1, 2. Nu ka dzie wòle be mía dometɔ ɖe sia ɖe naka ɖo? (Kpɔ nɔnɔmetata si le nyati sia ƒe gɔmedzedze.)

ABE ale si míedzro eme le nyati si do ŋgɔ na esia me ene la, Abosam tsɔ nya ɖe Yehowa ŋu be meɖua dzi le mɔ nyuitɔ nu o, eye eme anyo na amegbetɔwo wu ne woawo ŋutɔwo woɖu wo ɖokuiwo dzi. Ðe Satana ƒe nyaa le emea? Tsɔe be amegbetɔwo ate ŋu aɖu wo ɖokuiwo dzi, eye le ɣeyiɣi ma ke me la, woanɔ agbe tegbee. Ðe eme anyo na wo wua? Ke ne anya wɔ be nànɔ ɖokuiwò si Mawu ƒe mɔfiafia manɔmee eye nànɔ agbe tegbee ya ɖe, ɖe esia ana nàkpɔ dzidzɔ wua?

² Ame aɖeke mate ŋu aɖo nya mawo ŋu na wò o. Ele be mía dometɔ ɖe sia ɖe nabu wo ŋu nyuie. Ne míewɔe nenema la, míava kpɔe kɔtɛ be Mawu ɖua dzi le mɔ nyuitɔ nu. Eƒe dziɖuɖue nye nyuitɔ kekeake. Eye ele be míade edzi kple dzi blibo. Biblia ɖo kpe edzi be esɔ be míawɔe alea. Na míadzro nya si Biblia gblɔ ku ɖe nu si tae Yehowae dze be wòanye xexea katã ƒe Dziɖulagã la ƒe kpɔɖeŋu aɖewo me kpɔ.

3. Nu ka tae Yehowa ɖeɖe koe dze be wòanye xexea katã ƒe Dziɖulagã?

³ Yehowa ye dze be wòanye xexea katã ƒe Dziɖulagã, elabena eyae nye Mawu ŋusẽkatãtɔ kple nuwo katã Wɔla. (1 Kron. 29:11; Dɔw. 4:24) Le ŋutega aɖe si ŋu woƒo nu tsoe le Nyaɖeɖefia 4:11 me la, ame 144,000 siwo aɖu fia kple Kristo le dziƒo la le gbɔgblɔm be: “Yehowa, mía Mawu, wòe dze be nàxɔ ŋutikɔkɔe,  bubu kple ŋusẽ, elabena wòe wɔ nuwo katã, eye wò lɔlɔ̃nu ta woli, eye wowɔ wo ɖo.” Ɛ̃, esi wònye be Yehowae wɔ nuwo katã ta la, gome le esi bliboe be wòaɖu ame sia ame si le dziƒo kple anyigba dzi la dzi.

4. Nu ka tae tsitretsitsi ɖe Mawu ƒe dziɖuɖu ŋu nye tiatiawɔblɔɖea ŋu dɔ wɔwɔ le mɔ gbegblẽ nu?

⁴ Yehowae wɔ nu sia nu si le xexea me, ke Satana ya mewɔ naneke o. Eya ta, gome aɖeke mele esi be wòaɖu nuwɔwɔwo katã dzi o. Satana kpakple atsu kple asi gbãtɔa wɔ nu dadatɔe esi wodze aglã ɖe Yehowa ƒe dziɖuɖu ŋu. (Yer. 10:23) Ele eme be tiatiawɔblɔɖe le woamawo si, si fia be ablɔɖe le wo si be woatiae be yewomabɔbɔ ɖe Mawu ƒe dziɖuɖu te o ya. Gake ɖe wokpɔ mɔ awɔe nenema? Ao. Tiatiawɔblɔɖe si le amegbetɔwo si la wɔnɛ be wotea ŋu tsoa nya me nyuie le nu geɖe ŋu gbe sia gbe. Gake esia mefia be wokpɔ mɔ adze aglã ɖe ame si nye wo Wɔla kple Agbenala la ŋu o. Eya ta, eme kɔ ƒãa be tsitretsitsi ɖe Yehowa ŋu nye tiatiawɔblɔɖea ŋu dɔ wɔwɔ le mɔ gbegblẽ nu. Ele be amegbetɔwo katã nabɔbɔ ɖe Yehowa ƒe dziɖuɖu dzɔdzɔea te.

5. Nu ka tae míate ŋu aka ɖe edzi be Mawu ƒe nyametsotsowo nɔa eteƒe ɣesiaɣi?

⁵ Yehowae dze be wòanye Dziɖulagã le susu bubu aɖe hã ta. Eyae nye be, ewɔa eƒe ŋusẽ ŋu dɔ le dzɔdzɔenyenye deblibo me. Eya ŋutɔ gblɔ be: “Nyee nye Yehowa, Ame si nyoa dɔme, drɔ̃a ʋɔnu dzɔdzɔe hewɔa nu dzɔdzɔe le anyigba dzi; elabena nu siawoe dzea ŋunye.” (Yer. 9:24) Yehowa mehiã amegbetɔwo ƒe sewo hafi atso nya me le dzɔdzɔenyenye me o. Ke boŋ, eya gbɔe sedede siwo fiaa nu dzɔdzɔe wɔwɔ ame la tsona, elabena eƒe dzɔdzɔenyenye de blibo. “[Eli eƒe] fiazikpui anyi ɖe dzɔdzɔenyenye kple ʋɔnu dzɔdzɔe dɔdrɔ̃ dzi,” eya ta, míate ŋu aka ɖe edzi be eƒe sewo, mɔfiamewo kple afiatsotsowo katã dzɔ. (Ps. 89:14; 119:128) Satana tsɔ nya ɖe Yehowa ŋu be eƒe dziɖuɖu mele dzɔdzɔe o, evɔ eya ŋutɔ mete ŋu na dzɔdzɔenyenye xɔ aƒe ɖe xexe sia me o.

6. Susu bubu ka tae Yehowae dze aɖu xexea dzi?

⁶ Susu bubu si tae Yehowae dze be wòanye Dziɖulagã ye nye be sidzedze kple nunya si hiã be woaɖu xexea katã dzi nyuie la le esi. Esia dze kɔtɛ le ale si wòna ŋusẽ Via be wòte ŋu da dɔ siwo ɖɔktawo metea ŋu dana o la me. (Mat. 4:23, 24; Marko 5:25-29) Yehowa ya mebua dɔdada mawo be wonye nukunu kura o. Nu si tae nye be, enya ale si tututu míaƒe ametia wɔa dɔe, eye ŋutetea le esi be wòaɖɔ nu sia nu si gblẽ le eŋu la ɖo. Nenema kee ŋutete le esi hã be wòafɔ ame kukuwo ɖe tsitre eye wòaxe mɔ ɖe dzɔdzɔmefɔkuwo hã nu.

7. Aleke gbegbee Yehowa ƒe nunya ƒo xexe si le Satana ƒe ŋusẽ te la ƒe nunya tae?

⁷ Xexe si le Satana ƒe ŋusẽ te la le agbagba dzem be yewoakpɔ ta na masɔmasɔ siwo le edzi yim le dukɔ vovovowo me kpakple dukɔwo dome masɔmasɔwo, gake gbeɖegbeɖea koe. Yehowa ɖeɖe ko sie nunya le be wòahe ŋutifafa ava xexea me. (Yes. 2:3, 4; 54:13) Nu siwo míesrɔ̃na tso Yehowa ƒe nunya kple sidzedze ŋu la nana míesena le mía ɖokui me abe apostolo Paulo ene, esi gbɔgbɔ ʋãe wòŋlɔ bena: “Oo, Mawu ƒe kesinɔnuwo kple nunya kpakple sidzedze me goglo loo! Aleke eƒe ʋɔnudɔdrɔ̃wo me dzodzro tsitotsito meli o, eye eƒe mɔwo mele nyanya me o ale!”—Rom. 11:33.

8. Nu kae wɔa dɔ ɖe dziwò le ale si Yehowa ɖua dzii ŋu?

⁸ Abe ale si míekpɔe va yi ene la, Biblia na eme kɔ ƒãa be Yehowae dze be wòaɖu  dzi. Eɖe nu si tae wònye Dziɖula nyuitɔ kekeake la me. Susu ɖekae nye be eɖua dzi le lɔlɔ̃ me. Vavãe, ale si wòwɔa eƒe dziɖulanyenye ŋu dɔe la wɔa dɔ ɖe mía dzi ale gbegbe. Enye “nublanuikpɔla kple veveseɖeamenula, ame si medoa dziku kabakaba o, eye eƒe lɔlɔ̃ si nu metsina o kple eƒe nuteƒewɔwɔ sɔ gbɔ.” (2 Mose 34:6) Mawu dea bubu amegbetɔwo ŋu le ale si wòwɔa nu ɖe wo ŋui me. Eléa be na mí wu ale si míawo ŋutɔwo míate ŋui gɔ̃ hã. Abosam tso Yehowa nu be etea nu nyui esubɔla wɔnuteƒewo, gake aʋatsoe nya ma nye. Yehowa tsɔ Via gɔ̃ hã na ɖe mía ta ale be míate ŋu anɔ agbe tegbee!—Xlẽ Psalmo 84:11; Romatɔwo 8:32.

9. Aleke míewɔ nya be Mawu tsɔ ɖe le eme na ame ɖekaɖekawo hã?

⁹ Yehowa lɔ̃ eƒe amewo katã abe ƒuƒoƒo ene. Ke hã, etsɔ ɖe le eme na wo dometɔ ɖe sia ɖe hã. Le kpɔɖeŋu me, bu ale si Yehowa wɔ nu kple eƒe dukɔa le ƒe alafa etɔ̃ siwo me wòtia ʋɔnudrɔ̃lawo na wo be woaɖe wo tso ame siwo nɔ Israel dukɔa tem ɖe anyi la si me ŋu kpɔ. Le ɣeyiɣi sesẽ mawo me la, egatsɔa ɖe le eme na ame ɖekaɖekawo hã kokoko. Wo dometɔ ɖekae nye Rut. Menye Israel-vie wònye o, eye etsɔ nu geɖe sa vɔe ale be yeasubɔ Yehowa. Yehowa yra Rut wòkpɔ ŋutsu ɖe, eye wòdzi viŋutsu ɖeka hã. Gake mese ɖe afi ma o. Ne wova fɔ Rut ɖe tsitre la, akpɔe be ye viŋutsua ƒe dzidzimevie Mesia la nye. Wò ya bu ale si gbegbe wòawɔ dɔ ɖe edzii ne eva kpɔe be woŋlɔ yeƒe ŋutinyaa ɖe Biblia-gbalẽwo dometɔ ɖeka si wona ŋkɔe be Rut la me ŋu kpɔ!—Rut 4:13; Mat. 1:5, 16.

10. Nu ka tae míate ŋu agblɔ be Yehowa ƒe dziɖuɖu metea ame ɖe anyi o?

¹⁰ Yehowa ƒe dziɖuɖu metea ame ɖe anyi o, eye eƒe nya me mesẽ kpaɖii hã o. Ke boŋ, enaa ablɔɖe eteviwo eye wònana wokpɔa dzidzɔ. (2 Kor. 3:17) David ɖe esia gblɔ ale: “Gãnyenye kple atsyɔ̃ɖoɖo le [Mawu ŋkume], ŋusẽ kple dzidzɔ le enɔƒe.” (1 Kron. 16:7, 27) Nenema kee hakpala Etan hã ŋlɔ bena: “Dzidzɔtɔwoe nye dukɔ si nya aseyetsotso. Oo Yehowa, wozɔna le wò mo ƒe kekeli me. Wotsoa aseye le wò ŋkɔ me ŋkeke blibo la, eye wodoa wo ɖe dzi le wò dzɔdzɔenyenye me.”—Ps. 89:15, 16.

11. Aleke míawɔ aka ɖe edzi bliboe be Yehowa ƒe dziɖuɖue nye nyuitɔ kekeake?

¹¹ Ne míedea ŋugble le Yehowa ƒe nyuiwɔwɔ ŋu edziedzi la, esia ate ŋu akpe ɖe mía ŋu míaka ɖe edzi bliboe be eƒe dziɖuɖue nye nyuitɔ kekeake. Esia awɔe be míava se le mía ɖokui me abe hakpalaa ene esi wògblɔ be: “Ŋkeke ɖeka le wò xɔxɔnu nyo wu ŋkeke akpe ɖeka le teƒe bubu!” (Ps. 84:10) Eƒe nyaa nye nyateƒe matrɔmatrɔ! Esi wònye be Yehowa lɔ̃ mí eye wònye mía Wɔla ta la, enya nu si míehiã be míakpɔ dzidzɔ la nyuie, eye enaa nu mawo mí le agbɔsɔsɔ me. Nu sia nu si wòbia tso mía si la dzi wɔwɔ ɖea vi na mí eye wònana míekpɔa dzidzɔ geɖe, ne esia bia be míatsɔ nanewo asa vɔe gɔ̃ hã.—Xlẽ Yesaya 48:17.

12. Susu vevi ka koŋ tae míedea Yehowa ƒe dziɖulanyenye dzi?

¹² Biblia ɖee fia be le Kristo Ƒe Ƒe Akpe Ðeka Dziɖuɖua megbe la, ame aɖewo adze aglã ɖe Yehowa ƒe dziɖuɖu ŋu. (Nyaɖ. 20:7, 8) Nu ka gɔ̃e ana woawɔ nu sia? Ɣemaɣi la, woaɖe Abosam le gaxɔ me, eye ɖikeke mele eme o be adi be yeable amewo nu woadi wo ɖokui tɔ. Aleae wòwɔnɛ tso gbe aɖe gbe ke. Ðewohĩ adze agbagba be yeable wo nu woasusui be ne yewomeɖo to Yehowa o hã, yewoate ŋu anɔ agbe tegbee. Gake mate ŋu anɔ nenema gbeɖe o. Azɔ biabia lae nye be: Ðe míaxɔ eƒe alakpanya ma dzi asea? Ne míelɔ̃ Yehowa hesubɔnɛ le esi wòwɔa nyui na mí kple esi wònye xexea katã ƒe Dziɖulagã si dze ta la, míagbe Abosam ƒe susu vɔ̃ ma. Mímadi  gbeɖe be míanɔ agbe Yehowa ƒe dziɖuɖu dzɔdzɔe si me lɔlɔ̃ le la manɔmee o.

13. Ne míesrɔ̃a Mawu la, aleke esia ɖenɛ fiana be míede eyama dzi?

¹³ Edze be míade Yehowa ƒe dziɖulanyenye dzi kple dzi blibo. Abe ale si míekpɔe ene la, eyae dze be wòaɖu dzi, eye eɖua dzi le mɔ nyuitɔ kekeake nu. Ne míelé fɔmaɖimaɖi me ɖe asi hesubɔa Mawu nuteƒewɔwɔtɔe la, míeɖenɛ fiana be míede Yehowa ƒe dziɖulanyenye dzi. Mɔ bubu ka nue míagate ŋu aɖe esia afia le? Míagate ŋu awɔ esia ne míesrɔ̃a Yehowa le míaƒe nuwɔnawo me. Ne míekpɔa nyawo gbɔ abe ale si Yehowa awɔe ene la, míeɖenɛ fiana be míelɔ̃ eƒe dziɖuɖu eye míedea edzi.—Xlẽ Efesotɔwo 5:1, 2.

14. Aleke hamemetsitsiwo kple ƒome ƒe tawo ate ŋu asrɔ̃ Yehowa?

¹⁴ Míesrɔ̃e le Biblia me be Yehowa wɔa eƒe ŋusẽ ŋu dɔ le lɔlɔ̃ me. Esia ta, ƒome ƒe tawo kple hamemetsitsi siwo lɔ̃ Yehowa ƒe dziɖuɖu la mana woƒe nya me nasẽ kpaɖii o. Woasrɔ̃ Yehowa ƒe kpɔɖeŋu boŋ. Nenema tututue Paulo srɔ̃ Mawu kple Viae. (1 Kor. 11:1) Paulo medo ŋukpe amewo alo zi wo dzi be woawɔ nu si le eteƒe o. Ke boŋ, ewɔ nu si aʋã wo be woalɔ̃ faa awɔ nu si le eteƒe. (Rom. 12:1; Ef. 4:1; Filem. 8-10) Aleae Yehowa wɔa nui. Eya ta, nenemae wòle be mí ame siwo katã lɔ̃ eƒe dziɖuɖu hedea edzi la nawɔ nui.

15. Ne míedea bubu tanyenye ƒe ɖoɖoa ŋu la, aleke wòɖenɛ fiana be míede Yehowa ƒe dziɖuɖu dzi?

¹⁵ Aleke míewɔa nu ɖe ƒome ƒe tawo kple ame siwo le agbanɔamedzinɔƒewo ŋui? Ne míedea bubu wo ŋu hewɔa nu kpli wo aduadu la, míeɖenɛ fiana be míede Yehowa ƒe dziɖulanyenye dzi. Ne mímese nyametsotso aɖe gɔme nyuie o alo mewɔ ɖeka kple míaƒe susu o gɔ̃ hã la, míelɔ̃na faa wɔna ɖe teokrasiɖoɖowo dzi. Esia to vovo sãsãsã na ale si xexea wɔa nui ya, gake aleae ame siwo lɔ̃ Yehowa ƒe dziɖuɖu la wɔa nui. (Ef.  5:22, 23; 6:1-3; Heb. 13:17) Esia wɔwɔ ɖea vi na mí, elabe Mawu di vevie be eme nanyo na mí.

16. Aleke ame siwo dea Mawu ƒe dziɖulanyenye dzi la tsoa nya me le nya siwo ka woawo ŋutɔwo la ŋu?

¹⁶ Míeɖenɛ fiana be míedea Mawu ƒe dziɖulanyenye dzi le ale si míetsoa nya me le nya siwo ka míawo ŋutɔwo ŋu hã me. Yehowa medea sewo ku ɖe nu sia nu si míewɔna le agbe me ŋu o. Ke boŋ, enaa mɔfiame siwo kpena ɖe mía ŋu míenyaa eƒe susu le nuwo ŋu. Le kpɔɖeŋu me, eƒe sededewo megblɔ awu siwo tututu wòle be Kristotɔwo nado kple esiwo mele be woado o. Ke boŋ, ena míenya be yedi be míatia awu ƒe atsyãwo le ŋuɖɔɖo me eye míaƒe dzadzraɖo nanye esi dze Kristotɔwo. (1 Tim. 2:9, 10) Edi vevie hã be míagana míaƒe tiatiawo le go sia me nazu nukikli na ame bubuwo loo alo aɖia wo nu o. (1 Kor. 10:31-33) Ne míeɖea mɔ Yehowa ƒe susuwo kple eƒe didiwo koŋ fiaa mɔ míaƒe afɔɖeɖewo, ke menye míawo ŋutɔwo míaƒe didiwo ko o la, míeɖenɛ fiana be míelɔ̃ eƒe dziɖuɖu eye míede edzi.

17, 18. Mɔ siwo nu srɔ̃tɔwo ate ŋu aɖee afia le be yewode Yehowa ƒe dziɖulanyenye dzi la dometɔ aɖewo ɖe?

¹⁷ Bu mɔ ɖeka aɖe si dzi Kristotɔ srɔ̃tɔwo ate ŋu ade Yehowa ƒe dziɖulanyenye dzi le ŋu kpɔ. Le kpɔɖeŋu me, tsɔe be kuxiwo va le srɔ̃ɖeɖea me wu ale si míekpɔ mɔ nɛ. Alo, srɔ̃ɖeɖea meva le abe ale si míesusui ene o. Ðe manyo be míadi ɣeyiɣi ade ŋugble le ale si Yehowa ŋutɔ hã wɔ nu kple blema Israel la ŋu oa? Yehowa gblɔ le kpɔɖeŋunyagbɔgblɔ nu be yenye blemadukɔ ma ƒe srɔ̃ŋutsu. (Yes. 54:5; 62:4) Kadodo si nɔ eya kple dukɔ ma dome la nɔ abe srɔ̃ɖeɖe si me kuxi sesẽwo nɔ ene. Ke hã, Yehowa metsɔ dzitsitsi ɖe ta le eme o. Ekpɔ nublanui na dukɔ la zi gbɔ zi geɖe eye wòwɔ nu, si wòbla kpli wo la dzi nuteƒewɔwɔtɔe. (Xlẽ Psalmo 106:43-45.) Ðe lɔlɔ̃ vavã si Yehowa ɖe fia le nya sia me la menana eƒe nu léa dzi na mí oa?

¹⁸ Srɔ̃tɔ siwo lɔ̃ Yehowa ƒe mɔwo la srɔ̃a eyama le go sia me. Womenɔa mɔnu siwo mewɔ ɖeka kple Ŋɔŋlɔawo o dim be yewoaɖe ta le srɔ̃ɖeɖe si me kuxi le me o. Wonyae be Yehowa bla yewo ɖekae eye edi be ‘yewoaku ɖe’ yewo nɔewo ŋu. Nu ɖeka kolia si ate ŋu awɔe be ame aɖe nagbe srɔ̃a eye wòavo aɖe ame bubu wòasɔ le Ŋɔŋlɔawo nue nye ne srɔ̃a wɔ ahasi. (Mat. 19:5, 6, 9) Ne srɔ̃tɔwo le woƒe ŋutete katã wɔm be yewoana yewoƒe srɔ̃ɖeɖea nakpɔ dzidzedze la, efia be wodea Yehowa ƒe dziɖuɖu dzɔdzɔea dzi.

19. Nu kae wòle be míawɔ ne míeda vo?

¹⁹ Esi míenye ame madeblibowo ta la, míewɔa nu siwo medzea Yehowa ŋu o ɣeaɖewoɣi. Esia le nyanya na Yehowa, eya tae wòto Kristo dzi wɔ tafe ƒe ɖoɖoa na mí lɔlɔ̃tɔe. Eya ta, ne míeda vo le go aɖewo me la, ele be míabia Yehowa be wòatsɔ míaƒe vodada ake mí. (1 Yoh. 2:1, 2) Esia megbe la, le esi míanɔ fɔ bum mía ɖokui teƒe la, anyo be míasrɔ̃ nu tso vodada si míewɔ la me boŋ. Ne míeyi edzi nɔ Yehowa ŋu kplikplikpli la, atsɔ míaƒe vodada ake mí ahakpe ɖe mía ŋu be ƒomedodo nyui nanɔ mía kplii dome eye míasu te be míaƒo asa na vodada ma dzidzedzetɔe ɣebubuɣi.—Ps. 103:3.

20. Nu ka tae wòle be míade Yehowa ƒe dziɖulanyenye dzi fifia?

²⁰ Le xexe yeyea me la, ame sia ame anɔ Yehowa ƒe dziɖuɖu te eye woasrɔ̃ nu tso eƒe mɔ dzɔdzɔeawo ŋu. (Yes. 11:9) Gake fifia gɔ̃ hã, míele nu geɖe srɔ̃m. Eye eteƒe madidi o, ame aɖeke magatsɔ nya ɖe Mawu ƒe dziɖuɖu ŋu azɔ o. Fifiae nye ɣeyiɣi si wòle be míato míaƒe nuteƒewɔwɔ, subɔsubɔdɔa wɔwɔ kple agbagbadzedze vevie be míasrɔ̃ eyama dzi aɖee afia be míede eƒe dziɖulanyenye dzi.