Dzo kpo yi emenuwo dzi

Dzo kpo yi emenuawo dzi

 NYATI SI LE AKPAA DZI

Nɔnɔme Si Le Asiwò Ye Ana Nàkpɔ Dzidzɔ!

Nɔnɔme Si Le Asiwò Ye Ana Nàkpɔ Dzidzɔ!

Nu etɔ̃ siawo dometɔ kae ana nàkpɔ dzidzɔ?

  • Nɔnɔme si me nèle

  • Ame si ƒomevi nènye

  • Nɔnɔme si anɔ asiwò

AME aɖewo atia, “nɔnɔme si me nèle,” ɖewohĩ woagblɔ be, “makpɔ dzidzɔ geɖe . . . ”

  • “Ne ga geɖe le asinye”

  • “Ne mekpɔ srɔ̃ nyui aɖe ɖe”

  • “Ne mele lãmesẽ me”

Le nyateƒe me la, nɔnɔme si anɔ asiwò ye ana nàkpɔ dzidzɔ ke menye nɔnɔme si me nèle alo ame si ƒomevi nènye o. Eye esia nye dzidzɔnya. Nu ka tae? To vovo na nɔnɔme si me nèle kple ame si ƒomevi nènye siwo ŋu màte ŋu awɔ naneke le o la, àte ŋu awɔ nane tso nɔnɔme si le asiwò ya ŋu.

“ATIKE NYUI”

Biblia me lododo aɖe gblɔ be: “Dzi kpɔdzi- dzɔ nye atike nyui, ke gbɔgbɔ si dzi nu te ɖo vevie la nana ŋusẽ vɔna le ame ŋu.” (Lododowo 17:22) Ne míagblɔe bubui la, nɔnɔme si anɔ asiwò ye ana nàkpɔ dzidzɔ loo alo makpɔ dzidzɔ o! Ate ŋu ana nàɖo wò taɖodzinu aɖe gbɔ loo alo màɖo egbɔ o; alo ate ŋu ana be nànɔ te ɖe nɔnɔmewo nu ne nya vɔ̃ aɖe dzɔ ɖe dziwò loo alo be dzi naɖe le ƒowò.

Asesẽ na ame aɖewo be woaxɔe ase be nɔnɔme si anɔ ame si ye ana wòakpɔ dzidzɔ loo alo makpɔe o. Woagblɔ be:

  • ‘Nu ka tae manɔ fu kpem evɔ ahanɔ mɔ kpɔm be nuwo ava nyo?’

  • ‘Ne mele mɔ kpɔm be nuwo ava nyo nam hã la, mɔkpɔkpɔ dzodzro koe wònye.’

  • ‘Ele be mawɔ nu ɖe ale si tututu nɔnɔmea le nu tsɔ wu be manɔ drɔ̃e kum be nuwo ava nyo.’

Adze abe susu le nya siawo me ene. Ke hã, eɖea vi ne míekpɔa mɔ be nuwo ava nyo. Na míade ŋugble le kpɔɖeŋu siwo gbɔna ŋu kpɔ.

Alex kple Brian wɔa dɔ le dɔwɔƒe ɖeka, gake wo dometɔ ɖe sia ɖe kple dɔ si wòwɔna. Esi woƒe dɔdzikpɔlaa va lé ŋku ɖe woƒe dɔwo ŋu la, ehe woƒe susu yi vodada aɖewo siwo le woƒe dɔwo ŋu la dzi.

  • Alex: “Mewɔ nye ŋutetewo katã hezã ɣeyiɣi geɖe ɖe dɔ sia ŋu, gake wogakpɔ vodada le eŋu kokoko! Nyemate ŋu awɔ dɔ sia nyuie gbeɖe o. Ne meku kutri le eŋu hã la, gbeɖegbeɖea koe. Nu ka tae wòle be magayi ewɔwɔ dzi?”

  • Brian: “Nye dɔtɔ ƒo nu tso nye dɔa ƒe akpa si mewɔ nyuie la ŋu, ke hã mewɔ vodada ɖeka eve aɖewo. Mesrɔ̃ nu vevi aɖewo le aɖaŋu si wòɖo nam la me si akpe ɖe ŋunye mawɔ dɔa nyuie ɣebubuɣi.”

 NU KAE NÈSUSU?

  • Ame eve siawo dometɔ kae akpɔ dzidzedze le eƒe dɔa me le ɣleti ade megbe, Alex loo alo Brian?

  • Ne ènye dɔtɔ ɖe, ame eve siawo dometɔ kae nàdi be yeaxɔ ɖe dɔ me alo ne èva hiã be nàtso dɔwɔlawo dzi la, eka ŋue nàɖe asi le?

  • Ne nuwo meyi nyuie abe ale si nèkpɔ mɔe ene o la, ame eve siawo dometɔ kae nuwɔnawo ɖina?

Blanuilédɔ dzea Andrea kple Brittney dzi ɣeaɖewoɣi. Wo dometɔ ɖe sia ɖe kple ale si wònɔa te ɖe enui.

  • Andrea ƒe susu katã nɔa eɖokui ŋu. Melɔ̃na be yeawɔ naneke na ame aɖeke o negbe ɖe ame aɖe wɔ nane nɛ ko hafi. Esusuna be, ‘nu ka tae wòle be magblẽ ɣeyiɣi ɖe ame siwo mawɔ naneke wòaɖe vi nam o la ŋu?’

  • Brittney ya dzea agbagba vevie be yeanyo dɔme na amewo ahawɔ nu siwo aɖe vi na wo, ne wokpɔ ŋudzedze ɖe eŋu alo womekpɔ ŋudzedze ɖe eŋu o hã. Enɔa agbe ɖe Sikasededea nu—si nye be ewɔa nu ɖe amewo ŋu abe ale si wòadi be woawɔ nu ɖe ye ŋu ene. (Luka 6:31) Le Brittney gome la, nu nyui geɖe doa go tsoa nyuiwɔwɔ na amewo me.

NU KAE NÈSUSU?

  • Nyɔnu eve siawo dometɔ kae nàdi be wòanye xɔ̃wò?

  • Wo dometɔ kae anɔ ƒomedodo nyui me kple amewo?

  • Ne èlea blanui ɣeaɖewoɣi la, ɖe nèwɔa nu abe Andrea ene loo alo abe Brittney enea?

Ðewohĩ ànya ame aɖewo siwo wɔa nu abe Brian kple Brittney ene. Ðewohĩ àse le ɖokuiwò me be yewɔa nu abe woawo ene. Ne ele nenema la, àkpɔe be nɔnɔme si anɔ asiwò ye ana nàkpɔ dzidzɔ le agbe me loo alo makpɔe o. Ke ne èwɔa nu abe Alex alo Andrea ene ɖe? Na míade ŋugble tso mɔ etɔ̃ siwo nu Biblia ate ŋu akpe ɖe ŋuwò nànɔ te ɖe agbemekuxiwo nu nyuie wu la ŋu.

 1 MÈGANƆ MƆ KPƆM BE NUWO MANYO O

BIBLIA GBLƆ BE: “Ne dzi ɖe le ƒowò le xaxagbe la, ekema wò ŋusẽ dzi aɖe kpɔtɔ.”—Lododowo 24:10.

NU SI WÒFIA: Dziɖeleameƒo mana nàkpɔ ŋusẽ atsɔ aɖe afɔ siwo hiã aɖɔ nɔnɔmea ɖo loo alo akpɔ kpekpeɖeŋu atsɔ anɔ te ɖe nɔnɔmea nu o.

KPƆÐEŊU: Juliza mekpɔ dzidzɔ aɖeke tso eƒe ɖevime o. Fofoa nye ahanoxe, eye eƒe ƒomea da ahe. Woʋuna tsoa teƒe yia teƒe. Gbã la, Juliza mekpɔa mɔ be nuwo ava nyo o. Gake etrɔ eƒe susu. Nu kae kpe ɖe eŋu? Juliza gblɔ be, “Hafi dzinyelawo nawɔ asitɔtrɔ le woƒe agbenɔnɔ ŋu wòanyo la, Biblia kpe ɖe ŋunye mɔkpɔkpɔ su asinye le agbe me. Va se ɖe egbea la, Biblia me nyawo kpena ɖe ŋunye be nyemebua dziɖeleameƒonuwo ŋu o. Fifia ne amewo ɖe nɔnɔme manyomanyo aɖe fia la, medzea agbagba be mase nu si ta wowɔ nu nenema ɖo la gɔme.”

Abe ale si Juliza va srɔ̃e ene la, mɔfiame nyui geɖewo le Biblia me. Eƒe aɖaŋuɖoɖowo ate ŋu akpe ɖe ŋuwò nànɔ te ɖe nɔnɔme madeamedziwo nu. Le kpɔɖeŋu me, Biblia gblɔ le Efesotɔwo 4:23 be: “Minɔ miaƒe tamesusu ƒe nɔnɔme si kpɔa ŋusẽ ɖe mia dzi wɔm yeyee.”

Abe ale si mawunyakpukpui sia gblɔe ene la, àte ŋu awɔ nane le wò nɔnɔmewo ŋu. Àte ŋu anɔ nɔnɔme si kpɔa ŋusẽ ɖe dziwò la “wɔm yeyee.” Eya ta tɔtrɔwo wɔwɔ nye nu si wòle be nànɔ wɔwɔm ɖaa. Esia tae mawunyakpukpuia gblɔ be míayi edzi anɔ míaƒe ‘tamesusu ƒe nɔnɔme si kpɔa ŋusẽ ɖe mía dzi wɔm yeyee.’

2 WÒ SUSU NÈNƆ NU NYUIWO ŊU

BIBLIA GBLƆ BE: “Ame si le fu kpem la ƒe ŋkekewo katã nye vɔ̃, ke ame si ƒe dzi le dzidzɔ kpɔm la tua aglo ɣesiaɣi.”—Lododowo 15:15.

NU SI WÒFIA: Ne èbua nɔnɔme ɖe sia ɖe be made ame dzi o la, ekema “nuxaxa” axɔ aƒe ɖe mewò eye ŋkeke sia ŋkeke anye “vɔ̃” na wò. Gake ne wò susu le nu nyuiwo ŋu la, wò ‘dzi akpɔ dzidzɔ’ eye àtso aseye gɔ̃ hã. Wò ŋutɔe awɔ tiatiaa.

KPƆÐEŊU: Wowɔ dɔ heɖe nutete le ahɔhɔ̃ me na Yanko zi geɖe. Eye esia gblẽ nu le eƒe lãmesẽ kple nuƒoƒo ŋu. Esi Yanko kpɔe be esia awɔe be yemaɖo yeƒe taɖodzinuwo gbɔ o la, dzi ɖe le eƒo hena ƒe geɖe. Emegbe etrɔ susu. Aleke wòtrɔe? Egblɔ be, “Le esi teƒe be mana nye susu nanɔ nɔnɔme madeamedziwo ŋu la, mesrɔ̃ ale si manɔ nu siwo ade dzi ƒo nam la ŋu bum boŋ.”

Mɔ ɖeka aɖe si dzi wòwɔna esia toe nye ale si wòxlẽa Biblia me nyawo. Egblɔ be: “Esia naa nye susu nɔa nu nyuiwo ŋu. Nyemeŋlɔ taɖodzinu siwo gbɔ medi be maɖo le etsɔme la be o, gake nye susu le esiwo gbɔ mate ŋu aɖo fifia la ŋu. Ne dziɖeleameƒonuwo va susu me nam la, medea ŋugble tsoa susu geɖe siwo ta wòle be makpɔ dzidzɔ ɖo la ŋu.”

Abe ale si Yanko wɔe ene la, àte ŋu adzudzɔ dziɖeleameƒonuwo ŋu bubu ahanɔ nu siwo ade dzi ƒo na wò la ŋu bum. Ne èle akɔ kpem kple nɔnɔme sesẽwo—ɖewohĩ lãmesẽkuxiwo abe Yanko ene la, bia ɖokuiwò be: ‘Ðe nɔnɔmea nye esi ŋu nyemate ŋu awɔ naneke le kura oa? Ðe wòvɔ nama, alo mɔxenu aɖe koe wònyea?’ Srɔ̃ ale si nàdzudzɔ dziɖeleameƒonuwo ŋu bubu ahanɔ nu siwo atu wò ɖo boŋ la ŋu bum.

 3 WƆ NU SI AÐE VI NA AMEWO

BIBLIA GBLƆ BE: “Dzidzɔ geɖe le nunana me wu nuxɔxɔ.”—Dɔwɔwɔwo 20:35.

NU SI WÒFIA: Nunana amewo tso dzi me faa naa ame kpɔa dzidzɔ. Nu ka tae? Elabena wowɔ mí be míawɔ nu wòaɖe vi na amewo wu be míaƒe susu nanɔ míawo ŋutɔwo ƒe nuhiahiãwo ko ŋu. (Filipitɔwo 2:3, 4; 1 Yohanes 4:11) Dzidzɔ si míakpɔ tso nunana amewo me ate ŋu akpe ɖe mía ŋu míanɔ te ɖe nɔnɔme sesẽ siwo míado goe le agbe me la nu.

KPƆÐEŊU: Dzimeƒudɔ sesẽ aɖe ɖe fu na Josué. Esia na wòsea veve ale gbegbe. Gake Josué wɔa nu si ɖea vi na amewo si naa wòkpɔa dzidzɔ. Josué gblɔ be, “le esi magblɔ be, ‘nyemate ŋu awɔ esi kple ekemɛ o’ teƒe la, mebua mɔ ŋutɔŋutɔ siwo dzi mato akpe ɖe amewo ŋu gbe sia gbe la ŋu. Media mɔ siwo dzi mato awɔ nu siwo aɖe vi na amewo, eye esia naa mekpɔa dzidzɔ.”

NU SI NÀTE ŊU AWƆ

Di mɔ siwo dzi nàto akpe ɖe amewo ŋu. Le kpɔɖeŋu me, ɖe nàte ŋu aɖa nu na aƒelika aɖe si dze dɔa? Ðe nàte ŋu akpe ɖe ame tsitsi aɖe si hiã kpekpeɖeŋu be wòadzra eƒe aƒe me ɖo la ŋua?

Trɔ asi le wò nɔnɔme ŋu wòanyo ɖe edzi abe ale si nànɔ be lém na abɔ ene. Ho aɖigbe siwo nye dziɖeleameƒonuwo ɖa le susu me. Eye nàƒã nu nyui siwo anɔ wò tum ɖo si ana nɔnɔme nyui nanɔ asiwò. Ne èwɔe alea la, àŋe nu siwo awɔe be nàkpɔ dzidzɔ le agbe me. Eye esia aɖo kpe edzi be nɔnɔme si anɔ asiwò ye ana nàkpɔ dzidzɔ.

Ame aɖewo dzudzɔ nanewo ɖuɖu le woƒe lãmesẽ ta, nenema ke wò hã àte ŋu aɖe asi le nɔnɔme manyomanyowo ŋu