Dzo kpo yi emenuwo dzi

Dzo kpo yi emenuawo dzi

Etsɔmemɔkpɔkpɔ Kae Li?

Etsɔmemɔkpɔkpɔ Kae Li?

 Etsɔmemɔkpɔkpɔ Kae Li?

NUSIWO katã ŋu míede ŋugble le ƒe akpa aɖe koe amegbetɔ nye. Nuwɔwɔ siwo katã le anyigba dzi ƒe wɔƒe li si Mawu ɖo na wo. Mía kple nu gbagbe bubu siwo ƒo xlã mí kpɔa gome le nu geɖe me ɖekae—esi ƒo wo katã ta lae nye agbe, nunana wɔnuku la ŋutɔ hã. Susu sia tae wòtena ɖe ame geɖe dzi vevie ne nu gbagbe ƒomevi aɖe tsrɔ̃.

Esime dzɔdzɔmeŋutinunyala Anthony C. Janetos nɔ eƒe nyawo ŋlɔm ɖe Consequences magazine me la, egblɔ be: “Ame geɖe alɔ̃ ɖe edzi be esi mí katã míedo ka ta la, enye míaƒe agbanɔamedzi be míakpɔ ɣletinyigba la ta be wòakpɔtɔ anye nɔƒe, eye be míanye xɔnuvi nyui siwo kpɔa nu gbagbe ƒomevi gbogbo siwo le edzi la ta hena amegbetɔƒome siwo le edzi fifia kple esiwo le vava ge ƒe dedienɔnɔ. Be esia nanya wɔ la, ebia be míatsɔ ɖe le nu gbagbe ƒomevi vovovowo ƒe vevienyenye me—le nusiwo míekpɔna tsoa wo gbɔ hena nu gbagbe ɖesiaɖe ƒe zazã kple le mɔ siwo dzi míate ŋu azã wo le siaa ta—eye míaɖoe kplikpaa be míakpɔ wo ta.”

Nuka Wɔm Wole tso Eŋu?

Le nyateƒe me la, alesi amewo tsi dzi le xexeame godoo ɖe nu gbagbe siwo dzi míaƒe agbe nɔ te ɖo ƒe tsɔtsrɔ̃ ta na dziɖuɖuwo kple habɔbɔ bubuwo ƒe amedɔdɔwo kpe ta wɔ Nu Ggbagbe Ƒomeviwo Takpɔkpɔ Ðoɖo. Wokpɔe le ɖoɖo sia si me kɔ la me be nu gbagbe ƒomevi vovovowo takpɔkpɔ nye nusi me wole be amesiame natsɔ ɖe le.

Be woagase nu gbagbe ƒomevi vovovowo ƒe nyaa gɔme ɖe edzi la, nugbagbeŋutinunyalawo, nu gbagbewo kple wo nɔƒewo ŋutinunyalawo, kple dzɔdzɔmeŋutinunyala bubu siwo le xexeame godoo ɖo ƒe 2001-2002 ɖi be wòanye Ŋkuléle Ðe Dukɔwo Dome Nu Gbagbe Ƒomeviwo  Ŋu ƒe Ƒe. Diana Wall, amesi nye nugbagbeŋutinunyala le Colorado State Yunivɛsiti, amesi nɔ zi me na numekuhaa gblɔ be: “Nu gbagbe ƒomevi vovovowo ŋuti numekuku wɔwɔ aʋu mɔnukpɔkpɔ geɖe na mí be míake ɖe domenyiŋusẽmenugbagbevi yeyewo ŋu, kple nusiwo woate ŋu atsɔ awɔ dɔyɔtikewoe, míate ŋu ana agblemenuwo nawɔ nyuie wu alo atrɔ asi le anyigba siwo dome wogblẽ ŋu woagbugbɔ aɖo woƒe nɔnɔ.” Wall gblɔ kpee be: “Vevietɔ wu la, nu gbagbe ƒomevi yeyewo ƒe nɔƒewo, akpa siwo wɔna be nu gbagbewo kple wo nɔƒewo nakpɔtɔ anɔ dedie, kple alesi míakpɔ wo tae la nyanya le vevie na mí ŋutɔ be míate ŋu awɔ nyametsotso nyuiwo tso míaƒe anyigbaa, tɔsisiwo kple atsiaƒugã gbanaawo ŋu.”

Tɔtrɔ Veviwo Wɔwɔ Hiã

Togbɔ be wowɔ ŋgɔyiyi aɖewo siwo dze na kafukafu hã la, kuxia ƒe dzesiwo ko gbɔe agbagbadzedze aɖewo kpɔ, ke menye nusiwo gbɔ wotso o. Numekulawo bui be afisi woɖo fifia la, ɣeyiɣi fũ mele amegbetɔwo si o. Esi Ruth Patrick, si le Dzɔdzɔmenunya Ŋuti Nusrɔ̃ƒe si le Philadelphia, Pennsylvania, U.S.A., ku nu me tso nusi wòyɔ be “nu gbagbe ƒomevi vovovo siwo ate ŋu atsrɔ̃” ŋu la, eƒo nya ta be “ŋkubiãɣi enye esia . . . Nuwɔwɔ kpatae hiã vevie fifia.” Be nu gbagbe ƒomeviwo tsɔtsrɔ̃ si le edzi yim natɔ te la, ele be amegbetɔ nawɔ tɔtrɔ tso alesi wòwɔa nui ɖe ɣletinyigba sia kple nu gbagbe siwo le edzi ŋu la me. Nu geɖe hiã wu be woanɔ nusiwo dome wogblẽ ɖɔm ɖo ko atɔ ɖe afima. Dzɔdzɔmenuwo Ŋuti Numekuha gblɔ be: “Eyata womate ŋu aɖe nu gbagbe ƒomevi vovovoawo takpɔkpɔ ɖa le hadome ŋgɔyinyawo . . . gbɔ kpɔkpɔ ŋu o.

Taɖodzinu sia gbɔ ɖoɖo abia kokoko be amegbetɔwo nawɔ tɔtrɔ veviwo. Agbalẽ si nye Caring for the Earth lɔ̃ ɖe edzi be xɔnuvi nyui nyenye bia “dzidzenuwo, ga ŋuti nukpɔsusu ɖɔʋu, kple ameƒomevinyenye si to vovo kura tso akpa gãtɔ siwo li egbea gbɔ.”

Biblia la na eme kɔ be ŋutete mele amegbetɔwo ŋu be woahe tɔtrɔ siawo vɛ o. Yeremya 10:23 gblɔ be: “Yehowa, menyae be, amegbetɔ ƒe mɔ kple ŋutsu ƒe zɔzɔme la menye eya ŋutɔ si me wòle, ne eƒe azɔlime nato mɔ ɖeka o.” (Lododowo 20:24) Nyateƒenya sia dze gaglãa le ŋutinya me katã, eye nusi do tso eme na amegbetɔwo esi woŋe aɖaba ƒu gɔmeɖose sia dzi na míele akɔ kpem kple “ɣeyiɣi vɔ̃wo” siwo ƒe nya wogblɔ le Timoteo II, 3:1-5. Kpukpui siawo fia mí hã be amewo ƒe nu trama wɔwɔwo gbɔe ɣeyiɣi vɔ̃awo tso. Eyata ne amewo metrɔ o la, ɣeyiɣi kpui aɖe koe kuxia gbɔ kpɔnu ɖesiaɖe si woato vɛ la anɔ anyi.

Le gbebiabia dzɔdzɔmeŋutinunyala Ðk. Jane Goodall, si xɔ ŋkɔ le xexeame godoo me la, egblɔ be nu gbagbewo ƒe nɔƒewo tsɔtsrɔ̃ “tsoa ŋukeklẽ ɖe ga ŋu kple ŋutilãmenudidi vivivo le dukɔ deŋgɔwo me gbɔ zi geɖe.” Eye nu miemieŋutinunyala Peter Raven, si nye United States Dukɔa ƒe Dzɔdzɔmenunya Ŋuti Nusrɔ̃ƒe ƒe agbalẽŋlɔla tsã la xlɔ̃ nu be “manyamanya, ɖekematsɔleme, koɖoɖo kple ŋubiã gbɔe kuxi vovovo siwo ate ŋu agblẽ nu le Anyigba la ŋu kura la tso.” Eyata dzidzenu siwo hiã be woatrɔ la dometɔ aɖewoe nye ɖokuitɔdidi, ŋukeklẽ, manyamanya, nuŋumabumabu yi ŋgɔe kple tɔnye-ko-nenyo nukpɔsusuwo.

Nusi Ko Akpɔ Nu Gbagbe Ƒomevi Vovovowo Ta

Esɔ be nu gbagbe ƒomevi vovovo siwo wɔ nuku ale gbegbe la Wɔla natsɔ ɖe le eƒe nuwɔwɔwo ƒe etsɔme me vevie. Biblia gblɔ na mí be Mawu ade nu nyawo me kpuie ‘ahatsrɔ̃ amesiwo le anyigba la gblẽm.’—Nyaɖeɖefia 11:18.

Ðe Mawu ana nu gbagbe siwo tsrɔ̃ le anyigba la dzi le amegbetɔwo ƒe nuwɔna ta natrɔ agbɔa? Ne Wɔla la di be yeana lã siwo tsrɔ̃ nagbugbɔ ado ɖe anyigbaa dzi la, ɖikeke mele eme o be ate ŋu agbugbɔ awɔ wo le etsɔme. Ate ŋu awɔ nu miemie siwo tsrɔ̃ la hã nenema ke. Gake esi Biblia megblɔ eŋunya na mí o ta la, masɔ be míasusu naneke agblɔ o.

Nusi ŋugbe wodo be Mawu ƒe dziɖuɖu awɔ enye be woayra anyigba dzi nu gbagbewo katã. Hakpala la gblɔ be: “Anyigba atso aseye, eye atsiaƒu kple eme nuwo aɖe gbe; agble kple nusiwo katã le eme la, akpɔ dzidzɔ, emegbe avemetiwo katã atso aseye.”—Psalmo 96:11, 12.