Dzo kpo yi emenuwo dzi

Dzo kpo yi emenuawo dzi

 NUSƆSRƆ̃NYATI 7

Míelɔ̃ Yehowa, Mía Fofo La, Vevie Ŋutɔ

Míelɔ̃ Yehowa, Mía Fofo La, Vevie Ŋutɔ

“Míelɔ̃a ame, elabena Mawu tre mí lɔlɔ̃.”​—1 YOH. 4:19.

HADZIDZI 3 Wòe Nye Míaƒe Ŋusẽ Kple Míaƒe Mɔkpɔkpɔ

NYA VEVIAWO *

1-2. Nu ka tae Yehowa ʋu mɔnukpɔkpɔ ɖi na mí be míanye yeƒe ƒomea me tɔwo, eye aleke wòwɔ esiae?

YEHOWA kpe mí be míava nye yeƒe subɔlawo eye míazu yeƒe ƒomea me tɔwo. Amekpekpe dodzidzɔname ka gbegbee nye esi! Ƒome sia me tɔwo nye ame siwo tsɔ wo ɖokuiwo ɖe adzɔgbe na Mawu eye woxɔ Via ƒe tafevɔsaa dzi se. Míekpɔa dzidzɔ le ƒome sia me. Dzidzeme su mía si le agbe me fifia, eye míekpɔa dzidzɔ ɖe mɔkpɔkpɔ si le mía si be míava nɔ agbe tegbee, le dziƒo loo alo le Paradiso me le anyigba dzi, la ŋu.

2 Lɔlɔ̃e ʋã Yehowa wòʋu mɔnukpɔkpɔa ɖi na mí be míava nye yeƒe ƒomea me tɔwo; ke hã, esia bia be wòatsɔ Via si gbɔ melɔ̃a nu le kura o la asa vɔ ɖe mía ta. (Yoh. 3:16) ‘Ho gã aɖee wòtsɔ ƒle mí.’ (1 Kor. 6:20) Yehowa to tafea dzi na mɔnukpɔkpɔ mí be ƒomedodo kplikplikpli nava nɔ mía kpli ye dome. Enye bubu na mí be míate ŋu ayɔ Ame vevitɔ kekeake si le xexea me katã la be Fofo. Eye abe ale si míedzro eme le nyati si do ŋgɔ na esia me ene la, Yehowa ye nye Fofo nyuitɔ kekeake.

3. Nya kawoe míate ŋu abia? (Kpɔ aɖaka si nye, “ Ðe Yehowa Tsɔa Ðe Le Eme Nama?”)

3 Ðewohĩ míawo hã míabia nya si Biblia-ŋlɔla aɖe bia la mía ɖokui; ebia be: “Nu kae matsɔ aɖo eteƒe na Yehowa ɖe nyui siwo katã wòwɔ nam la ta?” (Ps. 116:12) Ŋuɖoɖoa ye nye be míate ŋu aɖo nu siwo gbegbe mía Fofo si le dziƒo la wɔ na mí la teƒe nɛ gbeɖe o. Ke hã, ale si gbegbe wòlɔ̃ míi la ʋãa mí be míawo hã míalɔ̃e. Apostolo Yohanes ŋlɔ bena: “Míelɔ̃a ame, elabena  Mawu tre mí lɔlɔ̃.” (1 Yoh. 4:19) Nu kawoe míate ŋu awɔ atsɔ aɖee afia mía Fofo si le dziƒo la be míelɔ̃e?

NƆ YEHOWA ŊU KPLIKPLIKPLI

Míeɖea ale si gbegbe míelɔ̃ Yehowa, mía Fofo si le dziƒo lae fiana, ne míedoa gbe ɖa nɛ edziedzi ale be míakpɔtɔ anɔ eyama ŋu kplikplikpli, ne míeɖoa to eyama, eye míekpena ɖe ame bubuwo ŋu be woawo hã woava lɔ̃e (Kpɔ memama 4-14 lia)

4. Le Yakobo 4:8 ƒe nya nu la, nu ka tae wòle be míadze agbagba vevie be míate ɖe Yehowa ŋu kplikplikpli?

4 Yehowa di be míate ɖe ye ŋu eye míaƒo nu na ye ahaɖo to ye. (Xlẽ Yakobo 4:8.) Ede dzi ƒo na mí be ‘míanɔ gbedodoɖa dzi ɖaa,’ eye esea míaƒe gbedodoɖawo ɣesiaɣi. (Rom. 12:12) Yehowa mesena le eɖokui me gbeɖe be ɖeɖi te ye ŋu alo vovo mele ye ŋu be yeaɖo to míaƒe gbedodoɖawo o. Míawo hã míeɖoa to Yehowa ne míexlẽa eƒe Nya, Biblia, kple míaƒe agbalẽ siwo kpena ɖe mía ŋu míesea Biblia gɔme. Azɔ hã, ne míeɖoa to nyuie le Kristotɔwo ƒe kpekpewo me la, ekema, míele to ɖom Yehowa. Ale si ko kadodo kplikplikpli va nɔa ɖeviwo kple wo dzilawo dome ne woɖoa dze kple wo nɔewo nyuie la, nenema kee ne míeƒoa nu na Yehowa edziedzi eye míeɖoa to eyama la, esia awɔe be míayi edzi anɔ kadodo kplikplikpli me kplii.

Kpɔ memama 5 lia

5. Aleke míawɔ be míaƒe gbedodoɖawo naganyo ɖe edzi?

5 Bu gbe siwo nèdona ɖa na Yehowa la ƒe nyonyome ŋu kpɔ. Yehowa di be míagblɔ míaƒe dzimenyawo kple seselelãmewo na ye le gbedodoɖa me. (Ps. 62:8) Anyo be mía dometɔ ɖe sia ɖe nabia eɖokui be: ‘Ðe nye gbedodoɖawo nɔna abe gbedeasi aɖe si megbugbɔna gblɔna ko ene loo, alo ɖe wonɔna abe nya siwo tso keke nye dzi me ke enea?’ Ðikeke mele eme o be, èlɔ̃ Yehowa vevie eye èdi be ƒomedodo si le ye kplii dome la nakpɔtɔ anɔ kplikplikpli. Hafi nàte ŋu awɔ esia la, ele be nànɔ gbe dom ɖa nɛ edziedzi. Gblɔ wò dzimenyawo nɛ. Gblɔ nu siwo doa dzidzɔ na wò kple nu siwo nana nèléa blanui la nɛ. Ka ɖe edzi be àte ŋu abiae be wòakpe ɖe ŋuwò.

6. Nu kae wòle be míawɔ be míayi edzi anɔ ƒomedodo kplikplikpli me kple mía Fofo si le dziƒo la?

6 Ele be míayi edzi anɔ ŋudzedze kpɔm ɖe nu siwo katã mía Fofo si le dziƒo la wɔ na mí la ŋu hafi míate ŋu ayi edzi anɔ ƒomedodo kplikplikpli me kplii. Míelɔ̃ ɖe hakpalaa ƒe nya dzi esi wògblɔ be: “Oo Yehowa nye Mawu, nu siwo nèwɔ na mí la sɔ gbɔ loo! Wò nukudɔwo kple wò susu siwo nèɖe ku ɖe mía ŋu la sɔ gbɔ. Ame aɖeke mede nuwò o; ne mebe maƒo nu tso wo ŋu alo agblɔ wo ŋu nya la, womele xexlẽ me o!” (Ps. 40:5) Menye ɖeko míesena le mía ɖokui me be míekpɔ ŋudzedze ɖe nu siwo Yehowa wɔ na mí ŋu ko o, ke míeɖea esia fiana to míaƒe nyagbɔgblɔwo kple nuwɔnawo hã me. Esia wɔe be míeto vovo na ame geɖe egbea. Ame siwo le xexea me egbea la dometɔ akpa gãtɔ mekpɔa ŋudzedze ɖe nu siwo katã Mawu wɔ na wo la ŋu o. Le nyateƒe me la, nu siwo ɖee fia be míele “ŋkeke mamlɛawo” me la dometɔ ɖekae nye be amewo nye akpemadalawo. (2 Tim. 3:1, 2) Míedi be míawɔ nu abe woamawo ene gbeɖe o!

7. Nu kae Yehowa di be míawɔ, eye nu ka tae?

7 Dzilawo medina be yewo viwo nanɔ dzre wɔm kple wo nɔewo o, ke boŋ woanye xɔlɔ̃wo. Le mɔ ma ke nu la, Yehowa dina be xɔlɔ̃wɔwɔ nanɔ ye subɔlawo katã dome. Le nyateƒe me la, lɔlɔ̃ si le mía si na mía nɔewo la ɖenɛ fiana be míenye Kristotɔ vavãwo. (Yoh. 13:35) Míaƒe susu wɔ ɖeka kple hakpalaa tɔ esi wògblɔ be: “Kpɔ ale si wònyo eye wòvivinae ɖa ne nɔviwo le afi ɖeka le ɖekawɔwɔ me!” (Ps. 133:1) Ne míelɔ̃ mía nɔviŋutsuwo kple mía nɔvinyɔnuwo la, míetoa esia dzi ɖenɛ fiana Yehowa be míelɔ̃e. (1 Yoh. 4:20) Aleke gbegbe wònyoe ye nye esi be míenye ƒome si me nɔviŋutsuwo kple nɔvinyɔnuwo ‘nyoa dɔme na wo nɔewo eye woƒe dɔme trɔna ɖe wo nɔewo ŋu vevie’ le la me tɔwo!—Ef. 4:32.

 ÐO TO YEHOWA NÀTSƆ AÐEE AFIA BE YELƆ̃E

Kpɔ memama 8 lia

8. Le 1 Yohanes 5:3 ƒe nya nu la, susu vevi ka tae míeɖoa to Yehowa ɖo?

8 Yehowa di tso ɖeviwo si be woaɖo to wo dzilawo, eye edi tso míawo hã mía si be míaɖo to ye. (Ef. 6:1) Edze be míaɖo toe, elabe eyae nye mía Wɔla, kple Ame si lé míaƒe agbe ɖe te, eye enye Fofo si ƒe nunya ƒo vifofo ɖe sia ɖe tɔ ta sãsãsã. Ke hã, susu vevitɔ si ta míeɖoa to Yehowa ɖoe nye be míelɔ̃e. (Xlẽ 1 Yohanes 5:3.) Togbɔ be susu geɖewo li siwo tae wòle be míaɖo to Yehowa ɖo hã la, mezia mía dzi be míaɖo to ye o. Yehowa na ablɔɖe mí be míawo ŋutɔwo míatso nya me na mía ɖokuiwo, eya ta, edzɔa dzi nɛ ne míetiae be míaɖo to ye le esi míelɔ̃ ye ta.

9-10. Nu ka tae wòle vevie be míanya Mawu ƒe sewo ahanɔ agbe ɖe wo nu?

9 Dzilawo dina be yewo viwo nanɔ dedie. Eya tae wodea sewo na wo viwo be yewoatsɔ akpɔ wo ta ɖo. Ne ɖeviawo wɔ ɖe se mawo dzi la, woɖenɛ fiana be yewoka ɖe yewo dzilawo dzi eye yewodea bubu wo ŋu. Ekema, ɖe mele vevie kura wu be míanya mía Fofo si le dziƒo la ƒe sewo ahanɔ agbe ɖe wo nu oa? Ne míewɔe alea la, míaɖee afia Yehowa be míelɔ̃e eye míedea bubu eŋu, eye esia aɖe vi na míawo ŋutɔwo hã. (Yes. 48:17, 18) Gake ame siwo gbe Yehowa eye womewɔna ɖe eƒe sewo dzi o la wɔa nu vevi wo ɖokuiwo.—Gal. 6:7, 8.

10 Ne míenɔa agbe le mɔ si dzea Yehowa ŋu nu la, esia kpɔa mía ta tso nu siwo ate ŋu agblẽ nu le mía ŋu le ŋutilã me kple seselelãme gome  la me, eye akpɔ mía ta tso nu siwo ate ŋu agblẽ ƒomedodo si le mía kple Yehowa dome hã si me. Yehowa nya nu si aɖe vi na mí wu. Nɔvinyɔnu Aurora, si le Amerika, la gblɔ be, “Menyae be toɖoɖo Yehowa ana míakpɔ dzidzɔ le agbe me godoo.” Aleae wòle le mí katã gome. Aleke wɔwɔ ɖe Yehowa ƒe mɔfiame si me lɔlɔ̃ le dzi la ɖe vi na wòe?

11. Aleke gbedodoɖa kpena ɖe mía ŋu?

11 Gbedodoɖa kpena ɖe mía ŋu míeɖoa to Yehowa, ne esesẽ na mí be míaɖo toe gɔ̃ hã. Ɣeaɖewoɣi la, esesẽna na mí be míaɖo to Yehowa le esi míenye nu vɔ̃ mewo ta, gake ele be míaku kutri vevie aɖo toe. Hakpalaa ƒo koko na Mawu be: ‘Nyɔ wò lɔlɔ̃nu wɔwɔ ƒe gbɔgbɔ ɖe menye.’ (Ps. 51:12) Nɔvinyɔnu Denise, si nye gbesiagbe mɔɖela la gblɔ be, “Ne mekpɔe be ele sesẽm nam be mawɔ ɖe Yehowa ƒe se aɖe dzi la, medoa gbe ɖa nɛ be wòado ŋusẽm be mawɔ nu si le eteƒe.” Míate ŋu aka ɖe edzi be Yehowa aɖo gbedodoɖa mawo tɔgbi ŋu godoo.—Luka 11:9-13.

KPE ÐE AME BUBUWO ŊU WOALƆ̃ MÍA FOFO LA

12. Le Efesotɔwo 5:1 ƒe nya nu la, nu kae wòle be míawɔ?

12 Xlẽ Efesotɔwo 5:1. Esi míenye Yehowa ƒe ‘vi lɔlɔ̃awo’ ta la, míewɔa míaƒe ŋutete katã be míasrɔ̃ eyama. Míeɖea eƒe nɔnɔme nyoameŋuawo fiana ne míewɔa nu ɖe amewo ŋu le lɔlɔ̃ me henyoa dɔme na wo eye míetsɔna kea wo faa. Ne ame siwo menya Mawu o la de dzesi míaƒe agbenɔnɔ nyuiwo la, esia ate ŋu aʋã wo be woasrɔ̃ nu tso eyama ŋu. (1 Pet. 2:12) Ele be dzila Kristotɔwo nadze agbagba awɔ nu ɖe wo viwo ŋu abe ale si Yehowa wɔa nu ɖe mía ŋui  ene. Ne wowɔe alea la, esia ate ŋu awɔe be wo viwo nadi be yewo hã yewoava zu mía Fofo lɔ̃ame la ƒe xɔlɔ̃wo.

Kpɔ memama 13 lia

13. Nu kae wòle be míawɔ be dzi naɖo mía ƒo?

13 Le ɖeviwo gome la, wo fofo nyea dada na wo le wo hatiwo ŋkume eye edzɔa dzi na wo be yewoaƒo nu tso yewo fofo ŋu. Nenema kee Yehowa, mía Fofo si le dziƒo la, nyea dada na mí, eye míedina be ame bubuwo nanya eyama. Mí katã míesena le mía ɖokuiwo me abe Fia David ene, esi wòŋlɔ bena: “Matsɔ Yehowa aƒo adegbe.” (Ps. 34:2) Ke ne ŋu kpea mí ya ɖe? Nu kae míate ŋu awɔ be dzi naɖo mía ƒo be míaƒo nu tso mía Fofo la ŋu? Dzi ɖoa mía ƒo ne míetsɔa susu ɖoa ale si gbegbe míana dzi nadzɔ Yehowae ne míeƒo nu tso eyama ŋu na ame bubuwo kpakple ale si esia aɖe vi na woe ŋu. Yehowa ana dzi naɖo mía ƒo. Ekpe ɖe mía nɔvi Kristotɔ siwo nɔ anyi le ƒe alafa gbãtɔ me la ŋu dzi ɖo wo ƒo, eye akpe ɖe míawo hã ŋu.—1 Tes. 2:2.

14. Susu kawo tae wòle vevie be míawɔ nusrɔ̃lawɔwɔdɔa?

14 Yehowa medea vovototo amewo me o, eye edzɔa dzi nɛ ne ekpɔe be míelɔ̃ amewo katã, afi ka kee woɖatso o alo nɔnɔme ka ke mee woɖale o. (Dɔw. 10:34, 35) Mɔ nyuitɔ siwo dzi míate ŋu ato aɖee afia amewo be míelɔ̃ wo la dometɔ ɖekae nye be míaɖe gbeƒã nya nyuia na wo. (Mat. 28:19, 20) Nu kawoe ate ŋu ado tso dɔ sia me? Ate ŋu ana ame siwo ɖoa to mí la ƒe agbenɔnɔ nanyo ɖe edzi, eye mɔkpɔkpɔ ate ŋu asu wo si be woava nɔ agbe tegbee.—1 Tim. 4:16.

LƆ̃ MÍA FOFO LA EYE ÀKPƆ DZIDZƆ

15-16. Susu kawo tae míekpɔa dzidzɔ ɖo?

15 Yehowa nye Fofo lɔ̃ame, eya ta edi be yeƒe ƒomea me tɔwo nakpɔ dzidzɔ. (Yes. 65:14) Susu geɖewo li siwo tae dzi ate ŋu anɔ mía dzɔm fifia togbɔ be míate ŋu anɔ nɔnɔme sesẽwo me tom gɔ̃ hã. Le kpɔɖeŋu me, míeka ɖe edzi be mía Fofo si le dziƒo la lɔ̃ mí vevie ŋutɔ. Nyateƒe si le Mawu ƒe Nya, Biblia, me la ŋuti sidzedze vavãtɔ su mía si. (Yer. 15:16) Eye míawo hã míele ƒome tɔxɛ aɖe, si me tɔwo lɔ̃ Yehowa, siwo lɔ̃ eƒe agbe nyui nɔnɔ ŋuti se kɔkɔawo eye wolɔ̃ wo nɔewo la me.—Ps. 106:4, 5.

16 Míate ŋu anɔ dzidzɔ kpɔm ɣesiaɣi, elabe mɔkpɔkpɔ si ŋu kakaɖedzi le la le mía si be agbea ava nyo wu kura le etsɔme. Míenyae be eteƒe madidi o, Yehowa atsrɔ̃ ame vɔ̃ɖiwo katã eye ato eƒe Fiaɖuƒea dzi ana anyigba bliboa nazu Paradiso. Azɔ hã, dzidzɔmɔkpɔkpɔ si nye be woava fɔ ame siwo ku la ɖe tsitre woagawɔ ɖeka kple woƒe ame veviwo ake la le mía si. (Yoh. 5:28, 29) Dzidzɔ ka gbegbee esia anye! Esi gale vevie wue nye be, míeka ɖe edzi be, eteƒe madidi o, ame siwo katã le dziƒo kple anyigba dzi la atsɔ bubu, kafukafu, kple subɔsubɔ si mía Fofo lɔ̃amea dze na la anae!

HADZIDZI 12 Mawu Gã Yehowa

^ mm. 5 Míenyae be, mía Fofo, Yehowa, lɔ̃ mí vevie ŋutɔ eye ena míeva nye esubɔlawo eye míezu eƒe ƒomea me tɔwo. Esia ʋã mí míawo hã míelɔ̃e. Nu kawoe míate ŋu awɔ atsɔ aɖee afia mía Fofo si léa be na mí la be míelɔ̃e? Míadzro nu vovovo aɖewo siwo míate ŋu awɔ atsɔ aɖe esia afia la me le nyati sia me.