Mose​—Ame Ŋutɔŋutɔe loo alo Glimemee?

WODZI Mose le ɣeyiɣi si me wonɔ vidzĩwo tsrɔ̃m me. Wo detɔwo nye tsatsalawo ƒe ƒome siwo va nɔ Egipte tsɔ kpe ɖe wo fofo Yakob, alo Israel ŋu, bene yewoasi le dɔwuame nu. Woa kple Egiptetɔwo nɔ anyi le ŋutifafa me ƒe gbogbo aɖewo. Gake tɔtrɔ dziŋɔ aɖe va. Blema nuŋlɔɖi aɖe si ŋu wodea bubui vevie gblɔ be: “Fia yeye aɖe ɖu fia le Egipte . . . Eye wògblɔ na eƒe dukɔ la bena: Mikpɔ ɖa, Israel-dukɔ la sɔ gbɔ, eye wòsẽ ŋu wu mí. Enyo, mina míadze aye ɖe wo ŋuti, bena womagasɔ gbɔ ɖe edzi o.” Nugbe kae woɖo? Eyae nye be woatɔ te Israel-viwo ƒe dzidziɖedzi to egbɔkpɔkpɔ me be “woawɔ dɔ sesẽ” eye wògade se na Hebritɔ vixelawo be woawu ŋutsuvi ɖesiaɖe si woadzi hã. (Mose II, 1:8-10, 13, 14) Le Israel-viwo ƒe vixela siwo gbe be yewomawɔ sededea dzi o ƒe dzinɔameƒo ta la, Israel-dukɔa dzi ɖe edzi. Eyata Egipte fia va de se be: ‘Mitsɔ ŋutsuvi siwo katã wodzi la ƒu gbe ɖe Nil-tɔsisi la me.’—Mose II, 1:22.

Israel-vi atsu kple asi siwo nye Amram kple Yoxebet, ‘mevɔ̃ fia ƒe sedede la o.’ (Hebritɔwo 11:23) Yoxebet dzi ŋutsuvi si ŋu wova gblɔ le emegbe be ‘edze ɖeka le Mawu ƒe ŋkume.’ * (Dɔwɔwɔwo 7:20) Ðewohĩ wokpɔe dze si le mɔ aɖe nu be ɖevia nye amesi nu Mawu ve. Aleke kee wòɖale o, wogbe be yewomaɖe asi le ɖevia ŋu woawu o. Wotsɔ woawo ŋutɔ woƒe agbe de afɔku me be yewoatsɔe aɣla.

Le ɣleti etɔ̃ megbe la, Mose dzilawo megate ŋu yi edzi nɔ eɣlam o. Esi nu bubu aɖeke megali woawɔ o la, wowɔ afɔɖeɖe aɖe. Yoxebet tsɔ vidzĩa mlɔ kusi si wolɔ̃ kple papyrus, si nye gbe aɖe si ɖi aɖa la me va da ɖe Nil-tɔsisia to. Menya be ɖe yele mɔ tam nɛ be wòava zu ame ŋkuta le ŋutinya me o!—Mose II, 2:3, 4.

Ðe Nuawo Dzɔ Nyateƒea?

Egbea agbalẽnyala geɖewo bua nudzɔdzɔ siawo nyakpakpawoe. Agbalẽ si nye Christianity Today gblɔ be: “Nya lae nye be womekpɔ tomenukuku sue aɖeke si nye [ƒe siwo] Israel-viwo nɔ Egipte la ƒe kpeɖodzi tẽ o.” Togbɔ be womekpɔ kpeɖodzi tẽ aɖeke o hã la, ɖaseɖiɖi siwo mele tẽ o ƒe gbogbo aɖewo li siwo fia be míate ŋu axɔ Biblia ƒe nuŋlɔɖia dzi ase. Egiptetɔwo ƒe blemanuwo ŋuti nunyala James K. Hoffmeier gblɔ le eƒe agbalẽ si nye Israel in Egypt me be: “Nyatakaka si wokpɔ tso tomenukuku me ɖee fia eme kɔ ƒã be dukɔ siwo le Mediterranea ƒe Ɣedzeƒe nutome dea Egiptetɔwo gbɔ enuenu, vevietɔ le ɣeyiɣi siwo me yame ƒe nɔnɔme wɔe be ku ɖi me . . . Eyata tso le ɣeyiɣi si anye tso ƒe 1800 va ɖo 1540 D.M.Ŋ. me la, Egipte nye teƒe aɖe si dzroa Sem ƒe dzidzimevi siwo le Asia ƒe ɣetoɖoƒe be yewoaʋu ayi.”

Gakpe ɖe eŋu la, ɣeyiɣi didi aɖee nye esia si woda asi ɖe edzi be alesi Biblia ƒo nu tso kluvinyenye le Egipte ŋui la le eteƒe pɛpɛpɛ. Agbalẽ si nye Moses—A Life ka nya ta be: “Edze abe ɖe blema Egipte yɔdo ƒe nɔnɔmetata aɖe si wogbugbɔ tana zi geɖe si me wota kluviwo ƒe hatsotso ɖo wole anyikpe mem wòle dzedzem nyuie le la ɖo kpe Biblia ƒe nuŋlɔɖi  si ku ɖe Israel-viwo teteɖeanyi ŋu dzi ene.”

Alesi Biblia ƒo nu tso kusi sue si Yoxebet zã la ŋu hã nye nyateƒe. Biblia gblɔ be papyrus, si nye gbe aɖe si ɖi aɖa, ye wotsɔ lɔ̃e eye Cook ƒe Commentary gblɔ be “eya koŋue Egiptetɔwo tsɔ wɔa tɔdziʋu siwo mekpena o siwo ƒua du sesĩe.”

Ke hã ɖe menye nu sesẽ ŋutɔ be woaxɔe ase be dukplɔla aɖe nade se be woawu vidzĩ kokoewo nublanuimakpɔmakpɔe oa? Agbalẽnyala George Rawlinson gblɔ na mí be: “Vidzĩwuwu . . . bɔ ŋutɔ le ɣeyiɣi vovovo me kple le teƒe vovovowo, eye nya tsɛ aɖe koe wobunɛe.” Le nyateƒe me la, mehiã be nàyi didiƒe boo aɖeke hafi nàkpɔ míaƒe ŋkekea me amehawo wuwu si dzi ŋɔ nenema ke o. Biblia me nuŋlɔɖia sese able fu lãme na mí ya, gake nublanuitɔe la, nyateƒe ŋutɔŋutɔe wònye.

Woxɔe Nyi le Farao ƒe Aƒeme

Yoxebet megblẽ via ɖe yame ko o. ‘Ekɔ kusi si wolɔ̃ wònye aɖaka la ɖada ɖe Nil-tɔsisi to le aƒlawo me.’ Anye afimae wònɔ mɔ kpɔm be woake ɖe eŋu le. Afisiae Farao vinyɔnu va lea tsi le, ɖewohĩ elenɛ lee edziedzi. *—Mose II, 2:2-4.

 Woke ɖe aɖaka sue la ŋu kaba. “Esi [Farao vinyɔnua ʋui] la, ekpɔ ŋutsuvi aɖe le avi fam le eme. Eye eƒe nu wɔ nublanui nɛ wògblɔ bena: Ðewo Hebri-ŋutsuviwo dometɔ aɖee!” Eyata Egipte fiavinyɔnua xɔe nyi via nyinyii. Ŋkɔ ka kee dzilawo tsɔ nɛ va yi o, woŋlɔ eya be xoxo. Egbea ŋkɔ si nyɔnu si xɔe nyi tsɔ nɛ lae nye esi wonya nɛ le xexeame godoo—eyae nye Mose. *—Mose II, 2:5-10.

Gake ɖe menye nusi wɔ moyaa be woaxɔe ase be Egipte fiavinyɔnu akpɔ ɖevi la dzi oa? Ao, elabena Egiptetɔwo ƒe mawusubɔsubɔ ƒe nufiafia aɖee nye be ehiã be woawɔ dɔmenyo hafi woate ŋu ayi dziƒo. Ku ɖe ɖevia xɔxɔ nyi ŋutɔ ŋu la, blematomenukula Joyce Tyldesley gblɔ be: “Gomenɔamesi le Egipte nyɔnuwo kple Egipte ŋutsuwo si sɔsɔe. Gomenɔamesi ɖekae le wo katã si le senyawo kple ganyawo gome, ne mede ɖeke o hã la, nenemae wòle le agbalẽ dzi, eye . . . nyɔnuwo ate ŋu axɔ vi anyi faa.” Le nyateƒe me la, blema Vixɔxɔnyigbalẽ ƒo nu tso alesi Egipte nyɔnu aɖe xɔ eƒe kluviwo nyii ŋu. Ke le Mose dada si woda be wòana noe gome la, The Anchor Bible Dictionary gblɔ be: “Fexexe na Mose dada ŋutɔŋutɔ be wòana noe . . . sɔ ɖe Mesopotamiatɔwo ƒe vixɔxɔnyi ɖoɖo dzi.”

Esi woxɔ Mose nɔ nyinyim fifia la, ɖe woaɣla Hebritɔ si wònye la ɖee be wòaganye ŋukpe nɛ oa? Hollywood ƒe sinima aɖewo na wòdze nenema. Gake Ŋɔŋlɔawo ɖee fia be menye nenemae o. Edaa Miriam tsɔ aɖaŋudzedze kpɔ egbɔ be Mose dada Yoxebet ŋutɔŋutɔ va na noe. Edze ƒã be mawuvɔ̃la sia maɣla nyateƒea ɖe via o! Eye esi wònye be wonaa no ɖeviwo ƒe geɖe le ɣeyiɣi mawo me ta la, ɣeyiɣi gbogbo aɖe su Yoxebet si be wòafia nu Mose tso ‘Abraham, Isak, kple Yakob ƒe Mawu la ŋu.’ (Mose II, 3:6) Gbɔgbɔmegɔmeɖoanyi sia ɖe vi na Mose ŋutɔ, elabena esi woɖe asi le eŋu na Farao vinyɔnua emegbe la, “wofia Egiptetɔwo ƒe nunyawo katã Mose.” Míate ŋu aɖo kpe blemaŋutinyaŋlɔla Josephus ƒe nya si wògblɔ be Mose va zu aʋafia le aʋa aɖe si wowɔ kple Etiopiatɔwo me la ƒe nyateƒenyenye dzi o. Ke hã Biblia gblɔ be Mose “[sẽ] ŋu le eƒe nyawo kple dɔwɔwɔwo me” ya. *—Dɔwɔwɔwo 7:22.

Esi Mose xɔ anɔ ƒe 40 la, anya su te be wòava zu kplɔla vevi aɖe le Egipte. Ŋusẽ kple kesinɔnuwo ate ŋu ava su esi ne ekpɔtɔ nɔ Farao ƒe aƒeme. Ke nane va dzɔ si trɔ eƒe anyinɔnɔ.

Esi Yi Ðatsi Midian

Gbeɖeka Mose “[kpɔ] Egiptetɔ aɖe le nɔvia Hebritɔ aɖe ƒom.” Mose ɖe vi geɖe tso Hebritɔ si wònye kple Egiptetɔwo dome nɔnɔ me ƒe geɖe. Gake esi wòkpɔ wonɔ nɔvia Israel-vi aɖe ƒom—ɖewohĩ kutɔkutɔe—la, eʋã Mose be wòawɔ tiatia vevi aɖe. (Mose II, 2:11) “Egbe be, womegayɔ ye be Farao ƒe vinyɔnuvi la vi o; elabena elɔ̃ be, yeakpe fu akpe ɖe Mawu ƒe dukɔ la ŋuti.”—Hebritɔwo 11:24, 25.

 Mose ɖe afɔ sesẽ aɖe si womagate ŋu atrɔ o: “Eƒo Egiptetɔ la wu, eye wòlɔ ke ɖe edzi.” (Mose II, 2:12) Numeɖela aɖe gblɔ be menye ame aɖe “si dzi ku zi ɖeka ƒe nuwɔna” ye wònye o. Anɔ eme be xɔse ƒe nuwɔnae—togbɔ be mewɔe le mɔ nyuitɔ nu o hã—si nye edzixɔxɔse be Mawu do ŋugbe be yeaɖe Israel-viwo tso Egipte. (Mose I, 15:13, 14) Ðewohĩ Mose mebu eŋu nyuie o eye wòxɔe se be yeƒe nuwɔna ana yewo tɔwo nadze aglã. (Dɔwɔwɔwo 7:25) Gake dzi ɖe le eƒo be nɔvia Israel-viwo melɔ̃ ɖe eƒe kplɔlanyenyea dzi o. Esi Farao se amewunyaa la, eva zu dzizizi na Mose be wòasi ayi du bubu me. Eyi ɖanɔ Midian heɖe lãnyila tsaglalãtsalawo ƒe amegã si ŋkɔe nye Yetro la ƒe vinyɔnu si woyɔna be Zipora.

Mose nɔ anyi abe alẽkplɔla dzro ko ene ƒe 40 sɔŋ, mɔkpɔkpɔ si nɔ esi be yeava zu ɖela la bu ɖee. Ke gbeɖeka ekplɔ Yetro ƒe lãha la yi teƒe aɖe si tsɔ ɖe Xoreb-toa gbɔ. Afimae Yehowa ƒe dɔla aɖe ɖe eɖokui fia Mose le le avekɔe bibi aɖe gbɔ. Kpɔ nudzɔdzɔa ɖa le susu me: Mawu gblɔ nɛ be, ‘Kplɔ nye dukɔ Israel-viwo dzoe tso Egipte.’ Gake Mose meka ɖe eɖokui dzi esi wònɔ nyaa ŋu ɖom o, dzi menɔ eƒo o. Edo taflatse be: “Ameka menye, be mayi Farao gbɔ, eye makplɔ Israel-viwo adzoe atso Egipte?” Emegbe ekɔ nu le eya ŋutɔ ƒe gbɔdzɔgbɔdzɔ aɖe si sinimawɔla aɖewo mete ŋu ɖena fiana nyuie o dzi: Edze ƒã be nuƒoƒo ƒe kuxi aɖe le eŋu. Aleke gbegbe Mose to vovo na kalẽtɔ siwo ŋu woƒoa nu tsoe le xotutuwo mee nye esi! Ƒe 40 si ŋutsu sia tsɔ kplɔ alẽe la na wòbɔbɔ eɖokui eye wòfa kura. Togbɔ be dzi menɔ Mose ŋutɔ ƒo o hã la, Mawu ya ka ɖe edzi be edze akplɔ dukɔa!—Mose II, 3:1–4:20.

Ðeɖe tso Egipte

Mose dzo le Midian yi Farao gbɔ va bia be wòana ablɔɖe Mawu ƒe amewo. Esi fiagã dzimesesẽtɔ ma gbe la, wohe fuwɔame ewo va wo dzi. Fuwɔame ewolia tsrɔ̃ Egiptetɔwo ƒe ŋgɔgbeviwo, eye Farao, amesi dzi woɖu la va ɖe asi le Israel-viwo ŋu mlɔeba.—Mose II, ta 5-13.

Nuxlẽla akpa gãtɔ nya nudzɔdzɔ siawo nyuie. Gake ɖe esiawo katã nye nusiwo dzɔ va yi ŋutɔŋutɔa? Ame aɖewo hea nya be esi womeyɔ Farao si wònye ƒe ŋkɔ o ta la, anye ɖe wokpa ŋutinya ma. * Gake Hoffmeier, amesi ƒe nyawo míeyɔ va yi, de dzesii be  Egiptetɔwo ƒe agbalẽŋlɔlawo ɖonɛ koŋ gbea Farao ƒe futɔwo ƒe ŋkɔ dede woƒe nuŋlɔɖiwo me. Eɖe nu me be: “Ðikeke mele eme o be blemaŋutinyaŋlɔlawo magbe Thutmose III ƒe aʋahoho le Megiddo ƒe nyateƒenyenye le esi womeŋlɔ Kades kple Megiddo fiawo ŋkɔ ɖi o ta o.” Hoffmeier gblɔ be anye “mawusubɔsubɔ me susu nyui aɖewo ta” ye womeyɔ Farao ma ƒe ŋkɔ o ɖo. Susuawo dometɔ ɖekae nye be esi womeyɔ Farao ma ƒe ŋkɔ o la, ŋutinya la he susu yi Mawu dzi ke menye Farao la dzi o.

Togbɔ be ele alea hã, ɖeklemiɖelawo melɔ̃na ɖe edzi be Yudatɔ gbogbo aɖewo ʋu tso Egipte o. Agbalẽnyala Homer W. Smith ɖe nu me be “anye ne” ameha gbogbo mawo ƒe ʋuʋu ŋu nya “naɖi hoo le Egiptetɔwo alo Siriatɔwo ƒe ŋutinya me . . . Anye kokoko be ame ʋɛ aɖewo siwo si tso Egipte yi Palestina la ƒe ŋutinya totro aɖe koe ʋuʋu ma nye.”

Nyateƒee, womeke ɖe Egiptetɔwo ƒe nuŋlɔɖi aɖeke si ku ɖe nudzɔdzɔ sia ŋuti ŋu o. Gake mesesẽ na Egiptetɔwo be woatrɔ nuŋlɔɖiwo o ne nyateƒea nye ŋukpe na wo alo wòagblẽ nu le wo ŋu le dunyahehenyawo gome. Esi Thutmose III va zi dzi la, edze agbagba be yeatutu dziɖula si do ŋgɔ nɛ, si nye  Hatshepsut ŋu nyawo ɖa kura be woagaɖo ŋku edzi o. Egiptetɔwo ƒe blema nudzɔdzɔwo me kula John Ray gblɔ be: “Wotutu [nyɔnu sia ƒe] nuŋɔŋlɔwo ɖa, wotɔ kpɔ tsɔ xe eƒe ŋkuɖodzikpe ŋkume, eye woŋlɔ eƒe kpememewo be. Eƒe ŋkɔ megadzena le ƒe siwo kplɔe ɖo ƒe nudzɔdzɔ ƒe nuŋlɔɖiwo me o.” Afɔɖeɖe siawo tɔgbe be woatsɔ atrɔ nusiwo nye ŋukpenanuwo alo atsyɔ nu wo dzi yi edzi le míaƒe ŋkekea me gɔ̃ hã.

Le gbeadzinɔnɔ ƒe blematomenukuku ƒe kpeɖodzi manɔanyi gome la, ele be míaɖo ŋku edzi be tsatsalawoe Yudatɔwo nye. Wometso du o; womede agble o. Esusɔ ko be míagblɔ be womegblẽ naneke kura ɖi o. Gake míate ŋu akpɔ woƒe gbeadzinɔnɔ ŋu nyawo ƒe kpeɖodzi siwo dzi anya xɔ se le Biblia ŋutɔ me. Woƒo nu tso eŋu le agbalẽ kɔkɔe ma ƒe teƒe geɖe. (Samuel I, 4:8; Psalmo 78; Psalmo 95; Psalmo 106; Korintotɔwo I, 10:1-5) Eɖe dzesi be Yesu Kristo hã ɖi ɖase le gbeadzinɔnɔ ƒe nudzɔdzɔwo ƒe nyateƒenyenye ŋu.—Yohanes 3:14.

Eyata ɖikeke aɖeke mele eme o be míate ŋu axɔ Biblia ƒe nuŋlɔɖi si ku ɖe Mose ŋu dzi ase, nyateƒee wònye. Ke hã amesi nɔ anyi gbaɖegbe ʋĩ va yie wònye. Ŋusẽ kae Mose ate ŋu akpɔ ɖe wò agbe dzi egbea?

[Etenuŋɔŋlɔwo]

[Aɖaka/Nɔnɔmetata si le axa 21]

Mose Ðeɖe​—Trɔ̃subɔlawo ƒe Xotutuea?

Ðeklemiɖela aɖewo gblɔna be ɖikeke le Mose ɖeɖe tso Nil-tɔsisia me ŋu eye be eɖi Fia Sargon si tso Akkad ŋuti blema xotutu—si nye ŋutinya si ame aɖewo gblɔ be enye xoxo na Mose ƒe ŋutinya. Eya hã ƒo nu tso ɖevi aɖe si nɔ kusi me woɖe tso tɔsisi me ŋu.

Gake nusiwo ɖi wo nɔewo bɔ ɖe ŋutinya me. Eye manye nusi medzɔna o ye ɖevi tsɔtsɔ da ɖe tɔ to nye abe alesi wòadzee ene o. Agbalẽ si nye Biblical Archaeology Review gblɔ be: “Ele be míade dzesii be tɔ to dukɔwoe Babilonia kple Egipte tɔwo nye eye vidzĩ tsɔtsɔ de kusi si me wotre si me tsi mate ŋu aɖo o la nye vidzĩ gbegblẽ ɖi mɔnu si ka ɖe eme wu etsɔtsɔ ƒu gbe ɖe akɔli dzi, si nye nuwɔna si bɔ ɣemaɣi wu. . . . Vidzĩ si wofɔ si va zu ame xɔŋkɔ ate ŋu anye nyati vevi aɖe si ŋu wotua xo le, gake esi wònye nusi dzɔna edziedzi ŋutɔŋutɔ tae wònɔna nenema ɖo.”

Nahum M. Sarna gblɔ le eƒe agbalẽ si nye Exploring Exodus me be togbɔ be woɖi wo nɔewo le go aɖewo me hã la, Mose dzidzi ƒe ŋutinya la to vovo na “Sargon ƒe Xotutua” le “nu tɔxɛ geɖewo me.” Eyata kpeɖodzi aɖeke mele ɖeklemiɖeɖe be trɔ̃subɔlawo ƒe xotutu mee woɖe Biblia ƒe nuŋlɔɖia tsoe ŋu o.

[Aɖaka/Nɔnɔmetata si le axa 24, 25]

Amekae Ŋlɔ “Mose ƒe Agbalẽawo”?

Wogblɔna be Mose ye ŋlɔ Biblia ƒe Agbalẽ Gbãtɔ Atɔ̃awo. Anye blemaŋutinya ƒe nuŋlɔɖi siwo nɔ anyi do ŋgɔ mee Mose akpɔ eƒe nyatakakawo dometɔ aɖewo tsoe. Gake ɖeklemiɖela geɖewo xɔe se be menye Mose ye ŋlɔ Mose ƒe Agbalẽ Atɔ̃awo o. Ƒe alafa 17 lia me xexemenunyala Spinoza tsɔ kakaɖedzi gblɔ be: “Eyata edze ƒã be menye Mose ye ŋlɔ Mose ƒe Agbalẽ Atɔ̃awo o.” Le ƒe alafa 19 lia ƒe afã susɔea me la, Germanytɔ agbalẽnyala Julius Wellhausen kaka nufiafia aɖe si ŋu wòbe “kpeɖodzi le”—be Mose ƒe agbalẽawo nye nuŋlɔla alo ƒuƒoƒo vovovowo ƒe agbalẽwo ƒe ƒuƒoƒo.

Wellhausen gblɔ be agbalẽŋlɔla ɖeka zã Mawu ƒe ŋkɔ Yehowa. Bubu yɔ Mawu be “Elohim.” Wosusui be bubu hã ŋlɔ nunɔlawo ƒe se kple ɖoɖowo le Mose ƒe Agbalẽ Etɔ̃lia me, eye bubu ŋlɔ Mose ƒe Agbalẽ Atɔ̃lia. Togbɔ be agbalẽnyala geɖe xɔ nufiafia sia dzi se ƒe geɖe hã la, agbalẽ si nye The Pentateuch, si Joseph Blenkinsopp ŋlɔ la yɔ Wellhausen ƒe susudodoɖa sia be nufiafia si “ŋu nya ku ɖo.”

Agbalẽ si nye Introduction to the Bible si John Laux ŋlɔ ɖe nu me be: “Ame ŋutɔ ƒe nukpɔsusu alo nya siwo nye aʋatso tsimatɔe dzie wotu Nufiafia si Ŋu Kpeɖodzi Le me nyawo ɖo. . . . Ne ɖe Nufiafia si Ŋu Kpeɖodzi Le la nye nyateƒe la, anye ne Israel-viwo anye amesiwo wodo lãe ŋutɔ esi woɖe mɔ woda Se ƒe agba kpekpe ma ɖe wo dzi. Anye amefuflu gãtɔ kekeake si dzɔ kpɔ le ŋutinya me.”

Ðeklemiɖenya bubu si wogagblɔna hãe nye be vovototo si le nuŋɔŋlɔ ƒe atsyã si wotsɔ ŋlɔ Mose ƒe Agbalẽ Atɔ̃awo me fia be ame vovovowoe ŋlɔe. Ke hã K. A. Kitchen gblɔ le eƒe agbalẽ si nye Ancient Orient and Old Testament me be: “Vovototo si le nuŋɔŋlɔ ƒe atsyãwo me mewɔ naneke o, ɖeko woɖea alesi nyati siwo ŋu wole nu ƒom le to vovo na wo nɔewoe fia.” Woate ŋu akpɔ nuŋɔŋlɔ ƒe atsyã ƒe vovototo ma ke le “blema nuŋɔŋlɔ bubu siwo ŋu ɖikeke mele o be ame ɖekae ŋlɔ wo” hã me.

Gɔmeɖoanyi mele nya si wohena be ŋkɔ kple dzesideŋkɔ vovovo zazã na Mawu nye kpeɖodzi be ame vovovowoe ŋlɔe la ŋu o. Le kpɔɖeŋu me, le Mose ƒe Agbalẽ Gbãtɔ ƒe akpa sue aɖe ko la, woyɔ Mawu be “Mawu Dziƒoʋĩtɔ,” ‘dziƒo kple anyigba Wɔla,’ ‘Aƒetɔ Dziɖulagã Yehowa,’ “Mawu nusianu kpɔla,” “Mawu ŋusẽkatãtɔ,” “Mawu,” ‘Mawu vavãtɔ’ kple “xexeame ƒe ʋɔnudrɔ̃la.” (Mose I, 14:18, 19; 15:2; 16:13; 17:1, 3, 18; 18:25) Ðe wòfia be ame vovovoe ŋlɔ Biblia ƒe kpukpui siawo dometɔ ɖesiaɖea? Alo Mose I, 28:13, afisi wozã “Elohim” (Mawu) kple “Yehowa” ɖe du le ya ɖe? Agbalẽŋlɔla evee ƒo ƒu ŋlɔ kpukpui ɖeka ma?

Vodada si le nuŋububu sia ŋu va dzena kɔte ne míezã nuŋububu ma ke na egbegbe nuŋɔŋlɔwo. Le míaƒe ɣeyiɣia me gbalẽ aɖe si do yeyee, si wota ku ɖe Xexemeʋa II ŋu me la, woyɔ Germany ƒe dukplɔla be “Führer,” “Adolf Hitler,” kple kpuie ko be “Hitler” le axa ʋɛ aɖewo ko me. Ðe ame aɖe ate ŋu agblɔ be enye kpeɖodzi be ame vovovo etɔ̃e ŋlɔe?

To ema gbɔ hã la, Wellhausen ƒe nufiafia ƒe tɔtrɔwo yi edzi le kakam. Eƒe ɖee nye nufiafia si agbalẽnyala eve aɖewo do ɖa ku ɖe nuŋlɔla si wogblɔ be ezã Yehowa ƒe ŋkɔ edziedzi ŋu. Menye ɖeko wogbe be menye Mose ye ŋlɔe o ke boŋ wotea tɔ ɖe edzi hã be ‘nyɔnue eŋlɔla nye.’

[Nɔnɔmetata]

Mose tsɔ ɖokuibɔbɔ ŋlɔ alesi mete ŋu tsɔ ŋutikɔkɔe na Mawu o la ɖi

[Nɔnɔmetata si le axa 23]

Egiptetɔwo ƒe yɔdo dzi nutata si fia alesi kluviwo le anyikpe memee

[Afi Si Míexɔ Mɔɖeɖe Tso]

Erich Lessing/Art Resource, NY