Dzo kpo yi emenuwo dzi

Dzo kpo yi emenuawo dzi

 NYATI SI LE AKPAA DZI

Nu Kae Nye Dzidzedzekpɔkpɔ Vavã?

Nu Kae Nye Dzidzedzekpɔkpɔ Vavã?

NU KAE vɔ̃ɖi wu kpododonu? Eyae nye yaɖidzidzedzekpɔkpɔ alo alakpadzidzedzekpɔkpɔ. Elabe ne èdo kpo nu le nanewɔwɔ me la, àte ŋu aɖe afɔ aɖewo atsɔ aɖɔ nɔnɔmea ɖo. Ne mète ŋu ɖɔ nɔnɔmea ɖo o hã la, àsrɔ̃ nu tso nu si dzɔa me ahaɖoe kplikpaa be yeawɔe wòanyo wu ɣebubuɣi.

Gake mele alea le yaɖidzidzedzekpɔkpɔ ya gome o. Ana nàsusui be yele dzidzedze kpɔm, evɔ wòhenye to boŋ yim nèle hafi. Kaka nàva nya la, gbada yi.

Bu kpɔɖeŋu sia ŋu kpɔ. Yesu bia kpɔ be: “Viɖe kae wòanye na ame, ne xexe blibo la katã zu etɔ, gake wòbu eƒe luʋɔ?” (Mateo 16:26) Nya sia sɔ kple ame siwo tia ga kple nu siwo ga ate ŋu aƒle la yome ŋkubiãtɔe, elabe nu sia tututue nye yaɖidzidzedzekpɔkpɔ. Dɔwɔwɔŋutiɖaŋuɖola Tom Denham ŋlɔ bena: “Mɔkpɔkpɔ be woagado ye ɖe ŋgɔ le dɔ me ale be ɖoƒe gã nasu ye si kple ga geɖe alo nunɔamesi geɖe kpɔkpɔ ko ŋu bubu meɖia kɔ na ame o. Esusu be gakpɔkpɔe nye dzidzedzekpɔkpɔ nye nuŋumabumabu yi ŋgɔe si nana be ame va ɖia gbɔlo mlɔeba.”

Edze ƒãa be ame geɖe alɔ̃ ɖe nya sia dzi egbea. Esi wobia gbe amewo le United States la, woyɔ nu 22 be “woawoe nana wokpɔa dzidzedze,” eye “ga geɖe ƒe amesinɔnɔe” nye nu 20 lia le nu siwo woyɔ la dome. Nu gbãtɔ siwo woyɔ la dometɔ aɖewoe nye lãmesẽ, ƒomedodo nyui me nɔnɔ kple amewo kpakple dɔwɔɖui si wɔwɔ vivia ame nu.

Eme kɔ be ame geɖewo tea ŋu dea vovototo yaɖidzidzedzekpɔkpɔ kple dzidzedzekpɔkpɔ vavã dome, ne wobia gbe wo. Gake mele bɔbɔe kura be ame natso nya me wòaɖee afia be ekpɔ nu si dzidzedzekpɔkpɔ vavã nye dzesii o.