Dzo kpo yi emenuwo dzi

Dzo kpo yi emenuawo dzi

Ðo To Mawu Ƒe Nyagblɔɖinya Na Míaƒe Ŋkekea

Ðo To Mawu Ƒe Nyagblɔɖinya Na Míaƒe Ŋkekea

 Ðo To Mawu Ƒe Nyagblɔɖinya Na Míaƒe Ŋkekea

“Amevi, ƒu to anyi, ŋutega sia la, nuwuɣi ŋu wòle ɖo.”—DANIEL 8:17.

1. Nukae Yehowa di be ameƒomea katã nanya tso míaƒe ŋkekea ŋu?

YEHOWA memiãa nu ɖe etsɔme nudzɔdzɔwo dzi wònɔa nyanya na eya ɖeka ko o. Ke boŋ enye Amesi ɖea nya ɣaɣlawo ɖe go. Le nyateƒe me la, edi be mí katã míanya be míele ‘nuwuɣia’ me ʋĩ. Nya vevi ka gbegbee nye si wònye na ame biliɔn ade siwo le anyigba dzi fifia!

2. Nukatae amewo tsi dzi ɖe ameƒomea ƒe etsɔme ŋu?

2 Ðe wòwɔ nuku be xexe sia gogo eƒe nuwuwua? Amegbetɔ te ŋu zɔa dzinu dzi, gake le teƒe geɖe la, mete ŋu ɖia tsa le anyigba sia ƒe ablɔwo dzi vɔvɔ̃manɔmee o. Ate ŋu atsɔ egbegbe nuzazãwo ayɔ eƒe aƒeme fũ, gake mete ŋu tsia ƒomewo ƒe gbagbã nu o. Eye ete ŋu to nyatakakaxɔxɔ ƒe mɔnu yeyewo vɛ, gake mete ŋu fiaa nu amewo be woanɔ anyi ɖekae le ŋutifafa me o. Kpododonu alea wɔ ɖeka kple kpeɖodzi gbogbo siwo le Ŋɔŋlɔawo me be míele nuwuɣia me.

3. Ɣekaɣie wozã nya “nuwuɣi” zi gbãtɔ le anyigba dzi?

3 Mawudɔla Gabriel ye zã nya ɖedzesi ma—si nye “nuwuɣi”—zi gbãtɔ anye ƒe 2,600 enye si va yi. Mawu ƒe nyagblɔɖila aɖe si vɔvɔ̃ ɖo see Gabriel gblɔ be: “Amevi, ƒu to anyi, ŋutega sia la, nuwuɣi ŋu wòle ɖo.”—Daniel 8:17.

Míele “Nuwuɣi” la Me!

4. Mɔ bubu kawo nue Biblia gaƒo nu tso nuwuɣi ŋu le?

4 Nyagbɔgblɔ siwo nye “nuwuɣi” kple “nuwuɣi, si woɖo ɖi” dze zi ade le Daniel ƒe agbalẽa me. (Daniel 8:17, 19; 11:35, 40; 12:4, 9) ‘Ŋkeke mamlɛ’ siwo apostolo Paulo gblɔ ɖi ŋue woku ɖo. (Timoteo II, 3:1-5) Yesu Kristo ƒo nu tso ɣeyiɣi ma ke ŋu be enye yeƒe ‘anyinɔɣi’ si me  yeanye Fia si woɖo zi dzi le dziƒo.—Mateo 24:37-39.

5, 6. Amekawoe ‘dzro nu me’ le nuwuɣia me, eye nukae do tso eme?

5 Daniel 12:4 gblɔ be: “Ke wò Daniel, dzra nya siawo ɖo, eye natre agbalẽ la nu vaseɖe nuwuɣi; ame geɖewo adzro eme, eye sidzedze adzi ɖe edzi.” Woɣla nya siwo Daniel ŋlɔ la ƒe akpa geɖe eye wotre enu ale be amegbetɔwo mete ŋu se egɔme o ƒe alafa nanewo. Ke egbea ya ɖe?

6 Le nuwuɣi sia me la, Kristotɔ nuteƒewɔla geɖe ‘dzro’ Mawu ƒe Nya, Biblia, me. Nukae do tso eme? Yehowa yra ɖe woƒe agbagbadzedzewo dzi ale be sidzedze vavãtɔ va su ame geɖe si. Le kpɔɖeŋu me, wotsɔ sidzedze yra Yehowa ƒe Ðasefo amesiaminawo wòna wote ŋu se egɔme be Yesu Kristo va zu Fia le dziƒo le ƒe 1914 me. Amesiamina siawo kple woƒe zɔhɛ nuteƒewɔlawo wɔ ɖe apostoloa ƒe nya siwo woŋlɔ ɖe Petro II, 1:19-21 dzi hele ‘to lém ɖe nyagblɔɖinya la’ ŋu eye woka ɖe edzi bliboe be nuwuɣi la mee míele.

7. Nya siwo na Daniel ƒe agbalẽa le etɔxɛ dometɔ aɖewo ɖe?

7 Daniel ƒe agbalẽa le etɔxɛ le mɔ geɖe nu. Nya siwo le eme ƒe ɖewoe nye be fia aɖe do ŋɔdzi na eƒe nunyalawo be yeawu wo elabena womete ŋu lĩ eƒe drɔ̃e si tɔtɔe la heɖe egɔme nɛ o, gake Mawu ƒe nyagblɔɖila ya te ŋu kpɔ ta nɛ! Wotsɔ ɖekakpui etɔ̃ siwo gbe be yewomade ta agu na legba kɔkɔ aɖe o la ƒu gbe ɖe kpodzo si le bibim wu gbɔgblɔ la me, gake wotsi agbe eye dzo mefia woƒe akpa aɖeke o. Esi wonɔ azã aɖe ɖum la, ame alafa geɖe kpɔ asi aɖe wònɔ nya siwo gɔme womete ŋu se o ŋlɔm ɖe fiasã aɖe ƒe gli ŋu. Nugbeɖola vɔ̃ɖi aɖewo na wotsɔ ŋutsu tsitsi aɖe ƒu gbe ɖe dzatawo ƒe do me, gake edo go eye nuvevi aɖeke mewɔe o. Wokpɔ lã ene aɖewo le ŋutega me, eye nusi wofia le nyagblɔɖi me la va eme va ɖo keke nuwuɣia me ke.

8, 9. Aleke Daniel ƒe agbalẽa ate ŋu aɖe vi na míi, vevietɔ fifia si míele nuwuɣia me?

8 Edze ƒã be nya ƒomevi evee dze le Daniel ƒe agbalẽa me. Ðeka nye ŋutinya, eye evelia nye nyagblɔɖi. Evea siaa ate ŋu atu míaƒe xɔse ɖo. Esiwo nye ŋutinya fia mí be Yehowa Mawu yraa amesiwo yia edzi wɔa nuteƒe nɛ. Eye akpa siwo nye nyagblɔɖi doa ŋusẽ xɔse elabena woɖee fia be Yehowa nya alesi nuwo ava yii le ŋutinya me ƒe alafa geɖe—ƒe akpe geɖe gɔ̃ hã—do ŋgɔ.

9 Nyagblɔɖi vovovo siwo Daniel ŋlɔ la he susu yi Mawu ƒe Fiaɖuƒe dzi. Ne míekpɔ alesi nyagblɔɖi siawo le eme vamee la, edoa ŋusẽ míaƒe xɔse kple míaƒe kakaɖedzi be míele nuwuɣia me. Gake ɖikela aɖewo tso ɖe Daniel ŋu, eye wobe nudzɔdzɔ siwo dze abe ɖe wona nyagblɔɖi siwo le agbalẽ si wotsɔ eƒe ŋkɔ na me va eme ene la dzɔ hafi woŋlɔ wo. Ne woƒe nya siawo le eme la, ke ana ɖikeke gã aɖe nava nɔ nya si Daniel ƒe agbalẽa gblɔ ɖi le nuwuɣia ŋu la ŋuti. Ðikelawo tsɔ nya ɖe ŋutinya siwo le agbalẽa me hã ŋu. Eyata mina míaku wo me kpɔ.

Eɖo Ʋɔnu!

10. Gɔmesese ka nue wotsɔ nya ɖe Daniel ƒe agbalẽa ŋu le?

10 Tsɔe be ʋɔnudrɔ̃ƒee yele hele nya aɖe dɔdrɔ̃ teƒe kpɔm. Senyala amenutsola la te tɔ ɖe edzi be amesi ŋu wotsɔ nyaa ɖo dze agɔ si nye be etafa ame. Daniel ƒe agbalẽa me nyawo fia be enye nyateƒegbalẽ si Hebri-vi nyagblɔɖila aɖe si nɔ agbe le ƒe alafa adre kple adelia D.M.Ŋ. me ŋlɔ. Gake ɖikelawo te tɔ ɖe edzi be agbalẽa me nyawo nye nyakpakpa. Eyata mina míalé ŋku ɖe agbalẽa ƒe akpa si nye ŋutinya ŋu akpɔe ɖa be ewɔ ɖeka kple ŋutinya me nudzɔdzɔwo hã.

11, 12. Nukae dzɔ ɖe nutsotso si nye be Belsazar nye amesi ƒe ŋkɔ wokpa dzro ko la dzi?

11 Mina míatsɔ nusi míayɔ be enye fia si ŋu womeƒo nu tsoe o ƒe nya la adzro eme akpɔ. Daniel ta 5 lia ɖee fia be Belsazar ye nye fia nɔ dzi ɖum le Babilon-dugã la me esime womui le ƒe 539 D.M.Ŋ. me. Ðikelawo tso ɖe nya sia ŋu elabena le Biblia megbe la, Belsazar ƒe ŋkɔ megadze le teƒe bubu aɖeke o. Blema ŋutinyaŋlɔlawo  gblɔ be Nabonido boŋue nye Babilon-fia mamlɛtɔ.

12 Gake le ƒe 1854 me la, woke ɖe nuŋlɔɖikpe sue aɖewo ŋu le tome le blema Babilon-dugã Ur si le egbegbe Iraq ƒe dudowo me. Nya siwo dze le blemanuŋlɔɖikpe siawo dzi ƒe ɖee nye gbedodoɖa si me Fia Nabonido yɔ “vinye ŋutsu tsitsitɔ Bel-sar-ussur” le. Ðikelawo gɔ̃ hã lɔ̃ ɖe edzi be: Belsazar sia ŋue Daniel ƒe agbalẽa ƒo nu tsoe. Eyata menye ɖe womeƒo nu tso fia la ŋu hafi o, ɖeko womekpɔe le xexemenuŋlɔɖiwo me ɣemaɣi o. Esia nye kpeɖodzi gbogbo siwo li be nya siwo Daniel ŋlɔ nye nyateƒe ŋutɔŋutɔ la dometɔ ɖeka ko. Kpeɖodzi sia fia be Daniel ƒe agbalẽa nye Mawu ƒe Nya la ƒe akpa aɖe nyateƒe eye ele be míadzro emenyawo me fifi laa, le nuwuɣia me.

13, 14. Amekae Nebukadnezar nye, eye alakpamawu ka koŋue wòsubɔ?

13 Daniel ƒe agbalẽa ƒe akpa vevi aɖee nye nyagblɔɖi siwo ku ɖe xexemedziɖuɖu siwo va ɖe wo nɔewo yome kple nusiwo wo dzi ɖula aɖewo wɔ ŋu. Míate ŋu ayɔ dziɖula siawo dometɔ ɖeka be aʋakalẽtɔ si ɖo fiaɖuƒe anyi. Amesia si nye Babilon fiavi si ava zu fia la kple eƒe aʋakɔ ɖu Egipte-fia Farao Nexo ƒe aʋakɔwo dzi le Karkemis. Gake gbedasi aɖe si Babilon fiavi la xɔ wɔe be eɖe asi le aʋadziɖuɖudɔ mamlɛawo ŋu na eƒe aʋafiawo. Esi ɖekakpui sia si ŋkɔe nye Nebukadnezar se be ye fofo Nabopolassar ku la, eva xɔ fiazikpuia le ƒe 624 D.M.Ŋ. me. Le ƒe 43 siwo wòtsɔ ɖu fiae me la, ena nuto siwo nye Asiria tɔ tsã va nɔ fiaɖuƒe si wòɖo anyi me eye wòkeke eƒe dziɖuƒe ɖe enu hexɔ Siria kple Palestina vaseɖe keke Egipte-liƒo dzi ke.

14 Marduk si nye Babilon-mawu gãtɔ koŋue Nebukadnezar subɔ. Fia la xɔe se be Marduk gbɔe yeƒe aʋadziɖuɖuwo katã tso. Nebukadnezar tu gbedoxɔwo na Marduk kple Babilonia-mawu gbogbo bubuwo ɖe Babilon heɖo atsyɔ̃ na wo. Anye Marduk ye Babilon-fia sia wɔ sikalegba si wòli anyi ɖe Dura-bali me la na. (Daniel 3:1, 2) Eye edze abe Nebukadnezar ɖo ŋu ɖe afakaka ŋu vevie ne ele ɖoɖo wɔm ɖe eƒe aʋahohowo ŋu ene.

15, 16. Nukae Nebukadnezar wɔ na Babilon, eye nukae dzɔ esime wòƒo adegbe le dua ƒe gãnyenye ŋu?

15 Esi Nebukadnezar wu Babilon ƒe gli gã eve ƒokpli si gɔme fofoa dze la ɖoɖo nu la, ena wòva dze abe ɖe womate ŋu aɖu fiadu ma dzi akpɔ o ene. Wogblɔ be Nebukadnezar tso abɔ ɖe gli dzi be wòana srɔ̃a Mediatɔ si wo denyigba dzi togbɛwo kple avewo kpɔkpɔ dzro la ƒe dzi nadze eme—eye wobu abɔa de nu adre siwo wɔ nuku wu le blemaxexeame la dome. Ena Babilon zu dugã si ŋu gli nyadri le wu du ɖesiaɖe ɣemaɣi. Eye aleke gbegbe alakpasubɔsubɔ ƒe nɔƒe vevi ma nye dada nɛ enye si!

16 Gbeɖeka Nebukadnezar ƒo adegbe be: ‘Ðe menye esia enye Babilon gã la si nye ŋutɔ metso oa?’ Gake Daniel 4:28-30 gblɔ be “esi fia la mekpɔ ɖe nu le nyaa me o la,” eku tsu enumake. Megadze aɖu fia o ƒe adre sɔŋ, eye wòɖu gbe, abe alesi tututu Daniel gblɔe ɖi ene. Emegbe wogbugbɔ fiaɖuƒea nɛ. Ènya nusi nusiawo katã fia le nyagblɔɖi mea? Àte ŋu aɖe alesi emevava gãtɔ kplɔ mí va ɖo nuwuɣia me la mea?

Agbalẽa ƒe Nyagblɔɖiwo Me Dzodzro

17. Aleke nàƒo nu tso drɔ̃e si nye nyagblɔɖi si Mawu na Nebukadnezar ku le eƒe fiaɖuɖu ɖe xexeame dzi ƒe ƒe evelia me ŋui?

17 Fifia mina míadzro nyagblɔɖi siwo le Daniel ƒe agbalẽa me dometɔ aɖewo me kpɔ. Le Nebukadnezar ƒe fiaɖuɖu ɖe xexeame dzi  le Biblia ƒe nyagblɔɖi nu ƒe ƒe evelia me (ƒe 606/605 D.M.Ŋ.) la, Mawu na wòku drɔ̃e dziŋɔ aɖe. Daniel ta 2 lia gblɔ be drɔ̃ea ku ɖe legba gã aɖe si ƒe ta nye sika ŋu, eƒe akɔta kple abɔwo nye klosalo, eƒe ƒodo kple ali nye akɔbli, eƒe atawo nye gayibɔ, eye eƒe afɔwo nye gayibɔ si tsaka kple tsu. Nukae legba la ƒe akpa vovovoawo tsi tre ɖi na?

18. Nukae drɔ̃ea me legba la ƒe ta si nye sika, akɔta kple abɔ siwo nye klosalo, kple ƒodo kpakple ali siwo akɔbli, la tsi tre ɖi na?

18 Mawu ƒe nyagblɔɖila la gblɔ na Nebukadnezar be: “Wò fia, . . . wòe nye sika ta la.” (Daniel 2:37, 38) Nebukadnezar ye nye fia nɔ fiaƒome si ɖu Babilon Fiaɖuƒea dzi nu. Medo-Persia si legba la ƒe akɔta kple abɔ siwo nye klosalo tsi tre ɖi na va mui ƒu anyi. Hela Fiaɖuƒea, si ƒodo kple ali siwo nye akɔbli tsi tre ɖi na la, kplɔe ɖo. Aleke xexemefiaɖuƒe ma wɔ dze egɔmee?

19, 20. Amekae nye Alexander Gãtɔ, eye akpa kae wòwɔ si na Hela va zu xexemefiaɖuƒe?

19 Le ƒe alafa enelia D.M.Ŋ. me la, ɖekakpui aɖe wɔ akpa vevi aɖe le Daniel ƒe nyagblɔɖia me vava me. Wodzii le ƒe 356 D.M.Ŋ. me, eye wova yɔe le xexeame be Alexander Gãtɔ. Esi wowu fofoa Philip le ƒe 336 D.M.Ŋ. me la, Alexander si xɔ ƒe 20 la va xɔ Makedonia-fiazikpuia.

20 Alexander dze aʋadziɖudɔ aɖe gɔme le ƒe 334 D.M.Ŋ. ƒe May ƒe gɔmedzedze. Aʋakɔ sue bibi aɖe si me asrafo afɔzɔla 30,000 kple sɔdola 5,000 le nɔ esi. Alexander ɖu aʋa gbãtɔ si wòwɔ kple Persiatɔwo dzi le ƒe 334 D.M.Ŋ. me le Granicus Tɔsisia gbɔ le Asia Sue (si nye Turkey fifia) ƒe dzieheɣetoɖoƒe. Kaka ƒe 326 D.M.Ŋ. naɖo la, aʋadziɖula zazɛ̃ sia ɖu wo dzi keŋkeŋ eye wòyi ɣedzeƒe gome va ɖo keke Indus Tɔsisi si le egbegbe Pakistan gbɔ ke. Gake woɖu Alexander dzi le eƒe aʋa mamlɛtɔ me esime wònɔ Babilon. Le June 13, 323 D.M.Ŋ. me, esi Alexander xɔ ƒe 32 kple ɣleti 8 pɛ ko la, ena ta futɔ dziŋɔtɔ kekeake si nye ku. (Korintotɔwo I, 15:55) Gake eƒe aʋadziɖuɖuwo na Hela va zu xexemefiaɖuƒe, abe alesi wogblɔe ɖi le Daniel ƒe nyagblɔɖia me ene.

21. Hekpe ɖe Roma Fiaɖuƒea ŋu la, xexemefiaɖuƒe bubu ka hãe drɔ̃e me legba la ƒe afɔ siwo nye gayibɔ la tsi tre ɖi na?

21 Nukae legba gã la ƒe ata siwo nye gayibɔ la tsi tre ɖi na? Roma si le abe gayibɔ ene lae dze Hela Fiaɖuƒea dzi hegbãe gudugudu. Esi Romatɔwo mede bubu aɖeke Mawu ƒe Fiaɖuƒe si Yesu Kristo ɖe gbeƒãe ŋu o ta la, wowui le fuwɔameti ŋuti le ƒe 33 M.Ŋ. me. Roma ti Yesu ƒe nusrɔ̃lawo yome kple susu be yewoagblẽ Kristotɔnyenye vavãtɔ dome. Gake menye Roma Fiaɖuƒea koe Nebukadnezar ƒe drɔ̃ea me legba la ƒe afɔ siwo nye gayibɔ la tsi tre ɖi na o ke etsi tre ɖi na dunyaheŋusẽ si va do tso eme hã—si nye Anglo-Amerika Xexemefiaɖuƒea.

22. Aleke drɔ̃e me legba la kpe ɖe mía ŋu míekpɔe be míele nuwuɣia me ʋĩ?

22 Numekuku nyuie ɖee fia be míele nuwuɣia me ʋĩ, elabena míeɖo ɣeyiɣi si me legba la ƒe afɔ siwo nye gayibɔ kple tsu le dzi ɖum le la me. Egbeŋkekea me dziɖuɖu aɖewo le abe gayibɔ ene alo wozia ame dzi, eye bubuwo hã le abe tsu ene. Togbɔ be tsu si nye nusi wotsɔ wɔ ‘amegbetɔƒomea’ bɔbɔ hã la, eva hiã na dziɖuɖu siwo le abe gayibɔ ene be woana gome aɖe nanɔ ame tsɛwo si le dziɖuɖu siwo le wo dzi ɖum me. (Daniel 2:43; Hiob 10:9) Gake dziɖuɖu siwo ƒe nya me sẽ kple ame tsɛwo mete ŋu wɔa ɖeka o, abe alesi gayibɔ kple tsu manya tsaka o ene. Gake Mawu ƒe Fiaɖuƒea ahe xexe sia si me ma kakɛkakɛ le dunyahehe gome la ava nuwuwui kpuie.—Daniel 2:44.

23. Aleke nàƒo nu tso drɔ̃e si Daniel ku kple ŋutega siwo wòkpɔ le Belsazar ƒe fiaɖuɖu ƒe ƒe gbãtɔ me ŋui?

23 Daniel ƒe nyagblɔɖi wɔdɔɖeamedzia ƒe ta 7 lia hã kplɔ mí va nuwuɣia mee. Ta sia ƒo nu tso nane si dzɔ le Babilon Fia Belsazar ƒe ƒe gbãtɔ me ŋu. Ɣemaɣi Daniel xɔ ƒe 70 kple edzivɔ, eye “[eku] drɔ̃e, eye wòkpɔ ŋutega le eƒe aba dzi.” Aleke gbegbe ŋutega mawo do ŋɔdzi nɛ enye si! Egblɔ be: “Mekpɔ . . . dziƒo ƒe ya eneawo lɔ atsiaƒu gã la ɖe nu. Lã gã ene do tso atsiaƒu la me, eye woto vovo tso wo nɔewo gbɔ.” (Daniel 7:1-8, 15) Lã ɖedzesi kawo gbegbee nye si wonye! Gbãtɔ  nye dzata si to aʋala, eye evelia ɖi sisiblisi. Lãkle si to aʋala ene kple ta ene kplɔ wo ɖo! Lã enelia si sesẽ ŋutɔ la to gaɖu gãwo kple dzo ewo. Dzo ‘sue’ aɖe si “to ŋku abe amegbetɔ ƒe ŋku ene” eye “nu, si gblɔa nya gãwo” li nɛ la to ɖe eƒe dzo ewoawo dome. Lã wɔmoyaa kawo gbegbee nye si!

24. Nukae Daniel 7:9-14 gblɔ be Daniel kpɔ le dziƒo, eye nuka ŋue ŋutega sia ku ɖo?

24 Daniel ƒe ŋutegawo va trɔ ɖe dziƒo ŋu. (Daniel 7:9-14) Ekpɔ “Amegã Ðeɖi,” Yehowa Mawu, wònye Ʋɔnudrɔ̃la bɔbɔ nɔ fiazikpui dzi le ŋutikɔkɔe me. “Ame akpe teƒe akpe le esubɔm, eye ame akpe ewo teƒe akpe ewo tsi tre ɖe egbɔ.” Mawu drɔ̃ fɔbuʋɔnu lãawo hexɔ dziɖulanyenye le wo si eye wòtsrɔ̃ lã enelia. Wotsɔ dziɖuŋusẽ mavɔ de asi na ‘ame aɖe si le abe amegbetɔvi ene’ ɖe “dukɔwo katã, anyigba dzi dukɔwo kple gbegbɔgblɔwo” dzi. Esia ku ɖe nuwuɣia kple Amegbetɔvi, Yesu Kristo, ɖoɖo fiazikpui dzi le ƒe 1914 me ŋu.

25, 26. Biabia kawoe afɔ ɖe te ne míele Daniel ƒe agbalẽa xlẽm, eye agbalẽ kae ate ŋu akpe ɖe mía ŋu míaɖo wo ŋu?

25 Nya geɖe anɔ amesiame si axlẽ Daniel ƒe agbalẽa si wòabia godoo. Le kpɔɖeŋu me, nukae lã ene siwo ŋu Daniel ta 7 ƒo nu tsoe la tsi tre ɖi na? Aleke míaɖe nyagblɔɖi si ku ɖe “kwasiɖa blaadre” si woyɔ le Daniel 9:24-27 ŋu mee? Ke Daniel ta 11 kple nyagblɔɖi me hoʋiʋli si le “dziehefia” kple “anyiehefia” dome ya ɖe? Nukae míate ŋu akpɔ mɔ na be fia siawo awɔ le nuwuɣia me?

26 Yehowa na nya siawo me kɔ na esubɔla amesiamina siwo le anyigba dzi, amesiwo woyɔ le Daniel 7:18 be ‘Dziƒoʋĩtɔ la ƒe ame kɔkɔewo.’ Tsɔ kpe ɖe eŋu la, “dɔla nuteƒewɔla kple aɖaŋudzela” la wɔ ɖoɖo si ana míagase nyagblɔɖila Daniel ƒe agbalẽ si tso gbɔgbɔ me la me ɖe edzi. (Mateo 24:45) Esia li fifia le agbalẽ yeye si woɖe ɖe go nyitsɔ laa si nye Ðo To Daniel ƒe Nyagblɔɖi La! me. Axa 320-gbalẽ sia si me nɔnɔmetata dzeaniwo le ƒo nu tso Daniel ƒe agbalẽa ƒe akpa ɖesiaɖe ŋu. Eƒo nu tso nyagblɔɖi siwo tua xɔse ɖo la dometɔ ɖesiaɖe kple ŋutinya siwo katã nyagblɔɖila lɔlɔ̃tɔ Daniel ŋlɔ ɖi ŋu.

Gɔmesese Ŋutɔŋutɔ Le Eŋu na Míaƒe Ŋkekea

27, 28. (a) Nyateƒenya kae dze le Daniel ƒe agbalẽa me nyagblɔɖiwo me vava ŋu? (b) Ɣeyiɣi ka mee míele, eye nukae wòle be míawɔ?

27 Bu nya vevi sia ŋu kpɔ: Daniel ƒe agbalẽa me nyagblɔɖiwo katã va eme, negbe nya ʋɛ aɖewo koe meva eme haɖe o. Le kpɔɖeŋu me, míele xexeame ƒe nɔnɔme si drɔ̃e me legba si ŋu Daniel ta 2 lia ƒo nu tsoe ƒe afɔwo tsi tre ɖi na la teƒe kpɔm fiafia. Wotu ga le ati takpoe si ŋu Daniel ta 4 lia ƒo nu tsoe ŋu esi woɖo Mesia Fia, Yesu Kristo, zi dzi le ƒe 1914 me. Ẽ, abe alesi wogblɔe ɖi le Daniel ta 7 me ene la, ɣemaɣie Amegã Ðeɖi la tsɔ dziɖuɖu na Amegbetɔvi la.—Daniel 7:13, 14; Mateo 16:27–17:9.

28 Ŋkeke 2,300 si ŋu Daniel ta 8 lia ƒo nu tsoe kple ŋkeke 1,290, kpakple ŋkeke 1,335 si Daniel ta 12 lia yɔ la katã va yi—míeto ɣeyiɣi mawo ŋu yi xoxo. Daniel ta 11 lia me dzodzro ɖee fia be ʋiʋli si le “dziehefia” kple “anyiehefia” dome ɖo eƒe yɔyrɔenu. Esiawo katã nye Ŋɔŋlɔawo me kpeɖodzi be míeɖo nuwuɣia me ʋĩ. Esi míeɖo ɣeyiɣi tɔxɛ aɖe me le ŋutinya me ta la, nukae wòle be míaɖo kplikpaa awɔ? Ðikeke aɖeke mele eme o be ele be míaɖo to Yehowa Mawu ƒe nyagblɔɖinya la.

Aleke Nàɖo Wo Ŋui?

• Nukae Mawu di be ameƒomea katã nanya le míaƒe ŋkekea ŋu?

• Aleke Daniel ƒe agbalẽa ate ŋu atu míaƒe xɔse ɖoe?

• Akpa kawoe nɔ Nebukadnezar ƒe drɔ̃e me legba la si, eye nukae akpa siawo tsi tre ɖi na?

• Nukae ɖe dzesi le Daniel ƒe agbalẽa me nyagblɔɖiwo me vava ŋu?

[Biabiawo]