Dzo kpo yi emenuwo dzi

Dzo kpo yi emenuawo dzi

Paulo Wɔ Ðoɖo Ðe Nudzɔdzɔ Woatsɔ Akpe Ðe Ame Kɔkɔewo Ŋu La Ŋuti

Paulo Wɔ Ðoɖo Ðe Nudzɔdzɔ Woatsɔ Akpe Ðe Ame Kɔkɔewo Ŋu La Ŋuti

 Paulo Wɔ Ðoɖo Ðe Nudzɔdzɔ Woatsɔ Akpe Ðe Ame Kɔkɔewo Ŋu La Ŋuti

GBƆGBƆMEVIÐEWO nɔa vevie na Kristotɔ vavãwo wu. Ke hã, ɖetsɔtsɔ le ame bubuwo ƒe ŋutilãmenyonyo me hã le vevie na wo. Zi geɖe la, wonaa nu amesiwo ɖo xaxa me. Nɔvilɔlɔ̃ ʋãa Kristotɔwo be woakpe ɖe haxɔsetɔ siwo nu hiã la ŋu.—Yohanes 13:34, 35.

Lɔlɔ̃ na gbɔgbɔ me nɔviŋutsuwo kple nɔvinyɔnuwo ʋã apostolo Paulo be wòawɔ ɖoɖo be hame siwo le Axaya, Galatia, Makedonia, kple Asia ƒe nutowo me nadzɔ nu. Nukae wɔe be esia va hiã? Aleke wowɔ ɖoɖo ɖe kpekpeɖeŋunanaa ŋui? Aleke wowɔ nu ɖe eŋui? Eye nukatae wòle be míatsɔ ɖe le nusi dzɔ me?

Nɔnɔme si me Yerusalem Hamea Nɔ

Le ƒe 33 M.Ŋ. ƒe Pentekoste megbe la, Yudatɔ kple trɔ̃subɔla zu Yudatɔ siwo tso teƒe vovovo siwo va zu nusrɔ̃lawo le Pentekoste-ŋkekea dzi la tsi Yerusalem hena ɣeyiɣi aɖe be woasrɔ̃ nu geɖe tso xɔse vavãa ŋu. Le afisi wòhiã le la, hati tadeagulawo tsɔ dzidzɔ kpe asi ɖe amesiawo ƒe agbanɔamedziawo tsɔtsɔ ŋu le woƒe anyinɔɣi sia me. (Dɔwɔwɔwo 2:7-11, 41-44; 4:32-37) Tɔtɔ si Yuda dukɔmeviwo ƒe aglãdzedze kple nuvlowɔha ƒe ŋutasesẽ he va dukɔa me anya na hiahiãa nu gasẽ wu. Gake be Kristo yomedzela aɖeke nagatsi dɔ o la, womaa nu na ahosi siwo nu hiã gbesiagbe. (Dɔwɔwɔwo 6:1-6) Herodes ti hamea yome vevie, eye le ƒe 40-awo M.Ŋ. ƒe domedome la, dɔwuame gblẽ nu le Yudea ŋu. Le Yesu yomedzelawo gome la, esiawo katã he nusi Paulo yɔ be “fukpekpewo,” “xaxawo,” kple “[woƒe] ŋutinuwo haha” vɛ.—Hebritɔwo 10:32-34; Dɔwɔwɔwo 11:27–12:1.

Le ƒe 49 M.Ŋ. lɔƒo la, nɔnɔmea gakpɔtɔ sẽ. Eyata esi wolɔ̃ ɖe edzi be Paulo ƒe susu nenɔ Trɔ̃subɔdukɔwo me tɔwo ŋu wu vɔ megbe hã la, Petro, Yakobo, kple Yohanes xlɔ̃ nui be eƒe “ŋkuwo nanɔ ame dahewo dzi.” Esia ƒe agbagba dzemee Paulo nɔ.—Galatiatɔwo 2:7-10.

Ðoɖowɔwɔ ɖe Nudzɔdzɔa Ŋu

Paulo kpɔ nudzɔdzɔ na Kristotɔ dahe siwo le Yudea dzi. Le ƒe 55 M.Ŋ. me lɔƒo la, egblɔ na Korintotɔwo be: “Le nudzɔdzɔ na ame kɔkɔeawo ŋuti, alesi meɖoe na Galatia-hamewo la, nenema ke miawo hã miwɔ. Kwasiɖa ƒe ŋkeke gbãtɔ dzi la mia dometɔ amesiame natsɔ nane adzra ɖo ɖi vovo ɖe ye ŋutɔ gbɔ, eye wòaƒo enu ƒu le eƒe viɖekpɔkpɔ nu . . . [Ekema] matsɔ agbalẽwo ade asi na amesiwo ke miekpɔ be, wodze la, aɖo wo ɖa, ne woatsɔ miaƒe nunana ayi Yerusalem.” (Korintotɔwo I, 16:1-3) Le ƒe ɖeka megbe la, Paulo gblɔ be Makedonia kple Axaya nɔ gome kpɔm le nudzɔdzɔa  me. Eye esi wotsɔ nusiwo wokpɔ la yi Yerusalem la, amedɔdɔ siwo tso Asia nutowo me yi la ɖo kpe edzi be hame siwo le nuto ma me hã dzɔ nu.—Dɔwɔwɔwo 20:4; Korintotɔwo II, 8:1-4; 9:1, 2.

Womezii ɖe ame aɖeke dzi be wòadzɔ nu wu alesi wòate ŋui o. Ke boŋ be enye dadasɔ ƒe nya ale be amesiwo ana geɖe la tɔ nate ŋu akpɔ ame kɔkɔe siwo nɔ Yerusalem kple Yudea ƒe hiahiãwo gbɔ. (Korintotɔwo II, 8:13-15) Paulo gblɔ be: “Amesiame abe alesi wòɖo ɖi le eƒe dzi me ene, menye kple veve alo dzizizi o; elabena amesi na nu kple dzidzɔ la, eyae Mawu lɔ̃na.”—Korintotɔwo II, 9:7.

Apostoloa ɖe susu si tae wòle be Korintotɔwo nadzɔ nu faa la me. Yesu ‘va da ahe ɖe wo ta, bene woawo la woato eƒe ahedada la me azu kesinɔtɔwo’ le gbɔgbɔ me. (Korintotɔwo II, 8:9) Ðikeke mele eme o be woadi be yewoasrɔ̃ nunana ƒe gbɔgbɔ si nɔ esi la. Gawu la, esi Mawu nɔ wo wɔm “kesinɔtɔwo le nusianu me” ta la, esɔ be woakpe asi ɖe ame kɔkɔewo ƒe nuhiahiãwo gbɔ kpɔkpɔ ŋu.—Korintotɔwo II, 9:10-12.

Nudzɔlaawo ƒe Nɔnɔme

Míate ŋu asrɔ̃ nu geɖe tso lɔlɔ̃nu faa nudzɔdzɔ ŋu to ŋugbledede le amesiwo dzɔ nu le kpekpeɖeŋunana ame kɔkɔewo ƒe ɖoɖoa me le ƒe alafa gbãtɔa me ƒe nɔnɔme ŋu. Nudzɔdzɔa ɖee fiaa be menye ɖetsɔtsɔ le hati Yehowa subɔla dahewo me koe na wodzɔ nuawo o. Efia be nɔvisilelé nɔ Yudatɔ kple Trɔ̃subɔla zu Kristotɔwo dome. Nuawo dzɔdzɔ kple wo xɔxɔ nye ɖekawɔwɔ kple xɔlɔ̃wɔwɔ si le Trɔ̃subɔla kple Yudatɔ siawo dome ƒe dzesi. Woma ŋutilã me kple gbɔgbɔ me nuwo siaa.—Romatɔwo 15:26, 27.

Anɔ eme be Paulo mekpe Makedonia Kristotɔwo tẽ be woadzɔ nu o—elabena hiãkame nɔ fu ɖem na woawo hã. Ke hã, ‘woyi edzi nɔ kuku ɖem be woana mɔnukpɔkpɔ yewo be yewoadzɔ nu.’ Togbɔ be wonɔ “xaxa me dodokpɔ geɖe me” hã la, wotsɔ dzidzɔ ‘na nu wu alesi woate ŋui’! (Korintotɔwo II, 8:1-4) Edze ƒã be alesi wole wo nu tsomee be woƒe subɔsubɔ mewɔ ɖeka kple Romatɔwo ƒe sewo o la nye woƒe xaxa me dodokpɔ ƒe akpa aɖe. Eyata eme kɔ be woase veve ɖe wo nɔvi siwo le Yudea, amesiwo le nɔnɔme sesẽ mawo tɔgbe me tom la nu.—Dɔwɔwɔwo 16:20, 21; 17:5-9; Tesalonikatɔwo I, 2:14.

Togbɔ be Paulo zã dzonɔameme si nɔ Korintotɔwo me gbã ɖe nudzɔdzɔa ŋu tsɔ de dzi ƒo na Makedoniatɔwo hã la, dzonɔameme si nɔ Korinto la nu va fa. Azɔ apostoloa yɔ Makedoniatɔawo ƒe dɔmenyonyo tsɔ ʋã Korintotɔawoe. Ekpɔe be esɔ be yeaɖo ŋku edzi na wo be ɣeyiɣia de be woawɔ nusi gɔme wodze ƒe ɖeka do ŋgɔ la ade goe. Nukae dzɔ?—Korintotɔwo II, 8:10, 11; 9:1-5.

Tito ye do nudzɔdzɔ ƒe nyaa ɖa le Korinto, gake kuxiwo do mo ɖa siwo anya gblẽ eƒe agbagbadzedzewo me. Esi Tito yi va gblɔe na Paulo le Makedonia megbe la, etrɔ gbɔ hekplɔ ame eve bubu ɖe ŋuti be woado ŋusẽ hame si le Korinto be woadzɔ nua awu enu. Ame aɖewo anya si ahama be ɖe Paulo di be yeatafa Korintotɔawo. Ðewohĩ esia tae wòdɔ ŋutsu etɔ̃ be woaɖa kpɔ nudzɔdzɔa dzi eye wòŋlɔ agbalẽ kpe ɖe wo dometɔ ɖesiaɖe ŋu. Paulo gblɔ be: “Míele mɔ xem na esia, bena ame aɖeke nagaka mo na mí le nudzɔdzɔ gã sia, si míena wodzɔ la ŋuti o. Elabena míaƒe tamesusuwo  le nu nyui yome, menye le Aƒetɔ la ŋku me ɖeɖeko o, ke le amewo ŋku me hã.”—Korintotɔwo II, 8:6, 18-23; 12:18.

Nunanaawo Tsɔtsɔ Yii

Kaka ƒe 56 M.Ŋ. ƒe adame naɖo la, woɖoe be woatsɔ ga si wodzɔ la ayi Yerusalem. Amesiwo nudzɔlaawo tia la akpe ɖe Paulo ŋu ayi. Dɔwɔwɔwo 20:4 gblɔ be: “Eye amesiwo ɖoe ɖa vaseɖe Asia la, woawo nye: Sopatre, Piro, Beroiatɔ la ƒe vi, Aristarxo kple Sekundo tso Tesalonika; Gayo, Derbetɔ, kple Timoteo; Tixiko kple Trofimo tso Asia.” Edze ƒã be Luka, amesi anya nɔ Kristotɔ siwo nɔ Filipi teƒe la, hã nɔ wo dome. Eyata, ne mede ɖeke o la, ŋutsu asieke ye de dɔa gbe.

Agbalẽnyala Dieter Georgi gblɔ be: “Anɔ eme be ga siwo wodzɔ ƒo ƒu la anya sɔ gbɔ, elabena ne menye nenema o la, ekema viɖe aɖeke manɔ agbagba siwo Paulo kple ame dɔdɔ gbogboawo dze mlɔeba la ŋu o.” Menye nuawo ƒe dedienɔnɔ ta koe ameawo nɔ Paulo ŋuti ɖo o, ke boŋ be womagatsɔ anukwaremaɖimaɖi ƒe nya aɖeke ɖe eŋu o. Amesiwo wodɔ la nɔ Trɔ̃subɔla zu Kristotɔwo ƒe hameawo teƒe le ame kɔkɔeawo ŋkume le Yerusalem.

Esi ame dɔdɔawo ɖo tɔdziʋu tso Korinto yi Siria ta la, woanya ɖo Yerusalem le Ŋutitotoŋkekenyuia ɖuɣi. Gake esi wose be woɖo nugbe be woawu Paulo la na be wotrɔ ɖoɖoawo. (Dɔwɔwɔwo 20:3) Ðewohĩ eƒe futɔwo anya ɖoe be yewoawui le ƒua dzi.

Nu bubuwo hã nɔ vevie na Paulo. Hafi wòadzo la, eŋlɔ na Kristotɔ siwo nɔ Roma be woado gbe ɖa be ‘woaɖe ye atso tosẽla, siwo le Yudea la si me, eye bena yeƒe subɔsubɔdɔ, si yewɔ hena Yerusalem la, nadze ame kɔkɔewo ŋu nyuie.’ (Romatɔwo 15:30, 31) Togbɔ be ame kɔkɔeawo axɔ nudzɔdzɔawo kple ŋudzedzekpɔkpɔ deto, ɖikekemanɔmee hã la, nusi anya nɔ vevie na Paulo enye kuxi si eƒe vava ade Yudatɔawo dome.

Le nyateƒe me la, apostoloa ƒe ŋkuwo nɔ ame dahewo dzi. Togbɔ be Ŋɔŋlɔawo megblɔ ɣeyiɣi si me wotsɔ nudzɔdzɔawo na o hã la, etsɔtsɔ yii tu ɖekawɔwɔ ɖo eye wòna mɔnukpɔkpɔ Trɔ̃subɔla zu Kristotɔwo be woaɖe ŋudzedzekpɔkpɔ afia Yudatɔ haxɔsetɔwo ɖe gbɔgbɔmekesinɔnu siwo woxɔna tsoa wogbɔ ta. Paulo ƒe gbedoxɔa me yiyi esime wòɖo Yerusalem megbe kpuie la he tɔtɔ aɖe si na wolée la vɛ. Gake esia na mɔnukpɔkpɔwo su esi be wòɖi ɖase na mɔmefiawo kple fiawo.—Dɔwɔwɔwo 9:15; 21:17-36; 23:11; 24:1–26:32.

Míaƒe Nudzɔdzɔwo Egbea

Nu geɖe trɔ tso ƒe alafa gbãtɔ me va ɖo fifia—gake menye gɔmeɖose veviwo o. Kristotɔwo nya nu tso gadzɔdzɔ ƒe hiahiã ŋu nyuie. Ele be nudzɔdzɔ ɖesiaɖe si woawɔ na amesiwo hia tu la nanye esi nye lɔlɔ̃nu faa tɔ, si lɔlɔ̃ na Mawu kple na ame havi ye aʋã wo be woawɔ.—Marko 12:28-31.

Afɔ siwo woɖe le kpekpeɖeŋunana ame kɔkɔewo me le ƒe alafa gbãtɔ me ɖee fia be wokpɔ nudzɔdzɔ siawo dzi nyuie eye wowɔe le anukwareɖiɖi me. Le nyateƒe me la, Yehowa Mawu nya nu tso hiahiãwo ŋu, eye wowɔa ɖoɖo na eƒe subɔlawo ale be togbɔ be nɔnɔme sesẽwo anɔ anyi hã la, woate ŋu ayi edzi anɔ gbeƒã ɖem Fiaɖuƒenyanyuia na ame bubuwo. (Mateo 6:25-34) Ke hã, mí katã míate ŋu awɔ míatɔ sinua, aleke kee míaƒe ganyawo ɖale o. Le mɔ ma nu la, ‘amesi si nu le fũ la, makpɔ ɖeke ɖe edzi o, eye amesi ke si nu ʋɛ le la, naneke mahiãe o.’—Korintotɔwo II, 8:15.