Dzo kpo yi emenuwo dzi

Dzo kpo yi emenuawo dzi

 AGBEMEŊUTINYA

Yehowa Tea Ŋu Wɔa Nu Sia Nu

Yehowa Tea Ŋu Wɔa Nu Sia Nu

“KU MAGANƆ anyi akpɔ o, eye woafɔ kukuawo gɔ̃ hã ɖe tsitre.” Esi srɔ̃nye Mairambubu ɖo bɔs ye wòsee nyɔnu aɖe nɔ nya mawo gblɔm na ame aɖe le ʋua me. Edi be yeagase nya geɖe kpee. Eya ta esi ʋua tɔ eye amewo ɖi le ʋua me la, eɖe abla dze nyɔnu si gblɔ nya mawo la yome ɖatui. Nyɔnua ŋkɔe nye Apun Mambetsadykova, eye enye Yehowa Ðasefo. Le ɣeyiɣi mawo me la, dzeɖoɖo kple Ðasefowo ate ŋu ana ame nadze setɔwo si me, ke hã nu siwo míeva srɔ̃ tso Apun gbɔ la trɔ míaƒe agbe.

MÍEWƆA DƆ TSO FƆŊLI VA SE ÐE ƔETRƆ

Wodzim le ƒe 1937 me le dziɖuɖu ƒe agble gã aɖe si me woxɔa dɔwɔlawo ɖo, si te ɖe Tokmok ŋu le Kyrgyzstan la dzi. Míaƒe ƒomea nye Kyrgyztɔwo, eye Kyrgyzgbea ye míedona. Dzinyelawo nye agbledɔwɔlawo, eye wowɔa dɔ tso fɔŋli va se ɖe ɣetrɔ. Wonaa nuɖuɖu agbledɔwɔlawo edziedzi, gake zi ɖeka le ƒea me koe wotsɔa ga xea fe na wo. Mía dada dagbana hafi tea ŋu kpɔa nye kple nɔvinyenyɔnua dzi. Ƒe atɔ̃ pɛ koe mede suku, eye nye hã meva zu agbledɔwɔla si wɔa dɔ ŋkeke bliboa.

Teskey Ala-Too tonutowo

Amewo da ahe le nuto si me menɔ la me ŋutɔ, eye dɔ si wowɔna tsɔ kpɔa wo ɖokuiwo dzi la tea ɖeɖi wo ŋu belibeli. Esime menye ɖekakpui la, nyemedea ŋugble le taɖodzinu si le agbea ŋu alo ale si etsɔme ava nɔ ŋu o. Nyemesusui kpɔ be nyateƒe wɔdɔɖeamedzi siwo ku ɖe Yehowa Mawu kple eƒe tameɖoɖowo ŋu la ava kpɔ ŋusẽ ɖe nye agbe dzi nenema gbegbe o. Ale si nyateƒe ma wɔ va ɖo Kyrgyzstan hekeke tae la nye ŋutinya si wɔa dɔ ɖe ame dzi. Dziehe Kyrgyzstan, si nye nuto si me metso la mee ŋutinyaa dze egɔme tsoe.

AME SIWO NƆ ABOYO ME TSÃ LA TSƆ NYATEƑEA VA KYRGYZSTAN

Yehowa Mawu ŋuti nyateƒea va ɖo Kyrgyzstan le ƒe 1950-awo me. Gake hafi nyateƒea naxɔ anyinɔ la, ele be amewo naɖe asi le Kɔmiunisttɔwo ƒe xexemenunya si Soviet Dziɖuɖua dona ɖe ŋgɔ la ŋu. Nu ka tae? Tsã la, Kyrgyzstan nɔ dukɔ siwo nɔ Soviet Dziɖuɖua te la dome. Yehowa Ðasefo siwo katã nɔ nuto siwo dzi kpɔ ŋusẽ ɖo me la medea akpa aɖeke dzi le dunya me o. (Yoh. 18:36) Eya ta wobu wo be wonye  Kɔmiunist dziɖuɖua ƒe futɔwo, eye wotia wo yome. Gake xexemenunya aɖeke mate ŋu axe mɔ ɖe Mawu ƒe Nya la nu be wòagaɖo dzianukwaretɔwo ƒe dzi gbɔ o. Le nyateƒe me la, nu vevitɔ siwo mesrɔ̃ le agbe me dometɔ ɖekae nye be Yehowa “tea ŋu wɔa nu sia nu.”—Marko 10:27.

Emil Yantzen

Yehowa Ðasefowo yome titi wɔe be nyateƒea va xɔ anyinɔ ɖe Kyrgyzstan. Aleke esia dzɔe? Siberia, si nye nuto si me wokplɔa dukɔa ƒe futɔwo yina wova zua aboyomewo le la, nɔ Soviet Dziɖuɖua te. Esi woɖe asi le aboyomeawo ŋu la, wo dometɔ geɖe ʋu va tsi Kyrgyzstan, eye wo dometɔ aɖewo tsɔ nyateƒea va afi ma. Ame siawo dometɔ ɖekae nye Emil Yantzen. Wodzii le Kyrgyzstan le ƒe 1919 me. Dɔsesẽwɔsaɖa aɖe mee Emil nɔ esime wònye aboyome, eye afi mae wòdo go Ðasefowo le. Exɔ nyateƒea eye wòtrɔ yi aƒe le ƒe 1956 me. Emil ʋu va tsi afi si te ɖe Sokuluk ŋu, si tsɔ ɖe mía de. Sokuluk ye woɖo hame gbãtɔ ɖo le Kyrgyzstan le ƒe 1958 me.

Victor Vinter

Anɔ abe ƒe ɖeka ene megbe la, Victor Vinter ʋu yi Sokuluk. Nɔviŋutsu wɔnuteƒe sia kpe fu geɖe ŋutɔ le eyometilawo si me. Zi eve sɔŋ wolée de gaxɔ me ƒe etɔ̃ le akpaɖekedzimademade ta; emegbe enɔ gaxɔ me ƒe ewo, eye wòganɔ aboyo me ƒe atɔ̃ bubu. Gake yometiti mawo mete ŋu xe mɔ ɖe tadedeagu vavãtɔ ƒe takeke nu o.

NYATEƑEA GOGO MÍA DE

Eduard Varter

Kaka ƒe 1963 naɖo la, Ðasefo siwo ade 160 ye nɔ Kyrgyzstan, eye wo dometɔ geɖe tso Germany, Ukraine kple Russia. Wo dometɔ ɖekae nye Eduard Varter. Exɔ nyɔnyrɔ le ƒe 1924 me le Germany hafi wova ɖe aboyoe emegbe. Le ƒe 1940-awo me la, Nazi dziɖuɖua kplɔ Eduard yi fuwɔamesaɖa aɖe me, eye le ƒe ʋɛ aɖewo megbe la, Kɔmiunist Dziɖuɖua hã ɖe aboyoe yi afi si te ɖe Siberia ŋu. Le ƒe 1961 me la, nɔviŋutsu wɔnuteƒe sia ʋu va Kant, si medidi kura tso mía de o.

Elizabeth Fot; Aksamai Sultanalieva

Nɔvinyɔnu Elizabeth Fot, si nye Yehowa subɔla wɔnuteƒe la hã nɔ Kant. Nutɔlae wònye. Esi wòbi ɖe eƒe dɔa me ta la, ame ŋkutawo abe ɖɔktawo kple nufialawo ene nana wòtɔa awu na wo. Eƒe asisiwo dometɔ ɖekae nye nyɔnu aɖe si ŋkɔe nye Aksamai Sultanalieva. Nyɔnu sia srɔ̃ nye amegã le setɔwo ƒe dɔwɔƒea. Gbe ɖeka esi Aksamai va eƒe awuwo xɔ ge le Elizabeth gbɔ la, ebia nya geɖewoe tso taɖodzinu si le agbea ŋu kple nɔnɔme si me kukuawo le ŋu. Elizabeth tsɔ Biblia ɖo eƒe biabiawo katã ŋu nɛ. Aksamai va zu nya nyui gbeƒãɖela dovevienu.

Nikolai Chimpoesh

Ɣemaɣi lɔƒoe Nikolai Chimpoesh, si tso Moldova la zu nutome sue dzikpɔla, eye enɔ dɔ sia dzi ƒe 30 kloe. Tsɔ kpe ɖe hamewo sasrã kpɔ ŋu la, Nikolai xɔ ŋgɔ le míaƒe agbalẽwo tata kple wo mama ƒe dɔa me. Setɔwo va nya nu tso dɔ siwo wɔm wònɔ ŋu. Eya ta Eduard Varter gblɔ dzideƒonamenya aɖe tsɔ ɖo aɖaŋu na Nikolai ale: “Ne setɔwo bia gbe wò la, gblɔ na wo be míaƒe dɔwɔƒegã si le Brooklyn lae agbalẽawo tsona. Kpɔ adzamekpovitɔ la ƒe ŋkume tututu hafi nàgblɔ nyaa. Mègavɔ̃ kura o.”—Mat. 10:19.

Dzeɖoɖo sia megbe kpuie koe adzamekpovitɔwo sama Nikolai wòyi woƒe dɔwɔƒegã si le Kant. Egblɔ nu si dzɔ la ale: “Kpovitɔ la biam be afi kae míekpɔa míaƒe agbalẽawo tsonɛ hã. Megblɔ nɛ be Brooklyn ye wotsona. Kpovitɔa meganya nya si wòagblɔ o. Ðeko wòɖe mɔ nam medzo eye megasamam azɔ o.” Ðasefo dzinɔameƒotɔ siawo yi edzi nɔ nya nyuia kakam ŋuɖɔɖotɔe le mía de nutowo me le dziehe Kyrgyzstan. Esi Yehowa ŋuti nyateƒe xɔasi la va ɖo mía gbɔ le ƒe 1980-awo me la, srɔ̃nye Mairambubu  ye nye ame gbãtɔ si se nu tso eŋu le míaƒe ƒomea me.

SRƆ̃NYE KPƆ NYATEƑEA DZE SII ENUMAKE

Mairambubu tso Kyrgyzstan ƒe afi si woyɔna be Naryn Nuto la me. Gbe ɖeka, le August 1974 me la, eyi ɖasrã nɔvinyenyɔnua kpɔ, eye afi mae míedo go le zi gbãtɔ. Mairambubu ƒe nu lé dzi nam enumake. Gbe ma gbe kee míeɖe srɔ̃.

Apun Mambetsadykova

Le January 1981 me esime Mairambubu nɔ ʋu me yina asimee wòse dzeɖoɖo si ŋu meƒo nu tsoe le gɔmedzedzea. Srɔ̃nye di be yeagase nya bubuwo kpee, eya ta ebia nyɔnua ƒe ŋkɔ kple afi si wòle. Nyɔnua gblɔ nɛ be yeƒe ŋkɔe nye Apun, gake ewɔ nu ŋuɖɔɖotɔe, elabena le ƒe 1980-awo me gɔ̃ hã la, woɖo asi Ðasefowo ƒe dɔa dzi le dukɔa me. Eya ta le esi Apun naɖɔ afi si wòle na srɔ̃nye teƒe la, ena srɔ̃nye boŋ ɖɔ afi si míele la nɛ. Srɔ̃nye gbɔ va aƒe me kple dzidzɔ.

Mairambubu gblɔ be: “Mese nya nyuiwo. Nyɔnu aɖe gblɔ nam be eteƒe madidi o, amewo magaku o. Lã wɔadãwo gɔ̃ hã afa.” Eƒe nyawo ɖi le to me nam abe gli tom wòle ene. Eya ta megblɔ nɛ be, “Ke míakpɔ esinu ale be wòava kɔ nyaa me na mí.”

Ɣleti etɔ̃ megbe la, Apun va mía gbɔ. Eye egayi edzi nɔ mía gbɔ vam, si wɔe be míeva nya Kyrgyztɔ gbãtɔ siwo zu Ðasefowo la dometɔ aɖewo. Eya kple nɔvinyɔnu siwo vaa mía gbɔ la na míese nyateƒenya wɔdɔɖeamedzi siwo ku ɖe Yehowa kple tameɖoɖo si le esi na amegbetɔwo la ŋu. Wozã agbalẽ si nye Tso Paradiso si Bu me Yi Paradiso si Wogakpɔ Me * tsɔ srɔ̃ Biblia kpli mí. Eye esi wònye be agbalẽ sia ƒe ɖeka koe nɔ Tokmokgbea me ta la, míetsɔ asi gbugbɔ ŋlɔ emenyawo na mía ɖokuiwo.

Nyagblɔɖi si le 1 Mose 3:15 la nɔ nu gbãtɔ siwo ŋu míesrɔ̃ nu tsoe la dome. Nyagblɔɖi sia ava eme to Yesu, si Mawu ɖo Mesia Fiaɖuƒea ƒe Fia la dzi. Esia nye gbedeasi vevi aɖe si wòle be ame sia ame nase! Míekpɔe be esia nye susu vevi aɖe si tae wòle be míakpe asi ɖe gbeƒãɖeɖedɔa ŋu. (Mat. 24:14) Le ɣeyiɣi kpui aɖe ko me la, Biblia me nyateƒea kpɔ ŋusẽ ɖe ale si míenɔa agbee dzi.

MÍEDE KPEKPEAWO EYE MÍEXƆ NYƆNYRƆ LE ƔEYIƔI SI ME WOÐO ASI DƆA DZI ME

Nɔviŋutsu aɖe si le Tokmok la kpe mí míeyi srɔ̃ɖeƒe aɖe. Enumake mía kple srɔ̃nye míede dzesii be  Ðasefowo ƒe nɔnɔme to vovo. Womema aha muamewo le srɔ̃ɖeƒea o, eye wowɔ nu sia nu ɖe ɖoɖo nu. Esia to vovo kura na srɔ̃ɖeƒe bubu siwo míede va yi. Le srɔ̃ɖeƒe mawo la, amewo mu aha, wowɔ nu baɖawo eye wozã dzugbewo.

Míede Kristotɔwo ƒe kpekpe aɖewo hã le hame si le Tokmok la me. Wowɔa kpekpe siawo le avewo me, ne yame ƒe nɔnɔmewo ɖe mɔ. Nɔviawo nyae be kpovitɔwo nɔ mía ɖiam, eya ta wonana nɔviŋutsu aɖe nɔa afi si wòate ŋu akɔ to dzi na mí ne ekpɔ wo wogbɔna. Le vuvɔŋɔli la, míekpena le aƒe aɖe me. Edzɔ zi eve aɖewo kpɔ be kpovitɔwo va do ɖe aƒea me hebia mí be nu ka wɔm míele hã. Esi ŋkekea de be mía kple Mairambubu míaxɔ nyɔnyrɔ le Chüy Tɔsisia me le July 1982 me la, ɖe míeɖɔ ŋu ɖo ŋutɔ. (Mat. 10:16) Nɔviawo nɔ vavam ʋɛʋɛʋɛ va se ɖe esime mí katã míekpe ta le avea me. Míedzi Fiaɖuƒeha ɖeka eye míese nyɔnyrɔxɔnuƒoa.

MÍEWƆ MƆNUKPƆKPƆA ŊU DƆ KEKE MÍAƑE SUBƆSUBƆDƆA ÐE ENU

Le ƒe 1987 me la, nɔviŋutsu aɖe gblɔ nam be mayi ɖetsɔlemetɔ aɖe si nɔ Balykchy la gbɔ. Tso míaƒe aƒe me yi afi ma nye keteke ƒe mɔzɔzɔ gaƒoƒo ene. Esi míegatrɔ yi Balykchy zi gbɔ zi geɖe la, míede dzesii be ame geɖe di be yewoase nyateƒea. Míekpɔe be esia nye mɔnukpɔkpɔ na mí be míakeke míaƒe subɔsubɔdɔa ɖe enu.

Nye kple Mairambubu míezɔa mɔ yia Balykchy edziedzi. Míetsia afi ma le kwasiɖa nuwuwuwo zi geɖe, míedea gbeadzi le afi ma, eye míewɔa Kristotɔwo ƒe kpekpewo. Le ɣeyiɣi kpui aɖe ko me la, ame geɖe ŋutɔ va hiã míaƒe agbalẽwo. Míedea agbalẽawo kotoku aɖe si wotsɔ lɔa anagoteewo, si woyɔna be mishok la me. Mía kple srɔ̃nye míetsɔa agbalẽ kotoku eve tso Tokmok yia nutoa me ɣleti sia ɣleti, gake medena o. Le mɔzɔzɔ yi Balykchy kple gbɔgbɔ me siaa la, míetea ŋu ɖia ɖase na amewo le ketekea me.

Le ƒe 1995 me, si nye ƒe enyi tso esime míeyi Balykchy nutoa me zi gbãtɔ la, woɖo hame ɖeka ɖe afi ma. Mɔzɔzɔ tso Tokmok yi Balykchy le ƒe mawo me bia ga geɖe. Ganyawo mede mía dzi o, eya ta aleke míewɔna yina? Nɔviŋutsu aɖe naa ga mí edziedzi míetsɔ kpɔa míaƒe gazazãwo gbɔ. Yehowa kpɔe be míedi vevie be míakeke míaƒe subɔsubɔdɔa ɖe enu eye wòʋu “dziƒowo ƒe tsigbowo” na mí. (Mal. 3:10) Yehowa tea ŋu wɔa nuwo katã vavã!

ƑOMEGBANƆAMEDZIWO KPLE GBEƑÃÐEÐEDƆA

Mezu hamemetsitsi le ƒe 1992 me, eye nyee nye Kyrgyz hamemetsitsi gbãtɔ si woɖo le dukɔa me. Subɔsubɔdɔa ƒe mɔnukpɔkpɔ yeyewo ʋu ɖi esime míenɔ hame si le mía de Tokmok la me. Míesrɔ̃ Biblia kple Kyrgyz sukuvi geɖe siwo gakpɔtɔ nɔ suku. Sukuvi siwo míesrɔ̃ nu kpli la dometɔ ɖeka nye Alɔdzekɔmiti me tɔ fifia, eye wo dometɔ eve nye mɔɖela veviwo. Míena kpekpeɖeŋu hamea me tɔwo hã le míaƒe kpekpeawo me. Le ƒe 1990-awo me la, Russiagbe me gbalẽwoe míezãna eye Russiagbee wodona le kpekpeawo me. Gake esi hamea nɔ dzidzim ɖe edzi la, ame akpa gãtɔ va nye Kyrgyzgbedolawo. Eya ta meɖea kpekpea me nyawo gɔme na wo ne kpekpea le edzi yim, si wɔe be wose nyateƒea gɔme nyuie wu.

Nye kple srɔ̃nye kple mía viwo dometɔ enyi le ƒe 1989 me

Azɔ hã, nye kple Mairambubu míelé fɔ ɖe míaƒe ƒomea si nɔ dzidzim ɖe edzi la dzi kpɔkpɔ ŋu. Míekplɔa mía viwo dea gbeadzi kple kpekpeawo hã. Esime  mía vinyɔnu Gulsayra xɔ ƒe 12 pɛ ko la, elɔ̃a nuƒoƒo tso Biblia me nyawo ŋu na ame siwo tso eme va yina. Eye edzɔa dzi na mía viawo be yewoalé Ŋɔŋlɔawo me nyawo ɖe ta me. Esia wɔe be mía viawo kple mía tɔgbuiyɔviwo hã léa fɔ ɖe hamea me dɔwo ŋu. Le mía vi 9 kple tɔgbuiyɔvi 11 siwo gale agbe dome la, wo dometɔ 16 le Yehowa subɔm alo dea kpekpeawo kple wo dzilawo.

TƆTRƆ ÐEDZESIWO

Ale si gbegbe nuwo va trɔe teƒe kpɔkpɔ awɔ nuku na nɔviŋutsu kple nɔvinyɔnu siwo dze Yehowa ƒe dɔa gɔme le míaƒe nutoa me le ƒe 1950-awo me la ŋutɔ. Tso ƒe 1990-awo me yina la, ablɔɖe geɖe va su mía si míeɖea gbeƒã nya nyuia hekpea ta le ƒuƒoƒo gãwo me.

Nye kple srɔ̃nye míele nya nyuia gblɔm

Le ƒe 1991 me la, nye kple srɔ̃nye míede takpekpe zi gbãtɔ le Alma-Ata si woyɔna fifia be Almaty, le Kazakhstan. Eye le ƒe 1993 me la, nɔviwo wɔ takpekpe le Kyrgyzstan zi gbãtɔ le Spartak Fefewɔƒegã si le Bishkek. Gbeƒãɖelawo tsɔ kwasiɖa ɖeka dzra fefewɔƒea ɖo do ŋgɔ na takpekpea. Dɔ si nɔviawo wɔ la wɔ dɔ ɖe fefewɔƒedzikpɔlaa dzi ale gbegbe be ena míezã teƒea femaxee.

Le ƒe 1994 me la, míegakpɔ tɔtrɔ ɖedzesi aɖe teƒe esi woɖe míaƒe agbalẽwo ɖe go le Kyrgyzgbe me zi gbãtɔ. Fifia, gbegɔmeɖela siwo le alɔdzedɔwɔƒea le Bishkek la ɖea míaƒe agbalẽwo gɔme ɖe Kyrgyzgbe me. Ƒe 1998 mee woda asi ɖe Ðasefowo ƒe dɔa dzi le se nu le Kyrgyzstan. Dzidziɖedzi geɖe va, eye fifia, gbeƒãɖela siwo le dukɔ sia me la wu 5,000. Egbea, hame 83 kple ƒuƒoƒo 25 ye le dukɔa me. Wowɔa kpekpeawo le Chinagbe, Eŋlisigbe, Kyrgyzgbe, Russiagbe, Russia Tokunɔgbe, Turkeygbe, Uighurgbe kple Uzbekgbe me. Nɔviŋutsu kple nɔvinyɔnu siawo siwo tso teƒe vovovowo la katã le Yehowa subɔm le ɖekawɔwɔ me. Yehowa gbɔe wòtso be míekpɔ tɔtrɔ ɖedzesi siawo katã teƒe.

Yehowa na nuwo trɔ le nye agbe me hã. Agbledela dahewo ƒe ƒome mee metsi le eye ƒe atɔ̃ pɛ koe mede suku. Ke hã, Yehowa na mezu hamemetsitsi eye wòzãm mefia Biblia me nyateƒeawo ame siwo nya agbalẽ wum. Vavãe, Yehowa tea ŋu wɔa nu siwo manya wɔ le amegbetɔwo gbɔ o. Nu siwo teƒe mekpɔ le agbe me la ʋãm be mayi edzi anɔ gbeƒã ɖem tso Yehowa, ame si “tea ŋu wɔa nu sia nu” la ŋu nuteƒewɔwɔtɔe.—Mat. 19:26.

^ mm. 21 Yehowa Ðasefowoe tae, gake womegale etam fifia o.