Dzo kpo yi emenuwo dzi

Dzo kpo yi emenuawo dzi

Ta aɖe si ƒe Tsiwo Biãa?

Ta aɖe si ƒe Tsiwo Biãa?

 Ta aɖe si ƒe Tsiwo Biãa?

Etso Nyɔ! ŋlɔla si le Senegal gbɔ

ÐE TA aɖe li si ƒe tsiwo biã nyateƒea? Ŋkɔ bubu si wotsɔ na Retba-taa enye Ta si Biã. Esi wònye be tso míaƒe aƒeme, le Dakar, Senegal, le Ɣetoɖoƒe Afrika, yi afisi ta la le nye kilometa 30 pɛ ko ta la, míeɖoe be míaɖi tsa ayi ava kpɔe ɖa nenye be ŋkɔ si wotsɔ nɛ la sɔ ŋutɔŋutɔ. Esi míeɖo la, míekpɔe be tsia me kɔ hele dzo dam esi ɣea klẽ ɖe edzi. Nyateƒee, àkpɔe be tsia biã vie eye wònya kpɔ ŋutɔ. Ŋutsu si kplɔ mí nɔ tsa ɖimee la ɖe eme be ŋdɔ ƒe keklẽ ɖe tsimenu suesue aɖewo siwo ŋku mate ŋu akpɔ o dzie nana wokpɔnɛ le amadede tɔxɛ ma me. Gake àkpɔ nu geɖe le afisia si ahe wò susu wu ta la ƒe amadede ko.

Dze bla ɖe tsi sia si me megoglo fũ o la gɔme. Dze sɔ gbɔ ɖe tsia me ale gbegbe be àte ŋu aho ɖe tsia dzi bɔbɔe. Míekpɔe be tsaɖila aɖewo wɔ mɔnukpɔkpɔ sia ŋudɔ ge ɖe tsia me hemlɔ tsia dzi hã nyateƒe.

Ta si Biã la na ame alafa geɖe siwo le nutoa me kpɔ dɔwɔɖui (1). Dɔwɔlawo le dze lɔm le ʋuwo dem le ta la to. Míetɔ vie be míakpɔ alesi afimatɔwo ɖea dzee le ta la me. Míekpɔ ŋutsu aɖe si tsia va se akɔta na, wòtsɔ tsyo nɔ dze si le tsia gɔme la kum. Eyome wotsɔa sofi lɔnɛ kɔna ɖe kusiwo me hedenɛ akrowo me. Dɔwɔla aɖe gblɔ na mí be ne yewɔ dɔ gaƒoƒo etɔ̃ la, yekpɔa dze si ƒe kpekpeme ade tɔn ɖeka. Wodoa agba na akroawo ale gbegbe be akroa ŋutɔ megadzena tututu le tsia dzi o (2). Ne akroawo va ɖo tɔa to la, ke eɖo nyɔnuawo dzi be woaku dzea adro ɖe ta (3). Alesi nyɔnuawo le dɔa wɔm ɖekae ɖe ɖoɖo nu la nya kpɔ ŋutɔ.

Míaƒe tsaɖiɖia vivi mía nu ŋutɔ. Ta sia si biã la nye nu wɔnuku geɖe siwo le anyigba dzi la dometɔ ɖeka si na wònye nunana xɔasi aɖe tso Yehowa gbɔ.—Psalmo 115:16.—g05 9/22.

[Nɔnɔmetata si le axa 12]

◀ Photo by Jacques CLEMENT, Clichy, FRANCE at http://community.webshots.com/user/pfjc