1. Se kae Yesu de na eƒe nusrɔ̃lawo tẽe? (Kpɔ nɔnɔmetata si le akpaa dzi.)

LE ZÃ si do ŋgɔ na Yesu ƒe ku me la, ede se aɖe na eƒe nusrɔ̃lawo tẽe. Egblɔ na wo be: “Ale si melɔ̃ mi la, miawo hã milɔ̃ mia nɔewo nenema ke.” Eyome, egblɔ kpee be: “Esia me amewo katã anyae le be nye nusrɔ̃lawo mienye, ne lɔlɔ̃ le mia dome.”—Yoh. 13:34, 35.

2. Nu ka tae wòle vevie be míaɖe lɔlɔ̃ afia mía nɔewo?

² Yesu gblɔ be ne yeƒe nusrɔ̃lawo ɖe lɔlɔ̃ fia wo nɔewo abe ale si yelɔ̃ wo ene la, esiae ana amewo nakpɔe adze sii kɔtɛ be yeƒe nusrɔ̃lawoe wonye. Nya ma nye nyateƒe le ƒe alafa gbãtɔ me, eye eganye nyateƒe egbea hã. Aleke gbegbe wòle vevie ye nye esi be míaɖu kuxi ɖe sia ɖe si axe mɔ na mí be míagalɔ̃ mía nɔewo o la dzi ahalɔ̃ mía nɔewo vevie!

3. Nu kawo me míadzro le nyati sia me?

³ Esi mí katã míede blibo o ta la, esesẽna na mí be míalɔ̃ mía nɔewo vevie tso dzi me ke. Gake, ele be míasrɔ̃ kpɔɖeŋu si Kristo ɖo ɖi na mí. Le nyati sia me la, míadzro ale si lɔlɔ̃ kpena ɖe mía ŋu be míanye ŋutifafawɔlawo, míagade vovototo amewo me o, eye míanye amedzrowɔlawo la me. Esi nèle nyati sia srɔ̃m la, bia ɖokuiwò be: ‘Nu kae mate ŋu asrɔ̃ tso nɔviŋutsu kple nɔvinyɔnu siwo yi edzi lɔ̃ wo nɔvi Kristotɔwo togbɔ be wodo go kplamatsedonuwo gɔ̃ hã la gbɔ?’

4. Abe ale si Mateo 5:23, 24 gblɔe ene la, ne nya aɖe le nɔvi aɖe si ɖe mía ŋu la, nu ka tae wòle be míawɔ ŋutifafa kplii?

⁴ Yesu fia mí nu si tae wòle vevie be míawɔ ŋutifafa kple nɔvi aɖe si si nya aɖe le ɖe mía ŋu. (Xlẽ Mateo 5:23, 24.) Ete gbe  ɖe edzi be ehiã vevie be míana mía kple mía nɔviwo dome nanɔ nyuie hafi ko míaƒe nu adze Mawu ŋu. Edzɔa dzi na Yehowa ne míewɔ míaƒe ŋutete ɖe sia ɖe be míawɔ ŋutifafa kple mía nɔviwo. Ne míeyi edzi lé mía nɔvi aɖe ɖe dɔ me eye míegbe be míadze agbagba gɔ̃ hã be míawɔ ŋutifafa kplii o la, Yehowa makpɔ ŋudzedze ɖe míaƒe subɔsubɔ ŋu o.—1 Yoh. 4:20.

5. Nu kae na wòsesẽ na Mark be wòawɔ ŋutifafa kple nɔviŋutsu aɖe?

⁵ Ate ŋu asesẽ na mí be míawɔ ŋutifafa kple mía nɔviwo. Nu ka tae? Bu nu si dzɔ ɖe Mark * dzi la ŋu kpɔ. Ete ɖe edzi vevie esi nɔviŋutsu aɖe he nya ɖe eŋu hegblɔ nya siwo mesɔ o tso eŋu na ame bubuwo le hamea me. Aleke Mark wɔ nui? Egblɔ be: “Medo dziku eye nyemeƒo nu nɛ nyuie o.” Gake emegbe la, eva te ɖe Mark dzi be yewɔ nu nenema eye edze agbagba be yeaɖe kuku na nɔviŋutsua eye yeana ŋutifafa naganɔ ye kplii dome. Gake nɔviŋutsua gbe be yemawɔ ŋutifafa kple Mark o. Gbã la, Mark susui be, ‘Nu ka tae wòle be mayi edzi anɔ agbagba dzem be mawɔ ŋutifafa kplii esi medi be yeawɔ ŋutifafa kplim o?’ Ke hã, nutome sue dzikpɔlaa de dzi ƒo na Mark be megana ta o. Nu kae Mark wɔ?

6. (a) Aleke Mark ti ŋutifafa yome? (b) Aleke Mark wɔ aɖaŋuɖoɖo si dze le Kolosetɔwo 3:13, 14 la dzi?

⁶ Esi Mark dzro eɖokui me kpɔ la, ede dzesii be yebua ye ɖokui ɣeaɖewoɣi be yenyo wu ame bubuwo. Ekpɔe dze sii be ehiã be yeatrɔ yeƒe nɔnɔme. (Kol. 3:8, 9, 12) Etsɔ ɖokuibɔbɔ gate ɖe nɔviŋutsua ŋu ake heɖe kuku nɛ ɖe ale si yewɔ nu ɖe eŋu la ta. Azɔ hã, Mark ŋlɔ lɛta na nɔviŋutsua hegblɔ ale si gbegbe wòte ɖe ye dzi be yewɔ nu ɖe eŋu nenema kple ale si yedi vevie be yewoaganye xɔlɔ̃wo ake la nɛ. Mark na nunana sue aɖewo siwo wòsusu be woadzɔ dzi na nɔviŋutsua lae gɔ̃ hã. Nublanuitɔe la, nɔviŋutsua metsɔe kee o, ke egakpɔtɔ lé dziku ɖe dɔ me. Ke hã, Mark yi edzi wɔ ɖe se si Yesu de be míalɔ̃ mía nɔvi ahatsɔe anɔ ekem la dzi. (Xlẽ Kolosetɔwo 3:13, 14.)  Ne míedze agbagba enuenu be míawɔ ŋutifafa kple mía nɔvi Kristotɔwo gake wogbe la, Kristotɔ vavãwo ƒe lɔlɔ̃ akpe ɖe mía ŋu míayi edzi atsɔ anɔ wo kem faa eye míanɔ gbe dom ɖa be ŋutifafa nagava nɔ mía kpli wo dome ake.—Mat. 18:21, 22; Gal. 6:9.

7. (a) Nu kae Yesu de dzi ƒo na mí be míawɔ? (b) Nɔnɔme sesẽ kae dze ŋgɔ nɔvinyɔnu aɖe?

⁷ Yesu de dzi ƒo na mí be míayi edzi anɔ nu wɔm ɖe amewo ŋu abe ale si míedi be woawɔ nu ɖe mía ŋu ene. Egblɔ kpee be, menye ame siwo lɔ̃a mí la koe wòle be míalɔ̃ o. (Luka 6:31-33) Gake, ne edzɔ be ame aɖe si le hamea me la ƒoa asa na wò eye medina be yeado gbe na wò o ɖe? Togbɔ be ƒãa hafi nu sia ate ŋu adzɔ hã la, nu ma tututue dzɔ ɖe Lara dzi. Lara gblɔ be: “Nɔvinyɔnu aɖe ƒoa asa nam, eye nyemenya nu si tututu tae o. Esia tena ɖe dzinye eye nyemegakpɔa dzidzɔ ɖe kpekpeawo dede ŋu o.” Gbã la, Lara gblɔ na eɖokui be: “Nyemedze agɔ aɖeke le edzi o. Eye ame bubu siwo le hamea me la nyae be nɔvinyɔnu ma wɔa nu ɖeƒomevii.”

8. Afɔ kawoe Lara ɖe be yeana ŋutifafa nanɔ ye kple nɔvinyɔnua dome, eye nu kae míate ŋu asrɔ̃ tso eƒe kpɔɖeŋua me?

⁸ Lara ɖe afɔ vovovowo be yeana ŋutifafa nanɔ ye kple nɔvinyɔnua dome. Edo gbe ɖa na Yehowa eye wòtso nya me be yeate ɖe nɔvinyɔnua ŋu. Esi woƒo nu tso kuxia ŋu vɔ la, wodzra wo nɔewo dome ɖo, eye wokpla asi kɔ na wo nɔewo. Edze abe nu sia nu ɖɔ ɖo ene. Lara gblɔ be: “Gake emegbe la, nɔvinyɔnua ganɔ nu wɔm ɖe ŋunye abe ale si wòwɔnɛ tsã ene. Dzi ɖe le ƒonye vevie.” Gbã la, Lara susu be ne nɔvinyɔnua trɔ eƒe nɔnɔme ɖe ye ŋu ko hafi yeate ŋu akpɔ dzidzɔ. Gake, mlɔeba la, Lara va kpɔe be, nu nyuitɔ si yeate ŋu awɔe nye be, yeayi edzi anɔ nu wɔm ɖe nɔvinyɔnua ŋu le lɔlɔ̃ me eye ‘yeatsɔ anɔ ekem faa.’ (Ef. 4:32–5:2) Lara ɖo ŋku edzi be Kristotɔ vavã ƒe lɔlɔ̃ “meléa vɔ̃ siwo wowɔ ɖe eŋu la ɖi o. Enɔa te ɖe nuwo katã nu, exɔa nuwo katã dzi sena, ekpɔa mɔ na nuwo katã, edoa dzi le nuwo katã me.” (1 Kor. 13:5, 7) Esia na Lara ƒe dzi dze eme. Ɣeyiɣi aɖe megbe la, nɔvinyɔnua  va nɔ nu wɔm ɖe Lara ŋu xɔlɔ̃wɔwɔtɔe. Ne èdzea agbagba wɔa ŋutifafa kple nɔviwòŋutsuwo kple nɔviwònyɔnuwo eye nèyia edzi lɔ̃a wo vevie la, àte ŋu aka ɖe edzi be “ŋutifafa ƒe Mawu la anɔ anyi kpli [wò].”—2 Kor. 13:11.

9. Le Dɔwɔwɔwo 10:34, 35 ƒe nya nu la, nu ka tae mele be míade vovototo amewo me o?

⁹ Yehowa medea vovototo amewo me o. (Xlẽ Dɔwɔwɔwo 10:34, 35.) Ne mímedea vovototo amewo me o la, míeɖenɛ fiana be viawoe míenye. Míewɔna ɖe se si nye be míalɔ̃ mía havi abe míawo ŋutɔwo mía ɖokui ene la dzi, eye míetoa esia me kpea asi ɖe eŋu be ŋutifafa nɔa mía kple mía nɔviwo dome le hamea me.—Rom. 12:9, 10; Yak. 2:8, 9.

10-11. Aleke nɔvinyɔnu aɖe wɔ ɖu seselelãme si mesɔ o dzi?

¹⁰ Ðewohĩ manɔ bɔbɔe na ame aɖewo be woagade vovototo amewo me o. Le kpɔɖeŋu me, bu nu si me nɔvinyɔnu aɖe si ŋkɔe nye Ruth to la ŋu kpɔ. Esime wònye ƒewuivi la, ame aɖe si tso dukɔ bubu me la mewɔ nu ɖe eŋu nyuie kura o. Aleke esia kpɔ ŋusẽ ɖe edzi? Ruth gblɔ be: “Melé fu nu sia nu si ku ɖe dukɔ ma ŋu. Metsɔnɛ be nenema koe dukɔ ma me tɔwo katã le, nɔviŋutsu kple nɔvinyɔnuawo gɔ̃ hã.” Nu kae Ruth wɔ te ŋu ɖu seselelãme ma dzi?

¹¹ Ruth kpɔe be ele be yeaku kutri vevie adzudzɔ nuŋububu nenema. Exlẽ nu tso nuteƒekpɔkpɔwo kple nyatakakawo ŋu tso dukɔ ma ŋu le Yearbook (alo Annuaire) me. Egblɔ be: “Medze agbagba be mabu susu nyui tso dukɔ ma me tɔwo ŋu. Meva de dzesii be dzo le nɔviŋutsu kple nɔvinyɔnu siwo tso dukɔ ma me la me ɖe Yehowa subɔsubɔ ŋu. Eme va kɔ nam nyuie be woawo hã wole míaƒe xexea me katã ƒe nɔviwo ƒe habɔbɔa me.” Vivivi la, Ruth va kpɔe be ehiã be yeaɖe lɔlɔ̃ hã afia wo. Egblɔ be: “Ɣesiaɣi si medo go nɔvi siwo tso dukɔ ma me la, mekua kutri vevie doa vivi ɖe wo ŋu. Meɖoa dze kpli wo eye meva nyaa wo nyuie wu.” Nu kae do tso eme? Ruth gblɔ be: “Ɣeyiɣi aɖewo megbe la, meva ɖu seselelãme manyomanyo ma dzi keŋkeŋ.”

12. Nu kae nye nɔvinyɔnu aɖe si ŋkɔe nye Sarah ƒe kuxia?

¹² Ate ŋu anɔ eme be ame aɖewo nye ame siwo dea vovototo amewo me evɔ woawo ŋutɔwo menya o. Le kpɔɖeŋu me, Sarah susui be yemedea vovototo amewo me o elabena yemedrɔ̃a ʋɔnu amewo le dukɔ si me wotso, ga ale si nu le wo si, alo agbanɔamedzi si le wo si le habɔbɔa me la ta o. Ke hã, eva gblɔ emegbe be: “Meva de dzesii be, medea vovototo amewo me ŋutɔ.” Le mɔ ka nu? Sarah kple eƒe ƒometɔwo de yunivɛsiti eye ame siwo hã de suku yi ŋgɔ koe wòlɔ̃a hadede kple. Egblɔ na exɔlɔ̃ aɖe gɔ̃ hã gbe ɖeka be: “Nye ya nɔvi siwo de yunivɛsiti ye medea ha kple. Nyemedina be made ha kple ame siwo mede suku yi ŋgɔ o.” Eme kɔ ƒãa be, ehiã be Sarah natrɔ eƒe nɔnɔme. Aleke wòwɔe?

13. Nu kae míate ŋu asrɔ̃ tso ale si Sarah wɔ trɔ eƒe nɔnɔme la me?

¹³ Nutome sue dzikpɔla aɖe kpe ɖe Sarah ŋu wòde ŋugble le eƒe nɔnɔmea ŋu. Sarah gblɔ be: “Ekafum ɖe nye subɔsubɔdɔwɔwɔ nuteƒewɔwɔtɔe, nye nyaŋuɖoɖo nyuiwo, kple ale si mese Ŋɔŋlɔawo gɔme nyuie la ta. Eyome, egblɔ be, ne míaƒe sidzedze le dzidzim ɖe edzi la, ehiã hã be míatu Kristotɔwo ƒe nɔnɔme nyuiwo abe ɖokuibɔbɔ, ŋuɖɔɖɔɖo, kple nublanuikpɔkpɔ ene ɖo.” Sarah wɔ ɖe nya siwo nutome sue dzikpɔlaa gblɔ nɛ la dzi. Egblɔ be: “Meva de dzesii be nu si koŋ le vevie ye nye be míanyo dɔme eye míalɔ̃ amewo.” Esia wɔe be eva bua susu nyui ɖe nɔviawo ŋu. Egblɔ be: “Medzea agbagba be made dzesi nɔnɔme nyui siwo le wo si siwo tae asixɔxɔ le wo ŋu na  Yehowa ɖo.” Ke míawo ya ɖe? Negadzɔ gbeɖe be míase le mía ɖokui me be míenyo wu ame bubuwo le esi míede suku wu wo ta o! Ne ‘míelɔ̃ nɔviwo ƒe habɔbɔ blibo la katã’ vevie la, míaƒo asa na vovototodede nɔviawo me le hamea me.—1 Pet. 2:17.

14. Le Hebritɔwo 13:16 ƒe nya nu la, aleke Yehowa sena le eɖokui me ne míewɔa amedzro na amewo?

¹⁴ Ne míewɔa amedzro na amewo la, edzea Yehowa ŋu ŋutɔ. (Xlẽ Hebritɔwo 13:16.) Yehowa bua míaƒe amedzrowɔwɔ be enye subɔsubɔ si míetsɔ nanɛ la ƒe akpa aɖe, vevietɔ, ne míewɔ amedzro na ame siwo ɖo hiã me. (Yak. 1:27; 2:14-17) Esia tae Ŋɔŋlɔawo de dzi ƒo na mí be ‘míanɔ amedzrowɔwɔ dzi’ ɖo. (Rom. 12:13) Ne míewɔ amedzro na ame bubuwo la, míeɖenɛ fiana wo be míetsɔ ɖe le eme na wo vevie, míelɔ̃ wo, eye míedi be woanye mía xɔlɔ̃wo. Eɖanye numeɖenu sue aɖe, aha vivi aɖe, alo kplɔ̃ ye míeɖo tsɔ wɔ amedzro na amewo loo alo ɖe míezã ɣeyiɣi ɖe wo ŋu heɖe lɔlɔ̃ fia wo o, edzea Yehowa ŋu ŋutɔ. (1 Pet. 4:8-10) Ke hã, nanewo ate ŋu awɔe be wòasesẽ na mí be míawɔ amedzro na amewo.

15-16. (a) Nu kae ate ŋu awɔe be wòasesẽ na ame aɖewo be woawɔ amedzro na amewo? (b) Nu kae kpe ɖe Edit ŋu wòva nye ame si lɔ̃na faa wɔa amedzro na amewo?

¹⁵ Ðewohĩ, esesẽna na mí be míawɔ amedzro na amewo le nu siwo me míeto le agbe me, ale si nɔnɔmea le na mí, alo ame si ƒomevi míenye ta. Bu nɔvinyɔnu aɖe si ŋkɔe nye Edit si nye ahosi la ƒe kpɔɖeŋua ŋu kpɔ. Hafi wòava nye Ðasefo la, medina be yeade ha kple amewo ale o. Edit se le eɖokui me be ame bubuwo ate ŋu awɔ amedzro na amewo wu ye.

¹⁶ Gake esi Edit va zu Ðasefo la, etrɔ eƒe nuŋububu. Eɖe afɔ siwo kpe ɖe eŋu wòva zu amedzrowɔla. Egblɔ be: “Esime míenɔ míaƒe Fiaɖuƒe Akpata yeyea tum la, hamemetsitsi aɖe na menya be atsu kple asi aɖe ava kpe asi ɖe xɔtudɔa ŋu, eye ebiam be ɖe woate ŋu adze gbɔnye kwasiɖa eve mahã. Meɖo ŋku ale si Yehowa yra ahosi si nɔ Zarefat la dzi.” (1 Fia. 17:12-16) Edit lɔ̃ be yeaxɔ atsu kple asia woadze  ye gbɔ. Ðe Yehowa yraea? Egblɔ be: “Menye kwasiɖa eve koe wonɔ anyi se ɖo o, ke boŋ ɣleti eve. Le ɣeyiɣi mawo me la, míeva zu xɔlɔ̃ kplikplikpliwo.” Yayra bubu siwo Edit kpɔe nye be, edze xɔlɔ̃ yeyewo le hamea me. Ezu mɔɖela fifia eye nɔvi siwo wòwɔa dɔ kplii le gbeadzi la vaa egbɔ le eƒe me woɖea modzaka ɖekae. Egblɔ be: “Nunana amewo nana mekpɔa dzidzɔ! Eye nyateƒea ye nye be, Yehowa ɖoa eteƒe nam le mɔ geɖe nu.”—Heb. 13:1, 2.

17. Nu kae nɔviŋutsu aɖe si ŋkɔe nye Luke kple srɔ̃a va de dzesii?

¹⁷ Ðewohĩ, míelɔ̃ amedzrowɔwɔ, gake ɖe míagate ŋu awɔe geɖe wua? Le kpɔɖeŋu me, nɔviŋutsu aɖe si ŋkɔe nye Luke kple srɔ̃a lɔ̃ amedzrowɔwɔ ŋutɔ. Wokpea wo dzilawo, woƒe ƒometɔwo, wo xɔlɔ̃ kplikplikpliwo, kpakple nutome sue dzikpɔlaa kple srɔ̃a vaa wo ƒe me edziedzi. Gake, Luke gblɔ be, “Míeva de dzesii be ame siwo mía kpli wo dome le kplikplikpli koe míekpena.” Aleke Luke kple srɔ̃a wɔ keke woƒe amedzrowɔwɔa ɖe enu?

18. Nu kae kpe ɖe Luke kple srɔ̃a ŋu wokeke woƒe amedzrowɔwɔa ɖe enu?

¹⁸ Esi Luke kple srɔ̃a wode ŋugble le Yesu ƒe nya si nye be, ‘Ne ame siwo lɔ̃a mi koe mielɔ̃na ɖe, fetu kae le eme na mi?’ ŋu vɔ la, wotrɔ woƒe susu. (Mat. 5:45-47) Wokpɔe be, ehiã be yewoasrɔ̃ Yehowa, ame si nyoa dɔme na amewo katã. Eya ta, woɖoe wo ɖokui dzi be yewoakpe nɔviŋutsu kple nɔvinyɔnu siwo yewomekpe kpɔ o la. Luke gblɔ be: “Fifia, hadede alea doa dzidzɔ na mí katã ale gbegbe. Esia na nɔvi ɖe sia ɖe se le eɖokui me be ye kple nɔviawo kpakple Yehowa dome va le kplikplikpli.”

19. Aleke míeɖenɛ fiana be míenye Yesu ƒe nusrɔ̃lawo, eye nu kae nèɖo kplikpaa be yeawɔ?

¹⁹ Míedzro ale si mía nɔewo lɔlɔ̃ vevie ate ŋu akpe ɖe mía ŋu be míanye ŋutifafawɔlawo, míagade vovototo amewo me o, eye míanye amedzrowɔlawo la me. Ele be míaɖu kuxi ɖe sia ɖe si axe mɔ na mí be míagalɔ̃ mía nɔviŋutsuwo kple nɔvinyɔnuwo vevie tso dzi me ke o la dzi. Ne míewɔ esia la, míakpɔ dzidzɔ eye míaɖee afia be Yesu ƒe nusrɔ̃lawoe míenye vavã.—Yoh. 13:17, 35.