DANIEL KPLE MIRIAM ɖe srɔ̃ le September 2000 me eye wonɔ Barcelona dugãa me le Spain. Daniel gblɔ be: “Míenɔ agbe abe ale si ko ame sia ame nɔnɛ ene. Esi dɔ si míewɔna ƒe fetu de mía dzi ta la, míeɖua nu le nuɖuƒe xɔŋkɔwo, míezɔa mɔ yia duta, eye míedoa awu xɔasiwo. Míekpɔa gome le gbeadzisubɔsubɔdɔa hã me edziedzi.” Gake emegbe wowɔ tɔtrɔ.

Esi wonɔ takpekpe aɖe me le ƒe 2006 me la, nya aɖe si wobia le nuƒo aɖe me la wɔ dɔ ɖe Daniel dzi vevie. Nya si wobia ye nye be: “Ðe míele míaƒe ŋutete ɖe sia ɖe wɔm be míakpe ɖe ‘ame siwo wokplɔ yina wuwu ge’ la ŋu be woava mɔ si ɖo ta agbe mavɔ me la dzia?” (Lod. 24:11) Nuƒoa te gbe ɖe agba si le mía dzi be míana amewo nase Biblia me gbedeasi si xɔa ame ɖe agbe la dzi. (Dɔw. 20:26, 27) Daniel gblɔ be, “Mese le ɖokuinye me be Yehowa nɔ nu ƒom nam.” Wogblɔ le nuƒoa me hã be míekpɔa dzidzɔ geɖe wu ne míekeke míaƒe subɔsubɔdɔa ɖe enu. Daniel nyae be nya ma nye nyateƒe. Elabena Miriam ya dze mɔɖeɖedɔa gɔme xoxo eye dzi nɔ edzɔm ɖe yayra siwo kpɔm wònɔ ta.

Daniel gblɔ be, “Meƒo nya ta be ɣeyiɣia de azɔ be mawɔ tɔtrɔ gã aɖe le nye agbe me.” Eye ewɔe hã. Eɖe ɣeyiɣi si wòzãna ɖe dɔwɔɖui ŋu la dzi kpɔtɔ, edze mɔɖeɖedɔa gɔme, eye wòbu dzidzɔ si gbegbe eya kple Miriam woakpɔ ne woyi ɖasubɔ le afi si Fiaɖuƒegbeƒãɖela geɖe wu hiã le la ŋu.

Le May 2007 me la, Daniel kple Miriam ɖe asi le woƒe dɔwɔɖuiwo ŋu heʋu yi Panama, si nye dukɔ aɖe si me woɖi tsa yi kpɔ. Woƒe anyigbamama yeyea nye Carib-Ƒua ƒe ƒukpo vovovo siwo le Bocas del Toro Ƒukpohatsotsoawo dome. Guaymitɔwo koŋue nye ƒukpo mawo dzi nɔlawo. Daniel kple Miriam susui be yewoate ŋu anɔ agbe ɖe ga si yewodzra ɖo la nu ɣleti enyi le Panama.

Tɔdziʋu kple gasɔ ye wotsɔ zɔa mɔe, eye woɖo ŋku zi gbãtɔ si wotsɔ gasɔ zɔ mɔe la dzi—enye kilometa 32 ƒe mɔzɔzɔ si me wòhiã be woado gasɔ alia togbɛwo esime ŋdɔ nɔ ʋuʋum ganagana le. Ðeɖi te Daniel ŋu ale gbegbe be eku ƒenyi kloe. Ke hã, Guaymitɔwo xɔ wo nyuie le aƒe siwo le mɔa dzi la me, vevietɔ esi atsu kple asia srɔ̃ nya ʋɛ aɖewo gbɔgblɔ le gbe si nutoa me tɔwo dona me. Eteƒe medidi o, wova nɔ Biblia-nusɔsrɔ̃ 23 wɔm.

Gake esi ga si wodzra ɖo la vɔ la, woƒe dzidzɔa trɔ zu nuxaxa. Daniel gblɔ be: “Esi míeva nɔ eŋu bum be míatrɔ ayi Spain la, aɖatsi koe lólo ɖe ŋku dzi na mí. Ete ɖe mía dzi ŋutɔ be míadzo le míaƒe Biblia-nusrɔ̃viwo gbɔ.” Ke hã, ɣleti ɖeka megbe la, wose nya aɖe si na dzi dzɔ wo ŋutɔ. Miriam gblɔ be: “Woɖo mí mɔɖela veviwo. Dzidzɔ ka gbegbee nye esi wònye na mí be míayi edzi asubɔ le afi ma!”

Esi habɔbɔa nɔ asitɔtrɔwo wɔm le ƒe 2015 me la, eva hiã be Daniel kple Miriam nayi woƒe subɔsubɔdɔa dzi abe gbesiagbe mɔɖelawo ene. Nu kae woawɔ? Woka ɖe ŋugbedodo si le Psalmo 37:5 la dzi. Afi ma gblɔ be: “Tsɔ wò mɔwo gblẽ ɖe Yehowa si me; ɖo ŋu ɖe eŋu, ekema eya ŋutɔ awɔe na wò.” Wokpɔ dɔ si akpe ɖe wo ŋu woakpɔ wo ɖokuiwo dzi esime wole mɔɖeɖedɔa wɔm. Egbea wole subɔsubɔm le hame aɖe me le Veraguas nutoa me, le Panama.

Daniel gblɔ be: “Hafi míadzo le Spain la, mímeka ɖe edzi be míate ŋu anɔ agbe tsɛ o. Gake egbea, míele agbe tsɛ nɔm eye agbemenuhiahiã veviwo su mía si, naneke mehiã mí o.” Nu kae nye woƒe dzidzɔ gãtɔ? Wogblɔ be, “Kpekpeɖeŋu si nam míele ɖokuibɔbɔlawo be woasrɔ̃ nu tso Yehowa ŋu la nana míekpɔa dzidzɔ manyagblɔ!”