WODZIM le ƒe 1923 me le Hemsworth, si nye du aɖe si le Yorkshire, le England. Fonye ŋkɔe nye Bob. Esi mexɔ abe ƒe asieke ene la, mía fofo si melɔ̃a subɔsubɔhawo ƒe alakpanuwɔwɔwo kura o la ƒe asi su agbalẽ aɖewo siwo klo nu le alakpasubɔsubɔhawo ƒe nuwɔnawo dzi la dzi. Nu siwo wòxlẽ la wɔ dɔ ɖe edzi ŋutɔ. Ƒe ʋɛ aɖewo megbe la, Bob Atkinson va mía ƒeme eye wòzã agbaƒomɔ̃ tsɔ ƒo Nɔviŋutsu Rutherford ƒe nuƒo aɖe na mí. Míede dzesii be ame siwo ta agbalẽ mawo la ke gbɔe nuƒoa me nyawo hã tso. Dzinyelawo kpe Nɔviŋutsu Atkinson be wòava nɔ fiẽnu ɖum kpli mí gbe sia gbe ale be wòanɔ biabia gbogbo siwo nɔ mía si ku ɖe Biblia me nyawo ŋu la ŋu ɖom na mí. Ekpe mí be míade kpekpeawo le nɔviŋutsu aɖe si gbɔ didi tso mía gbɔ kilometa ʋɛ aɖewo la ƒe aƒe me. Míete kpekpeawo dede enumake, eye le ɣeyiɣi kpui aɖe ko me la, woɖo hame sue aɖe ɖe Hemsworth. Esia megbe kpuie la, nutome subɔlawo (siwo woyɔna fifia be nutome sue dzikpɔlawo) va dzea mía gbɔ, eye míekpea mɔɖela siwo le nutoa me wova ɖua nu kpli mí. Hadede kple nɔvi mawo ɖe vi geɖe nam.

Ƒomea nɔ dɔwɔƒe aɖe ɖom ɣemaɣi, ke hã, Papa gblɔ na fonye be, “Ne èdi be yeawɔ mɔɖeɖedɔa la, ke ɖeko míakpa dɔ sia.” Bob lɔ̃ ɖe edzi, eye wòʋu yi ɖanɔ mɔɖeɖedɔa wɔm esime wòxɔ ƒe 21. Le ƒe eve megbe, esime mexɔ ƒe 16 la, mezu mɔɖela. Mezãa ɖaseɖigbalẽvi kple agbaƒomɔ̃ le gbeƒãɖeɖedɔa me, eye zi geɖe la, nye ɖekae nɔa gbeadzi negbe kwasiɖanuwuwuwo ko. Ke hã, Yehowa yram mekpɔ Biblia nusrɔ̃vi aɖe si wɔ ŋgɔyiyi wòɖe dzesi. Nusrɔ̃vi ma ƒe ƒometɔ geɖe va xɔ nyateƒea emegbe. Le ƒe si kplɔe ɖo me la, woɖo nye kple Mary Henshall mɔɖela veviwoe. Anyigbamama si me wona míewɔ dɔ lee nye Cheshire nutoa me.

Xexemeʋa Evelia nɔ edzi yim vevie ɣemaɣi, eye wobia tso nyɔnuwo si be woawɔ dɔ aɖewo atsɔ akpe asi ɖe aʋaa ŋu. Esi míenye mɔɖela veviwo ta la, míesusu be womabia tso mía si be míawɔ dɔ mawo o, abe ale si wònɔ le mawunyafiala bubuwo gome ene. Gake setɔwo melɔ̃ o, eye wona menɔ gaxɔ me ŋkeke 31. Le ƒe si kplɔe ɖo me esime mexɔ ƒe 19 la, mede nye ŋkɔ agbalẽ me le dziɖuɖua gbɔ be nyemayi aʋa o  le dzitsinya ta. Wokplɔm yi ʋɔnu zi eve, gake le go eveawo katã me la, woɖe asi le ŋunye. Le esiawo katã me la, mekpɔe be gbɔgbɔ kɔkɔea nɔ kpekpem ɖe ŋunye, eye Yehowa lém ɖe te, eye wòna meli ke hesẽ ŋu.—Yes. 41:10, 13.

Ƒe 1946 mee nye kple Nɔviŋutsu Arthur Matthews míedo go zi gbãtɔ. Enɔ gaxɔ me ɣleti etɔ̃, elabena egbe be yemawɔ asrafodɔ o le dzitsinya ta, eyome eyi ɖawɔ dɔ kple nɔvia Dennis si nye mɔɖela vevi le Hemsworth. Tso woƒe ɖevime kee wo fofo fia nu wo tso Yehowa ŋu, eye woxɔ nyɔnyrɔ le woƒe ƒewuiwo me. Ɣeyiɣi kpui aɖe megbe la, woɖo Dennis ɖe Ireland, si wɔe be zɔhɛ megava nɔ Arthur si o. Ale si ɖekakpui veviedola sia wɔa nui la wɔ dɔ ɖe dzinyelawo dzi, eya ta womia asi Arthur be wòava nɔ yewo gbɔ. Ne meɖi tsa yi dzinyelawo gbɔ la, nye kple Arthur míeɖonɛ mía ɖokui dzi be míaklɔ agbawo le nuɖuɖu vɔ megbe. Emegbe míeva nɔ agbalẽ ŋlɔm ɖo ɖe mía nɔewo. Le ƒe 1948 me la, wogana Arthur yi gaxɔ me ɣleti etɔ̃ ake. Míeɖe srɔ̃ le January 1949 me, eye míaƒe taɖodzinue nye be míanɔ ɣeyiɣiawo katã ƒe subɔsubɔdɔa dzi zi ale si wòanya wɔ ko. Míeɖɔ ŋu ɖo le gazazã me, eye ne míexɔ mɔkeke la, míekpena ɖe agbledelawo ŋu wogbea atikutsetsewo eye woxea fe na mí. Le Yehowa ƒe kpekpeɖeŋu me la, míete ŋu yi mɔɖeɖedɔa dzi.

Ƒe ɖeka kple nu vi aɖe megbe la, woɖo mí ɖe Northern Ireland. Míeyi Armagh gbã, emegbe míeyi Newry. Katolikotɔwo koŋue nɔ du eve siawo me. Wotsia tsitre ɖe ha bubu me tɔwo ŋu vevie le nuto mawo me ɣemaɣi, eya ta, ehiã be míadze aye ahaɖɔ ŋu ɖo le nuƒoƒo na amewo me. Wowɔa kpekpeawo le nɔviŋutsu aɖe kple srɔ̃a ƒe aƒe me. Teƒea didi tso mía gbɔ kilometa 16. Ame enyi aɖewo koe dea kpekpeawo. Ne atsu kple asia na mɔnukpɔkpɔ mí be míatsi yewo gbɔ ŋu nake la, míemlɔa anyigba, eye le ŋufɔke la, míeɖua ŋdinu wòsua mí nyuie hafi dzea mɔ. Dzidzɔ gãe wònye nam be Ðasefo geɖewo le nuto ma me fifia.

Fonye kple srɔ̃a Lottie wonye mɔɖela veviwo le Northern Ireland xoxo, eye le ƒe 1952 me la, mí ame enea míede nutome gã takpekpe aɖe le Belfast. Nɔviŋutsu aɖe xɔ mí katã ɖe eƒeme hekpe ɖe Pryce Hughes, si nye alɔdze dzikpɔla le Britain ɣemaɣi la ŋu. Le zã aɖe me la, míenɔ dze ɖom tso Mawu Ƒe Mɔ Nye Lɔlɔ̃ gbalẽvia, (si le yevugbe me) si woɖe ɖe go la ŋu. Irelandtɔwo koŋ tae wotae ɖo. Nɔviŋutsu Hughes ƒo nu tso ale si wòsesẽ be woaɖe gbeƒã na Katolikotɔ siwo le Ireland ŋu. Le ɣeyiɣi mawo me la, amewo tsɔ akpa sesẽ nya nɔviwo do goe le woƒe aƒewo me eye amehawo dze wo dzi ŋutasesẽtɔe le esi woƒe nunɔlawo ƒoe ɖe wo nu ta. Nɔviŋutsu Pryce gblɔ be, “Míehiã na srɔ̃tɔ siwo si ʋu le ale be woawɔ gbeƒãɖeɖedɔ vevi aɖe si me míama agbalẽviawo le le dukɔ bliboa me.” * Míexɔ edzi nɛ enumake be, “Míawɔ dɔ ma!” Aleae wòdzɔe be míegblɔ nya ma si dze le ŋutinya sia ƒe ŋgɔdonyaa me.

 Teƒe aɖe si mɔɖelawo dzena zi geɖe le Dublin ye nye Dada Rutland ƒeme. Enye nɔvinyɔnu tsitsi wɔnuteƒe aɖe. Mí ame enea míedze egbɔ, eyome míedzra míaƒe nunɔamesi aɖewo, eye mí katã míetigi ɖe Bob ƒe dzokeke si ŋu amenɔƒe bubu tsiã ɖo la me be míaɖadi ʋu aɖe aƒle. Míekpɔ ʋu aɖe si sɔ na mí heƒlee; ɖeko menye ʋu yeyee o. Míegblɔ na edzralaa be wòana woakui ava aƒe me na mí, elabe mía dometɔ aɖeke menya ʋukuku o. Arthur nɔ zã dzi gbe ma gbe nɔ asi wɔm ɖe yame abe ɖe wòle ʋu ƒe gear dem ene. Le ŋufɔke esime wònɔ agbagba dzem be yeaku ʋua ado goe le enɔƒe la, Mildred Willett si nye dutanyanyuigblɔla (si va ɖe John Barr emegbe) la va aƒea me. Eya nya ʋukuku! Ekpe ɖe mía ŋu míesrɔ̃ ʋua kuku, eye míesu te azɔ be míayi dɔa gbe!

Nu si míehiã azɔe nye dzeƒe. Woɖo aɖaŋu na mí do ŋgɔ be míagatsi xɔdɔmeʋu me o, elabena tsitretsiɖeŋulawo ate ŋu ava tɔ dzoe, eya ta míedi aƒe be míahaya, gake míekpɔ ɖeke o. Esia ta, mí ame enea míetsi ʋua me dɔ gbe ma gbe. Le ŋufɔke la, nu si ŋu míete ŋu ke ɖo koe nye xɔdɔmeʋu si me abati sue eve le. Esiae va zu míaƒe aƒe. Nukutɔe la, afi si míada xɔdɔmeʋua ɖo la meva nye kuxi o, elabena agbledela aɖewo nyo dɔme na mí; wona míedae ɖe woƒe anyigba dzi. Nu si míewɔnae nye be, míeɖea gbeƒã le nuto si didi abe kilometa 16 va ɖo 24 ene tso afi si míeda xɔdɔmeʋua ɖo gbɔ la me. Eyome, míeʋuna yia teƒe bubu hafi trɔna va ɖea gbeƒã na ame siwo le nuto si me míeda xɔdɔmeʋua ɖo va yi la me.

Míeyi aƒe siwo katã le Ireland Dukɔa ƒe anyieheɣedzeƒe gome ɖaɖe gbeƒã kuxi aɖeke manɔmee hema agbalẽvi 20,000 kple edzivɔwo, eye míetsɔa ame siwo tsɔ ɖe le eme la ƒe ŋkɔwo ɖona ɖe alɔdzedɔwɔƒe si le Britain. Dzidzɔ ka gbegbee nye esi be Ðasefo alafa geɖe le nuto ma me fifia!

Ɣeyiɣi aɖe megbe la, wode dɔ asi na mí le London ƒe anyiehe gome. Eye Kwasiɖa ʋɛ aɖewo megbe la, alɔdzedɔwɔƒe si le Britain la ƒo ka na Arthur hebia tso esi be wòadze nutome sue dzikpɔkpɔdɔa gɔme le ŋkeke si kplɔe ɖo dzi! Esi wona hehee kwasiɖa ɖeka vɔ la, míezɔ mɔ yi nutome sue si wode asi na mí le Scotland la me. Ɣeyiɣi boo menɔ Arthur si be wòatsɔ adzra ɖo ɖe eƒe nuƒoawo ŋu o, ke hã, ale si wòtsɔa dzo ɖe Yehowa subɔsubɔ ŋu kuxi ka kee wòɖado goe o la nye dzideƒo gã aɖe nam. Míekpɔ dzidzɔ geɖe le míaƒe nutome sue dzikpɔkpɔdɔa me. Hafi míadze dɔ sia gɔme la, míewɔ dɔ le anyigbamama saɖeagawo me ƒe geɖe, eye fifia, yayra gã aɖee wònye na mí be míele subɔsubɔm le nɔvi geɖewo dome.

Esi wokpe Arthur be wòava de Gilead Sukua ɣleti ewo le ƒe 1962 me la, nyametsotso gã aɖe dze ŋgɔ mí. Míetso nya me be togbɔ be nye ɖeka koe atsi anyi hã, anyo be Arthur nade sukua. Esi wònye be nye ɖeka koe susɔ azɔ ta la, wona metrɔ yi Hemsworth ɖawɔ mɔɖela vevi ƒe dɔa le afi ma. Esi Arthur trɔ gbɔ ƒe ɖeka megbe la, wode dɔ asi na mí be míawɔ nutome gã dzikpɔkpɔdɔa eye míewɔ dɔ le Scotland bliboa kple England ƒe dziehe kpakple Northern Ireland.

Le ƒe 1964 me la, wogade dɔ bubu aɖe asi na Arthur be wòanye alɔdze dzikpɔla le Ireland Dukɔa me. Míekpɔ dzidzɔ geɖe le dzikpɔla mɔzɔla ƒe dɔa me, eya ta le gɔmedzedzea me la, míaƒe dɔdeasi yeyea na metsi mavo vevie. Gake fifia, mekpɔe be mɔnukpɔkpɔ gã aɖee wònye nam be mesubɔ le Betel. Mexɔe se be ne èlɔ̃ xɔ dɔ aɖe si medzɔ dzi na wò tututu o gɔ̃ hã, Yehowa ayra wò godoo. Dɔ siwo mewɔ le Betel la ƒe ɖewoe nye ɔfisdɔwo, agbalẽwo ɖoɖo, nuɖaɖa kple xɔwo me dzadzra ɖo. Esime míenɔ alɔdzedɔwɔƒea la, míewɔ nutome gã dzikpɔkpɔdɔa hã ɣeyiɣi aɖe eye esia na míedo go nɔvi geɖewo le dukɔ bliboa me. Dɔ sia kple ŋgɔyiyi si míaƒe Biblia nusrɔ̃viwo wɔ le nyateƒea me la wɔe be mía kple nɔviwo dome va le kplikplikpli le Ireland dukɔa me. Yayra ka gbegbee nye esi!

Dukɔwo dome takpekpe gbãtɔ si wowɔ le Ireland lae nye esi wowɔ le Dublin le ƒe 1965 me. * Togbɔ be wotsi tsitre ɖe mía ŋu le goawo katã me hã la, takpekpea kpɔ dzidzedze ale gbegbe. Vavalawo katã ƒe xexlẽmee nye 3,948, eye ame 65 xɔ nyɔnyrɔ. Woŋlɔ akpedalɛta na ame siwo katã xɔ vavala 3,500 siwo tso duta ɖe wo ƒeme la dometɔ ɖe sia ɖe. Ame siwo xɔ amedzroawo ɖe woƒe aƒewo me hã ƒo nu nyui tso wo ŋu. Tɔtrɔ ɖedzesi aɖee esia nye le Ireland ƒe ŋutinya me.

Le ƒe 1966 me la, alɔdzedɔwɔƒe si nɔ Dublin lae va nɔ dɔa dzi kpɔm le dziehe kple anyiehe Ireland siaa—esia to vovo sãsãsã na mama si nɔ dunyahehe kple subɔsubɔ nyawo me le ƒukpo ma dzi. Edzɔ dzi na mí be míekpɔ eteƒe Katolikotɔ gbogbo aɖewo va xɔ nyateƒea hesubɔ aduadu kple nɔvi siwo nye Protestanttɔwo tsã.

Le ƒe 2011 me la, nuwo trɔ kura le míaƒe agbe me esi wotsɔ dɔ siwo alɔdzedɔwɔƒe si nɔ Ireland wɔna la de Britain Alɔdzedɔwɔƒea ƒe dzikpɔkpɔ te, si wɔe be wode dɔ asi na mí le London Betel. Tɔtrɔ yeye sia va esime meva te dzitsitsi ɖe Arthur ƒe lãmesẽ ŋu. Wokpɔe be dɔléle aɖe si woyɔna be Parkinson ƒe dɔléle la nɔ fu ɖem nɛ. Le May 20, 2015 dzi la, srɔ̃nye si nye nye zɔhɛ ƒe 66 sɔŋ la ku.

Le ƒe ʋɛ siwo va yi me la, nye dzi gbã gudugudu, nu te ɖe dzinye, eye mexa nu vevie. Esime Arthur nɔ agbe la, eyae kpena ɖe ŋunye. Mesusunɛ ŋutɔ! Gake ne èle nɔnɔme sia tɔgbi me tom la, àte ɖe Yehowa ŋu kplikplikpli. Esi meva nya ale si gbegbe amewo lɔ̃ Arthur la, ewɔ dɔ ɖe dzinye ŋutɔ. Nɔvi siwo le Ireland, Britain kple Amerika gɔ̃ hã ŋlɔ lɛtawo ɖo ɖem. Lɛta siawo, kple Arthur nɔviŋutsu Dennis kple srɔ̃a, Mavis, kpakple tasiyɔvinye siwo nye Ruth kple Judy ƒe dzideƒonyawo fa akɔ nam wu gbɔgblɔ.

Mawunyakpukpui aɖe si de dzi ƒo nam ŋutɔe nye Yesaya 30:18. Afi ma gblɔ be: “Yehowa anɔ lalam dzigbɔɖitɔe be yeave mia nu, eye wòatso be yeakpɔ nublanui na mi. Elabena Yehowa nye Mawu si drɔ̃a ʋɔnu dzɔdzɔe. Dzidzɔtɔwoe nye ame siwo katã kpɔa esinu.” Akɔfafa gã aɖee wònye nam be Yehowa le lalam dzigbɔɖitɔe be yeaɖɔ nuwo ɖo eye yeana dɔ dodzidzɔnamewo mí le xexe yeyea me.

Ne metrɔ kpɔ megbe la, mekpɔa ale si gbegbe Yehowa fia mɔ dɔa le Ireland heyra ɖe edzi! Mese le ɖokuinye me be mɔnukpɔkpɔ gã aɖee wònye nam be mewɔ akpa sue aɖe le nya nyuia dodo ɖe ŋgɔ me le dukɔ ma me. Ðikeke aɖeke mele eme o be, ne míewɔ nu si Yehowa bia tso mía si la, ayra mí godoo!