1-2. Abe ale si Dɔwɔwɔwo 8:27-31, 35-38 ɖee fia ene la, nu kae ʋã Etiopiatɔwo ƒe amegãa wòxɔ nyɔnyrɔ?

ÐE NÈDI be yeaxɔ nyɔnyrɔ azu Kristo ƒe nusrɔ̃la? Lɔlɔ̃ na Yehowa kple ŋudzedzekpɔkpɔ ɖe eya amea ŋu ʋã ame geɖewo woɖe afɔ sia. Bu amegã aɖe si subɔ le Etiopia-fianyɔnu aɖe te la ƒe kpɔɖeŋua ŋu kpɔ.

² Etiopiatɔ la wɔ ɖe nu si wòsrɔ̃ tso Ŋɔŋlɔawo me la dzi enumake. (Xlẽ Dɔwɔwɔwo 8:27-31, 35-38.) Nu kae ʋãe wòwɔ nu alea? Ðikeke mele eme o be, ede asixɔxɔ Mawu ƒe Nyaa ŋu, elabena enɔ ŋutinya aɖe xlẽm le Yesaya ƒe agbalẽa me esime wònɔ tasiaɖam la me trɔ tso Yerusalem yina wo de. Eye esi Filipo ƒo nu kplii la, ŋutsua kpɔ ŋudzedze ɖe nu si Yesu wɔ nɛ la ŋu ale gbegbe. Gake, nu ka tae amegã sia zɔ mɔ yi Yerusalem ɖo? Nu si tae nye be, esrɔ̃ nanewo tso Yehowa ŋu si na wòlɔ̃ Yehowa. Aleke míewɔ nya? Ðeko wòyi ɖasubɔ Yehowa le Yerusalem ye nye ema. Edze ƒãa be ŋutsu sia ɖe asi le eƒe mawusubɔsubɔ ŋu eye wòva wɔ ɖeka kple dukɔ ɖeka kolia si nye Mawu vavã la ƒe dukɔ ɖeadzɔgbe la. Lɔlɔ̃ na Yehowa kee ʋãe wògaɖe afɔ vevi bubu aɖe hã—eyae nye be, exɔ nyɔnyrɔ hezu Kristo ƒe nusrɔ̃la.—Mat. 28:19.

3. Nu kae ate ŋu axe mɔ na ame aɖe be wòagaxɔ nyɔnyrɔ o? (Kpɔ aɖaka si nye, “ Dzi Ka Ƒomevie Le Asiwò?”)

³ Lɔlɔ̃ na Yehowa ate ŋu aʋã wò be nàxɔ nyɔnyrɔ. Gake lɔlɔ̃ agate ŋu axe mɔ na wò hã be màxɔ nyɔnyrɔ o. Le mɔ ka nu? Bu kpɔɖeŋu aɖewo ko ŋu kpɔ. Ate ŋu anye be èlɔ̃ ƒowòmetɔwo kple xɔ̃wò siwo mesubɔa Yehowa o la vevie, eye àte ŋu atsi dzimaɖi be ne yexɔ nyɔnyrɔ la, woalé fu ye. (Mat. 10:37) Alo ate ŋu anye be èlɔ̃ nuwɔna siwo nènya be Mawu lé fui la, eye ate ŋu  anɔ sesẽm na wò be nàɖe asi le numame mawo ŋu. (Ps. 97:10) Alo ate ŋu anye be èɖu azã siwo tso alakpasubɔsubɔ me la tso wò ɖevime ke. Ðewohĩ èɖoa ŋku nu dodzidzɔname siwo yia edzi le azã mawo ɖuɣi la dzi eye èlɔ̃a nu mawo. Le esia ta, ɖewohĩ esesẽna na wò be nàdzudzɔ azã mawo siwo medzea Yehowa ŋu o la ɖuɖu. (1 Kor. 10:20, 21) Eya ta, biabia si wòanyo be nàbia ɖokuiwòe nye, “Nu ka alo ame kae malɔ̃ wu bubu ɖe sia ɖe?”

4. Nu kae nye nu vevitɔ si wòle be wòaʋã wò be nàxɔ nyɔnyrɔ?

⁴ Nu nyui geɖewo li siwo nèlɔ̃, siwo ŋu nèdea asixɔxɔe hã. Le kpɔɖeŋu me, hafi nàva dze Biblia sɔsrɔ̃ kple Yehowa Ðasefowo gɔme gɔ̃ hã la, anɔ eme be èdea asixɔxɔ Biblia la ŋu ŋutɔ. Eye anɔ eme be lɔlɔ̃ aɖe sinu nɔ asiwò na Yesu. Fifia si nèva nya Yehowa Ðasefowo la, èlɔ̃ hadede kpli wo. Ke hã, lɔlɔ̃ ma alo nu nyui mawo lɔlɔ̃ mana nàdi be yeatsɔ ɖokuiwò aɖe adzɔgbe na Yehowa ahaxɔ nyɔnyrɔ kokoko o. Nu vevitɔ si wòle be wòaʋã wò be nàxɔ nyɔnyrɔ ye nye lɔlɔ̃ si le asiwò na Yehowa Mawu ŋutɔ. Ne èlɔ̃ Yehowa wu nu sia nu alo ame sia ame la, màɖe mɔ be naneke alo ame aɖeke naxe mɔ na wò be nàgasubɔ eyama o. Lɔlɔ̃ na Yehowa aʋã wò be nàxɔ nyɔnyrɔ eye akpe ɖe ŋuwò hã be nàyi edzi awɔ nuteƒe na Yehowa le wò nyɔnyrɔxɔxɔ megbe.

5. Biabia kawo me míadzro?

⁵ Yesu gblɔ be ele be míalɔ̃ Yehowa kple míaƒe dzi blibo, luʋɔ blibo, tamesusu blibo kple ŋusẽ blibo. (Marko 12:30) Nu kae nàte ŋu awɔ be nàlɔ̃ Yehowa ahade bubu eŋu alea gbegbe? Ŋugbledede le ale si gbegbe Yehowa lɔ̃ míi ŋu aʋã mí be míawo hã míalɔ̃e. (1 Yoh. 4:19) Ne ènya va lɔ̃ ame si wòle be nàlɔ̃ wu ame bubu ɖe sia ɖe ko la, afɔ kawoe esia aʋã wò nàɖe godoo? *

6. Le Romatɔwo 1:20 ƒe nya nu la, mɔ siwo dzi nàte ŋu ato asrɔ̃ nu tso Yehowa ŋu la dometɔ ɖeka ɖe?

⁶ Srɔ̃ nu tso Yehowa ŋu le eƒe asinudɔwɔwɔwo me. (Xlẽ Romatɔwo 1:20; Nyaɖ. 4:11) De ŋugble le nu miemiewo kple lã siwo Yehowa wɔ kpakple ale si nuwɔwɔ siawo ɖe eƒe nunya fiae la ŋu. Srɔ̃ nanewo tso ale si wò ametia ƒe wɔwɔme wɔ nukui la ŋu. (Ps. 139:14) Eye de ŋugble le ŋusẽ si gbegbe Yehowa de míaƒe ɣea me, evɔ wòhenye ɣletivi miliɔn akpeakpeawo dometɔ ɖeka pɛ ko ŋu kpɔ. * (Yes. 40:26) Ne èdea ŋugble le Yehowa ƒe asinudɔwɔwɔwo ŋu la, esia ana nàva de bubu eya amea ŋu geɖe wu. Ke hã, nyanya be nunya kple ŋusẽ geɖe le Yehowa si nye nu vevi siwo akpe ɖe ŋuwò be ƒomedodo nava nɔ wò kplii dome la dometɔ aɖewo ko. Eya ta, hafi nàte ŋu ava lɔ̃ Yehowa vevie la, ehiã be nànya nu geɖe wu tso eyama ŋu.

7. Hafi nàte ŋu alɔ̃ Yehowa vevie la, nu ka ŋue wòle be kakaɖedzi nasu asiwò le?

⁷ Ehiã be kakaɖedzi nasu asiwò be Yehowa tsɔa ɖe le eme na wò vevie. Ðe wòsesẽna na wò be nàxɔe ase be dziƒo kple anyigba Wɔla la nya be nèli eye wòtsɔa ɖe le eme na wòa? Ne nenemae la, ke ɖo ŋku edzi be Yehowa “mele adzɔge tso mía dometɔ aɖeke gbɔ hafi o.” (Dɔw. 17:26-28) ‘Edzroa dziwo katã me kpɔna,’ eye edo ŋugbe na wò, abe ale si David gblɔe na Salomo ene be, ‘ne èdi eya amea la, ekema ana nàke ɖe eŋu.’ (1 Kron. 28:9) Le nyateƒe me la, nu si ta nèle Biblia srɔ̃m fifia ɖoe nye be, Yehowa gblɔ be, ‘Mehe wò ɖe ɖokuinye  ŋu.’ (Yer. 31:3) Zi ale si nèkpɔa ŋudzedze ɖe nu siwo katã Yehowa wɔ na wò ŋu la, zi nenemae nàgava lɔ̃e ɖe edzi.

8. Aleke nàte ŋu ada akpe ɖe lɔlɔ̃ si Yehowa ɖe fia wò la ta?

⁸ Mɔ aɖe si dzi nàte ŋu ato ada akpe na Yehowa ɖe lɔlɔ̃ si wòɖe fia wò la tae nye be nànɔ gbe dom ɖa nɛ. Zi ale si nèdoa gbe ɖa gblɔa wò dzimenyawo na Mawu hedaa akpe nɛ ɖe nu siwo wòwɔna na wò ta la, zi nenemae wò lɔlɔ̃ na eyama nu agasẽ ɖe edzi. Eye zi ale si nèdea dzesi ale si Yehowa ɖoa wò gbedodoɖawo ŋui la, zi nenemae wò kplii dome agava nɔ kplikplikpli wu. (Ps. 116:1) Kakaɖedzi ava su asiwò be enya ale si nɔnɔmeawo le na wò. Gake hafi wò kple Yehowa dome nava nɔ kplikplikpli la, ehiã be nàse nu si tae wòlɔ̃ nanewo eye wòlé fu nanewo ɖo la gɔme. Azɔ hã, ehiã be nànya nu si wòdi tso asiwò. Mɔ ɖeka kolia si dzi nàto be sidzedze siawo nasu asiwò ye nye be nàsrɔ̃ eƒe Nya, Biblia la.

9. Aleke nàte ŋu aɖee afia be èdea asixɔxɔ Biblia ŋu?

⁹ Srɔ̃ ale si nàde asixɔxɔ Mawu ƒe Nya, Biblia, ŋu. Biblia me koe míate ŋu akpɔ nyateƒe si ku ɖe Yehowa kple eƒe tameɖoɖo ŋu la le. Ne èxlẽa Biblia gbe sia gbe, ne èdzrana ɖo ɖe wò Biblia nusɔsrɔ̃ ɖe sia ɖe ŋu do ŋgɔ, eye nèwɔna ɖe nu siwo srɔ̃m nèle dzi la, ekema èle eɖem fia be èdea asixɔxɔ Biblia la ŋu. (Ps. 119:97, 99; Yoh. 17:17) Ðe nèwɔ ɖoɖo aɖe si dzi nèzɔna ɖo tsɔ xlẽa Biblia? Ðe nèzɔna ɖe ɖoɖowɔɖi ma dzi hekpɔa egbɔ be yexlẽ Biblia gbe sia gbea?

10. Nu vevi siwo ɖe dzesi le Biblia ŋu la dometɔ aɖe ye nye eka?

¹⁰ Nu vevi siwo ɖe dzesi le Biblia ŋu la dometɔ ɖekae nye be, ŋutinya siwo ame siwo ŋutɔ kpɔ nu siwo Yesu wɔ esime wònɔ anyigba dzi la teƒe ŋlɔ ɖi la le eme. Biblia me koe nàte ŋu akpɔ nu si Yesu wɔ na wò la ŋuti nuŋlɔɖi siwo de pɛpɛpɛ la le. Ne èsrɔ̃a nu tso nya siwo Yesu gblɔ kple nu siwo wòwɔ ŋu la, esia aʋã wò nàlɔ̃ eyama godoo.

11. Nu kae akpe ɖe ŋuwò be nàlɔ̃ Yehowa?

¹¹ Srɔ̃ nu geɖe tso Yesu ŋu, eye esia ana nàgalɔ̃ Yehowa geɖe wu. Nu ka tae? Nu si tae nye be, Yesu ɖe Fofoa ƒe nɔnɔme nyoameŋuawo fia bliboe. (Yoh. 14:9) Eya ta, zi ale si nèsrɔ̃a nu  tso Yesu ŋu la, zi nenemae àgava nya Yehowa ahakpɔ ŋudzedze ɖe Eyama ŋu. De ŋugble le ale si Yesu se veve ɖe ame siwo ame bubuwo ɖia gbɔ̃e, siwo nye ame dahewo, dɔnɔwo kple wɔnamanɔŋutɔwo, nui ŋu kpɔ. Eye bu aɖaŋu nyui siwo Yesu ɖo na wò kple ale si wò agbea ganyo ɖe edzi esi nèɖo to eyama la hã ŋu kpɔ.—Mat. 5:1-11; 7:24-27.

12. Ne èyi edzi le nu srɔ̃m tso Yesu ŋu la, nu kae esia ate ŋu aʋã wò be nàwɔ?

¹² Ne èdea ŋugble tso ale si Yesu tsɔ eɖokui sa vɔe ale be Mawu nate ŋu atsɔ míaƒe nu vɔ̃wo ake mí la ŋu vevie la, esia ate ŋu awɔe be lɔlɔ̃ si le asiwò na Yesu la nu nanɔ sesẽm ɖe edzi. (Mat. 20:28) Ne èva se egɔme be Yesu lɔ̃ faa ku ɖe tawò la, esia ate ŋu aʋã wò be nàtrɔ dzi me eye nàbia Yehowa be wòatsɔ wò nu vɔ̃wo ake wò. (Dɔw. 3:19, 20; 1 Yoh. 1:9) Eye zi ale si nèva lɔ̃ Yesu kple Yehowa vevie la, zi nenemae nàdi be yeade ha kple ame siwo hã lɔ̃ wo.

13. Nu nyui kae Yehowa na wò?

¹³ Srɔ̃ ale si nàlɔ̃ ame siwo lɔ̃ Yehowa. Ðewohĩ wò ƒometɔ siwo mesubɔa Yehowa o kple ame siwo nèdea ha kplii tsã la mase nu si tae nèdi be yeatsɔ ye ɖokui aɖe adzɔgbe na Yehowa la gɔme o. Woate ŋu atsi tsitre ɖe ŋuwò gɔ̃ hã. Yehowa akpe ɖe ŋuwò le mɔ sia nu be, ana nɔviŋutsu kple nɔvinyɔnu siwo le hamea me la nava nɔ abe ƒome ene na wò. Ne èyi edzi nɔ wò ƒome yeye sia ŋu kplikplikpli la, àkpɔ lɔlɔ̃ kple kpekpeɖeŋu siwo nèhiã. (Marko 10:29, 30; Heb. 10:24, 25) Ɣeyiɣi aɖewo megbe la, wò ƒometɔwo ate ŋu ava wɔ ɖeka kpli wò miasubɔ Yehowa ahanɔ agbe ɖe eƒe nudidiwo nu.—1 Pet. 2:12.

14. Abe ale si wòdze le 1 Yohanes 5:3 ene la, nu kae nède dzesi le Yehowa ƒe nudidiwo ŋu?

¹⁴ Srɔ̃ ale si nàde asixɔxɔ Yehowa ƒe sewo ŋu kple ale si nàwɔ wo dzi. Hafi nàva nya Yehowa la, ɖewohĩ, wò ŋutɔe tsoa nya me le nu si nèsusu be enyo kple nu si nèsusu be menyo o la ŋu, gake fifia, èva kpɔe be Yehowa ƒe sewo de ŋgɔ wu kura. (Ps. 1:1-3; xlẽ 1 Yohanes 5:3.) Bu aɖaŋu siwo Biblia ɖo na srɔ̃ŋutsuwo, srɔ̃nyɔnuwo, dzilawo kple ɖeviwo la ŋu kpɔ. (Ef. 5:22–6:4) Esi nèva le wɔwɔm ɖe aɖaŋuɖoɖo mawo dzi la, ɖe nèkpɔe be wò ƒomea va le dzidzɔ kpɔm geɖe wua? Esi nèva le wɔwɔm ɖe mɔfiame siwo Yehowa na ku ɖe xɔlɔ̃ nyuiwo dzedze ŋu dzi la, ɖe nèkpɔe be èva zu ame ɖɔʋu fifia? Ðe nèle dzidzɔ kpɔm fifia wu tsã? (Lod. 13:20; 1 Kor. 15:33) Ðikeke mele eme o be, àɖo biabia mawo ŋu be ɛ̃.

15. Ne èhiã kpekpeɖeŋu be nàwɔ ɖe Biblia ƒe mɔfiamewo dzi la, nu kae nàte ŋu awɔ?

¹⁵ Ɣeaɖewoɣi la, ate ŋu asesẽ na wò be nànya ale si nàwɔ ɖe Biblia ƒe mɔfiafia siwo srɔ̃m nèle la dzi. Esia tae Yehowa toa eƒe habɔbɔa dzi naa agbalẽ kple nu bubu ɖe sia ɖe si ate ŋu akpe ɖe ŋuwò be nàse Biblia gɔme la wò ale be nàte ŋu ade vovototo nyui kple vɔ̃ dome. (Heb. 5:13, 14) Ne èxlẽa agbalẽ mawo hesrɔ̃a wo la, wò ŋutɔ àde dzesi ale si gbegbe mɔfiame mawo sɔ nyuie kple ale si woɖea vii, eye esia ate ŋu awɔe be nàva nɔ Yehowa ƒe habɔbɔa ŋu kplikplikpli.

16. Aleke Yehowa na eƒe amewo le ɖoɖo nu?

¹⁶ Srɔ̃ ale si nàlɔ̃ Yehowa ƒe habɔbɔa ahakpe asi ɖe eŋu. Yehowa na eƒe amewo le ɖoɖo nu le hamewo me; Via, Yesu, ye nye hameawo katã ƒe ta. (Ef. 1:22; 5:23) Yesu ɖo amesiaminawo ƒe ƒuƒoƒo sue aɖe be wòaxɔ ŋgɔ awɔ ɖoɖo ɖe dɔ si wòdi be míawɔ egbea la ŋu. Yesu yɔ ƒuƒoƒo sia be “kluvi nuteƒewɔla kple aɖaŋudzela,” eye kluvi sia tsɔa dɔ si Yesu de esi be wòanyi wò ahakpɔ tawò be wò kple Mawu dome nanɔ kplikplikpli la ŋkubiãnyae. (Mat. 24:45-47) Mɔ siwo dzi kluvi nuteƒewɔlaa tona léa be na wò la dometɔ ɖekae nye be ekpɔa egbɔ be woɖo hamemetsitsi siwo dze la le hameawo me ale be woafia mɔ wò ahakpɔ tawò. (Yes.  32:1, 2; Heb. 13:17; 1 Pet. 5:2, 3) Hamemetsitsiwo lɔ̃na faa be yewoawɔ nu sia nu si yewoate ŋui na wò, afa akɔ na wò, ahakpe ɖe ŋuwò be wò kple Yehowa dome nagava nɔ kplikplikpli wu. Ke hã, nu vevitɔ kekeake siwo woate ŋu awɔ na wò la dometɔ ɖekae nye be woakpe ɖe ŋuwò be nànya ale si nàfia nu ame bubuwo tso Yehowa ŋu.—Ef. 4:11-13.

17. Le Romatɔwo 10:10, 13, 14 ƒe nya nu la, nu ka tae míeƒoa nu na amewo tso Yehowa ŋu?

¹⁷ Kpe ɖe ame bubuwo ŋu be woawo hã woava lɔ̃ Yehowa. Yesu de se na eyomedzelawo be woafia nu amewo tso Yehowa ŋu. (Mat. 28:19, 20) Ele bɔbɔe be míawɔ ɖe sedede ma dzi le esi míenyae be ele na mí kokoko be míawɔ ɖe edzi ko ta. Gake, ne wò lɔlɔ̃ na Yehowa nu va le sesẽm ɖe edzi la, àva se le ɖokuiwò me abe ale si apostolo Petro kple Yohanes se le wo ɖokuiwo me ene, esi wogblɔ be: “Míate ŋu adzudzɔ nuƒoƒo le nu siwo míekpɔ kple nu siwo míese la ŋu o.” (Dɔw. 4:20) Nu bubu aɖeke mana míakpɔ dzidzɔ wu kpekpe ɖe ame bubuwo ŋu be woava lɔ̃ Yehowa o. Bu dzidzɔ si gbegbe nyanyuigblɔla Filipo kpɔ esi wòkpe ɖe Etiopiatɔ la ŋu wòsrɔ̃ nyateƒe si le Ŋɔŋlɔawo me hexɔ nyɔnyrɔ la ŋu kpɔ! Ne èsrɔ̃ Filipo ƒe kpɔɖeŋua hewɔ ɖe se si Yesu de be míaɖe gbeƒã dzi la, ke èle kpe ɖom edzi be yedi be yeazu Yehowa Ðasefowo dometɔ ɖeka. (Xlẽ Romatɔwo 10:10, 13, 14.) Ne èwɔ ŋgɔyiyi va ɖo afi sia la, anɔ eme godoo be, wò hã àbia nya si Etiopiatɔ la bia be: “Nu kae xe mɔ na nye nyɔnyrɔxɔxɔ?”—Dɔw. 8:36.

18. Nu kawo me míadzro le nyati si kplɔ esia ɖo me?

¹⁸ Nyametsotso vevitɔ kekeake si nàwɔ le wò agbe me ye nye be nàtso nya me be yeaxɔ nyɔnyrɔ. Esi wònye be afɔɖeɖe sia nye ŋkubiãnya ta la, ehiã be nàbu nu siwo afɔɖeɖe sia abia tso asiwò la ŋu nyuie do ŋgɔ. Nu kawoe wòhiã be nànya tso nyɔnyrɔxɔxɔ ŋu? Nu kawoe wòhiã be nàwɔ hafi axɔ nyɔnyrɔ kple le wò nyɔnyrɔxɔxɔ megbe? Àkpɔ ŋuɖoɖo na biabia mawo le nyati si kplɔ esia ɖo me.