Dzo kpo yi emenuwo dzi

Dzo kpo yi emenuawo dzi

Mawu Kpe Ðe Mía Ŋu

Mawu Kpe Ðe Mía Ŋu

 Mawu Kpe Ðe Mía Ŋu

ABE ALESI ESTHER GAITÁN GBLƆE ENE

“Míelé mia nɔ dzo akpasesẽtɔe. Migadi be yewoayɔ kpovitɔwo o. Miawo ya milala ko; míagbugbɔ ayɔ mi etsɔ ŋdi kanya.”

NƆVINYENYƆNU suetɔ ye woƒo ka na alea tso mía nɔ Esther ŋu, le Braɖa aɖe gbe le ƒe 2004 me. Mía kple srɔ̃nye Alfredo míegbɔ tso Yehowa Ðasefowo ƒe kpekpe aɖe le Fiaɖuƒe Akpata me koe nye ema si míese nyaa. Kaka míaɖo mía dzilawo ƒeme le Mexico City la, míaƒe ƒometɔwo le afima xoxo. Nɔvinyeŋutsu kple nɔvinyenyɔnu suewo ƒe dzi gbã vevie, eye nɔgãnyewo kple nɔɖinyewo nɔ avi fam.

Fofonye kple fonye zɔ mɔ yi dɔ aɖe wɔƒe. Míeyɔ wo le telefon dzi, eye mí katã míelɔ̃ ɖe edzi be anyo wu be míagblɔe na kpovitɔwo. Míedo gbe ɖa bia kpekpeɖeŋu le zã donuxaxaname ma katã me. Míese le mía ɖokui me nyuie be Mawu nɔ ‘ŋusẽ si gbɔ dzɔdzɔmetɔ’ ŋu la nam mí.—Korintotɔwo II, 4:7.

Le ŋufɔke ƒe ŋdi me la, nyee ɖo amefilaa ƒe kaƒoƒoa ŋu. Togbɔ be metsi dzimaɖi hã la, mete ŋu ƒo nu kplii dzitsitsi manɔmee. Amefilaa di be yeaƒo nu kple fofonye, gake megblɔ nɛ be ezɔ mɔ. Eyata ŋutsua gblɔ be yewoalala vaseɖe esime Papa gbɔ hafi yewoagblɔ nusi wòle be míana. Ena menya be ne míexe ga gbogbo aɖe o la, yewoawu mía nɔa.

Le ŋkeke si kplɔe ɖo dzi la, megaɖo eƒe kaƒoƒoa ŋu. Esi wònye nyemetsi dzi le nuƒoƒo kple amefilaa me o, togbɔ be enɔ ŋɔdzidonamenyawo gblɔm hã, ta la, ebiam be: “Mènya be nya gãe nya sia nye oa?”

Meɖo eŋu nɛ be: “Menya ɖe. Mielé nɔnye akpa sesẽe. Gake Yehowa Ðasefowoe míenye,  eye míeka ɖe edzi bliboe be mía Mawu akpe ɖe mía ŋu. Eye Biblia dzra mí ɖo be míado dzi le ɣeyiɣi sesẽ sia siwo me míele la me.”

Eɖo eŋu nam be: “Ẽ. Ẽ. Menya nusiawo katã. Nya mawo ke gblɔm nɔwò hã le. Eka ɖe eƒe Mawu kple mia dzi ŋutɔ.” Eyata míenya be Dada hã lé xɔse me ɖe asi sesĩe, eye esia do ŋusẽ mí.

Nusi Kpe Ðe Mía Ŋu Míedo Dzi

Esi ŋkekeawo va nɔ yiyim la, mía hati Kristotɔwo yɔ mí le telefon dzi eye woɖo babadonamegbalẽviwo ɖe mí, eye woŋlɔ gbedasiwo hã ɖo ɖe mí to Internet dzi. Míeyi edzi dea míaƒe kpekpewo hekpɔa gome le gbeƒãɖeɖedɔa me. Biblia kple Biblia-srɔ̃gbalẽwo xexlẽ gbesiagbe hã fa akɔ na mí. Ƒo wo katã ta la, gbedodoɖa na míekpɔ “Mawu ƒe ŋutifafa.”—Filipitɔwo 4:6, 7.

Kpovitɔwo dometɔ ɖeka gblɔ be: “Le ƒe asieke siwo mele dɔwɔƒe sia me la, mekpɔ alesi dzi ɖe le ƒome geɖewo ƒo, gake miawo ya mieto vovo. Miedze akɔ anyi ŋutɔ. Meka ɖe edzi be Mawu si subɔm miele tae.”

Míegbugbɔ dzro January 1, 2000 ƒe Nyɔ! [Eŋlisigbe me tɔ, December 22, 1999] si ƒo nu tso ameléle sesẽe ŋu me, eye míetsɔe fia kpovitɔa. Exlẽe, eye wòbia be míana kɔpi geɖe ye, hegblɔ be yedi be yeanya Yehowa Ðasefowo nyuie wu.

Mlɔeba le ŋkeke 15 ƒe numedzodzro kple amefilaawo megbe la, woɖe asi le nɔnyea ŋu. Enɔ lãmesẽ me, togbɔ be wotui ɖe xɔ sue aɖe me, hede kɔsɔkɔsɔ eƒe afɔ hã. Ke hã, wowɔ nu ɖe eŋu bubutɔe, eye wonɛ atike siwo wòzãna edziedzi ɖe suklidɔ kple ʋusɔgbɔdɔ si le eŋu ta.

Dada gblɔ alesi wòwɔ nɔ te ɖe nɔnɔmea nu nyuie nenema gbegbe la na mí. Elɔ̃ ɖe edzi be: “Le gɔmedzedzea me la, mevɔ̃ ŋutɔ; gake medze gbe dodo ɖa na Yehowa, eye mena dzi ɖe le ƒonye o. Mewɔ nam kpɔ be metsi akogo le xɔ sue ma me o. Meva de dzesi alesi mebua Yehowa ame ŋutɔŋutɔe; megblẽm ɖi gbeɖe o. Mebiae be wòakpe ɖe ŋunye maɖe gbɔgbɔa ƒe kutsetse afia—vevietɔ dzigbɔɖi.

“Mawu ƒe kpekpeɖeŋu wɔe be nyemefa avi alo vɔ̃ kpɔ o. Mezã ŋkekeawo tsɔ ɖoa ŋku mawunyakpukpui siwo menya dzi, eye medzi Fiaɖuƒehawo sesĩe hã. Ɣeaɖewoɣi la, metsɔnɛ be mele Kristotɔwo ƒe kpekpewo me, eye mekpɔa gome le eme le susu me. Metsɔnɛ hã be mele gbeƒã ɖem na amewo hele Biblia-nusɔsrɔ̃wo wɔm. Nye susu nɔ nusiawo ŋu ale gbegbe be ɖeko ɣeyiɣia va yi nam kabakaba.

“Mɔnukpɔkpɔ su asinye gɔ̃ hã meɖi ɖase na amesiwo lém. Ɣesiaɣi si wo dometɔ aɖe tsɔ nuɖuɖu vɛ nam la, meɖea gbeƒã nɛ, togbɔ be wotsɔ nu bla ŋku me nam hã. Le kpɔɖeŋu me, gbeɖeka megblɔ na amesiwo lém dometɔ ɖeka be Biblia gblɔ ɣeyiɣi sesẽ siwo me míele la ŋu nya ɖi, eye be mese egɔme be gakuxi sesẽ aɖe me tomee woanya nɔ. Megblɔ nɛ be ŋusẽ blibo le Yehowa Mawu si, gake be mezãnɛ le mɔ gbegblẽ nu gbeɖe o. Emegbe meɖe kuku nɛ be womegasẽ ŋuta le ŋunye o, ke boŋ woawɔ nu ɖe ŋunye nyuie.

“Amefilaa ɖo tom hegblɔ nam be magatsi dzi o, be yewomawɔ nuvevi aɖekem o. Meda akpe na Yehowa ɖe alesi wòkpe ɖe ŋunye le ɣeyiɣi sesẽ mawo me ta, eye meɖoe kplikpaa wu tsã be mayi nye gbesiagbe mɔɖeɖedɔa [si nye nyanyuigbɔgblɔdɔa wɔwɔ ɣesiaɣi] dzi zi alesi ŋutete le ŋunye ko.”

Kakaɖedzitɔea, dodokpɔ sia na Dada gava te ɖe Yehowa ŋu wu, eye nenema kee wòwɔ míawo hã. Míate ŋu ada akpe ɖe alesi wòdzɔ dzi na mí be Dada trɔ gbɔ va aƒemee ta wòade edeƒe o. Nyanya be le Mawu ƒe Fiaɖuƒea te la, ŋutasẽnuwɔna siawo maganɔ anyi o la fana akɔ na mí ŋutɔ. Hafi ɣeyiɣi ma naɖo la, mía kple nye ƒomea míate ŋu agblɔ be Biblia me hakpala ƒe nya siawo nye nyateƒe, be: “Ame dzɔdzɔe ƒe fukpekpewo sɔ gbɔ, ke Yehowa ɖenɛ tsoa wo katã me.”—Psalmo 34:20.—g05 10/22.