Dzo kpo yi emenuwo dzi

Dzo kpo yi emenuawo dzi

Yehowa Tɔ Míenye

Yehowa Tɔ Míenye

“Dzidzɔtɔwoe nye dukɔ si ƒe Mawu Yehowa nye, dukɔ si wòtia be wòanye ye ŋutɔ ye tɔ.”—PS. 33:12.

HADZIDZI: 40, 50

1. Nu ka tae gome le Yehowa si be wòagblɔ be ye tɔe nu sia nu nye? (Kpɔ foto si le nyati sia ƒe gɔmedzedze.)

YEHOWA tɔe nye nu sia nu! Etɔe nye “dziƒowo, ɛ̃, dziƒowo ƒe dziƒowo, kple anyigba la kpakple edzinuwo katã.” (5 Mose 10:14; Nyaɖ. 4:11) Esi wònye be Yehowae wɔ amegbetɔwo ta la, etɔe mí katã míenye. (Ps. 100:3) Ke hã, le amegbetɔwo ƒe ŋutinya katã me la, Mawu tia ame aɖewo koŋ be woanye ye tɔ le mɔ tɔxɛ nu.

2. Ame kawo ŋue woƒo nu tsoe le Biblia me be wonye Yehowa tɔ le mɔ tɔxɛ nu?

2 Le kpɔɖeŋu me, Psalmo 135 lia gblɔ tso Yehowa subɔla wɔnuteƒe siwo nɔ anyi le blema Israel la ŋu be wonye ‘eƒe nunɔamesi tɔxɛ.’ (Ps. 135:4) Wogblɔe ɖi le Hosea ƒe agbalẽa hã me be ame siwo menye Israel-viwo o la dometɔ aɖewo ava nye Yehowa ƒe dukɔa me tɔwo. (Hos. 2:23) Hosea ƒe nyagblɔɖia va eme esime Yehowa tia ame siwo menye Yudatɔwo o la kpe ɖe ame siwo aɖu fia kple Kristo la ŋu. (Dɔw. 10:45; Rom. 9:23-26) “Dukɔ kɔkɔe” sia nye Yehowa ƒe “nunɔamesi tɔxɛ” le gɔmesese ɖedzesi aɖe nu, le mɔ sia nu be wotsɔ gbɔgbɔ kɔkɔe si ami na wo hetia wo be woava nɔ agbe le dziƒo. (1 Pet. 2:9, 10) Ke Kristotɔ wɔnuteƒe akpa gãtɔ siwo le mɔ kpɔm be yewoanɔ agbe mavɔ le anyigba dzi ya ɖe? Yehowa yɔa woawo hã be wonye  yeƒe “amewo” kple yeƒe “ame tiatiawo.”—Yes. 65:22.

3. (a) Ame kawoe le ƒomedodo tɔxɛ me kple Yehowa egbea? (b) Nu ka mee míadzro le nyati sia me?

3 Egbea, “alẽha sue” la, si me tɔwo si dziƒoyiyi ƒe mɔkpɔkpɔ le, kple ‘alẽ bubuawo,’ siwo si anyigba dzi nɔnɔ ƒe mɔkpɔkpɔ le la katã ƒo ƒu nye “alẽha ɖeka” si Yehowa buna be wonye yeƒe amewo. (Luka 12:32; Yoh. 10:16) Enye míaƒe didi vevie be míaɖee afia Yehowa be míekpɔ ŋudzedze ɖe ƒomedodo tɔxɛ si va le mía kplii dome ŋu. Le nyati sia me la, míadzro mɔ vovovo siwo dzi míate ŋu ato aɖee afia Yehowa be míekpɔ ŋudzedze ɖe bubu tɔxɛ si wòde mía ŋuti la ŋu me.

MÍETSƆ MÍA ÐOKUI ÐE ADZƆGBE NA YEHOWA

4. Aleke míate ŋu ada akpe na Yehowa ɖe mɔnukpɔkpɔ tɔxɛ si wòna mí be míeva le ƒomedodo me kplii la ta, eye aleke Yesu wɔ nu sia tɔgbi?

4 Ne míetsɔ mía ɖokui ɖe adzɔgbe na Yehowa tso dzi blibo me la, míetoa esia me daa akpe nɛ ɖe mɔnukpɔkpɔ tɔxɛ si wòna mí be míeva le ƒomedodo me kplii la ta. Ne míexɔ nyɔnyrɔ la, míetoa esia me nana amewo nyana be míezu Yehowa tɔ eye míedi be míaɖo to eyama. (Heb. 12:9) Yesu hã wɔ nu sia tɔgbi le eƒe nyɔnyrɔxɔɣi. Ðeko wònɔ abe ɖe wògblɔ na Yehowa be, “Oo nye Mawu, medi be mawɔ wò lɔlɔ̃nu” ene. (Ps. 40:7, 8, etenuŋɔŋlɔ) Yesu tsɔ eɖokui na Yehowa be yeawɔ eƒe lɔlɔ̃nu, togbɔ be enye dukɔ aɖe si tsɔ eɖokui ɖe adzɔgbe na Yehowa xoxo la me tɔ hã.

5, 6. (a) Nu kae Yehowa wɔ esime wonyrɔ Yesu? (b) Wɔ nu si tae Yehowa kpɔa dzidzɔ ne míetsɔ mía ɖokui ɖe adzɔgbe nɛ la ƒe kpɔɖeŋu.

5 Nu kae Yehowa wɔ esime wonyrɔ Yesu? Biblia gblɔ be: “Esi wonyrɔ Yesu vɔ la, efɔ tso tsia me enumake; eye kpɔ ɖa, dziƒowo nu ʋu, eye wòkpɔ Mawu ƒe gbɔgbɔ la wòle ɖiɖim ɖe edzi abe ahɔnɛ ene. Kpɔ ɖa! Gbe aɖe hã ɖi tso dziƒowo gblɔ be: ‘Ame siae nye Vinye si gbɔ nyemelɔ̃a nu le o, si ƒe nu dzea ŋunye.’” (Mat. 3:16, 17) Togbɔ be Yesu nye Yehowa tɔ xoxo hã la, Yehowa kpɔ dzidzɔ esi wòkpɔe be ye Via lɔ̃ faa be Yeƒe lɔlɔ̃nu koe yeawɔ. Nenema kee Yehowa kpɔa dzidzɔ ne míetsɔ mía ɖokui ɖe adzɔgbe nɛ, eye ayra mí.—Ps. 149:4.

6 Le kpɔɖeŋu me, tsɔe be ŋutsu aɖe do seƒoƒo nyui geɖe ɖe eƒe abɔ me. Gbe ɖeka, vianyɔnuvi sue aɖe gbe seƒoƒoawo dometɔ ɖeka hetsɔe nɛ. Ðe menye ŋutsua tɔe nye seƒoƒoa oa? Ðe susu le eme be ɖevi la natsɔ nu si nye fofoa tɔ xoxo la anaea? Vifofo lɔ̃ame mabu biabia siawo tɔgbi ŋu o. Ke boŋ axɔ nunana sia si ɖe ale si vianyɔnuvia lɔ̃e fia la kple dzidzɔ. Ade asixɔxɔ seƒoƒo ɖeka ma si via tsɔ nɛ la ŋu wu seƒoƒo siwo katã le eƒe abɔa me. Nenema kee Yehowa kpɔa dzidzɔ ne míelɔ̃ faa tsɔ mía ɖokui ɖe adzɔgbe nɛ be míasubɔ eya ɖeka ko.—2 Mose 34:14.

7. Nya kae Malaki gblɔ si ɖe ale si Yehowa sena le eɖokui me tso ame siwo subɔnɛ tso dzi me faa ŋu la fia?

7 Xlẽ Malaki 3:16. Ne mèkpɔ ɖe adzɔgbe hexɔ nyɔnyrɔ haɖe o la, ke bu nu si tae afɔɖeɖe sia le vevie la ŋu. Ele eme be Yehowa tɔe nènye tso esime wodzi wò abe ale si wòle le amegbetɔwo katã gome ene ya. Ke hã, bu ale si gbegbe Yehowa akpɔ dzidzɔe ne ekpɔe be èlɔ̃ ɖe edzi be eyae nye xexea katã dzi ɖula eye nètsɔ ɖokuiwò ɖe adzɔgbe nɛ be yeawɔ eƒe lɔlɔ̃nu ŋu kpɔ. (Lod. 23:15) Yehowa nya ame siwo subɔnɛ tso dzi me faa, eye eŋlɔ woƒe ŋkɔwo ɖe eƒe “ŋkuɖodzigbalẽ” me.

8, 9. Nu kae Yehowa di tso ame siwo ƒe ŋkɔwo wòŋlɔ ɖe eƒe “ŋkuɖodzigbalẽ” me la si?

8 Ne míedi be míaƒe ŋkɔ nakpɔtɔ anɔ Yehowa ƒe ‘ŋkuɖodzigbalẽa’ me la,  nanewo li wòle be míawɔ. Malaki gblɔe eme kɔ ƒãa be ele be míanye ame siwo ‘vɔ̃a Yehowa kple ame siwo dea ŋugble le eƒe ŋkɔa ŋu.’ Ne míesubɔ ame bubu alo nu bubu aɖe la, Yehowa aɖe míaƒe ŋkɔ ɖa le eƒe agbegbalẽa me.—2 Mose 32:33; Ps. 69:28.

9 Eya ta, míaƒe adzɔgbeɖeɖe na Yehowa bia nu geɖe wu ŋugbedodo nɛ be míawɔ eƒe lɔlɔ̃nu ahaxɔ nyɔnyrɔ ko. Afɔɖeɖe siawo nye nu siwo míewɔna zi ɖeka ko. Gake Yehowa ƒe akpa dzi nɔnɔ bia be míayi edzi anɔ to ɖom eyama gbe sia gbe, zi ale si míele agbe.—1 Pet. 4:1, 2.

MÍETSRIA XEXEA ƑE NUDZODZROWO

10. Vovototo kae wòle be wòadze ƒãa le ame siwo subɔa Yehowa kple ame siwo mesubɔnɛ o dome?

10 Le nyati si do ŋgɔ na esia me la, míedzro Biblia me ŋutinya siwo ku ɖe Kain, Salomo kple Israel-viwo ŋu la me. Wo katã wogblɔ be yewonɔ Yehowa subɔm, gake womeku ɖe Yehowa ŋu bliboe o. Kpɔɖeŋu mawo ɖee fia kɔtɛ be ele be ame siwo nye Yehowa tɔwo ŋutɔŋutɔ la nalé ɖe nu si nyo la ŋu ahalé fu nu vɔ̃ɖi. (Rom. 12:9) Esɔ nyuie be esi Malaki ƒo nu tso “ŋkuɖodzigbalẽ” la ŋu vɔ la, Yehowa ƒo nu tso “vovototo si le ame dzɔdzɔe kple ame vɔ̃ɖi dome, kple vovototo si le ame si subɔa Mawu kple ame si mesubɔnɛ o la dome” ŋu.—Mal. 3:18.

11. Nu ka tae wòle be wòadze ƒãa na amewo be Yehowa ɖeka koe míesubɔna?

11 Mɔ bubu si dzi míate ŋu ato aɖee afia be míekpɔ ŋudzedze ɖe mɔnukpɔkpɔ tɔxɛ si Yehowa na mí be míele eƒe amewo domee nye esi: Ele be míaƒe ŋgɔgbedede “nadze ƒãa na amewo katã.” (1 Tim. 4:15; Mat. 5:16) Bia ɖokuiwò be: ‘Ðe amewo kpɔnɛ dzea sii be Yehowa ƒe akpa dzie melea? Ðe media mɔnukpɔkpɔ siwo ŋu dɔ mawɔ atsɔ ana amewo nanya be Yehowa Ðasefoe menyea?’ Kpɔ ale si gbegbe wòate ɖe Yehowa dzii be, esi wòxɔ mí de eƒe amewo dome vɔ la, ekpea ŋu na mí be míagblɔ na amewo be Yehowa Ðasefoe míenye ɖa!—Ps. 119:46; xlẽ Marko 8:38.

Ðe wò agbenɔnɔ nana wòdzena ƒãa be Yehowa Ðasefoe nènyea? (Kpɔ memama 12, 13 lia)

12, 13. Aleke nɔvi aɖewo na wòsesẽna na amewo be woakpɔe be Yehowa Ðasefowoe yewonye?

12 Nublanuitɔe la, nɔvi aɖewo ƒe nuwɔna  na wòsesẽna na amewo be woakpɔe adze sii nenye be ‘wosubɔa Yehowa loo alo womesubɔnɛ o,’ le esi woɖea ‘xexea ƒe gbɔgbɔ’ fiana ta. (1 Kor. 2:12) Gbɔgbɔ sia nana amewo ɖia kɔ na ‘ŋutilã ƒe nudzodzro’ ɖe sia ɖe. (Ef. 2:3) Le kpɔɖeŋu me, togbɔ be woɖo aɖaŋu na mí enuenu be míado awu siwo sɔ ahadzra ɖo le ŋuɖɔɖo me hã la, nɔvi aɖewo gakpɔtɔ le awu maɖɔʋu siwo mesɔ o la dodo dzi. Wodoa awu siwo miaa wo kpaɖii kple esiwo me woƒe teƒeteƒewo dzena le, eye wodoa wo yia Kristotɔwo ƒe kpekpewo gɔ̃ hã. Alo wova lɔ̃ ɖakpakpa kple ɖawɔwɔ ƒe atsyã siwo gbɔ eme. (1 Tim. 2:9, 10) Esia wɔnɛ be, esesẽna na amewo be woanya nenye be Yehowa subɔlawoe wonye loo alo xexea me tɔwoe wonye.—Yak. 4:4.

13 Ðasefo aɖewo hã ƒe agbenɔnɔ ɖenɛ fiana be wometsri xexea ƒe nɔnɔme keŋkeŋ o. Ale si woɖua ɣe hewɔa nu le kplɔ̃ɖoƒewo la gbɔ eme eye medze Kristotɔwo o. Wotsɔa woƒe foto siwo mesɔ o la dana ɖe Internet dzi hahoo kadoƒewo eye woŋlɔa nya siwo medze gbɔgbɔmemewo o la ɖe afi ma. Anɔ eme be womehe to na wo le Kristo hamea me be wowɔ nu vɔ̃ si nye ŋkubiãnya o, ke hã, woƒe agbe maɖɔʋu nɔnɔa ate ŋu akpɔ ŋusẽ gbegblẽ ɖe ame siwo le agbagba dzem be yewoana yewoƒe agbenɔnɔ nanyo le Yehowa ƒe amewo dome la dzi.—Xlẽ 1 Petro 2:11, 12.

Mègana ame siwo mele Yehowa ƒe akpa dzi bliboe o ƒe nuwɔna nakpɔ ŋusẽ ɖe dziwò o

14. Nu kae wòle vevie be míawɔ ne míedi be míakpɔ ƒomedodo si le mía kple Yehowa dome ta?

14 Xexea le “ŋutilã ƒe nudzodzro kple ŋkuwo ƒe nudzodzro kple ame ƒe nunɔamesiwo fiafia adegbeƒoƒotɔe” dom ɖe ŋgɔ ŋkubiãtɔe. (1 Yoh. 2:16) Ke hã, esi míenye Yehowa tɔ ta la, woxlɔ̃ nu mí be “míatsri mawumavɔmavɔ̃ kple xexea me nudzodzrowo, eye be míanɔ agbe le ŋuɖɔɖo kple dzɔdzɔenyenye kpakple ɖokuitsɔtsɔ na Mawu me le fifi nuɖoanyi sia me.” (Tito 2:12) Ele be míaƒe nuɖuɖu kple nunono, awudodo kple dzadzraɖo, ale si míewɔa dɔe kple nu sia nu si míewɔna nana amewo nakpɔe be Yehowa tɔe míenye.—Xlẽ 1 Korintotɔwo 10:31, 32.

 ‘MÍELƆ̃A MÍA NƆEWO VEVIE’

15. Nu ka tae wòle be míawɔ nu ɖe mía nɔvi Kristotɔwo ŋu le dɔmenyonyo kple lɔlɔ̃ me?

15 Ne míedea asixɔxɔ xɔlɔ̃wɔwɔ ƒe kadodo tɔxɛ si le mía kple Yehowa dome ŋu la, esia dzena le ale si míewɔa nu ɖe mía nɔvi Kristotɔwo ŋu la me. Yehowa tɔe woawo hã nye. Ne nyateƒenya sia nɔa susu me na mí ɣeawokatãɣi la, míawɔ nu ɖe mía nɔviŋutsu kple nɔvinyɔnuwo ŋu le dɔmenyonyo kple lɔlɔ̃ me ɣesiaɣi. (1 Tes. 5:15) Yesu gblɔ na eyomedzelawo be: “Esia me amewo katã anyae le be nye nusrɔ̃lawo mienye, ne lɔlɔ̃ le mia dome.”—Yoh. 13:35.

16. Nufiame kae le Mose ƒe Sea me na mí ku ɖe ale si Yehowa lɔ̃a eƒe amewoe ŋu?

16 Bu ale si wòle be míawɔ nu ɖe mía nɔewo ŋu le hamea me la ƒe kpɔɖeŋu sia ŋu kpɔ. Nu siwo wozãna le Yehowa ƒe gbedoxɔa me la nye esiwo woɖe ɖe vovo na subɔsubɔ dzadzɛa ŋuti dɔwo wɔwɔ. Wogblɔ ale si wòle be woalé be na nu siawoe la ɖe Mose ƒe Sea me tsitotsito, eye wowua ame sia ame si da ɖoɖo mawo dzi. (4 Mose 1:50, 51) Ne Yehowa kpɔ nu siwo me agbe mele o, siwo wozãna le eƒe subɔsubɔdɔwo me, la ta alea gbegbe la, aleke gbegbee wòakpɔ esubɔla ɖeadzɔgbe wɔnuteƒe siwo eya ŋutɔ tia be woanye yeƒe amewo la tae! Yehowa gblɔ na eƒe amewo gbe ɖeka be: “Ame si ka asi mia ŋu la ka asi nye gadaglamakui ŋu.”—Zak. 2:8.

17. Nya kae Yehowa ‘ɖoa to sena’?

17 Eɖe dzesi ŋutɔ be Malaki gblɔ tso Yehowa ŋu be ‘eɖoa to sena’ nya siwo esubɔlawo gblɔna na wo nɔewo. (Mal. 3:16) Vavãe, Yehowa “nya ame siwo nye etɔwo.” (2 Tim. 2:19) Enya nu sia nu si míewɔna kple nya sia nya si míegblɔna. (Heb. 4:13) Ne míewɔ nu ɖe mía nɔewo ŋu dɔmenyotɔe o la, Yehowa dea dzesii. Nenema kee ne míenyoa dɔme na mía nɔvi Kristotɔwo, wɔa amedzro na wo, naa nu wo faa, eye míetsɔna kea wo faa la, míate ŋu aka ɖe edzi be Yehowa dea dzesi esia hã.—Heb. 13:16; 1 Pet. 4:8, 9.

“YEHOWA MAGBE EƑE DUKƆ LA O”

18. Aleke míate ŋu aɖee afia be míekpɔ ŋudzedze ɖe bubu si Yehowa de mía ŋu be míenye eƒe amewo la ŋu?

18 Ðikeke mele eme o be, míedi vevie be míaɖee afia Yehowa be míekpɔ ŋudzedze ɖe bubu si wòde mía ŋu be míenye eƒe amewo la ŋu. Míekpɔe be nunya le eme be míelɔ̃ ɖe eƒe dziɖulanyenye dzi eye míawo ŋutɔwo míetsɔ mía ɖokui ɖe adzɔgbe nɛ. Togbɔ be míele agbe le “dzidzime gɔglɔ̃ totro kpaɖikpaɖi titina” hã la, míedi be amewo nakpɔe be míenye ‘fɔmaɖila kple mokakamanɔŋutɔ siwo le keklẽm abe akaɖiwo ene le xexea me.’ (Flp. 2:15) Míelé fu nu vɔ̃ɖi ɖikaa. (Yak. 4:7) Eye míelɔ̃ mía nɔvi Kristotɔwo hedea bubu wo ŋu, elabe míenyae be woawo hã Yehowa tɔe wonye.—Rom. 12:10.

19. Aleke Yehowa ɖoa eteƒe na ame siwo nye etɔwo?

19 Biblia do ŋugbe be: “Yehowa magbe eƒe dukɔ la o.” (Ps. 94:14) Ŋugbedodo sia si ŋu kakaɖedzi le la nye nyateƒe matrɔmatrɔ. Togbɔ be vɔ̃ ɖe sia ɖe ƒomevi ate ŋu ava mía dometɔ ɖe sia ɖe dzi hã, Yehowa li kpli mí. Ku gɔ̃ hã mate ŋu ama mí ɖa tso lɔlɔ̃ si le Yehowa si na mí la gbɔ o. (Rom. 8:38, 39) “Ne míele agbe la, míele agbe na Yehowa, eye ne míeku la, míeku na Yehowa. Eya ta míele agbe alo míeku o, Yehowa tɔe míenye.” (Rom. 14:8) Míele mɔ kpɔm na ŋkeke si dzi Yehowa ana exɔlɔ̃ wɔnuteƒe siwo ku la katã nagbɔ agbe la vevie. (Mat. 22:32) Fifia gɔ̃ hã la, Yehowa yra mí le mɔ geɖe nu. Abe ale si Biblia gblɔe ene la, “dzidzɔtɔwoe nye dukɔ si ƒe Mawu Yehowa nye, dukɔ si wòtia be wòanye ye ŋutɔ ye tɔ.”—Ps. 33:12.