Dzo kpo yi emenuwo dzi

Dzo kpo yi emenuawo dzi

Tu Suewo, Ametsrɔ̃nu Gãwo

Tu Suewo, Ametsrɔ̃nu Gãwo

 Tu Suewo, Ametsrɔ̃nu Gãwo

NUKLIAƲAWƆNUWO ŋu koe woƒoa nu tsoe le mɔ siwo dzi woato akpɔ egbɔ be tuwo mabɔ fũ akpa o ŋuti numedzodzrowo me ƒe geɖe. Esia mewɔ nuku kura o elabena nukliabɔmb ɖeka dada ate ŋu atsrɔ̃ dugã blibo. Ke hã womezã aʋawɔnu gã vɔ̃ɖi siawo, abe alesi wozã tu suewo ene, le aʋawɔwɔ me o le ƒe 50 kple edzivɔ sɔŋ me.

Aʋawɔwɔŋutinyaŋlɔla, John Keegan, si ŋu wodea bubui ŋlɔ bena: “Tso August 9, 1945 dzi la, nukliaʋawɔnuwo mewu ame aɖeke kpɔ o. Aʋawɔnu tsɛ, siwo wowɔna le agbɔsɔsɔ gã me eye woƒe nu melolo o, siwo ƒe home gbɔ radio sue siwo me wodea batrii ŋu vie ko, lae wotsɔ wu ame 50,000,000 siwo ku le aʋawɔwɔ ta tso ŋkeke ma dzi ƒe akpa gãtɔ. Esi aʋawɔnu tsɛwo gblẽa nu le nuto siwo me atikevɔ̃ɖisitsatsa kple dunyahehe me nuvlowɔwɔ yia edzi le vevie me ko ta la, dukɔ siwo si ga le me tɔwo mele dzi tsim ɖe tu sue siawo zazã ƒe ŋɔdzidoname kple emetsonuwo ŋu o.”

Ame aɖeke menya tu sue kple aʋawɔnu siwo mekpena o agbɔsɔsɔ si tututue le amewo si le dukɔwo me ya o, gake eŋunyalawo bu akɔnta be tu siwo asrafowo zãna tɔgbe siwo le amewo si ade miliɔn 500. Tsɔ kpe ɖe eŋu la, tu siwo dukɔmevi dzrowo zãna kple asitui miliɔn nanewoe le dukɔmevi siwo menye asrafowo o si. Gakpe ɖe eŋu la, wowɔa aʋawɔnu yeyewo kɔna ɖe fiasewo me ƒe sia ƒe.

Aʋawɔnu Siwo Amewo Di

Nukatae wònye tu suewoe amewo lɔ̃a zazã le aʋawɔwɔ me le ŋkeke siawo me? Susu siwo tae ƒe ɖe enye ƒomedodo si le aʋawɔwɔ kple ahedada dome. Aʋa akpa gãtɔ si wowɔ le ƒe 1990-awo me dzɔ le dukɔ dahewo me—woda ahe ale gbegbe be womate ŋu aƒle aʋawɔnu gãwo o. Tu suewo kple aʋawɔnu siwo mekpena o mexɔ asi boo o. Le kpɔɖeŋu me, ga dɔlar miliɔn 50, si woatsɔ aƒle aʋawɔyameʋu siwo to fifia ƒe ɖeka, ate ŋu aƒle aʋawɔtu gã 200,000 si wozãna le amedzidzedze me na asrafoha ɖeka.

Ɣeaɖewoɣi la, tu suewo ƒe asi ɖiɖina wu ema kura. Ðeko asrafoha siwo le woƒe asrafowo kple tuwo dzi ɖem kpɔtɔ, alo le aʋa aɖe dzudzɔm hele bubu wɔƒe yim, ɖea asi le woƒe tu  gbogbo siawo ŋu dzro ko. Le dukɔ aɖewo me la, aʋawɔtu gã siwo wozãna le amedzidzedze me bɔ ale gbegbe be wodzraa wo hotsɔkpɔe ŋutɔ, wote ŋu xɔa dɔlar ade ɖe wo ta, alo axɔ gbɔ̃, koklo, alo awu xoxo kotoku ɖeka ɖe eta.

Gake le aʋawɔnu suewo ƒe asimaxɔmaxɔ kple woƒe bɔbɔ megbe la, susu bubuwo li siwo ta wobɔ alea gbegbe ɖo. Woƒe nugblẽƒe mekɔna o. Aʋawɔtu gã si dana kabakaba si wozãna le amedzidzedze me ɖeka ate ŋu ada tukpe zi 300 le aɖabaƒoƒo ɖeka me. Wo zazã kple wo dzadzraɖo hã le bɔbɔe. Woate ŋu afia ɖevi si xɔ ƒe ewo be wòakaka aʋawɔtu gã si wozãna le amedzidzedze me agagbugbɔ akpee. Azɔ hã ɖevi ate ŋu atsɔ ɣeyiɣi kpui ŋutɔ aɖe asrɔ̃ alesi wòatsɔ tu ma aɖo ameha aɖe dzi ahadae ɖe wo me.

Susu bubu si ta tuwo bɔ ɖo enye be wowɔ wo nyuie eye wote ŋu zãa wo ƒe geɖe. Wogale tuwo abe AK-47 kple M16 ene, si asrafowo zã le Vietnam-ʋa me zãm vaseɖe fifia. Tu aɖewo siwo zãm wole le Afrika egbea li tso keke Xexemeʋa I wɔɣi. Gakpe ɖe eŋu la, tuwo tsɔtsɔ yi teƒe bubuwo kple wo tsɔtsɔ ɣla le bɔbɔe. Agbatsɔsɔ ɖeka ate ŋu atsɔ tu gbogbo aɖewo ayi na asrafoha aɖe si le hehe xɔm le gbedadaƒo alo le to aɖe si sa ɖe aga ŋutɔ dzi. Woate ŋu atsɔ tu siwo ade na asrafo ha sue aɖe ƒe zazã ado agba na sɔwo woatsɔ ayi na wo.

Tuwo, Atikevɔ̃ɖiwo, Kple Kpe Xɔasiwo

Wotoa mɔ vovovowo dzi tsaa tu si le xexeame godoo. Woɖea mɔ le senu wotsɔa tu gbogbo aɖewo tsoa dukɔ aɖe me yia dukɔ bubu me. Le Dukɔwo Dome Nyaʋiʋlia megbe la, woɖe asrafowo dzi kpɔtɔ le Ɣedzeƒe kple Ɣetoɖoƒe siaa, eye dziɖuɖuwo tsɔ aʋawɔnuawo na wo xɔlɔ̃wo kple wo hatiwo alo dzra wo na wo. Ŋutifafa Ŋuti Numekuƒe le Oslo, Norway, ƒe nuŋlɔla aɖe gblɔ be, tso ƒe 1995 me la, United States ɖeɖe ɖe asi le tu, asitui, tu siwo dana trena ɖe enu, kple bɔmb 300,000 ŋu na amewo. Wogblɔ be gagbegblẽ boo aɖeke mele asiɖeɖe le aʋawɔnuwo ŋu na amewo me abe wo  kaka alo wo dzadzraɖo ahanɔ wo ŋu dzɔm ene o. Numekula aɖewo bu akɔnta be anye tu sue kple aʋawɔnu siwo mekpena o siwo ƒe asi ade dɔlar biliɔn etɔ̃ ŋue woɖea mɔ le le senu wotsɔna tsoa dukɔwo dome dewoe ƒe sia ƒe.

Gake esiwo ƒe asi wotsana le vivime anya sɔ gbɔ sã wu ema. Zi geɖe esiwo wodzrana le afisiwo se meɖe mɔ ɖe edzadzra ŋu le o metsina anyi maƒlemaƒle o. Le Afrika-ʋa aɖewo me la, asrafo hehexɔlawo ƒe ƒuƒoƒowo ƒle tu suewo kple aʋawɔnu siwo mekpena o dɔlar miliɔn alafa geɖe sinu, menye kple ga o, ke kple kpe xɔasi siwo woxɔ sesẽe le tomenukuƒewo. The New York Times gblɔ be: “Afisiwo dziɖuɖuwo wɔa nufitifitiwo le la, aglãdzelawo mekpɔa nublanui na amewo o eye wogbãa dewo bɔbɔe . . . Wotoa kpe xɔasiwo dzi naa kluvidɔwɔwɔ, amewuwu, amewo ƒe ŋutinuwo lalã ɖa, aƒemanɔsitɔwo ƒe agbɔsɔsɔ kple gaŋutiɖoɖowo ƒe dzidzedzemakpɔmakpɔ si bɔ ɖe afisiafi la xɔa aƒe ɖi.” Aleke gbegbe wòwɔ mo ya enye si be kpe xɔasi si wotsɔ ɖɔli tuwoe nava zu lɔlɔ̃ mavɔ ƒe dzesidenu xɔasi woava dzra le sikanu dzeaniwo dzraƒe!

Azɔ hã ƒomedodo le aʋawɔnuwo kple atikevɔ̃ɖisitsatsa si mele senu o dome. Menye nu yeye wònye na nuvlowɔhawo be woatsɔ atikevɔ̃ɖiwo agba de aɖatsɔ xɔ tuwoe o. Eyata aʋawɔnuwo va zu ga si woxɔna ɖe atikevɔ̃ɖiwo ta ɣesiaɣi kloe.

Nusi Dzɔna Ðe Tuwo Dzi ne Aʋa Ke

Zi geɖe ne aʋa ke la, tu siwo wozã le wo wɔwɔ me va gena ɖe nuvlowɔlawo si me. Bu nusi dzɔ le anyiehe Afrika dukɔ aɖe si me dunyahehe me ŋutasẽnuwɔnawo trɔ va zu nuvlowɔlawo ƒe ŋutasẽnuwɔnawo ŋu kpɔ. Le ƒe etɔ̃ pɛ ko me la, amesiwo ade 10,000 ye ku le dunyahehe me nuvlowɔwɔ si dzɔ le afima me. Esi aʋa ma ke la, nuvlowɔlawo ƒe ŋutasẽnuwɔnawo de dzi bobobo. Taksikulawo ƒe hoʋiʋli kple wo nɔewo he “taksiʋawɔwɔwo” vɛ, aʋa si me wohaya gbevuviwo le be woada tu mɔzɔla kple ʋukula siwo de aʋaa ƒe akpa kemɛ dzi. Enuenu la, wozãa aʋawɔtu gã siwo wozãna le amedzidzedze me si tɔgbe asrafowo zãna la le adzodada kple nuvlowɔwɔ bubuwo me. Le nyitsɔ laa ƒe aɖe me la, amesiwo wowu kple tuwo ɖo 11,000, si nye amesiwo wowu ƒe agbɔsɔsɔ si kplɔ gbogbotɔ kekeake le xexeame ɖo le dukɔ siwo me womele aʋa wɔm le o me.

Enyanya be nuvlowɔlawo tsɔa tu ɖe ŋui dea vɔvɔ̃ amewo me eye wosena le wo ɖokui me be yewomele dedie o. Le dukɔ madeŋgɔ geɖe me  la, aƒe siwo de sɔsɔ ge kple mɔ sesẽwo kloe me ye kesinɔtɔwo le, gli kple kpɔtɔtɔ siwo me wode elektrikmɔ̃woe, siwo ŋu dzɔlawo dzɔna zã kple keli ye ƒo xlã wo. Dukɔ deŋgɔwo me nɔlawo hã dzea aʋa ɖi. Aleae wòle le teƒe siwo me dukɔmeviʋa medzɔ le kpɔ o gɔ̃ hã me.

Eyata le dukɔ siwo me aʋawɔwɔ le kple dukɔ siwo me “ŋutifafa” le siaa me la, tuwo naa dedienɔnɔ menɔa anyi o. Amegbetɔ aɖeke mate ŋu adzidze nusi gbegbe tuwo gblẽ; alo míate ŋu axlẽ amesiwo ku, amesiwo xɔ abi, amesiwo dzi ku dzɔ ɖo, kple agbe siwo dome gblẽ o. Ke hã míenya be tuwo bɔ ɖe xexeame fũ ale gbegbe eye dzidzim ɖe edzi ko woƒe xexlẽme le. Amewo ƒe gbe le dzi dem bobobo ɣesiaɣi be woawɔ nane tso eŋu. Gake nukae woate ŋu awɔ? Nuka wɔ gee wole? Esiawoe nye biabia siwo me míadzro le nyati si kplɔe ɖo me.

[Aɖaka/Nɔnɔmetata si le axa 15]

Aʋawɔla Xoxo aɖe Se le Eɖokui me be “Yetsi Bome Ŋutɔ”

Ðevi srafo aɖe si wɔ aʋa le aʋa ma si na amesiwo ŋu míeƒo nu tsoe le nyati gbãtɔa me zu sitsoƒedilawo me va zu dɔmanɔsitɔ, si ɖo ko kpata, le du si ŋu wòkpe asi ɖo wowɔ aʋa xɔ me. Eƒo nu vevesesetɔe esi wòkpɔ wo ŋgɔnɔla viŋutsu nɔ dzokeke dzeani xɔasi aɖe dom nɔ tsatsam le dua me kple alesi aʋa-megã tsãtɔwo nɔ mɔ fitifitiwo dzi tom nɔ ŋusẽ xɔm henɔ bubunɔƒewo ʋlim. Aʋawɔla la gblɔ be: “Ne mebu ƒe atɔ̃ si metsɔ nɔ gbemee, nɔ amewo wum eye tukpewo nɔ lɔ nyem ŋu la, mesena le ɖokuinye me be metsi bome ŋutɔ. Míetsɔ míaƒe agbe nɔ anyi ɖom na amesiwo maɖo ŋku alesi wowɔ va ɖo afisi wole dzi le etsɔme o.”

[Afi Si Míexɔ Mɔɖeɖe Tso]

Ðevi srafo: Nanzer/Sipa Press

[Aɖaka/Nɔnɔmetata si le axa 16]

“Bebeƒe Aɖeke Meli O”

Togbɔ be egbegbeʋawɔtu gã siwo wozãna le amedzidzedze me ƒe nugblẽƒe mekɔna o hã la, seɖoƒe li na eƒe nugbegblẽ. Tukpewo dzaa koe wòdana. Mate ŋu awu amesiwo be ɖe gli alo akpoxɔnu sesẽwo megbe o. Ne vɔvɔ̃ ɖo asrafo le aʋawɔwɔ me la, ate ŋu adzɔ be eƒe asi madzɔ ɖe nusi dzi wòɖo tuae dzi o. Ne woku asi eme le nɔnɔme deamedziwo me gɔ̃ hã la, meta 460 koe tukpea ate ŋu aɖo.

United States srafowo kpɔ “kuxi” sia gbɔkpɔnu—si nye aʋawɔtu gã deŋgɔ yeye sẽŋu aɖe si te ŋu wɔa nu vovovo, si wotsɔ ŋkɔ na be Ameɖekaʋawɔtu si Kpea Mɔxenuwo Dzi. Ameɖekaʋawɔtu Deŋgɔa le hodzoe ale gbegbe be asrafo ɖeka ate ŋu alée ɖe asi, eye menye tukpewo koe wòate ŋu ada o, ke ate ŋu ada bɔmb siwo ƒe didime nye milimeta 20. Nu tɔxɛ bubu si wòagate ŋu awɔ: Ate ŋu awu futɔ siwo be ɖe akpoxɔnuwo godo. Nusi asrafoa awɔ koe nye be wòatsɔ tua aɖo nusi wòdi be yeada ƒe tame alo eƒe axadzi tututu. Tua ŋutɔ dzidzea didime si le eya kple nusi dzi wotsɔe ɖoe la dome eye wòsina elektrikmɔ̃ sue aɖe si le bɔmb la ŋu ale be wòayi ava wó le afisi tututu woɖoe ɖo, ahawu bɔmb si gbãna akpoxɔnu ɖesiaɖe ɖe nua dzi. Adzɔha si le aʋawɔtua wɔm teƒenɔla gblɔ be: “Ŋutete tɔxɛ si le eŋu akpe ɖe United States aʋawɔsrafowo ŋu be woada tu ɖe ɣaɣlaƒe ɖesiaɖe kloe.” Nudimɔ̃ aɖe si le aʋawɔtua ŋu ana wòate ŋu awɔ dɔ nyuie le viviti me gɔ̃ hã.

Tua wɔlawo ƒo adegbe be “bebeƒe aɖeke meli” le tu sia nu “o,” wogblɔ hã be tua awu ame agbɔsɔsɔ si M16 kple M203 bɔmb awu ƒe teƒe atɔ̃ eye wòade didiƒe zi gbɔ zi eve. Mele be asrafo siwo le ezãm la natsi dzi be yewoaɖoe nua dzi pɛpɛpɛ hafi adae o; teƒekpɔmɔ̃a me koe wòle be woakpɔ ahate asi ɖe edaƒea dzi be tukpewo kple bɔmbwo nada. Ne nuwo ayi edzi abe alesi woɖoe ene la, ke asrafoha gbãtɔ axɔ Ameɖekaʋawɔtu Deŋgɔa le ƒe 2007 me.

Gake nya si biam ɖikelawo le enye: Ne asrafowo le nuto siwo me amewo sɔ gbɔ ɖo fũ me tsam la, mɔ ka nue woazã tua le esi wònye futɔwo ate ŋu anɔ dukɔmevi dzrowo dome? Nukae adzɔ ne wodzra Ameɖekaʋawɔtu Deŋgɔa na asrafowo le xexeame godoo amesiwo ate ŋu atsɔ tuawo ɖe woa ŋutɔwo ŋu mewo ŋu? Eye nukae adzɔ ne tua ge ɖe ŋɔdzidonamelawo kple nuvlowɔlawo si me?

[Afi Si Míexɔ Mɔɖeɖe Tso]

Alliant Techsystems

[Nɔnɔmetata siwo le axa 14]

Wotsɔa tu suewo kple aʋawɔtu siwo mekpena o ɖɔlia kpe xɔasiwo kple atikevɔ̃ɖiwo zi geɖe