Dzo kpo yi emenuwo dzi

Dzo kpo yi emenuawo dzi

Na Wò Dzi Naku Ðe Nu Xɔasi Siwo Mawu Na Mí La Ŋu

Na Wò Dzi Naku Ðe Nu Xɔasi Siwo Mawu Na Mí La Ŋu

Afi si wò nu xɔasiwo le la, afi mae wò dzi hã anɔ.”—LUKA 12:34.

HADZIDZI: 153, 104

1, 2. (a) Nu xɔasi etɔ̃ kawoe Yehowa na mí? (b) Nu kawo mee míadzro le nyati sia me?

YEHOWA sie kesinɔnu le wu ame sia ame le xexea me godoo. (1 Kron. 29:11, 12) Esi wònye Fofo dɔmenyotɔ ta la, eʋua asi me faa naa gbɔgbɔmekesinɔnuwo ame siwo dea asixɔxɔ wo ŋu. Aleke gbegbe míedaa akpee ye nye esi be Yehowa na kesinɔnu vavã siwo nye (1) Mawu Fiaɖuƒea, (2) míaƒe gbeƒãɖeɖedɔ si xɔa ame ɖe agbe, kple (3) nyateƒe xɔasi siwo le eƒe Nya la me mí! Gake ne míeɖɔ ŋu ɖo o la, mímagava nɔ asixɔxɔ dem nu xɔasi siawo ŋu o, eye ɖeko wòanɔ abe ɖe míetsɔ wo ƒu gbe ene. Hafi nu xɔasi siawo nakpɔtɔ anɔ mía si la, ele be míawɔ wo ŋu dɔ nyuie eye míayi edzi anɔ lɔlɔ̃ si le mía si na wo la tum ɖo. Yesu gblɔ be: “Afi si wò nu xɔasiwo le la, afi mae wò dzi hã anɔ.”—Luka 12:34.

2 Na míadzro ale si míate ŋu ana míaƒe lɔlɔ̃ kple ŋudzedzekpɔkpɔ ɖe Fiaɖuƒea, gbeƒãɖeɖedɔa, kple Biblia me nyateƒea ŋu nadzi ɖe edzi kple ale si míawɔ alé wo me ɖe asi la me. Ne míele esia me dzrom la, de ŋugble le nu si nàwɔ be wò dzi naku ɖe Mawu ƒe nunana siawo ŋu geɖe wu la ŋu.

 MAWU FIAÐUƑEA LE ABE DZONU AÐE SI XƆ ASI ŊUTƆ ENE

3. Nu kae asitsala si ŋu Yesu ƒo nu tsoe le eƒe kpɔɖeŋua me la lɔ̃ faa be yeawɔ ale be dzonu xɔasia nasu ye si? (Kpɔ nɔnɔmetata si le nyati sia ƒe gɔmedzedze.)

3 Xlẽ Mateo 13:45, 46. Yesu wɔ kpɔɖeŋu tso asitsala aɖe si nɔ dzonuwo dim ŋu. Ðikeke mele eme o be le ƒe siwo asitsalaa tsɔ tsa asii me la, eƒle dzonuwo dzra zi gbɔ zi geɖe. Ke azɔ la, eva ke ɖe dzonu tɔxɛ aɖe ŋu; dzonua nyo ale gbegbe be ekpɔkpɔ ɖeɖe na dzi dzɔe eteƒe mekɔ o. Ke hã, ele be wòadzra nu siwo katã le esi hafi wòate ŋu aƒlee. Bu ale si gbegbe dzonu ma xɔ asi nɛ ŋu kpɔ!

4. Ne míelɔ̃ Mawu Fiaɖuƒea vevie abe ale si asitsalaa lɔ̃ dzonu ma ene la, nu kae míawɔ?

4 Nufiame kae le kpɔɖeŋu sia me na mí? Mawu Fiaɖuƒea le abe dzonu aɖe si xɔ asi ŋutɔ ene. Ne míelɔ̃ Mawu Fiaɖuƒea vevie abe ale si asitsalaa lɔ̃ dzonu ma ene la, míalɔ̃ faa aɖe asi le nu sia nu ŋu ale be míazu Fiaɖuƒea teviwo eye míakpɔtɔ anye eteviwo ɖaa. (Xlẽ Marko 10:28-30.) Bu ame eve aɖewo siwo wɔe alea la ƒe kpɔɖeŋuwo ŋu kpɔ.

5. Nu kae Zaxeo lɔ̃ faa be yeawɔ le Mawu Fiaɖuƒea ta?

5 Zaxeo nye adzɔxɔlawo ƒe amegã aɖe si to amewo tafatafa dzi va zu kesinɔtɔ. (Luka 19:1-9) Ke hã, esi ame madzɔmadzɔ ma se Fiaɖuƒe ŋuti nya si Yesu nɔ gbeƒã ɖemee la, ekpɔe be asixɔxɔ gã aɖe le nya si yese la ŋu eye wòɖe afɔ enumake. Egblɔ be: “Kpɔ ɖa Aƒetɔ, matsɔ nye nunɔamesiwo ƒe afã ana ame dahewo, eye maɖo nu sia nu si metafa ame aɖe xɔ le esi la teƒe zi ene.” Etsɔ dzidzɔ ɖe asi le kesinɔnu siwo wòkpɔ to ametafatafa dzi la ŋu eye wòdzudzɔ ŋukeklẽ ɖe ŋutilãmenuwo ŋu.

6. Tɔtrɔ kawoe Rose wɔ hafi va zu Mawu Fiaɖuƒea tevi, eye nu ka tae wòwɔ tɔtrɔ mawo ɖo?

6 Ƒe aɖewoe nye esi va yi la, nyɔnu aɖe si míayɔ be Rose la nye nyɔnu si dɔna kple nyɔnu hafi va se Fiaɖuƒe ŋuti nyaa. Enye habɔbɔ aɖe ƒe tatɔ. Habɔbɔ ma ʋlia ŋutsu siwo dɔna kple ŋutsuwo kpakple nyɔnu siwo dɔna kple nyɔnuwo la ƒe gomenɔamesiwo ta. Ke hã, esi Rose va nɔ Biblia srɔ̃m la, ekpɔe be asixɔxɔ gã le Mawu Fiaɖuƒe ŋuti nya la ŋu. Gake ekpɔe hã be ele be yeawɔ tɔtrɔ gãwo. (1 Kor. 6:9, 10) Eƒe dzi ʋãe wòdo le habɔbɔ ma me eye wòtso kadodo si le eya kple eƒe ahiãvi nyɔnua dome la me. Rose xɔ nyɔnyrɔ le ƒe 2009 me, eye le ƒe si kplɔe ɖo me la, eva zu gbesiagbe mɔɖela. Ale si wòlɔ̃ Yehowa kple Eƒe Fiaɖuƒea la nu sẽ wu eƒe ŋutilãa ƒe nudzodzrowo.—Marko 12:29, 30.

7. Nu kae akpe ɖe mía ŋu míayi edzi alɔ̃ Mawu Fiaɖuƒea bliboe?

7 Mía dometɔ geɖe wɔ tɔtrɔ gãwo le míaƒe agbe me hafi va zu Mawu Fiaɖuƒea teviwo. (Rom. 12:2) Ke hã, mese ɖe afi ma o. Ele be míayi edzi anɔ ŋudzɔ be nu sia nu si ate ŋu aɖe míaƒe susu ɖa le Mawu Fiaɖuƒea ŋu, abe didi be ŋutilãmenu geɖe nasu mía si kple gbɔdɔdɔ ƒe dzodzro vɔ̃wo ene, nagafi míaƒe dzi o. (Lod. 4:23; Mat. 5:27-29) Yehowa na nu xɔasi bubu mí si akpe ɖe mía ŋu míaƒe dzi naku ɖe Mawu Fiaɖuƒea ŋu bliboe.

MÍAƑE GBEƑÃÐEÐEDƆ SI XƆA AME ÐE AGBE

8. (a) Nu ka tae apostolo Paulo gblɔ tso míaƒe gbeƒãɖeɖedɔa ŋu be enye ‘nu xɔasi si le anyigoewo me’? (b) Aleke Paulo ɖee fia be yedea asixɔxɔ gbeƒãɖeɖedɔa ŋu?

8 Yesu de dɔ asi na mí be míaɖe gbeƒã Mawu Fiaɖuƒe ŋuti nya nyuia ahafia nu amewo tso eŋu. (Mat. 28:19, 20) Apostolo Paulo nya asixɔxɔ si gbegbe le gbeƒãɖeɖedɔa ŋu. Egblɔ tso nubabla yeyea ƒe subɔsubɔdɔa ŋu be enye ‘nu xɔasi si le anyigoewo me.’ (2 Kor. 4:7; 1 Tim. 1:12) Esi míede blibo o ta la, ɖeko míele abe anyigoewo ene, ke hã, gbedeasi si míeɖea  gbeƒãe la ate ŋu ana míawo ŋutɔwo kple ame siwo ɖoa to mí la nakpɔ agbe mavɔ. Esi Paulo nya esia ta la, egblɔ be: “Nya nyui la tae mewɔa nuwo katã ɖo, ale be nye hã mate ŋu agblɔe na amewo.” (1 Kor. 9:23) Ɛ̃, ale si Paulo lɔ̃ gbeƒãɖeɖedɔae la na wòku kutri le nusrɔ̃lawɔwɔdɔa me. (Xlẽ Romatɔwo 1:14, 15; 2 Timoteo 4:2.) Esia kpe ɖe eŋu wòdo dzi le yometiti sesẽwo gɔ̃ hã me. (1 Tes. 2:2) Aleke míawo hã míate ŋu aɖee afia be míelɔ̃ gbeƒãɖeɖedɔa abe ale si Paulo lɔ̃e ene?

9. Mɔ kawo nue míaɖee afia le be míedea asixɔxɔ gbeƒãɖeɖedɔa ŋu?

9 Mɔ aɖe si nu Paulo ɖee fia le be yedea asixɔxɔ gbeƒãɖeɖedɔa ŋue nye be, enɔ ŋudzɔ be yeawɔ mɔnukpɔkpɔ ɖe sia ɖe ŋu dɔ aɖi ɖase na amewo. Abe ale si apostoloawo kple Kristotɔ gbãtɔwo wɔe ene la, míawo hã míeɖia vomeɖase eye míeɖea gbeƒã le dutoƒo kple tso aƒe me yi aƒe me. (Dɔw. 5:42; 20:20) Le ale si nɔnɔmeawo aɖe mɔe nu la, míedia mɔ siwo dzi míato akeke míaƒe subɔsubɔdɔa ɖe enu, ɖewohĩ to kpekpeɖeŋu mɔɖeɖedɔa alo gbesiagbe mɔɖeɖedɔa wɔwɔ me. Azɔ hã, míate ŋu asrɔ̃ gbe bubu, alo aʋu ayi teƒe bubu le dukɔ si me míele me loo alo duta gɔ̃ hã.—Dɔw. 16:9, 10.

10. Yayra kae Irene kpɔ le esi wòku kutri le nya nyui gbɔgblɔ dɔa me ta?

10 Bu kpɔɖeŋu sia ŋu kpɔ. Irene nye nɔvinyɔnu tre aɖe si le Amerika. Edi vevie be yeaɖe gbeƒã na Russiagbedola siwo nye amedzrowo le dukɔa me. Esi wòdze dɔ sia gɔme le ƒe 1993 me la, gbeƒãɖela 20 pɛ koe nɔ Russiagbedolawo ƒe ƒuƒoƒoa me le New York City. Irene ɖe gbeƒã na Russiagbedolawo kutrikukutɔe ƒe 20 aɖewo. Irene gblɔ be: “Va de asi na fifia la, nyemeɖu tu na Russiagbea o.” Ke hã, Yehowa yra ɖe dɔ si eya kple ame bubuwo wɔ dzonɔamemetɔe la dzi. Fifia, Russiagbedolawo ƒe hame ade ye le New York City. Ame siwo Irene srɔ̃ nu kple la dometɔ wuiatɔ̃ xɔ nyɔnyrɔ. Wo dometɔ aɖewo le subɔsubɔm le Betel, ɖewo nye mɔɖelawo, eye bubuwo hã nye hamemetsitsiwo. Irene gblɔ be, “Ne mebu taɖodzinu bubu siwo yome mate ŋu ati hafi ŋu la, mekpɔnɛ be wo dometɔ aɖeke mate ŋu ana makpɔ dzidzɔ si gbegbe kpɔm mele fifia o.” Ɛ̃, Irene de asixɔxɔ eƒe subɔsubɔdɔa ŋu!

Ðe nèdea asixɔxɔ wò gbeƒãɖeɖedɔa ŋu hedia ɣeyiɣi kpɔa gome le eme kwasiɖa sia kwasiɖa?(Kpɔ memama 11, 12)

11. Ne wole mía yome tim gake míeyi edzi ɖe gbeƒã la, nu nyui kawoe dona tso eme?

11 Ne míedea asixɔxɔ míaƒe gbeƒãɖeɖedɔa ŋu la, míayi edzi anɔ gbeƒã ɖem ne wole mía yome tim gɔ̃ hã, abe ale si apostolo Paulo wɔe ene. (Dɔw. 14:19-22) Le ƒe 1930-awo kple ƒe 1940-awo ƒe gɔmedzedze la, mía nɔvi siwo nɔ Amerika to yometiti sesẽwo me. Ke hã, abe Paulo ene la, womena ta o, ke boŋ woyi edzi nɔ gbeƒã ɖem. Eva hiã be nɔviawo naʋli gome si le mía si be míaɖe gbeƒã la ta zi gbɔ zi geɖe le ʋɔnu. Le ƒe 1943 me esi Nɔviŋutsu Nathan  H. Knorr nɔ nu ƒom tso ʋɔnudrɔ̃nya aɖe si me Amerika ƒe Ʋɔnudrɔ̃ƒe Kɔkɔtɔ tso afia dzɔdzɔe na mía nɔviwo le me ŋu la, egblɔ be: “Miaƒe ʋiʋli vevie tae míeɖu dzi le ʋɔnunyawo me ɖo. Ne ɖe gbeƒãɖelawo meyi edzi ɖe gbeƒã o la, anye ne nya aɖeke maɖo Ʋɔnudrɔ̃ƒe Kɔkɔtɔ la o; gake esi mi, gbeƒãɖelawo, kple nɔvi siwo le xexea me godoo, mieyi dɔa dzi eye miena ta o tae womete ŋu xe mɔ ɖe míaƒe gbeƒãɖeɖedɔa nu o. Esi Aƒetɔ la ƒe amewo nɔ tsitre sesĩe ta la, esia wɔe be ʋɔnudrɔ̃ƒea va tso afia sia na mí mlɔeba.” Ale si mía nɔviwo nɔ tsitre sesĩe nenema ke le dukɔ bubuwo me la wɔe be míeɖu dzi le ʋɔnudrɔ̃nya siawo tɔgbi me. Ɛ̃, lɔlɔ̃ si le mía si na gbeƒãɖeɖedɔa ate ŋu ana míaɖu yometiti dzi.

12. Aleke nèɖoe kplikpaa be yeawɔ subɔsubɔdɔae?

12 Ne míebua gbeƒãɖeɖedɔa be enye nunana xɔasi si tso Yehowa gbɔ la, menye gaƒoƒo agbɔsɔsɔme si míaŋlɔ ɖe míaƒe akɔntagbalẽvia dzie anye nu vevitɔ na mí o. Ke boŋ, míawɔ míaƒe ŋutete ɖe sia ɖe be ‘míaɖi ɖase le nya nyui la ŋu tsitotsito.’ (Dɔw. 20:24; 2 Tim. 4:5) Gake nu kae míafia amewo? Na míalé ŋku ɖe nu xɔasi bubu aɖe si Mawu na mí la ŋu.

NYATEƑE XƆASI SIWO LE MÍAƑE NUDZRAÐOƑE

13, 14. Nu kae nye “kesinɔnudzraɖoƒe” si ŋu Yesu ƒo nu tsoe le Mateo 13:52, eye aleke míaƒo nuwo nu ƒu ɖe eme?

13 Nu xɔasi etɔ̃lia si Mawu na míe nye nyateƒe siwo míeva srɔ̃. Yehowae nye nyateƒe Mawu la. (2 Sam. 7:28; Ps. 31:5) Esi wònye Fofo dɔmenyotɔ ta la, efiaa nyateƒe xɔasiwo ame siwo vɔ̃nɛ. Tso esime míese nyateƒea zi gbãtɔ la, mɔnukpɔkpɔ su mía si míesrɔ̃ nyateƒenya geɖewo tso Mawu ƒe Nya, Biblia, kple habɔbɔa ƒe agbalẽwo, takpekpewo kpakple kpekpe siwo míedena kwasiɖa sia kwasiɖa la me. Le ɣeyiɣi aɖe megbe la, nyateƒe siwo míesrɔ̃, xoxoawo kple yeyeawo siaa, va sɔa gbɔ ɖe nu si Yesu yɔ be míaƒe “kesinɔnudzraɖoƒe” la. (Xlẽ Mateo 13:52.) Yehowa akpe ɖe mía ŋu míaƒo nyateƒe xɔasi yeyewo nu ƒu ɖe míaƒe ‘kesinɔnudzraɖoƒea’ ne míedia wo abe kesinɔnu ɣaɣlawo ene. (Xlẽ Lododowo 2:4-7.) Aleke míate ŋu awɔ esiae?

14 Ele be míalé fɔ ɖe ɖokuisinusɔsrɔ̃ ŋu eye míanɔ Mawu ƒe Nya la kple míaƒe agbalẽwo me kum tsitotsito. Esia akpe ɖe mía ŋu míake ɖe nyateƒe “yeyewo” ŋu. Wonye nyateƒe yeyewo le gɔmesesea nu be wonye nu siwo míenya tsã o. (Yos. 1:8, 9; Ps. 1:2, 3) Wogblɔ le magazine sia ƒe gbãtɔ si wota le July 1879 me be: “Nyateƒe la le abe seƒoƒo sue aɖe si le gbedadaƒo, si aʋatsonufiafia ƒe gbe vɔ̃ɖiwo ƒo xlã hevu tsyɔ kloe, la ene. Hafi nàke ɖe eŋu la, ele be nànɔ edidi dzi. . . . Hafi wòasu asiwò la, ke ele be nàbɔbɔ agbee. Mègana nyateƒea ƒe seƒoƒo ɖeka pɛ nadze ŋuwò o. . . . Ƒo geɖe nu ƒu, di bubuwo kpee.” Ɛ̃, ele be wòanye míaƒe didi vevie be míaƒo nyateƒe xɔasiwo nu ƒu ɖe míaƒe nudzraɖoƒe.

15. Nu ka tae míate ŋu agblɔ be nyateƒe aɖewo nye nyateƒe “xoxowo”? Eye nyateƒe xoxo siwo léa dzi na wò la dometɔ aɖewo ɖe?

15 Míesrɔ̃ nyateƒe xɔasi aɖewo esi míete hadede kple Mawu ƒe amewo. Míate ŋu agblɔ be nyateƒe xɔasi mawo nye nyateƒe “xoxowo,” le susu sia nu be woawoe míesrɔ̃ gbã. Nu kawoe nye nyateƒe siawo dometɔ aɖewo? Le kpɔɖeŋu me, míesrɔ̃e be Yehowae nye mía Wɔla kple Agbenala, eye tameɖoɖo aɖe le esi ɖe amegbetɔwo ŋu. Míesrɔ̃e hã be lɔlɔ̃ ʋã Mawu wòtsɔ Via sa vɔe wònye tafe ɖe mía ta ale be míavo tso nu vɔ̃ kple ku si me. Gakpe ɖe eŋu la, míesrɔ̃e hã be Mawu ƒe Fiaɖuƒea ava ɖe fukpekpewo katã ɖa eye mɔnukpɔkpɔ asu mía si be míanɔ agbe tegbee le ŋutifafa kple dzidzɔ  me le Fiaɖuƒedziɖuɖua te.—Yoh. 3:16; Nyaɖ. 4:11; 21:3, 4.

16. Ne wowɔ asitɔtrɔ le ale si míese nyateƒe aɖe gɔmee ŋu la, nu kae wòle be míawɔ?

16 Ɣeaɖewoɣi la, wotrɔa asi le gɔmesese si le mía si ku ɖe Biblia me nyagblɔɖi aɖe alo Ŋɔŋlɔawo ƒe akpa aɖe ŋu la ŋu. Ne edzɔ alea la, ele be míadi ɣeyiɣi adzro gɔmesese yeyea me nyuie ahade ŋugble le eŋu. (Dɔw. 17:11; 1 Tim. 4:15) Menye vovototo gã siwo le gɔmesese yeyea kple xoxoa dome la gɔme koe míadi be míase o, ke ele be míadze agbagba be míade dzesi vovototo suesuesueawo hã. Ne míewɔe alea la, kakaɖedzi li be nyateƒe yeyea ava kpe ɖe esiwo le míaƒe nudzraɖoƒea xoxo la ŋu. Nu ka tae agbagbadzedze sia ɖea vi?

17, 18. Aleke gbɔgbɔ kɔkɔea ate ŋu akpe ɖe mía ŋu?

17 Yesu gblɔ be Mawu ƒe gbɔgbɔ kɔkɔea ate ŋu aɖo ŋku nu siwo míesrɔ̃ va yi la dzi na mí. (Yoh. 14:25, 26) Aleke esia ate ŋu aɖe vi na mí ame siwo ɖea gbeƒã nya nyuia le dutoƒo? Bu nɔviŋutsu aɖe si ŋkɔe nye Peter ƒe kpɔɖeŋu ŋu kpɔ. Exɔ ƒe 19 le ƒe 1970 me, eye ɖeko wòdze subɔsubɔdɔ gɔme le Betel, le Britain koe nye ema. Gbe ɖeka esime wònɔ gbeƒã ɖem tso aƒe me yi aƒe me la, edo go ŋutsu aɖe, si xɔ abe ƒe 50 ene, si ɖo ge wuyaa. Peter biae be adi be yease Biblia gɔme hã. Nyaa dze ŋutsua kpo, eye wòɖo eŋu nɛ be Yudatɔ rabiwo ƒe aƒe mee nye esia. Esi ŋutsua di be yeado Peter kpɔ ta la, ebiae be, “Vinye, gbe ka mee woŋlɔ Daniel ƒe agbalẽa ɖo?” Peter ɖo eŋu nɛ be, “Woŋlɔ eƒe akpa aɖewo ɖe Aramgbe me.” Peter gblɔ be, “Ewɔ nuku na rabia be menya ŋuɖoɖoa—gake ewɔ nuku na nye ŋutɔ wu eya gɔ̃ hã! Aleke wòdzɔe be menya ŋuɖoɖoa? Esi metrɔ yi aƒe me eye metsa Gbetakpɔxɔ kple Nyɔ! magazine siwo do ɣleti aɖewoe nye ema me la, meke ɖe nyati aɖe si me wogblɔ le be Aramgbe mee woŋlɔ Daniel ƒe agbalẽa ɖo la ŋu.” (Dan. 2:4, etenuŋɔŋlɔ) Ɛ̃, gbɔgbɔ kɔkɔea ate ŋu aɖo ŋku nu siwo míexlẽ va yi kple nu siwo míedzra ɖo ɖe míaƒe kesinɔnudzraɖoƒea dzi na mí.—Luka 12:11, 12; 21:13-15.

18 Ne míede asixɔxɔ nunya si tso Yehowa gbɔ ŋu la, míaƒe dzi aʋã mí be míaƒo nyateƒe xɔasiwo, yeyeawo kple xoxoawo siaa, nu ƒu ɖe míaƒe kesinɔnudzraɖoƒea. Ne míeva lɔ̃ Yehowa ƒe nunya hekpɔ ŋudzedze ɖe eŋu vevie la, míasu te nyuie be míafia nu amewo.

KPƆ WÒ NU XƆASIAWO TA

19. Nu ka tae wòle be míakpɔ nu xɔasi siwo Mawu na mí la ta?

19 Satana kple eƒe xexea le agbagba dzem ɣeawokatãɣi be yewoana míadzudzɔ asixɔxɔdede nu xɔasi siwo Mawu na mí, siwo ŋu míeƒo nu tsoe le nyati sia me, la ŋu. Ne míeɖɔ ŋu ɖo o la, eƒe aɖaŋu vɔ̃wo ate ŋu agblẽ nu le mía ŋu. Dɔ siwo me wobe míakpɔ ga geɖe le, didi be míanɔ agbe si me dzidzeme le, alo nunɔamesiwo fiafia adegbeƒoƒotɔe ate ŋu akplɔ mí atrae. Apostolo Yohanes xlɔ̃ nu mí be xexea kple eƒe nudzodzrowo nu va yina. (1 Yoh. 2:15-17) Eya ta, ele be míaku kutri vevie be míayi edzi ade asixɔxɔ nu xɔasi siwo Mawu na mí la ŋu ahakpɔ wo ta.

20. Nu kae nèɖo kplikpaa be yeawɔ be nàkpɔ nu xɔasi siwo Mawu na wò la ta?

20 Ele be nàlɔ̃ faa aɖe asi le nu sia nu si ana lɔlɔ̃ si le asiwò na Mawu Fiaɖuƒea me nagbɔdzɔ la ŋu. Yi edzi nànɔ gbeƒã ɖem dzonɔamemetɔe, eye mègaɖe mɔ gbeɖe be wò ŋudzedzekpɔkpɔ ɖe míaƒe gbeƒãɖeɖedɔ si xɔa ame ɖe agbe la ŋu nayi to o. Yi edzi nànɔ Biblia me nyateƒea dim kutrikukutɔe. Ne èwɔ esia la, àƒo “[nu xɔasiwo nu ƒu] ɖe dziƒowo, afi si fiafitɔ megogona o, eye agbagblaʋui hã megblẽa nu le o. Elabena afi si wò nu xɔasiwo le la, afi mae wò dzi hã anɔ.”—Luka 12:33, 34.