Dzo kpo yi emenuwo dzi

Dzo kpo yi emenuawo dzi

Avetsu Damawo—Amekae Akpɔ Wo Ta?

Avetsu Damawo—Amekae Akpɔ Wo Ta?

 Avetsu Damawo​—Amekae Akpɔ Wo Ta?

ELE be amesiame si di be yeakpɔ nusiwo doa kplamatse anyigba xɔdzo dzi vewo gbɔ la, nakpɔ kuxi vevi siwo henɛ vɛ gbɔ gbã. Nukawoe nye kuxiawo? Menye amegbetɔwo ƒe agbɔsɔsɔ fũ koŋue nye kuxia o. Míaƒe ɣletinyigba ƒe nuto damawo ate ŋu alé xexea me nɔlawo ƒe agbe ɖe te bɔbɔe—tsɔ kpe ɖe xexlẽme gbogbo aɖe gɔ̃ hã ŋu.

Le nyateƒe me la, dziɖuɖu aɖewo tsi dzi vevie le dukɔ aɖewo me ku ɖe nukugbledede fũ ŋu, elabena esia na nuɖuɖu ƒe asi ɖiɖina ŋutɔ. Dziɖuɖu aɖewo dea dzi ƒo na agbledelawo be woatrɔ woƒe anyigbawo wòazu fefewɔƒewo, abe modzakaɖeƒewo, golf-ƒoƒewo, alo lãwokpɔƒe ene.

Ekema nukatae avetsu siwo le xexeame le vɔvɔm ɖo? Ele be míalé ŋku ɖe nusiwo henɛ vɛ ŋu nyuie wu nusiwo ŋu míeƒo nu tsoe va yi.

Nusiwo Koŋ Gbɔe Avewo ƒe Tsɔtsrɔ̃ Tsona

Ɣeyiɣi didi aɖe do ŋgɔ na amewo ƒe agbɔsɔsɔ fũ egbea la, dziɖuɖu geɖewo xɔ ave gbogbo aɖewo le ŋusẽxɔxɔ kple kesinɔnu didi ŋukeklẽtɔe ta. Le kpɔɖeŋu me, alesi Britain Fiaɖuƒea nɔ ati dim vevie hena tɔdziʋuwo kpakpa na wotsrɔ̃ Britaintɔwo ƒe avetsu siwo me ati hamehamewo nɔ eye emegbe wotsrɔ̃ ave siwo me oɖum geɖe nɔ le Burma kple Thailand. Fiaɖuƒe ma kee tsrɔ̃ ave siwo nɔ India esi wonɔ ati dim hena gayibɔ ƒe dɔwɔƒe tututu. Wotsrɔ̃ ave bubuwo ɖe aŋe, kɔfi, kple kokogblewo dede ta.

Gake le xexemeʋa evelia megbe la, atitsomɔ̃wo kple anyigbakumɔ̃wo na atitsotso le avewo me va dzi ɖe edzi geɖe ŋutɔ. Wonɔ ave geɖewo tsrɔ̃m.

Dɔwɔƒe gãwo ƒle anyigba gbogbo aɖewo eye wozã mɔ̃wo tsɔ de nukugblewoe. Esi wonya kɔƒe me nɔla akpe nanewo le dɔme la, woʋu yi ɖe du gãwo me. Gake wode dzi ƒo na bubuwo be woaʋu ayi ɖe avenyigbawo dzi. Woɖɔa anyigba mawo ɣeaɖewoɣi be enye “anyigba si dzi amewo mele o alo be amesiwo si anyigba mele o.” Hafi amewo nava de dzesi alesi gbegbe wòsesẽ be woade agble le nuto mawo me la, etsi megbe ŋutɔ—elabena avetsu gãwo tsrɔ̃ ɖa.

Dumemegãwo ƒe nufitifitiwɔwɔ hã nye avewo tsɔtsrɔ̃ ɖa ŋuti kuxiwo dometɔ ɖeka. Mɔɖegbalẽ si wonana ɖe atitsotso ŋu nyea nusi me wokpɔa ga gbogbo le. Le zãnunana gome la, wode dzesi dumemegã anukwaremaɖila aɖewo be wonana ɣeyiɣi kpui aɖe ƒe mɔɖegbalẽ atidzedɔwɔƒe siwo tsoa atiwo ɖekematsɔlemetɔe.

 Gake menye atidzedzee nye afɔku gãtɔ na gbemelãwo ƒe agbe o ke boŋ afima tɔtrɔ zu agbledeƒewo boŋue. Le go aɖewo me la, ne teƒea nye anyigba wɔnu la, ekema tɔtrɔ ma tɔgbe sɔ. Gake zi geɖe la, dumemegã nufitifitiwɔlawo alo esiwo medze tututu o la ɖea mɔ ɖe ave siwo magate ŋu aɖo wo teƒe gbeɖe o ŋu.

Nuvlowɔlawo hã gblẽa avewo dome. Atidzela mawɔsedziwo hã va tsoa ati veviwo, wotsoa ati le tsaɖibɔwo me kura gɔ̃ hã le bebeme. Ɣeaɖewoɣi la, wodzea atiawo le avea me tẽ—si nye nu dome gbegblẽ si mele se nu o. Woxea fe na nutoa me nɔlawo be woatsɔ gasɔwo alɔ ati dzedzeawo ɖa le avea me alo be woalɔ wo kple ta kura gɔ̃ hã. Emegbe ne zã do la, agbatsɔʋuwo va lɔa wo ɖatoa mɔ siwo le towo dzi afisi amewo metona o be woagaka agba me na wo o ta.

Eyata menye amewo ƒe agbɔsɔsɔ fũ si ŋu womate ŋu awɔ naneke le o gbɔe avewo kple gbemelãwo tsɔtsrɔ̃ ɖa tso o. Zi geɖe la, nuwo ŋudɔ mawɔmawɔ nyuie, asitsala ŋuklẽlawo, nuvlowɔwɔ, kple dziɖuɖuwo ƒe nufitifitiwɔwɔ gbɔe wòtsona. Esi nya la le alea ta la, mɔkpɔkpɔ kae li na nugbagbe ƒomevi vovovo siwo nɔa avetsu damawo me?

Mɔkpɔkpɔ Kae Li na Avetsuwo?

Agbalẽ si nye The Cutting Edge: Conserving Wildlife in Logged Tropical Forest gblɔ be: “Ave siwo le anyigba xɔdzowo dzi ƒe akpa sue aɖe koe woléa be na.” Egagblɔ kpee be: “Fifi laa la, avenyigba ʋɛ aɖewo (ne ɖe li gɔ̃ hãe nye ma) ŋudɔ koe wowɔna le mɔ si ana woanɔ anyi dedie nu.” Wo ŋudɔwɔwɔ be woanɔ anyi ɣeyiɣi didi nye nusi woate ŋu awɔ, gake nusi le dzɔdzɔm ŋutɔŋutɔ le xexeame godoo enye avenyigbawo tsɔtsrɔ̃ ɖa si le dzidzim ɖe edzi kabakaba.

Wogblɔna be Bolivia koe do le eme le go sia me wòɖe dzesi, afisi avetsu dama 25 le alafa me le eye woɖi ɖase le eŋu be wowɔa wo ŋu dɔ le mɔ si ana woanɔ anyi dedie nu. Gake le xexeame godoo la xexlẽmea mate ŋu ade ɖeka le alafa me o—agbɔsɔsɔ sia ɖea dzi le ame ƒo ŋutɔ. Wowɔa avenyigba geɖewo ŋudɔ yakatsyɔ. Ðokuitɔdidi kple ŋukeklẽe nye nusi koŋ nana wotsrɔ̃a wo nenema. Ekema aleke wòanya wɔe be woakpɔ mɔ be xexeame ƒe asitsalawo kple dunyahedziɖulawo adzudzɔ eye woatrɔ ɖe ameƒomea ƒe domenyinu si ŋu mele be woaƒo asi o la ta kpɔkpɔ ŋui?

Agbalẽ si nye Forests of Hope tsɔ nya sia si sɔ na ameƒomea la ƒo etae be: “Eyae nye be woati agbenɔnɔ si asɔ na amewo le xexeame godoo yome, esi menana wotsrɔ̃a anyigba la kple emenuwo o.” Taɖodzinu ma ʋãa dzi na ame ŋutɔ—gake ɖe wòanya wɔa?

Nukae nye mía Wɔla ƒe tameɖoɖo na anyigba kple ameƒomea? Ede se na ame eve gbãtɔwo be: “Midzi, ne miasɔ gbɔ, eye miayɔ anyigba la dzi, eye mianye agbo ɖe edzi, miaɖu ƒumelãwo kple dziƒoxe dzodzoewo kple lã, siwo katã zɔna le anyigba dzi la dzi!” (Mose I, 1:28) Eyata Mawu ɖe mɔ na amegbetɔwo be woawɔ nuwɔwɔwo ŋudɔ. Gake ‘nuwo dziɖuɖu’ meɖe mɔ ɖe wo tsɔtsrɔ̃ ŋu o.

Ekema biabia lae nye be, Ðe wòanya wɔ be amegbetɔwo natrɔ woa ŋutɔwo ƒe agbenɔnɔ le xexeame godoo wòasɔ kple esi “menana wotsrɔ̃a anyigba la kple emenuwo o” la? Nya mawo ɖe lɔlɔ̃ na amehavi kple bubudede Mawu ƒe nuwɔwɔ ŋu fia si nye nusi mebɔ le egbe xexeame o. Be woakpɔ mɔ be amegbetɔ kplɔlawo atia agbenɔnɔ ma ahadoe ɖe ŋgɔ le abe mɔkpɔkpɔ na nususukpɔ aɖe ene.

Ke hã Mawu ƒe Nya la gblɔ ɣeyiɣi si me anyigba la ayɔ kple amesiwo lɔ̃a wo haviwo kple wo Wɔla la ƒe nya ɖi. Biblia la gblɔ be: “Womawɔ vɔ̃ aɖeke o, eye womahe gbegblẽ ava nye tonyigba kɔkɔe blibo la dzi o; elabena sidzedze Yehowa xɔ anyigba la dzi, abe alesi tsi yɔ atsiaƒu me ene.” (Yesaya 11:9; Psalmo 37:29; Mateo 5:5) De dzesii be esi amewo va nya Yehowa, Wɔla Gã la, helɔ̃nɛ ta la, Mawu ƒe amewo tsri ‘vɔ̃ wɔwɔ’ alo “gbegblẽ” hehe vɛ. Ðikeke mele eme o be ame mawo tɔgbe aƒo asa na anyigba la gbegblẽ godoo.

Esia menye drɔ̃e aɖe ko o. Fifi laa gɔ̃ hã la, Yehowa le dzianukwaretɔwo nu ƒom ƒu hele nu fiam wo. Ame miliɔn nane siwo le anyigba dzi godoo srɔ̃ agbenɔnɔ si wotu ɖe ɖokuitsɔtsɔsavɔ ƒe lɔlɔ̃ na amewo dzi tso Mawu ƒe Nya la me. (Yohanes 13:34; Yohanes I, 4:21) Wotaa magazine sia kple eƒe kpeɖeŋutɔ si nye Gbetakpɔxɔ be woatsɔ akpe ɖe amewo ŋu be woasrɔ̃ nu geɖe tso agbenɔnɔ ma tɔgbe ŋu kple alesi woawɔ anɔe ŋu. Míekpe wò be nàyi edzi asrɔ̃ nu geɖe. Viɖe mele naneke ŋu wu nusia sɔsrɔ̃ o.

[Nɔnɔmetata siwo le axa 26]

Amegbetɔwo alé be na anyigba dzeani la wu be woatsrɔ̃e