Dzo kpo yi emenuwo dzi

Dzo kpo yi emenuawo dzi

 NYATI SI LE AKPAA DZI

Gbegbɔgblɔ Vovovowo Mexe Mɔ Na Mí O—Na Míakpɔ Ale Si Gbegɔmeɖeɖedɔa Yinae Ða

Gbegbɔgblɔ Vovovowo Mexe Mɔ Na Mí O—Na Míakpɔ Ale Si Gbegɔmeɖeɖedɔa Yinae Ða

“Wogblɔna ɣeaɖewoɣi be dɔ aɖeke wɔwɔ mesesẽ de gbegɔmeɖeɖe nu o.”—“The Cambridge Encyclopedia of Language.”

YEHOWA ÐASEFOWO wɔa ɖoɖo nyuie kua nu me eye woŋlɔa agbalẽwo hafi va ɖea wo gɔme. Agbalẽŋɔŋlɔ Dɔwɔƒe si le wo si le woƒe dɔwɔƒegã le New York toa nu si woŋlɔ la me tsitotsito hekpɔa egbɔ be wo me nyawo de pɛpɛpɛ hesɔ ɖe egbegbe gbeŋutisewo nu. *

Emegbe Agbalẽŋɔŋlɔ Dɔwɔƒea ɖoa nu si woŋlɔ la ɖe gbegɔmeɖela alafa geɖe siwo le xexea me godoo—ame siawo dometɔ akpa gãtɔ le gbegɔmeɖeɖedɔa wɔm le teƒe siwo wodoa gbe siawo le. Ele be gbegɔmeɖelawo nase Eŋlisigbea kple wo degbea nyuie.

Aleke gbegɔmeɖelawo wɔa dɔae?

Geraint, ame si nye gbegɔmeɖela le Britain gblɔ be: “Nye kple gbegɔmeɖela aɖewoe wɔa dɔ, eya ta nuwɔwɔ aduadu le vevie. Mí katã míewɔa dɔ ɖekae ɖea nyati siwo gɔmeɖeɖe sesẽ la gɔme. Ne míele dɔa wɔm la, menye nya ɖekaɖekawo ŋu koe míeléa ŋku ɖo o, ke míeléa ŋku ɖe nyawo ƒe ƒuƒoƒowo hã ŋu. Míaƒe susu nɔa gɔmesese si le nyawo ŋu kple taɖodzinu si tae woŋlɔ wo ɖo la ŋu eye ame siwo tututu woŋlɔ nyatia na hã nɔa susu me na mí ɣesiaɣi.”

Nu kae nye wò taɖodzinu abe gbegɔmeɖela ene?

“Míaƒe taɖodzinue nye be míaƒe nuxlẽlawo naxlẽ nu si gɔme  míeɖe la abe wo degbe mee woŋlɔe ɖo gbã ene.” Mele be Eŋlisigbea nakpɔ ŋusẽ ɖe gbegɔmeɖeɖea dzi o. Esia ta míedzea agbagba be míazã nya siwo gbea dolawo zãna. Esia wɔnɛ be míaƒe nuxlẽlawo ƒe susu nɔa nu si xlẽm wole la ŋu abe nuɖuɖu vivi aɖe ɖum wole ene.”

Vi kawoe wòɖena ne gbegɔmeɖelawo le gbea dolawo dome?

“Ekpena ɖe mía ŋu be míeɖea agbalẽwo gɔme wo gɔme nya sena. Amewo doa gbea míesena gbe sia gbe. Tsɔ kpe ɖe eŋu la, míate ŋu abia amewo ƒe susu le nya aɖewo ŋu anya nenye be wosɔ, wonya se eye wo gɔmesese le bɔbɔe. Esia kpena ɖe mía ŋu míetea ŋu gblɔa nya si tututu Eŋlisigbea gblɔ.”

Aleke miewɔa ɖoɖo ɖe miaƒe dɔa ŋu?

“Ame etɔ̃e wɔa dɔ ɖekae. Gbã la, ame etɔ̃awo dometɔ ɖe sia ɖe xlẽa nu si gɔme wodi be woaɖe la le Eŋlisigbea me be wòase egɔme nyuie, anya ɖoɖo si nu woŋlɔe ɖo kple ame siwo koŋ woŋlɔe na. Míebiana mía ɖokui be: ‘Ame kawo koŋue woŋlɔe na? Nya vevi ka ŋue wòku ɖo, eye taɖodzinu ka gbɔe wodi be wòaɖo? Nu kae mate ŋu asrɔ̃ tso eme?’ Esiawo kpena ɖe mía ŋu míenyaa nya siwo tɔgbi wòle be míazã.

“Emegbe ame etɔ̃awo va kpena hedzroa nyatia me, eye wosrɔ̃a nu tso wo nɔewo gbɔ. Ðe míese nyatia gɔme ŋutɔŋutɔa? Aleke míate ŋu aɖe egɔme wòasɔ kple Eŋlisigbea? Míaƒe taɖodzinue nye be míana míaƒe nuxlẽlawo nase le wo ɖokui me abe ale si ame si axlẽ Eŋlisigbea hã ase le eɖokui me ene.”

Aleke ame etɔ̃awo wɔa dɔ ɖekae?

“Míaƒe taɖodzinue nye be míaƒe nuxlẽlawo nase nu siwo gɔme míeɖe la me nyuie ne wonya xlẽe zi gbãtɔ. Esia ta míexlẽa memama ɖe sia ɖe si gɔme míeɖe vɔ la wòɖina zi geɖe.

“Ame etɔ̃awo dometɔ ɖeka si nye gbegɔmeɖelaa ŋlɔa nyawo ɖe kɔmpiuta dzi eye ame susɔeawo nɔa ekpɔm le mɔ̃a dzi. Míeléa ŋku ɖe eŋu be nya bubuwo meva kpee loo alo nya aɖewo bu le eme o. Míaƒe ŋku nɔa nyawo ŋɔŋlɔ nyuie, gbeŋutise kple ale si tututu wodoa gbeae ŋu. Emegbe mía dometɔ ɖeka xlẽa memama si gɔme míeɖe wu enu la wòɖina. Ne ele exlẽm eye afi aɖe meyi nyuie o la, míebiana be nu ka  gbɔe wòtso? Ne míeɖe nyati bliboa gɔme vɔ la, mía dometɔ ɖeka xlẽnɛ wòɖina eye ame mamlɛawo nɔa dzesi dem teƒe siwo mezɔ nyuie o siwo ahiã ɖɔɖɔɖo la ɖi.”

Edze abe menye dɔ vie wònye o ene!

“Nenemae! Eya ta kaka ŋkekea nawu enu la ɖeɖi tea mía ŋu. Eya ta le ŋufɔke la míegaxlẽa nyatia toa eme. Kwasiɖa aɖewo megbe la, Agbalẽŋɔŋlɔ Dɔwɔƒea ɖoa asitɔtrɔ mamlɛ siwo wowɔ le Eŋlisigbea me la ɖe mí. Emegbe míegaxlẽa nyatia eye míeléa ŋku kple to ɖe eŋu nyuie hewɔa ɖɔɖɔɖo siwo hiã.”

Kɔmpiutadzidɔwɔɖoɖo kawoe miezãna?

“Kɔmpiutawo mate ŋu awɔ dɔ si gbegɔmeɖelawo wɔna o. Gake Yehowa Ðasefowo to kɔmpiutadziɖoɖo aɖewo vɛ siwo kpena ɖe mía ŋu míetea ŋu wɔa dɔ aɖewo bɔbɔe. Dɔwɔnuawo dometɔ ɖeka wɔa dɔ abe nyagɔmeɖegbalẽ ene eye míetsɔa nyawo kple nuwo ŋkɔ dana ɖe afi ma. Dɔwɔnu bubu hã kpena ɖe mía ŋu míekua nu me tso ale si míaƒe gbegɔmeɖelawo ɖe nya sesẽ aɖewo gɔme va yi ŋu.”

Aleke nèbua wò dɔae?

“Míebua míaƒe dɔa be enye nunana na amewo. Eye míedina be míatrɔ asi le nunana ma ŋu nyuie be wòaɖe vi na wo. Dzi dzɔa mí ne nyati aɖe si dze le magazine me alo Internet dzi wɔ dɔ ɖe exlẽla dzi be wòwɔ tɔtrɔ nyuiwo le eƒe agbe me.”

 Viɖe Siwo Nɔa Anyi Ðaa

Le xexea me godoo la, ame miliɔn geɖe xlẽa Yehowa Ðasefowo ƒe agbalẽwo le woawo ŋutɔwo degbe me. Wotu nunya si le woƒe agbalẽwo kple videowo me kpakple nyati siwo dzena le jw.org dzi la ɖe Biblia dzi. Le agbalẽ kɔkɔe ma me la, Mawu si ƒe ŋkɔe nye Yehowa la gblɔ na mí be yedi be woagblɔ yeƒe gbedeasia na “dukɔ sia dukɔ kple to sia to kple gbegbɔgblɔ sia gbegbɔgblɔ.”—Nyaɖeɖefia 14:6. *

^ mm. 4 Eŋlisigbe mee woŋlɔa agbalẽawo ɖo gbã.

^ mm. 25 Ʋu www.jw.org be nàkpɔ video kple nu siwo woxlẽ lé ɖe mɔ̃ dzi kpakple agbalẽ siwo le mia degbe kple gbegbɔgblɔ bubu alafa geɖe me.