Dzo kpo yi emenuwo dzi

Dzo kpo yi emenuawo dzi

Nukatae Ŋutasẽnuwɔwɔ Dziŋɔ Geɖewo Dzɔna Egbea?

Nukatae Ŋutasẽnuwɔwɔ Dziŋɔ Geɖewo Dzɔna Egbea?

 Nukatae Ŋutasẽnuwɔwɔ Dziŋɔ Geɖewo Dzɔna Egbea?

NUVLOWƆWƆ aɖeke menyo o ya, gake esesẽ ŋutɔ be woase nuvlowɔwɔ manyatalenuwo gɔme. Nyateƒenya si wònye be susu si tututu ta wowɔa wo ɖo medzena zi geɖe o la tɔtɔa numekulawo. Esi nyadzɔdzɔgblɔmɔnuwo keke ta ɖo afisiafi le ƒe siawo me ta la, ame miliɔn alo biliɔn geɖe sea nu tso nuvlowɔwɔ dziŋɔ mawo ŋu le gaƒoƒo ʋɛ aɖewo ko megbe. Nyatakaka aɖe si Xexeame ƒe Lãmesẽ Habɔbɔ ta la ɖee fia be “nuvlowɔwɔ le nu gblẽm le anyigbagãwo, dukɔwo, kple nuto geɖe ŋu.”

Nuvlowɔwɔ manyatalenu geɖe va le aƒe xɔm ɖe teƒe siwo wobuna tsã be dedienɔnɔ sue aɖe ya teti nɔ la gɔ̃ hã le ƒe siawo me. Le kpɔɖeŋu me, hena ƒe gbogbo aɖewo la, nuvlowɔwɔ dziŋɔwo mebɔ le Japan o. Gake le June 2001 me le Ikeda la, ŋutsu aɖe tsɔ lãtsohɛ gã aɖe ɖe asi ge ɖe suku aɖe me hete hɛ tɔtɔ amewo nyamanyama. Le aɖabaƒoƒo 15 me la, ewu ɖevi 8 hede abi 15 bubu ŋu. Ne míetsɔ nudzɔdzɔ sia kpe ɖe bubu siwo dzɔ le Japan, abe sɔhɛ siwo nɔ amedzrowo wum yakatsyɔ tsɔ nɔ dzidzɔ dom na wo ɖokui ŋu la, míakpɔe be nuwo trɔ nyateƒe.

Le dukɔ siwo me nuvlowɔwɔ bɔ ɖo gɔ̃ hã me la, nuwɔna manyatalenu aɖewo nyɔa ŋu na amewo ale gbegbe. Xexeame Katã ƒe Asitsaƒegã si le New York la dzidzedze le September 11, 2001 dzi ɖo kpe nya sia dzi. Susuŋutinunyala Gerard Bailes gblɔ be: “Nudzɔdzɔ sia trɔ xexeame katã zu teƒe manyamanya kura, ezu afɔkuteƒe si me míate ŋu anya nusi le ŋgɔ gbɔna dzɔdzɔ ge o.”

Nukatae Wowɔnɛ Ðo?

Nu ɖeka gobii aɖeke meli woayɔ be eya gbɔe nuvlowɔwɔ manyatalenu vovovo siwo katã dzɔna la tso o. Nusi naa wòsesẽna ŋutɔ be woanya nusi gbɔ nuvlowɔwɔ aɖe tso la nye alesi wònye nuwɔna si me susu aɖeke mele o. Le kpɔɖeŋu me, esesẽ ŋutɔ be woase nusita ame tutɔ aɖe atso ko aɖatɔ nu amesiwo menya le afi aɖeke o la woaku alo nusita ame aɖe aku ʋu ayi aƒe aɖe me aɖada tu amewo woaku dzodzro la gɔme.

Ame aɖewo gblɔna be ɖe wodzia ame kple nuvlowɔwɔ. Ame bubuwo hã ʋlia nya be womate ŋu agblɔ be nuvlowɔwɔ manyatalenu nye amegbetɔ ƒe nɔnɔme ƒe akpa aɖe si womate ŋu aƒo asa na o.—Kpɔ aɖaka si nye “Ðe Wodzia Ame Kple Ŋutasẽnuwɔwɔa?”

 Numekula bibi geɖe xɔe se be nu gbogbo aɖewoe ʋãa amewo wowɔa nuvlo manyatalenuwo. Nyatakaka aɖe si United States Dukɔa ƒe Hlɔ̃nyamekulawo (FBI) ƒe Hehexɔƒe ta la gblɔ kaŋ be: “Tagbɔkɔkɔetɔ, nɔŋute aɖeke mawɔ nuvlo manyatalenu aɖeke o.” Ŋusẽtɔ aɖewo mada asi ɖe nya sia dzi o. Gake ame geɖe lɔ̃ ɖe nusi wòfia la dzi. Le susu aɖe ta la, amesiwo wɔa ŋutasẽnu dziŋɔwo ƒe susu mele te o. Nane gblẽ le woƒe nuŋububu ŋu ale gbegbe be wowɔa nu manyatalenuwo. Nukawo gbɔe wòtsona amewo wɔa nu mawo tɔgbe? Mina míalé ŋku ɖe nu geɖe siwo numekulawo yɔ be ate ŋu atso wo gbɔ la ŋu.

Ƒomegbenɔnɔ ƒe Toyiyi

Nyɔ! ƒe nuŋlɔla aɖe bia gbe Marianito Panganiban, si nye Philippines Dukɔa ƒe Numekudɔwɔƒe ƒe nyanuɖela tso amesiwo wɔa nuvlo dziŋɔwo ƒe amenyenye ŋu. Egblɔ be: “Wotso ƒome siwo gbã me. Womelé be na wo alo lɔ̃ wo o. Agbenyuinɔnɔ ŋuti nukpɔsusu aɖeke megale amewo si o, elabena womexɔ mɔfiame aɖeke o si wɔnɛ be wova zua ame dzegowo.” Numekula geɖe gblɔ be ƒome siwo dome kadodo nyui mele o kple esiwo me ŋutasẽnuwɔwɔ yia edzi le mee nuvlowɔla sẽŋuta geɖe tso.

United States Dukɔa ƒe Dɔwɔƒe si Dzroa Nuvlowɔwɔ Dziŋɔwo Me ta nyatakaka aɖe si yɔ nusiwo woate ŋu akpɔ adze sii le sɔhɛ siwo ate ŋu awɔ ŋutasẽnu dziŋɔ le suku ŋu. Woƒo nu tso ƒomenya siwo gbɔna hã ŋu: dzila kple vi dome ƒomedodo manyomanyo, dzila siwo mete ŋu kpɔa kuxi siwo le fu ɖem na wo viwo dzea sii o, ƒomedodo kplikplikpli manɔanyi, dzila siwo dea se ʋɛ aɖewo ko na ɖevi alo mexea mɔ ɖe naneke kura nu nɛ o, kple ɖevi siwo ɣlaa woƒe amenyenye gbidigbidi, nɔa agbe eve heɣlaa woƒe agbenɔnɔ ƒe akpa aɖe ɖe wo dzilawo.

Egbea la, ɖevi geɖe tso ƒome siwo gbã me. Bubuwo dzilawo mekpɔa ɣeyiɣi boo aɖeke na wo o. Ðevi akpe geɖewo tsi va zu ame tsitsiwo agbenyuinɔnɔ ƒe mɔfiame boo aɖeke maxɔmaxɔ le ƒomea mee. Numekula aɖewo se le wo ɖokui me be ɖeviwo ƒe tsitsi ɖe ƒome mawo tɔgbe me ate ŋu ana womatu anyinɔnɔ kple ame bubuwo le ŋutifafa me ƒe ŋutete ɖo o, si wɔnɛ be wònɔa bɔbɔe na wo be woawɔ ŋutasẽnuwo ɖe wo havi amegbetɔwo ŋu, veve aɖeke masemase ɖe wo nui.

Ƒuƒoƒo Siwo me Fuléle aɖe Le, Kpakple Vivimehawo

Kpeɖodziwo ɖee fia be ƒuƒoƒo siwo me fuléle aɖe le alo vivimehawo koŋ gbɔe wòtso ame aɖewo wɔ nuvlo aɖewo tɔgbe. Le Indiana, U.S.A. la, ɖekakpui aɖe si xɔ ƒe 19, si nye ameyibɔ la trɔ tso nuƒleƒe le fiase aɖe me yina aƒeme. Le aɖabaƒoƒo ʋɛ aɖewo megbe la, eyae nye ma  mlɔ lɔrimɔ to tukpe gbã ta na. Ðekakpui aɖe kpɔe ko heɖo tu edzi dae. Nukatae? Wobe ɖe amewulaa di be yeage ɖe habɔbɔ aɖe si dea asixɔxɔ yevuwo ŋu wu ameyibɔwo me eye be woata yiyiɖɔ nɔnɔmetata ɖe ye ŋu be yewu ameyibɔ.

Aɖiya si woda ɖe Tokyo tomeketekemɔ dzi le ƒe 1995 me; ame gbogbo siwo wu wo ɖokui le Jonestown, Guyana; kple Ɣe Gbedoxɔ ƒe Nɔvisiha me tɔ 69 siwo ku le Switzerland, Canada, kple France la katã tso vivimehawo ƒe ŋusẽkpɔɖeamedzi gbɔ. Nudzɔdzɔ siawo ɖe alesi ƒuƒoƒo aɖewo te ŋu kpɔa ŋusẽ ɖe amewo ƒe tamebubu dzi vevie la fia. Gbɔgbɔhawo ƒe ŋgɔnɔlawo na amewo wɔ “nu manyatalenuwo” le yeaɖi viɖenu aɖewo siwo wotsɔ ɖo wo ŋkume ta.

Nyadzɔdzɔgblɔmɔnuwo ƒe Teƒe Geɖe Ðoɖo Kple Nuvlowɔwɔ

Ame aɖewo gblɔ kpeɖodzi si li be egbegbe nyadzɔdzɔgblɔmɔnuwo ate ŋu ade aglãdzenuwɔwɔ ƒe dzi ƒo. Wogblɔ be ŋutasẽnuwɔwɔ kpɔkpɔ edziedzi le television dzi, le sinimawo me, le video dzi fefewo me, kpakple le Internet dzi naa amewo ƒe dzitsinya kuna heʋãa amewo be woawɔ ŋutasẽnu dziŋɔwo. Ðk. Daniel Borenstein, si nye Amerika Tagbɔdɔdalawo ƒe Habɔbɔ ƒe zimenɔla, gblɔ be: “Fifia la, nyati 1,000 kple edzivɔ, siwo wotu ɖe ƒe 30 kple edzivɔ ƒe numekuku dzi la ŋuti nusɔsrɔ̃ le edzi yim, si le eɖem fia be kadodo le nyadzɔdzɔgblɔmɔnuwo me ŋutasẽnuwɔna kple ɖevi aɖewo ƒe ŋutasẽnuwɔnawo dome.” Le United States Sewɔtakpekpea ŋkume la, Ðk. Borenstein ɖi ɖase be: “Kakaɖedzi le mía si be modzakaɖefefe ƒomevi ɖesiaɖe si me ŋutasẽnuwɔna le kpɔkpɔ edziedzi le nu gblẽm le dumeviwo ƒe lãmesẽ ŋu vevie.”—Kpɔ aɖaka si nye “Kɔmpiutadzifefe me Ŋutasẽnuwɔnawo—Ðɔkta aɖe ƒe Nukpɔsusu.”

Zi geɖe wogblɔa nudzɔdzɔ ŋutɔŋutɔ aɖewo ƒe kpɔɖeŋu tsɔ ɖenɛ fiana be nya sia nye nyateƒe. Le ŋutsu si da tu wu atsu kple asi siwo nɔ agudzedze kpɔm le ƒuta ŋɔdzitɔe ƒe nya si ŋu míeƒo nu tsoe le nyati si do ŋgɔ me gome la, enutsolawo ɖo kpe edzi be sinima siwo me ŋutasẽnuwɔnawo le kpɔkpɔ edziedzi gbɔe wòtso wòwu ameawo be yeatsɔ ado dzidzɔ na ye ɖokui. Le nudzɔdzɔ si me woda tu wu sukuvi 15 le suku gome la, wogblɔ be sukuvi amewula eveawo zãa gaƒoƒo geɖe gbesiagbe nɔa videodzifefe siwo me ŋutasẽnuwɔnawo le wɔm.  Gakpe ɖe eŋu la, wokpɔa sinima siwo kafua ŋutasẽnuwɔwɔ kple amewuwu edziedzi.

Atikevɔ̃ɖiwo

Le United States la, amesiwo ƒewuiviwo wu dzi ɖe edzi zi gbɔ zi etɔ̃ le ƒe enyi me. Nukae setɔwo gblɔ be enye nusiwo gbɔ wòtso la dometɔ ɖeka? Cocaine koŋue nuvlowɔhawo zãna. Le ame 500 kple edzivɔ siwo wowu le Los Angeles, California nyitsɔ laa me la, “kpovitɔwo gblɔ be wo dometɔ 75 le alafa me tso nuvlowɔhawo gbɔ.”

Nyatakaka aɖe si FBI Hehexɔƒea ta la gblɔ be: “Atikevɔ̃ɖizazã do ƒome kple amewunya geɖe.” Ame aɖewo siwo ƒe tamebubu tro le atikevɔ̃ɖizazã ta la wua ame esime atikevɔ̃ɖia kpɔ ŋusẽ ɖe wo dzi. Ame bubuwo ʋlia atikevɔ̃ɖisitsatsa ta to ŋutasẽnuwɔwɔ me. Edze ƒã be atikevɔ̃ɖiwo kpɔa ŋusẽ ɖe amewo dzi vevie wowɔa nu dziŋɔwo.

Tu Vɔ̃ɖiwo Kpɔkpɔ Bɔbɔe

Abe alesi míegblɔe le nyati si do ŋgɔ me ene la, ŋutsu ɖeka pɛ tsɔ tu wu ame 35 le Tasmania, Australia. Ede abi ame 19 bubu ŋu. Asrafowo ƒe tu aɖe si dana trena ɖe nu tɔgbee ŋutsua zã. Esia na ame geɖe ƒo nya ta be tu mawo tɔgbe kpɔkpɔ bɔbɔe hã nye nusita nuvlowɔwɔ dziŋɔwo le dzidzim ɖe edzi ɖo.

Nyatakaka aɖe ɖee fia be le ƒe 1995 me la, ame 32 koe woda tu wu le Japan, eye akpa gãtɔ nye nuvlowɔha me tɔ siwo nuvlowɔha bubu me tɔwo wu. Gake ame 15,000 kple edzivɔe woda tu wu le United States ya. Nuka gbɔe vovototoa tso? Ame aɖewo yɔ se sesẽ si ku ɖe tu ƒe amesinɔnɔ ŋu le Japan be enye susuawo dometɔ ɖeka.

Amewo ƒe Temanɔmanɔ Ðe Agbemekuxiwo Nu

Ne amewo se nu dziŋɔ aɖewo ƒe dzɔdzɔ la, ɖewohĩ woagblɔ be, ‘Tsu kumee ame ma anya le!’ Gake menye amesiwo wɔa nuvlo mawo tɔgbe katãe tagbɔ le fu ɖem na o. Ke boŋ esesẽna na wo dometɔ geɖe be woanɔ te ɖe agbemekuxiwo nu. Numekulawo tɔ asi nanewo ƒe afɔmatsɔmatsɔ nyuie siwo ate ŋu ana woawɔ nu dziŋɔwo  la dzi. Wo dometɔ aɖewoe nye esiwo gbɔna: nu si womete ŋu srɔ̃na kple hadomegbe si womenya nɔnɔ o; ŋlɔmiwɔwɔ alo amegbɔdɔdɔ sesẽe me tsonu vɔ̃wo; hadomegbenɔnɔ manyamanya ƒe nɔnɔmewo; fuléle ƒuƒoƒo aɖewo, abe nyɔnuwo ene; nugbegblẽwɔwɔ ŋuti vevemasemase; kple dzodzro be woakpɔ ŋusẽ gbegblẽ ɖe ame bubuwo dzi.

Nuka kee ɖanye woƒe kuxi o, ame aɖewo ƒe susu katã nɔa nɔnɔme sesẽ siwo me wole ŋu ale gbegbe be nu va gblẽna le woƒe tamebubu ŋu, eye esia ate ŋu ana woawɔ nu manyatalenuwo. Esia ƒe kpɔɖeŋu aɖee nye dɔnɔdzikpɔla aɖe si di vevie be yeahe ame bubuwo ƒe susu ɖe eɖokui ŋu. Edo abi aɖe si gbɔdzɔa lãmeka na ɖevi aɖewo eye woƒe gbɔgbɔ nu tso. Emegbe dzi dzɔe ale gbegbe esime wòhe amewo ƒe susu ɖe eɖokui ŋu to nana be ɖeviawo “nagate gbɔgbɔ ake” me. Nublanuitɔe la, mete ŋu na wo katã gate gbɔgbɔ o. Wobu fɔe be ewu ame.

Eɖe dzesi ƒã le nya siwo me míedzro fifia me be nu geɖewoe kpɔa ŋusẽ ɖe amewo dzi wowɔa ŋutasẽnu dziŋɔwo. Ke hã, nusiwo míeyɔ la made ne míeƒo nu tso nu vevi bubu ɖeka aɖe ŋu o.

Biblia ƒe Ŋuɖoɖo

Biblia kpe ɖe mía ŋu be míase nusiwo le dzɔdzɔm fifia la gɔme ahanya nusita amewo wɔa nu dziŋɔ mawo. Eɖɔ amewo ƒe nuwɔna siwo teƒe míekpɔna ɣesiaɣi la pɛpɛpɛ. Le kpɔɖeŋu me, Timoteo II, 3:3, 4 gblɔ be amewo ‘malɔ̃ ame ƒe nya o’ eye be woanye ‘amesiwo mete ŋu ɖua wo ɖokui dzi o, ame wɔadãwo, amesiwo melɔ̃a nu nyui o, kple ame mabunuwo.’ Le Biblia-gbalẽ bubu me la, woyɔ Yesu ƒe nya aɖe si wògblɔ be: “Ame geɖewo ƒe lɔlɔ̃ nu latsi.”—Mateo 24:12.

Biblia gblɔ be: “Le ŋkeke mamlɛawo me la ɣeyiɣi vɔ̃wo lava.” (Timoteo II, 3:1) Ẽ, nusi kpɔm míele la nye kpeɖodzi be míele fifi nuɖoanyiawo ƒe nuwuɣi me. Nɔnɔmewo kple amewo ƒe agbenɔnɔ le gbegblẽm ɖe edzi ɣesiaɣi. Ðe míate ŋu akpɔ mɔ na nɔnɔmea gbɔ kpɔkpɔ kpataa? Biblia ɖo eŋu be: “Ame vɔ̃ɖiwo kple ameblelawo la woayi dzi vɔ̃ɖitɔe wu.”​—Timoteo II, 3:13.

Ðe esia fia be alea koe nuvlowɔwɔ dziŋɔwo ayi edzi anɔ fu ɖem na ameƒomea ɖaa? Mina míadzro biabia sia me le nyati si kplɔe ɖo me.

[Aɖaka si le axa 6]

ÐE WODZIA AME KPLE ŊUTASẼNUWƆWƆA?

Ame aɖewo ʋlia nya be didi be woawɔ ŋutasẽnu alo awu ame nyea amegbetɔwo ƒe dzɔdzɔmedidi ɣesiaɣi. Nɔnɔmetɔtrɔnufiafia taʋlilawo tea tɔ ɖe edzi be lã wɔadãwo mee míedzɔ tso eye be míenyi woƒe nu gbodogbodowɔwɔ ƒe nɔnɔmewo dome. Nufiafia siawo afia be ŋutasẽnuwɔwɔwo ayi edzi le mía dome tegbetegbe eye mɔkpɔkpɔ aɖeke meli be wo nu ava yi o.

Ke hã, kpeɖodzi geɖe li be mele nenema kura o. Nufiafia mawo siwo ŋu míeƒo nu tsoe meɖe nusita vovototo gã aɖe le ŋutasẽnuwɔwɔwo ƒe dzɔdzɔ kple wo ƒomeviwo me le ameƒomevi vovovowo dome la me o. Womeɖe nusitae wòdzena abe ŋutasẽnuwɔwɔ nye numame na ameƒomevi aɖewo, evɔ le ame bubuwo dome ya ŋutasẽnuwɔwɔ ʋɛ aɖewo koe dzɔna, eye ƒã hafi amewunya aɖe aɖi la me o. Seselelãmeŋutinunyala Erich Fromm ɖee fia be vodada le nufiafia si nye be lãwo gbɔe míenyi ŋutasẽnuwɔwɔ ƒe dome tsoe me esime wòɖee fia be togbɔ be wo dometɔ aɖewo wɔa ŋutasẽnuwo le ŋutilãmenuhiahiãwo alo ɖe wo ɖokui taʋiʋli ta hã la, amegbetɔwo koe wonya be wowua ame ɖe dzidzɔdodo na wo ɖokui ta.

Nufialagã James Alan Fox kple Jack Levin gblɔ le woƒe agbalẽ si nye The Will to Kill​—Making Sense of Senseless Murder me be: “Ame aɖewo lɔ̃a ŋutasẽnuwo wɔwɔ kabakaba wu ame bubuwo, ke hã, tiatiawɔblɔɖe kpɔtɔ le wo si. Togbɔ be ememe kple gotagome ŋusẽkpɔɖeamedzinuwo gbɔe amewuwu ƒe didi tsona hã la, tiatiawɔwɔ kple amegbetɔwo ƒe nyametsotso wɔwɔ kpɔtɔ li, eyata woabu eŋuti kɔnta ahaxɔ fɔɖiɖia.”

[Aɖaka/Nɔnɔmetata si le axa 7]

KƆMPIUTADZIFEFE ME ŊUTASẼNUWƆNAWO​—ÐƆKTA AÐE ƑE NUKPƆSUSU

Ðk. Richard F. Corlin, si nye Amerika Tikewɔlawo ƒe Habɔbɔ ƒe zimenɔla tsã la ƒo nuƒo aɖe na ɖɔkta siwo nɔ suku nu wum le Philadelphia, Pennsylvania, U.S.A., ƒe ƒuƒoƒo aɖe. Le nuƒoa me la, eƒo nu tso kɔmpiutadzifefe siwo dea ŋutasẽnuwɔwɔ ƒe dzi ƒo la ŋu. Fefe siawo dometɔ aɖewo naa ŋgɔyiyidzesiwo amesi tɔ nu ame aɖe wòxɔ abi, amesi da tu ame wòxɔ abi xɔa dzesi si gayi ŋgɔ wu, eye amesi da tu wòlɔ ame ƒe ta ƒe dzesi gasɔa gbɔ wu ema hã. Ʋu kɔna ɖe anyi bababa, eye amewo ƒe ahɔhɔ̃ kakana ɖe anyigba nyamaa.

Ðk. Corlin gblɔ be womeɖea mɔ na ɖeviwo be woaku ʋu o, womeɖea mɔ na wo be woano aha sesẽ o, eye womeɖea mɔ na wo be woano atama ne wometsi o. Eyi edzi be: “Gake míeɖea mɔ na wo be woana tudada ƒe hehe wo le ɣeyiɣi si me womekpɔ nya alesi woaɖu woƒe seselelãmewo dzi o me, eye wometsi ɖo afi aɖeke ate ŋu amla wo ɖokui le aʋawɔnu siwo wotsɔ le fefemee zazã nyuie me o. . . . Ehiã be míafia nu mía viwo tso gɔmedzedzea me be ŋutasẽnuwɔwɔ [kple] emetsonu—dziŋɔwoe—zɔna ɣesiaɣi.”

Nublanuitɔe la, le esi teƒe be woafia nu ɖeviwo be nuvlowɔwɔ me tsonuwo menyo o la, ɖeviwo, amesiwo mele naneke nyam o la ŋue ŋutasẽnuwɔwɔ dziŋɔwo gblẽa nu le. Akɔntabubu ɖee fia be wodaa tu ɖevi ewo wokuna gbesiagbe le United States. Ðk. Corlin gblɔ be: “Le xexeame katã la, United States ye xɔ ŋgɔ—le dukɔ siwo me wodaa tu wua ɖeviwo le wu dukɔ ɖesiaɖe.” Aleke wòƒo nya tae? “Tu zazã atsɔ awɔ ŋutasẽnu nye afɔku gã na míaƒe dukɔmeviwo ƒe lãmesẽ. Nya sia nye nyateƒe matrɔmatrɔ.”

[Aɖaka si le axa 9]

NUSIWO GBƆ ŊUTASẼNUWƆWƆ DZIŊƆWO TSONA DOMETƆ AÐEWO

Eŋutinumekula bibi geɖewo bui be nuvlowɔwɔ manyatalenuwo ate ŋu atso nusiwo gbɔna gbɔ:

Ƒome ƒe gbagbã

Ƒuƒoƒo siwo me fuléle aɖe le, nugbɔmewɔwɔ

Vivimeha vɔ̃ɖiwo

Modzakaɖenu siwo me ŋutasẽnuwɔna dzena le

Ŋutasẽnuwɔna ŋutɔŋutɔwo teƒe kpɔkpɔ

Atikevɔ̃ɖiwo zazã

Temanɔmanɔ ɖe agbemekuxiwo nu

Tu vɔ̃ɖiwo kpɔkpɔ bɔbɔe

Tagbɔdɔléle aɖewo ƒomevi

[Nɔnɔmetata si le axa 8]

Bɔmb atɔ̃ siwo woda dometɔ ɖeka wu ame 12 ya teti, hede abi amesiwo wu 80 ŋu le Quezon City, Philippines

[Afi Si Míexɔ Mɔɖeɖe Tso]

AP Photo/Aaron Favila December 30, 2000

[Nɔnɔmetata si le axa 8]

Sukuvi eve wu nufiala ɖeka, wo hati 12, kpakple wo ɖokui le Columbine High School, Colorado, U.S.A.

[Afi Si Míexɔ Mɔɖeɖe Tso]

AP Photo/Jefferson County Sheriff’s Department April 20, 1999

[Nɔnɔmetata si le axa 8, 9]

Bɔmb aɖe si woɣla ɖe ʋu aɖe me wu amesiwo ade 182 hede abi ame 132 ŋu le zãmodzakaɖeƒe aɖe le Bali, Indonesia

[Afi Si Míexɔ Mɔɖeɖe Tso]

Maldonado Roberto/GAMMA October 12, 2002