Dzo kpo yi emenuwo dzi

Dzo kpo yi emenuawo dzi

Ŋutifafa Kafukafu Ðe Aʋawɔwɔ Teƒe

Ŋutifafa Kafukafu Ðe Aʋawɔwɔ Teƒe

 Ŋutifafa Kafukafu Ðe Aʋawɔwɔ Teƒe

ABE ALESI DOROTHY HORLE GBLƆE ENE

Wodzim ɖe Italy Katolikotɔwo ƒe ƒome aɖe me le ƒe 1919 me le Wilmington, Delaware, U.S.A. Dzinyelawo medea sɔleme gbeɖe o, gake wonaa mía kple nɔvinyenyɔnu eveawo dena. Gbedoxɔ gãawo kple atsyã si wotsɔ tu woe, woƒe kpememewo, kple atsyɔ̃ɖoɖo wɔ dɔ ɖe dzinye ŋutɔ.

ESI ƒeawo va nɔ yiyim la, nyemegava doa vivi ɖe Katolikotɔnyenye ŋu o. Sɔlemeha la meƒoa nu tso Biblia ŋu o, evɔ fofonye ya dea bubu eŋu hexlẽnɛ edziedzi. Alesi sɔlemeha la ƒe nyadzɔdzɔgbalẽwo yɔa nunalawo ƒe ŋkɔ kple ga home si amewo na la medze ŋunye kura o. Amewo hã nɔ nu ƒom tso nunɔlawo ƒe nu madzegadziwo wɔwɔ ŋu. Kaka maxɔ ƒe 15 la, nyemeganɔ Katoliko-ha la me o. Esia na mekpɔ ɣeɣiɣi geɖe tsɔ xɔ hehe le nutata me.

Metsɔ Nutata Wɔ Agbemedɔe

Le ƒe 1940 me, esime mexɔ ƒe 21 la, William Horle si nye ɖekakpui si lɔ̃a nusianu si ku ɖe asrafonya ŋu—yameʋuwo, asrafowo, tuwo, meliwo—tata la ɖem mezu srɔ̃a. Bill kpɔ dzidzɔ be menye nutala, eye eƒle aŋɔ hamehame si nutalawo zãna nam zi gbãtɔ. Medze egɔme nɔ nutala bibiwo ƒe aɖaŋuwo srɔ̃m.

Le míaƒe srɔ̃ɖeɖe ƒe eve megbe la, Bill zãa tsumikpe wɔa asrafonu suesuewo tsɔ ɖea modzakae. Asrafowo ƒe kpememe si nye fefenuwoe wòwɔnaa? Kura o! Edina be yeawɔ nu wòanye nutata akuaku. Nutala bubuwo zã aŋe, ati, alo nusiwo wofana ɖe nuwo ŋu, gake tsumikpe hã sɔ nyuie le esi Bill xɔ hehe le mɔ̃zazã me ta.

Ewɔa nane ƒe nɔnɔme kple nusi me wòakɔe ɖo, eye wòlóloa tsumikpe tsɔ kɔna ɖe eme. Le ɣeyiɣi aɖe megbe la, eva bi ɖe nusi me wòakɔ nuawo ɖo kpekpe, tsumikpe tsɔtsɔ tre nui, nusi wòkɔ la ŋu lili, kple eŋu zɔzrɔ̃ me. Emegbe eɖe asi le pauɖa aɖe si wozãna tsɔ mea nui ŋu va nɔ nusi wotsɔ kpaa aɖui zãm. Esia na wòte ŋu wɔa nuwo wònya kpɔna wu.

Ne eme nu ɖesiaɖe vɔ la, nye dɔ wònye be mawu eŋu dɔ mamlɛawo nu. Míewɔ numekuku geɖe heke ɖe asrafowu xoxowo ŋuti nuŋɔŋlɔwo ŋu—míeke ɖe woƒe awunugbuiwo, ka gbigbiwo, ɖoƒedzesiwo, kple amadedewo gɔ̃ hã ŋu.

Mezãa nusuekpɔmɔ̃ tsɔ sia ami kple aŋɔ siwo ŋu wotrɔ asi le be woalé ɖe ga ŋuti la ɖe numemeawo ŋu. Esia na míaƒe numemeawo dzena nu ŋutɔŋutɔe. Míeme nɔnɔme geɖe le míaƒe xɔtexɔ sue si le Philadelphia, Pennsylvania, la me, eye nuawo ƒe ɖewoe nye Amerika India tɔwo, Dukɔmeviʋa la ƒe asrafowo, United States Ƒudziʋawɔmeliwo, Napoleon ƒe sɔwo kple wo dolawo, blema Egipte-srafomegãwo, Algeria-srafohehexɔlawo kple bubuawo!

Emegbe Bill xɔ du tso United States Ƒudzisrafoha gbɔ be wòawɔ ƒudzisrafo sɔdola gbãtɔ  siwo wodɔ ɖe dɔgbe le Peking (si nye Beijing fifia) si le China, do ŋgɔ na ƒe 1939 la ƒe nɔnɔme. Míelé fɔ ɖe dɔ sia ŋu wɔ, eye le ƒe 1954 me la, míetsɔe yi Smithson Nusrɔ̃ƒe si le Washington, D.C. Ƒe aɖewo megbe la, Dukplɔla Lyndon Johnson bia nenye be woate ŋu atsɔ numeme la ayi United States Dukplɔalanɔƒea. Míelɔ̃ wotsɔe yii.

Míedzraa míaƒe numemewo gbeɖe o, gake Bill tsɔ alafa geɖe na amewo. Woƒo nu tsɔ kafu mí le asrafowo ƒe nɔnɔmetatagbalẽ geɖe me. Woɖe míaƒe dɔ fia le Xexeame Katã ƒe Adzɔnuɖefiaƒe le Flushing Meadow si le Queens-nutome, New York, le ƒe 1965 me. Blemanudzraɖoƒewo biana be míana míaƒe nɔnɔmewɔwɔwo yewo. Bruce Catton si nye United States Dukɔmeviʋa Ŋutinyaŋlɔla la ta míaƒe nɔnɔmetatawo kple numemewo ɖe eƒe agbalẽwo me.

Meva Nɔ Nya Geɖe Biam le Agbe Ŋu

Gake kaka maxɔ ƒe 40 la, nuwo va nɔ tɔtrɔm. Meva nɔ Mawu ŋu bum. Le Kristmas-ŋkeke aɖe dzi la, dzo fia ɖevi atɔ̃ siwo nye Katolikotɔwo woku le aƒe aɖe me esime wo dzilawo nɔ sɔleme. Mebia ɖokuinye be, ‘Nukata Mawu aɖe mɔ nusia tɔgbe nadzɔ le eƒe dzigbe?’ Mekpɔ agbalẽ aɖe si ƒo nu tso ŋutasẽnu siwo wowɔ le Yudatɔwo ƒe Tsɔtsrɔ̃ Gã la me ŋu. Nusiawo kple xexemenudzɔdzɔ dziŋɔ bubuwo na mebia be, ‘Afikae Mawu le? Mawu mele nusi wòle be wòawɔ la wɔm o!’

Le nusi mesrɔ̃ tso kpɔɖeŋu si fofonye ɖo me le nye ɖevime ta la, mebui be nya siawo ƒe ŋuɖoɖo anɔ Biblia me. Eyata meyi Katoliko nunɔlanɔƒe aɖe si gogo míaƒe aƒeme le Philadelphia eye mewɔ ɖoɖo be nunɔlaa nadzro Biblia me kplim. Melala ʋuu, gake medo va o. Mede nunɔlanɔƒea kwasiɖa ɖesiaɖe hena kwasiɖa ene gake nyemewɔ numedzodzro kple nunɔla la zi ɖeka pɛ gɔ̃ hã o.

Fiẽ aɖe me, esi metsi dzodzodzoe helé blanui la, mefɔ mo dzi hedo gbe ɖa be: “Nyemenya amesi nènye ya o. Nyemenya sɔlemeha ka me hãe nèle o, gake menya be èli. Taflatse na manya wò!” Ɣeyiɣi kpui aɖe megbe la, Yehowa Ðasefowo va nye agbo nu.

Ɣeaɖewoɣi mekpɔa Ðasefowo wotɔa woƒe ʋuwo ɖi, woɖina le ʋua me, eye woyia ʋɔtru vovovowo nu. Togbɔ be nyemenya naneke tso woa ŋutɔwo loo alo nusita woyia amewo gbɔ ŋu o hã, mebua dɔ si wowɔna ŋu.

Esime Ðasefowo va gbɔnye gbemagbe le ƒe 1961 me la, melé blanui elabena nyemenɔ ta kpɔm na nye Mawu didi la o. Esi menɔ nye aƒea ƒe agbo gã ŋu tutum la, nyɔnu aɖe si wɔ ame tsitsi vie si ŋkɔe nye Marge Brion lia atrakpuia le xɔxɔnua hedo gbe nam. Nyemetrɔ kpɔe gbã o. Gake esi wòƒo nu tso alesi woatrɔ anyigba wòazu paradiso dzeani aɖe ŋui la, melé to ɖe nya sia nya si wògblɔ ŋu. Mlɔeba ebiam be, “Èle nya la sema?”

Megbugbɔ nya sia nya si wògblɔ la gblɔ, tsɔ kpe ɖe mawunyakpukpui si me nyawo wòyɔ, si  nye Yesaya 55:11 ŋu. Azɔ metrɔ ɖe eŋu, melé eƒe alɔnu, eye megblɔ be, “Na míayi xɔ me!” Etsɔ Biblia gbãtɔ si su asinye kpɔ kple nusrɔ̃gbalẽ si nye Tso Paradiso si Bu me Yi Paradiso si Wogakpɔ Me la nam. Egblɔ nam hã be yeava míanɔ Biblia me dzrom edziedzi—si nye nusɔsrɔ̃ si tɔgbe tututu mekpɔ mɔ be Katoliko-ha la awɔ kplim.

Míaƒe nusɔsrɔ̃ zi eve kwasiɖa ɖeka wɔe be mewɔ ŋgɔyiyi kabakaba le nye Biblia sɔsrɔ̃ me. Le ɣeyiɣi kpui aɖe megbe la, edze ƒã be mekpɔ nyateƒea. Mawu ƒe ŋkɔ, Yehowa, nyanya wɔ dɔ ɖe dzinye vevie. (Psalmo 83:19) Kpɔe ɖa le susu me—Mawu siae medi be manya tso ɖevime ke! Meva srɔ̃e hã be Via, Yesu Kristo, menye mawuɖekaetɔ̃ ɣaɣla aɖeke ƒe akpa aɖe o. (Yohanes 14:28) Eteƒe medidi o, meva nɔ Kristotɔwo ƒe kpekpe siwo Yehowa Ðasefowo wɔna dem eye edzrom be mava zu amesi ɖea gbeƒã Biblia me gbedasia ɣeyiɣiawo katã.

Tiatia Vevi Aɖewo Wɔwɔ

Azɔ medze ŋgɔ dodokpɔ gãtɔ kekeake. Ðe maɖe asi le nutaƒe si William kple Dorothy Horle ɖo la ŋua? Aleke mawɔ asubɔ ŋutifafa Mawu la kple Via, Ŋutifafafia la, esime megale aʋawɔwɔ kafum le nutata me? (Yesaya 9:5) Ðe Yehowa medo ŋugbe be ‘yeatsi aʋawɔwɔwo nu vaseɖe anyigba ƒe mlɔenu ke oa”? (Psalmo 46:10) Eyata nukata maganɔ nusi Mawu ahe va nuwuwui la wɔm? Eye ɖe Yesaya megblɔe ɖi be Mawu ƒe amewo ‘atsɔ woƒe yiwo atu kodziwoe’ eye womagasrɔ̃ aʋawɔwɔ azɔ oa? (Yesaya 2:4) Mebu tame hedo gbe ɖa vevie ɣeyiɣi didi aɖe. Metso nya me azɔ be: “Nyemagate ŋu ata wo azɔ o!” Le April 25, 1964, dzi la, metsɔ nyɔnyrɔxɔxɔ ɖe tsi me wɔ nye adzɔgbeɖeɖe na Yehowa Mawu ƒe kpɔɖeŋui.

Bill gblɔnɛ zi geɖe be evena ye ŋutɔ be ku ava klã mía dome gbeɖeka. Esi medze Biblia sɔsrɔ̃ gɔme la, megblɔna nɛ be: “Bill, míate ŋu anɔ agbe tegbee le Mawu ƒe xexe yeyea me!” (Yesaya 25:8; Nyaɖeɖefia 21:4, 5) Ebu be tsu kumee menɔ. Esi megblɔ nusita nyemate ŋu atsɔ dzitsinya nyui ata asrafowo ŋuti numemewo o nɛ la, edo dziku eye wòdo ŋɔdzi nam be yeadzo le gbɔnye. Edzo emegbe.

Bill wɔ asrafowo ŋuti numemewo ƒe geɖe. Gake meʋu yi didiƒe o, eye ekpɔa mía kple mía viŋutsu, Craig, si míedzi le ƒe 1942 me la dzi ɣesiaɣi. Le ƒe 1988 me la, Bill gatrɔ va gbɔnye, eye míenɔ anyi ɖekae ƒe ewo vaseɖe esime wòku.

Do ŋgɔ na esia la, mete ŋu ɖo nye taɖodzinu si nye be mazu mɔɖela la gbɔ le ƒe 1966 me. Nyemedzudzɔ ewɔwɔ kpɔ tso ɣemaɣi o. Mɔnukpɔkpɔ su asinye mesrɔ̃ Biblia kple nɔvinyenyɔnu tsitsitɔ. Exɔ nufiafiaawo dzi se, eye ekpɔtɔ nye Ðasefo si me dzo le vaseɖe egbe. Fofonye ɖo to se Biblia ƒe gbedasia eye kaka kwasiɖa eve nava yi la, edze kpekpewo dede gɔme le Fiaɖuƒe Akpataa me. Exɔ nyɔnyrɔ esime wòxɔ ƒe 75 eye eyi edzi wɔ nuteƒe na Mawu vaseɖe esime wòku le ƒe 81 xɔxɔ me. Danye hã xɔ Yehowa dzi se be enye yeƒe Mawu, togbɔ be mete ŋu ɖe adzɔgbe hafi ku o hã. Esusɔ vie wòaxɔ ƒe 94.

Le ƒeawo me la, Yehowa, ŋutifafa ƒe Mawu la, yram geɖe. Fifia si mexɔ ƒe 81 la, mekpɔtɔ nye mɔɖela, togbɔ be azɔli meganya zɔna nam o hã. Mesena le ɖokuinye me abe apostolo Paulo ene, amesi ŋlɔ bena: “Meda akpe na amesi do ŋusẽm, si nye Kristo Yesu, mía Aƒetɔ la be, wòbum nyateƒetɔ, eye wòtsɔm ɖo subɔsubɔ la nu.” (Timoteo I, 1:12) Subɔsubɔdɔ nyui ka gbegbee nye si wònye! Ame geɖe siwo mesrɔ̃ Biblia kpli la ŋutɔwo tsɔ nuwo sa vɔe be woate ŋu asubɔ míaƒe Mawu nublanuikpɔla la.

Eveam ŋutɔ be ƒonyemetɔwo katã mexɔ Biblia me nyateƒea o. Ðewohĩ wo dometɔ bubuwo ava xɔe emegbe. Gake le gonyeme la, nya siwo Yesu gblɔ be yeƒe nusrɔ̃lawo ‘axɔ teƒeɖoɖo alafa le ɣeyiɣi sia me, xɔwo kple nɔviŋutsuwo kple nɔvinyɔnuwo kple dadawo kple viwo’ la va eme nam. (Marko 10:30) Yehowa wɔm kesinɔtɔe vavã. Bubu kple dzidzɔ kae nye si wònye be matsɔ ŋkɔxɔxɔ kple aʋawɔwɔ aɖɔ li Mawu kple ŋutifafae!

[Nɔnɔmetata si le axa 22]

Mía kple Aʋafia L. C. Shepherd, Jr., le ƒe 1954 me

[Afi Si Míexɔ Mɔɖeɖe Tso]

Defense Dept. photo (Marine Corps)

[Nɔnɔmetata si le axa 23]

(Eƒe lolome ŋutɔŋutɔe nye sia)

[Nɔnɔmetata si le axa 24]

Fifia si mexɔ ƒe 81 la, ƒe 30 kple edzivɔe nye sia si mele mɔɖeɖedɔa wɔm