pronouncing Edition of the Holy Bible, si me King James kple Revised Biblia gɔmeɖeɖewo le me