Dzo kpo yi emenuwo dzi

Dzo kpo yi emenuawo dzi

Ðe Nèwɔ Nyateƒea Tɔwòea?

Ðe Nèwɔ Nyateƒea Tɔwòea?

 Ðe Nèwɔ Nyateƒea Tɔwòea?

‘Mitrɔ miaƒe nɔnɔme to miaƒe tamesusu ƒe yeyewɔwɔ me, bene miadzro nusi nye Mawu ƒe lɔlɔ̃nu, si nyo, eye wòdzea eŋu nyuie, eye wòle blibo la me akpɔ.’—ROMATƆWO 12:2.

1, 2. Nukata mele bɔbɔe be woanye Kristotɔ vavã egbea o?

BE WOANYE Kristotɔ vavã le ŋkeke mamlɛ siawo—‘ɣeyiɣi sesẽ siawo siwo me nɔnɔ sẽ’—me mele bɔbɔe o. (Timoteo II, 3:1) Le nyateƒe me be woadze Kristo ƒe kpɔɖeŋu yome la, ebia be ame naɖu xexeame dzi. (Yohanes I, 5:4) Ðo ŋku nusi Yesu gblɔ le Kristotɔwo ƒe mɔa ŋu dzi: “Miyi ɖe agbo bii la me; elabena agbo la keke, eye mɔ la le gbadza, si kplɔa amewo yina ɖe tsɔtsrɔ̃ me, eye ame geɖewo nye amesiwo le edzi yina ɖe eme. Elabena agbo la le biie, eye mɔ la hã xaxa, si kplɔa amewo yina ɖe agbe la me, eye ame ʋɛwo nye amesiwo kpɔnɛ.” Egblɔ hã be: ‘Ne ame aɖe le didim be, yeadze yonyeme la, negbe nu le ye ŋutɔ ɖokui gbɔ, eye wòatsɔ eƒe fuwɔameti gbawotsyogbe, eye wòadze yonyeme.’—Mateo 7:13, 14; Luka 9:23.

2 Ne Kristotɔ aɖe va ɖo agbemɔ xaxɛa dzi la, gbetɔame bubu si gadze ŋgɔe enye be wòali ke ɖe edzi. Nukata ema nye gbetɔame? Elabena míaƒe adzɔgbeɖeɖe kple nyɔnyrɔxɔxɔ na Satana tɔa ŋku mí hezãa eƒe ayemɔwo, alo aɖaŋu vɔ̃ bleameawo ɖe mía ŋu. (Efesotɔwo 6:11) Enya míaƒe gbɔdzɔgbɔdzɔwo eye wòdzea agbagba wɔa wo ŋudɔ be yeatsɔ agblẽ míaƒe gbɔgbɔmemenyenye me. Ne èbu eŋu kpɔ la, ete kpɔ be yeagblẽ Yesu dome, eyata nukata wòaɖe asi le míawo ya ŋu?—Mateo 4:1-11.

Satana ƒe Ayemɔwo

3. Aleke Satana ƒã ɖikeke ɖe Xawa ƒe susu mee?

3 Ayemɔ ɖeka si Satana zãnae nye be wòaƒã ɖikeke ɖe míaƒe susu me. Edia gbɔdzɔgbɔdzɔƒewo le míaƒe gbɔgbɔmeʋawɔnu ŋu. Le gɔmedzedzea me ke la, ezã ayemɔ ma ɖe Xawa ŋu, ebia be: “Vavãe Mawu gblɔ bena, migaɖu abɔmetiawo katã ƒe tsetse aɖeke o mahã?” (Mose I, 3:1) Ne míagblɔe bubui la, Satana nɔ gbɔgblɔm be, ‘Ðe wònya wɔ na Mawu be wòde se sia gbegbe na mia? Ðe wòate nu nyui sia gbegbe mia? Mawu nyae bena, gbesigbe ke miaɖu ati sia ƒe ɖe la, miaƒe ŋkuwo laʋu, eye mianɔ abe Mawu ene, anya nyui kple vɔ̃!’ Satana ƒã ɖikeke ƒe ku ɖe Xawa me helala be wòamie.—Mose I, 3:5.

4. Ðikeke kawoe ate ŋu agblẽ nu le ame aɖewo ŋu egbea?

4 Aleke Satana zãa mɔnu sia egbeae? Ne míedzudzɔ míaƒe Biblia-xexlẽ, dzudzɔ míaƒe ɖokuisinusɔsrɔ̃, hedzudzɔ gbedodoɖa, eye míedzudzɔ míaƒe Kristotɔwo ƒe subɔsubɔdɔa kple kpekpewo dede la, ana be ame bubuwo ƒe ɖikenyawo nate ŋu agblẽ nu le mía ŋu bɔbɔe. Le kpɔɖeŋu me: “Aleke míewɔ nya be nyateƒe si Yesu fiae nye esia?” “Ŋkeke mamlɛawoe nye esia vavã? Ne èbu eŋu kpɔ la, míele ƒe alafa 21 lia me xoxo ɖe.” “Ðe míeɖo Harmagedon ƒe agbo nua, alo egale ŋgɔ ʋĩi?” Ne edzɔ be ɖikeke mawo tɔgbe ɖo mía me la, nukae míate ŋu awɔ atsɔ ɖe wo ɖae?

5, 6. Nukae wòle be míawɔ ne ɖikekewo ɖo mía me?

5 Yakobo ɖo aɖaŋu nyui aɖe esi wòŋlɔ be: “Ne mia dometɔ aɖe le nunya hiãm la, neɖe kuku na Mawu, si na amewo katã faa, eye medoa ŋukpe ame o la, eye wòatsɔe anɛ. Ke neɖe kuku le xɔse me, eye megake ɖi aɖeke o; elabena amesi le ɖi kem la, eɖi ƒutsotsoe, si ya ƒona yina gbɔna la. Elabena ame kema megasusu be, yeakpɔ nane atso Aƒetɔ la gbɔ o; ŋutsu  dzimevesusula melina sesĩe le eƒe mɔwo katã dzi o.”—Yakobo 1:5-8.

6 Ke nukae wòle be míawɔ? Ele be ‘míayi edzi anɔ Mawu biam’ le gbedodoɖa me be xɔse kple gɔmesese nasu mía si eye be míado ŋusẽ nu le míaƒe ɖokuisinusɔsrɔ̃ ku ɖe biabia alo ɖikeke ɖesiaɖe ŋu me. Míate ŋu abia kpekpeɖeŋu tso amesiwo sẽŋu le xɔse me hã gbɔ, eye míagake ɖi gbeɖe o be Yehowa ana kpekpeɖeŋu si míehiã la mí. Yakobo gblɔ hã be: “Eyaŋuti mibɔbɔ mia ɖokui ɖe Mawu te; ke mitsi tre ɖe Abosam ŋu, eye wòasi le mia gbɔ. Mite ɖe Mawu ŋu, eye wòate ɖe mia ŋu.” Ẽ, míaƒe ɖikekewo nu ayi ne míete ɖe Mawu ŋu to nusɔsrɔ̃ kple gbedodoɖa me.—Yakobo 4:7, 8.

7, 8. Nukawoe nye dzidzenu vevi aɖewo siwo woatsɔ akpɔ tadedeagu si tɔgbe Yesu fia dze sii eye amekawoe ɖo dzidzenu siawo gbɔ?

7 Mítsɔ biabia sia abe kpɔɖeŋu ene, be: Aleke míewɔ nya be tadedeagu si Yesu fia mee míelé ɖe asi? Be míaɖo nya sia ŋu la, dzidzenu ka ŋue wòle be míalé ŋku ɖo? Biblia ɖee fia be ele be lɔlɔ̃ vavãtɔ nanɔ Kristotɔ vavãwo dome. (Yohanes 13:34, 35) Ele be woakɔ Mawu ƒe ŋkɔ, Yehowa, ŋu. (Yesaya 12:4, 5; Mateo 6:9) Eye ele be woana amewo nanya ŋkɔ ma.—Mose II, 3:15; Yohanes 17:26.

8 Nyateƒe tadedeagu ƒe dzesi bubu enye bubudede Mawu ƒe Nya, Biblia ŋu. Enye agbalẽ tɔxɛ si ɖe Mawu ƒe amenyenye kple eƒe tameɖoɖowo fia. (Yohanes 17:17; Timoteo II, 3:16, 17) Gakpe ɖe eŋu la, nyateƒe Kristotɔwo ɖea gbeƒã Mawu ƒe Fiaɖuƒea be eya koe nye ameƒomea ƒe mɔkpɔkpɔ ɖeka kolia si ahe agbe mavɔ nɔnɔ le paradisonyigba dzi vɛ. (Marko 13:10; Nyaɖeɖefia 21:1-4) Woɖe wo ɖokui ɖa tso xexe sia me dunyahehe me nufitifitiwɔwɔwo kple eƒe agbeƒaƒãnɔnɔ gbɔ. (Yohanes 15:19; Yakobo 1:27; 4:4) Amekawoe ɖo dzidzenu siawo gbɔ ŋutɔŋutɔ egbea? Nyateƒeawo ɖo kpe edzi be ŋuɖoɖo ɖeka koe li—Yehowa Ðasefowo.

Ke ne Ède Ðikekewo Dzi Ðu Ge Do Kpoe Ðe?

9, 10. Nukae míate ŋu awɔ be míaɖu ɖikeke siwo dzi menya le ɖuɖum na mí o dzi?

9 Ke ne ɖikeke aɖe ɖo mía me vevie ya ɖe? Nukae wòle be míawɔ? Nunyala Fia Salomo na ŋuɖoɖoa mí, be: “Vinye, ne èxɔ nye nuƒoƒo wɔ tɔwòe, eye nèdzra nye sewo ɖo ɖe ɖokuiwò gbɔ, be nèƒu wò to anyi ɖe nunya ŋu, eye nèbi wò dzi ɖe gɔmesese ŋuti, ẽ, ne èyɔ nunya, eye nèkɔ wo gbe dzi ɖe gɔmesese ŋu la, ne èdii abe klosalo ene, eye nèdi eyome mɔ abe kesinɔnu, si le to me ene la, ekema àse Yehowa-vɔvɔ̃ gɔme, eye wò asi atu sidzedze Mawu.”Lododowo 2:1-5, míawoe te gbe ɖe edzi.

 10 Ðe susu sia mewɔ dɔ ɖe ame dzi ŋutɔ oa? Ne míelɔ̃ faa ɖo to Mawu ƒe nunya le anukware me la, míaƒe asi “atu sidzedze Mawu.” Ẽ, xexeame katã ƒe Aƒetɔ Dziɖulagã ƒe sidzedze ate ŋu asu mía si ne míelɔ̃ faa be míaxɔ eƒe nyawo eye míede asixɔxɔ wo ŋu. Ema fia be míatrɔ ɖe Yehowa ŋu le gbedodoɖa me kple to ɖokuisinusɔsrɔ̃ me. Kesinɔnu siwo ɣla ɖe eƒe Nya la me ate ŋu aɖe ɖikeke ɖesiaɖe ɖa eye woana míakpɔ nyateƒea ƒe kekeli.

11. Aleke ɖikeke ɖo Elisa ƒe subɔvi mee?

11 Alesi gbedodoɖa te ŋu kpe ɖe Mawu subɔla si me vɔvɔ̃ kple ɖikeke ɖo ŋu ƒe kpɔɖeŋu si me kɔ dze le Fiawo II, 6:11-18. Elisa ƒe subɔvi mete ŋu kpɔ nu le gbɔgbɔ me o. Mete ŋu kpɔe dze sii be dziƒoʋakɔwo li akpe ɖe Mawu ƒe nyagblɔɖila, si Siria-ʋakɔa xaxa ɖo ŋu o. Subɔvia tsɔ vɔvɔ̃ do ɣli be: “Oo, nye aƒetɔ, nuka wɔ ge míala?” Aleke Elisa ɖo eŋui? “Megavɔ̃ o, elabena amesiwo le mía dzi la, sɔ gbɔ wu amesiwo le wo dzi.” Gake aleke subɔvia awɔ axɔ edzi ase? Mate ŋu akpɔ dziƒoʋakɔawo o.

12. (a) Aleke wokpɔ subɔvia ƒe ɖikekea gbɔ nɛ? (b) Aleke míawɔ akpɔ ta na ɖikeke ɖesiaɖe si aɖo mía mee?

12 “Elisa do gbe ɖa gblɔ bena: Yehowa, ʋu eƒe ŋkuwo, ne wòakpɔ nu! Tete Yehowa ʋu ɖekakpui la ƒe ŋkuwo, eye wòkpɔ nu, eye kpɔ ɖa, dzosɔwo kple dzotasiaɖamwo le to la ŋu kpaŋkpaŋ ƒo xlã Elisa.” To mɔ sia dzi la, Yehowa na subɔvia kpɔ dziƒoʋakɔ siwo nɔ Elisa ŋu dzɔm. Gake mele be míakpɔ mɔ na Mawu ƒe kpekpeɖeŋu ma ƒomevi tututu egbea o. Ðo ŋku edzi be Biblia bliboa menɔ nyagblɔɖilaa ƒe subɔvi ma si wòasrɔ̃ hena ŋusẽdodo eƒe xɔse o. Biblia le míawo ya si. Ne míezãe nyuie la, ado ŋusẽ míaƒe xɔse nenema ke. Le kpɔɖeŋu me, míate ŋu ade ŋugble le nudzɔdzɔ geɖe siwo ƒo nu tso Yehowa ŋu le eƒe dziƒoʋɔnu ŋu. Wona míekpɔe ɖikekemanɔmee be dziƒohabɔbɔ le Yehowa si si kpea asi ɖe eƒe subɔlawo ŋu le xexeame katã ƒe hehenadɔ si wɔm wole egbea la me.—Yesaya 6:1-4; Xezekiel 1:4-28; Daniel 7:9, 10; Nyaɖeɖefia 4:1-11; 14:6, 7.

Kpɔ Nyuie le Satana ƒe Aɖaŋu Vɔ̃wo Ŋu!

13. Mɔ kawo dzie Satana tona dzea agbagba be yeagbɔdzɔ míaƒe nyateƒea me léle ɖe asi me?

13 Mɔnu bubu kawoe Satana gazãna tsɔ gbɔdzɔa míaƒe gbɔgbɔmemenyenye kple míaƒe nyateƒea me léle ɖe asi mee? Wo dometɔ ɖekae nye agbegbegblẽnɔnɔ ƒomevi ɖesiaɖe.  Le egbexexe si ku gbɔdɔdɔ ƒe tsu me la, ŋukpenanuwɔna alo gbɔdɔdɔ ƒe agbegbegblẽnɔnɔ va zu gbesiagbenuwɔna na dzidzime sia si tiaa dzidzɔ yome heɖua agbe eɖanye nuka ke wòlɔ ɖe eme o. Sinimawo, television, kple videowo doa agbenɔnɔ sia ɖe ŋgɔ. Amamaɖeɖenuwɔnawo bɔ ɖe nyakakamɔnuwo me, vevietɔ Internet dzi. Tetekpɔ de xa ɖi na ŋkukeɖenumelawo.—Tesalonikatɔwo I, 4:3-5; Yakobo 1:13-15.

14. Nukatae Satana ƒe aɖaŋu vɔ̃wo gblẽ nu le Kristotɔ aɖewo ŋu?

14 Kristotɔ aɖewo ɖe mɔ woƒe ŋkukekeɖenume gblẽ nu le wo ŋu eye woƒo ɖi woƒe susu kple dzi to gbɔdɔdɔnuwɔna ƒe nɔnɔmetatawo alo eƒe nuwɔna siwo woɖena fiana gaglã kpɔkpɔ me. Woɖe mɔ le wo ɖokui ŋu Satana ƒe amenublemɔ̃ ɖe wo. Zi geɖe la, esia wɔwɔ na wodzea go le gbɔgbɔ me. Ame mawo tɔgbe meyi edzi nye “vidzĩwo le nu tovo wɔwɔ me” o. Womezu ‘ame tsitsiwo le nyasã me’ o. (Korintotɔwo I, 14:20) Ƒe sia ƒe la, amewo ŋea tomaɖomaɖo Mawu ƒe Nya la me gɔmeɖosewo kple dzidzenuwo me tsonu vɔ̃wo. Wogbe “Mawu ƒe aʋawɔnu blibo la katã” dodo kple emeléle ɖe asi.—Efesotɔwo 6:10-13; Kolosetɔwo 3:5-10; Timoteo I, 1:18, 19.

De Asixɔxɔ Nusi Su Mía Si Ŋu

15. Nukata wòasesẽ na ame aɖewo be woakpɔ ŋudzedze ɖe woƒe gbɔgbɔmedomenyinu ŋu?

15 Yesu gblɔ be: “Miadze si nyateƒe la, eye nyateƒe la lawɔ mi ablɔɖeviwoe.” (Yohanes 8:32) Eva hiã be Ðasefo akpa gãtɔ nadzudzɔ woƒe tsã gbenɔnɔ kple subɔsubɔhadedewo. Eyata ɖewohĩ ŋudzedzekpɔkpɔ ɖe ablɔɖe si nyateƒea na wo la ŋu anɔ bɔbɔe na wo wu. Gake ɖewohĩ asesẽ na sɔhɛ aɖewo siwo wo dzilawo nyi le nyateƒea me be woakpɔ ŋudzedze ɖe woƒe gbɔgbɔmedomenyinua ŋu. Womenɔ alakpasubɔsubɔha aɖeke me kpɔ loo alo nye xexe sia si tea gbe ɖe vivisese didi dzi, eƒe atikevɔ̃ɖizazã, kple eƒe agbegbegblẽnɔnɔ ƒe akpa aɖeke kpɔ o. Ale wɔ wòate ŋu adzɔ be womakpɔ vovototo gã si le míaƒe gbɔgbɔmeparadisoa kple Satana ƒe xexe gblẽkua dome la adze sii o. Ðewohĩ wo dometɔ aɖewo gɔ̃ hã aɖe mɔ tetekpɔ si nye be woaɖɔ xexeame ƒe aɖia kpɔ be woanya nusi gbegbe to wo ŋu la naɖu wo dzi!—Yohanes I, 2:15-17; Nyaɖeɖefia 18:1-5.

16. (a) Biabia kawoe míate ŋu abia mía ɖokui? (b) Nukae wofia mí hede dzi ƒo na mí be míawɔ?

16 Ðe wòhiã ŋutɔŋutɔ be míade míaƒe asiwo dzo me be míanya nusi vevesese kple fukpekpe nyea? Ðe míate ŋu asrɔ̃ nu tso numanyomanyo si me amewo to la me oa? Ðe wòhiã be míade mía ɖokui xexe sia me ƒe “ba” me be míakpɔe ɖa be nane to mía ŋu hãa? (Petro II, 2:20-22) Petro ɖo ŋku edzi na ƒe alafa gbãtɔ me Kristotɔ siwo nye Satana ƒe xexeame nɔlawo tsã be: “Agbe ƒe ɣeyiɣi, si va yi la, sɔ gbɔ be, miewɔ trɔ̃subɔlawo ƒe lɔlɔ̃nu, eye miezɔ le hadzedzewo, nudzodzrowo, ahatsunonowo, nutsuɖuɖuwo, aglotutuwo kple trɔ̃subɔsubɔ ŋunyɔtɔ la me.” Le nyateƒe me la, mehiã be míaƒo mía ɖokui ɖe xexeame ƒe ‘nuvlowɔwɔ ƒe ba me’ be míakpɔ alesi gbegbe agbenɔnɔ ate ŋu aɖi gbɔe  o. (Petro I, 4:3, 4) Ke boŋ wofia Yehowa ƒe agbenyuinɔnɔ ƒe dzidzenu kɔkɔwo mí le míaƒe Fiaɖuƒe Akpatawo, siwo nye Biblia ŋuti hehenaƒewo me. Eye wodea dzi ƒo na mí be míazã míaƒe tamebubuŋutete atsɔ ana kakaɖedzi mía ɖokui be míawo sie nyateƒea le eye be míawɔ nyateƒea mía tɔe.—Yosua 1:8; Romatɔwo 12:1, 2; Timoteo II, 3:14-17.

Míaƒe Ŋkɔ Menye Dzesidenu Dzro aɖe Ko O

17. Aleke míawɔ anye Yehowa ƒe Ðasefo siwo wɔa dɔ geɖe wu?

17 Ne míewɔ nyateƒea mía tɔe la, míadi be míagblɔe na ame bubuwo le mɔnukpɔkpɔ nyui ɖesiaɖe me. Esia mefia be míate kpɔ azii ɖe amesiwo meɖe ɖetsɔleme fia o la dzi o. (Mateo 7:6) Ke boŋ efia be míavɔ̃ be míaɖe mía ɖokui afia be míenye Yehowa Ðasefo o. Ne ame aɖe ɖe ɖetsɔleme sue aɖe fia to nya aɖe biabia tso dzime alo Biblia-srɔ̃gbalẽ aɖe xɔxɔ me la, míasu te anɔ dzadzraɖo be míagblɔ míaƒe mɔkpɔkpɔa ŋu nya nɛ. Nyateƒee, esia abia be agbalẽ vovovoawo dometɔ aɖe nanɔ mía si ɣesiaɣi eɖanye afikae míanɔ o—le aƒeme, dɔwɔƒe, suku, fiase me, alo ɖiɖiɖemeƒewo.—Petro I, 3:15.

18. Aleke mía ɖokui ɖeɖefia wòadze ƒã be míenye Kristotɔwo akpɔ ŋusẽ nyui ɖe míaƒe agbe dzii?

18 Ne míeɖe mía ɖokui fia wòdze ƒã be míenye Kristotɔwo la, míedoa ŋusẽ míaƒe akpababla ɖe Satana ƒe xadede vɔ̃wo ŋu. Ne dzigbezã alo Kristmas kplɔ̃ɖoɖo loo alo dɔwɔƒe tsatsadada wɔna aɖe ɖo edzi la, zi geɖe dɔwɔhatiwo agblɔ be, “Migaɖe fu nɛ o. Yehowa Ðasefoe wònye.” Awɔe hã be ɖewohĩ amewo aɖu wo ɖokui dzi le gbegblẽnyawo gbɔgblɔ me ne èle teƒea. Ale wɔ míaƒe Kristotɔnyenye ɖeɖefia kpɔa ŋusẽ nyui ɖe míaƒe agbe dzi, abe alesi apostolo Petro gɔ̃ hã ɖee fiae ene be: “Eye ameka awɔ vɔ̃ ɖe mia ŋu, ne mienye veviedolawo le nu nyui me mahã? Ke ne miekpe fu le nu dzɔdzɔe ŋuti hã la, woayra mi.”—Petro I, 3:13, 14.

19. Aleke míewɔ nya be míele ŋkeke mamlɛawo ŋutɔŋutɔ me?

19 Viɖe bubu si tsoa nyateƒea wɔwɔ mía tɔe mee nye be míakpɔ kakaɖedzi be nuɖoanyi sia ƒe ŋkeke mamlɛawoe nye sia vavã. Míava nyae be Biblia me nyagblɔɖi geɖe le eme vam le míaƒe ŋkekea me. * Paulo ƒe nuxlɔ̃ame si nye be “le ŋkeke mamlɛawo me la ɣeyiɣi sesẽ siwo me nɔnɔ asẽ la ava” ƒe kpeɖodzi dze ƒã le nudzɔdzɔ dziŋɔ siwo dzɔ le ƒe alafa si va yi me la me. (Timoteo II, 3:1-5, NW; Marko 13:3-37) Woɖo tanya na nyadzɔdzɔgbalẽ aɖe si do nyitsɔ laa me nyati aɖe si ƒo nu tso ƒe alafa 20 lia ŋu be “Woaɖo Ŋku Edzi be Ŋutasẽnu Gbɔ Eme Wɔwɔ ƒe Azã.” Nyatia gblɔ be: “Ƒe 1999 ye nye ƒe si me wokɔ ʋu ɖi le wu ɖesiaɖe le ƒe alafa si me wowɔ hlɔ̃nu le wu ƒe afã susɔea me.”

20. Fifia enye nuka wɔɣi?

20 Menye fifiae nye megbeleleheɣi o. Yehowa ƒe yayra ɖe Biblia ƒe hehenadɔ si ƒo ɖesiaɖe ta si wowɔ kpɔ le xexeame katã wònye ɖaseɖiɖi na dukɔwo dzi la dze ƒã. (Mateo 24:14) Wɔ nyateƒea tɔwoe, eye nàgblɔe na ame bubuwo. Wò etsɔme mavɔ nɔ te ɖe nusi nàwɔ fifia dzi. Alɔgblɔlɔ wɔwɔ mana nàxɔ Yehowa ƒe yayra o. (Luka 9:62) Ke boŋ ɣeyiɣia de be ‘mianɔ te sesĩe, maʋãmaʋã, eye miagba go ɖaasi le Aƒetɔ la ƒe dɔwɔwɔ me, esi mienyae bena, miaƒe agbagbadzedze menye dzodzro le Aƒetɔ la me o ŋuti la.’—Korintotɔwo I, 15:58.

[Etenuŋɔŋlɔ]

^ mm. 19 Kpɔ Gbetakpɔxɔ, January 15, 2000, axa 12-14. Memama 13 vaseɖe 18 dzro kpeɖodzi sẽŋu ade siwo ɖee fia be míele ŋkeke mamlɛawo me tso ƒe 1914 me ke la me.

Èɖo Ŋku Wo Dzia?

•Aleke míawɔ aɖe ɖikekewo ɖa?

•Nuka míate ŋu asrɔ̃ tso Elisa ƒe subɔvi ƒe kpɔɖeŋua me?

•Agbenɔnɔ teamekpɔ kawoe wòle be míanɔ ŋudzɔ na ɣesiaɣi?

•Nukata wòle be míaɖe mía ɖokui fia wòadze ƒã be míenye Yehowa Ðase fowo?

[Biabiawo]

[Nɔnɔmetata siwo le axa 10]

Biblia-sɔsrɔ̃ kple gbedodoɖa ɣesiaɣi ate ŋu ana míaɖe ɖikekewo ɖa

[Nɔnɔmetata si le axa 11]

Wokpɔ Elisa ƒe subɔvi ƒe ɖikekewo gbɔ nɛ to ŋutega aɖe dzi

[Nɔnɔmetata si le axa 12]

Wofiaa Yehowa ƒe agbenyuinɔnɔ ƒe dzidzenu kɔkɔwo mí le Fiaɖuƒe Akpatawo, abe esia tɔgbe si le Benin ene me