Le ƒe 1913 me la, tɔnye, John Mills, xɔ nyɔnyrɔ le New York City, esime wòxɔ ƒe 25. Nɔviŋutsu Russell ye ƒo nyɔnyrɔxɔnuƒoa. Ɣeyiɣi kpui aɖe megbe la, Papa ʋu yi Trinidad, afi si wòɖe Constance Farmer, si nye Biblia Nusrɔ̃vi dovevienu aɖe le. Papa kpena ɖe exɔlɔ̃a William R. Brown ŋu woɖea fotoɖeɖefia si nye “Xexemewɔwɔ Ƒe Foto-Drama” la fiaa amewo. Woyi esia wɔwɔ dzi va se ɖe esime woɖo Nɔviŋutsu Brown kple eƒe ƒomea ɖe Ɣetoɖoƒe Afrika le ƒe 1923 me. Papa kple Dada, siwo si dziƒoyiyi ƒe mɔkpɔkpɔ nɔ la, yi subɔsubɔdɔa dzi le Trinidad.

Vi asieke ye nɔ dzinyelawo si, eye wotsɔ ŋkɔ na wo viŋutsu gbãtɔa be Rutherford. Nɔviŋutsu Rutherford si nye Gbetakpɔxɔ Biblia Kple Trakt Habɔbɔa ƒe zimenɔla ɣemaɣi la ƒe ŋkɔe wotsɔ nɛ. Esime wodzim le December 30, 1922 dzi la, wotsɔ ŋkɔ nam be Clayton J. Woodworth. Nɔviŋutsu si nye Nunyonameɣi magazinea (si míeyɔna fifia be Nyɔ!) ƒe nuŋɔŋlɔmetola ƒe ŋkɔe wònye wotsɔ nam. Mía dzilawo na míesrɔ̃ nuxexlẽ kple nuŋɔŋlɔ, ke vevietɔ wu la, wote gbe ɖe edzi na mí be míaɖo gbɔgbɔmetaɖodzinuwo na mía ɖokuiwo. Ŋɔŋlɔawo ŋu dɔ wɔwɔ ƒe ŋutete tɔxɛ aɖe nɔ Dada si, si wɔnɛ be wòtea ŋu zãa Ŋɔŋlɔawo aɖaŋutɔe tsɔ dea ŋugble kple amewo. Papa lɔ̃a Biblia me ŋutinyawo gbɔgblɔ na mí; ne ele ŋutinyaawo gblɔm na mí la, ewɔa eƒe ŋutinuwo ŋu dɔ ale gbegbe be míetea ŋu kpɔa ale si nuwo dzɔ ŋutɔŋutɔ la le susu me.

Nu nyui geɖe do tso woƒe agbagbadzedzeawo me. Le ŋutsuvi atɔ̃ siwo wodzi dome la, mí ame etɔ̃ míede Gilead Sukua. Mía nɔvinyɔnuawo dometɔ etɔ̃ wɔ mɔɖeɖedɔa ƒe geɖe le Trinidad Kple Tobago dukɔa me. Mía dzilawo to woƒe nufiafia kple kpɔɖeŋu nyui siwo woɖo na mí la dzi do mí “ɖe Yehowa ƒe aƒe la me” le kpɔɖeŋunyagbɔgblɔ nu. Woƒe dzideƒonyawo kpe ɖe mía ŋu míeyi edzi nɔ afi ma eye míetsi “le mía Mawu ƒe xɔxɔnuwo.”—Ps. 92:13.

Míaƒe aƒe me va zu afi si wowɔa ɖoɖo ɖe gbeƒãɖeɖedɔa ŋu le. Mɔɖelawo va ƒoa ƒu le afi ma, eye woɖoa dze tso Nɔviŋutsu George Young, si nye dutanyanyuigblɔla aɖe si tso Canada, si ɖi tsa va Trinidad la ŋu zi  geɖe. Dzinyelawo hã ƒoa nu tso Brown ƒomea, si wowɔ dɔ kplii tsã, si nye atsu kple asi siwo nɔ Ɣetoɖoƒe Afrika ɣemaɣi la ŋu kple dzidzɔ. Esiawo katã ʋãm medze gbeƒãɖeɖedɔa gɔme esime mexɔ ƒe ewo.

Ɣemaɣi la, míaƒe magazinewo me nyawo nu sẽna ŋutɔ, elabe wokloa nu le alakpasubɔsubɔ, asitsatsa me ŋukeklẽ kple dunyahehe me nu fitifiti wɔwɔ dzi. Esia wɔe be, le ƒe 1936 me la, subɔsubɔhakplɔlawo ƒoe ɖe Trinidad ƒe nutodziɖula si nɔ anyi ɣemaɣi la nu be wòaɖo asi Gbetakpɔxɔ Habɔbɔa ƒe agbalẽwo katã dzi. Míeɣla agbalẽawo, gake míeyi edzi nɔ wo zãm va se ɖe esime esiwo nɔ mía si la katã vɔ. Míewɔ gbeƒãɖeɖe ƒe gbɔlɔlɔ siwo me míekplaa pepa siwo dzi woŋlɔ nu ɖo, eye míetoa afɔ henɔa míaƒe agbalẽviwo mam, gake ɣeaɖewoɣi la, míetsɔ gasɔwo wɔ esia. Nɔvi siwo zãa ʋu si tame nyasemɔ̃ le, siwo tso Tunapuna hã va wɔ ɖeka kpli mí míeɖe gbeƒã yi keke Trinidad ƒe saɖeaganutowo gɔ̃ hã me. Dɔ sia na míekpɔ dzidzɔ ale gbegbe! Nu siawo kpe ɖe ŋunye le gbɔgbɔ me, si wɔe be mexɔ nyɔnyrɔ esime mexɔ ƒe 16.

Ŋusẽ nyui si míaƒe ƒomea kpɔ ɖe dzinye kple nuteƒekpɔkpɔ nyui mawo siwo su asinye la wɔe be meva di vevie be mawɔ dutanyanyuigbɔgblɔdɔa. Didi ma kpɔtɔ nɔ menye esime meyi Aruba le ƒe 1944 me, eye nye kple Nɔviŋutsu Edmund W. Cummings míewɔ gbeƒãɖeɖedɔa ɖekae le afi ma. Le ƒe 1945 me la, míekpɔ dzidzɔ ale gbegbe esime ame siwo míekpe na Ŋkuɖodzia la dometɔ ewo va. Le ƒe si kplɔe ɖo me la, míeɖo hame gbãtɔ ɖe Aruba ƒukpoa dzi.

Le ema megbe kpuie la, meɖi vomeɖase na ɖetugbui aɖe, si ŋkɔe nye Oris Williams, si nye nye dɔwɔhati. Oris dze agbagba vevie be yeaʋli yeƒe dzixɔsewo ta. Ke hã, esi wodze Biblia sɔsrɔ̃ gɔme kplii la, eva srɔ̃ nu si tututu Mawu ƒe Nyaa fia, eye wòxɔ nyɔnyrɔ le January 5, 1947 dzi. Le ɣeyiɣi aɖe megbe la, míaƒe nu va lé dzi na mía nɔewo, eye míeɖe mía nɔewo. Edze mɔɖeɖedɔa gɔme le November 1950 me. Oris na agbe yeye ɖo menye.

Le ƒe 1955 me la, wokpe mí be míade Gilead Sukua. Nye kple Oris míeɖe asi le míaƒe dɔwɔɖuiwo ŋu, míedzra míaƒe aƒea kple nunɔamesi bubu aɖewo tsɔ dzra ɖo ɖe sukua dede ŋu, eye míedzo le Aruba. Le July 29, 1956 dzi la, míedo le Gilead Sukua ƒe klass 27 lia, eye woɖo mí ɖe Nigeria.

Oris ɖo ŋku ale si wòtrɔ ɖe nɔnɔmeawo ŋui la dzi hegblɔ be: “Yehowa ƒe gbɔgbɔ ate ŋu akpe ɖe ame ŋu be wòatrɔ ɖe kuxi siwo doa mo ɖa le dutanyanyuigbɔgblɔdɔa me la ŋu. To vovo na srɔ̃nye la, nye ya nyemedi gbeɖe be manye dutanyanyuigblɔla hafi o. Ke boŋ, medi be matso aƒe ahadzi viwo. Gake metrɔ susu esime meva de dzesi ale si gbegbe wòhiã kpatae be woaɖe gbeƒã nya nyuia. Kaka míawu Gilead Sukua nu la, mesu te nyuie awɔ dutanyanyuigbɔgblɔdɔa. Esime míenɔ gegem ɖe tɔdziʋu si woyɔna be Queen Mary, si akɔ mí ayi teƒe si woɖo mí ɖo la me la, Nɔviŋutsu Worth Thornton, si wɔa dɔ kple Nɔviŋutsu Knorr la va do ‘Hede nyuie!’ na mí. Egblɔ na mí be alɔdzedɔwɔƒeae míawɔ dɔ le. Meɖe hũu, hegblɔ be: ‘Oo, menyo o ɖe!’ Gake metrɔ ɖe subɔsubɔ le Betel ŋu kaba, eye meva lɔ̃ dɔwɔwɔ le afi ma; mewɔ dɔ vovovowo. Dɔwɔwɔ le amedzroxɔƒea koŋue do dzidzɔ nam wu. Melɔ̃a amewo, eye dɔ sia wɔe be medo go Nigeria nɔviawo ŋkume kple ŋkume. Kaka wo dometɔ aɖewo nava ɖo alɔdzedɔwɔƒea la, ʋuʋu léa wo, ɖeɖi tea wo ŋu, eye tsikɔ kple dɔ hã wua wo. Mekpɔa dzidzɔ ne mekpe ɖe wo ŋu woƒe dzi dze eme. Esiawo katã nye subɔsubɔ kɔkɔe si míetsɔna naa Yehowa la ƒe akpa aɖe, eye esiae nana mekpɔa dzidzeme kple dzidzɔ geɖe.” Ɛ̃, dɔdeasiawo dometɔ ɖe sia ɖe na agbe yeye ɖo mía me.

Le ƒe 1961 me la, míewɔ ƒomekplɔ̃ɖoɖo aɖe le Trinidad, eye Nɔviŋutsu Brown gblɔ nuteƒekpɔkpɔ dodzidzɔname aɖewo siwo su esi le Afrika la ŋu nya na mí. Eye nye hã meƒo nu tso dzidziɖedzi si kpɔm míele le Nigeria la ŋu. Eyome, Nɔviŋutsu Brown da eƒe abɔ ɖe kɔme nam lɔlɔ̃tɔe hegblɔ na Papa be: “Johnny, mèyi Afrika kpɔ o, gake Woodworth ya yi!” Papa gblɔ be: “Lé eme ɖe asi, Worth! Lé eme ɖe asi!” Nɔvi nuteƒewɔla mawo ƒe dzideƒonyawo wɔe be megaɖoe kplikpaa geɖe wu be mawɔ nye subɔsubɔdɔa ade goe.

Le ƒe 1962 me la, mɔnukpɔkpɔ gasu asinye mexɔ hehe geɖe le Gilead Suku ƒe klass 37 lia, si wowɔ ɣleti ewo la me. Nɔviŋutsu Wilfred Gooch, si nye alɔdzedɔwɔƒe si le Nigeria la dzi kpɔla ɣemaɣi la de Gilead Suku ƒe klass 38 lia, eye woɖoe ɖe England. Eya ta, alɔdzedɔwɔƒe si le Nigeria la dzi kpɔkpɔ va kpɔ ŋkunyeme. Le Nɔviŋutsu Brown ƒe kpɔɖeŋua sɔsrɔ̃ me  la, nye hã mezɔ mɔ yi teƒeteƒewo, eye meva nya Nigeria nɔviawo nyuie helɔ̃ wo vevie. Togbɔ be nu mede wo dzi le ŋutilãme gome o, eye nu siwo bɔ ɖe amewo si le dukɔ deŋgɔwo me la menɔ wo si o hã la, ale si wokpɔa dzidzɔe kple ale si nu siwo le wo si la dzea wo ŋui la ɖee fia kɔtɛ be menye ga alo nunɔamesiwoe nana ame kpɔa dzidzeme vavãtɔ le agbe me o. Ale si nɔnɔmeawo nɔ na wo evɔ wonɔa dzadzɛ eye woƒe dzadzraɖo dea bubu kpekpeawo ŋu la wɔ dɔ ɖe dzinye ŋutɔ. Ne wogbɔna takpekpe la, wo dometɔ geɖewo ɖoa lɔriwo, kple bɔs siwo wowɔ le dukɔa me, siwo woyɔna be bolekajas; * bɔs siawo ƒe axawo dzi le nuvo. Zi geɖe la, nuŋɔŋlɔ siwo le bɔs siawo dzi la hea ame ƒe susu. Wo dometɔ ɖekae nye: “Tsigege toŋtoŋ ye ƒo ƒu zu atsiaƒu gbanaa.”

Susu le nya mawo me vavã! Ame sia ame ƒe wɔƒe le vevie; míawo hã míewɔ mía tɔ sinua. Kaka ƒe 1974 naɖo la, Nigeria ƒe gbeƒãɖelawo ƒe xexlẽme ɖo 100,000. To vovo na Amerika la, Nigeria ye nye dukɔ gbãtɔ si ɖo xexlẽme ma gbɔ. Gbeƒãɖeɖedɔa kpɔ dzidzedze vavã!

Nigeria ƒe Dukɔmeviʋaa nɔ edzi yim vevie tso ƒe 1967 va ɖo ƒe 1970 me esime míenɔ dzidziɖedzi sia kpɔm. Mía nɔvi siwo le Biafra le Niger Tɔsisia ƒe go kemɛ dzi la megate ŋu vaa alɔdzedɔwɔƒea o ɣleti geɖe. Ehiã kokoko be míatsɔ gbɔgbɔmenuɖuɖu ayi na wo. Abe ale si megblɔe va yi le gɔmedzedzea ene la, míetso tɔsisia zi gbɔ zi geɖe, eye gbedodoɖa kple ŋuɖoɖo ɖe Yehowa ŋue kpe ɖe mía ŋu.

Meɖoa ŋku ale si míaƒe agbe ɖoa afɔku me le asrafo ŋutasẽlawo si me, kple ale si míate ŋu axɔ dɔlélewo kpakple afɔku bubu siwo ate ŋu ava mía dzi le Niger Tɔsisia tsotso me la dzi vevie. Esesẽna na mí be míato dukɔa ƒe asrafoha siwo nɔa ŋku lém ɖe amewo ŋu tsitotsito la ŋu, gake esi gaɖi vɔvɔ̃ wue nye be míato asrafo siwo xe mɔwo le Biafra ƒe akpa dzi la gbɔ. Meɖo ŋku edzi be gbe ɖeka la, meɖo akro aɖe le zã me tso Niger Tɔsisia tso Asaba yi Onitsha; eyome meyi Enugu ɖade dzi ƒo na dzikpɔla siwo le afi ma. Ɣebubuɣi la, meyi ɖade dzi ƒo na hamemetsitsi siwo le Aba; ɣemaɣi la, wode se na dua me tɔwo be ame aɖeke nagasi akaɖi le zã me o, ale be wòagahe futɔwo ƒe susu ava wo dzi o. Esi mekpe kple nɔviawo gbe ɖeka le Port Harcourt la, eva hiã be míado gbe ɖa ahawu kpekpea nu kpata, elabe míese be dukɔa ƒe asrafohaa ɖu Biafra-srafowo dzi eye wogbã woƒe mɔxenuwo hege ɖe dua me.

Kpekpe vevi mawo na kakaɖedzi su mía nɔvi lɔlɔ̃awo si be Yehowa alé be na yewo, eye wona mɔfiame nɔviawo ku ɖe akpaɖekedzimademade kple ale si wòle vevie be woawɔ ɖekae hã ŋu; wohiã na mɔfiame mawo vevie le ɣeyiɣi mawo me. Mía nɔvi siwo le Nigeria la te ŋu to ʋunyaʋunya ƒe ɣeyiɣi sesẽ mawo me do dzidzedzetɔe. Woɖe lɔlɔ̃ si nu sẽ wu fuléle si nɔa to vovovo me tɔwo dome la fia, eye woyi edzi lé Kristotɔwo ƒe ɖekawɔwɔ me ɖe asi. Mɔnukpɔkpɔ gã aɖee wònye nam be menɔ kpli wo le ɣeyiɣi sesẽ mawo me!

Le ƒe 1969 me la, Nɔviŋutsu Milton G. Henschel ye nye “Ŋutifafa le Anyigba Dzi” Dukɔwo Dome Takpekpe si wowɔ le Yankee Stadium, le New York, la ƒe zimenɔla, eye mɔnukpɔkpɔ su asinye menye eƒe kpeɖeŋutɔ, eye esia wɔe be mesrɔ̃ nu geɖe tso egbɔ. Mɔnukpɔkpɔ sia va ɖe ɣeyiɣi nyuitɔ dzi, elabena le ƒe 1970 me la, míewɔ ‘Ame Siwo Ŋu Mawu Kpɔa Ŋudzedze Ðo’ Dukɔwo Dome Takpekpe le Lagos, Nigeria. Yehowa ƒe yayra koe na be takpekpea te ŋu dze edzi, elabe ɖeko dukɔmeviʋaa ke teti koe nye ema míewɔ takpekpea. Takpekpe sia ɖe dzesi etɔxɛe, elabe ame 121,128 ye de takpekpe sia si wowɔ le gbegbɔgblɔ 17 sɔŋ me le teƒe ɖeka ma ke. Nɔviŋutsu Knorr kple Nɔviŋutsu Henschel kpakple nɔvi bubu siwo tso Amerika kple England la da yameʋuwo va takpekpea, eye wokpɔ eteƒe esime nusrɔ̃la yeye siwo ƒe xexlẽmee nye 3,775 la xɔ nyɔnyrɔ; tso keke Pentekoste ŋkekea dzi va de asi na ɣemaɣi la, emae nye takpekpe siwo me ame gbogbo mawo gbegbe xɔ nyɔnyrɔ zu Kristotɔwo le la dometɔ ɖeka! Le nye agbe me ŋkekewo katã me la, ɣeyiɣi si me míewɔ ɖoɖo ɖe takpekpe sia ŋu lae nye ɣeyiɣi si me vovo menɔ ŋunye kura o wu bubu ɖe sia ɖe. Menye ɖeko gbeƒãɖelawo ƒe xexlẽme dzi ɖe edzi o, ke edzi ɖe edzi zi ɖeka kpoyi!

Le ƒe 30 kple edzivɔ siwo metsɔ nɔ Nigeria me la, mewɔ dzikpɔla mɔzɔla ƒe dɔa ɣeaɖewoɣi eye mewɔ alɔdzewo dzikpɔla ƒe dɔa hã le Ɣetoɖoƒe Afrika dukɔ aɖewo me ɣeaɖewoɣi; eye mese vivi na dɔ siawo ŋutɔ. Edzɔa dzi na dutanyanyuigblɔlawo ŋutɔ be míevaa wo gbɔ va dea dzi ƒo na wo dometɔ ɖe sia ɖe! Dzidzɔ gã aɖee wònye nam be mɔnukpɔkpɔ su asinye mete ŋu kpe ɖe wo ŋu woka ɖe edzi bliboe be womegblẽ yewo ɖi o! Meva srɔ̃e le subɔsubɔdɔ sia wɔwɔ me be, ele vevie ŋutɔ be míatsɔ ɖe le eme na amewo ale be míate  ŋu akpe ɖe wo ŋu woayi ŋgɔ le Yehowa subɔsubɔ me, eye woasẽ ŋu ahalé ɖekawɔwɔ si le Yehowa ƒe habɔbɔa me la me ɖe asi sesĩe.

Yehowa ƒe kpekpeɖeŋu mee míete ŋu nɔ te ɖe nɔnɔme sesẽ siwo do mo ɖa le dukɔmeviʋaa megbe kple dɔléle siwo va mía dzi la nu dzidzedzetɔe. Míekpɔe dze sii ɣesiaɣi be Yehowa le mía yram. Oris gblɔ be:

“Asrãdɔ lé mí ame evea siaa zi gbɔ zi geɖe. Ɣeaɖeɣi la, asrãdɔ sesẽ aɖe lé Worth wòyi ɖi me, eye wosikae ɖe kɔ aɖe dzi le Lagos. Ðɔktaa gblɔ nam be ɖewohĩ matsi agbe o, gake meda akpe na Yehowa be ehaya! Esi wònyɔ tso ɖi me la, eɖi ɖase na dɔnɔdzikpɔla si nɔ egbɔ kpɔm la tso Mawu Fiaɖuƒea ŋu. Emegbe la, nye kple Worth míeyi ɖasrã dɔnɔdzikpɔlaa, si ŋkɔe nye Aƒetɔ Nwambiwe, la kpɔ ale be míatu eƒe ɖetsɔleme ɖo. Eva xɔ nyateƒea, eye emegbe la, eva zu hamemetsitsi le Aba. Mɔnukpɔkpɔ su nye hã asinye mekpe ɖe ame geɖe ŋu wova zu Yehowa subɔla dovevienuwo, wo dometɔ aɖewo gɔ̃ hã nye ame siwo sẽ ŋu le Moslemtɔwo ƒe subɔsubɔ me tsã. Edzɔ dzi na mí ŋutɔ be míeva nya nu tso Nigeriatɔwo, woƒe dekɔnuwo, kple woƒe gbegbɔgblɔwo ŋu helɔ̃ wo.”

Nu bubu si míegasrɔ̃ ye nye esi: Hafi míate ŋu akpɔ dzidzedze le subɔsubɔdɔa wɔwɔ me le dutadukɔ aɖe me la, ele vevie be míasrɔ̃ ale si míalɔ̃ nɔviawo aleke kee woƒe dekɔnuwo ɖato vovo na mía tɔe o.

Esi míesubɔ le Betel le Nigeria ƒe aɖewo vɔ la, wode dɔ yeye asi na mí le ƒe 1987 me be míayi aɖawɔ dutanyanyuigbɔgblɔdɔa le Karib-ƒukpo dzeani si nye St. Lucia dzi. Subɔsubɔ le afi ma do dzidzɔ na mí ŋutɔ, gake míedo go kuxi aɖewo hã. To vovo na Afrika, afi si ŋutsu ɖeka tea ŋu ɖea nyɔnu geɖe le la, le St. Lucia ya, ŋutsu kple nyɔnu tea ŋu nɔa wo nɔewo gbɔ srɔ̃maɖemaɖee. Gake Mawu ƒe Nyaa, si ŋu ŋusẽ le la kpe ɖe míaƒe Biblia nusrɔ̃vi geɖewo ŋu wowɔ tɔtrɔ siwo hiã.

Esi tsitsi wɔe be ŋusẽ megava nɔ mía ŋu ale o ta la, Dɔdzikpɔhaa wɔ ɖoɖo na mí lɔlɔ̃tɔe be míava subɔ le habɔbɔa ƒe dɔwɔƒegã le Brooklyn, New York, le Amerika, le ƒe 2005 me. Medaa akpe na Yehowa gbe sia gbe be wòna meɖe Oris. Gake míaƒe futɔ vɔ̃ɖi si nye ku va xɔe le asinye le ƒe 2015 me, eye esia na mese veve wu gbɔgblɔ. Kpeɖeŋutɔ si ɖeke mesɔ kplii o ye wònye nam; enye srɔ̃nyɔnu lɔ̃ame si gbɔ nyemelɔ̃a nu le kura o. Melɔ̃ Oris vevie le míaƒe srɔ̃ɖeɖe ƒe 68 la katã me. Míeva de dzesii be, nu si akpe ɖe mía ŋu míakpɔ dzidzɔ le srɔ̃ɖeɖe kple hamea me siaa ye nye be míade bubu tanyenye ƒe ɖoɖoa ŋu, míatsɔ ke faa, míabɔbɔ mía ɖokui ɣesiaɣi, eye míaɖe gbɔgbɔa ƒe kutsetsea afia.

Ɣesiaɣi si dzi di be yeaɖe le mía ƒo alo mɔkpɔkpɔ di be yeabu ɖe mí la, míekpɔa Yehowa sinu be wòayra ɖe míaƒe agbagbadzedzewo dzi. Esi Yehowa yi edzi nɔ mía ɖɔm ɖo ta la, míeva kpɔnɛ be nuwo va nyona kura wu tsã, ke hã, nu nyuitɔ kekeake gale ŋgɔ gbɔna!—Yes. 60:17; 2 Kor. 13:11.

Yehowa yra ɖe subɔsubɔdɔ si dzinyelawo kple nɔvi bubuwo wɔ le Trinidad Kple Tobago dukɔa me la dzi ale gbegbe be, le ƒe 2017 subɔsubɔƒea ƒe akɔntabubu nu la, ame 9,892 ye va le subɔsubɔ vavãtɔ ƒe akpa dzi. Le Aruba la, nɔvi geɖewo ku kutri vevie do ŋusẽ hame gbãtɔ si nɔ afi ma, si me menɔ kpɔ la. Hame 14 sɔŋ ye le ƒukpo ma dzi fifia, eye wole dzidzedze kpɔm le subɔsubɔdɔa me. Le Nigeria la, gbeƒãɖelawo dzi ɖe edzi va zu ameha gã nyadri aɖe si ƒe xexlẽmee nye ame 381,398. Eye le St. Lucia ƒukpoa dzi la, ame 783 ye le gbeƒã ɖem Yehowa ƒe Fiaɖuƒea.

Fifia, mexɔ ƒe 90 kple edzivɔ. Psalmo 92:14 gblɔ tso ame siwo wodo ɖe Yehowa ƒe aƒe me la ŋu be: “Woayi edzi anɔ ku tsem le woƒe tsitsime gɔ̃ hã; ŋusẽ anɔ wo ŋu, eye woada ama.” Medaa akpe na Yehowa ɖe mɔnukpɔkpɔ siwo wònam le eƒe subɔsubɔdɔa me la ta. Kristotɔwo ƒe domenyinu xɔasi si mexɔ tso dzinyelawo gbɔ la ʋãm be masubɔ Yehowa bliboe. Eye le Yehowa ƒe amenuveve me la, meda ama ‘mlɔmlɔmlɔ [le kpɔɖeŋunyagbɔgblɔ nu] le nye Mawu ƒe xɔxɔnuwo.’—Ps. 92:13.