Dzo kpo yi emenuwo dzi

Dzo kpo yi emenuawo dzi

 Biblia Ƒe Nukpɔsusu

Nu Kae Nye Ʋɔnudrɔ̃gbe La?

Nu Kae Nye Ʋɔnudrɔ̃gbe La?

Biblia gblɔ be Mawu ɖo “ŋkeke aɖe ɖi, si dzi wòɖo tame be yeadrɔ̃ ʋɔnu anyigba dzi tɔwo katã le.” (Dɔwɔwɔwo 17:31) Ame geɖe medina be yewoase be woava drɔ̃ ʋɔnu yewo le etsɔme o. Nenemae wòle le wò hã gowòmea?

NENYE nenemae la, ekema nyae be Mawu ƒe ɖoɖo si me lɔlɔ̃ lee Ʋɔnudrɔ̃gbe la nye, eye be ahe yayra avae na ameƒomea—ame siwo ku hã le eme—ale be wòafa akɔ na wò. (Mateo 20:28; Yohanes 3:16) Nu ka tae wòhiã be Mawu naɖo Ʋɔnudrɔ̃gbe aɖe ɖi? Nu ka tututue ayi edzi le ʋɔnudrɔ̃ŋkeke ma dzi?

Ʋɔnudrɔ̃gbe La—Nu Ka Tae Wòhiã?

Esi Mawu wɔ amegbetɔwo ɖe anyigba dzi la, menye eƒe tameɖoɖoe nye be woanɔ anyigba dzi sẽe bene woasu te nyuie ayi dziƒo o. Ðe wòwɔ amegbetɔwo be woanɔ agbe tegbee le anyigba dzi. Togbɔ be atsu kple asi gbãtɔa ƒe ŋutilã kple susu de blibo hã la, wodze aglã ɖe Mawu ŋu. Esia wɔe be wobu mɔnukpɔkpɔ si ʋu ɖi na wo be woanɔ agbe mavɔ la, eye wohe nu vɔ̃ kple ku va woƒe dzidzimeviwo dzi.—1 Mose 2:15-17; Romatɔwo 5:12.

Ʋɔnudrɔ̃gbea nye ɣeyiɣi si axɔ ƒe akpe ɖeka, si me mɔnukpɔkpɔ agasu amegbetɔwo si le be woƒe asi nagasu nu si Adam kple Xawa bu la dzi. * De dzesii be Dɔwɔwɔwo 17:31 si míeyɔ va yi la gblɔ be nu si ayi edzi le Ʋɔnudrɔ̃gbea la alɔ “anyigba dzi tɔwo katã” ɖe eme. Ame siwo woatso afia dzɔdzɔe na le ʋɔnudɔdrɔ̃ ma me la ade blibo ahanɔ anyigba dzi tegbee. (Nyaɖeɖefia 21:3, 4) Eya ta Ʋɔnudrɔ̃gbea ana ta me si Mawu ɖo le gɔmedzedzea me ɖe amegbetɔwo kple anyigbaa ŋu la nava eme.

Ame si Mawu ɖo be wòanye Ʋɔnudrɔ̃la le ŋkeke ma dzie nye Kristo Yesu. Biblia gblɔ be Yesu ‘adrɔ̃ ʋɔnu agbagbeawo kple kukuawo.’ (2 Timoteo 4:1) Ame kawoe nye ‘agbagbe’ siwo woadrɔ̃ ʋɔnui? Alekee woagbɔ agbe kukuawo be woagava nɔ “anyigba dzi”?

 Yesu Adrɔ̃ Ʋɔnu “Agbagbeawo”

Míele nuɖoanyi sia ƒe nuwuwu si wogblɔ ɖi, esime Mawu aɖe ameƒome gblẽku sia ƒe nuɖoanyia ƒe akpa sia akpa ɖa ahatsrɔ̃ ame vɔ̃ɖiwo ɖa la, gogom. Ame siwo atsi agbe le nuɖoanyi sia ƒe nuwuwue nye ‘agbagbe’ siwo woadrɔ̃ ʋɔnui.—Nyaɖeɖefia 7:9-14; 19:11-16.

Le Ʋɔnudrɔ̃gbe ma si axɔ ƒe 1,000 la, Kristo Yesu kple ame 144,000, siwo nye ŋutsu kple nyɔnu siwo wofɔ ɖe tsitre be woaɖanɔ agbe le dziƒo la aɖu fia ɖe anyigba la dzi. Woanye fiawo kple nunɔlawo, eye woanɔ Yesu ƒe tafevɔsa ƒe viɖewo ŋu dɔ wɔm vivivi va se ɖe esime ameƒomea ƒe susu kple ŋutilã de blibo.—Nyaɖeɖefia 5:10; 14:1-4; 20:4-6.

Le Ʋɔnudrɔ̃gbea la, woaxe mɔ na Satana kple eƒe gbɔgbɔ vɔ̃wo be woagakpɔ ŋusẽ ɖe amegbetɔwo dzi o. (Nyaɖeɖefia 20:1-3) Gake ne Ʋɔnudrɔ̃gbea wu enu la, woaɖe mɔ na Satana wòado ame siwo le agbe ɣemaɣi la dometɔ ɖe sia ɖe kpɔ be ayi edzi awɔ nuteƒe hã. Ame siwo lé nuteƒewɔwɔ me ɖe asi na Mawu la ato dodokpɔ si me Adam kple Xawa do kpo nu le la me ado dzidzedzetɔe. Woatso afia na wo be wodze anɔ agbe mavɔ le Paradiso si wogaɖo anyi la me. Woatsrɔ̃ ame siwo tiae be yewoadze aglã ɖe Mawu ŋu la ɖa tegbee, abe ale si wòanɔ na Satana kple eƒe gbɔgbɔ vɔ̃wo hã ene.—Nyaɖeɖefia 20:7-9.

Ʋɔnudɔdrɔ̃ “Kukuawo”

Biblia gblɔ be kukuawo “afɔ” le Ʋɔnudrɔ̃gbe la. (Mateo 12:41) Yesu gblɔ be: “Gaƒoƒo la gbɔna, esi me ame siwo katã le ŋkuɖodziyɔdowo me la ase eƒe gbe, eye woado go, ame siwo wɔ nu nyuiwo la, hena agbe ƒe tsitretsitsi, ame siwo wɔ nu vlowo la, hena ʋɔnudɔdrɔ̃ ƒe tsitretsitsi.” (Yohanes 5:28, 29) Menye ame siwo ku la ƒe luʋɔwoe wowɔnɛ o. Kukuawo menyaa naneke kura o, eye luʋɔ aɖeke mele wo me, si yia edzi nɔa agbe le woƒe ku megbe o. (Nyagblɔla 9:5; Yohanes 11:11-14, 23, 24) Yesu afɔ ame siwo le alɔ̃ dɔm le ku me la woagava nɔ agbe le anyigba dzi.

Nu siwo ame siawo wɔ hafi ku dzie woanɔ te ɖo adrɔ̃ ʋɔnu woa? Ao. Biblia fia nu be “ame si ku la, woɖee tso eƒe nu vɔ̃ me.” (Romatɔwo 6:7) Eya ta abe ale si wòanɔ le ame siwo atsi agbe le nuɖoanyi sia ƒe nuwuwu gome ene la, woadrɔ̃ ʋɔnu ame siwo woafɔ ɖe tsitre la ɖe “woƒe dɔwɔwɔwo,” si fia nu siwo woawɔ le Ʋɔnudrɔ̃gbea la “nu.” (Nyaɖeɖefia 20:12, 13) Woƒe nuwɔnawo dzie nu siwo ado tso woƒe tsitretsitsia me la anɔ te ɖo, ate ŋu anye tsitretsitsi hena agbe mavɔ nɔnɔ loo alo tsitretsitsi hena tsɔtsrɔ̃. Ame siwo woafɔ ɖe tsitre la dometɔ geɖe ava srɔ̃ nu tso Yehowa Mawu kple eƒe nudidiwo hena agbetsitsi ŋu. Mɔnukpɔkpɔ asu wo si be woanɔ agbe ɖe Mawu ƒe lɔlɔ̃nu nu, eye woana agbe mavɔ wo le anyigba dzi.

Susu Aɖeke Meli Si Ta Wòle Be Míavɔ̃ O

Menye mɔfiamewo koe ame siwo anɔ agbe ɣemaɣi la axɔ tso Mawu gbɔ le Ʋɔnudrɔ̃gbea o, ke boŋ anye ɣeyiɣi si woatsɔ nu siwo wosrɔ̃ la ade dɔwɔwɔ me ahaxɔ yayra geɖewo to ema wɔwɔ me hã. Kpɔ ale si gbegbe dzi adzɔ wò ɖa ne èva wɔ ɖeka kple wò ame vevi siwo wofɔ ɖe tsitre, eye mia kpli wo miele blibo dem vivivi!

Mawu aɖe mɔ na Satana wòado amegbetɔwo kpɔ le Ʋɔnudrɔ̃gbea ƒe nuwuwu be woayi edzi awɔ nuteƒe hã. Gake mehiã be míatsi dzodzodzoe alo avɔ̃ o. Kaka Ʋɔnudrɔ̃gbea nawu enu la, ame siwo katã anɔ agbe ɣemaɣi la asu te bliboe ato dodokpɔ mamlɛa me. Eya ta mɔ siwo dzi Mawu ato ana ta me si wòɖo be yeaɖɔ nu siwo mía dzila gbãtɔwo ƒe aglãdzedze ɖe eŋu le Eden bɔa me gblẽ le mía ŋu ɖo keŋkeŋ la dometɔ ɖekae nye Ʋɔnudrɔ̃gbe ƒe ɖoɖo si wòwɔ.— g10-E 01.

^ mm. 7 Le Biblia me la, nya “ŋkeke” ate ŋu afia ɣeyiɣi ƒe didime vovovowo.

Kpɔ ale si gbegbe dzi adzɔ wò ɖa ne èva wɔ ɖeka kple wò ame vevi siwo wofɔ ɖe tsitre