Dzo kpo yi emenuwo dzi

Dzo kpo yi emenuawo dzi

Ale Si Nàkpɔ Viwòwo Tae

Ale Si Nàkpɔ Viwòwo Tae

 Ale Si Nàkpɔ Viwòwo Tae

MÍA dometɔ akpa gãtɔ medina be yeabu gbɔdɔnuwɔnawo wɔwɔ ɖe ɖeviwo ŋu madzemadzee ƒe nyaa ŋu boo o. Nuwɔna sia ŋu bubu ɖeɖe dzaa doa dziku na dzilawo ŋutɔ! Gake nuwɔna vɔ̃ɖi sia nye ŋɔdzinu si le dzɔdzɔm ŋutɔŋutɔ le egbexexea me, eye egblẽa nu le ɖeviwo ŋu vevie ŋutɔ. Ðe wòhiã be míadzro nya sia mea? Wò ya bu eŋu kpɔ ko, nu kae nàdi be yeawɔ atsɔ akpɔ viwò ta? Nusɔsrɔ̃ tso nuwɔna wɔnublanui sia si le dzɔdzɔm ŋu mebia agbagbadzedze boo aɖeke o. Nu sia nyanya akpe ɖe ŋuwò le viwò ta kpɔkpɔ me.

Mègana gbɔdɔnuwɔnawo wɔwɔ ɖe ɖeviwo ŋu madzemadzee ƒe kuxi si le agbogbo dom ɖe edzi la naɖe dzi le ƒowò o. Ne mede ɖeke o la, ŋusẽ aɖe le asiwò si mele viwò ya si o—enye ŋutete si ava su viwòa si le ƒe geɖe, alo ƒe blananewo gɔ̃ hã megbe. Esi nènɔ tsitsim la, sidzedze, nuteƒekpɔkpɔ, kple nunya geɖe va su asiwò. Tu wò ŋutetewo ɖo eye nàzã wo atsɔ akpɔ viwò ta. Míadzro afɔ vevi etɔ̃ siwo dzila ɖe sia ɖe ate ŋu aɖe la me. Woawoe nye: (1) Nye viwòa ta kpɔla vevitɔ tso gbɔdɔnuwɔnawo wɔwɔ ɖe eŋu me, (2) fia viwòa nu vevi siwo wòle be wòanya tso kuxia ŋu, eye (3) fia viwòa nu vevi siwo wòate ŋu awɔ atsɔ akpɔ eɖokui ta.

Ðe Nènye Viwòa Ta Kpɔla Vevitɔa?

Dzilawo koŋ ƒe agbanɔamedzie ɖeviwo ta kpɔkpɔ tso gbɔdɔnuwɔnawo wɔwɔ ɖe wo ŋu me nye, ke menye ɖeviawoe o. Eya ta ehiã be dzilawo nanya nu geɖe tso kuxia ŋu gbã hafi woana hehe ɖeviawo. Ne dzilae nènye la, nanewo li siwo wòle be nànya ku ɖe gbɔdɔnuwɔnawo wɔwɔ ɖe ɖeviwo ŋu ŋuti. Ehiã be nànya ame siwo ƒomevi wɔa nu mawo ɖe ɖeviwo ŋu kpakple ale si wowɔnɛ. Zi geɖe la, dzilawo susuna be ame siwo wɔa nu siawo ɖe ɖeviwo ŋu la nyea ame tutɔ aɖewo siwo dea xa ɖi hedina be yewoafi ɖeviawo dzo aɖadɔ wo gbɔ akpasesẽe. Nyateƒee, ame siawo ƒomevi li. Wogblɔa wo ŋuti nya le nyatakakamɔnuwo dzi míesena zi geɖe. Gake womede ha o. Ame siwo wɔa gbɔdɔnuwo ɖe ɖeviwo ŋu madzemadzee dometɔ 90 le alafa me nye ame siwo ɖeviawo nya nyuie heka ɖe wo dzi.

Ðewohĩ manɔ bɔbɔe na wò be nàxɔe ase be aƒelika, nufiala, atikewɔla, hehenala, alo ƒometɔ aɖe adi be yeawɔ nu gbegblẽ sia ɖe viwò ŋu o. Gake ame akpa gãtɔ mele nenema o. Eya ta mehiã be nànɔ nazã bum ɖe ame nyanyɛ ɖe sia ɖe ko ŋu o. Ke hã, àte ŋu  akpɔ viwò ta to ale si ame siwo wɔa gbɔdɔnu mawo ɖe ɖeviwo ŋu ŋutɔŋutɔ wɔa nui nyanya me.—Kpɔ aɖaka si le axa 16.

Woƒe ayemɔwo nyanya ate ŋu akpe ɖe ŋuwò nàsu te nyuie anye viwòa ta kpɔla vevitɔ. Le kpɔɖeŋu me, ne ame aɖe si tsɔa ɖe le eme na ɖeviwo wu ame tsitsiwo la wɔa nu ɖe viwò ŋu etɔxɛe, léa be nɛ henaa nu vovovowoe alo tsɔa eɖokui nana faa be yeakpɔ viwòa dzi ne mèli o, alo be yeakplɔe ado go la, nu kae nàwɔ? Àtso nya me be enye ame si wɔa gbɔdɔnuwo ɖe ɖeviwo ŋua? Ao. Mègaƒo nya ta enumake nenema o. Ðewohĩ susu gbegblẽ aɖeke mele amea si o. Ke hã, esia ate ŋu ana nànɔ ŋudzɔ. Biblia gblɔ be: “Amebebewu xɔa nya sia nya dzi sena; ke nunyala léa ŋku ɖe eƒe afɔɖeɖe ŋu.”—Lododowo 14:15.

Nenɔ susu me na wò be dɔmenyowɔwɔ si gbɔ eme ate ŋu anye dzesi. Nɔ ŋku lém ɖe ame sia ame si lɔ̃na faa zãa ɣeyiɣi geɖe ɖe viwòa ŋu la ŋu nyuie. Na ame sia ƒomevi nanya be, sẽ kple sẽ la, yeate ŋu ava lé ŋku ɖe ye via ŋu. Melissa kple Brad, siwo nye dzila siwo si ŋutsuvi etɔ̃ le la, nɔa ŋudzɔ ɖe wo vi gbegblẽ ɖe ame tsitsi aɖe gbɔ ŋu. Esime wonɔ haƒoƒo fiam wo vi aɖe le aƒe me la, Melissa gblɔ na hafialaa be: “Sẽ kple sẽ la, mava nɔ míakpɔm ɖa.” Adze abe ɖe ŋudzɔnɔnɔ alea gbɔ eme ene, gake esia wɔwɔ aɖe vi na dzila siawo wu be woava xa nu emegbe.

Tsɔ ɖe le nu siwo katã viwòa wɔna, ame siwo ƒomevi exɔlɔ̃wo nye, kple eƒe sukudɔwɔnawo me vevie. Nya nu sia nu tso tsaɖiɖi ɖe sia ɖe si ŋu wowɔ ɖoɖo ɖo ŋuti. Susuŋutinunyala aɖe si zã ƒe 33 le gbɔdɔnuwɔnawo wɔwɔ aɖe ame ŋu madzemadzee ŋuti nyawo gbɔ kpɔkpɔ me la de dzesii be, nuwɔna siawo dometɔ geɖe siwo wotsɔ va ye gbɔ la nye esiwo dzilaawo ƒe ŋudzɔnɔnɔ ɖeɖe dzaa ate ŋu axe mɔ na hafi. Eka nya ta be ame aɖe si wɔa gbɔdɔnuwo ɖe ɖeviwo ŋu, si wolé de ga la, gblɔ be: “Dzilawo ŋutɔwoe tsɔa wo viwo nana mí. . . . Wonana be esia nɔa bɔbɔe nam.” Nenɔ susu me na wò be ɖevi siwo nu woate ŋu able bɔbɔe la ƒe nue dzɔa dzi na ame siawo. Ne dzilawo tsɔa ɖe le wo viwo ƒe nuwɔnawo me vevie la, esia nana wòsesẽna ŋutɔ be ame gblẽku mawo ƒe asi nasu wo dzi.

Mɔ bubu si nu nàte ŋu anye viwòa ta kpɔla vevitɔ lee nye be nànye toɖola nyui. Ƒãa hafi ɖeviwo te ŋu ɖea gbɔdɔnuwɔna aɖe si wowɔ ɖe wo ŋu gblɔna tẽe; ekpea ŋu na wo, eye wovɔ̃na ɖe ale si amewo awɔ nui ne wosee la ta. Eya ta ɖo to eƒe nyawo nyuie eye nànɔ ŋudzɔ ɖe dzesi suetɔ kekeake ŋu. * Ne viwò gblɔ nya aɖe si tso dzika ƒo na wò la, bia nya aɖewoe tufafatɔe bene wòaɖe nu sia nu me na wò. Ne egblɔ be yemedi be woagagblẽ ye ɖe vidzikpɔla aɖe gbɔ ake o la, biae be, nu ka tae hã. Ne egblɔ na wò be ame tsitsi aɖe nɔa fefe aɖewo fem kpli ye la, biae be: “Fefe ka tɔgbie? Nu kae wòwɔna na wò?” Ne eto nyatoƒoe be ame aɖe doa konukonui na ye la, biae be, “Afi kae wòlili asi  ɖo na wò?” Mègaŋe aɖaba ƒu eƒe ŋuɖoɖoawo dzi enumake ɖekematsɔlemetɔe o. Zi geɖe la, ame siwo wɔa gbɔdɔnuwo ɖe ɖeviwo ŋu la gblɔna na wo be ne wogblɔe la, ame aɖeke maxɔ wo dzi se o; eye nublanuitɔe la, nenema tututue wòdzɔna zi geɖe. Eye ne wowɔ gbɔdɔnuwo ɖe ɖevi aɖe ŋu la, be dzilawo naxɔ wo dzi se ahade dzi ƒo na wo nye afɔɖeɖe vevi aɖe si akpe ɖe ɖeviawo ŋu woƒe nuxaxaa dzi naɖe akpɔtɔ.

Fia Nu Vevi Aɖewo Viwòa Tso Nɔnɔmea Ŋu

Numekugbalẽ aɖe si woŋlɔ ku ɖe gbɔdɔnuwɔnawo wɔwɔ ɖe ɖeviwo ŋu ŋuti la ka nya ta be ame siwo wɔa nu sia dometɔ aɖe gblɔ be: “Ne miegblẽ ɖevi aɖe si menya naneke tso gbɔdɔnuwɔnawo ŋu o ɖe gbɔnye la, ke ɖevi si ŋu magawɔ gbɔdɔnuwo ɖoe nye ma mietsɔ de asi nam.” Nya blefulãmename siawo nye nuxlɔ̃amenya na dzilawo. Ame gblẽku siawo te ŋu blea ɖevi siwo menya naneke tso nuwɔna mawo ŋu o la bɔbɔe. Biblia gblɔ be sidzedze kple nunya ate ŋu aɖe mí “tso mɔ vɔ̃ dzi, le amesiwo gblɔa godzenya la ŋu.” (Lododowo 2:10-12) Menye nenemae nàdi be wòanɔ le viwò gome oa? Ekema mègahe ɖe megbe le afɔ vevi evelia si nàɖe atsɔ akpɔ viwòa ta, si nye nufiafiae tso nɔnɔmea ŋu la, ɖeɖe ŋu o.

Gake aleke nàwɔe? Ekpea ŋu na dzila geɖewo be woaɖo dze tso gbɔdɔnyawo ŋuti na wo viwo. Ðewohĩ nuƒoƒo tso gbɔdɔnyawo ŋu kpea ŋu na viwòa ya geɖe wu, eye anɔ eme be asesẽ nɛ ŋutɔ be wòado eŋutidzeɖoɖo ɖa. Eya ta anyo be nàxɔ ŋgɔ le esia wɔwɔ me. Melissa gblɔ be: “Míedzea egɔme kaba fiaa ŋutinu ɖe sia ɖe ƒe ŋkɔ wo. Míezãa ɖevinyagbɔgblɔ o, ke boŋ míeyɔa ŋutinu ɖe sia ɖe ŋkɔ abe ale si tututu woyɔnɛ ene, tsɔ fiaa wo be woƒe ŋutinu aɖeke  menye fefenu alo nu si ŋu woakpe ŋu le o.” Nufiafia wo tso gbɔdɔnuwɔnawo wɔwɔ ɖe wo ŋu madzemadzee ŋu va nɔa bɔbɔe wu. Dzila geɖewo gblɔna na wo viwo be ŋutinu siwo le woƒe atawo dome kpakple woƒe nowo nye woawo ŋutɔwo ɖeɖe ko tɔ eye wole etɔxɛ.

Heather, si ŋu míeƒo nu tso le nyati si do ŋgɔ me, gblɔ be: “Mía kple Scott míegblɔ na mía viŋutsuvia be eya ŋutɔ ɖeɖe ko tɔe eƒe aʋa nye, eye menye fefenue wònye o. Mele be ame aɖeke natsɔe afe fefe o—mele be Dada loo, Papa loo, alo ɖɔkta gɔ̃ hã natsɔe afe fefe o. Ne míekplɔe yi ɖɔkta gbɔ la, mieɖea nu me nɛ be ɖɔkta di be yeakpɔe ɖa be èle lãmesẽ me hã, eya ta ate ŋu aka asi eƒe aʋa ŋu.” Dzila evea siaa gblɔa nya siawo na wo via enuenu, eye wogblɔna nɛ be ɣesiaɣi si ame aɖe ka asi eŋu le mɔ si mesɔ o alo si ɖe fu nɛ nu la, ate ŋu ava gblɔe na yewo. Beléle na ɖeviwo kple mɔxexe na gbɔdɔnuwɔnawo wɔwɔ ɖe wo ŋu ŋuti nunyalawo ɖo aɖaŋu be ele be dzilawo katã naɖo dze siawo tɔgbi kple wo viwo.

Dzila geɖewo kpɔe be agbalẽ si nye Srɔ̃ Nu tso Nufiala Gã la Gbɔ * kpe ɖe yewo ŋuti ŋutɔ le nu sia fiafia yewo viwo me. Mɔfiame siwo le tẽe hefaa akɔ na ame le gbɔdɔnuwɔnawo wɔwɔ ɖe ɖeviwo ŋu ƒe afɔkua ŋu kple ale si woawɔ anɔ dedie ŋuti nyatakaka geɖe le agbalẽ sia ƒe ta 32 lia, si nye “Alesi Wokpɔ Yesu Tae,” la me. Melissa gblɔ be: “Agbalẽa kpe ɖe mía ŋu míena mía viwo gakpɔ kakaɖedzi le nya siwo míawo ŋutɔwo míegblɔ na wo la ŋu.”

Le egbexexea me la, ehiã be ɖeviwo nanya be ame aɖewo li siwo dina be yewoaka asi ɖeviwo ŋu, alo be ɖeviwo naka asi yewo ŋu le mɔ aɖewo siwo mesɔ o nu. Mele be woagblɔ nuxlɔ̃amenya siawo le mɔ si ana ŋɔdzi nalé ɖeviawo alo ana womagaka ɖe ame tsitsi aɖeke dzi o nu o. Heather gblɔ be: “Nyatakaka si akpe ɖe wo ŋu woanɔ dedie koe wònye. Nu gbogbo siwo wogblɔna tsɔ xlɔ̃a nu ɖeviwo la dometɔ ɖeka ko wònye, eye wo dometɔ geɖe mekuna ɖe gbɔdɔnuwɔnawo wɔwɔ ɖe ɖeviwo ŋu ŋuti o. Medoa ŋɔdzi na vinyea kura o.”

Azɔ hã, ele be nàfia viwòa ale si wòada asɔ le toɖoɖo amewo me. Henenana ɖeviwo be woaɖo to le vevie, evɔ mele bɔbɔe o. (Kolosetɔwo 3:20) Gake ne dzilawo meɖɔ ŋu ɖo o la, woate ŋu awɔe le mɔ si mada asɔ o nu. Ne wofia ɖevi aɖe be wòaɖo to ame tsitsi ɖe sia ɖe ɣesiaɣi le nu sia nu me la, anɔ bɔbɔe be woawɔ gbɔdɔnuwo ɖe eŋu. Ame siwo wɔa gbɔdɔnuwo ɖe ɖeviwo ŋu la kpɔa ɖevi siwo wɔa nu sia nu si amewo bia tso wo si la dzea sii bɔbɔe. Dzila dzeaɖaŋuwo fiaa nu wo viwo be menye ame ɖe sia ɖe koe woaɖo to o. Nya siawo fiafia ɖeviwo mesesẽ na Krsitotɔwo ya o. Ðeko woagblɔ na ɖeviawo be: “Ne ame aɖe bia tso asiwò be nàwɔ nane si Yehowa Mawu gblɔ be menyo o la, mele be nàwɔe o. Mele be Dada alo Papa gɔ̃ hã nabia tso asiwò nenema o. Eye ɣesiaɣi si ame aɖe abia tso asiwò be nàwɔ nu gbegblẽ aɖe la, àte ŋu agblɔe na Dada alo Papa.”

Mlɔeba, mina ɖevia nanya be mele be ame aɖeke nabia tso esi be wòaɣla nya aɖe ɖe mi o. Migblɔ nɛ be ɣesiaɣi si ame aɖe abia tso esi be wòaɣla nya aɖe ɖe mi la, nena mianya. Nya ka kee woɖagblɔ nɛ o—ne wodo ŋɔdzi nɛ be yewoawɔ nu vevii gɔ̃ hã, alo ne eya ŋutɔ wɔ nu  gbegblẽ aɖe la—esɔ be wòava gblɔ nu sia nu si dzɔ la na Dada kple Papa ɣesiaɣi. Mele be woagblɔ mɔfiamenya siawo le mɔ si ana vɔvɔ̃ naɖo ɖevia nu o. Àte ŋu aka ɖe edzi nɛ be ame akpa gãtɔ mawɔ nu mawo—abe asikaka eƒe ŋutilã ƒe akpa si mele be woaka asii o, biabia tso esi be wòada Mawu ƒe se dzi, alo be wòana nya aɖe nanɔ ɣaɣla ene—ɖe eŋu o. Nyatakaka siawo le abe ale si ko wowɔa ɖoɖo ɖe dedienɔnɔ ŋu le dzodzeaƒe ta ene, ameɖokuitakpɔkpɔ ŋuti mɔfiamewo koe wonye, eye ɖewohĩ womava hiã na wo o.

Fia Ameɖokuitakpɔkpɔ Ƒe Mɔnu Bɔbɔe Aɖewo Viwòa

Afɔɖeɖe etɔ̃lia si me míadzroe nye be nàfia viwòa nu bɔbɔetɔ si wòate ŋu awɔ atsɔ akpɔ eɖokui ta ne ame aɖe di be yeawɔ nu si mesɔ o ɖe eŋu ne mieli o. Esia wɔwɔ ƒe mɔnu si ƒe dzi wode ƒo na dzilawo la le abe fefewɔwɔ ene. Dzilawo abiae be, “Nu kae nàwɔ ne . . . ?” eye ɖevia aɖo eŋu. Le kpɔɖeŋu me, woate ŋu abia be, “Nu kae nàwɔ ne míeyi nu ƒle ge le fiase gã aɖe me eye míebu ɖe mía nɔewo? Aleke nàwɔ ake ɖe ŋunye?” Ðewohĩ ɖevia ƒe ŋuɖoɖoa masɔ na wò tututu o, gake àte ŋu akpe ɖe eŋu to nya bubuwo biabiae me, abe “Ðe nàgate ŋu abu nu bubu aɖe si nàte ŋu awɔ bene nànɔ dedie wu la ŋua?”

Àte ŋu abia nya mawo tɔgbi atsɔ ana viwòa nagblɔ nu si wòsusu be yeate ŋu awɔ atsɔ akpɔ ye ɖokui ta ne ame aɖe di be yealé teƒe aɖewo siwo mesɔ be wòalé o la nɛ. Ne èkpɔ be nya mawo tɔgbi ana ɖevia natsi dzi le eɖokui me la, àte ŋu ana dzeɖoɖoa naku ɖe ɖevi bubu aɖe ŋu. Le kpɔɖeŋu me, àte ŋu agblɔ be: “Tsɔe be nyɔnuvi sue aɖee ma le eƒe ƒometɔ aɖe si wòlɔ̃na la gbɔ, eye eƒe ƒometɔ sia di be yealé teƒe aɖewo nɛ si mesɔ be wòalé o. Nu kae nèsusu be ɖevia ate ŋu awɔ atsɔ akpɔ eɖokui ta?”

Nu kae wòle be nàfia viwòa be wòawɔ le nɔnɔme siwo ŋu míeƒo nu tso le etame la tɔgbi me? Agbalẽŋlɔla aɖe gblɔ be: “Gbɔgblɔ moveviɖoɖotɔe be, ‘Nyemedi o!’ alo ‘Megawɔe o!’ alo ‘Ðe asi le ŋunye!’ ate ŋu ado ŋɔdzi na ame aɖe si di be yewɔ nu gbegblẽ ɖe viwòa ŋu la be wòatrɔ eƒe susu alo be wòadzudzɔ fuɖeɖe nɛ.” Na viwòa nawɔ nu siawo ƒe wɔwɔfia ʋɛ aɖewo bene kakaɖedzi nasu esi be wòate ŋu ado ɣli, asi du adzo le teƒea ava gblɔ nu si dzɔ la na wò. Ne edze be ɖevia se nu siawo siwo miefiae gɔme nyuie hã la, ate ŋu aŋlɔ wo be bɔbɔe le kwasiɖa alo ɣleti ʋɛ aɖewo megbe. Eya ta migbugbɔ fiae nu siawo edziedzi.

Ele be ɖevia dzi kpɔlawo katã, esiwo nye ŋutsuwo—eɖanye fofoa, atikɔmefofo, alo ƒometɔ bubu si nye ŋutsu o—hã nakpɔ gome le numedzodzroawo me. Nu ka tae? Nu si tae nye be ɖeko wòle abe ɖee ame siwo katã kpɔ gome le numedzodzroa me la le adzɔgbe ɖem na ɖevia le mɔ aɖe nu be yewomawɔ gbɔdɔnu mawo ƒomevi ɖe eŋu gbeɖe o ene. Nublanuitɔe la, ƒometɔwo ŋutɔwoe wɔa gbɔdɔnuwɔnawo ɖe ɖeviwo ŋu madzemadze zi geɖe. Nyati si kplɔe ɖo adzro ale si nàwɔ be wò ƒomea nanye dedienɔƒe le xexe gblẽku sia me la me.—g10/07.

[Etenuŋɔŋlɔwo]

^ mm. 10 Numekulawo de dzesii be, ɖevi siwo ŋu wowɔ gbɔdɔnuwɔnawo ɖo ɖea dzesi aɖewo fiana numaƒomaƒoe. Le kpɔɖeŋu me, ne ɖevi aɖe gate ɖevimenu si wòdzudzɔ xoxo la wɔwɔ ake, abe aɖuɖɔɖɔɖɔ ɖe aba dzi, dzila ŋu nɔnɔ kplikplikpli, alo ale si wòanɔ vɔvɔ̃m ne wogblẽ eya ɖeɖe ɖi ene la, ɖewohĩ anye dzesi be nane le dzɔdzɔm ɖe edzi. Mele be woabu dzesi siawo be wofia godoo be wowɔ gbɔdɔnuwo ɖe ɖevia ŋu o. Ðo dze kple ɖevia le tufafa me be nànya nu si tututu le fu ɖem nɛ ale be nàte ŋu afa akɔ nɛ, ade dzi ƒo nɛ ahakpɔ eta.

^ mm. 15 Yehowa Ðasefowoe tae.

[Nya si ɖe dzesi si le axa 15]

Nye viwòa ta kpɔla vevitɔ

[Nya si ɖe dzesi si le axa 17]

Fia nu vevi aɖewo viwòa tso nɔnɔmea ŋu

[Nya si ɖe dzesi si le axa 18]

Fia ameɖokuitakpɔkpɔ ƒe mɔnu bɔbɔe aɖewo viwòa

[Aɖaka si le axa 14]

GBƆDƆNUWƆNAWO WƆWƆ ÐE AME ŊU MADZEMADZEE—XEXEA ME KATÃ ƑE KUXIE

Le ƒe 2006 me la, Dukɔ Ƒoƒuawo ƒe dɔdzikpɔlagã ka nya ta na Dukɔ Ƒoƒuawo ƒe Aɖaŋudehagã ku ɖe ŋutasẽnuwɔwɔ ɖe ɖeviwo ŋu ŋuti numekuku si Dukɔ Ƒoƒuawo ƒe numekula aɖe wɔ le xexea me godoo la ŋu. Numekukua ɖee fia be le akɔnta si wobu le ƒe ɖeka aɖe ko me nyitsɔ laa nu la, “wodɔ kple [nyɔnuvi siwo ƒe xexlẽme ade miliɔn 150 kpakple ŋutsuvi siwo ade miliɔn 73, siwo mekpɔ xɔ ƒe 18 haɖe o la] akpasesẽe alo wɔ gbɔdɔnuwɔna bubu ƒomeviwo ɖe wo ŋu ŋutasesẽtɔe.” Xexlẽme siawo ƒe agbɔsɔsɔ wɔ nuku ŋutɔ, ke hã, numekukua gblɔ be: “Xexlẽme sia mede tututu gɔ̃ hã o.” Nyatakaka siwo tso dukɔ 21 me me dzodzro ɖee fia be wowɔ gbɔdɔnuwɔna aɖe ƒomevi ɖe nyɔnu siwo ade 36 le alafa me kple ŋutsu siwo ade 29 le alafa me ŋu le woƒe ɖevime. Ame siwo wɔ nu gbegblẽ siawo ɖe wo ŋu la dometɔ akpa gãtɔ nye woƒe ƒometɔwo!

[Aɖaka si le axa 16]

WOƑE AMEBLEMƆNUWO

Ame si wɔa gbɔdɔnuwo ɖe ɖeviwo ŋu madzemadzee dzea aɖaŋu ale gbegbe be medina be yeawɔ nu akpasesẽtɔe kple ɖevi si yedi be yeagblẽ o. Ke boŋ, adi be yeable ɖevia nu vivivi. Gbã la, etiaa ɖevi si wòdi, zi geɖe la, enyea ɖevi si nu woate ŋu able bɔbɔe, si kana ɖe ame dzi, ale be nuwo nanɔ bɔbɔe na ye. Eyome la, eléa be na ɖevi ma etɔxɛe. Ðewohĩ adi hã be yeana ɖevia dzilawo naka ɖe ye dzi. Ame siawo bi ɖe nuwɔwɔ abe ɖee wotsɔ ɖe le eme na ɖevia kple ƒome bliboa ŋutɔ ene me.

Le ɣeyiɣi aɖewo megbe la, ate ɖevia dzadzraɖo hena eƒe nu gbegblẽa wɔwɔ. Ate asikaka ɖevia ŋu vivivi to nuwɔna siwo adze abe ɖe wòtsɔ ɖe le eme nɛ ene, ate ŋu anye hoʋlifefewo wɔwɔ kplii, kpakple konukonuidodo nɛ, me. Ate ŋu ate nunanawo ƒeƒle nɛ ahadze egɔme anɔ ɖevia ɖem ɖe aga tso xɔlɔ̃awo, nɔviawo kple dzilawo gbɔ. Ɣeaɖewoɣi la, abia tso ɖevia si be wòaɣla nya aɖe ɖe edzilawo—ate ŋu anye nane si wòƒle nɛ alo ɖoɖo aɖe si wowɔ ɖe tsaɖiɖi ŋu. Ayemenuwɔna mawo dzraa mɔ dzi ɖo na amenubeble. Ne gbɔdɔnuwɔlaa te ŋu na be dzilawo kple ɖevia te kaka ɖe eyama dzi ko la, ke ele dzadzraɖoɖi na eƒe nugbegblẽa wɔwɔ.

Ke hã, adze aye able ɖevia nu tsɔ wu be wòawɔ akpasesẽnu kplii alo be wòazi edzi. Ðewohĩ adi be yeazã didi si le ɖevia me be yeanya nu tso gbɔdɔdɔ ŋu to eɖokuiwɔwɔ abe nufiala ene me, alo abia tso esi be “yewoafe fefe tɔxɛ” aɖe si mele be ame aɖeke nanya o la ɖekae. Adze agbagba anɔ amamaɖeɖenuwɔnawo ɖem fia ɖevia kple susu be nuwɔna mawo nadze na ɖevia abe ɖe naneke megblẽ le wo ŋu o ene.

Ne ete ŋu wɔ gbɔdɔnuwɔnawo kple ɖevia mlɔeba la, adze agbagba be yeana ɖevia nagagblɔe na ame aɖeke o. Azã mɔnuwo abe ŋɔdzidodo nɛ, fɔbubui, kple gbɔgblɔ be yeado ŋukpee ene, alo azã mɔnu siawo katã ƒo kpli. Le kpɔɖeŋu me, agblɔ be: “Wòe wɔ nua. Mègblɔ nam be madzudzɔ o.” Ate ŋu agblɔ kpee be: “Ne ègblɔe na dziwòlawo la, woayɔ kpovitɔwo woava lém de ga tegbee.” Alo ɖewohĩ agblɔ be: “Mele be ame aɖeke nasee o. Ne ègblɔe la, ame aɖeke maxɔe ase o. Ne mese be dziwòlawo nya la, mawɔ nuvevi wo.” Ŋɔdzidonamemɔnu siwo wozãna la mele xexlẽme o.

[Nɔnɔmetata si le axa 15]

Tsɔ ɖe le nu siwo viwòa wɔna me

[Nɔnɔmetata si le axa 17]

Megahe ɖe megbe le nufiafia viwòa tso gbɔdɔnyawo ŋu me o

[Nɔnɔmetata si le axa 18]

Fia viwòa be wòatɔ afɔ to sesĩe awɔ ɖe nu siwo nèfiae dzi ne ame aɖe di be yeagblẽe