Dzo kpo yi emenuwo dzi

Dzo kpo yi emenuawo dzi

Ame Ka Ŋue Nèdina Be Yeadze?

Ame Ka Ŋue Nèdina Be Yeadze?

“Mawu menye madzɔmadzɔtɔ, be wòaŋlɔ miaƒe dɔwɔwɔ kple lɔlɔ̃ si mieɖe fia le eƒe ŋkɔ la ta . . . la be o.”—HEB. 6:10.

HADZIDZI: 39, 30

1. Dzɔdzɔmedidi kae le mí katã mía me?

ALEKE nèsena le ɖokuiwò me ne ame aɖe si nènya, si ŋu nèdea bubui, la ŋlɔ wò ŋkɔ be, alo kura gɔ̃ hã, mekpɔ wò dze sii o? Esia vena ŋutɔ. Nu ka tae? Nu si tae nye be, le dzɔdzɔme nu la, mía dometɔ ɖe sia ɖe dina be amewo nakpɔ ŋudzedze ɖe ye ŋu. Gake menye ɖeko míedina be woakpɔ mí adze sii ko evɔ o, míedina hã be woanya ame si ƒomevi míenye eye woade dzesi nu siwo míete ŋu wɔ.—4 Mose 11:16; Hiob 31:6.

2, 3. Nu kae ate ŋu awɔe be míagava da asɔ le ale si míedina be amewo nakpɔ ŋudzedze ɖe mía ŋu la me o? (Kpɔ nɔnɔmetata si le nyati sia ƒe gɔmedzedze.)

2 Gake abe ale si ko wòle le míaƒe dzɔdzɔmedidi bubuawo gome ene la, míaƒe blibomademade ate ŋu awɔe be míagava da asɔ le ale si míedina be amewo nakpɔ ŋudzedze ɖe mía ŋu la me o. Ate ŋu ana be míadi be amewo nade bubu mía ŋu wu ale si dze. Satana ƒe xexea ƒonɛ ɖe mía nu be míadi ŋkɔxɔxɔ kple bubu. Ne edzɔ alea la, míetsɔa bubu kple subɔsubɔ si mía Fofo si le dziƒo, Yehowa Mawu, ɖeɖe ko dze na la nanɛ o.—Nyaɖ. 4:11.

 3 Le Yesu ƒe ŋkekea me la, subɔsubɔhakplɔla aɖewo dina be woade bubu yewo ŋu wu ale si dze. Yesu xlɔ̃ nu eyomedzelawo be: “Mikpɔ mia ɖokui dzi nyuie le agbalẽfiala siwo nɔa awu ʋlayawo me nɔa tsatsam, siwo dina be amewo nado gbe na yewo le ablɔwo me, eye wolɔ̃a ŋgɔgbezikpuiwo dzi [“teƒe nyuitɔwo”] nɔnɔ le ƒuƒoƒewo kple bubunɔƒewo nɔnɔ le fiẽnuɖuƒewo la ŋu.” Eyi edzi gblɔ be: “Ame siawo ƒe ʋɔnudɔdrɔ̃ le sesẽ ge wu.” (Luka 20:46, 47, etenuŋɔŋlɔ) Gake Yesu kafu ahosi dahe aɖe si dzɔ ga home sue aɖe ya, togbɔ be ame bubuwo manya de dzesii o gɔ̃ hã. (Luka 21:1-4) Edze ƒãa be ale si Yesu bua ŋkɔ si tɔgbi wòle be ame nawɔ na eɖokuii la to vovo kura. Nyati sia akpe ɖe mía ŋu be nuŋububu nyuitɔ nakpɔtɔ anɔ mía si le nya sia ŋu abe ale si Yehowa Mawu dii ene.

ŊKƆ NYUITƆ KEKEAKE SI MÍATE ŊU AWƆ NA MÍA ÐOKUI

4. Ŋkɔ kae nye nyuitɔ kekeake si míate ŋu awɔ na mía ɖokui, eye nu ka tae?

4 Azɔ, ŋkɔ kae nye nyuitɔ kekeake si wòle be míaku kutri vevie be míawɔ na mía ɖokui? Menye ŋkɔ si tɔgbi amewo dina be yewoawɔ na yewo ɖokuiwo le xexe sia ƒe agbalẽnyanya, asitsatsa kple modzakaɖefefewo mee o. Ke boŋ, enye esi ŋu Paulo ƒo nu tsoe esi wògblɔ be: “Azɔ, esi mieva nya Mawu, alo esi Mawu boŋ va nya mi la, aleke wɔ miegale tɔtrɔm ɖe gɔmedzenu gbɔdzɔ maɖinuawo ŋu, eye miele didim be yewoagazu woƒe kluviwo ake?” (Gal. 4:9) Mɔnukpɔkpɔ nyui ka gbegbee nye esi be Mawu, ame si nye Xexea Katã ƒe Dziɖulagã la ‘nanya mi’! Edi be mía kpli ye dome nanɔ kplikplikpli. Abe ale si agbalẽnyala aɖe gblɔ ene la, míeva nyea “ame siwo ŋu wòkpɔ ŋudzedze ɖo.” Ne Yehowa bu mí exɔlɔ̃woe la, ekema míeɖo taɖodzinu si koŋ tae míele agbe ɖo la gbɔ.—Nyagb. 12:13, 14.

5. Nu kae míawɔ be Mawu nanya mí?

5 Míenyae be Yehowa xɔlɔ̃e Mose nye. Esi wòɖe kuku na Yehowa be nena yeanya eƒe mɔwo nyuie wu la, Yehowa ɖo eŋu nɛ be: “Mawɔ nya sia si gblɔm nèle la hã dzi, elabena meve nuwò, eye menya wò kple wò ŋkɔ.” (2 Mose 33:12-17) Nenema kee míawo hã míakpɔ yayra geɖe ne Yehowa va nya mí. Gake nu kae míate ŋu awɔ be Yehowa nanya mí? Eyae nye be míalɔ̃ eyama ahatsɔ míaƒe agbe aɖe adzɔgbe nɛ.—Xlẽ 1 Korintotɔwo 8:3.

6, 7. Nu kae ate ŋu ana ƒomedodo si le mía kple Yehowa dome la nagblẽ?

6 Ke hã, ele be míakpɔ ƒomedodo xɔasi si le mía kple mía Fofo si le dziƒo dome la ta. Abe Kristotɔ siwo nɔ Galatia, siwo Paulo ŋlɔ nya mawo na ene la, ele be míawo hã míadze agbagba be míaganye kluviwo na xexe sia ƒe “gɔmedzenu gbɔdzɔ maɖinuawo,” siwo dome xexea ƒe kafukafu didi hã le la o. (Gal. 4:9) Kristotɔ gbãtɔ mawo yi ŋgɔ le mawusubɔsubɔ me ale gbegbe be Mawu va nya wo. Gake Paulo gblɔ be nɔvi mawo ke ‘gava nɔ tɔtrɔm ɖe’ nu ƒuƒluwo ŋu. Ðeko wòle abe ɖe Paulo nɔ wo biam be, “Esi mieyi ŋgɔ alea gbegbe vɔ la, nu ka tae miegale tɔtrɔm ɖe nu dzodzro maɖinu siwo miegblẽ ɖe megbe la ŋu?” ene.

7 Ðe wòate ŋu adzɔ be míawo hã míava kpɔ mía ɖokuiwo le nɔnɔme ma tɔgbi me egbea? Ɛ̃, ate ŋu adzɔ. Esi míeva nya Yehowa la, ɖewohĩ míawo hã míeɖe asi le xexe sia me ŋkɔxɔxɔ kple nudzedzinamewo ŋu abe ale si Paulo wɔe ene. (Xlẽ Filipitɔwo 3:7, 8.) Ðewohĩ, mɔnukpɔkpɔwo su mía si be míade suku kɔkɔ, woado mí ɖe ŋgɔ le dɔ me, alo míakpɔ ga geɖe le asitsatsa me, gake míeɖe asi le mɔnukpɔkpɔ mawo ŋu. Alo ɖewohĩ hadzidzi alo kamedede  ƒe ŋutete siwo le mía si la ate ŋu awɔe be míaƒe ŋkɔ nanyɔ eye míakpɔ ga geɖe hafi, gake míetrɔ megbe de nu mawo katã. (Heb. 11:24-27) Masɔ kura be míabu nyametsotso nyui siwo míewɔ va yi la be wonye mɔnukpɔkpɔ siwo to mía ŋu o! Nuŋububu sia ate ŋu ana míava nɔ didim be míati nu siwo míebu va yi be wonye xexe sia me nu ‘gbɔdzɔ maɖinuwo’ la yome. *

ÐOE KPLIKPAA BE YEADZE YEHOWA ŊU

8. Nu kae akpe ɖe mía ŋu míadi vevie be míawɔ ŋkɔ nyui le Yehowa gbɔ?

8 Aleke míawɔ ado ŋusẽ tame si míeɖo kplikpaa be míana Yehowa nanya mí, ke menye be míaxɔ ŋkɔ le xexea me o? Be míawɔ esia la, ele be nu vevi eve aɖewo nanɔ susu me na mí. Gbãtɔe nye be, Yehowa ɖenɛ fiana esubɔla si wɔa nuteƒe nɛ la godoo be yekpɔ ŋudzedze ɖe eŋu heɖoa eteƒe nɛ. (Xlẽ Hebritɔwo 6:10; 11:6) Edea asixɔxɔ esubɔla ɖe sia ɖe ŋu ŋutɔ, eye ebunɛ be anye ‘nu madzɔmadzɔ wɔwɔ’ be yeaŋlɔ ame siwo wɔa nuteƒe na ye la be. Yehowa ‘nyaa ame siwo nye etɔwo’ ɣesiaɣi. (2 Tim. 2:19) Yehowa “nya ame dzɔdzɔewo ƒe mɔ” eye wònya ale si wòaɖe wo tso xaxawo me.—Ps. 1:6; 2 Pet. 2:9.

9. Gblɔ ale si Yehowa ɖee fia be yekpɔ ŋudzedze ɖe yeƒe amewo ŋu la ƒe kpɔɖeŋuwo.

9 Ɣeaɖewoɣi la, Yehowa ɖenɛ fiana le mɔ ɖedzesiwo nu be yekpɔ ŋudzedze ɖe yeƒe amewo ŋu. (2 Kron. 20:20, 29) Le kpɔɖeŋu me, bu ale si Yehowa ɖe eƒe dukɔa le Ƒudzĩa nu esime Farao kple eƒe aʋakɔ sesẽ la ti wo yome la ŋu kpɔ. (2 Mose 14:21-30; Ps. 106:9-11) Nudzɔdzɔ ma wɔ dɔ ɖe amewo dzi ale gbegbe be ƒe 40 sɔŋ megbe gɔ̃ hã la, dukɔ siwo nɔ nuto ma me la me tɔwo gaƒoa nu tso eŋu. (Yos. 2:9-11) Ne míeɖo ŋku ale si Yehowa xɔ na eƒe amewo le blema dzi la, edea dzi ƒo na mí ŋutɔ, elabe míenyae be, eteƒe madidi o, Gog, si tso Magog-nyigba dzi la ava dze mía dzi! (Eze. 38:8-12) Ɣemaɣi la, míakpɔ dzidzɔ ŋutɔ be míewɔ ŋkɔ nyui na mía ɖokui le mía Mawu la gbɔ, ke menye le xexea me o.

10. Nu kae nye nu vevi evelia si ŋu wòle be míaƒe susu nanɔ?

10 Ele be míaƒe susu nanɔ nu vevi evelia hã dzi. Eyae nye be: Yehowa ate ŋu aɖee afia le mɔ siwo míele mɔ kpɔm na o la nu be yenya mí. Ame siwo wɔa nu nyuiwo kple susu be amewo nakpɔ yewo ta ko la maxɔ teƒeɖoɖo aɖeke tso Yehowa gbɔ o. Nu ka tae? Nu si tae nye be, woxɔ woƒe fetu blibo la xoxo esime amewo kafu wo. (Xlẽ Mateo 6:1-5.) Gake Yesu gblɔ be ye Fofo si “kpɔa nu le ɣaɣlaƒe” la dea dzesi ame siwo mexɔ teƒeɖoɖo si wodze na la ɖe nu nyui siwo wowɔ na amewo la ta o. Edea dzesi dɔ nyui siwo wowɔ la, eye wònaa teƒeɖoɖo si ame sia ame dze na lae. Gake, ɣeaɖewoɣi la, Yehowa ɖoa eteƒe na mí le mɔ siwo míele mɔ kpɔm na o nu. Na míadzro esia ƒe kpɔɖeŋu aɖewo me kpɔ.

YEHOWA ÐO ETEƑE NA ÐETUGBUI ÐOKUIBƆBƆLA AÐE LE MƆ SI MENƆ MƆ KPƆM NA O LA NU

11. Aleke Yehowa ɖo eteƒe na Maria ɖetugbui la?

11 Esi ɣeyiɣia de be woadzi Mawu ƒe Vi la wòanye amegbetɔ la, Yehowa tia ɖetugbui leaƒe ɖokuibɔbɔla, si ŋkɔe nye Maria, be wòanye ɖevi tɔxɛ sia dada. Maria nɔ Nazaret, si nye du tsɛ aɖe si le didiƒe ʋĩi tso Yerusalem kple eƒe gbedoxɔ gã dzeani la gbɔ. (Xlẽ Luka 1:26-33.) Nu ka tae Yehowa tsɔ mɔnukpɔkpɔ sia na Maria? Esi mawudɔla Gabriel va egbɔ la,  egblɔ nɛ be: “Mawu ve nuwò.” Míate ŋu akpɔ ale si gbegbe Maria tsi le gbɔgbɔ mee la le nya siwo wògblɔ na eƒe ƒometɔ Elizabet emegbe la me. (Luka 1:46-55) Ɛ̃, Yehowa nɔ ŋku lém ɖe Maria ŋu, eye etsɔ mɔnukpɔkpɔ sia si menɔ mɔ kpɔm na kura o la ɖo eƒe nuteƒewɔwɔa teƒe nɛ.

12, 13. Aleke Yehowa de bubu Yesu ŋu esime wodzii kple esime wokɔe yi gbedoxɔa me le ŋkeke 40 megbe?

12 Esi Maria va dzi Yesu mlɔeba la, Yehowa megblɔ nu si dzɔ la ŋu nya na ame ŋkuta alo dumegã siwo nɔ Yerusalem kple Betlehem o. Ena mawudɔlawo yi ɖagblɔ nudzɔdzɔ tɔxɛ sia ŋuti nya na alẽkplɔla ɖokuibɔbɔla siwo nɔ woƒe alẽwo ŋu dzɔm le gbedzi le Betlehem nutowo me. (Luka 2:8-14) Eyome alẽkplɔla siawo yi ɖakpɔ vidzĩ la. (Luka 2:15-17) Anya wɔ nuku na Maria kple Yosef godoo be Yehowa de bubu Yesu ŋu le mɔ sia nu! De dzesi vovototo gã si le ale si Yehowa wɔa nui kple ale si Abosam wɔa nui dome. Esi Satana na ɣletivimefakalawo yi Yesu kple edzilawo gbɔ la, dzidzi ƒo Yerusalem nɔlawo katã le Yesu dzidzi ŋuti nya sia ta, eye esia he kuxi geɖe vɛ. (Mat. 2:3) Ewɔe be wova wu ɖevi maɖifɔ geɖewo.—Mat. 2:16.

13 Ŋkeke blaene le Yesu dzidzi megbe la, ehiã be Maria nayi aɖasa vɔ na Yehowa le Yerusalem gbedoxɔa, si didi tso Betlehem abe kilometa 9 ene la me. (Luka 2:22-24) Esi Maria kple Yosef kpakple Yesu wonɔ mɔa dzi la, Maria anya nɔ eŋu bum nenye be nunɔlaa agblɔ nya aɖe tso akpa vevi si Yesu ava wɔ le etsɔme ŋu. Yehowa na wode bubu Yesu ŋu, gake menye le mɔ si Maria anya nɔ mɔ kpɔm na la nu o. Yehowa to ŋutsu aɖe si ŋkɔe nye Simeon, si nye “ame dzɔdzɔe kple mawuvɔ̃la” kpakple ahosi aɖe si nye nyɔnunyagblɔɖila si ŋkɔe nye Hana, si xɔ ƒe 84 la dzi, na amewo nya be ɖevi siae ava nye Mesia, alo Kristo, si ŋugbe wodo la.—Luka 2:25-38.

14. Aleke Yehowa ɖo eteƒe na Maria?

14 Ke Maria ya ɖe? Ðe Yehowa yi edzi ɖee fiae be yekpɔ ŋudzedze ɖe ale si wòlé be na ye Via henyii nuteƒewɔwɔtɔe la ŋua? Ɛ̃, ewɔe nenema. Mawu na woŋlɔ nu siwo Maria wɔ kple nya siwo wògblɔ la ɖe Biblia me. Edze abe nɔnɔmeawo mede Maria dzi be wòakplɔ Yesu ɖo le subɔsubɔdɔ si wòwɔ ƒe etɔ̃ kple afã la me o ene. Ðewohĩ, eva hiã be Maria si zu ahosi la natsi Nazaret. Gake togbɔ be mɔnukpɔkpɔ geɖe to eŋu hã la, ete ŋu va nɔ Yesu ŋu le eƒe kuɣi. (Yoh. 19:26) Eye emegbe la, Maria nɔ nusrɔ̃lawo dome le Yerusalem le ŋkeke siwo do ŋgɔ na Pentekoste ŋkekea, si dzi wokɔ gbɔgbɔ kɔkɔea ɖe nusrɔ̃lawo dzi la me. (Dɔw. 1:13, 14) Anɔ eme be wosi ami na eya hã kpe ɖe nusrɔ̃la bubuawo ŋu. Ne nenemae la, esia afia be wona mɔnukpɔkpɔe be wòanɔ Yesu gbɔ le dziƒo tegbee. Teƒeɖoɖo nyui kae nye esi Yehowa nae ɖe eƒe nuteƒewɔwɔa ta!

YEHOWA ÐEE FIA BE YEKPƆ ŊUDZEDZE ÐE YE VIA ŊU

15. Esime Yesu nɔ anyigba dzi la, aleke Yehowa ɖee fia be yekpɔ ŋudzedze ɖe eŋu?

15 Yesu medi bubu kple kafukafu tso subɔsubɔhakplɔlawo kple dziɖula siwo nɔ anyi le eƒe ŋkekea me la gbɔ o. Gake, anya de dzi ƒo na Yesu ŋutɔ esi Yehowa ƒo nu tẽe tso dziƒo zi etɔ̃ sɔŋ tsɔ ɖee fia be yekpɔ ŋudzedze ɖe eŋu. Esi wonyrɔ̃ Yesu le Yordan-tɔsisia me vɔ teti la, Yehowa gblɔ be: “Ame siae nye Vinye si gbɔ nyemelɔ̃a nu le o, si ƒe nu dzea ŋunye.” (Mat. 3:17) Edze ƒãa be to vovo na Yesu la, Yohanes Amenyrɔɖetsimelaa koe ganye ame si se nya ma. Eyome esi wòsusɔ abe ƒe ɖeka ene hafi Yesu naku la, eƒe apostoloawo dometɔ etɔ̃ see Yehowa gblɔ tso Yesu ŋu be: “Ame siae nye Vinye, si gbɔ nyemelɔ̃a nu le o, si ƒe nu dzea ŋunye. Miɖo toe.” (Mat. 17:5) Eye ŋkeke ʋɛ aɖewo  do ŋgɔ na Yesu ƒe ku la, Yehowa gaƒo nu na Via ake tso dziƒo.—Yoh. 12:28.

Nu kae nèsrɔ̃ tso ale si Yehowa ɖo eteƒe na Viae me? (Kpɔ memama 15-17)

16, 17. Aleke Yehowa de bubu Yesu ŋu le mɔ si menɔ mɔ kpɔm na o nu?

16 Togbɔ be Yesu nyae be yeava ku gbɔɖiameku eye woatso ye nu alakpatɔe be yenye busunyagblɔla hã la, edo gbe ɖa be Yehowa ƒe lɔlɔ̃nu nava eme, ke menye ye tɔ o. (Mat. 26:39, 42) “Edo dzi kpe fuwɔameti ŋuti fu, eye mebu ŋukpe ɖe naneke me o.” Ɛ̃, medi xexea ƒe bubu o, ke Fofoa ƒe bubu boŋ. (Heb. 12:2) Aleke Yehowa ɖo eteƒe nɛ?

17 Esime Yesu gakpɔtɔ nɔ anyigba dzi la, egblɔ na Fofoa be yedi be wòatsɔ ŋutikɔkɔe si nɔ ye si tsã le dziƒo la agbugbɔ ana ye. (Yoh. 17:5) Naneke meɖee fia be Yesu nɔ mɔ kpɔm na nu si wu ema o. Menɔ mɔ kpɔm be “woado ye ɖe ŋgɔ” le dziƒo o. Gake nu kae Yehowa wɔ? Ede bubu eŋu le mɔ si menɔ mɔ kpɔm na o nu, le mɔ sia nu be, efɔe ɖe tsitre, eye wòdoe ɖe dzi hena wòva le “ɖoƒe si kɔ wu,” eye wòna makumakunyenye, si nye ɖoƒe si mesu ame aɖeke si kpɔ va de asi na ɣemaɣi o lae! * (Flp. 2:9; 1 Tim. 6:16) Teƒeɖoɖo gã ka gbegbee nye esi Yehowa tsɔ yra Yesu ɖe eƒe nuteƒewɔwɔa ta!

18. Nu kae akpe ɖe mía ŋu be míaƒo asa na xexe sia ƒe ŋudzedzekpɔkpɔ didi?

18 Nu kae akpe ɖe mía ŋu be míadi Yehowa ƒe teƒeɖoɖo, ke menye be xexe sia nakpɔ ŋudzedze ɖe mía ŋu o? Anyo be wòanɔ susu me na mí be Yehowa ɖenɛ fiana esubɔla siwo wɔa nuteƒe nɛ la godoo be yekpɔ ŋudzedze ɖe wo ŋu eye wòɖoa eteƒe wo, eye zi geɖe la, ewɔa esia le mɔ si womele mɔ kpɔm na o nu. Ame kae nya yayra siwo míele mɔ kpɔm na o, siwo míava kpɔ le etsɔme? Gake fifia, esi míele dzi dom le xaxa kple tetekpɔ siwo le mía dzi vam le xexe vɔ̃ɖi sia me me la, mina wòanɔ susu me na mí ɣesiaɣi be xexe sia nu va yina. Nenema kee ŋkɔxɔxɔ kple nudzedziname ɖe sia ɖe si ate ŋu asu ame si le xexe sia me la nu ava yi. (1 Yoh. 2:17) Gake Yehowa, mía Fofo lɔ̃ame la ‘menye madzɔmadzɔtɔ, be wòaŋlɔ míaƒe dɔwɔwɔ kple lɔlɔ̃ si míeɖe fia le eƒe ŋkɔ la ta be o.’ (Heb. 6:10) Ɛ̃, ave mía nu—ɖewohĩ, awɔ esia le mɔ siwo meva susu me na mí kpɔ o gɔ̃ hã nu!

^ mm. 7 Biblia gɔmeɖeɖe bubuwo ɖe nya “maɖinuawo” gɔme be “nu dzodzrowo,” “nu siwo ŋu viɖe aɖeke mele o,” “nu gbɔlowo,” kple “nu wɔnublanuiwo.”

^ mm. 17 Anɔ eme be Yesu menɔ mɔ kpɔm na yayra sia o, elabena womeƒo nu tso makumakunyenye ŋu le Hebri Ŋɔŋlɔawo me o.