Dzo kpo yi emenuwo dzi

Dzo kpo yi emenuawo dzi

Xɔse Tutuɖo to Biblia Sɔsrɔ̃ me le India

Xɔse Tutuɖo to Biblia Sɔsrɔ̃ me le India

 Míenye Amesiwo Si Xɔse le

Xɔse Tutuɖo to Biblia Sɔsrɔ̃ me le India

INDIA nye dukɔ si me subɔsubɔha vovovowo kple nuwɔna vovovowo yia edzi le tso Himalaya-to kɔkɔ si dzi sno yɔ tititi le dziehe gome vaseɖe India-ƒu si ƒe tsi xɔa dzo le anyiehe gome la dzi. Le emenɔla siwo wu biliɔn ɖeka dome la, ame 83 lɔƒo le alafa me nye Hindutɔwo, 11 le alafa me nye Moslemtɔwo, eye kpɔtɔeawo nye amesiwo tɔ ŋkɔ be Kristotɔwo, Sikhtɔwo, Buddhatɔwo, kple Jaintɔwo. Mawusubɔsubɔblɔɖe le wo katã si. The World Book Encyclopedia gblɔ be: “Mawusubɔsubɔ nye Indiatɔwo ƒe agbenɔnɔ ƒe akpa vevi aɖe.”

Yehowa Ðasefowo, amesiwo ƒe xexlẽme wu 21,200 le India, ƒe agbenɔnɔ ɖe woƒe Kristotɔwo ƒe dzixɔse nu la ɖe dzesi vevie. Abe alesi woƒe zɔhɛ siwo le xexeame ƒe akpa bubuwo wɔnɛ ene la, Ðasefo siwo le India bunɛ be enye mɔnukpɔkpɔ na yewo be yewoakpe ɖe yewo haviwo ŋu woatu xɔse sẽŋu ɖo ɖe Mawu ƒe Nya, Biblia Kɔkɔe la me. (Timoteo II, 3:16, 17) Bu alesi Biblia me nyateƒea ƒe sidzedze wɔ va su ƒome aɖe si le Chennai, le India ƒe anyiehe la si ŋu kpɔ.

Hafi ƒome sia nava ke ɖe Yehowa Ðasefowo ŋu la, wonye Katoliko gbɔgbɔha siwo gblɔna be yewoakpɔa ŋutegawo, gblɔa aɖe yeyewo, eye yewodaa gbe la me tɔ dovevienuwo. Woxɔ ŋkɔ le sɔlemeha la kple nuto si me wole me eye amewo yɔa ƒomea me tɔ aɖewo gɔ̃ hã be swami, si gɔmee nye “aƒetɔ.” Gbeɖeka Ðasefo aɖe srã ƒome sia kpɔ eye wòfia wo le Biblia me be Yesu enye Mawu ƒe Vi, ke menye Mawu Ŋusẽkatãtɔ abe alesi amewo xɔe se ene o. Ðasefoa fia wo hã be Mawu ƒe ŋkɔe nye Yehowa eye be tameɖoɖo si le Yehowa si ɖe anyigba ŋue nye be yeawɔe wòanye paradiso dzeani aɖe.—Psalmo 83:19; Luka 23:43; Yohanes 3:16.

Esi ƒome sia me tɔwo dea bubu Mawu ƒe Nya ŋu eye nusi wose la dzɔ dzi na wo ta la, wolɔ̃ be Yehowa Ðasefowo nasrɔ̃ Biblia kpli yewo. Esia na amesiwo dze si wo le sɔlemeha si me wonɔ tsã me la ɖu fewu le wo ŋu. Gake ƒomea ɖoe kplikpaa be yewoayi Biblia sɔsrɔ̃ dzi. Esi sidzedze geɖe va su wo si eye woƒe xɔse va sẽ ɖe edzi la, woɖe asi le woƒe alakpasubɔsubɔ me nuwɔnawo ŋu. Egbea, ƒome sia me tɔ etɔ̃ nye Ðasefo xɔnyɔnyrɔ dovevienuwo, eye wo dada wɔa kpekpeɖeŋu mɔɖeɖedɔa ɣesiaɣi si wòanya wɔ nɛ.

Ebia Xɔse be Wòanɔ Te Ðe Wɔametɔnyenye Nu

Ehiã vevie be Sunder Lal, si nye ɖekakpui aɖe si le kɔƒe aɖe me le Punjab naɖe xɔse sẽŋu kple dzideƒo afia hafi wòate ŋu agblɔ Mawu ƒe Fiaɖuƒe ŋuti nyanyuia na ame bubuwo. (Mateo 24:14) Nusita wòle aleae nye be eɖe asi le mawugeɖedzixɔse si le eƒe ƒomea kple kɔƒea me tɔwo si ŋu be yeasubɔ Mawu vavã Yehowa. Susu bubue nye be afɔ mele Sunder Lal si o.

Va ɖo ƒe 1992 la, afɔku aɖeke megblẽ Sunder Lal ƒe agbe dome o. Enye ɖɔkta ƒe kpeɖeŋutɔ eye woa kple eƒe ƒomea wɔa ɖeka dea ta agu na mawu vovovowo le mawunyafiala si wotia ƒe mɔfiafia te. Le zã aɖe me esime wònɔ keteke mɔ aɖe me tsom la, edze anyi. Keteke aɖe zɔ edzi eye wòlã eƒe atawo ɖa. Togbɔ be etsi agbe  hã la, mɔkpɔkpɔ bu ɖee le agbe me. Wogblɔ be Sunder Lal va zu nublanuitɔ ale gbegbe be eɖoe gɔ̃ hã be yeawu ye ɖokui. Eƒe ƒomea na kpekpeɖeŋui ale gbegbe, gake ewɔ nɛ be wɔna aɖeke maganɔ ye ŋu le etsɔme o.

Emegbe Yehowa Ðasefo aɖe va Sunder Lal gbɔ eye wòfiae le Biblia me be Mawu do ŋugbe be yeawɔ anyigba wòanye paradiso dzeanyi aɖe eye yeana lãmesẽ deblibo amesiwo katã lɔ̃a ye hevɔ̃a ye. Sunder Lal lɔ̃ be woasrɔ̃ Biblia kpli ye, eye wòsrɔ̃ nu veviedodotɔe ƒe ɖeka. Wokpee be wòade Kristotɔwo ƒe kpekpewo eye mlɔeba xɔlɔ̃ aɖe kɔnɛ ɖe gasɔ dzi woyina. Togbɔ be esea veve ŋutɔ ne ele gasɔa dzi hã la, viɖe geɖe va do tso eme nɛ. Ekpɔ nusi wòsrɔ̃ le eɖokuisi Biblia sɔsrɔ̃ me ƒe kpeɖodzi esime wòdo go ame bubu siwo xɔ Mawu ƒe Nyaa me ŋugbedodowo dzi se vavã eye wonɔa agbe ɖe Biblia ƒe nufiafiawo nu.

Sunder Lal te nyanyuia gbɔgblɔ na ehaviwo, eye wòxɔ nyɔnyrɔ le ƒe 1995 me. Gbã la, etana le anyigba abe alesi wowɔnɛ ene eye wòwɔa tso aƒeme yi aƒeme ƒe subɔsubɔdɔa le eƒe kɔƒea me. Gake fifia ya, eƒe gbɔgbɔ me nɔviwo na nui—afɔtietɔ̃keke si wowɔ be woatsɔ asi “adoe” lae. Afɔtietɔ̃keke sia wɔe be ele eɖokui si fifia wu tsã eye eya ŋutɔ te ŋu zɔa kilometa 12 ƒe mɔ yia hamea ƒe kpekpewo. Ɣeaɖewoɣi la, edoa kekea toa ya ʋuduʋuduwo me; ɣeaɖewoɣi hã edonɛ toa yame ƒe dzoxɔxɔ si gbɔa degree 43 ŋu me.

Tsɔ kpe ɖe kpekpewo dede ŋu la, Sunder Lal srɔ̃a Biblia kple ame geɖe siwo di be woakpe ɖe yewo ŋu be woatu xɔse sẽŋu ɖo ɖe Mawu vavã, Yehowa, me. Le nyateƒe me la, eƒe Biblia-nusrɔ̃vi xoxowo dometɔ adre xɔ nyɔnyrɔ fifia, eye ame etɔ̃ bubu siwo ŋu wòke ɖo siwo ehati Ðasefo bubuwo srɔ̃ Biblia kpli wo hã xɔ nyɔnyrɔ.

Biblia gblɔ be: “Menye amewo katã si xɔse la le o.” (Tesalonikatɔwo II, 3:2) Gake le amesiwo ‘ƒe nɔnɔme sɔ na agbe mavɔ kpɔkpɔ’ gome la, Mawu ƒe Nyaa sɔsrɔ̃ edziedzi ate ŋu atu xɔse sẽŋu ɖo ɖe wo me. (Dɔwɔwɔwo 13:48) Nusɔsrɔ̃ sia ƒomevi nana wokpɔa mɔ na etsɔme wɔnuku aɖe vevie—nusi dzi Indiatɔ gbogbo aɖewo va le xɔxɔm se.

[Anyigbatata si le axa 30]

(Edze nyuie le agbalẽa ŋutɔ me)

AFGANISTAN

PAKISTAN

NAPAL

BHUTAN

CHINA

BANGLADESH

MYANMAR

LAOS

THAILAND

VIETNAM

CAMBODIA

SRI LANKA

INDIA

[Afi Si Míexɔ Mɔɖeɖe Tso]

Mountain High Maps® Copyright © 1997 Digital Wisdom, Inc.