Dzo kpo yi emenuwo dzi

Dzo kpo yi emenuawo dzi

Fêng Shui—Ðe Wònyo na Kristotɔwoa?

Fêng Shui—Ðe Wònyo na Kristotɔwoa?

 Biblia Ƒe Nukpɔsusu

Fêng Shui—Ðe Wònyo na Kristotɔwoa?

LE ASIA la, nusi wòfia dzie wonɔa te ɖo ɖoa teƒe ɖi na ameɖibɔ. Wotaa xɔwo heɖoa atsyɔ̃ na wo ɖe nusi wòfia nu. Nunɔamesiwo ƒeƒle kple wo dzadzra nɔa te ɖe edzi. Woyɔnɛ le Chinagbe me be fêng shui, si nye anyigbafakaka alo afakaka tɔgbe aɖe. Togbɔ be Asia ye fêng shui bɔ ɖo ƒe alafa geɖe hã la, ekaka ɖo Ɣetoɖoƒedukɔwo me le ƒe siawo me. Xɔtuɖaŋunyala aɖewo le ezãm le xɔ kɔkɔwo, dɔwɔƒewo, kple aƒewo tata me. Srɔ̃nyɔnu aƒedzikpɔla aɖewo zãnɛ le atsyɔ̃ɖoɖo na woƒe aƒewo me. Agbalẽ kple Internet dzi Nyatakakadiƒe gbogbo aɖewo donɛ ɖe ŋgɔ hefianɛ.

Susu ka tae wòle ta kekem alea? Edzixɔsela aɖe gblɔ be fêng shui ate ŋu ana “agbenɔnɔ kple lãmesẽ nanyo ɖe edzi, ana srɔ̃ɖeɖe alo adzɔdodo me nanyo, ate ŋu ana woakpɔ kesinɔnu geɖe, eye ame ƒe dzi nadze eme.” Togbɔ be esiawo katã dze nu nyuiwoe hã la, nuka tututue nuwɔna sia nye, eye aleke wòle be Kristotɔwo nabui?

Nukae Wònye?

Chinagbe me nya fêng shui le nyaa ŋutɔŋutɔ nu fia ‘ya kple tsi.’ Fêng shui dze egɔme xoxoxo ƒe akpe geɖe tso ɣeyiɣi si me woto Ɣedzeƒetɔwo ƒe xexemenunya geɖe vɛ. Dzixɔse siawo dometɔ aɖee nye nusi woyɔ be yin kple yang (viviti kple kekeli, dzoxɔxɔ kple fafa, nu gbegblẽ kple nu nyui) ƒe dadasɔ. Wotsɔ yin kple yang nukpɔsusua kpe ɖe nukpɔsusu si nye chʼi, si fia “ya” alo “yagbɔgbɔ” le nyaa ŋutɔŋutɔ nu ŋuti. Yin, yang, kple chʼi, kpakple nusiwo woyɔna be anyigba dzi nu atɔ̃awo, siwo nye ati, anyigba, tsi, dzo, kple gakpo, nye fêng shui nukpɔsusua ƒe akpa vevi aɖewo. Fêng shui dzixɔselawo xɔ se be dzɔdzɔmeŋusẽ ƒe fli sẽŋu aɖewo zɔ to anyigba ƒe akpa sia akpa. Taɖodzinuae nye be woade dzesi afisiwo anyigba kple yame ƒe dzɔdzɔmeŋusẽwo alo chʼi, da sɔ le. Wowɔa esia to anyigba la ŋutɔ ƒe nɔnɔme tɔtrɔ alo xɔ si wotu ɖe teƒe aɖe tɔtrɔ me. Wosusu be ne yewote ŋu na nusiawo da sɔ la, ana nu nadze edzi na amesiwo le dɔ wɔm le afima alo amesiwo le teƒea.

Zi geɖe la, fêng shui ŋu nyala bibiwo zãa anyigbafakanu aɖe. * Alesi afakanu sia le enye be wowɔ ɣletivi me nɔnɔmetatawo kple nuŋɔŋlɔwo ɖe nu gbadzɛ aɖe dzi eye wode teƒefianu sue aɖe si trona la eƒe titina. Wote fli tegblẽe siwo ƒo xlã wo nɔewo la ɖe edzi eye wogate fli dzɔdzɔe bubuwo tso ga tegblẽeawo mee keŋ. Ðoɖo si nu woɖo ɣletiviwo ɖo, ɣeyiɣiwo, kple ɣe ŋuti nyatakakawo le anyigbafakanua dzi. Ne wole ŋugble dem le xɔtuƒe alo xɔ aɖe ŋu la, wodea dzesi nyatakaka vovovo siwo wokpɔ le afakanua dzi. Fêng shui ŋu nyalaa léa ŋku ɖe afisi teƒefianua kple fli dzɔdzɔeawo kpakple fli tegblẽeawo do go le la ŋu, eye esia dzie wònɔa te ɖo nyaa nusi hiã be woatsɔ “aɖɔ” xɔtuƒe aɖe “ɖoe.”

Wote ŋu léa ŋku ɖe nuto si me teƒea le, tsimɔwo, tsigbegblẽtoƒewo, kple afisi woaɖe fesre kple ʋɔtruwo gɔ̃ hã ɖo le xɔa ŋu la katã ŋu ne wodi be woakpɔ afisi teƒea anɔ wòada asɔ. Le kpɔɖeŋu me, le Canada la, fiasetɔ aɖe ku ahuhɔ̃e ɖe eƒe fiasea ƒe megbe ʋɔtru ŋu be yeatsɔ “aɖɔ” alesi wode fiasea ƒe ʋɔtruwoe “ɖo.” Nenema ke anyigbafakala ate ŋu akafui be woaɖɔli teƒe na numiemiewo alo zikpuiwo,  be woaɖɔli foto aɖe, woagatsɔ xɔtamegaƒoɖokui bubu akpee, alo woaɖe tɔmelãnyita be woana xɔ alo xɔ aɖe me nada asɔ.

Kristotɔwo ƒe Nukpɔsusu

Enye nusi ɖe dzesi be le agbalẽdzraɖoƒe akpa gãtɔ la, fêng shui gbalẽ kple ɣletivimefakaka kpakple etsɔmegbɔgblɔɖi ŋuti gbalẽwoe woɖo ɖe teƒe ɖeka. Le nyateƒe me la, nyagɔmeɖegbalẽ aɖewo ɖe anyigbafakaka me be enye afakaka si me wozãa xexlẽdzesiwo alo fliwo alo anyigba dzi nuwo le tsɔ kaa afae. Eyata ame geɖe lɔ̃ ɖe edzi be fêng shui kpakple anyigbafakaka ƒomevi bubuwo nye etsɔmegbɔgblɔɖi. Afakaka kple gbɔgbɔyɔyɔ nuwɔnawoe wonye, eye womenye nu yeye aɖeke na amegbetɔwo o.

Esime Israel-viwo dzo le Egipte hege ɖe Kanaan-nyigba dzi mlɔeba le ƒe alafa 15 lia D.M.Ŋ. me la, afakaka ƒomevi vovovowo bɔ le dukɔ eve mawo siaa me. Mawu gblɔ to Mose dzi woŋlɔ ɖe Mose V, 18:14 be: “Dukɔ, siwo nyã ge nala la, ɖoa to goloɖolawo kple bokɔnɔwo; ke wò la, Yehowa, wò Mawu, meɖe esia ƒe mɔ na wò o.” Afakaka ƒomevi geɖe siwo nɔ Egipte kple Kanaan la dzɔ tso blema Babilon. Esime Yehowa tɔtɔ Babilontɔwo ƒe gbe la, wokaka yi teƒe bubuwo, eye wotsɔ nuwɔna siwo do ƒome kple Babilontɔwo ƒe afakaka kple gbɔgbɔyɔyɔ yii.—Mose I, 11:1-9.

Yehowa Mawu xlɔ̃a nu Israel-viwo vevie edziedzi be woagaƒo wo ɖokui ɖe dukɔwo ƒe afakaka nuwɔnawo me o, esime wògblɔ be: ‘Bokɔnɔ, goloɖola, zidoedola aɖeke meganɔ dowòme o. Amesiame, si le nusia wɔm la, ŋunyɔnu wònye na Yehowa, elabena ŋunyɔnu siawo ta Yehowa, wò Mawu, le wo nyã ge le ŋgɔwò ɖo.’ (Mose V, 18:9-12; Mose III, 19:26, 31) Egblɔ be woawu afakalawo enumake.—Mose II, 22:18; Mose III, 20:27.

Nukatae wòtsri afakaka ƒomevi ɖesiaɖe keŋkeŋ? Dɔwɔwɔwo 16:16-19 gblɔ nyɔnu aɖe si me ‘afakakagbɔgbɔ’ le ŋu nya. Ẽ, afakaka do ƒome kplikplikpli kple gbɔgbɔyɔyɔ. Eyata gomekpɔkpɔ le afakaka nuwɔna ƒomevi ɖesiaɖe me ana kadodo nanɔ ame kple Satana kpakple eƒe gbɔgbɔ vɔ̃wo dome! Ema ate ŋu ana nu nagblẽ le ame ŋu le gbɔgbɔ me.—Korintotɔwo II, 4:4.

Alakpasubɔsubɔ nuwɔnawo abe fêng shui enee anya kpɔ ŋusẽ ɖe Ɣedzeƒetɔwo alo Ɣetoɖoƒetɔwo ƒe atsyɔ̃ɖoɖo na aƒe kple anyigba dzadzraɖo ƒe atsyã nyanyɛ aɖewo dzi le gɔmedzedzea me. Gake zi geɖe la, subɔsubɔ nukpɔsusu si nɔ atsyã mawo ŋu tsã va buna keŋkeŋ. Ke hã anye Mawu ƒe se dzi dada tẽ ne woto fêng shui zazã me be woanya etsɔme alo ahe dzɔgbenyui alo lãmesẽ vɛ na ame. Ema wɔwɔ anye se si Biblia de eme kɔ ƒã be woagaka asi “nu makɔmakɔ” aɖeke ŋu o la dzi dada.—Korintotɔwo II, 6:14-18.

[Etenuŋɔŋlɔ]

^ mm. 7 Le Ɣetoɖoƒedukɔwo me la, fêng shui zãlawo dze agbagba zãa dzɔdzɔmeŋutinunya deŋgɔ le ewɔwɔ me, wo dometɔ aɖewo gɔ̃ hã zãa kɔmpiutawo tsɔ léa ŋku ɖe anyigba ƒe nɔnɔmewo ŋui.

[Nɔnɔmetata si le axa 15]

Anyigbafakanu

[Afi Si Míexɔ Mɔɖeɖe Tso]

Pages 2 and 23: Hong Kong Tourism Board