Dzo kpo yi emenuwo dzi

Dzo kpo yi emenuawo dzi

“Dugã Siwo Le Kekem Ðe Enu”

“Dugã Siwo Le Kekem Ðe Enu”

 “Dugã Siwo Le Kekem Ðe Enu”

“Ʋuʋua dzi ko ameƒomea le wu tsã, eye amesiwo dzona le wo de be yewoaɖa di agbe si nyo wu anɔ la dometɔ geɖe ɖoa ta dugã me.”

ALEAE agbalẽ si nye Foreign Affairs me nyati si ƒe tanyae nye “Dukɔ Madeŋgɔwo ƒe Dugã Siwo Le Kekem Ðe Enu” ƒe ŋgɔdonya gblɔ. Nyati ma gblɔ be “nuwo ƒe anidzedze, alo dunyahehe kple ganya ƒe tɔtɔ, amewo ƒe agbɔsɔsɔ, kple nutome ƒe amedzimademade ye na” ame geɖe ʋuna.

Aleke tututue dugãwo le kekemee? Ame aɖewo bu akɔnta be ame gbogbo aɖewo siwo wu miliɔn ɖeka ye ʋuna yia dugãwo me kwasiɖa sia kwasiɖa! Le dukɔ madeŋgɔwo me la, dugã 200 kple edzivɔ me nɔlawo wu miliɔn ɖeka fifia. Wo dometɔ 20 aɖewo me nɔlawo ɖo miliɔn ewo! Eye dzesi aɖeke meli be edzi ava ɖe akpɔtɔ o. Le kpɔɖeŋu me, bu Nigeria-dugã, Lagos, ŋu kpɔ. Ŋkuléle Ðe Xexeame Ŋu Habɔbɔ ƒe nyatakaka aɖe gblɔ be “kaka ƒe 2015 naɖo la, amesiwo ade miliɔn 25 ye anɔ Lagos, si ana wòatso xexeame dugã wuietɔ̃lia nɔƒe ava xɔ nɔƒe etɔ̃lia.”

Agbalẽnyala aɖewo bui be esia made ame dzi le etsɔme o. Federico Mayor, amesi nye Dukɔ Ƒoƒuawo ƒe Agbalẽsɔsrɔ̃, Dzɔdzɔmeŋutinunya, Kple Dekɔnu Nyawo Gbɔkpɔha ƒe dɔdzikpɔlagã tsã, xlɔ̃ nu be kaka ƒe 2035 naɖo la, “ame miliɔn akpe etɔ̃ ye ava kpe ɖe amesiwo le dugã siwo li egbea me ŋu.” Be míate ŋu akpɔ amewo ƒe agbɔsɔsɔ gbogbo sia gbɔ la, “ahiã be míatso dugã akpe ɖeka ne ame miliɔn etɔ̃ nanɔ eme le ƒe blaene siwo gbɔna me, si fia be míatso blave vɔ atɔ̃ le ƒe ɖeka me.”

Agbalẽnyalawo hã gblɔ be dugãmenɔlawo ƒe agbɔsɔsɔ si le dzidzim ɖe edzi kabakaba le nu gblẽm le dugãwo ŋu le xexeame katã. Eye dukɔ deŋgɔ siwo dzi nu de ƒe dugãwo hã kpe ɖe eŋu. Kuxi kawo koŋue le fu ɖem na dugãwo, eye ŋusẽ kae esia ate ŋu akpɔ ɖe dziwò? Ðe wo gbɔ kpɔnu aɖewo lia? Nyati siwo kplɔe ɖo dzro nya vevi siawo me.