LE BIBLIA ŋlɔɣiwoa, ŋugbetɔsrɔ̃a naa nu nyɔnua ƒe ƒometɔwo ne ƒome evea lɔ̃ ɖe srɔ̃ɖeɖea dzi. Tabianua tea ŋu nyea nu xɔasiwo, lãwo alo ga. Ɣeaɖewoɣi hã, ŋutsua tea ŋu wɔa dɔ na nyɔnua ƒe ƒomea wònyea tabianu abe ale si wònɔ le Yakob gome ene; ewɔ dɔ na Rahel fofo ƒe adre kple susu be yeaɖe Rahel. (1 Mose 29:17, 18, 20) Nu ka tae woxea tabianu?

Biblia ŋuti nunyala aɖe si ŋkɔe nye Carol Meyers gblɔ be: “Esi wònye be nyɔnua wɔa dɔ kpea asi ɖe eƒe ƒomea ŋu, vevietɔ le agble me ta, tabianu si ŋutsua ana nyɔnua ƒe ƒomea axe ʋe ma si atsi anyi la.” Azɔ hã ne woxe tabianua, ewɔnɛ be kadodo kplikplikpli va nɔa ƒome eveawo dome si wɔnɛ be wokpena ɖe wo nɔewo ŋu le ɣeyiɣi sesẽwo me. Tsɔ kpe ɖe eŋua, tabianua nye kpeɖodzi be wobia nyɔnua ta, eye maganɔ fofoa ƒe dzikpɔkpɔ te o, ke boŋ ava nɔ srɔ̃a ƒe kpɔkplɔ te.

Tabianua nana mefia be wole nyɔnua dzram alo le eƒlem o. Agbalẽ aɖe si ƒo nu tso ale si blema Israel-viwo wɔa nui ŋu gblɔ be: “Le blema Israel la, ga alo nu siwo wonaa nyɔnua ƒe ƒomea ate ŋu ana wòadze abe ɖe wole nyɔnua ƒlem ene. Gake edze be woawo ya mebua tabianua be enye fe si woxe ɖe nyɔnua ta o, ke boŋ be enye teƒeɖoɖo si wona nyɔnua ƒe ƒomea.”

Egbea hã, le dukɔ aɖewo mea, amewo xea tabianu. Ne dzila Kristotɔwo axɔ tabianu la, ele be ‘woaɖe nugɔmesese afia’ ale be woagaxɔ nu gbogbowo tso ŋutsu si di be yeaɖe wo vi la si o. (Flp. 4:5; 1 Kor. 10:32, 33) Ne wowɔe alea, woaɖee afia be yewomenye “galɔ̃lawo” alo ŋuklẽlawo o. (2 Tim. 3:2) Azɔ hã, ne dzila Kristotɔwo mebia tabianu si gbɔ eme tso ŋutsua si oa, ŋutsua mahe srɔ̃ɖeɖea ɖe megbe kple susu be yeavae di ga geɖe ne yeate ŋu ava na tabianua o. Alo mana ŋutsua nase le eɖokui me be ele be yeadzudzɔ mɔɖeɖedɔa ne yeavae di dɔ si ana yeakpɔ ga geɖe be yeate ŋu axe tabianu gbogbo ma si wobia tso ye si la o.

Le dukɔ aɖewo mea, dziɖuɖua de se ɖe tabianuxɔxɔ ƒe ɖoɖoa ŋu, eye ele be dzila Kristotɔwo nawɔ ɖe se mawo dzi. Nu ka tae? Elabe Mawu ƒe Nyaa bia tso Kristotɔwo si be ‘woabɔbɔ ɖe ŋusẽtɔwo te,’ eye woawɔ se siwo metsi tre ɖe Mawu ƒe sewo ŋu o la dzi.—Rom. 13:1; Dɔw. 5:29.