Dzo kpo yi emenuwo dzi

Dzo kpo yi emenuawo dzi

Bu Gbɔgbɔ La Ŋu Ne Nànɔ Agbe!

Bu Gbɔgbɔ La Ŋu Ne Nànɔ Agbe!

 Bu Gbɔgbɔ La Ŋu Ne Nànɔ Agbe!

‘Gbɔgbɔ la ŋu bubu hea agbe vɛ.’—ROMATƆWO 8:6.

1, 2. Vovototo kae Biblia de “ŋutilã” kple “gbɔgbɔ” dome?

AGBEDZADZƐNƆNƆ me léle ɖe asi le Mawu ŋkume le ame gblẽku siwo kpɔa dzidzɔ ɖe vivisese na ŋutilã ƒe dzodzrowo ŋu dome mele bɔbɔe kura o. Ke hã Ŋɔŋlɔawo de vovototo “ŋutilã” kple “gbɔgbɔ” dome, eye wòna vovototo si le mɔɖeɖe le ame ɖokui ŋu be nuvɔ̃ŋutilã nakpɔ ŋusẽ ɖe ame dzi me tsonu wɔnublanuiwo kple mɔɖeɖe le ame ɖokui ŋu be Mawu ƒe gbɔgbɔ kɔkɔe nakpɔ ŋusẽ ɖe ame dzi ƒe yayrawo dome la dze kɔte.

2 Le kpɔɖeŋu me, Yesu Kristo gblɔ be: “Gbɔgbɔ la gbɔa agbe, ŋutilã menyo na naneke o; nya, siwo megblɔ na mi la, [gbɔgbɔ] kple agbe wonye.” (Yohanes 6:63) Apostolo Paulo ŋlɔ na Kristotɔ siwo nɔ Galatia la bena: “Ŋutilã la tsi tre ɖe gbɔgbɔ la ŋuti, eye gbɔgbɔ la tsi tre ɖe ŋutilã la ŋuti; elabena esiawo tsi tre ɖe wo nɔewo ŋuti.” (Galatiatɔwo 5:17, NW) Paulo gblɔ hã be: “Amesi ƒã nu ɖe eƒe ŋutilã me la, aŋe gbegblẽ atso eƒe ŋutilã me; ke amesi ƒã nu ɖe [gbɔgbɔ] me la, aŋe agbe mavɔ atso [gbɔgbɔ] me.”—Galatiatɔwo 6:8.

3. Nukae hiã be woado le nudzodzro kple tamesusu vɔ̃ ƒe kluvinyenye si me?

3 Yehowa ƒe gbɔgbɔ kɔkɔe—si nye eƒe dɔwɔŋusẽ—ate ŋu aɖe “ŋutilã ƒe dzodzro” makɔmakɔwo kple míaƒe nuvɔ̃ŋutilã ƒe ŋusẽkpɔɖeamedzi gbegblẽ la ɖa le mía me keŋkeŋ. (Petro I, 2:11) Be míado le nudzodzro vɔ̃wo ƒe kluvinyenye si me la, ele vevie be Mawu ƒe gbɔgbɔ nakpe ɖe mía ŋu, elabena Paulo ŋlɔ bena: “Ŋutilã la ŋu bubu hea ku vɛ, ke gbɔgbɔ la ŋu bubu hea agbe kple ŋutifafa vɛ.” (Romatɔwo 8:6, NW) Nukae gbɔgbɔ la ŋu bubu fia?

“Gbɔgbɔ la Ŋu Bubu”

4. Nukae “gbɔgbɔ la ŋu bubu” fia?

4 Esi Paulo ŋlɔ nu tso “gbɔgbɔ la ŋu bubu” ŋuti la, ezã Helagbe me nya si fia “alesi wobua nu ŋui, susu dada ɖe nane dzi, . . . taɖodzinu, nudidi, agbagbadzedze.” Dɔwɔnya si ɖii fia be “woabu tame, woabu nu ŋu le mɔ aɖe nu.” Eyata, gbɔgbɔ la ŋu bubu fia Yehowa ƒe dɔwɔŋusẽ ƒe ŋusẽkpɔɖeamedzi, amedziɖuɖu, kple ameʋaʋã. Efia be míalɔ̃ faa be Mawu ƒe gbɔgbɔ kɔkɔe nakpɔ ŋusẽ blibo ɖe míaƒe tamebubu, nudzodzrowo, kple nudidiwo dzi.

5. Aleke gbegbee wòle be míaɖe mɔ le mía ɖokui ŋu na gbɔgbɔ kɔkɔea ƒe ŋusẽkpɔɖeamedzi?

5 Paulo ɖo kpe alesi gbegbe wòle be míaɖe mɔ le mía ɖokui ŋu gbɔgbɔ kɔkɔea nakpɔ ŋusẽ ɖe mía dzii la dzi esi wòƒo nu tso ‘kluvinyenye na gbɔgbɔa’ ŋu. (Romatɔwo 7:6) Esi Kristotɔwo xɔ Yesu ƒe tafevɔsa dzi se ta la, woɖe wo tso nuvɔ̃ ƒe kluvinyenye me eye ‘woku’ le kluvinyenye na woƒe tsã gbenɔnɔ gome. (Romatɔwo 6:2, 11) Amesiwo ku le kpɔɖeŋumɔ sia nu la kpɔtɔ le agbe le ŋutilã me eye fifia wovo adze Kristo yome anye ‘dzɔdzɔenyenye ƒe kluviwo.’—Romatɔwo 6:18-20.

Tɔtrɔ Wɔnuku

6. Tɔtrɔ kae amesiwo va zua ‘dzɔdzɔenyenye ƒe kluviwo’ wɔna?

6 Tɔtrɔ tso ‘nuvɔ̃ ƒe kluvinyenye’ me azu ‘dzɔdzɔenyenye ƒe kluviwo’ asubɔ Mawu nye tɔtrɔ wɔnuku vavã. Paulo ŋlɔ nu tso ame aɖewo siwo wɔ tɔtrɔ sia ŋu be: “Wole tsi na mi, ke wona mia ŋuti kɔ, ke wotso afia na mi le Aƒetɔ Yesu ƒe ŋkɔ la kple mía Mawu ƒe [gbɔgbɔ] la me.”—Romatɔwo 6:17, 18; Korintotɔwo I, 6:11.

7. Nukatae wòle vevie be Yehowa ƒe nukpɔsusu le nyawo ŋu nanɔ mía si?

7 Be míate ŋu awɔ tɔtrɔ ɖedzesi sia la, ehiã be míasrɔ̃ nu tso alesi Yehowa bua nuwoe ŋu gbã. Ƒe alafawoe nye si va yi la, hakpala Dawid ƒo koko na Mawu vevie be: “Yehowa, ɖe wò mɔwo  fiam . . . Na mazɔ le wò nyateƒe me, eye nafia num.” (Psalmo 25:4, 5) Yehowa ɖo to Dawid, eye Ate ŋu aɖo to esubɔla siwo li egbea hã ƒe gbedodoɖa siawo tɔgbe. Esi Mawu ƒe mɔwo kple eƒe nyateƒea le dzadzɛ hele kɔkɔe ta la, ŋugbledede le wo ŋu akpe ɖe mía ŋu ne vivisese na ŋutilã me dzodzro makɔmakɔwo ƒe tetekpɔ va mía dzi.

Akpa Vevi si Mawu ƒe Nya Wɔna

8. Nukatae wòle vevie be míasrɔ̃ Biblia?

8 Mawu ƒe Nya, Biblia, nye eƒe gbɔgbɔa ƒe dɔwɔwɔwo dometɔ ɖeka. Eyata mɔ vevi siwo dzi míana gbɔgbɔ ma nawɔ dɔ ɖe mía dzi le dometɔ ɖekae nye Biblia xexlẽ kple esɔsrɔ̃—gbesiagbe, alesi wòanya wɔe. (Korintotɔwo I, 2:10, 11; Efesotɔwo 5:18) Biblia me nyateƒe kple gɔmeɖosewo dede míaƒe susu kple dzi me akpe ɖe mía ŋu míanɔ te sesĩe ne wodze míaƒe gbɔgbɔmemenyenye dzi. Ẽ, ne agbegbegblẽnɔnɔ ƒe tetekpɔwo do mo ɖa la, Mawu ƒe gbɔgbɔ ate ŋu aɖo ŋku Ŋɔŋlɔawo me ŋkuɖodzinya kple gɔmeɖose siwo fiaa mɔ ame siwo ate ŋu ado ŋusẽ míaƒe tameɖoɖo kplikpaa be míawɔ nu le ɖekawɔwɔ me kple Mawu ƒe lɔlɔ̃nu dzi na mí. (Psalmo 119:1, 2, 99; Yohanes 14:26) Esia awɔe be womable mí ade nugbegblẽwɔwɔ me o.—Korintotɔwo II, 11:3.

9. Aleke Biblia-sɔsrɔ̃ doa ŋusẽ tame si míeɖo be míalé mía kple Yehowa dome ƒomedodo me ɖe asii?

9 Ne míeyi edzi do vevie nu srɔ̃ Ŋɔŋlɔawo anukwareɖiɖitɔe to Biblia-srɔ̃gbalẽwo dzi la, Mawu ƒe gbɔgbɔ kpɔa ŋusẽ ɖe míaƒe susu kple dzi dzi, eye wònaa míaƒe bubudede Yehowa ƒe dzidzenuwo ŋu dea to ɖe edzi. Míaƒe ƒomedodo kple Mawu va zua nu vevitɔ wu na mí le míaƒe agbe me. Ne míedze ŋgɔ tetekpɔ la, míebua vivi si míase le nu gbegblẽa wɔwɔ me ŋu o. Ke boŋ nusi ŋu míatsi dzi ɖo gbãe nye nuteƒewɔwɔ me léle ɖe asi na Yehowa. Ŋudzedzekpɔkpɔ vevie ɖe ƒomedodo si le mía kplii dome ŋu ʋãa mí be míatsi tre ɖe dzodzro ɖesiaɖe si ade abi eŋu alo agblẽ edome la ŋu.

“Aleke Gbegbe Nyemehelɔ̃a Wò Se Lae O!”

10. Be míabu gbɔgbɔ la ŋu la, nukatae toɖoɖo Yehowa ƒe se le vevie?

10 Ne míabu gbɔgbɔ la ŋu la, ekema Mawu ƒe Nya ŋuti sidzedze ɖeɖe mesɔ gbɔ o. Yehowa ƒe dzidzenuwo ŋuti gɔmesese geɖe su Fia Salomo si, gake edo kpo agbenɔnɔ ɖe wo nu le eƒe agbenɔɣi mamlɛawo me. (Fiawo I, 4:29, 30; 11:1-6) Ne míebua gbɔgbɔ la ŋu la, míakpɔ alesi wòhiãe be menye nusi Biblia gblɔ nyanya koe le vevie o, ke be ehiã be míaɖo to Mawu ƒe se tso dzi blibo me. Ema fia be míanɔ Yehowa ƒe dzidzenuwo me dzrom tsitotsito ahanɔ agbagba dzem vevie be míalé wo me ɖe asi. Nɔnɔme sia nɔ hakpala la si. Edzi ha be: “Aleke gbegbe nyemehelɔ̃a wò se lae o! Nye ŋugbledede wònye ɖaa.” (Psalmo 119:97) Ne míetsi dzi ɖe Mawu ƒe se dzi wɔwɔ ŋu nyateƒe la, míedzea mawumenɔnɔmewo ɖeɖe fia gɔme. (Efesotɔwo 5:1, 2) Le esi teƒe be nugbegblẽwɔwɔ nadzro mí vevie wɔnamanɔŋutɔe la, míaɖe gbɔgbɔa ƒe kutsetse boŋ afia, eye didi be míawɔ nusi dzea Yehowa ŋu aɖe mí ɖa tso ‘ŋutilã ƒe dɔwɔwɔ’ gbegblẽwo ŋu.—Galatiatɔwo 5:16, 19-23; Psalmo 15:1, 2.

11. Aleke nàɖe emee be Yehowa ƒe se si tsri matrewɔwɔ la nye takpɔkpɔ na mí?

11 Aleke míate ŋu atu bubu deto kple lɔlɔ̃ ɖo na Yehowa ƒe sewo? Mɔawo dometɔ ɖekae nye asixɔxɔ si le wo ŋu me dzodzro tsitotsito. De ŋugble le Mawu ƒe se si ɖe mɔ ɖe gbɔdɔdɔnuwɔnawo ŋu le srɔ̃ɖeɖe ɖeɖeko me eye wòxe mɔ ɖe matrewɔwɔ kple ahasiwɔwɔ ŋu la  ŋuti kpɔ. (Hebritɔwo 13:4) Ðe se sia dzi wɔwɔ na nu nyui aɖe le mía ŋu toma? Ðe Dziƒofofo lɔ̃ame ade se aɖe si ana be nane si aɖe vi na mí masu mía si oa? Kura o! Kpɔ nusi le dzɔdzɔm le ame geɖe siwo menɔa agbe ɖe Yehowa ƒe agbenyuinɔnɔ ƒe dzidzenuwo nu o ƒe agbe me ɖa ko. Gbɔmeyafuwo fɔfɔ na woɖea fu zi geɖe alo ɖewohĩ enaa wogena ɖe srɔ̃ɖeɖe me esi womele klalo nɛ hafi o kple esi me dzidzɔ mele o me. Ehiã be ame geɖe nanyi vi srɔ̃ŋutsu alo srɔ̃nyɔnu manɔmee. Gakpe ɖe eŋu la, amesiwo wɔa matre ɖe mɔ le wo ɖokui ŋu na nulɔdɔwo xɔxɔ. (Korintotɔwo I, 6:18) Eye ne Yehowa subɔla wɔ matre la, dzi ƒe fuɖename si me wòato la nu ate ŋu asẽ ŋutɔ. Agbagbadzedze be woatsi dzitsinya ƒe fɔbubu ame nu ate ŋu ana woatsi zãdomadɔlɔ̃e ahana ame ƒe susu nade vovo ge ado kpoe. (Psalmo 32:3, 4; 51:5) Ekema ɖe medze ƒã be ɖe Yehowa de se ɖe matrewɔwɔ nu be yeatsɔ akpɔ mía tae oa? Ẽ, viɖe geɖe le agbedzadzɛnɔnɔ me léle ɖe asi me vavã!

Do Gbe Ða Nàbia Yehowa ƒe Kpekpeɖeŋu

12, 13. Nukatae wòsɔ be míado gbe ɖa ne dzodzro vɔ̃wo le fu ɖem na mí?

12 Le nyateƒe me la, gbɔgbɔa ŋu bubu bia gbedodoɖa tso dzi me. Esɔ be míabia Mawu ƒe gbɔgbɔ ƒe kpekpeɖeŋu, elabena Yesu gblɔ be: ‘Ne mienya alesi miana nunana nyui mia viwo la, aleke wɔ Fofo, si le dziƒo la, mana gbɔgbɔ kɔkɔe amesiwo bianɛ la oa?’ (Luka 11:13) Míate ŋu aɖe míaƒe ŋuɖoɖo ɖe gbɔgbɔa ŋu bena wòakpe ɖe mía ŋu míaɖu míaƒe gbɔdzɔgbɔdzɔwo dzi afia le gbedodoɖa me. (Romatɔwo 8:26, 27) Ne míede dzesii be dzodzro alo nɔnɔme gbegblẽwo le ŋusẽ kpɔm ɖe mía dzi, alo ne haxɔsetɔ lɔ̃ame aɖe he míaƒe susu va edzi la, nunya anɔ eme be míaƒo nu tso kuxia ŋu tẽ le míaƒe gbedodoɖa me eye míabia be Mawu nakpe ɖe mía ŋu míaɖu nɔnɔme siawo dzi.

13 Yehowa ate ŋu akpe ɖe mía ŋu míaƒe susu nanɔ nusiwo le dzɔdzɔe, nusiwo le dzadzɛ, nusiwo dze na wɔwɔ, kple nusiwo dze na kafukafu la ŋu. Eye aleke gbegbe wòsɔe be míaƒo koko nɛ vevie ale be “Mawu ƒe ŋutifafa” nadzɔ míaƒe dziwo kple míaƒe tamesusuwo ŋui enye si! (Filipitɔwo 4:6-8) Eyata mina míado gbe ɖa be Yehowa nakpe ɖe mía ŋu “[míadze] dzɔdzɔenyenye, mawusosroɖa, dzixɔse, lɔlɔ̃, dzidodo, dɔmefafa yome.” (Timoteo I, 6:11-14) Le míaƒe Dziƒofofoa ƒe kpekpeɖeŋu me la, dzimaɖitsitsiwo kple tetekpɔwo nu masẽ kakaka agbɔ eme o. Ke boŋ ŋutifafa si Mawu nana asu mía si le agbe me.

Mègado Dziku na Gbɔgbɔ la O

14. Nukatae Mawu ƒe gbɔgbɔ nye dzadzɛnyenye ƒe ŋusẽ?

14 Yehowa subɔla tsitsiwo tsɔa Paulo ƒe aɖaŋuɖoɖo sia wɔa dɔe, si gblɔ be: “Migatsi gbɔgbɔ la nu o!” (Tesalonikatɔwo I, 5:19) Esi Mawu ƒe gbɔgbɔ nye “kɔkɔenyenye ƒe [gbɔgbɔ]” ta la, ele dzadzɛ, hele kɔkɔe, fɔɖiɖi mele eŋu o. (Romatɔwo 1:4) Eyata ne gbɔgbɔ ma le dɔ wɔm ɖe mía dzi la, ekema enye kɔkɔenyenye, alo dzadzɛnyenye ƒe ŋusẽ. Ekpena ɖe mía ŋu míeléa agbedzadzɛnɔnɔ si dona tsoa toɖoɖo Mawu me ɖe asi. (Petro I, 1:2) Nuwɔna makɔmakɔ ɖesiaɖe fia bubumademade gbɔgbɔ ma ŋu, eye ema ate ŋu agblẽ nu le mía ŋu ale gbegbe. Le mɔ ka nu?

15, 16. (a) Mɔ ka nue míate ŋu ado dziku na Mawu ƒe gbɔgbɔ le? (b) Aleke míate ŋu aƒo asa na dzikudodo na Yehowa ƒe gbɔgbɔe?

15 Paulo ŋlɔ bena: “Eye migawɔ nusi ave Mawu ƒe gbɔgbɔ kɔkɔe la, si wotsɔ tre mia nu hena xɔxɔ ƒe ŋkeke la o.” (Efesotɔwo 4:30, NW) Ŋɔŋlɔawo ɖe Yehowa ƒe gbɔgbɔa fia be enye kpeɖodzi, alo  ‘nusi gbɔna ƒe dzesi’ na Kristotɔ amesiamina nuteƒewɔlawo. Eye nu mae nye makumakugbenɔnɔ le dziƒo. (Korintotɔwo II, 1:22; Korintotɔwo I, 15:50-57; Nyaɖeɖefia 2:10) Mawu ƒe gbɔgbɔ ate ŋu afia mɔ amesiaminawo kple wo xɔlɔ̃ siwo si anyigbadzinɔnɔ ƒe mɔkpɔkpɔ le be woanɔ agbe nuteƒewɔwɔtɔe eye ate ŋu akpe ɖe wo ŋu woaƒo asa na dɔwɔwɔ vɔ̃wo.

16 Apostoloa xlɔ̃ nu tsi tre ɖe alakpadada, fififi, ŋukpenanuwɔwɔ, kple bubuawo ŋu. Ne míeɖe mɔ le mía ɖokui ŋu nuwɔna siawo he mí la, míanɔ nu wɔm atsi tre ɖe Mawu ƒe Nya ƒe nuxlɔ̃ame si tso gbɔgbɔ me la ŋu. (Efesotɔwo 4:17-29; 5:1-5) Le mɔ aɖe nu la, ema afia be míele dziku dom na Mawu ƒe gbɔgbɔ, eye emae nye nusi míedi be míaƒo asa na. Le esia ta ne mía dometɔ aɖe dze egɔme le Yehowa ƒe Nya ƒe nuxlɔ̃ame gbem la, ɖewohĩ míadze egɔme anɔ nuwɔna alo nɔnɔme siwo akplɔ mí ade nuvɔ̃ si woɖo koŋ wɔ me eye wòana míabu Mawu ƒe ŋudzedzekpɔɖeameŋu kura. (Hebritɔwo 6:4-6) Togbɔ be ɖewohĩ míanɔ nuvɔ̃ wɔm fifia o hã la, míate ŋu anɔ nusiwo akplɔ mí aɖo ta ewɔwɔ me la wɔm. Ne míele nu wɔm tsi tre ɖe gbɔgbɔa ƒe mɔfiame ŋu la, míanɔ dziku dom nɛ. Míanɔ tsitre tsim ɖe Yehowa, amesi nye gbɔgbɔ kɔkɔea tsoƒe la, hã ŋu ahanɔ dziku dom nɛ. Esi míenye amesiwo lɔ̃ Mawu ta la, míedi be míawɔ nu ma gbeɖe o. Ke boŋ anyo ne mí katã míado gbe ɖa abia Yehowa ƒe kpekpeɖeŋu ale be míagado dziku na eƒe gbɔgbɔ o ke boŋ míawɔ nusi ana eƒe ŋkɔ kɔkɔe la ŋuti nakɔ to gbɔgbɔ la ŋu bubu ɣesiaɣi me.

Yi Edzi Nànɔ Gbɔgbɔ la Ŋu Bum

17. Gbɔgbɔ me taɖodzinu siwo míate ŋu aɖo na mía ɖokui dometɔ aɖewoe nye kawo, eye nukatae nunya anɔ esia wɔwɔ me?

17 Mɔ ɖedzesi aɖe si dzi míato ayi edzi anɔ gbɔgbɔ la ŋu bum enye be míaɖo gbɔgbɔ me taɖodzinuwo na mía ɖokui ahadze agbagba be míaɖo wo gbɔ. Le alesi míaƒe nuhiahiã kple nɔnɔmewo le nu la, taɖodzinu siwo míaɖo dometɔ aɖewo ate ŋu anye asitɔtrɔ le alesi míesrɔ̃a nui ŋu be wòanyo ɖe edzi, míaƒe gomekpɔkpɔ le gbeƒãɖeɖedɔa me dzidzi ɖe edzi, alo subɔsubɔmɔnukpɔkpɔ tɔxɛ aɖe, abe ɣeyiɣiawo katã ƒe mɔɖeɖedɔa, dɔwɔwɔ le Betel, alo dutanyanyuigbɔgblɔdɔa ene, si míaminyã. Esia ana míaƒe susu nanɔ gbɔgbɔmenuwo  ŋu eye wòakpe ɖe mía ŋu míatsi tre ɖe míaƒe amegbetɔ ƒe gbɔdzɔgbɔdzɔwo ŋu be woagaɖu mía dzi o alo be ŋutilãmenudidi kple dzodzro siwo menɔ te ɖe Ŋɔŋlɔawo dzi o siwo bɔ ɖe nuɖoanyi siawo me nakpɔ ŋusẽ ɖe míaƒe nuwɔnawo dzi o. Le nyateƒe me la, esiae nye mɔ nyuitɔa, elabena Yesu xlɔ̃ nu be: “Migadzra nu nyuiwo ɖo na mia ɖokui le anyigba dzi, afisi agbagblaʋui kple nusiwo ɖua nu la, gblẽa nu le, eye fiafitɔwo dzea kpɔ va fia nu le la o; ke boŋ midzra nu nyuiwo ɖo na mia ɖokui le dziƒo, afisi agbagblaʋui kple nusiwo ɖua nu la, megblẽa nu le o, eye fiafitɔ medzea kpɔ va fia nu le o; elabena afisi wò nu nyui le la, afima wò dzi hã lanɔ.”—Mateo 6:19-21.

18. Nukatae wòle vevie ŋutɔ be míayi edzi anɔ gbɔgbɔ la ŋu bum le ŋkeke mamlɛ siawo me?

18 Le nyateƒe me la, gbɔgbɔ la ŋu bubu kple tsitretsitsi ɖe xexeame ƒe nudzodzrowo ŋue nye nusi me nunya le be míawɔ le ‘ŋkeke mamlɛ’ siawo me. (Timoteo II, 3:1-5) Ne èbu eŋu kpɔ la, “xexeame va yina kple eƒe nudzodzrowo; ke amesi wɔa Mawu ƒe lɔlɔ̃nu la, nɔa anyi yi ɖe mavɔmavɔ me.” (Yohanes I, 2:15-17) Le kpɔɖeŋu me, ne sɔhɛ Kristotɔ ɖo ɣeyiɣiawo katã ƒe subɔsubɔdɔa wɔwɔ eƒe taɖodzinui la, esia ate ŋu anye mɔfiame nɛ le tsitsi alo sɔhɛ me ƒe siwo me toto sesẽna me. Ne woƒoe ɖe ame sia nu be wòawɔ nu gbegblẽ la, eƒe susu anɔ nusi wòdi be yeawɔ le Yehowa ƒe subɔsubɔdɔa me la dzi. Gbɔgbɔmeme sia akpɔe be enye movidzɔdzɔ, alo bometsinu gɔ̃ hã, be yeaɖe asi le gbɔgbɔ me taɖodzinuawo yometiti ŋu le ŋutilãmenudidiwo alo nuvɔ̃ ƒe vivisese aɖewo ta. Ðo ŋku edzi be Mose, amesi nye gbɔgbɔmeme la “[tiae] be, yeakpe fu akpe ɖe Mawu ƒe dukɔ la ŋuti wu esi yeakpɔ nuvɔ̃ ƒe vivisese le ɣeyiɣi vi aɖe ko me.” (Hebritɔwo 11:24, 25) Míeɖanye ɖevi alo ame tsitsi o, míawo hã míawɔ tiatia ma ke ne míeyia edzi bua gbɔgbɔ la ŋu tsɔ wu be míabu nuvɔ̃ŋutilã ŋu.

19. Ne míeyi edzi le gbɔgbɔ la ŋu bum la, viɖe kawoe míakpɔ?

19 “Ŋutilã la ŋu bubu naa wozua Mawu ƒe futɔ” esime “gbɔgbɔ la ŋu bubu hea agbe kple ŋutifafa vɛ.” (Romatɔwo 8:6, 7, NW) Ne míeyi edzi le gbɔgbɔa ŋu bum la, ŋutifafa geɖe asu mía si. Akpɔ míaƒe dzi kple tamesusuwo ta tso míaƒe nuvɔ̃menyenye ƒe ŋusẽkpɔɖeamedzi me geɖe wu. Míate ŋu atsi tre ɖe nugbegblẽwɔwɔ ƒe tetekpɔwo nu wu. Eye Mawu akpe ɖe mía ŋu be míanɔ te ɖe aʋa si le edzi yim le ŋutilã kple gbɔgbɔ dome la nu.

20. Nukatae kakaɖedzi ate ŋu anɔ mía si be míate ŋu aɖu dzi le ŋutilã kple gbɔgbɔ dome ʋawɔwɔa me?

20 Ne míeyi edzi bua gbɔgbɔ la ŋu la, ƒomedodo xɔasi aɖe ayi edzi anɔ mía kple Yehowa, amesi nye agbe kple gbɔgbɔ kɔkɔe siaa tsoƒe la, dome. (Psalmo 36:10; 51:13) Satana Abosam kple eƒe dɔtsɔlawo le nusianu si woate ŋui wɔm be yewoagblẽ mía kple Yehowa Mawu dome ƒomedodo me. Wotena kpɔna be yewoakpɔ ŋusẽ ɖe míaƒe susuwo dzi, esi wonyae be ne míena ta la, ana be míazu Mawu ƒe futɔwo eye míaku mlɔeba. Gake míate ŋu aɖu dzi le ŋutilã kple gbɔgbɔ dome ʋawɔwɔ sia me. Ema teƒee Paulo kpɔ, elabena esime wònɔ nu ŋlɔm tso eya ŋutɔ ƒe aʋaa ŋu la, ebia gbã be: “Amekae aɖem tso kuŋutilã si me mahã?” Emegbe esime wònɔ eɖem fia be ɖeɖekpɔkpɔ le bɔbɔe la, egblɔ be: “Meda akpe na Mawu to Yesu Kristo, mía Aƒetɔ, la dzi!” (Romatɔwo 7:21-25) Míawo hã míate ŋu ada akpe na Mawu to Kristo dzi be ena mɔ siwo dzi míato anɔ te ɖe amegbetɔ ƒe gbɔdzɔgbɔdzɔwo nu ahayi edzi anɔ gbɔgbɔ la ŋu bum kple agbe mavɔ nɔnɔ ƒe mɔkpɔkpɔ wɔnuku la mí.—Romatɔwo 6:23.

Èɖo Ŋku Wo Dzia?

• Nukae gbɔgbɔ la ŋu bubu fia?

• Aleke míate ŋu ana Yehowa ƒe gbɔgbɔ nawɔ dɔ ɖe mía dzii?

• Ðe nusita wòle vevie le aʋa si wɔm míele kple nuvɔ̃ me be míasrɔ̃ Biblia, míaɖo to Yehowa ƒe se, eye míado gbe ɖa nɛ, la me.

• Aleke gbɔgbɔ me taɖodzinuwo ɖoɖo na mía ɖokui ana míanɔ agbemɔa dzii?

[Biabiawo]

[Nɔnɔmetata si le axa 16]

Biblia-sɔsrɔ̃ kpena ɖe mía ŋu be míanɔ te sesĩe ne wodze mía dzi le gbɔgbɔ me

[Nɔnɔmetata si le axa 17]

Esɔ be míado gbe ɖa abia Yehowa be wòakpe ɖe mía ŋu míaɖu dzodzro vɔ̃wo dzi

[Nɔnɔmetata siwo le axa 18]

Gbɔgbɔ me taɖodzinuwo akpe ɖe mía ŋu míayi edzi anɔ gbɔgbɔ la ŋu bum