1. Nufiame kae le nya siwo dze le Nyagblɔla 3:1, 7 la me na mí?

MÍA dometɔ aɖewo lɔ̃a nuƒoƒo ŋutɔ. Nɔvi aɖewo hã melɔ̃a nuƒoƒo o. Abe ale si nyati sia ƒe tanya ɖee fia ene la, nuƒoɣi li eye ɖoɖoeziɣi hã li. (Xlẽ Nyagblɔla 3:1, 7.) Ke hã, anye ne adzɔ dzi na mí ne mía nɔviŋutsu alo mía nɔvinyɔnu aɖewo ƒoa nu geɖe wu eye bubuwo ya ƒoa nu ʋɛ wu.

2. Ame kae kpɔ mɔ aɖo ɣeyiɣi si me wòle be míaƒo nu kple ale si wòle be míaƒo nui na mí?

² Nuƒoƒo nye nunana tso Yehowa gbɔ. (2 Mose 4:10, 11; Nyaɖ. 4:11) Ekpe ɖe mía ŋu le eƒe Nyaa me míese ale si wòle be míazã nunana sia nyuie la me. Le nyati sia me la, míadzro Ŋɔŋlɔawo me kpɔɖeŋu siwo akpe ɖe mía ŋu míanya ɣesiɣi wòle be míaƒo nu kple ɣesiɣi wòle be míazi ɖoɖoe. Gakpe ɖe eŋu la, míakpɔ ale si Yehowa sena le eɖokui me tso nya si míegblɔna na ame bubuwo ŋu la hã. Gbã la, na míadzro ɣeyiɣi si me wòle be míaƒo nu la me.

3. Le Romatɔwo 10:14 ƒe nya nu la, ɣekaɣie wòle be míaƒo nu?

³ Ele be míanɔ klalo ɣesiaɣi be míaƒo nu tso Yehowa kple Fiaɖuƒea ŋu. (Mat. 24:14; xlẽ Romatɔwo 10:14.) Ne míewɔnɛ alea la, ekema, míele Yesu srɔ̃m. Susu vevi siwo tae Yesu va anyigba dzi ɖo la dometɔ ɖekae nye be yeagblɔ nyateƒe si ku ɖe ye Fofo ŋu la na amewo. (Yoh. 18:37) Gake ele be míaɖo ŋku edzi be ale si míeƒoa nui la hã le vevie. Eya ta, ne míele nu ƒom na amewo tso Yehowa ŋu la, ele be míawɔ esia “le tufafa kple bubu deto me,” eye ele be míabu ameawo ƒe seselelãmewo kple woƒe dzixɔsewo ŋu. (1 Pet. 3:15) Ne míewɔe alea la, menye ɖeko míaƒo  nu na amewo ko evɔ o, ke míafia nu wo eye ɖewohĩ, míaƒe nyawo awɔ dɔ ɖe wo dzi hã.

4. Le Lododowo 9:9 ƒe nya nu la, aleke míaƒe nuƒoƒo ate ŋu akpe ɖe ame bubuwo ŋu?

⁴ Ne hamemetsitsiwo kpɔe be ehiã be yewoaɖo aɖaŋu na nɔviŋutsu alo nɔvinyɔnu aɖe la, mele be woahe ɖe megbe o. Ke hã, anyo be woawɔe le ɣeyiɣi si sɔ me ale be woagana ŋu nakpe nɔvia dzodzro o. Ðewohĩ, anyo be woalala va se ɖe esime ame bubuwo dzo le teƒea hafi. Hamemetsitsiwo dzea agbagba ɣesiaɣi be yewoaƒo nu le mɔ si maklo bubu le ame si wole aɖaŋu ɖom na ŋu o la nu. Ke hã, ne ehiã be woaɖe Biblia me mɔfiame aɖe si akpe ɖe nɔvi aɖe ŋu be wòawɔ nu le nunya me la me nɛ la, womehena ɖe megbe le esia wɔwɔ ŋu o. (Xlẽ Lododowo 9:9.) Nu ka tae wòle vevie ŋutɔ be dzi nanɔ mía ƒo ne míaƒo nu ne ehiã? Bu esia ƒe kpɔɖeŋu eve aɖewo ŋu kpɔ: Gbãtɔ ku ɖe ŋutsu aɖe si wòle na be wòaɖɔ viaŋutsuwo ɖo la ŋu, eye evelia ku ɖe nyɔnu aɖe si wòle na be wòafa akɔ na ŋutsu aɖe si ava zu fia la ŋu.

5. Ɣeyiɣi ka mee Nunɔlagã Eli do kpo nuƒoƒo le?

⁵ Viŋutsu eve aɖewo nɔ Nunɔlagã Eli si, eye elɔ̃ wo vevie ŋutɔ. Ke hã, viaŋutsu mawo mede bubu Yehowa ŋu kura o. Wode dɔ si ŋu bubu le la asi na wo, elabena wonye nunɔla siwo wɔa subɔsubɔdɔ le avɔgbadɔa me. Ke hã, wowɔ woƒe ŋusẽa ŋu dɔ le mɔ gbegblẽ nu, womede bubu aɖeke vɔ siwo dukɔa va sana na Yehowa la ŋu o, eye woƒoa wo ɖokuiwo ɖe gbɔdɔdɔ manɔsenu me dzimesesẽtɔe. (1 Sam. 2:12-17, 22) Le Mose ƒe Sea nu la, Eli viŋutsuawo dze ku, gake ɖeko Eli wɔa vi na viaŋutsuawo hegbea nya na wo ɖewoɖewoe ko heɖea asi le wo ŋu woyia woƒe subɔsubɔdɔa dzi le avɔgbadɔa me. (5 Mose 21:18-21) Aleke Yehowa bu tso ale si Eli kpɔ nyaa gbɔe ŋu? Egblɔ na Eli be: “Nu ka tae nèle bubu dem viwòwo ŋu wum?” Eyome, Yehowa tso kufia na ŋutsu vɔ̃ɖi eve mawo be woaku godoo.—1 Sam. 2:29, 34.

6. Nu kae míesrɔ̃ tso Eli ƒe ŋutinyaa me?

⁶ Nufiame vevi aɖe le Eli ƒe ŋutinyaa me na mí. Ne míeva nyae be mía xɔlɔ̃ alo míaƒe ƒometɔ aɖe da le Mawu ƒe se dzi la, ele be míaƒo nu nɛ ahaɖo ŋku Yehowa ƒe dzidzenuwo dzi nɛ. Eyome, ele be míakpɔ egbɔ be exɔ kpekpeɖeŋu si hiã la tso ame siwo nye Yehowa teƒenɔlawo la gbɔ. (Yak. 5:14) Negadzɔ gbeɖe be míawɔ nu abe Eli ene ahade bubu mía xɔlɔ̃a alo míaƒe ƒometɔa ŋu wu Yehowa o. Ebia dzinɔameƒo be míagblɔ nu si le eteƒe la na nɔvi aɖe si hiã ɖɔɖɔɖo, ke hã, esia wɔwɔ ɖea vi geɖe. Kpɔ ale si  Israel nyɔnu aɖe si ŋkɔe nye Abigail la ƒe kpɔɖeŋua to vovo kura na Eli tɔae ɖa.

7. Nu ka tae Abigail yi ɖaƒo nu na David?

⁷ Abigail nye Nabal, si nye anyigbatɔ aɖe si nye kesinɔtɔ, la srɔ̃. Esi David kple eƒe amewo nɔ sisim le Fia Saul nu la, wova nɔ teƒe si Nabal ƒe alẽkplɔlawo nɔ eƒe lãhawo kplɔm le eye wokpɔ Nabal ƒe lãhawo ta tso adzodalawo si me. Ðe Nabal da akpe ɖe kpekpeɖeŋu si wonae la ta? Ao. Esi David biae be wòana nuɖuɖu vi aɖe kple tsi nono yeƒe amewo la, Nabal do dziku vevie hedzu wo. (1 Sam. 25:5-8, 10-12, 14) Esia ta, David ɖoe be yeawu ŋutsu ɖe sia ɖe le Nabal ƒe aƒe me. (1 Sam. 25:13, 22) Nu kae woate ŋu awɔ be vɔ̃ gã sia nagadzɔ o? Abigail kpɔe be esia nye ɣeyiɣi si me wòle be yeaƒo nu, eya ta, elé dzi ɖe ƒo yi ɖado go ŋutsu 400 siwo dɔ wu, siwo do dziku eye wobla aʋakpa la kpakple David siaa le mɔa dzi.

8. Nu kawoe míesrɔ̃ tso Abigail ƒe kpɔɖeŋua me?

⁸ Esi Abigail yi ɖado go David la, Abigail ƒo nu dzinɔameƒotɔe, bubutɔe, kple aɖaŋudzedze geɖe. Togbɔ be Abigail medze agɔ aɖeke le nya sia me o hã la, eɖe kuku na David. Egblɔ na David be yenya be ame nyui aɖe wònye eye awɔ nu si le eteƒe; Abigail ɖo ŋu ɖe Yehowa ŋu. (1 Sam. 25:24, 26, 28, 33, 34) Abe Abigail ene la, ehiã be míalé dzi ɖe ƒo aƒo nu ne míekpɔe be ame aɖe le nu si akplɔe ade afɔku me la wɔm. (Ps. 141:5) Ele be míawɔ nu ɖe amea ŋu le bubu me, gake ele be míawɔ nu dzinɔameƒotɔe hã. Ne míeɖo aɖaŋu na ame aɖe si hiã nɛ la le lɔlɔ̃ me la, míaɖee afia be míenye xɔlɔ̃ vavã.—Lod. 27:17.

9-10. Ne hamemetsitsiwo le aɖaŋu ɖom na ame bubuwo la, nu kae wòle be wòanɔ susu me na wo?

⁹ Hamemetsitsiwo koŋue wòle na be woalé dzi ɖe ƒo aƒo nu na ame siwo le hamea me siwo ɖe afɔ gbegblẽ aɖe. (Gal. 6:1) Hamemetsitsiwo lɔ̃na ɖe edzi ɖokuibɔbɔtɔe be yewo ŋutɔ hã yewomede blibo o eye ate ŋu ava hiã gbe ɖeka be  woaɖo aɖaŋu na yewo hã. Gake hamemetsitsiwo menana esia xea mɔ na wo be woagagbe nya na ame siwo hiã ɖɔɖɔɖo la o. (2 Tim. 4:2; Tito 1:9) Ne hamemetsitsiwo le aɖaŋu ɖom na ame aɖe la, wodzea agbagba wɔa woƒe nuƒoƒo ƒe nunanaa ŋu dɔ aɖaŋutɔe tsɔ fiaa nu amea le dzigbɔɖi me. Wolɔ̃ wo nɔvia, eye lɔlɔ̃ siae ʋãa wo be woakpe ɖe eŋu. (Lod. 13:24) Gake nu si le vevie na wo wue nye be yewoade bubu Yehowa ŋu; wowɔa esia to ale si wodoa Yehowa ƒe dzidzenuwo ɖe ŋgɔ kple ale si wokpɔa hamea tae la dzi.—Dɔw. 20:28.

¹⁰ Va se ɖe afi sia la, míedzro ɣeyiɣi si me wòle be míaƒo nu le la me. Ke hã, ɣeaɖewoɣi la, nu nyuitɔ si wòle be míawɔe nye be míazi ɖoɖoe. Nu kawoe ate ŋu ana be esia wɔwɔ nasesẽ na mí?

11. Kpɔɖeŋu kae Yakobo zã le eƒe lɛtaa me, eye nu ka tae kpɔɖeŋua sɔ ŋutɔ?

¹¹ Etea ŋu sesẽna be míaɖu mía ɖokui dzi le nuƒoƒo me. Biblia ŋlɔla Yakobo zã kpɔɖeŋu aɖe si sɔ nyuie tsɔ ɖɔ kuxi sia. Egblɔ be: “Ne ame aɖe meda vo le nuƒoƒo me o la, enye ame deblibo si ate ŋu ade ga eƒe ŋutilã bliboa hã.” (Yak. 3:2, 3) Ne wodi be woade ga nu na sɔ la, wotsɔa ga dea eƒe nu me hetsia ka ɖe gaa kple eƒe ta ŋu keŋ. Sɔdola tea ŋu fiaa mɔ sɔa alo nana wòtɔna ne ehe kaa me. Ne kaa do le sɔdolaa si la, sɔa ate ŋu ade afɔ du me ale gbegbe be awɔ nu vevi eɖokui kple edolaa siaa. Nenema kee ne míede ga míaƒe aɖe o la, ate ŋu agblẽ nu geɖe. Na míadzro ɣeyiɣi siwo me wòhiã le be ‘míade ga aɖea’ eye míazi ɖoɖoe la me.

12. Ɣekaɣie wòle be ‘míade ga aɖea’ eye míazi ɖoɖoe?

¹² Aleke nèwɔa nui ne ènya be nɔviŋutsu alo nɔvinyɔnu aɖe nya nya aɖe si nye nya ɣaɣla? Le kpɔɖeŋu me, ne èdo go nɔvi aɖe si le dukɔ aɖe si me woɖo asi míaƒe dɔa dzi le me la, ɖe nèdina be yeabiae ne wòagblɔ ale si tututu wowɔna  hafi tea ŋu wɔa míaƒe dɔa le dukɔ ma me la na wòa? Ele eme be, menye ɖe nèle biabiam kple susu be yeawɔ vɔ̃ wo o. Míelɔ̃ mía nɔviwo eye míedina be míanya nu si me tom wole. Míedina hã be míado gbe ɖa na Yehowa be wòawɔ nu si ŋutɔŋutɔ wohiã la na wo. Ke hã, ɣeyiɣi alo nɔnɔme sia tututu mee wòle be ‘míade ga aɖea’ eye míazi ɖoɖoe. Ne míeƒoe ɖe ame aɖe si nya nya ɣaɣla aɖe la nu be wòagblɔe na mí la, manye lɔlɔ̃ɖeɖefia eya amea kple nɔviŋutsu kpakple nɔvinyɔnu siwo le ŋu ɖom ɖe eŋu be maʋu go ale si yewowɔa subɔsubɔdɔae o la o. Kakaɖedzitɔe la, mía dometɔ aɖeke madi be yeƒe nuwɔna nana fukpekpe siwo me tom mía nɔviŋutsu kple nɔvinyɔnuwo le le dukɔ siwo me woɖo asi míaƒe dɔa dzi le me la nadzi ɖe edzi na wo o. Nenema kee, nɔviŋutsu alo nɔvinyɔnu siwo le dukɔ ma tɔgbi me la dometɔ aɖeke madi be yeaʋu go ale si Ðasefo siwo le afi ma la wɔa gbeƒãɖeɖedɔa alo Kristotɔwo ƒe subɔsubɔdɔwo la o.

13. Abe ale si wòdze le Lododowo 11:13 ene la, nu kae wòle be hamemetsitsiwo nawɔ, eye nu ka tae?

¹³ Ele na hamemetsitsiwo koŋ be woawɔ ɖe Biblia me mɔfiame si dze le Lododowo 11:13 la dzi, be woagaʋu go nya ɣaɣlawo o. (Xlẽe.) Esia ate ŋu asesẽ, vevietɔ, ne srɔ̃tɔe hamemetsitsia nye. Srɔ̃tɔwo dome nɔa kplikplikpli ne woɖoa dze edziedzi tso woƒe susuwo kple seselelãme ememetɔwo kpakple woƒe dzimaɖitsitsiwo ŋu na wo nɔewo. Gake, hamemetsitsi ya nyae be mele be yeagblɔ ame siwo le hamea me la ƒe “nya ɣaɣla” na ye srɔ̃ o. Ne ewɔ esia la, ame siwo le hamea me la magaka ɖe edzi o eye agblẽ ŋkɔ nyui si le eŋu la. Mele be ame siwo si agbanɔamedziwo le le hamea me la nanye “aɖeveetɔwo” alo ameblelawo o. (1 Tim. 3:8) Esia fia be, mele be woanye ameflulawo alo ame siwo lɔ̃ ameŋunyagbɔgblɔ o. Ne hamemetsitsi lɔ̃ srɔ̃a la, magblɔ nya siwo mehiã be srɔ̃a nanya o la nɛ atsɔ ado agba nɛ o.

14. Aleke hamemetsitsi srɔ̃ ate ŋu akpe ɖe srɔ̃a ŋu be ŋkɔ nyui nakpɔtɔ anɔ srɔ̃a ŋu?

¹⁴ Srɔ̃nyɔnu ate ŋu akpe ɖe srɔ̃a ŋu be ŋkɔ nyui nakpɔtɔ anɔ eŋu ne meƒonɛ ɖe enu be wòagblɔ nya siwo nye nya ɣaɣlawo la na ye o. Ne srɔ̃nyɔnu wɔna ɖe aɖaŋuɖoɖo sia dzi la, menye ɖeko wòakpe asi ɖe srɔ̃a ŋu be wòagaʋu go nya ɣaɣlawo ko o, ke ato esia me ade bubu ame siwo gblɔ woƒe nya ɣaɣlawo na srɔ̃a la hã ŋu. Eye vevietɔ la, edoa dzidzɔ na Yehowa, elabe ne ekpea asi ɖe srɔ̃a ŋu alea la, ekema, ele asi kpem ɖe eŋu be ŋutifafa kple ɖekawɔwɔ nanɔ hamea me.—Rom. 14:19.

15. Aleke Yehowa se le eɖokui me tso Hiob ƒe zɔhɛ etɔ̃awo ŋu, eye nu ka tae?

¹⁵ Míate ŋu asrɔ̃ nu geɖe tso Biblia-gbalẽ si nye Hiob la me tso ale si míaƒo nui kple ɣeyiɣi si me míaƒo nu la ŋu. Esi vɔ̃ gã vovovowo dzɔ ɖe Hiob dzi vɔ la, ŋutsu ene aɖewo va be yewoafa akɔ nɛ ahaɖo aɖaŋu nɛ. Ŋutsu mawo va nɔ egbɔ ɣeyiɣi didi aɖe numaƒomaƒoe. Gake edze ƒãa le nya siwo ŋutsuawo dometɔ etɔ̃—siwo nye Elifaz, Bildad, kple Zofar—va gblɔ emegbe la me be, womezã ɣeyiɣi ma tsɔ nɔ ŋugble dem le ale si woate ŋu akpe ɖe Hiob ŋu la ŋu o. Ke ale si woate ŋu aɖee afia Hiob be nu gbegblẽ aɖee wòwɔ la boŋ ŋu bum wonɔ. Wogblɔ nyateƒenya aɖewo, gake nya siwo wogblɔ tso Hiob kple Yehowa ŋu la ƒe akpa gãtɔ meɖe lɔlɔ̃ fia o eye ɖewo hã nye alakpanyawo. Wodrɔ̃ ʋɔnu Hiob be enye ame vɔ̃ɖi. (Hiob 32:1-3) Aleke Yehowa wɔ nui? Edo dziku ɖe ŋutsu etɔ̃ mawo ŋu vevie. Egblɔ be wonye bometsilawo eye egblɔ na wo be woabia Hiob ne wòado gbe ɖa ɖe wo ta.—Hiob 42:7-9.

16. Nu kawoe míate ŋu asrɔ̃ tso Elifaz, Bildad, kple Zofar ƒe kpɔɖeŋu gbegblẽawo me?

¹⁶ Míesrɔ̃ nu vevi aɖewo tso Elifaz, Bildad, kple Zofar ƒe kpɔɖeŋu gbegblẽawo me. Gbãtɔa  ye nye be, mele be míadrɔ̃ ʋɔnu mía nɔvi Kristotɔwo o. (Mat. 7:1-5) Ke boŋ, ele be míaɖo to ase woƒe nyawo nyuie hafi aƒo nu. Esia ko hafi míate ŋu ase nu si me tom wole la gɔme nyuie. (1 Pet. 3:8) Evelia, ne eva hiã be míaƒo nu la, ele be míakpɔ egbɔ be nya siwo míagblɔ la naɖe lɔlɔ̃ afia eye woanye nyateƒe. (Ef. 4:25) Eye etɔ̃liae nye be, Yehowa tsɔa ɖe le nya siwo míegblɔna na mía nɔewo la me vevie.

17. Nu kae míate ŋu asrɔ̃ tso Elihu ƒe kpɔɖeŋua me?

¹⁷ Ame siwo va Hiob gbɔ la dometɔ enelia ye nye Elihu, si nye Abraham ƒe dzidzimevi aɖe. Enɔ to ɖom esime Hiob kple ŋutsu etɔ̃awo nɔ woƒe nyawo gblɔm. Edze ƒãa be esi wonɔ nu ƒom la, eɖo to se nya siwo gblɔm wonɔ la nyuie, elabe ete ŋu gblɔ nya siwo ɖe veveseɖeamenu fia eye wòɖo aɖaŋu siwo nɔ tẽe hã na Hiob, eye esiawo katã kpe ɖe Hiob ŋu wòɖɔ eƒe susu ɖo. (Hiob 33:1, 6, 17) Nu si nɔ vevie na Elihu wue nye be yeado Yehowa ɖe dzi, ke menye be yeahe susu ava ye ɖokui alo ame bubu aɖeke dzi o. (Hiob 32:21, 22; 37:23, 24) Míesrɔ̃e le Elihu ƒe kpɔɖeŋua me be, ɣeyiɣi si míazi ɖoɖoe ahaɖo to nyuie la li. (Yak. 1:19) Míesrɔ̃e hã be, ne míele aɖaŋu ɖom na ame aɖe la, nu si koŋ wòle be wòanɔ vevie na mí wue nye be míahe kafukafu avae na Yehowa, ke menye na míawo ŋutɔwo o.

18. Aleke míate ŋu aɖee afia be míedea asixɔxɔ nuƒoƒo ƒe ŋutete si Yehowa na mí la ŋu?

¹⁸ Míate ŋu aɖee afia be míedea asixɔxɔ nuƒoƒo ƒe ŋutete si Yehowa na mí la ŋu ne míewɔna ɖe aɖaŋu si Biblia ɖo ku ɖe ɣeyiɣi si míaƒo nu kple ale si míaƒo nui ŋu la dzi. Nunyala Fia Salomo si Mawu ƒe gbɔgbɔ ʋã la ŋlɔ bena: “Nya si wogblɔ ɖe egblɔɣi la le abe sikatɔtɔŋuti le klosalogba me ene.” (Lod. 25:11) Ne míeɖo to se nya si gblɔm ame bubuwo le la nyuie eye míede ŋugble le eŋu hafi ƒo nu la, míaƒe nyawo ate ŋu anɔ abe sikatɔtɔŋuti mawo ene—woanye nya vavã siwo ŋu asixɔxɔ le. Ne míewɔe alea la, míeɖaƒo nu geɖe alo míeɖaƒo nu ʋɛ o, míaƒe nuƒoƒo atu ame bubuwo ɖo, eye míana Yehowa nakpɔ dzidzɔ ɖe mía ŋu. (Lod. 23:15; Ef. 4:29) Ðe míagate ŋu aɖe míaƒe ŋudzedzekpɔkpɔ afia ɖe Mawu ƒe nunana sia ŋu le mɔ bubu aɖe nu tsɔ wu esia?