Dzo kpo yi emenuwo dzi

Dzo kpo yi emenuawo dzi

Anyigba Mawɔnu Tɔtrɔ Wòazu Anyigba Wɔnu

Anyigba Mawɔnu Tɔtrɔ Wòazu Anyigba Wɔnu

 Anyigba Mawɔnu Tɔtrɔ Wòazu Anyigba Wɔnu

ETSO NYƆ! ŊLƆLA SI LE INDIA GBƆ

Aleke woawɔ Ladakh-nyigba mawɔnu si le India ƒe dziehe nutome wòazu anyigba wɔnu? Nyabiabia ma ɖu ta na Tsewang Norphel si nye mɔdodoɖaŋunyala aɖe si xɔ dzudzɔ. June mee tsi siwo tsana tsoa Himalaya-towo tame sno siwo zu tsikpe gãwo me la dzea egɔme le, ke menye April me si tsi medzana nyuie o eye agbledelawo nɔa tsi dim be yewoade yewoƒe agblemenuwo la o. Norphel do susu nyui aɖe ɖa: Be woawɔe tsikpeawo naɖiɖi va agame, afisi woate ŋu atrɔ zu tsi le le ɣleti siwo ado ŋgɔ me le ƒea me.

Indiatɔwo ƒe magazine The Week gblɔ be Norphel kple eƒe amewo ɖe tsimɔ gã si didi meta 200 eye wotrɔ mɔ na toa dzi tɔsisi aɖe wòto eme; woɖe tsimɔ suesue 70 bubuwo ɖe tsimɔ gã la ŋu. Tsimɔ siawo me tsi anɔ tsatsam vivivi eye womagaɖi abu sesĩe tso toawo dzi o, si ana woazu tsikpe hafi ava aɖo kpe siwo woɖo wòzu glikpɔ si le toa ƒe agunu gbɔ. Ʋɛʋɛʋɛ la, tsikpeawo va lia kɔ ɖe glikpɔa ŋu eye wotsyɔa edzi mlɔeba. Esi tsikpea le afisi toa ɖoa vɔvɔli ɖo ta la, le April me, esime dzoxɔxɔ nu sẽna koe tsikpea zua tsi ale be wònaa tsi agbledela siwo hiã nɛ vevie.

Ðe ame ŋutɔ ƒe tsikpewɔwɔ ƒe susu si wodo ɖa la dze edzia? Le nyateƒe me, susu si Norphel do ɖa la sɔ ale gbegbe be wowɔ tsikpexaɖoƒe mawo tɔgbe ewo xoxo ɖe Ladakh, eye wogale ɖoɖo wɔm ɖe bubuwo ŋu. Wote ŋu kpɔa tsi si ade lita miliɔn 34 le tsikpexaɖoƒe siawo dometɔ ɖeka si wotu ɖe toa ƒe afisi ƒe kɔkɔmee nye meta 1,372 la me. Ho nenie wogblẽna ɖe eŋu? The Week la gblɔ be: “Tsikpexaɖoƒe tutu xɔna abe ɣleti eve ene eye wozãa ga Rs 80,000 [$1,860], si ƒe akpa gãtɔ nyea ga si woxena na dɔa wɔlawo la ɖe eŋu.”

Ðikekemanɔmee la, ete ŋu ɖea vi geɖe ne wozã amegbetɔ ƒe sidzedze ɖe dɔ nyuiwo wɔwɔ ŋu. Bu nusiwo ameƒomea ate ŋu awɔ le Mawu ƒe Dziƒofiaɖuƒea ƒe mɔfiafia te ŋu kpɔ ko. Biblia do ŋugbe be: “Gbegbe kple gbedadaƒo akpɔ dzidzɔ, tagba atso aseye, eye wòaƒo se abe dzogbenya ene. . . . Tɔ ŋɔ tso gbegbe, eye tɔʋu tso tagba.” (Yesaya 35:1, 6) Dzidzɔ kae nye si wòanye be nàkpɔ gome le atsyɔ̃ɖoɖo na anyigba la ƒe dɔ sia me!

[Picture Credit Lines on page 31]

Mountain High Maps® Copyright © 1997 Digital Wisdom, Inc.

Arvind Jain, The Week Magazine